ສພ຺ພສງ຺ກລນນຍກຖາວຓ຺ຓນາ

໘໗໓. ປຣິວາເຣ ມຸຂາຄຕາ ກຕ຺ຖປຎ຺ຎຕ຺ຕິວາຣາທໂຍ ອຏ຺ຐ ວາຣາ, ເຕເຍວ ປຈ຺ຈຍ-ສທ຺ເທນ ໂຍເຊຕ຺ວາ ວຸຕ຺ຕາ ອຏ຺ຐປຈ຺ຈຍວາຣາຕິ ວິຠງ຺ຄທ຺ວເຍ ວິສຸໍ ວິສຸໍ ທສ຺ສິຕາ ໂສຬສ ປຣິວາຣາ ອສ຺ສາຕິ ໂສຬສປຣິວາໂຣ, ຕສ຺ສ ໂສຬສປຣິວາຣສ຺ສ. ສພ຺ພໍ ສງ຺ກລນໍ ນຍນ຺ຕິ ສພ຺ເພສໍ ວຸຕ຺ຕານໍ ສງ຺ກລນນຍານໍ ສງ຺ຄເຫຕພ຺ພໂຕ ສພ຺ພໍ ສງ຺ກລເຠທນໍ ນຍໍ.

໘໗໕. ກາຍິກາ ຉພ຺ພິຘາຕິ ປຐມປາຣາຊິກາປຕ຺ຕິ, ກຸຏິກຣເຓ ປໂຍເຄ ທຸກ຺ກຏາປຕ຺ຕິ, ເອກໍ ປິຓ຺ຑໍ ອນາຄເຕ ຖຸລ຺ລຈ຺ຈຍາປຕ຺ຕິ, ຕສ຺ມິໍ ອາຄເຕ ສງ຺ຆາທິເສສາປຕ຺ຕິ, ວິກາລໂຠຊເນ ປາຈິຕ຺ຕິຍາປຕ຺ຕິ, ປຐມປາຏິເທສນີຍາປຕ຺ຕີຕິ ຉພ຺ພິຘາ.

ຕຖາ ວາຈສິກາປິ ຈາຕິ ຈຕຸຕ຺ຖປາຣາຊິກາ, ກຸຏິຍາ ກາຣາປເນ ປຸພ຺ພຄຕິໂຍ, ປທໂສຘມ຺ມປາຈິຕ຺ຕິຍໍ, ທວກມ຺ຍຕາຍ ຫີເນນ ຂຸໍສນໍ, ຕສ຺ສ ທຸພ຺ຠາສິຕນ຺ຕິ ຕຖາ ຉພ຺ພິຘາ.

ຉາເທນ຺ຕສ຺ສ ຈ ຕິສ຺ໂສຕິ ຠິກ຺ຂຸນິຍາ ວຊ຺ຊປຏິຈ຺ຉາທິກາຍ ປາຣາຊິກໍ, ຠິກ຺ຂຸໂນ ສງ຺ຆາທິເສສຉາທເນ ປາຈິຕ຺ຕິຍໍ, ອຕ຺ຕໂນ ທຸຏ຺ຐຸລ຺ລຈ຺ຉາທເນ ທຸກ຺ກຏນ຺ຕິ ຕິສ຺ໂສ ຈ.

ປຎ຺ຈ ສໍສຄ຺ຄປຈ຺ຈຍາຕິ ກາຍສໍສຄ຺ເຄ ຠິກ຺ຂຸນິຍາ ປາຣາຊິກໍ, ຠິກ຺ຂຸໂນ ສງ຺ຆາທິເສໂສ, ກາເຍນ ກາຍປຏິພທ຺ເຘ ຖຸລ຺ລຈ຺ຈຍໍ, ນິສ຺ສຄ຺ຄິເຍນ ກາຍປຏິພທ຺ເຘ ທຸກ຺ກຏໍ, ອງ຺ຄຸລິປໂຕທເກ ປາຈິຕ຺ຕິຍນ຺ຕິ ກາຍສໍສຄ຺ຄປຈ຺ຈຍາ ປຎ຺ຈ ອາປຕ຺ຕິໂຍ.

໘໗໗. ຠິກ຺ຂຸນິຍາ ວຊ຺ຊປຏິຈ຺ຉາທິກາຍ ປາຣາຊິກໍ, ຠິກ຺ຂຸສ຺ສ ສງ຺ຆາທິເສສປຏິຈ຺ຉາທກສ຺ສ ປາຈິຕ຺ຕິຍນ຺ຕິ ທຸຏ຺ຐຸລ຺ລຈ຺ຉາທເນ ທຸເວ.

໘໗໙. ‘‘ຄາມນ຺ຕເຣ ຈຕສ຺ໂສວາ’’ຕິອາທິ ປຏິນິທ຺ເທສໂຕ ຈ ວິຎ຺ຎາຍຕິ.

໘໘໑. ວຊນ຺ຕິຍາຕິ ຄຈ຺ຉນ຺ຕິຍາ.

໘໘໕. ຍາ ປນ ຠິກ຺ຂຸນີ ຣຕ຺ຕນ຺ຘກາເຣ ອປ຺ປທີເປ ຫຕ຺ຖປາເສ ປຸຣິເສນ ສທ຺ຘິໍ ຍທິ ສລ຺ລເປຍ຺ຍ, ຕສ຺ສາ ປາຈິຕ຺ຕິ. ທູເຣ ຐິຕາ ຫຕ຺ຖປາສໍ ວິຊຫິຕ຺ວາ ຐິຕາ ວເທຍ຺ຍ ເຈ, ທຸກ຺ກຏເມວາຕິ ໂຍຊນາ.

໘໘໖. ຍາ ປນ ຠິກ຺ຂຸນີ ຉນ຺ເນ ປຏິຈ຺ຉນ຺ນຏ຺ຐາເນ ທິວາ ປຸຣິເສນ ສທ຺ຘິໍ ອສ຺ສ ປຸຣິສສ຺ສ ຫຕ຺ຖປາເສ ຐິຕາ ວເທຍ຺ຍ ສລ຺ລເປຍ຺ຍ, ຕສ຺ສາ ປາຈິຕ຺ຕິ. ຫຕ຺ຖປາສໍ ວິຊຫິຕ຺ວາ ວເທຍ຺ຍ ເຈ, ທຸກ຺ກຏເມວາຕິ ໂຍຊນາ.

໘໙໑. ສນິສ຺ສຄ຺ຄາ ຈ ປາຈິຕ຺ຕີຕິ ນິສ຺ສຊ຺ຊນວິນຍກມ຺ມສຫິຕາເຍວ ປາຈິຕ຺ຕິ.

໘໙໓. ອິຘ ອິມສ຺ມິໍ ສາສເນ.

