ອາປຕ຺ຕິສມຸຏ຺ຐານກຖາວຓ຺ຓນາ

໔໐໕. ອາທິນາຕິ ປຐເມນ ກາຍສງ຺ຂາເຕນ ສມຸຏ຺ຐາເນນ.

໔໐໖-໗. ທຸກ຺ກຏາທໂຍຕິ ອາທິ-ສທ຺ເທນ ຖຸລ຺ລຈ຺ຈຍສງ຺ຆາທິເສສາ ຄຫິຕາ. ຍຖາຫ – ‘‘ປໂຍເຄ ທຸກ຺ກຏໍ. ເອກໍ ປິຓ຺ຑໍ ອນາຄເຕ ອາປຕ຺ຕິ ຖຸລ຺ລຈ຺ຈຍສ຺ສ. ຕສ຺ມິໍ ປິຓ຺ເຑ ອາຄເຕ ອາປຕ຺ຕິ ສງ຺ຆາທິເສສສ຺ສາ’’ຕິ (ປຣິ. ໒໗໗). ວິກາເລ ປນ ປາຈິຕ຺ຕີຕິ ວິກາລໂຠຊນປາຈິຕ຺ຕິ. ອຎ຺ຎາຕິຫຕ຺ຖໂຕຕິ ອຎ຺ຎາຕິກາຍ ຠິກ຺ຂຸນິຍາ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ. ຄເຫຕ຺ວາຕິ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ. ‘‘ປຎ຺ຈ ອິມາ ອາປຕ຺ຕິໂຍ’’ຕິ ປທຈ຺ເຉໂທ.

໔໐໘. ທຸຕິເຍນາຕິ ວາຈາສງ຺ຂາເຕນ ສມຸຏ຺ຐາເນນ.

໔໐໙-໑໐. ສມາທິສຕິ ກເຖຕິ ເຈ. ສພ຺ພຖາ ວິປນ຺ນນ຺ຕິ ອເທສິຕວຕ຺ຖຸກຕາທິນາ ສພ຺ພປ຺ປກາເຣນ ວິປນ຺ນປ຺ປເທສໍ. ກຸຏິນ຺ຕິ ສຎ຺ຎາຈິກາຍ ກຸຏິໍ. ຍຖາຫ ປຣິວາເຣ ‘‘ຕສ຺ສ ກຸຏິໍ ກໂຣນ຺ຕິ ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນ’’ນ຺ຕິ (ປຣິ. ໒໗໘). ປທໂສຘມ຺ມໍ ມູລໍ ສມຸຏ຺ຐານໍ ຍສ຺ສ ປາຈິຕ຺ຕິຍສ຺ສາຕິ ຕຖາ ວຸຕ຺ຕໍ, ເຕນ ປທໂສຘມ຺ມມູເລນ, ສຫຕ຺ເຖ ເຈຕໍ ກຣຓວຈນໍ.

໔໑໑. ຕຕິເຍນ ສມຸຏ຺ຐາເນນາຕິ ກາຍວາຈາສງ຺ຂາເຕນ ສມຸຏ຺ຐາເນນ.

໔໑໒. ສໍວິທຫິຕ຺ວານາຕິ ສທ຺ຘິໍ ວິທຫິຕ຺ວາ, ‘‘ກຸຏິໍ ກໂຣມາ’’ຕິ ອຎ຺ເຎຫິ ສທ຺ຘິໍ ມນ຺ເຕຕ຺ວາຕິ ອຕ຺ໂຖ.

໔໑໓. ວຕ຺ວາຕິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ. ຠິກ຺ຂຸນິນ຺ຕິ ຠິກ຺ຂູນໍ ຠຸຎ຺ຊນຏ຺ຐາເນ ຐຕ຺ວາ ‘‘ອິຘ ສູປໍ ເທຖ, ອິຘ ໂອທນໍ ເທຖາ’’ຕິ ໂວສາສມານໍ ອຸປາສການໍ ວຕ຺ວາ ທາເປນ຺ຕິໍ ຠິກ຺ຂຸນິໍ. ນ ນິວາເຣຕ຺ວາຕິ ‘‘ອປສກ຺ກ ຕາວ, ຠຄິນິ, ຍາວ ຠິກ຺ຂູ ຠຸຎ຺ຊນ຺ຕີ’’ຕິ ອນປສາເທຕ຺ວາ ຠຸຎ຺ຊໂຕຕິ ໂຍຊນາ.

