ເສທໂມຈນກຖາວຓ຺ຓນາ

໖໗໙. ສຸຓຕໍ ສຸຓນ຺ຕານໍ ຠິກ຺ຂູນໍ ປຏຸຠາວກຣາ ວິນຍວິນິຈ຺ຉເຍ ປຎ຺ຎາໂກສລ຺ລສາຘິກາ ຕໂຕເຍວ ວຣາ ອຸຕ຺ຕມາ. ເສທໂມຈນຄາຖາໂຍຕິ ອຕ຺ຖປຈ຺ຈຕ຺ຖິການໍ, ສາສນປຈ຺ຈຕ຺ຖິການຎ຺ຈ ວິສ຺ສຊ຺ເຊຕຸມສກ຺ກຸເຓຍ຺ຍຠາເວນ ຈິນ຺ຕຍນ຺ຕສ຺ສ ຂິນ຺ນສຣີຣາ ເສເທ ໂມເຈນ຺ຕີຕິ ເສທໂມຈນາ. ອຕ຺ຖານຸຄຕປຎ຺ຫາ ອຸປາລິຕ຺ເຖເຣນ ຐປິຕາ ປຎ຺ຫຄາຖາໂຍ, ຕປ຺ປຏິພທ຺ຘາ ວິສ຺ສຊ຺ຊນຄາຖາໂຍ ຈ ອິໂຕ ປຣໍ ວກ຺ຂາມີຕິ ໂຍຊນາ.

໖໘໑. ກພນ຺ຘໍ ນາມ ອສີສໍ ອຸຣສິ ຊາຕອກ຺ຂິມຸຂສຣີຣໍ. ຍຖາຫ – ‘‘ອສີສກໍ ກພນ຺ຘໍ, ຍສ຺ສ ອຸເຣ ອກ຺ຂີນິ ເຈວ ມຸຂຎ຺ຈ ໂຫຕີ’’ຕິ (ປຣິ. ອຏ຺ຐ. ໔໗໙). ມຸເຂນ ກຣຓຠູເຕນ. ກຕ຺ວາຕິ ເສວິຕ຺ວາ.

໖໘໒. ຕສ຺ສ ຠິກ຺ຂຸໂນ ກຖໍ ປາຣາຊິໂກ ສິຍາ ປາຣາຊິກຘມ຺ໂມ ກຖໍ ສິຍາ.

໖໘໔. ກິຎ຺ຈີຕິ ປາທໍ ວາ ປາທາຣຫໍ ວາ ປຣສນ຺ຕກໍ. ປຣຎ຺ຈ ນ ສມາທເປຕິ ‘‘ອມຸກສ຺ສ ອິຕ຺ຖນ຺ນາມໍ ຠຓ຺ຑໍ ອວຫຣາຫີ’’ຕິ ປຣໍ ນ ອາຓາເປຍ຺ຍ.

໖໘໕. ປຣສ຺ສ ກິຎ຺ຈິ ນາທິຍນ຺ໂຕຕິ ສມ຺ພນ຺ໂຘ. ອາຓຕ຺ຕິຎ຺ຈາຕິ ຈ-ສທ຺ເທນ ສໍວິຘານໍ, ສງ຺ເກຕຎ຺ຈ ສງ຺ຄຓ຺ຫາຕິ.

໖໘໖. ຄຣຸກໍ ຠຓ຺ຑນ຺ຕິ ປາທຄ຺ຆນກຠາເວນ ຄຣຸຠຓ຺ຑໍ. ‘‘ປຣິກ຺ຂາຣ’’ນ຺ຕິ ເອຕສ຺ສ ວິເສສນໍ. ປຣສ຺ສ ປຣິກ຺ຂາຣນ຺ຕິ ປຣສນ຺ຕກໍ ຍໍ ກິຎ຺ຈິ ປຣິກ຺ຂາຣໍ.