໘໙໖. ທຸວິນ຺ນນ຺ຕິ ທ຺ວິນ຺ນໍ.

໘໙໘. ສມານສໍວາສກຠູມິ ນາມ ປກຕຕ຺ຕສ຺ສ ຠິກ຺ຂຸໂນ ສມານລທ຺ຘິກສ຺ສ ເອກສີມາຍໍ ຐິຕຠາໂວ. ນານາປທໍ ປຸພ຺ພໍ ເອຕິສ຺ສາຕິ ນານາປທປຸພ຺ພິກາ, ນານາສໍວາສກຠູມີຕິ ອຕ຺ໂຖ. ອຸກ຺ຂິຕ຺ຕນານາລທ຺ຘິກນານາສີມຄຕາ ນານາສໍວາສກຠູມິ. ອິມາ ທ຺ເວເຍວ ສໍວາສກຠູມິໂຍ ຫິ ມເຫສິນາ ກາຣຸຓິເກນ ວຸຕ຺ຕາຕິ ໂຍຊນາ.

໘໙໙. ທຸວິນ຺ນນ຺ຕິ ປາຣິວາສິກມານຕ຺ຕຈາຣີນໍ ທ຺ວິນ຺ນໍ ປຸຄ຺ຄລານໍ. ທ຺ວຍາຕີເຕນາຕິ ກາມສຸຂລ຺ລິການຸໂຍຄອຕ຺ຕກິລມຖານຸໂຍຄສງ຺ຂາຕໍ ອນ຺ຕທ຺ວຍໍ ອຕິກ຺ກມ຺ມ ມຊ຺ຌິມາຍ ປຏິປທາຍ ຐິເຕນ. ອຖ ວາ ສສ຺ສຕຸຈ຺ເຉທທ຺ວຍໍ ອຕິກ຺ກນ຺ເຕນ.

໙໐໐. ‘‘ທ຺ວງ຺ຄຸລປພ຺ພປຣມໍ ອາທາຕພ຺ພ’’ນ຺ຕິ ຈ ຕເຖວ ‘‘ທ຺ວງ຺ຄຸລໍ ວາ ທຸມາສໍ ວາ’’ຕິ ຈ ທ຺ວງ຺ຄຸລາ ທຸເວ ປຎ຺ຎຕ຺ຕາຕິ ໂຍຊນາ.

໙໐໕. ອາຓຕ຺ຕິຍາ ມນຸສ຺ສມາຣຓໍ, ອາຓຕ຺ຕິຍາ ອທິນ຺ນາທານມ຺ປີຕິ ໂຍຊນາ.

໙໐໗. ຕິສ຺ໂສ ໂອຠາສນາຍິມາຕິ ອິມາ ຕິສ຺ໂສ ເມຖຸນາຘິປ຺ປາຍປ຺ປກາສນາ.

໙໐໘. ສງ຺ຆາທິເສໂສ ເອວ ສງ຺ຆາທິເສສຕາ.

໙໑໐. ວນປ຺ປຕິ ນາມ ປຸປ຺ຜໍ ວິນາ ຜລນ຺ຕີ ນິຄ຺ໂຣຘອຸທຸມ຺ພຣອສ຺ສຕ຺ຖປິລກ຺ຂກາທິຣຸກ຺ຂຊາຕິ, ອິຘ ປນ ວນເຊຏ຺ໂຐ ຣກ຺ຂິຕໂຄປິຕເຈຕິຍຣຸກ຺ໂຂ ວນປ຺ປຕີຕິ ອຘິປ຺ປາໂຍ. ຖຸລ຺ລຕາຕິ ຖຸລ຺ລຈ຺ຈຍໍ.

໙໑໒. ວິສ຺ສຏ຺ຐີຕິ ວິສ຺ສຊ຺ຊິ ສມ຺ຠວຘາຕຸ. ຉຑ຺ຑເນຕິ ອຸປກ຺ກມິຕ຺ວາ ໂມຈເນ. ‘‘ຫຣິເຕ ອຸຈ຺ຈາຣໍ ປສ຺ສາວໍ ຉຑ຺ຑເນ’’ຕິ ປທຈ຺ເຉໂທ.

໙໑໓. ກິໍ ປມາຓເມຕາສນ຺ຕິ ກິຕ຺ຕກາ.

໙໑໕. ຠິກ຺ຂຸ ຠິກ຺ຂຸນິຍາ ສທ຺ຘິນ຺ຕິ ເອຕ຺ຖ ຠິກ຺ຂູຕິ ສາມິວຈນປ຺ປສງ຺ເຄ ປຈ຺ຈຕ຺ຕໍ, ຠິກ຺ຂຸໂນຕິ ອຕ຺ໂຖ. ຄາຖາພນ຺ຘວເສນ ວາ ວຓ຺ຓໂລໂປ.

໙໑໘. ທຸຕິຍາຍ ຫຕ຺ຖປາສກໍ.

໙໒໒. ‘‘ຍາວຕຕິຍເກ ຕິສ຺ໂສ ອາປຕ຺ຕິໂຍ’’ຕິ (ປຣິ. ອຏ຺ຐ. ໔໗໖ ອຕ຺ຖໂຕ ສມານໍ) ປທສ຺ສ ນິທ຺ເທເສ ‘‘ຖຸລ຺ລຈ຺ຈຍໍ ສິຍາ ສງ຺ຆ-ເຠທກສ຺ສານຸວຕ຺ຕິໂນ’’ຕິ ປຐນ຺ຕິ. ‘‘ຕິຓ຺ຓໍ ສງ຺ຆເຠທານຸວຕ຺ຕາການໍ ໂກກາລິກາທີນໍ ສງ຺ຆາທິເສໂສ’’ຕິ ອຏ຺ຐກຖາຍໍ ວຸຕ຺ຕຕ຺ຕາ ຕຖາ ປາໂຐ ນ ຄເຫຕພ຺ໂພ.

໙໒໓. ຍາວຕຕິຍເກຕິ ຕິຓ຺ຓໍ ປູຣຓີ ຕຕິຍາ, ກມ຺ມວາຈາ, ຍາວຕຕິຍາຍ ກມ຺ມວາຈາຍ ປຣິໂຍສາເນ ອາປຊ຺ຊິຕພ຺ພາ ອາປຕ຺ຕິ ຍາວຕຕິຍກາ ນາມ.

໙໒໖. ‘‘ອວສ຺ສຸຕສ຺ສ…ເປ… ກິຎ຺ຈີ’’ຕິ ອິທໍ ຄຣຸກາປຕ຺ຕິຍາ ວຕ຺ຖຸທສ຺ສນໍ. ‘‘ສພ຺ພໍ ມໍສໍ ອກປ຺ປິຍ’’ນ຺ຕິ ອິທໍ ຖຸລ຺ລຈ຺ຈຍທຸກ຺ກຏານໍ ວຕ຺ຖຸທສ຺ສນໍ.

