ສມຸຏ຺ຐານສີສກຖາວຓ຺ຓນາ

໓໒໕-໖. ມເຫສິນາ ທ຺ວີສຸ ວິຠງ຺ເຄສຸ ປຎ຺ຎຕ຺ຕານິ ຍານິ ປາຣາຊິກາທີນິ ສິກ຺ຂາປທານິ ອຸໂປສເຖ ອຸທ຺ທິສນ຺ຕິ, ເຕສໍ ສິກ຺ຂາປທານໍ ສມຸຏ຺ຐານໍ ຠິກ຺ຂູນໍ ປາຏວຕ຺ຖາຍ ອິໂຕ ປຣໍ ປວກ຺ຂາມິ, ຕໍ ສມາຫິຕາ ສຸຓາຖາຕິ ໂຍຊນາ.

໓໒໗. ກາໂຍ ຈ ວາຈາ ຈ ກາຍວາຈາ ຈາຕິ ອຈິຕ຺ຕການິ ຍານິ ຕີຓິ ສມຸຏ຺ຐານານິ, ຕາເນວ ຈິຕ຺ເຕນ ປຈ຺ເຈກໍ ໂຍຊິຕານິ ສຈິຕ຺ຕການິ ຕີຓິ ສມຸຏ຺ຐານານິ ໂຫນ຺ຕີຕິ ເອວເມວ ສມຸຏ຺ຐານໍ ປຸຣິມານໍ ທ຺ວິນ຺ນໍ ວເສນ ເອກງ຺ຄິກໍ, ຕຕິຍຈຕຸຕ຺ຖປຎ຺ຈມານໍ ວເສນ ທ຺ວງ຺ຄິກໍ, ຉຏ຺ຐສ຺ສ ວເສນ ຕິວງ຺ຄິກຎ຺ຈາຕິ ເອວໍ ຉຘາ ສມຸຏ຺ຐານວິຘິໍ ວທນ຺ຕີຕິ ໂຍຊນາ. ກາໂຍ, ວາຈາຕິ ເອກງ຺ຄິກໍ ທ຺ວຍໍ, ກາຍວາຈາ, ກາຍຈິຕ຺ຕໍ, ວາຈາຈິຕ຺ຕນ຺ຕິ ທຸວງ຺ຄິກຕ຺ຕຍໍ, ກາຍວາຈາຈິຕ຺ຕນ຺ຕິ ອງ຺ຄເຠເທນ ຕິວິຘມ຺ປິ ອວຍວເຠເທນ ສມຸຏ຺ຐານເຠທວິຘິໍ ຉປ຺ປກາຣໍ ວທນ຺ຕີຕິ ອຘິປ຺ປາໂຍ.

໓໒໘. ເຕສຸ ຉສຸ ສມຸຏ຺ຐາເນສຸ ເອເກນ ວາ ສມຸຏ຺ຐາເນນ ທ຺ວີຫິ ວາ ຕີຫິ ວາ ຈຕູຫິ ວາ ຉຫິ ວາ ສມຸຏ຺ຐາເນຫິ ນານາ ອາປຕ຺ຕິໂຍ ຊາຍເຣຕິ ສມ຺ພນ຺ໂຘ.

໓໒໙. ຕຕ຺ຖ ຕາສຸ ນານາປຕ຺ຕີສຸ. ປຎ຺ຈ ສມຸຏ຺ຐານານິ ເອຕິສ຺ສາຕິ ປຎ຺ຈສມຸຏ຺ຐານາ, ເອວຣູປາ ກາຈິ ອາປຕ຺ຕິ ນ ວິຊ຺ຊຕິ. ເອກເມກໍ ສມຸຏ຺ຐານໍ ຍາສນ຺ຕິ ວິຄ຺ຄໂຫ. ປຈ຺ຉິເມເຫວ ຕີຫິປີຕິ ສຈິຕ຺ຕເກເຫວ ຕີຫິ ສມຸຏ຺ຐາເນຫິ, ຍາ ອາປຕ຺ຕິ ເອກສມຸຏ຺ຐານາ ໂຫຕິ, ສາ ສຈິຕ຺ຕການໍ ຕິຓ຺ຓມຎ຺ຎຕເຣນ ໂຫຕີຕິ ອຘິປ຺ປາໂຍ.

໓໓໐-໑. ຕຕິຍຈ຺ຉຏ຺ຐໂຕປິ ຈາຕິ ກາຍວາຈໂຕ, ກາຍວາຈາຈິຕ຺ຕໂຕ ຈ. ຈຕຸຕ຺ຖຈ຺ຉຏ຺ຐໂຕ ເຈວາຕິ ກາຍຈິຕ຺ຕໂຕ ກາຍວາຈາຈິຕ຺ຕໂຕ ຈ. ປຎ຺ຈມຈ຺ຉຏ຺ຐໂຕປິ ຈາຕິ ວາຈາຈິຕ຺ຕໂຕ ກາຍວາຈາຈິຕ຺ຕໂຕ ຈ. ‘‘ກາຍໂຕ ກາຍຈິຕ຺ຕໂຕ’’ຕິ ປຐມໍ ທ຺ວິສມຸຏ຺ຐານໍ, ‘‘ວາຈໂຕ ວາຈາຈິຕ຺ຕໂຕ’’ຕິ ທຸຕິຍໍ, ‘‘ກາຍວາຈໂຕ ກາຍວາຈາຈິຕ຺ຕໂຕ’’ຕິ ຕຕິຍໍ, ‘‘ກາຍຈິຕ຺ຕໂຕ ກາຍວາຈາຈິຕ຺ຕໂຕ’’ຕິ ຈຕຸຕ຺ຖໍ, ‘‘ວາຈາຈິຕ຺ຕໂຕ ກາຍວາຈາຈິຕ຺ຕໂຕ’’ຕິ ປຎ຺ຈມໍ ທ຺ວິສມຸຏ຺ຐານນ຺ຕິ ເອວໍ ປຎ຺ຈຘາ ເອວ ຐິເຕຫິ ທ຺ວີຫິ ສມຸຏ຺ຐາເນຫິ ເອສາ ທ຺ວິສມຸຏ຺ຐານາປຕ຺ຕິ ຊາຍເຕ ສມຸຏ຺ຐາຕິ. ນ ອຎ຺ຎໂຕຕິ ກາຍໂຕ ວາຈໂຕຕິ ເອກໍ, ວາຈໂຕ ກາຍວາຈໂຕຕິ ເອກນ຺ຕິ ເອວໍ ຍຖາວຸຕ຺ຕກ຺ກມວິປຣິຍາເຍນ ໂຍຊິເຕຫິ ອຎ຺ເຎຫິ ສມຸຏ຺ຐາເນຫິ ນ ສມຸຏ຺ຐາຕິ.