໖໙໒. ມນຸສ຺ສຸຕ຺ຕຣິເກ ຘມ຺ເມຕິ ອຸຕ຺ຕຣິມນຸສ຺ສຘມ຺ມວິສເຍ. ກຕິກໍ ກຕ຺ວານາຕິ ‘‘ເອວໍ ນິສິນ຺ເນ ເອວໍ ຐິເຕ ເອວໍ ຄມເນ ອຕ຺ຖໍ ອາວິກໂຣຕີ’’ຕິອາທິໍ ກຕ຺ວາ. ສມ຺ຠາວນາຘິປ຺ປາໂຍຕິ ‘‘ອຣຫາ’’ຕິ ຄເຫຕ຺ວາ ມຫາສມ຺ຠາວນໍ ກໂຣຕີຕິ ອຘິປ຺ປາໂຍ ຫຸຕ຺ວາ. ອຕິກ຺ກມຕິ ເຈຕິ ຕຖາ ກຕໍ ກຕິກໍ ອຕິກ຺ກມຕິ ເຈ, ຕຖາຣູປໍ ນິສຊ຺ຊໍ ວາ ຐານໍ ວາ ຄມນໍ ວາ ກໂຣຕີຕິ ອຕ຺ໂຖ. ຈຸໂຕຕິ ຕຖາຣູປໍ ນິສຊ຺ຊາທິໍ ທິສ຺ວາ ເກນຈິ ມນຸສ຺ສຊາຕິເກນ ‘‘ອຣຫາ’’ຕິ ຕງ຺ຂເຓ ຎາເຕ ໂສ ປຸຄ຺ຄໂລ ປາຣາຊິກໍ ອາປຊ຺ຊຕິ.

໖໙໓. ເອກວຕ຺ຖຸກາ ກຖໍ ຠເວຍ຺ຍຸນ຺ຕິ ໂຍຊນາ.

໖໙໔. ອິຕ຺ຖິຍາຕິ ເອກິສ຺ສາ ອິຕ຺ຖິຍາ. ປຏິປຊ຺ຊນ຺ໂຕຕິ ເອກກ຺ຂເຓ ອຎ຺ເຎນ ປຸຣິເສນ ວຸຕ຺ຕສາສນໍ ວຕ຺ວາ, ອິມິນາ ຈ ‘‘ປຏິຄ຺ຄຓ຺ຫາຕິ, ວີມໍສຕີ’’ຕິ ອງ຺ຄທ຺ວຍສ຺ສ ປຸຣິມສິທ຺ຘຕໍ ທີເປຕິ ອິມສ຺ສ ປຈ຺ຈາຫຣຓກຕຎ຺ຈ. ກາຍສໍສຄ຺ຄໍ ສມາປຊ຺ຊິຕ຺ວາ ທຸຏ຺ຐຸລ຺ລໍ ວຕ຺ວາ ອຕ຺ຕກາມປາຣິຈຣິຍາຍ ວຓ຺ຓໍ ຠຓນ຺ໂຕ.

໖໙໕. ຍຖາວຸຕ຺ຕໍ ວຕ຺ຕໍ ອຈຣິຕ຺ວາຕິ ຠຄວຕາ ວຸຕ຺ຕໍ ປຣິວາສາທິວຕ຺ຕໍ ອຈຣິຕ຺ວາ.

໖໙໖. ຠິກ຺ຂຸນີຫິ ອສາຘາຣຓສິກ຺ຂາປທຕ຺ຕາ ອາຫ ‘‘ນຕ຺ຖິ ສງ຺ຆາທິເສສຕາ’’ຕິ.

໖໙໗. ເຍນ ກຸທ຺ໂຘ ປສໍສິໂຕຕິ ເອຕ຺ຖ ‘‘ນິນ຺ທິໂຕ ຈາ’’ຕິ ເສໂສ.