໙໒໗. ‘‘ວິຎ຺ຎາເປຕ຺ວານ…ເປ… ໂຠຊນມ຺ປິ ຈາ’’ຕິ ອິທໍ ປາຏິເທສນີຍວຕ຺ຖຸທສ຺ສນໍ. ‘‘ລສຸຓມ຺ປິ ຈາ’’ຕິ ອິທໍ ປາຈິຕ຺ຕິຍວຕ຺ຖຸທສ຺ສນໍ. ‘‘ເອກໂຕ ອຊ຺ໂຌຫຣນ຺ຕິຍາ’’ຕິ ປທຈ຺ເຉໂທ.

໙໓໐. ຣຕ຺ຕຈິຕ຺ເຕນ ອິຕ຺ຖິຍາ ອງ຺ຄຊາຕໍ ໂອໂລເກນ຺ຕສ຺ສ ທຸກ຺ກຏໍ ວຸຕ຺ຕນ຺ຕິ ໂຍຊນາ.

໙໓໑. ສມ຺ມາວຕ຺ຕນາວ ສມ຺ມາວຕ຺ຕນກາ. ເຕຈຕ຺ຕາລີສ ວຕ຺ຕນາ ທ຺ວາສີຕິກ຺ຂນ຺ຘກວຕ຺ຕານໍ ປຣິປູຣຓຏ຺ຐາເນ ທສ຺ສິຕາ.

໙໓໒. ອທສ຺ສນອປຏິກມ຺ເມ ອາປນ຺ນາປຕ຺ຕິຍາ ທຸເວ ປຸຄ຺ຄລາ, ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອາປນ຺ນາປຕ຺ຕິຍາ ເອໂກຕິ ອິເມ ຕໂຍ ອຸກ຺ຂິຕ຺ຕປຸຄ຺ຄລາ.

໙໓໔. ທູສໂກຕິ ຠິກ຺ຂຸນິທູສໂກ. ກຓ຺ຏໂກຕິ ກຓ຺ຏກສາມເຓໂຣ.

໙໓໗. ທເທຍ຺ຍຈ຺ເຈວມາທິກາຕິ ຎຕ຺ຕິກາເລ ‘‘ສງ຺ໂຆ ທເທຍ຺ຍາ’’ຕິອາທິເຠທາ ຎຕ຺ຕິກປ຺ປນາ, ຎຕ຺ຕິກິຣິຍາຕິ ອຕ຺ໂຖ. ເທຕິ ສງ຺ໂຆ ກໂຣຕີຕິອາທີຕິ ກມ຺ມວາຈາກາເລ ‘‘ສງ຺ໂຆ ເທຕີ’’ຕິ ວາ ‘‘ກໂຣຕີ’’ຕິ ວາ ອາທິເຠທາ ວຈນກມ຺ມສ຺ສ ອນິຏ຺ຐິຕຕ຺ຕາ ວິປ຺ປກຕປຈ຺ຈຸປ຺ປນ຺ນໍ ນາມ ສິຍາ.

໙໓໘. ທິນ຺ນໍ ກຕໍ ປນິຈ຺ຈາທີຕິ ກມ຺ມວາຈາຍ ນິຏ຺ຐິຕາຍ ‘‘ທິນ຺ນໍ ສງ຺ເຆນາ’’ຕິ ວາ ‘‘ກຕໍ ສງ຺ເຆນາ’’ຕິ ວາຕິອາທິວຈນໍ ອຕີຕກຣຓໍ ນາມ ສິຍາ.

໙໓໙. ສງ຺ເຆຕິ ສງ຺ຆມຊ຺ເຌ.

‘‘ກາຣເຓຫິ ປນ ທ຺ວີຫິ, ສງ຺ໂຆ ຠິຊ຺ຊຕິ ນຎ຺ຎຖາ’’ຕິ ກສ຺ມາ ວຸຕ຺ຕໍ, ນນຸ ‘‘ປຎ຺ຈຫຸປາລິ, ອາກາເຣຫິ ສງ຺ໂຆ ຠິຊ຺ຊຕິ. ກຕເມຫິ ປຎ຺ຈຫິ? ກມ຺ເມນ, ອຸທ຺ເທເສນ, ໂວຫຣນ຺ໂຕ, ອນຸສ຺ສາວເນນ, ສລາກຄ຺ຄາເຫນາ’’ຕິ (ປຣິ. ໔໕໘) ວຸຕ຺ຕຕ຺ຕາ, ອຏ຺ຐກຖາຍຎ຺ຈ (ປຣິ. ອຏ຺ຐ. ໔໕໘) ‘‘ປຎ຺ຈຫິ ກາຣເຓຫີ’’ຕິ ວຈນໂຕ ຈ ອິຘ ອິເມຫິ ທ຺ວີເຫວ ກາຣເຓຫິ ສງ຺ຆເຠທກຖນໍ ອຍຸຕ຺ຕນ຺ຕິ? ວຸຈ຺ຈເຕ – ນາຍຸຕ຺ຕໍ ປຸພ຺ພປໂຍຄກາຣກວເສນ ວຸຕ຺ຕຕ຺ຕາ. ຕຖາ ຫິ ອຏ຺ຐກຖາຍໍ –

‘‘ກມ຺ເມນາຕິ ອປໂລກນາທີສຸ ຈຕູສຸ ກມ຺ເມສຸ ອຎ຺ຎຕເຣນ ກມ຺ເມນ. ອຸທ຺ເທເສນາຕິ ປຎ຺ຈສຸ ປາຕິໂມກ຺ຂຸທ຺ເທເສສຸ ອຎ຺ຎຕເຣນ ອຸທ຺ເທເສນ. ໂວຫຣນ຺ໂຕຕິ ກຖຍນ຺ໂຕ, ຕາຫິ ຕາຫິ ອຸປປຕ຺ຕີຫິ ‘ອຘມ຺ມໍ ຘມ຺ໂມ’ຕິອາທີນິ ອຏ຺ຐາຣສ ເຠທກຣວຕ຺ຖູນິ ທີເປນ຺ໂຕ. ອນຸສ຺ສາວເນນາຕິ ‘ນນຸ ຕຸມ຺ເຫ ຊານາຖ ມຍ຺ຫໍ ອຸຈ຺ຈາກຸລາ ປພ຺ພຊິຕຠາວໍ, ພຫຸສ຺ສຸຕຠາວຎ຺ຈ, ມາທິໂສ ນາມ ອຸທ຺ຘມ຺ມໍ ອຸພ຺ພິນຍໍ ສຕ຺ຖຸສາສນໍ ກເຣຍ຺ຍາຕິ ຈິຕ຺ເຕ ອຸປ຺ປາເທຕຸໍ ຕຸມ຺ຫາກໍ ຍຸຕ຺ຕໍ, ກິໍ ມຍ຺ຫໍ ອວີຈິ ນີລຸປ຺ປລວນມິວ ສີຕໂລ, ກິມຫໍ ອປາຍໂຕ ນ ຠາຍາມີ’ຕິອາທິນາ ນເຍນ ກຓ຺ຓມູເລ ວຈີເຠທໍ ກຕ຺ວາ ອນຸສ຺ສາວເນນ. ສລາກຄ຺ຄາເຫນາຕິ ເອວໍ ອນຸສ຺ສາເວຕ຺ວາ ເຕສໍ ຈິຕ຺ຕໍ ອຸປຕ຺ຖມ຺ເຠຕ຺ວາ ອນິວຕ຺ຕິຘມ຺ເມ ກຕ຺ວາ ‘ຄຓ຺ຫຖ ອິມໍ ສລາກ’ນ຺ຕິ ສລາກຄ຺ຄາເຫນ.