໓໓໒. ປຐເມຫິ ຈ ຕີຫີຕິ ‘‘ກາຍໂຕ, ວາຈໂຕ, ກາຍວາຈໂຕ’’ຕິ ປຐມໍ ນິທ຺ທິຏ຺ເຐຫິ ຕີຫິ ອຈິຕ຺ຕກສມຸຏ຺ຐາເນຫິ. ປຈ຺ຉິເມຫິ ຈາຕິ ‘‘ກາຍຈິຕ຺ຕໂຕ, ວາຈາຈິຕ຺ຕໂຕ, ກາຍວາຈາຈິຕ຺ຕໂຕ’’ຕິ ເອວໍ ປຈ຺ຉາ ວຸຕ຺ເຕຫິ ສຈິຕ຺ຕເກຫິ ຕີຫິ ສມຸຏ຺ຐາເນຫິ. ນ ອຎ຺ຎໂຕຕິ ‘‘ກາຍໂຕ, ວາຈໂຕ, ກາຍຈິຕ຺ຕໂຕ, ວາຈໂຕ, ກາຍວາຈໂຕ, ກາຍຈິຕ຺ຕໂຕ’’ຕິ ເອວໍ ວຸຕ຺ຕວິປລ຺ລາສໂຕ ອຎ຺ເຎຫິ ຕີຫິ ສມຸຏ຺ຐາເນຫິ ນ ສມຸຏ຺ຐາຕິ.

໓໓໓-໔. ປຐມາ ຕຕິຍາ ເຈວ, ຈຕຸຕ຺ຖຈ຺ຉຏ຺ຐໂຕປິ ຈາຕິ ກາຍໂຕ, ກາຍວາຈໂຕ, ກາຍຈິຕ຺ຕໂຕ, ກາຍວາຈາຈິຕ຺ຕໂຕຕິ ເອເຕຫິ ຈຕູຫິ ສມຸຏ຺ຐາເນຫິ ເຈວ. ທຸຕິຍາ…ເປ… ຈ຺ຉຏ຺ຐໂຕປິ ຈາຕິ ວາຈໂຕ, ກາຍວາຈໂຕ, ວາຈາຈິຕ຺ຕໂຕ, ກາຍວາຈາຈິຕ຺ຕໂຕຕິ ອິເມຫິ ຈຕູຫິ ຈາຕິ ຈຕຸສມຸຏ຺ຐາເນນາປຕ຺ຕິ.

ສາ ເອວໍ ທ຺ວິຘາ ຐິເຕຫິ ຈຕູຫິ ສມຸຏ຺ຐາເນຫິ ຊາຍເຕ. ນ ປນຎ຺ຎໂຕຕິ ‘‘ກາຍໂຕ, ວາຈໂຕ, ກາຍວາຈໂຕ, ກາຍຈິຕ຺ຕໂຕ’’ຕິ ເອວມາທິນາ ວິປລ຺ລາສນເຍນ ໂຍຊິເຕຫິ ຈຕູຫິ ສມຸຏ຺ຐາເນຫິ ນ ສມຸຏ຺ຐາຕິ. ຉ ສມຸຏ຺ຐານານິ ຍສ຺ສາ ສາ ຉສມຸຏ຺ຐານາ. ສຈິຕ຺ຕເກຫິ ຕີຫິ, ອຈິຕ຺ຕເກຫິ ຕີຫີຕິ ຉຫິ ເອວ ສມຸຏ຺ຐາເນຫິ ສມຸຏ຺ຐາຕີຕິ. ປກາຣນ຺ຕຣາຠາວາ ອິຘ ‘‘ນ ອຎ຺ຎໂຕ’’ຕິ ນ ວຸຕ຺ຕໍ.

ອາຫ ຈ ອຏ຺ຐກຖາຈຣິໂຍ ມາຕິກຏ຺ຐກຖາຍໍ.

