໑. ປຓ຺ຓຕ຺ຕິວາຣວຓ຺ຓນາ

໑. ສຕິປິ ກຸສລມູລາທີນມ຺ປິ ວິຠຕ຺ຕຠາເວ ຂນ຺ຘາທິວິຠາໂຄ ຕໂຕ ສາຕິສໂຍຕິ ທສ຺ເສນ຺ໂຕ ‘‘ຂນ຺ຘາທໂຍ ວິຍ ປຸພ຺ເພ ອວິຠຕ຺ຕາ’’ຕິ ອາຫ. ປກາຣຕ຺ໂຖ ວາ ເອຕ຺ຖ ອາທິ-ສທ຺ໂທ ‘‘ຠູວາທໂຍ’’ຕິອາທີສຸ ວິຍາຕິ ກຸສລມູລາທີນມ຺ປິ ສງ຺ຄໂຫ ທຏ຺ຐພ຺ໂພ. ອວິຎ຺ຎາຕຕ຺ຕາ ນິສາເມນ຺ເຕຫິ. ເຫຕຸອຕ຺ໂຖ ວາ ເອຕ຺ຖ ລຸຕ຺ຕນິທ຺ທິຏ຺ໂຐ ອວິຎ຺ຎາປິຕຕ຺ຕາຕິ ອຕ຺ໂຖ. ຍທິປິ ກາຍສງ຺ຂາຣານໍ ວິກປ຺ປທ຺ວເຍປິ ເຫຕຸຜລຠາໂວເຍວ ອິຈ຺ຉິໂຕ, ສາມິວຈນຣູປາວິຠູໂຕ ປນ ອຕ຺ເຖວ ອຕ຺ຖເຠໂທຕິ ທສ຺ເສນ຺ໂຕ ‘‘ກາຍສ຺ສ…ເປ… ກຕ຺ຕຸອຕ຺ເຖ’’ຕິ ອາຫ. ໂສ ປນາຕິ ກຕ຺ຕຸອຕ຺ໂຖ.

໒-໗. ສຸທ຺ຘິກເອເກກປທວເສນາຕິ ‘‘ກາໂຍ ສງ຺ຂາໂຣ’’ຕິອາທີສຸ ທ຺ວີສຸ ທ຺ວີສຸ ປເທສຸ ອຎ຺ຎມຎ຺ຎໍ ອສມ຺ມິສ຺ສເອເກກປທວເສນ. ອຕ຺ຖາຠາວໂຕຕິ ຍຖາຘິປ຺ເປຕຕ຺ຖາຠາວໂຕ. ອຎ຺ຎຖາ ກຣຊກາຍາທິໂກ ອຕ຺ໂຖ ອຕ຺ເຖວ. ເຕເນວາຫ ‘‘ປທໂສຘນ…ເປ… ອວຈນີຍຕ຺ຕາ’’ຕິ. ອິທານິ ຕເມວ ອຕ຺ຖາຠາວໍ ພ຺ຍຕິເຣກວເສນ ທສ຺ເສນ຺ໂຕ ‘‘ຍຖາ’’ຕິອາທິມາຫ. ກສ຺ມາ ປນ ອຸຠຍຕ຺ຖ ສມາເນ ສມາສປທຠາເວ ຕຕ຺ຖ ອຕ຺ໂຖ ລພ຺ຠຕິ, ອິຘ ນ ລພ຺ຠຕີຕິ? ຠິນ຺ນລກ຺ຂຓຕ຺ຕາ. ຕຕ຺ຖ ຫິ ຣູປກ຺ຂນ຺ຘາທິປທານິ ສມານາຘິກຣຓານີຕິ ປທທ຺ວຍາຘິຏ຺ຐາໂນ ເອໂກ ອຕ຺ໂຖ ລພ຺ຠຕິ, ອິຘ ປນ ກາຍສງ຺ຂາຣາທິປທານິ ຠິນ຺ນາຘິກຣຓານີຕິ ຕຖາຣູໂປ ອຕ຺ໂຖ ນ ລພ຺ຠຕີຕິ. ເຕນາຫ ‘‘ຍຖາຘິປ຺ເປຕຕ຺ຖາຠາວໂຕ’’ຕິ.