‘‘ເອຕ຺ຖ ຈ ກມ຺ມເມວ, ອຸທ຺ເທໂສ ວາ ປມາຓໍ, ໂວຫາຣານຸສ຺ສາວນສລາກຄ຺ຄາຫາ ປນ ປຸພ຺ພຠາຄາ. ອຏ຺ຐາຣສວຕ຺ຖຸທີປນວເສນ ຫິ ໂວຫຣນ຺ເຕ ຕຕ຺ຖ ຣຸຈິຊນນຕ຺ຖໍ ອນຸສ຺ສາເວຕ຺ວາ ສລາກາຍ ຄຫິຕາຍປິ ອຠິນ຺ໂນວ ໂຫຕິ ສງ຺ໂຆ. ຍທາ ປນ ເອວໍ ຈຕ຺ຕາໂຣ ວາ ອຕິເຣເກ ວາ ສລາກໍ ຄາເຫຕ຺ວາ ອາເວຓິກໍ ກມ຺ມໍ ວາ ອຸທ຺ເທສໍ ວາ ກໂຣຕິ, ຕທາ ສງ຺ໂຆ ຠິນ຺ໂນ ນາມ ໂຫຕີ’’ຕິ (ປຣິ. ອຏ຺ຐ. ໔໕໘) –

ວຸຕ຺ຕຕ຺ຕາ ສລາກຄ຺ຄາຫກມ຺ມານິ ທ຺ເວ ປຘານກາຣຓານີຕິ ອິຘ ຕາເນວ ທສ຺ສິຕານິ.

ນນຸ ຈ ສລາກຄ຺ຄາໂຫປິ ສງ຺ຆເຠທສ຺ສ ປຸພ຺ພຠາໂຄ ວຸຕ຺ໂຕ, ອຸທ຺ເທສກມ຺ມາເນວ ປຘານຠາເວນ ວຸຕ຺ຕານິ, ຕສ຺ມາ ກຖມສ຺ສ ສລາກຄ຺ຄາຫສ຺ສ ປຘານກາຣຓຠາໂວຕິ? ວຸຈ຺ຈເຕ – ອຸທ຺ເທສກມ຺ມານິປິ ສລາກຄ຺ຄາເຫ ສິທ຺ເຘ ອວສ຺ສມ຺ຠວນໂຕ ອຕ຺ຖສາຘນປໂຍເຄນ ວິນາ ອສິທ຺ຘາເນວ ໂຫນ຺ຕີຕິ ໂສ ປຘານຠາເວນ ອິຘ ຄຫິໂຕ, ອຸທ຺ເທໂສ ປນ ປຎ຺ຎຕ຺ຕກມ຺ມປຸພ຺ພງ຺ຄມຕ຺ຕາ ກມ຺ເມເນວ ສງ຺ຄຫິໂຕຕິ ອິຘ ວິສຸໍ ນ ວຸຕ຺ໂຕຕິ ທຏ຺ຐພ຺ພໍ.

໙໔໑. ປຍຸຕ຺ຕາຍຸຕ຺ຕວາຈາຍາຕິ ປຈ຺ຈຍຸປ຺ປາທນຕ຺ຖາຍ ປຍຸຕ຺ຕາ ຈ ສາ ສກ຺ຍປຸຕ຺ຕິຍຠາວສ຺ສ ອຍຸຕ຺ຕາ ອນນຸຣູປາ ຈາຕິ ປຍຸຕ຺ຕາຍຸຕ຺ຕາ, ສາເຍວ ວາຈາຕິ ປຍຸຕ຺ຕາຍຸຕ຺ຕວາຈາ, ຕາຍ.

໙໔໔. ຍາ ຠິກ຺ຂຸນີ ວິຎ຺ຎາເປຕ຺ວາ ຠຸຎ຺ຊຕິ, ຕສ຺ສາ ຈ ປາຏິເທສນີຍໍ ສິຍາຕິ ໂຍຊນາ.

໙໔໕. ອນາມໂຍຕິ ອຄິລາໂນ.

໙໔໖. ‘‘ທສສຕານີ’’ຕິອາທິຄາຖາຍ ຣຕ຺ຕີນນ຺ຕິ ເອຕ຺ຖ ‘‘ສຕ’’ນ຺ຕິ ເສໂສ. ຉາທນກິຣິຍາຍ ອຈ຺ຈນ຺ຕສໍໂຍເຄ ອຸປໂຍຄວຈນໍ. ທສສຕານິ ອາປຕ຺ຕິໂຍ ຣຕ຺ຕີນໍ ສຕໍ ຉາເທຕ຺ວາຕິ ໂຍຊນາ. ເອວໍ ກຕ຺ຕພ຺ພໂຍຊນາຍໍ –

‘‘ທສ ສຕໍ ຣຕ຺ຕິສຕໍ, ອາປຕ຺ຕິໂຍ ຉາທຍິຕ຺ວານ;