໓໓໕. ສມຸຏ຺ຐາຕິ ເອຕສ຺ມາຕິ ສມຸຏ຺ຐານໍ, ກາຍາທິ ຉພ຺ພິຘໍ, ເອກໍ ສມຸຏ຺ຐານໍ ກາຣຓໍ ຍສ຺ສາ ສາ ເອກສມຸຏ຺ຐານາ. ປກາຣນ຺ຕຣາຠາວາ ຕິຘາ. ກຖໍ? ສຈິຕ຺ຕການໍ ຕິຓ຺ຓໍ ສມຸຏ຺ຐານານໍ ວເສນ ຕິວິຘາ. ທ຺ວີຫິ ສມຸຏ຺ຐາເນຫິ ສມຸຏ຺ຐິຕາ ທ຺ວິສມຸຏ຺ຐິຕາ, ທ຺ວິສມຸຏ຺ຐານາປຕ຺ຕີຕິ ອຕ຺ໂຖ. ປຎ຺ຈຘາຕິ ວຸຕ຺ຕນເຍນ ປຎ຺ຈປ຺ປກາຣາ. ຕີຓິ ສມຸຏ຺ຐານານິ ຍສ຺ສາ ສາ ຕິສມຸຏ຺ຐານາ, ຈຕ຺ຕາຣິ ສມຸຏ຺ຐານານິ ຍສ຺ສາ ສາ ຈຕຸຣຸຏ຺ຐານາ, ຕິສມຸຏ຺ຐານາ ຈ ຈຕຸຣຸຏ຺ຐານາ ຈ ຕິຈຕຸຣຸຏ຺ຐານາຕິ ເອກເທສສຣູເປກເສໂສ, ຕິສມຸຏ຺ຐານາ ທ຺ວິຘາ ວິຠຕ຺ຕາ, ຈຕຸສມຸຏ຺ຐານາ ຈ ທ຺ວິຘາ ເອວ ວິຠຕ຺ຕາຕິ ອຕ຺ໂຖ. ຉຫິ ສມຸຏ຺ຐາເນຫິ ສມຸຏ຺ຐິຕາ ຉສມຸຏ຺ຐິຕາ, ຉສມຸຏ຺ຐານາຕິ ອຕ຺ໂຖ. ເອກຘາຕິ ປກາຣນ຺ຕຣາຠາວາ ເອກຘາວ ຐິຕາຕິ ອຘິປ຺ປາໂຍ.

໓໓໖. ສພ຺ພາ ອາປຕ຺ຕິໂຍ ສມຸຏ຺ຐານວິເສສໂຕ ເອວໍ ເຕຣສຘາ ຐິຕານໍ ສມຸຏ຺ຐານເຠທານໍ ນານຕ຺ຕໂຕ ເຕຫິ ສມຸຏ຺ຐິຕານໍ ປຐມໍ ປຎ຺ຎຕ຺ຕຕ຺ຕາ ສີສຠູຕານໍ ສິກ຺ຂາປທານໍ ວເສນ ເຕຣເສວ ນາມານິ ລຠນ຺ຕິ, ຕານິ ອິໂຕ ປຣໍ ວກ຺ຂາມີຕິ ໂຍຊນາ.

໓໓໗. ປຐມນ຺ຕິມວຕ຺ຖຸຎ຺ຈາຕິ ປຐມປາຣາຊິກສມຸຏ຺ຐານໍ. ທຸຕິຍນ຺ຕິ ອທິນ຺ນາທານສມຸຏ຺ຐານໍ. ສຎ຺ຈຣິຕ຺ຕກນ຺ຕິ ສຎ຺ຈຣິຕ຺ຕສມຸຏ຺ຐານໍ. ສມນຸຠາສນນ຺ຕິ ສມນຸຠາສນສມຸຏ຺ຐານໍ. ‘‘ກຖິນໍ ເອຬກໂລມກ’’ນ຺ຕິ ປທຈ຺ເຉໂທ, ກຖິນສມຸຏ຺ຐານໍ ເອຬກໂລມສມຸຏ຺ຐານຎ຺ຈ.

໓໓໘. ປທໂສຘມ຺ມນ຺ຕິ ປທໂສຘມ຺ມສມຸຏ຺ຐານໍ. ອທ຺ຘານໍ ເຖຍ຺ຍສຕ຺ຖນ຺ຕິ ອທ຺ຘານສມຸຏ຺ຐານໍ ເຖຍ຺ຍສຕ຺ຖສມຸຏ຺ຐານໍ. ເທສນາຕິ ຘມ຺ມເທສນາສມຸຏ຺ຐານໍ. ຠູຕາໂຣຈນກນ຺ຕິ ຠູຕາໂຣຈນສມຸຏ຺ຐານໍ. ໂຈຣິວຸຏ຺ຐາປນນ຺ຕິ ໂຈຣິວຸຏ຺ຐາປນສມຸຏ຺ຐານໍ.

໓໓໙. ອນນຸຎ຺ຎາຕກຎ຺ຈາຕິ ອນນຸຎ຺ຎາຕກສມຸຏ຺ຐານຎ຺ຈາຕິ ເອຕານິ ເຕຣສ ເຕຫິ ສມຸຏ຺ຐາເນຫິ ສມຸຏ຺ຐິຕານໍ ເຕສໍ ສິກ຺ຂາປທານໍ ປຐມໍ ປຐມໍ ນິທ຺ທິຏ຺ຐານໍ ປຐມປາຣາຊິກາທິສິກ຺ຂາປທສມຸຏ຺ຐານານໍ ອິຕເຣສໍ ປຸພ຺ພງ຺ຄມຠາວໂຕ ‘‘ສີສານີ’’ຕິ ວຸຕ຺ຕານິ. ຍຖາຫ ປຣິວາຣຏ຺ຐກຖາຍໍ ‘‘ປຐມປາຣາຊິກໍ ນາມ ເອກໍ ສມຸຏ຺ຐານສີສໍ, ເສສານິ ເຕນ ສທິສານີ’’ຕິອາທິ (ປຣິ. ອຏ຺ຐ. ໒໕໘). ເຕຣເສເຕ ສມຸຏ຺ຐານນຍາຕິ ເອເຕ ສີສວເສນ ທສ຺ສິຕາ ເຕຣສ ສມຸຏ຺ຐານນຍາ. ວິຎ຺ຎູຫິ ອຸປາລິຕ຺ເຖຣາທີຫິ.

໓໔໐. ຕຕ຺ຖ ເຕຣສສຸ ສມຸຏ຺ຐານສີເສສຸ. ຍາຕິ ຍາ ປນ ອາປຕ຺ຕິ. ອາທິປາຣາຊິກຸຏ຺ຐານາຕິ ປຐມປາຣາຊິກສມຸຏ຺ຐານາ.