ວິສຸໍ ອທີເປຕ຺ວາຕິ ‘‘ກາຍສງ຺ຂາໂຣ’’ຕິອາທິນາ ສຫ ວຸຈ຺ຈມາໂນປິ ກາຍສງ຺ຂາຣສທ຺ໂທ ວິສຸໍ ວິສຸໍ ອຕ຺ຕໂນ ອຕ຺ຖໍ ອໂຊເຕຕ຺ວາ ເອກໍ ອຕ຺ຖໍ ຍທິ ທີເປຕີຕິ ປຣິກປ຺ປວເສນ ວທຕິ. ເຕນ ກາຍສງ຺ຂາຣສທ຺ທານໍ ສມານາຘິກຣຓຕໍ ອຸລ຺ລິງ຺ເຄຕິ. ‘‘ກາຍສງ຺ຂາຣສທ຺ໂທ ກາຍສງ຺ຂາຣຕ຺ເຖ ວຕ຺ຕມາໂນ’’ຕິ ກສ຺ມາ ວຸຕ຺ຕໍ, ‘‘ສງ຺ຂາຣສທ຺ໂທ ສງ຺ຂາຣຕ຺ເຖວ ວຕ຺ຕມາໂນ’’ຕິ ປນ ວຕ຺ຕພ຺ພໍ ສິຍາ. ເອວຎ຺ຫິ ສຕິ ຂນ຺ຘຕ຺ເຖ ວຕ຺ຕມາໂນ ຂນ຺ຘສທ຺ໂທ ວິຍ ຣູປສທ຺ເທນ ກາຍສທ຺ເທນ ວິເສສິຕພ຺ໂພຕິ ອິທໍ ວຈນໍ ຍຸຊ຺ເຊຍ຺ຍ, ກາຍສງ຺ຂາຣສທ຺ທານໍ ປນ ສມານາຘິກຣຓຕ຺ເຕ ນ ເກວລໍ ສງ຺ຂາຣສທ຺ໂທເຍວ ສງ຺ຂາຣຕ຺ເຖ ວຕ຺ຕຕິ, ອຖ ໂຂ ກາຍສທ຺ໂທປີຕິ ອິມມຕ຺ຖໍ ທສ຺ເສຕຸໍ ‘‘ກາຍສງ຺ຂາຣສທ຺ໂທ ກາຍສງ຺ຂາຣຕ຺ເຖ ວຕ຺ຕມາໂນ’’ຕິ ວຸຕ຺ຕໍ ສິຍາ, ກາຍສທ຺ເທນ ສມານາຘິກຣເຓນາຕິ ອຘິປ຺ປາໂຍ. ພ຺ຍຘິກຣເຓນ ປນ ສງ຺ຂາຣສ຺ສ ວິເສສິຕພ຺ພຕາ ອຕ຺ເຖວາຕິ.

ອິມສ຺ສ ວາຣສ຺ສາຕິ ສຸທ຺ຘສງ຺ຂາຣວາຣສ຺ສ. ປທໂສຘເນນ ທສ຺ສິຕານນ຺ຕິ ເອຕ຺ຕເກວ ວຸຈ຺ຈມາເນ ຕຕ຺ຖ ທສ຺ສິຕຠາວສາມຎ຺ເຎນ ສຸທ຺ຘກາຍາທີນມ຺ປິ ຄຫຓໍ ອາປຊ຺ເຊຍ຺ຍາຕິ ຕໍນິວາຣຓຕ຺ຖໍ ‘‘ຍຖາຘິປ຺ເປຕານເມວາ’’ຕິ ອາຫ. ກາຍາທິປເທຫິ ອຄ຺ຄຫິຕຕ຺ຕາຕິ ສຸທ຺ຘກາຍາທິປເທຫິ ອຄ຺ຄຫິຕຕ຺ຕາ. ອິຘ ປນາຕິ ອຏ຺ຐກຖາຍໍ. ສຸທ຺ຘສງ຺ຂາຣວາຣໍ ສນ຺ຘາຍ ວຸຕ຺ຕມ຺ປິ ສຸທ຺ຘສງ຺ຂາຣວາຣເມເວຕ຺ຖ ອນນຸຊານນ຺ໂຕ ສກລສງ຺ຂາຣຍມກວິສຍນ຺ຕິ ອາຫ ‘‘ອິຘ ປນ ສງ຺ຂາຣຍມເກ’’ຕິ. ອຘິປ຺ເປຕຕ຺ຖປຣິຈ຺ຈາໂຄຕິ ອສ຺ສາສປສ຺ສາສາທິກສ຺ສ ອຘິປ຺ເປຕຕ຺ຖສ຺ສ ອຄ຺ຄຫຓໍ ເຈຕນາກາຍອຠິສງ຺ຂຣຓສງ຺ຂາຣາທິ ອນຘິປ຺ເປຕຕ຺ຖປຣິຄ຺ຄໂຫ. ຍທິ ‘‘ກາໂຍ ສງ຺ຂາໂຣ’’ຕິອາທິນາ ສຸທ຺ຘສງ຺ຂາຣຕໍມູລຈກ຺ກວາຣາ ອຕ຺ຖາຠາວໂຕ ອິຘ ນ ຄເຫຕພ຺ພາ, ອຖ ກສ຺ມາ ປວຕ຺ຕິວາຣເມວ ອນາຣຠິຕ຺ວາ ອຎ຺ຎຖາ ເທສນາ ອາຣທ຺ຘາຕິ ອາຫ ‘‘ປທໂສຘນວາຣຕໍມູລຈກ຺ກວາເຣຫີ’’ຕິອາທິ. ສໍສໂຍ ໂຫຕິ ສງ຺ຂາຣສທ຺ທວຈນີຍຕາສາມຎ຺ຎໂຕ ກາຍສງ຺ຂາຣາທິປທານໍ ພ຺ຍຘິກຣຓຠາວໂຕ ຈ. ເຕເນວາຫ ‘‘ອສມານາຘິກຣເຓຫິ…ເປ… ທສ຺ສິຕາຍາ’’ຕິ.

ປຓ຺ຓຕ຺ຕິວາຣວຓ຺ຓນາ ນິຏ຺ຐິຕາ.