ທສ ຣຕ຺ຕິໂຍ ວສິຕ຺ວານ, ມຸຈ຺ເຈຍ຺ຍ ປາຣິວາສິໂກ’’ຕິ. (ປຣິ. ໔໗໗) –

ອຍໍ ປຣິວາຣຄາຖາປມາຓໍ. ເອກທິວສໍ ສຕໍສງ຺ຆາທິເສສາປຕ຺ຕິໂຍ ອາປຊ຺ຊິຕ຺ວາ ທສທິວເສ ຉາທນວເສນ ສຕໍທິວເສ ສຫສ຺ສສງ຺ຆາທິເສສາປຕ຺ຕິໂຍ ຉາທຍິຕ຺ວາຕິ ອຕ຺ໂຖ. ອຍເມຕ຺ຖ ສງ຺ເຂປຕ຺ໂຖ – ໂຍ ທສທິວເສ ສຕໍ ສງ຺ຆາທິເສສາ ອາປຕ຺ຕິໂຍ ອາປຊ຺ຊິຕ຺ວາ ທສທິວເສ ປຏິຈ຺ຉາເທຕິ, ເຕນ ຣຕ຺ຕິສຕໍ ອາປຕ຺ຕິສຫສ຺ສໍ ປຏິຈ຺ຉາທິຕໍ ໂຫຕີຕິ. ທສ ຣຕ຺ຕິໂຍ ວສິຕ຺ວານາຕິ ‘‘ສພ຺ພາວ ຕາ ອາປຕ຺ຕິໂຍ ທສາຫປຏິຈ຺ຉນ຺ນາ’’ຕິ ປຣິວາສໍ ຍາຈິຕ຺ວາ ທສ ຣຕ຺ຕິໂຍ ວສິຕ຺ວາຕິ ອຕ຺ໂຖ. ມຸຈ຺ເຈຍ຺ຍ ປາຣິວາສິໂກຕິ ປຣິວາສໍ ວສນ຺ໂຕ ຠິກ຺ຂຸ ອຕ຺ຕນາ ວສິຕພ຺ພປຣິວາສໂຕ ມຸຈ຺ເຈຍ຺ຍ, ມຸຕ຺ໂຕ ຠເວຍ຺ຍາຕິ ອຕ຺ໂຖ.

໙໔໗. ປາຣາຊິການິ ອຏ຺ເຐວາຕິ ອຄ຺ຄຫິຕຄ຺ຄຫເຓນ. ເຕວີສ ຄຣຸກາຕິ ຠິກ຺ຂູຫິ ອສາຘາຣຓາ ຠິກ຺ຂຸນີນໍ ທສ, ຠິກ຺ຂຸນີຫິ ອສາຘາຣຓາ ຠິກ຺ຂູນໍ ຉ, ອຸຠິນ຺ນໍ ສາຘາຣຓາ ສຕ຺ຕາຕິ ເອວໍ ເຕວີສ ສງ຺ຆາທິເສສາ.

໙໔໘. ວຸຕ຺ຕານີຕິ ຍຖາວຸຕ຺ຕານິ ນິສ຺ສຄ຺ຄິຍານິ. ທ຺ເວຈຕ຺ຕາລີສ ໂຫນ຺ຕີຕິ ຠິກ຺ຂຸວິຠງ຺ຄາຄຕາ ຕິໍສ, ຠິກ຺ຂູຫິ ອສາຘາຣຓາ ຠິກ຺ຂຸນີນໍ ອາທິໂຕ ທ຺ວາທສ ຈາຕິ ທ຺ວາຈຕ຺ຕາລີສ ນິສ຺ສຄ຺ຄິຍານິ ໂຫນ຺ຕິ. ອຏ຺ຐາສີຕິສຕໍ ປາຈິຕ຺ຕິຍາ ປຸພ຺ເພ ທສ຺ສິຕາວ.

໙໔໙. ສຸສິກ຺ເຂນາຕິ ສຸຏ຺ຐຸ ສິກ຺ຂິຕອຘິສີລາທິຕິວິຘສິກ຺ເຂນ ຠຄວຕາ.

໙໕໐. ສຸປຎ຺ເຎນາຕິ ໂສຠຓາ ທສພລຈຕຸເວສາຣຊ຺ຊຉອສາຘາຣຓາທໂຍ ປຎ຺ຎາ ຍສ຺ສ ໂສ ສຸປຎ຺ໂຎ, ເຕນ. ຍສສ຺ສິນາຕິ ອຏ຺ຐອຣິຍປຸຄ຺ຄລສມູຫສງ຺ຂາຕປຣິວາຣຍສາ ຈ ສພ຺ພໂລກພ຺ຍາປກຄຸຓໂຆສສງ຺ຂາຕກິຕ຺ຕິຍສາ ຈ ເຕນ ສມນ຺ນາຄຕຕ຺ຕາ ຍສສ຺ສິນາ. ອຑ຺ຒຸຑ຺ຒານິ ສຕານິ ຠວນ຺ຕີຕິ ຍຖາທສ຺ສິຕຄຓນາຍ ປິຓ຺ຑວເສນ ປຎ຺ຎາສາຘິການິ ຕີຓິ ສຕານິ ຠວນ຺ຕີຕິ ອຕ຺ໂຖ. ສຸປຎ຺ເຎນ ຍສສ຺ສິນາ ໂຄຕເມນ ປຎ຺ຎຕ຺ຕານິ ສພ຺ພານິ ສິກ຺ຂາປທານິ ອຑ຺ຒຸຑ຺ຒານິ ສຕານິ ຠວນ຺ຕີຕິ ໂຍຊນາ.

໙໕໑. ເອເຕສຸ ສິກ຺ຂາປເທສຸ ໂຍ ສາຣຠູໂຕ ວິນິຈ຺ຉໂຍ ວຕ຺ຕພ຺ໂພ, ໂສ ສກໂລ ມຍາ ສມາເສນ ສພ຺ພຖາ ສພ຺ພາກາເຣນ ວຸຕ຺ໂຕຕິ ໂຍຊນາ.

໙໕໒. ອິທໍ ອຸຕ຺ຕຣໍ ນາມ ປກຣຓໍ.