໓໔໑. ອທິນ຺ນາທານ-ສທ຺ໂທ ປຸພ຺ພໂກ ປຐໂມ ເອຕິສ຺ສາ ຕໍສມຸຏ຺ຐານາປຕ຺ຕິຍາຕິ ອທິນ຺ນາທານປຸພ຺ພກາ, ອທິນ຺ນາທານສມຸຏ຺ຐານາຕິ ອຸທ຺ທິຏ຺ຐາຕິ ໂຍຊນາ.

໓໔໒. ຊາຕູຕິ ເອກໍເສນ.

໓໔໓. ອຍໍ ສມຸຏ຺ຐານວເສນ ‘‘ສມນຸຠາສນາສມຸຏ຺ຐານາ’’ຕິ ວຸຕ຺ຕາຕິ ໂຍຊນາ.

໓໔໔. ກຖິນ-ສທ຺ໂທ ອຸປປໂທ ຍສ຺ສາ ຕໍສມຸຏ຺ຐານາຍ ອາປຕ຺ຕິຍາ ສາ ກຖິນຸປປທາ, ກຖິນສມຸຏ຺ຐານາຕິ ມຕາ ຎາຕາ, ອຍໍ ສມຸຏ຺ຐານວເສນ ‘‘ກຖິນສມຸຏ຺ຐານາ’’ຕິ ຎາຕາຕິ ອຕ຺ໂຖ.

໓໔໕. ເອຬກໂລມ-ສທ຺ໂທ ອາທິ ຍສ຺ສາ ຕໍສມຸຏ຺ຐານາປຕ຺ຕິຍາ ສາ ເອຬກໂລມາທິສມຸຏ຺ຐານາຕິ ອຕ຺ໂຖ.

໓໔໙. ເອຕ຺ຖ ສມຸຏ຺ຐາເນສຸ.

໓໕໐. ຠູຕາໂຣຈນ-ສທ຺ໂທ ປຸພ຺ພຠາໂຄ ເອຕິສ຺ສາ ຕໍສມຸຏ຺ຐານາຍ ອາປຕ຺ຕິຍາຕິ ຠູຕາໂຣຈນປຸພ຺ພກາ, ຠູຕາໂຣຈນສມຸຏ຺ຐານາຕິ ອຕ຺ໂຖ.

໓໕໑. ສມຸຏ຺ຐານໍ ສມຸຏ຺ຐິຕໍ, ໂຈຣິວຸຏ຺ຐາປນໍ ສມຸຏ຺ຐິຕໍ ຍສ຺ສາ ສາ ໂຈຣິວຸຏ຺ຐາປນສມຸຏ຺ຐິຕາ, ໂຈຣິວຸຏ຺ຐາປນສມຸຏ຺ຐານາຕິ ອຕ຺ໂຖ.

໓໕໓. ຕຕ຺ຖາຕິ ເຕຣສສມຸຏ຺ຐານສີເສສຸ, ‘‘ສມຸຏ຺ຐານໍ ສຈິຕ຺ຕກ’’ນ຺ຕິ ອິທໍ ‘‘ປຐມ’’ນ຺ຕິອາທີຫິ ປຈ຺ເຈກໍ ໂຍເຊຕພ຺ພໍ. ປຐມໍ ສມຸຏ຺ຐານນ຺ຕິ ປຐມປາຣາຊິກສມຸຏ຺ຐານໍ. ທຸຕິຍໍ ສມຸຏ຺ຐານນ຺ຕິ ອທິນ຺ນາທານສມຸຏ຺ຐານໍ. ຈຕຸຕ຺ຖໍ ສມຸຏ຺ຐານນ຺ຕິ ສມນຸຠາສນສມຸຏ຺ຐານໍ. ນວມໍ ສມຸຏ຺ຐານນ຺ຕິ ເຖຍ຺ຍສຕ຺ຖສມຸຏ຺ຐານໍ. ທສມໍ ສມຸຏ຺ຐານນ຺ຕິ ຘມ຺ມເທສນາສມຸຏ຺ຐານໍ. ທ຺ວາທສມໍ ສມຸຏ຺ຐານນ຺ຕິ ໂຈຣິວຸຏ຺ຐາປນສມຸຏ຺ຐານໍ.

໓໕໔. ສມຸຏ຺ຐາເນຕິ ສມຸຏ຺ຐານສີເສ. ສທິສາຕິ ເຕນ ເຕນ ສມຸຏ຺ຐານສີເສນ ສມຸຏ຺ຐານາ ອາປຕ຺ຕິໂຍ. ອິຘາຕິ ອິມສ຺ມິໍ ສມຸຏ຺ຐານວິນິຈ຺ຉເຍ. ທິສ຺ສເຣຕິ ທິສ຺ສນ຺ເຕ, ທິສ຺ສນ຺ຕີຕິ ອຕ຺ໂຖ. ອຖ ວາ ອິຘ ທິສ຺ສເຣຕິ ອິຘ ອຸຠໂຕວິຠງ຺ເຄ ເອເຕສຸ ເຕຣສສມຸຏ຺ຐາເນສຸ ເອເກກສ຺ມິໍ ອຎ຺ຎານິປິ ສທິສານິ ສມຸຏ຺ຐານານິ ທິສ຺ສນ຺ຕີຕິ ອຕ຺ໂຖ. ອິທານິ ຕານິ ສຣູປໂຕ ນິທສ຺ເສຕຸມາຫ ‘‘ສຸກ຺ກຎ຺ຈາ’’ຕິອາທິ. ຕຕ຺ຖ ສຸກ຺ກນ຺ຕິ ສຸກ຺ກວິສ຺ສຏ຺ຐິສິກ຺ຂາປທໍ. ເອສ ນໂຍ ‘‘ກາຍສໍສຄ຺ໂຄ’’ຕິອາທີສຸປິ. ຍເທຕ຺ຖ ທຸວິຎ຺ເຎຍ຺ຍໍ, ຕໍ ວກ຺ຂາມ.