໖໙໘. ຕິຕ຺ຖິຍານໍ ວຓ຺ຓມ຺ຫິ ຠຎ຺ຎມາເນ ໂຍ ກຸຊ຺ຌຕິ, ໂສ ອາຣາຘໂກຕິ ໂຍຊນາ, ປຣິໂຕສິໂຕ ປສໍສິໂຕຕິ ອຘິປ຺ປາໂຍ. ຕິຕ຺ຖິຍປຸພ຺ໂພ ອິມສ຺ມິໍ ສາສເນ ປພ຺ພຊ຺ຊໍ ລຠິຕ຺ວາ ຕິຕ຺ຖິຍານໍ ວຓ຺ຓສ຺ມິໍ ຠຎ຺ຎມາເນ ສຸຕ຺ວາ ສເຈ ກຸປ຺ປຕິ ອນຕ຺ຕມນໍ ກໂຣຕິ, ອາຣາຘໂກ ສງ຺ຆາຣາຘໂກ ສງ຺ຆໍ ປຣິໂຕເສນ຺ໂຕ ໂຫຕິ, ສມ຺ພຸທ຺ຘສ຺ສ ວຓ຺ຓສ຺ມິໍ ຠຎ຺ຎມາເນ ຍທິ ກຸຊ຺ຌຕິ, ນິນ຺ທິໂຕຕິ ໂຍຊນາ. ເອຕ຺ຖ ສມ຺ພຸທ຺ຘສ຺ສາຕິ ອຸປລກ຺ຂຓໍ.

໗໐໑. ຄເຫຕ຺ວາຕິ ປຏິຄ຺ຄເຫຕ຺ວາ.

໗໕໑. ‘‘ນ ຣຕ຺ຕຈິຕ຺ໂຕ’’ຕິອາທິນາ ປຸຣິມານໍ ຕິຓ຺ຓໍ ປາຣາຊິການໍ ວີຕິກ຺ກມຈິຕ຺ຕຸປ຺ປາທມຕ຺ຕສ຺ສາປິ ອຠາວໍ ທີເປຕິ. ມຣຓາຍາຕິ ເອຕ຺ຖ ‘‘ມນຸສ຺ສຊາຕິກສ຺ສາ’’ຕິ ອິທໍ ປາຣາຊິກປກຣຓໂຕວ ລພ຺ຠຕິ. ຕສ຺ສາຕິ ກິຎ຺ຈິ ເທນ຺ຕສ຺ສ. ຕນ຺ຕິ ຕຖາ ທີຍມານໍ.

໗໕໒. ‘‘ປຣາຊໂຍ’’ຕິ ອິທໍ ອຠພ຺ພປຸຄ຺ຄເລສຸ ສງ຺ຆເຠທກສ຺ສ ອນ຺ໂຕຄຘຕ຺ຕາ ວຸຕ຺ຕໍ. ສລາກຄ຺ຄາເຫນາປິ ສງ຺ຆໍ ຠິນ຺ທນ຺ໂຕ ສງ຺ຆເຠທໂກວ ໂຫຕິ.

໗໕໓. ອທ຺ຘໂຍຊເນ ຍໍ ຕິຓ຺ຓໍ ຈີວຣານໍ ອຎ຺ຎຕຣໍ ເອກໍ ຈີວຣໍ ນິກ຺ຂິປິຕ຺ວານາຕິ ໂຍຊນາ.

໗໕໔. ສຸປ຺ປຕິຏ຺ຐິຕນິຄ຺ໂຣຘສທິເສ ຣຸກ຺ຂມູລເກ ຕິຈີວຣໍ ນິກ຺ຂິປິຕ຺ວາ ອທ຺ຘໂຍຊເນ ອຣຸຓໍ ອຸຏ຺ຐາເປນ຺ຕສ຺ສາຕິ ໂຍຊນາ.

໗໕໕. ກາຍິກາ ນານາວຕ຺ຖຸກາໂຍ ສມ຺ພຫຸລາ ອາປຕ຺ຕິໂຍ ອປຸພ຺ພໍ ອຈຣິມໍ ເອກກ຺ຂເຓ ກຖໍ ຜຸເສຕິ ໂຍຊນາ.