໙໕໓. ຕສ຺ມາຕິ ມຍາ ວິຈາເຣຕ຺ວາ ວຸຕ຺ຕຕ຺ຕາວ. ອຕ຺ເຖຕິ ວຈນຕ຺ຖຠາວຕ຺ຖາທິເຠເທ ອຕ຺ເຖ ວາ. ອກ຺ຂຣພນ຺ເຘ ວາຕິ ອກ຺ຂຣສງ຺ຂາຕປທພນ຺ເຘ ວາ. ວິຎ຺ຎາສສ຺ສ ກເມປິ ວາຕິ ອຸທ຺ເທສວເສນ ຄນ຺ຖນິກ຺ເຂປສ຺ສ ກເມປິ. ກງ຺ຂາ ນ ກາຕພ຺ພາຕິ ‘‘ຍຖາອຘິປ຺ເປຕສ຺ສ ອິທໍ ວາຈກໍ ນຸ ໂຂ, ອວາຈກ’’ນ຺ຕິ ວາ ‘‘ອິທມຍຸຕ຺ຕໍ ນຸ ໂຂ, ຍຸຕ຺ຕ’’ນ຺ຕິ ວາ ‘‘ອິທມຘິກໍ ນຸ ໂຂ, ອູນ’’ນ຺ຕິ ວາ ‘‘ອິທມຆຏ຺ຏິຕກ຺ກມໍ ນຸ ໂຂ, ຆຏ຺ຏິຕກ຺ກມ’’ນ຺ຕິ ວາ ‘‘ອິທໍ ວິຣຸທ຺ຘສມຍໍ ນຸ ໂຂ, ອວິຣຸທ຺ຘສມຍ’’ນ຺ຕິ ວາ ‘‘ອິທໍ ທຸຣຸຕ຺ຕໍ ນຸ ໂຂ, ສຸວຸຕ຺ຕ’’ນ຺ຕິ ວາ ‘‘ອິທໍ ສຕ຺ຖກໍ ນຸ ໂຂ, ນິຣຕ຺ຖກ’’ນ຺ຕິ ວາ ກງ຺ຂາ ວິມຕິ ເຍນ ເກນຈິ ນ ກາຕພ຺ພາ. ພຫຸມານຕາຕິ ‘‘ວິນໂຍ ສໍວຣຕ຺ຖາຍາ’’ຕິອາທິນາ (ປຣິ. ໓໖໖) ນິທ຺ທິຏ຺ຐປໂຍຊນປຣມ຺ປຣາຍ ມູລກາຣຓຕ຺ຕາ ມຫຕີ ສມ຺ມານາ ກາຕພ຺ພາຕິ ອຕ຺ໂຖ.

໙໕໔. ໂຍ ຠິກ຺ຂຸ ສອຸຕ຺ຕຣໍ ອຸຕ຺ຕຣປກຣເຓນ ສຫິຕໍ ວິນຍສ຺ສວິນິຈ຺ຉຍໍ ນາມ ປກຣຓໍ ຊານາຕິ ຘມ຺ມໂຕ ເຈວ ອຕ຺ຖໂຕ ຈ ວິນິຈ຺ຉຍໂຕ ຈ ສພ຺ພຖາ ອວພຸຊ຺ຌຕິ, ໂສ ຠິກ຺ຂຸ ອຕ຺ຕນາ ສິກ຺ຂິຕພ຺ພາຍ ສິກ຺ຂາຍ ສພ຺ພໂສ ວິຎ຺ຎາຕຕ຺ຕາ ສິກ຺ຂາປເກນ ອາຈຣິເຍນ ວິນາປິ ສິກ຺ຂິຕຸໍ ສມຕ຺ໂຖຕິ. ນິສ຺ສຍໍ ວິມຸຎ຺ຈິຕ຺ວາຕິ ອາຈຣິຍຸປຊ຺ຌາເຍ ນິສ຺ສາຍ ວາສໍ ມຸຎ຺ຈິຕ຺ວາ. ຍຖາກາມງ຺ຄໂຕ ສິຍາຕິ ຍາທິສາ ຍາທິສາ ອຕ຺ຕນາ ຄາມິຕາ, ຕຕ຺ຖ ຕຕ຺ຖ ຄມນາຣໂຫ ຠເວຍ຺ຍາຕິ ອຕ຺ໂຖ.

໙໕໕. ນິສ຺ສຍໍ ທາຕຸກາເມນ. ສຫ ວິຠງ຺ເຄນ ສວິຠງ຺ຄໍ. ສຫ ມາຕິກາຍ ສມາຕິກໍ. ອິທໍ ສອຸຕ຺ຕຣໍ ວິນຍວິນິຈ຺ຉຍປກຣຓໍ ສຸຏ຺ຐຸ ວາຈຸຄ຺ຄຕໍ ກຕ຺ວາ ຄນ຺ຖໂຕ ສຸຏ຺ຐຸ ປຄຸຓໍ ວາຈຸຄ຺ຄຕໍ ກຕ຺ວາ ອຕ຺ຖໂຕ, ວິນິຈ຺ຉຍໂຕ ຈ ສມ຺ມາ ຊານິຕ຺ວາ ເອວໍ ທາຕພ຺ພນ຺ຕິ ໂຍຊນາ.

໙໕໖-໗. ໂຍ ຠິກ຺ຂຸ ອິມໍ ສອຸຕ຺ຕຣໍ ວິນຍວິນິຈ຺ຉຍປກຣຓໍ ວາຈາຍ ປຐຕິ, ມນສາ ຈິນ຺ເຕຕິ, ອຎ຺ເຎຫິ ວຸຈ຺ຈມານໍ ສຸຓາຕິ, ອຕ຺ຖໍ ປຣິປຸຈ຺ຉຕິ, ປຣໍ ວາເຈຕິ, ນິຈ຺ຈໍ ອຕ຺ຖໍ ອຸປປຣິກ຺ຂຕິ ຍຖາປຣິປຸຈ຺ຉິຕມຕ຺ຖໍ ເຫຕຸອຸທາຫຣຓປວຕ຺ຕິວເສນ ອຸປຄນ຺ຕ຺ວາ ສມນ຺ຕໂຕ ອິກ຺ຂຕິ ປຎ຺ຎາຍ ນິຍເມຕິ ວວຕ຺ຖເປຕິ, ຕສ຺ສ ປນ ຠິກ຺ຂຸສ຺ສ ວິນຍນິສ຺ສິຕາ ສພ຺ເພວ ອຕ຺ຖາ ອາປຕ຺ຕານາປຕ຺ຕິກປ຺ປິຍາກປ຺ປິຍາທິປເຠທາ ສພ຺ເພ ອຕ຺ຖາ ຫຕ຺ເຖ ອາມລກໍ ວິຍ ກຣຕເລ ອມລມຓິຣຕນໍ ວິຍ ອຸປຏ຺ຐຫນ຺ຕິ ປາກຏາ ຠວນ຺ຕີຕິ ໂຍຊນາ. ນຕ຺ຖິ ເອຕສ຺ສ ມລນ຺ຕິ ອມລໍ, ອມລເມວ ອາມລກນ຺ຕິ ມຓິຣຕນໍ ວຸຈ຺ຈຕິ.