໓໕໕. ປຸພ຺ພຸປປຣິປາໂກ ຈາຕິ ‘‘ຊານໍ ປຸພ຺ພຸປຄຕໍ ຠິກ຺ຂຸ’’ນ຺ຕິ (ປາຈິ. ໑໒໐) ສິກ຺ຂາປທຎ຺ຈ ‘‘ຠິກ຺ຂຸນິປຣິປາຈິຕ’’ນ຺ຕິ (ປາຈິ. ໑໙໒, ໑໙໔) ປິຓ຺ຑປາຕສິກ຺ຂາປທຎ຺ຈ. ຣໂຫ ຠິກ຺ຂຸນິຍາສຫາຕິ ຠິກ຺ຂຸນິຍາ ສທ຺ຘິໍ ຣໂຫ ນິສຊ຺ຊສິກ຺ຂາປທຎ຺ຈ. ສໂຠຊເນ, ຣໂຫ ທ຺ເວ ຈາຕິ ສໂຠຊເນ ກຸເລ ອນຸປຂຊ຺ຊສິກ຺ຂາປທຎ຺ຈ ທ຺ເວ ຣໂຫນິສຊ຺ຊສິກ຺ຂາປທານິ ຈ. ອງ຺ຄຸລີ ອຸທເກ ຫສນ຺ຕິ ອງ຺ຄຸລິປໂຕທຎ຺ຈ ອຸທກຫສຘມ຺ມສິກ຺ຂາປທຎ຺ຈ.

໓໕໖. ປຫາເຣ ອຸຄ຺ຄິເຣ ເຈວາຕິ ປຫາຣທານສິກ຺ຂາປທຎ຺ຈ ຕລສຕ຺ຕິອຸຄ຺ຄິຣຓສິກ຺ຂາປທຎ຺ຈ. ເຕປຎ຺ຎາສາ ຈ ເສຂິຍາຕິ ປຎ຺ຈສຕ຺ຕຕິເສຂິຍາສຸ ວກ຺ຂມານານິ ອຸຊ຺ຊຄ຺ຆິກາທີນິ ສມນຸຠາສນສມຸຏ຺ຐານານິ ທສ, ຉຕ຺ຕປາຓິອາທີນິ ຘມ຺ມເທສນາສມຸຏ຺ຐານານິ ເອກາທສ, ເຖຍ຺ຍສຕ຺ຖສມຸຏ຺ຐານໍ, ສູໂປທນວິຎ຺ຎຕ຺ຕິສິກ຺ຂາປທຎ຺ຈາຕິ ພາວີສຕິ ສິກ຺ຂາປທານິ ຐເປຕ຺ວາ ປຣິມຓ຺ຑລນິວາສນາທີນິ ອິຕຣານິ ເຕປຎ຺ຎາສ ເສຂິຍສິກ຺ຂາປທານິ ຈ. ອຘກ຺ຂກຸພ຺ຠຊາຓຸຎ຺ຈາຕິ ຠິກ຺ຂຸນີນໍ ອຘກ຺ຂກອຸພ຺ຠຊາຓຸສິກ຺ຂາປທຎ຺ຈ. ຄາມນ຺ຕຣມວສ຺ສຸຕາຕິ ຄາມນ຺ຕຣຄມນໍ, ອວສ຺ສຸຕສ຺ສ ຫຕ຺ຖໂຕ ຂາທນີຍຄ຺ຄຫຓສິກ຺ຂາປທຎ຺ຈ.

໓໕໗-໘. ຕລມຏ຺ຐຸທສຸທ຺ຘິ ຈາຕິ ຕລຆາຕໍ, ຊຕຸມຏ຺ຐໍ, ອຸທກສຸທ຺ຘິກາທິຍນຎ຺ຈ. ວສ຺ສໍວຸຕ຺ຖາຕິ ‘‘ວສ຺ສໍວຸຕ຺ຖາ…ເປ… ຉປ຺ປຎ຺ຈໂຍຊນານີ’’ຕິ (ປາຈິ. ໙໗໔) ສິກ຺ຂາປທຎ຺ຈ. ໂອວາທາຍ ນ ຄຈ຺ຉນ຺ຕີຕິ ໂອວາທາຍ ອຄມນສິກ຺ຂາປທຎ຺ຈ. ນານຸພນ຺ເຘ ປວຕ຺ຕິນິນ຺ຕິ ‘‘ວຸຏ຺ຐາປິຕໍ ປວຕ຺ຕິນິໍ ທ຺ເວ ວສ຺ສານິ ນານຸພນ຺ເຘຍ຺ຍາ’’ຕິ (ປາຈິ. ໑໑໑໒) ສິກ຺ຂາປທຎ຺ຈາຕິ ອຸຠໂຕວິຠງ຺ເຄ ນິທ຺ທິຏ຺ຐາ ອິເມ ປຎ຺ຈສຕ຺ຕຕິ ຘມ຺ມາ ກາຍຈິຕ຺ຕສມຸຏ຺ຐິຕາ ເມຖຸເນນ ສມາ ເອກສມຸຏ຺ຐານາ ມຕາຕິ ໂຍຊນາ.