໔໑໔. ຈຕຸຕ຺ເຖນ ກາຍຈິຕ຺ຕສມຸຏ຺ຐາເນນ ກຕິ ອາປຕ຺ຕິໂຍ ສິຍຸນ຺ຕິ ໂຍຊນາ.

໔໑໗. ປຎ຺ຈເມນາຕິ ວາຈາຈິຕ຺ຕສມຸຏ຺ຐາເນນ. ວທນ຺ຕິ ວທນ຺ໂຕ ສມຸທາຈຣນ຺ໂຕ.

໔໑໘. ກຸຏິນ຺ຕິ ນິທສ຺ສນມຕ຺ຕໍ, ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ສາຣມ຺ຠໍ ອປຣິກ຺ກມນໍ ເສນາສນມ຺ປິ ຄຫຓໍ ເວທິຕພ຺ພໍ.

໔໑໙. ວາເຈຕິ ປທໂສ ຘມ຺ມນ຺ຕິ ເອຕ຺ຖ ‘‘ອນຸປສມ຺ປນ຺ນ’’ນ຺ຕິ ເສໂສ. ຍຖາຫ – ‘‘ຠິກ຺ຂຸ ອກປ຺ປິຍສຎ຺ຎີ ອນຸປສມ຺ປນ຺ນໍ ປທໂສ ຘມ຺ມໍ ວາເຈຕີ’’ຕິ (ປຣິ. ໒໘໑). ທວກມ຺ຍຕາ ວທນ຺ຕສ຺ສາຕິ ຊາຕິອາທີຫິ ອກ຺ໂກສວຕ຺ຖູຫິ ກີຬາຘິປ຺ປາເຍນ ວທນ຺ຕສ຺ສ. ທວກມ຺ຍຕາຕິ ຈ ‘‘ປຏິສງ຺ຂາ ໂຍນິໂສ’’ຕິອາທີສຸ (ມ. ນິ. ໑.໒໒, ໒໔, ໔໒໒; ອ. ນິ. ໖.໕໘; ໘.໙; ມຫານິ. ໑໙໙, ໒໐໖; ຘ. ສ. ໑໓໕໕; ວິຠ. ໕໑໘) ວິຍ ຍ-ກາຣໂລເປນ ນິທ຺ເທໂສ.

໔໒໐. ຉຏ຺ເຐນ ກາຍວາຈາຈິຕ຺ຕສມຸຏ຺ຐາເນນ. ສໍວິທຫິຕ຺ວານາຕິ ສໍວິຘາຍ, ‘‘ຕ຺ວຎ຺ຈ ອຫຎ຺ຈ ເອກໂຕ ອວຫຣິສ຺ສາມາ’’ຕິ ສມ຺ມນ຺ຕນໍ ກຕ຺ວາ. ຠຓ຺ຑໍ ຫຣຕີຕິ ‘‘ຠາຣິຍໍ ຕ຺ວໍ ເອກໍ ປສ຺ສໍ ຄຓ຺ຫ, ອຫໍ ອິມ’’ນ຺ຕິ ວຕ຺ວາ ເຕນ ສຫ ຐານາ ຈາເວຕິ ເຈ.