໗໕໗. ວາຈສິກາ ນ ກາຍິກາ ນານາວຕ຺ຖຸກາໂຍ ສມ຺ພຫຸລາ ອາປຕ຺ຕິໂຍ ອປຸພ຺ພໍ ອຈຣິມໍ ເອກກ຺ຂເຓ ກຖໍ ຜຸເສຕິ ໂຍຊນາ.

໗໕໘. ວິນຍນສຕ຺ເຖຕິ ວິນຍປິຏເກ. ຕສ຺ສ ຠິກ຺ຂຸສ຺ສ.

໗໕໙. ‘‘ອິຕ຺ຖິຍາ’’ຕິອາທີສຸ ສຫຕ຺ເຖ ກຣຓວຈນໍ. ອິຕ຺ຖິຍາ ວາ ປຸຣິເສນ ວາ ປຓ຺ຑເກນ ວາ ນິມິຕ຺ຕເກ ເມຖຸນໍ ນ ເສວນ຺ໂຕ ນ ປຏິເສວນ຺ໂຕ ເມຖຸນປຈ຺ຈຍາ ຈຸໂຕຕິ ໂຍຊນາ.

໗໖໐. ກາຍສໍສຄ຺ໂຄເຍວ ກາຍສໍສຄ຺ຄຕາ, ຕໍ ອາປນ຺ນາ. ອຏ຺ຐວຕ຺ຖຸກໍ ເຉຊ຺ຊນ຺ຕິ ເອວໍນາມກໍ ປາຣາຊິກໍ.

໗໖໒. ສມເຍ ປິຏ຺ຐິສຎ຺ຎິເຕຕິ ຄິມ຺ຫານໍ ປຈ຺ຉິມມາສສ຺ສ ປຐມທິວສໂຕ ຍາວ ເຫມນ຺ຕສ຺ສ ປຐມທິວໂສ, ເອຕ຺ຖນ຺ຕເຣ ສຕ຺ຕມາສມຕ຺ເຕ ປິຏ຺ຐິສຎ຺ຎິເຕ ສມເຍ. ‘‘ມາຕຸຍາປິ ຈາ’’ຕິ ວຕ຺ຕພ຺ເພ ‘‘ມາຕຣມ຺ປິ ຈາ’’ຕິ ວຸຕ຺ຕໍ. ໂສເຍວ ວາ ປາໂຐ.

໗໖໔. ‘‘ອວສ຺ສຸຕຫຕ຺ຖໂຕ ຫິ ປິຓ຺ຑໍ ຄເຫຕ຺ວາ’’ຕິ ອິມິນາ ສງ຺ຆາທິເສສສ຺ສ ວຕ຺ຖຸມາຫ, ລສຸຓນ຺ຕິ ປາຈິຕ຺ຕິຍສ຺ສ ວຕ຺ຖຸໍ, ມນຸສ຺ສມໍສນ຺ຕິ ຖຸລ຺ລຈ຺ຈຍວຕ຺ຖຸໍ, ອກປ຺ປມຎ຺ຎນ຺ຕິ ທຸກ຺ກຏວຕ຺ຖຸໍ. ອກປ຺ປມຎ຺ຎນ຺ຕິ ເອຕ຺ຖ ‘‘ມໍສ’’ນ຺ຕິ ເສໂສ. ‘‘ສພ຺ເພ ເອກໂຕ’’ຕິ ປທຈ຺ເຉໂທ. ເອກໂຕຕິ ເອຕ຺ຖ ‘‘ມທ຺ທິຕ຺ວາ’’ຕິ ເສໂສ, ອກປ຺ປິຍມໍເສຫິ ສທ຺ຘິໍ ເອກໂຕ ມທ຺ທິຕ຺ວາ ຂາທຕີຕິ ອຕ຺ໂຖ. ສພ຺ພເມຕໍ ‘‘ຄເຫຕ຺ວາ, ມທ຺ທິຕ຺ວາ, ຂາທຕີ’’ຕິ ກິຣິຍານໍ ກມ຺ມວຈນໍ. ມນຸສ຺ສມໍສຎ຺ຈາຕິ ເອຕ຺ຖ ຈ-ສທ຺ໂທ ປຈ຺ເຈກໍ ໂຍເຊຕພ຺ໂພ ໂຫຕິ. ຕສ຺ສາຕິ ຠິກ຺ຂຸນິຍາ. ສງ຺ຆາທິເສສປາຈິຕ຺ຕິຍທຸກ຺ກຏປາຏິເທສນີຍຖຸລ຺ລຈ຺ຈຍານິ ເອກກ຺ຂເຓ ໂຫນ຺ຕິ.