ເອຕ຺ຖ ຈ ປາຬິຍໍ ‘‘ຉສຕ຺ຕຕີ’’ຕິ ຄຓນປຣິຈ຺ເຉໂທ ສມຸຏ຺ຐານສິກ຺ຂາປເທນ ສຫ ທສ຺ສິໂຕ. ອິຘ ປນ ຕໍ ວິນາ ຕໍສທິສານເມວ ຄຓນາ ທສ຺ສິຕາ. ເຕເນວ ປຐມໍ ສມຸຏ຺ຐານສີສໍ ປາຬິຍໍ ຄຓນາຍປິ ທສ຺ສິຕໍ, ອິເຘວ ນ ທສ຺ສິຕໍ. ອຸປຣິ ກຕ຺ຖຈິ ສມຸຏ຺ຐານສີສສ຺ສ ທສ຺ສນໍ ປເນຕ຺ຖ ວກ຺ຂມານານໍ ຕໍສທິສຠາວທສ຺ສນຕ຺ຖໍ, ຄຓນາຍ ວກ຺ຂມານາຍ ອນ຺ໂຕຄຘຠາວທສ຺ສນຕ຺ຖໍ. ເຕເນວ ຕຕ຺ຖປິ ຕໍ ວິນາ ຄຓນໍ ວກ຺ຂຕິ.

ປຐມປາຣາຊິກສມຸຏ຺ຐານວຓ຺ຓນາ.

໓໕໙. ວິຄ຺ຄຫນ຺ຕິ ມນຸສ຺ສວິຄ຺ຄຫສິກ຺ຂາປທໍ. ອຸຕ຺ຕຣິ ເຈວາຕິ ອຸຕ຺ຕຣິມນຸສ຺ສຘມ຺ມສິກ຺ຂາປທຎ຺ຈ. ທຸຏ຺ຐຸລ຺ລນ຺ຕິ ທຸຏ຺ຐຸລ຺ລວາຈາສິກ຺ຂາປທໍ. ອຕ຺ຕກາມຕາຕິ ອຕ຺ຕກາມປາຣິຈຣິຍສິກ຺ຂາປທຎ຺ຈ. ທຸຏ຺ຐໂທສາ ທຸເວ ເຈວາຕິ ທ຺ເວ ທຸຏ຺ຐໂທສສິກ຺ຂາປທານິ ຈ. ທຸຕິຍານິຍໂຕປິ ຈາຕິ ທຸຕິຍອນິຍຕສິກ຺ຂາປທຎ຺ຈ.

໓໖໐. ອຈ຺ຉິນ຺ທນຎ຺ຈາຕິ ສາມໍ ຈີວຣໍ ທຕ຺ວາ ອຈ຺ຉິນ຺ທນຎ຺ຈ. ປຣິຓາໂມຕິ ສງ຺ຆິກລາຠສ຺ສ ອຕ຺ຕໂນ ປຣິຓາມນຎ຺ຈ. ມຸສາໂອມສເປສຸຓາຕິ ມຸສາວາໂທ ຈ ໂອມສວາໂທ ຈ ຠິກ຺ຂຸເປສຸຎ຺ຎຎ຺ຈ. ທຸຏ຺ຐຸລ຺ລາໂຣຈນຎ຺ເຈວາຕິ ທຸຏ຺ຐຸລ຺ລາປຕ຺ຕິອາໂຣຈນສິກ຺ຂາປທຎ຺ຈ. ປຖວີຂຓນມ຺ປິ ຈາຕິ ປຖວີຂຓນສິກ຺ຂາປທຎ຺ຈ.

໓໖໑. ຠູຕຄາມຎ຺ຈ ວາໂທ ຈາຕິ ຠູຕຄາມສິກ຺ຂາປທໍ, ອຎ຺ຎວາທກສິກ຺ຂາປທຎ຺ຈ. ອຸຊ຺ຌາປນກເມວ ຈາຕິ ອຸຊ຺ຌາປນກສິກ຺ຂາປທຎ຺ຈ. ນິກ຺ກຑ຺ໂຒ ສິຎ຺ຈນຎ຺ເຈວາຕິ ວິຫາຣໂຕ ນິກ຺ກຑ຺ຒນຎ຺ຈ ອຸທເກ ຕິຓາທິສິຎ຺ຈນຎ຺ຈ. ອາມິສເຫຕຸ ຈາຕິ ອາມິສເຫຕຸ ຠິກ຺ຂຸນິໂຍ ໂອວາທສິກ຺ຂາປທຎ຺ຈ.

໓໖໒. ຠຸຕ຺ຕາວິນ຺ຕິ ຠຸຕ຺ຕາວິໍ ອນຕິຣິຕ຺ເຕນ ຂາທນີຍາທິນາ ປວາຣຓສິກ຺ຂາປທຎ຺ຈ. ເອຫນາທຣິນ຺ຕິ ‘‘ເອຫາວຸໂສ, ຄາມໍ ວາ’’ຕິ (ປາຈິ. ໒໗໕) ວຸຕ຺ຕສິກ຺ຂາປທຎ຺ຈ ອນາທຣິຍສິກ຺ຂາປທຎ຺ຈ. ຠິໍສາປນເມວ ຈາຕິ ຠິກ຺ຂຸຠິໍສນກຎ຺ຈ. ອປນິເຘຍ຺ຍາຕິ ປຕ຺ຕາທິອປນິຘານສິກ຺ຂາປທຎ຺ຈ. ສຎ຺ຈິຈ຺ຈ ປາຓນ຺ຕິ ສຎ຺ຈິຈ຺ຈ ປາຓໍ ຊີວິຕາໂວໂຣປນຎ຺ຈ. ສປ຺ປາຓກມ຺ປິ ຈາຕິ ຊານໍ ສປ຺ປາຓກອຸທກສິກ຺ຂາປທຎ຺ຈ.

