ຜສ຺ສປຈ຺ຈຍວາຣວຓ຺ຓນາ

໑໑໘. ປຣມ຺ປຣປຈ຺ຈຍທສ຺ສນຕ຺ຖນ຺ຕິ ຍໍ ທິຏ຺ຐິຍາ ມູລກາຣຓໍ, ຕສ຺ສາປິ ກາຣຓໍ, ປຸນ ຕສ຺ສປິ ກາຣຓນ຺ຕິ ເອວໍ ປຈ຺ຈຍປຣມ຺ປຣທສ຺ສນຕ຺ຖໍ. ເຍນ ຫິ ຕຓ຺ຫາປຣິຕສ຺ສິເຕນ ເອຕານິ ທິຏ຺ຐິຄຕານິ ປວຕ຺ຕນ຺ຕິ, ຕສ຺ສ ເວທຍິຕໍ ປຈ຺ຈໂຍ, ເວທຍິຕສ຺ສາປິ ຜສ຺ໂສ ປຈ຺ຈໂຍຕິ ເອວໍ ປຈ຺ຈຍປຣມ຺ປຣວິຠາວິນີ ອຍໍ ເທສນາ. ກິມຕ຺ຖິຍໍ ປນ ປຈ຺ຈຍປຣມ຺ປຣທສ຺ສນນ຺ຕິ ເຈ? ອຕ຺ຖນ຺ຕຣວິຎ຺ຎາປນຕ຺ຖໍ. ເຕນ ຫິ ຍຖາ ທິຏ຺ຐິສງ຺ຂາໂຕ ປຎ຺ຎາປນຘມ຺ໂມ, ຕປ຺ປຈ຺ຈຍຘມ຺ມາ ຈ ຍຖາສກໍ ປຈ຺ຈຍວເສເນວ ອຸປ຺ປຊ຺ຊນ຺ຕິ, ນ ປຈ຺ຈເຍຫິ ວິນາ, ເອວໍ ປຎ຺ຎເປຕພ຺ພຘມ຺ມາປິ ຣູປເວທນາທໂຍ, ນ ເອຕ຺ຖ ໂກຈິ ສສ຺ສໂຕ ອຕ຺ຕາ ວາ ໂລໂກ ວາຕິ ເອວມຕ຺ຖນ຺ຕຣໍ ວິຎ຺ຎາປິຕໍ ໂຫຕິ. ຕຓ຺ຫາທິຏ຺ຐິປຣິຜນ຺ທິຕໍ ຕທປິ ເວທຍິຕໍ ທິຏ຺ຐິກາຣຓຠູຕາຍ ຕຓ຺ຫາຍ ປຈ຺ຈຍຠູຕໍ ຜສ຺ສປຈ຺ຈຍາ ໂຫຕີຕິ ອຕ຺ໂຖ.

໑໓໑. ຕສ຺ສ ປຈ຺ຈຍສ຺ສາຕິ ຕສ຺ສ ຜສ຺ສສງ຺ຂາຕສ຺ສ ປຈ຺ຈຍສ຺ສ. ທິຏ຺ຐິເວທຍິເຕ ທິຏ຺ຐິຍາ ປຈ຺ຈຍຠູເຕ ເວທຍິເຕ, ຜສ຺ສປຘາເນຫິ ອຕ຺ຕໂນ ປຈ຺ຈເຍຫິ ນິປ຺ຜາເທຕພ຺ເພ. ສາເຘຕພ຺ເພ ເຈຕໍ ຠຸມ຺ມໍ. ພລວຠາວທສ຺ສນຕ຺ຖນ຺ຕິ ພລວກາຣຓຠາວທສ຺ສນຕ຺ຖໍ. ຕຖາ ຫິ ວິນາປິ ຈກ຺ຂາທິວຕ຺ຖູຫິ, ສມ຺ປຍຸຕ຺ຕຘມ຺ເມຫິ ຈ ເກຫິຈິ ເວທນາ ອຸປ຺ປຊ຺ຊຕິ, ນ ປນ ກທາຈິປິ ຜສ຺ເສນ ວິນາ, ຕສ຺ມາ ຜສ຺ໂສ ເວທນາຍ ພລວກາຣຓໍ. ນ ເກວລໍ ເວທນາຍ ເອວ, ອຖ ໂຂ ເສສສມ຺ປຍຸຕ຺ຕຘມ຺ມານມ຺ປິ. ສນ຺ນິຫິໂຕປິ ຫິ ວິສໂຍ ສເຈ ຈິຕ຺ຕຸປ຺ປາໂທ ຜຸສນາກາຣວິຣຫິໂຕ ໂຫຕິ, ນ ຕສ຺ສ ອາຣມ຺ມຓປຈ຺ຈໂຍ ຠວຕີຕິ ຜສ຺ໂສ ສພ຺ເພສມ຺ປິ ສມ຺ປຍຸຕ຺ຕຘມ຺ມານໍ ວິເສສປຈ຺ຈໂຍ. ຕຖາ ຫິ ຠຄວຕາ ຘມ຺ມສງ຺ຄຓີປກຣເຓ ຈິຕ຺ຕຸປ຺ປາທໍ ວິຠຊນ຺ເຕນ ‘‘ຜສ຺ໂສ ໂຫຕີ’’ຕິ ຜສ຺ສສ຺ເສວ ປຐມມຸທ຺ຘຣຓໍ ກຕໍ, ເວທນາຍ ປນ ສາຕິສຍມຘິຏ຺ຐານປຈ຺ຈໂຍ ເອວ. ‘‘ປຏິສໍເວທິສ຺ສນ຺ຕີ’’ຕິ ວຸຕ຺ຕຕ຺ຕາ ‘‘ຕທປີ’’ຕິ ເອຕ຺ຖາຘິກາໂຣຕິ ອາຫ ‘‘ຕໍ ເວທຍິຕ’’ນ຺ຕິ. ຄມ຺ຍມານຕ຺ຖສ຺ສ ວາ-ສທ຺ທສ຺ສ ປໂຍຄໍ ປຕິ ກາມຈາຣຕ຺ຕາ, ໂລປຕ຺ຕາ, ເສສຕ຺ຕາປິ ຈ ເອສ ນ ປຍຸຕ຺ໂຕ. ເອວມີທິເສສຸ. ໂຫຕິ ເຈຕ຺ຖ –

‘‘ຄມ຺ຍມານາຘິກາຣໂຕ, ໂລປໂຕ ເສສໂຕ ຈາຕິ;

ກາຣເຓຫິ ຈຕູຫິປິ, ນ ກຕ຺ຖຈິ ຣໂວ ຍຸຕ຺ໂຕ’’ຕິ.

‘‘ຍຖາ ຫີ’’ຕິອາທິນາ ຜສ຺ສສ຺ສ ພລວກາຣຓຕາທສ຺ສເນນ ຕທຕ຺ຖໍ ສມຕ຺ເຖຕິ. ຕຕ຺ຖ ປຕໂຕຕິ ປຕນ຺ຕສ຺ສ. ຖູຓາຕິ ອຸປຕ຺ຖມ຺ຠກທາຣຸສ຺ເສຕໍ ອຘິວຈນໍ.