໗໖໕. ‘‘ປຸຄ຺ຄໂລ ເອໂກ’’ຕິ ປທຈ຺ເຉໂທ. ທ຺ເວປິ ຈ ປຸຓ຺ຓວສ຺ສາຕິ ປຣິປຸຓ຺ຓວີສຕິວສ຺ສາ ຈ ທ຺ເວ ສາມເຓຣາ. ເອກາວ ເຕສໍ ປນ ກມ຺ມວາຈາຕິ ເຕສໍ ອຸຠິນ຺ນໍ ສາມເຓຣານໍ ເອເກນ ອາຈຣິເຍນ ເອກາວ ອຸປສມ຺ປທກມ຺ມວາຈາ ກຕາ. ເອກສ຺ສາຕິ ເອກສ຺ສາປິ ສາມເຓຣສ຺ສ. ກມ຺ມນ຺ຕິ ອຸປສມ຺ປທກມ຺ມໍ. ນ ຣູຫເຕຕິ ນ ສມ຺ປຊ຺ຊຕິ, ກິເມຕ຺ຖ ກາຣຓໍ, ວທ ຠທ຺ທມຸຂາຕິ ອຘິປ຺ປາໂຍ.

໗໖໖. ມຫິທ຺ຘິເກສູຕິ ທ຺ວີສຸ ສາມເຓເຣສຸ. ສເຈ ປນ ເອໂກ ເກສຄ຺ຄມຕ຺ຕມ຺ປິ ອາກາສໂຄ ອາກາສຏ຺ໂຐ ໂຫຕິ, ອາກາສຄຕສ຺ເສວ ກຕໍ ຕໍ ອຸປສມ຺ປທກມ຺ມໍ ເນວ ຣູຫຕິ ເນວ ສມ຺ປຊ຺ຊຕິ, ຠູມິຄຕສ຺ສ ຣູຫຕີຕິ ໂຍຊນາ.

໗໖໗. ອິທ຺ຘິຍາ ອາກາເສ ຐິເຕນ ສງ຺ເຆນ ຠູມິຄຕສ຺ສ ສາມເຓຣສ຺ສ ອຸປສມ຺ປທກມ຺ມໍ ນ ກາຕພ຺ພໍ. ຍທິ ກໂຣຕິ, ກຸປ຺ປຕີຕິ ໂຍຊນາ. ອິທຎ຺ຈ ສພ຺ພກມ຺ມານໍ ສາຘາຣຓລກ຺ຂຓໍ. ຍຖາຫ – ‘‘ສງ຺ເຆນາປິ ອາກາເສ ນິສີທິຕ຺ວາ ຠູມິຄຕສ຺ສ ກມ຺ມໍ ນ ກາຕພ຺ພໍ. ສເຈ ກໂຣຕິ, ກຸປ຺ປຕີ’’ຕິ (ປຣິ. ອຏ຺ຐ. ໔໘໑).