໓໖໓. ອຸກ຺ໂກຏນຎ຺ຈາຕິ ປຸນກມ຺ມາຍ ອຸກ຺ໂກຏນຎ຺ຈ. ອູໂນຕິ ອູນວີສຕິວສ຺ສສິກ຺ຂາປທຎ຺ຈ. ສໍວາໂສຕິ ອຸກ຺ຂິຕ຺ຕເກນ ສທ຺ຘິໍ ສໍວາສສິກ຺ຂາປທຎ຺ຈ. ນາສເນ ຈາຕິ ນາສິຕກສາມເຓຣສມ຺ໂຠຄສິກ຺ຂາປທຎ຺ຈ. ສຫຘມ຺ມິກນ຺ຕິ ສຫຘມ຺ມິກໍ ວຸຈ຺ຈມານສິກ຺ຂາປທຎ຺ຈ. ວິເລຂາ ຈາຕິ ‘‘ວິເລຂາຍ ສໍວຕ຺ຕນ຺ຕີ’’ຕິ (ປາຈິ. ໔໓໙) ອາຄຕສິກ຺ຂາປທຎ຺ຈ. ໂມຫນາຕິ ໂມຫນສິກ຺ຂາປທຎ຺ຈ. ອມູລເກນ ຈາຕິ ອມູລເກນ ສງ຺ຆາທິເສເສນ ອນຸທ຺ຘໍສນສິກ຺ຂາປທຎ຺ຈ.

໓໖໔. ກຸກ຺ກຸຈ຺ຈໍ ຂີຍນໍ ທຕ຺ວາຕິ ກຸກ຺ກຸຈ຺ຈອຸປ຺ປາທນຎ຺ຈ ຘມ຺ມິການໍ ກມ຺ມານໍ ຉນ຺ທໍ ທຕ຺ວາ ຂີຍນຎ຺ຈ ຈີວຣໍ ທຕ຺ວາ ຂີຍນຎ຺ຈ. ປຣິຓາເມຍ຺ຍ ປຸຄ຺ຄເລຕິ ສງ຺ຆິກໍ ລາຠໍ ປຸຄ຺ຄລສ຺ສ ປຣິຓາມນສິກ຺ຂາປທຎ຺ຈ. ກິໍ ເຕ, ອກາລໍ, ອຈ຺ຉິນ຺ເທຕິ ‘‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕີ’’ຕິ (ປາຈິ. ໗໐໕) ອາຄຕສິກ຺ຂາປທຎ຺ຈ ອກາລຈີວຣໍ ‘‘ກາລຈີວຣ’’ນ຺ຕິ ອຘິຏ຺ຐຫິຕ຺ວາ ຠາຊນສິກ຺ຂາປທຎ຺ຈ ຠິກ຺ຂຸນິຍາ ສທ຺ຘິໍ ຈີວຣໍ ປຣິວຕ຺ເຕຕ຺ວາ ອຈ຺ຉິນ຺ທນສິກ຺ຂາປທຎ຺ຈ. ທຸຄ຺ຄຫນິຣເຍນ ຈາຕິ ທຸຄ຺ຄຫິເຕນ ທຸປຘາຣິເຕນ ປຣໍ ອຸຊ຺ຌາປນສິກ຺ຂາປທຎ຺ຈ ນິຣເຍນ ວາ ພ຺ຣຫ຺ມຈຣິເຍນ ວາ ອຠິສປນສິກ຺ຂາປທຎ຺ຈ.

໓໖໕. ຄຓສ຺ສ ຈາຕິ ‘‘ຄຓສ຺ສ ຈີວຣລາຠໍ ອນ຺ຕຣາຍໍ ກເຣຍ຺ຍາ’’ຕິ (ປາຈິ. ໙໐໘) ວຸຕ຺ຕສິກ຺ຂາປທຎ຺ຈ. ວິຠງ຺ຄຎ຺ຈາຕິ ‘‘ຘມ຺ມິກໍ ຈີວຣວິຠງ຺ຄໍ ປຏິພາເຫຍ຺ຍາ’’ຕິ (ປາຈິ. ໙໑໒) ວຸຕ຺ຕສິກ຺ຂາປທຎ຺ຈ. ທຸພ຺ພລາສາ ຕເຖວ ຈາຕິ ‘‘ທຸພ຺ພລຈີວຣປຈ຺ຈາສາຍ ຈີວຣກາລສມຍໍ ອຕິກ຺ກາເມຍ຺ຍາ’’ຕິ (ປາຈິ. ໙໒໑) ວຸຕ຺ຕສິກ຺ຂາປທຎ຺ຈ. ຘມ຺ມິກໍ ກຖິນຸທ຺ຘາຣນ຺ຕິ ‘‘ຘມ຺ມິກໍ ກຖິນຸທ຺ຘາຣໍ ປຏິພາເຫຍ຺ຍາ’’ຕິ (ປາຈິ. ໙໒໘) ວຸຕ຺ຕສິກ຺ຂາປທຎ຺ຈ. ສຎ຺ຈິຈ຺ຈາຜາສຸເມວ ຈາຕິ ‘‘ຠິກ຺ຂຸນິຍາ ສຎ຺ຈິຈ຺ຈ ອຜາສຸໍ ກເຣຍ຺ຍາ’’ຕິ (ປາຈິ. ໙໔໒) ວຸຕ຺ຕສິກ຺ຂາປທຎ຺ຈ.

໓໖໖. ສຍໍ ອຸປສ຺ສຍໍ ທຕ຺ວາຕິ ‘‘ຠິກ຺ຂຸນິຍາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ເຒຍ຺ຍາ’’ຕິ (ປາຈິ. ໙໕໑) ວຸຕ຺ຕສິກ຺ຂາປທຎ຺ຈ. ອກ຺ໂກເສຍ຺ຍ ຈາຕິ ‘‘ຠິກ຺ຂຸໍ ອກ຺ໂກເສຍ຺ຍ ວາ ປຣິຠາເສຍ຺ຍ ວາ’’ຕິ (ປາຈິ. ໑໐໒໙) ວຸຕ຺ຕສິກ຺ຂາປທຎ຺ຈ. ຈຓ຺ຑິກາຕິ ‘‘ຈຓ຺ຑີກຕາ ຄຓໍ ປຣິຠາເສຍ຺ຍາ’’ຕິ (ປາຈິ. ໑໐໓໔) ວຸຕ຺ຕສິກ຺ຂາປທຎ຺ຈ. ກຸລມຈ຺ຉຣິນີ ອສ຺ສາຕິ ‘‘ກຸລມຈ຺ຉຣິນີ ອສ຺ສາ’’ຕິ (ປາຈິ. ໑໐໔໓) ວຸຕ຺ຕສິກ຺ຂາປທຎ຺ຈ. ຄພ຺ຠິນິໍ ວຸຏ຺ຐາເປຍ຺ຍ ຈາຕິ ‘‘ຄພ຺ຠິນິໍ ວຸຏ຺ຐາເປຍ຺ຍາ’’ຕິ (ປາຈິ. ໑໐໖໘) ວຸຕ຺ຕສິກ຺ຂາປທຎ຺ຈ.

