໕. ສໍສຏ຺ຐວາຣວຓ຺ຓນາ

໓໕໑-໓໖໘. ສາຕິ ສວຕ຺ຖຸກາ ປຏິສນ຺ຘິ. ອິຘາປີຕິ ອິມສ຺ມິໍ ສໍສຏ຺ຐວາເຣປິ. ອຘິປຕິປຸເຣຊາຕາເສວເນສຸ ອນຸໂລມໂຕ ນກມ຺ມນວິປາກນຌານນວິປ຺ປຍຸຕ຺ເຕສຸ ປຈ຺ຈນີຍໂຕ ຐິເຕສຸ ນ ລພ຺ຠຕິ, ອຎ຺ເຎສຸ ສຫຊາຕາທີສຸ ອນຸໂລມໂຕ ເຫຕຸອາທີສຸ ປຈ຺ຈນີຍໂຕ ຈ ອນຸໂລມໂຕ ຈ ຐິເຕສຸ ລພ຺ຠຕີຕິ. ເຕນາຫ ‘‘ລພ຺ຠມານປຈ຺ຈເຍສູ’’ຕິ. ອິມສ຺ສ ວິເສສສ຺ສາຕິ ອິມສ຺ສ ຍຖາວຸຕ຺ຕສ຺ສ ວິເສສສ຺ສ ທສ຺ສນຕ຺ຖໍ ອຸທ຺ຘຏາ, ຕສ຺ມາ ຕາທິສສ຺ສ ວິເສສສ຺ສ ທສ຺ເສຕພ຺ພສ຺ສ ອຠາວໂຕ ວຕ຺ຖຸວິຣຫິຕາ ປຏິສນ຺ຘິ ອນຸທ຺ຘຏາ, ນ ວິປ຺ປຍຸຕ຺ເຕ ປຈ຺ຈນີຍໂຕ ຐິເຕ ອຠາວໂຕຕິ ອຕ຺ໂຖ. ເຫຕຸປຈ຺ຈຍວິຣຫິຕມຕ຺ຕທສ຺ສນຕ຺ຖນ຺ຕິ ອິມິນາ ຠູຕກຖນໍ ອເຫຕຸກຄ຺ຄຫຓໍ ນ ພ຺ຍຠິຈາຣນິວຕ຺ຕນນ຺ຕິ ທສ຺ເສຕິ. ‘‘ອເຫຕຸກວິປາກກິຣິຍວເສນາ’’ຕິ ຠວິຕພ຺ພໍ ເຫຕຸປຣິຍນ຺ຕຕ຺ຕາ ມຄ຺ຄສ຺ສ.

໓໖໙-໓໙໑. ‘‘ເຫຕຸມ຺ຫິ ອນຸໂລມໂຕ ຐິເຕ ຌານມຄ຺ຄາ ປຈ຺ຈນີຍໂຕ ນ ລພ຺ຠນ຺ຕີ’’ຕິອາທິ ຍໍ ອິຘ ອຏ຺ຐກຖາຍໍ ວຸຕ຺ຕໍ, ຕໍ ເຫຕຸປຈ຺ຈຍາທິວເສນ ອຸປ຺ປຊ຺ຊມາໂນ ຘມ຺ໂມ ຈຕ຺ຕາໂຣ ສພ຺ພຏ຺ຐານິກາ ອາຫາຣິນ຺ທ຺ຣິຍຌານມຄ຺ຄາ ຈາຕິ ອິເມ ອຏ຺ຐ ປຈ຺ຈເຍ ອລຠນ຺ໂຕ ນາມ ນຕ຺ຖີຕິ ອິມິນາ ປຏິຈ຺ຈວາເຣ ອນຸໂລມປຈ຺ຈນີຍວຓ຺ຓນາຍໍ ວຸຕ຺ເຕນ ນເຍນ ເວທິຕຸໍ ສກ຺ກາຕິ ອາຫ ‘‘ປຏິຈ຺ຈວາເຣ…ເປ… ນເຍນາ’’ຕິ. ເສເສສູຕິ ອເຫຕຸກໂມຫວຊ຺ຊາເຫຕຸເກສຸ ປຎ຺ຈວິຎ຺ຎາຓາ…ເປ… ຌານປຈ຺ຈຍໍ ລຠນ຺ຕິ, ຕສ຺ມາ ‘‘ອເຫຕຸກໂມໂຫວ ຌານມຄ຺ຄປຈ຺ຈຍໍ ລຠຕີ’’ຕິ ນ ສກ຺ກາ ວຕ຺ຕຸໍ, ກິຎ຺ຈ ປຈ຺ຈນີຍານຸໂລເມ ທ຺ວິນ຺ນໍ ປຈ຺ຈຍານໍ ອນຸໂລເມນ ອນຸໂລມວເສນ ສຫ ໂຍຊນາ ນຕ຺ຖິ ເອເກກສ຺ເສວ ໂຍຊນາຍ ອາຄຕຕ຺ຕາ, ຕສ຺ມາ ອເຫຕຸກໂມໂຫວ ມຄ຺ຄປຈ຺ຈຍໍ ລຠຕີຕິ ເອວເມຕ຺ຖ ໂຍຊນາ ເວທິຕພ຺ພາ.

ສໍສຏ຺ຐວາຣວຓ຺ຓນາ ນິຏ຺ຐິຕາ.