໗໖໘. ວຕ຺ຖໍ ກປ຺ປກຕຎ຺ຈ ນ ໂຫຕິ, ຣຕ຺ຕຎ຺ຈ ນ ໂຫຕິ, ເກສກມ຺ພລາທິ ອກປ຺ປິຍຎ຺ຈ ໂຫຕິ, ນິວຕ຺ຖສ຺ສ ປນາປຕ຺ຕິ ຕໍ ປນ ນິວຕ຺ຖສ຺ສ ຠິກ຺ຂຸໂນ ອາປຕ຺ຕິ ໂຫຕິ. ອນາປຕ຺ຕິ ກຖໍ ສິຍາ, ວທ ຠທ຺ທມຸຂາຕິ ໂຍຊນາ.

໗໖໙. ເອຕ຺ຖ ເອຕສ຺ມິໍ ອກປ຺ປິຍວຕ຺ຖຸຘາຣເຓ ຕນ຺ນິມິຕ຺ຕໍ. ອຈ຺ຉິນ຺ນຈີວຣສ຺ສ ຠິກ຺ຂຸໂນ ອນາປຕ຺ຕິ ສິຍາຕິ ໂຍຊນາ. ‘‘ກິຎ຺ຈິປີ’’ຕິອາທິນາ ວຸຕ຺ຕເມວຕ຺ຖໍ ສມຕ຺ເຖຕິ. ອສ຺ສ ອຈ຺ຉິນ຺ນຈີວຣສ຺ສ ຠິກ຺ຂຸສ຺ສ ອກປ຺ປິຍໍ ນາມ ກິຎ຺ຈິປິ ຈີວຣໍ ນ ວິຊ຺ຊຕິ, ຕສ຺ມາ ອນາປຕ຺ຕີຕິ ອຘິປ຺ປາໂຍ.

໗໗໐. ກຸໂຕປິ ຈ ປຸຣິສສ຺ສ ຫຕ຺ຖໂຕ ໂຠຊນສ຺ສ ກິຎ຺ຈິ ນ ຄຓ຺ຫຕິ, ໂຠຊນໂຕ ກິຎ຺ຈິປິ ສຍມ຺ປິ ກສ຺ສຈິ ປຸຣິສສ຺ສ ນ ເທຕິ, ຕຖາປິ ຄຣຸກໍ ວຊ຺ຊໍ ສງ຺ຆາທິເສສາປຕ຺ຕິໍ ອຸເປຕິ ອາປຊ຺ຊຕິ, ຕໍ ກຖມາປຊ຺ຊຕິ, ຕ຺ວໍ ຍທິ ວິນເຍ ກຸສໂລ ອສິ, ເມ ມຍ຺ຫໍ ວທ ເອຕໍ ກາຣຓໍ ກເຖຫີຕິ ໂຍຊນາ. ຫເວຕິ ນິປາຕມຕ຺ຕໍ.

໗໗໑. ຍາ ປນ ຠິກ຺ຂຸນີ ອຎ຺ຎາຍ ຠິກ຺ຂຸນິຍາ ‘‘ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ’’ຕິອາທິນາ (ປາຈິ. ໗໐໕) ສງ຺ຆາທິເສສມາຕິກາຍ ວຸຕ຺ຕນເຍນ ອຸຍ຺ໂຍຊິຕາ ອວສ຺ສຸຕມ຺ຫາ ປຸຣິສປຸຄ຺ຄລາ ຍໍ ກິຎ຺ຈິ ໂຠຊນໍ ອາທາຍ ປຏິຄ຺ຄເຫຕ຺ວາ ສເຈ ຠຸຎ຺ຊຕິ, ສາ ຕຖາ ຠຸຎ຺ຊນ຺ຕີ ຍາຍ ອຸຍ຺ໂຍຊິຕາ ຠຸຎ຺ຊຕິ, ຕສ຺ສາ ອຸຍ຺ໂຍຊິກາຍ ຘີຣາ ວິນຍຘຣາ ປຓ຺ຑິຕາ ສງ຺ຆາທິເສສໍ ກຖຍນ຺ຕິ ຕສ຺ສາ ອຸຍ຺ໂຍຊິຕາຍ ໂຠຊນປຣິໂຍສາເນ ອຸຍ຺ໂຍຊິກາຍ ສງ຺ຆາທິເສສໍ ວທນ຺ຕີຕິ ໂຍຊນາ. ຍຖາຫ – ‘‘ຕສ຺ສາ ຫິ ໂຠຊນປຣິໂຍສາເນ ອຸຍ຺ໂຍຊິກາຍ ສງ຺ຆາທິເສໂສ ໂຫຕີ’’ຕິ (ປຣິ. ອຏ຺ຐ. ໔໘໑).