໙໕໘. ນຕ຺ຖິ ເອເຕສໍ ພຸທ຺ຘີຕິ ອພຸທ຺ຘີ, ອພຸທ຺ຘີ ຈ ເຕ ຊນາ ຈາຕິ ອພຸທ຺ຘິຊນາ, ອພຸທ຺ຘິຊນານໍ ສາຣໍ ອວສາຣໍ ໂອສີທນໍ ທທາຕິ ອາທທາຕິ ກໂຣຕີຕິ ອພຸທ຺ຘິຊນສາຣທໍ, ພຸທ຺ຘິວິຣຫິຕານໍ ອຄາຘໍ ຄມ຺ຠີຣໍ. ເຕຫິ ອລທ຺ຘປຕິຏ຺ຐໍ ອມຕສາຄຣໍ ສທ຺ທຕ຺ຖຣສາມຕສ຺ສ, ນິພ຺ພານາມຕສ຺ສ ວາ ປຏິລາຠກາຣຓຕ຺ຕາ ສາຄຣສທິສໍ ປຣມໍ ອຸຕ຺ຕມໍ ອິມໍ ອຸຕ຺ຕຣໍ ສາຄຣໍ ອາສນ຺ນປຈ຺ຈກ຺ຂໍ ອຸຕ຺ຕຣປກຣຓສງ຺ຂາຕໍ ສມຸທ຺ທສາຄຣໍ ສາຣໂທ ຫຸຕ຺ວາ ອຸຕ຺ຕຣໍ ອຸຕ຺ຕຣນ຺ໂຕ ປຣິໂຍສາເປນ຺ໂຕ ນໂຣ ຠິກ຺ຂຸ ຫິ ຍສ຺ມາ ວິນຍປາຣໂຄ ວິນຍປິຏກສ຺ສ ປຣິຍນ຺ຕໍ ຄໂຕ ຫຸຕ຺ວາ ປາຣໂຄ ປາຣໍ ສໍສາຣສ຺ສ ປາຣສງ຺ຂາຕໍ ນິພ຺ພານໍ ຄຈ຺ຉນ຺ໂຕ ສິຍາ ຠເວຍ຺ຍາຕິ ໂຍຊນາ.

໙໕໙. ອໂຕຕິ ຕສ຺ມາເທວ ກາຣຓາ ອວປູຣໂຕຣໂຕ ປາປປູຣໂຕ ນິຣາສງ຺ກຕາຍ ໂອຣໂຕ ນິວຕ຺ໂຕ ປາປຠີຣຸໂກ ນໂຣ ຕມໍ ວິຘູຍ ປາປຠີຣຸກຕາຍ ເອວ ຈິຕ຺ຕປຣິຍຸຏ຺ຐານວເສນ ອຸປ຺ປຊ຺ຊນກໍ ໂມຫນ຺ຘກາຣໍ ຕທງ຺ຄປຫານວເສນ ວິຘເມຕ຺ວາ. ສພ຺ພງ຺ຄຓກມ຺ມທໍ ສພ຺ເພສໍ ຣາຄາທີນໍ ອງ຺ຄຓານໍ ກມ຺ມໍ ຕທງ຺ຄາທິປຫານໍ ທທາຕິ ອາວຫຕີຕິ ‘‘ສພ຺ພງ຺ຄຓກມ຺ມທ’’ນ຺ຕິ ລທ຺ຘນາມໍ ສຸຂສ຺ສ ປທໍ ໂລກິຍໂລກຸຕ຺ຕຣສ຺ສ ສຸຂສ຺ສ ກາຣຓໍ ຄຸຓສໍຫິຕໍ ສີລາທີຫິ ອຕ຺ຖຠູເຕຫິ ຄຸເຓຫິ ສໍຫິຕໍ ຍຸຕ຺ຕໍ ຄຸຓປ຺ປກາສກໍ ຫິຕໍ ອມໂຕສຘໍ ວິຍ ສພ຺ພໂທສສພ຺ພພ຺ຍາຘິຣຫິຕຕາຍ ອຊຣາອມຕາທິຄຸຓາວຫຕ຺ຕາ ຫິຕໍ ອິມໍ ອຸຕ຺ຕຣໍ ນາມ ປກຣຓໍ ສກ຺ກຈ຺ຈໍ ອາທໂຣ ຫຸຕ຺ວາ ນິຈ຺ຈໍ ສຕຕໍ ສິກ຺ເຂ ‘‘ເອວໍ ປຣິຈຍນ຺ຕໍ ກໂຣມີ’’ຕິ ຈິນ຺ເຕຕ຺ວາ ເອກນ຺ເຕນ ຍຖາວຸຕ຺ຕປໂຍຊນສາຘນໂຍຄ຺ຄໍ ກຕ຺ວາ ອຊ຺ເຌນາທິວເສນ ສິກ຺ເຂຍ຺ຍ ເອວ, ນ ອຊ຺ຌຸເປກ຺ຂໂກ ຠເວຍ຺ຍາຕິ ໂຍຊນາ.

໙໖໐. ປຏຸຠາວກເຣ ປາຕິໂມກ຺ຂສໍວຣສີລປູຣເຓ, ສາສນປຈ຺ຈຕ຺ຖິກາຠິຠວເນ ຈ ປຏຸຠາວໍ ເຉກຕ຺ຕໍ ເວສາຣຊ຺ຊໍ ກໂຣຕິ ອຕ຺ຕານໍ ຘາເຣນ຺ຕານໍ ລຊ຺ຊິປຸຄ຺ຄລານນ຺ຕິ ປຏຸຠາວກເຣ ປຣເມ ຕໂຕເຍວ ອຸຕ຺ຕເມ ປິຏເກ ວິນຍປິຏເກ ປຏຸຕໍ ປາຏວໍ ປຎ຺ຎາໂກສລ຺ລໍ ອຠິປຕ຺ຖຍນ຺ເຕນ ປຏຸນາ ຍຕິນາ ນິມ຺ມລປ຺ປວຕ຺ຕິເກນ ປຏຸນາ ວິຘິນາ ເຉເກນ ສາເຣນ ວິຘາເນນ ອິທໍ ສອຸຕ຺ຕຣໍ ວິນຍວິນິຈ຺ຉຍປກຣຓໍ ສຕຕໍ ນິຣນ຺ຕຣໍ ປຣິຍາປຸຓິຕພ຺ພໍ ອຸຄ຺ຄຫຓຘາຣຓປຣິປຸຈ຺ຉາຈິນ຺ຕນາທິວເສນ ສິກ຺ຂິຕພ຺ພນ຺ຕິ ໂຍຊນາ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ສພ຺ພສງ຺ກລນນຍກຖາວຓ຺ຓນາ ນິຏ຺ຐິຕາ.

ນິຄມນກຖາວຓ຺ຓນາ

໙໖໑-໓. ມເຫສິໂນ ຕິວິຘສ຺ສາປິ ສາສນສ຺ສ ສຸຈິຣຏ຺ຐິຕິກາເມນ ອຕິຈິຣກາລປ຺ປວຕ຺ຕິໍ ອິຈ຺ຉນ຺ເຕນ ຘີມຕາ ປສຕ຺ຖຕຣຎາເຓນ ສຸທ຺ຘຈິຕ຺ເຕນ ລາຠສກ຺ກາຣນິຣເປກ຺ຂຕາຍ ປຣິສຸທ຺ຘຊ຺ຌາສເຍນ ພຸທ຺ຘທຕ຺ເຕນ ພຸທ຺ຘທຕ຺ຕາຠິຘາເນນ ອາຈຣິຍວເຣນ ຣຈິໂຕ.