໔໒໓. ອິຘ ອິມສ຺ມິໍ ສາສເນ. ວິມຕູປຣມໍ ປຣມນ຺ຕິ ເອຕ຺ຖ ‘‘ກປ຺ປິຍໍ ນຸ ໂຂ, ອກປ຺ປິຍ’’ນ຺ຕິ ວາ ‘‘ອາປຕ຺ຕິ ນຸ ໂຂ, ອນາປຕ຺ຕີ’’ຕິ ວາ ‘‘ຘມ຺ໂມ ນຸ ໂຂ, ອຘມ຺ໂມ’’ຕິ ວາ ເອວມາທິນາ ນເຍນ ວິວິເຘນາກາເຣນ ປວຕ຺ຕາ ວິມຕິ ວິຈິກິຈ຺ຉາ ວິມຕິ. ວິມຕິໍ ອຸປຣເມຕິ ວິນາເສຕີຕິ ວິມຕູປຣມໍ. ປຣມໍ ອຸຕ຺ຕມໍ. ອຸຕ຺ຕຣນ຺ຕິ ວິຠງ຺ຄຂນ຺ຘກາຄຕານໍ ນິທານາທິວິນິຈ຺ຉຍານໍ ປຎ຺ຫອຸຕ຺ຕຣຠາເວນ ຐິຕຕ຺ຕາ ອຸຕ຺ຕຣໍ. ອິມໍ ອຸຕ຺ຕຣໍ ນາມ ປກຣຓໍ ໂຍ ອຸຕ຺ຕຣຕິ ປຎ຺ຎາຍ ໂອຄາເຫຕ຺ວາ ປຣິໂຍສາເປຕິ. ອິຘ ‘‘ອຸຕ຺ຕຣໍ ອຸຕ຺ຕຣ’’ນ຺ຕິ ປທທ຺ວເຍ ເອກໍ ຄຸຓນິທສ຺ສນໍ, ເອກໍ ສຕ຺ຖນິທສ຺ສນນ຺ຕິ ຄເຫຕພ຺ພໍ. ສຸນເຍນ ຍຸໂຕ ໂສ ປຸຄ຺ຄໂລ ວິນຍໍ ປິຏກໍ ອຸຕ຺ຕຣຕີຕິ ສມ຺ພນ຺ໂຘ. ກິໍ ວິສິຏ຺ຐນ຺ຕິ ອາຫ ‘‘ສຸນຍ’’ນ຺ຕິອາທິ. ສຸຏ຺ຐຸ ຈາຣິຕ຺ຕວາຣິຕ຺ຕທຬ຺ຫີກຣຓສິຖິລກຣຓເຠທາ ປຎ຺ຎຕ຺ຕິອນອຸປຎ຺ຎຕ຺ຕາທິນຍາ ເອຕ຺ຖາຕິ ສຸນໂຍ, ຕໍ. ສຸຏ຺ຐຸ ນີຍຕິ ວິນິຈ຺ຉໂຍ ເອເຕນາຕິ ສຸນໂຍ, ອຸຕ຺ຕຣວິນິຈ຺ຉໂຍ, ເຕນ. ວິນິຈ຺ຉຍາວໂພເຘນ ສໍຍຸຕ຺ໂຕ ສມນ຺ນາຄໂຕ. ທຸກ຺ເຂນ ອຸຕ຺ຕຣີຍຕີຕິ ທຸຕ຺ຕຣໍ. ປາຕິໂມກ຺ຂສໍວຣສີລທີປກຕ຺ເຕນ ສມາຘິປຎ຺ຎານິພ຺ພານສງ຺ຂາຕອຸຕ຺ຕຣປ຺ປຕ຺ຕິຍາ ປຕິຏ຺ຐາຠາວໂຕ ອຸຕ຺ຕຣໍ ອຸຕ຺ຕຣຕິ ໂອຄາເຫຕ຺ວາ ປຣິໂຍສານໍ ປາປຸຓາຕີຕິ ອຕ຺ໂຖ.

ອິຘ ໂຍ ວິມຕູປຣມໍ ປຣມໍ ອຸຕ຺ຕຣໍ ອຸຕ຺ຕຣໍ ນາມ ປກຣຓໍ ອຸຕ຺ຕຣຕິ, ສຸນເຍນ ຍຸໂຕ ໂສ ປຸຄ຺ຄໂລ ສຸນຍໍ ທຸຕ຺ຕຣໍ ອຸຕ຺ຕຣໍ ວິນຍໍ ອຸຕ຺ຕຣຕີຕິ ໂຍຊນາ. ຈ-ສທ຺ເທນ ສຕ຺ຖນ຺ຕຣສມຸຈ຺ຈຍຕ຺ເຖນ ອິມມຕ຺ຖໍ ທີເປຕິ. ເສຍ຺ຍຖິທໍ, ອິຘ ໂຍ ສຸນຍໍ ທຸຕ຺ຕຣໍ ອຸຕ຺ຕຣໍ ວິນຍໍ ອຸຕ຺ຕຣຕິ, ສຸນເຍນ ຍຸໂຕ ໂສ ປຸຄ຺ຄໂລ ວິມຕູປຣມໍ ປຣມໍ ອຸຕ຺ຕຣໍ ອຸຕ຺ຕຣໍ ນາມ ປກຣຓໍ ອຸຕ຺ຕຣຕີຕິ. ອິມິນາ ໂຍ ອຸຕ຺ຕຣໍ ຊານາຕິ, ໂສ ວິນຍໍ ຊານາຕິ. ໂຍ ວິນຍໍ ຊານາຕິ, ໂສ ອຸຕ຺ຕຣໍ ຊານາຕີຕິ ອຸຕ຺ຕຣປກຣຓສ຺ສ ວິນຍປິຏກຊານເນ ອຈ຺ຈນ຺ຕູປກາຣິຕາ ວິຠາວິຕາຕິ ທຏ຺ຐພ຺ພໍ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ອາປຕ຺ຕິສມຸຏ຺ຐານກຖາວຓ຺ຓນາ ນິຏ຺ຐິຕາ.