໗໗໒. ຕໍ ກຖໍ ຍທິ ພຸຊ຺ຌສິ ຊານາສິ, ສາຘຸກໍ ພ຺ຣູຫິ ກເຖຫີຕິ ໂຍຊນາ.

໗໗໓. ນິເສວິເຕຕິ ຕາຍ ອຸຍ຺ໂຍຊິຕາຍ ຠິກ຺ຂຸນິຍາ ຕສ຺ສ ປຸຣິສປຸຄ຺ຄລສ຺ສ ຫຕ຺ຖໂຕ ປຏິຄ຺ຄຫິເຕ ຕສ຺ມິໍ ທນ຺ຕໂປເນ ປຣິຠຸຕ຺ເຕ ອຸຍ຺ໂຍຊິກາ ລຫຸວຊ຺ຊໍ ອາປຊ຺ຊຕີຕິ ອຕ຺ໂຖ.

໗໗໕. ‘‘ອຸກ຺ຂິຕ຺ຕໂກ’’ຕິ ອິມິນາ ອາປຕ຺ຕິວຊ຺ຊມາຫ. ຍຖາຫ – ‘‘ເຕນ ຫິ ສທ຺ຘິໍ ວິນຍກມ຺ມໍ ນຕ຺ຖິ, ຕສ຺ມາ ໂສ ສງ຺ຆາທິເສສໍ ອາປຊ຺ຊິຕ຺ວາ ຉາເທນ຺ໂຕ ວຊ຺ຊໍ ນ ຜຸສຕີ’’ຕິ.

໗໗໖. ສປ຺ປາຓປ຺ປາຓຊນ຺ຕິ ສປ຺ປາຓເກ ຈ ອປ຺ປາຓເກ ຈ ຊາຕໍ. ເນວ ຊງ຺ຄມນ຺ຕິ ປາເທຫິ ຠູມິຍໍ ເນວ ຈຣນ຺ຕໍ. ນ ວິຫງ຺ຄມນ຺ຕິ ອາກາເສ ປກ຺ຂໍ ປສາເຣຕ຺ວາ ນ ຈຣນ຺ຕໍ. ທ຺ວິຊນ຺ຕິ ທ຺ວີຫິ ປຈ຺ຈເຍຫິ, ທ຺ວິກ຺ຂຕ຺ຕຸໍ ວາ ຊາຕຕ຺ຕາ ທ຺ວິຊໍ. ກນ຺ຕນ຺ຕິ ມໂນຫຣໍ. ອກນ຺ຕນ຺ຕິ ອມໂນຫຣໍ.

໗໗໗. ສປ຺ປາຓໂຊ ສທ຺ໂທ ຈິຕ຺ຕໂຊ ວຸຕ຺ໂຕ, ອປ຺ປາຓໂຊ ອຸຕຸໂຊ ສທ຺ໂທ ວຸຕ຺ໂຕ, ໂສ ປນ ທ຺ວີເຫວ ປຈ຺ຈເຍຫິ ຊາຕຕ຺ຕາ ‘‘ທ຺ວິໂຊ’’ຕິ ມໂຕຕິ ໂຍຊນາ.

໗໗໘. ‘‘ວິນເຍ’’ຕິອາທິຄາຖາ ວຓ຺ຓິຕຕ຺ຖາເຍວ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ເສທໂມຈນກຖາວຓ຺ຓນາ ນິຏ຺ຐິຕາ.