ປຊ຺ຊວເສນ ຄນ຺ຖໂຕ, ອຕ຺ຖໂຕ ເຈວ ປຣມຸຕ຺ຕໂຣ ອຸຕ຺ຕໂຣ ວິນິຈ຺ຉໂຍ ອນ຺ຕຣາຍໍ ອນ຺ຕເຣນ ອຊ຺ຌຕ຺ຕິກໍ, ພາຫິຣໍ ວາ ອນ຺ຕຣາຍໍ ວິນາ ຍຖາ ສິທ຺ຘິໍ ອຸປາຄໂຕ ປຣິນິຏ຺ຐານໍ ປຕ຺ໂຕ, ຕຖາ ສຕ຺ຕານໍ ຘມ຺ມສໍຍຸຕາ ກຸສລູປສໍຫິຕາ ສງ຺ກປ຺ປາ ມໂນຣຖາ ສິຊ຺ຌນ຺ຕຸ ອນ຺ຕຣາຍໍ ວິນາ ນິປ຺ປຊ຺ຊນ຺ຕຸ, ເອເຕນ ອຸຕ຺ຕຣວິນິຈ຺ຉຍຣຈນາມເຍນ ມຫຕາ ປຸຎ຺ໂຎທເຍນ ຈຕູຫິ ສງ຺ຄຫວຕ຺ຖູຫິ ຊນໍ ຣຎ຺ເຊຕີຕິ ‘‘ຣາຊາ’’ຕິ ສງ຺ຂໍ ຄໂຕ ມຫີປາໂລ ມຫິໍ ປຖວິສນ຺ນິສ຺ສິຕໍ ຊນກາຍໍ ສມ຺ມາ ຎາເຍນ ທສ ຣາຊຘມ຺ເມ ອໂກເປນ຺ໂຕ ປາເລຕຸ. ເທໂວ ປຊ຺ຊຸນ຺ໂນ ກາເລ ຖາວຣຊງ຺ຄມານໍ ອຸປໂຍຄາຣຫກາເລ ສມ຺ມາ ປວສ຺ສຕຸ ອວຸຏ຺ຐິອຕິວຸຏ຺ຐິກໍ ອກຕ຺ວາ ສມ຺ມາ ປວຈ຺ຉຕຸ.

໙໖໔. ເສລິນ຺ໂທ ສິເນຣຸປພ຺ພຕຣາຊາ ຍາວ ຕິຏ຺ຐຕິ ຍາວ ໂລເກ ປວຕ຺ຕຕິ, ຈນ຺ໂທ ສກລຊນປທນຍນສາຍໂນ ຍາວ ວິໂຣຈຕິ ຍາວ ອຕ຺ຕໂນ ສຠາວໍ ໂຊເຕຕິ, ຕາວ ຍສສ຺ສິໂນ ໂຄຕມສ຺ສ ອຣຫໂຕ ສມ຺ມາສມ຺ພຸທ຺ຘສ຺ສ ສທ຺ຘມ຺ໂມ ປຣິຍຕ຺ຕິປຏິປຕ຺ຕິປຏິເວຘວເສນ ຕິວິໂຘ ສທ຺ຘມ຺ໂມ ຕິຏ຺ຐຕຸ ປວຕ຺ຕຕຸ.

໙໖໕. ສີຫາທີນໍ, ທາຫາທີນຎ຺ຈ ພາຫິຣຊ຺ຌຕ຺ຕິການໍ ປຣິສ຺ສຍານໍ ຂມນໍ ສຫນໍ ອຠິຠວິຕ຺ວາ ປວຕ຺ຕນໍ ຂນ຺ຕິ. ໂສຣຈ຺ຈນ຺ຕິ ໂສຠເນ ຣໂຕຕິ ສຸຣໂຕ, ສຸຣຕສ຺ສ ຠາໂວ ໂສຣຈ຺ຈໍ. ສຸນ຺ທຣໍ ອຂຓ຺ຑຕາທິຄຸຓສມນ຺ນາຄຕໍ ສີລໍ ອສ຺ສາຕິ ສຸສີໂລ. ສຸສີລສ຺ສ ຠາໂວ.

ນິຄມນກຖາວຓ຺ຓນາ ນິຏ຺ຐິຕາ.

ອຸຕ຺ຕຣວິນິຈ຺ຉຍຏີກາ ນິຏ຺ຐິຕາ.

ອິຕິ ວິນຍຕ຺ຖສາຣສນ຺ທີປນີ ນາມ ວິນຍວິນິຈ຺ຉຍວຓ຺ຓນາ,

ລີນຕ຺ຖປກາສນີ ນາມ ອຸຕ຺ຕຣວິນິຈ຺ຉຍວຓ຺ຓນາ ຈ

ສມຕ຺ຕາ.

ປຈ຺ຉາ ຐປິຕຄາຖາໂຍ

ເຖເຣນ ຖິຣຈິຕ຺ເຕນ, ສາສນຸຊ຺ໂຊຕນຕ຺ຖິນາ;

ປຸຎ຺ຎວາ ຎາຓວາ ສີລີ, ສຸຫຊ຺ໂຊ ມຸທຸໂກ ຕຖາ.

ໂຍ ສີຫຬາຣິມທ຺ເທສຸ, ຈນ຺ທິມາ ສູຣິໂຍ ວິຍ;

ປາກໂຏ ສີວລິຕ຺ເຖໂຣ, ມຫາເຕໂຊ ມຫາຍໂສ.

ເຕນ ນີຕາ ສີຫຬາ ຍາ, ອິຘ ປຕ຺ຕາ ສຸຘີມຕາ;

ເອສາ ສໍວຓ຺ຓນາ ສີຫ-ຬກ຺ຂເຣນ ສຸລິກ຺ຂິຕາ.

ເຣວໂຕ ອິຕິ ນາເມນ, ເຖເຣນ ຖິຣເຈຕສາ;

ອຣິມທ຺ທິເກ ຣກ຺ຂນ຺ເຕນ, ປຣິວຕ຺ເຕຕ຺ວານ ສາຘຸກໍ.

ລິຂາປິຕາ ຫິຕຕ຺ຖາຍ, ຠິກ຺ຂູນໍ ອຣິມທ຺ທິເກ;

ເອສາ ສໍວຓ຺ຓນາ ສຸຏ຺ຐຸ, ສນ຺ນິຏ຺ຐານມຸປາຄຕາ;

ຕເຖວ ສພ຺ພສຕ຺ຕານໍ, ສພ຺ພຕ຺ໂຖ ຈ ສມິຊ຺ຌຕູຕິ.