໓໖໗. ປາຍນ຺ຕິນ຺ຕິ ‘‘ປາຍນ຺ຕິໍ ວຸຏ຺ຐາເປຍ຺ຍາ’’ຕິ (ປາຈິ. ໑໐໗໓) ວຸຕ຺ຕສິກ຺ຂາປທຎ຺ຈ. ທ຺ເວ ຈ ວສ຺ສານີຕິ ‘‘ທ຺ເວ ວສ຺ສານິ ຉສຸ ຘມ຺ເມສຸ ອສິກ຺ຂິຕສິກ຺ຂໍ ສິກ຺ຂມານໍ ວຸຏ຺ຐາເປຍ຺ຍາ’’ຕິ (ປາຈິ. ໑໐໘໐) ວຸຕ຺ຕສິກ຺ຂາປທຎ຺ຈ. ສງ຺ເຆນາສມ຺ມຕນ຺ຕິ ‘‘ສິກ຺ຂິຕສິກ຺ຂໍ ສິກ຺ຂມານໍ ສງ຺ເຆນ ອສມ຺ມຕໍ ວຸຏ຺ຐາເປຍ຺ຍາ’’ຕິ (ປາຈິ. ໑໐໘໖) ວຸຕ຺ຕສິກ຺ຂາປທຎ຺ຈ. ຕິສ຺ໂສ ຄິຫິຄຕາ ວຸຕ຺ຕາຕິ ‘‘ອູນທ຺ວາທສວສ຺ສໍ ຄິຫິຄຕໍ (ປາຈິ. ໑໐໙໑), ປຣິປຸຓ຺ຓທ຺ວາທສວສ຺ສໍ ຄິຫິຄຕໍ ທ຺ເວ ວສ຺ສານິ ຉສຸ ຘມ຺ເມສຸ ອສິກ຺ຂິຕສິກ຺ຂໍ (ປາຈິ. ໑໐໙໗), ທ຺ເວວສ຺ສານິ ສິກ຺ຂິຕສິກ຺ຂໍ ສງ຺ເຆນ ອສມ຺ມຕ’’ນ຺ຕິ (ປາຈິ. ໑໑໐໓) ວຸຕ຺ຕສິກ຺ຂາປທານິ ຈ. ຕິສ຺ໂສເຍວ ກຸມາຣິກາຕິ ‘‘ອູນວີສຕິວສ຺ສໍ ກຸມາຣິຠູຕ’’ນ຺ຕິອາທິນາ (ປາຈິ. ໑໑໒໐) ນເຍນ ວຸຕ຺ຕາ ຕິສ຺ໂສ ຈ.

໓໖໘. ອູນທ຺ວາທສວສ຺ສາ ທ຺ເວຕິ ‘‘ອູນທ຺ວາທສວສ຺ສາ ວຸຏ຺ຐາເປຍ຺ຍ (ປາຈິ. ໑໑໓໗), ປຣິປຸຓ຺ຓທ຺ວາທສວສ຺ສາ ສງ຺ເຆນ ອສມ຺ມຕາ ວຸຏ຺ຐາເປຍ຺ຍາ’’ຕິ (ປາຈິ. ໑໑໔໒) ວຸຕ຺ຕານິ ທ຺ເວ ສິກ຺ຂາປທານິ ຈ. ອລໍ ຕາວ ເຕຕິ ‘‘ອລໍ ຕາວ ເຕ, ອຍ຺ເຍ, ວຸຏ຺ຐາປິເຕນາ’’ຕິ (ປາຈິ. ໑໑໔໗) ວຸຕ຺ຕສິກ຺ຂາປທຎ຺ຈ. ໂສກາວສ຺ສາຕິ ‘‘ຈຓ຺ຑິໍ ໂສກາວາສໍ ສິກ຺ຂມານໍ ວຸຏ຺ຐາເປຍ຺ຍາ’’ຕິ (ປາຈິ. ໑໑໕໙) ວຸຕ຺ຕສິກ຺ຂາປທຎ຺ຈ. ປາຣິວາສິກຈ຺ຉນ຺ທທານໂຕຕິ ‘‘ປາຣິວາສິກຉນ຺ທທາເນນ ສິກ຺ຂມານໍ ວຸຏ຺ຐາເປຍ຺ຍາ’’ຕິ (ປາຈິ. ໑໑໖໗) ວຸຕ຺ຕສິກ຺ຂາປທຎ຺ຈ.

໓໖໙. ອນຸວສ຺ສໍ ທຸເວ ຈາຕິ ‘‘ອນຸວສ຺ສໍ ວຸຏ຺ຐາເປຍ຺ຍ (ປາຈິ. ໑໑໗໑), ເອກໍ ວສ຺ສໍ ທ຺ເວ ວຸຏ຺ຐາເປຍ຺ຍາ’’ຕິ (ປາຈິ. ໑໑໗໕) ວຸຕ຺ຕສິກ຺ຂາປທານິ ຈາຕິ ເອກູນສຕ຺ຕຕິ ສິກ຺ຂາປທານິ. ອທິນ຺ນາທານຕຸລ຺ຍຕ຺ຕາຕິ ອທິນ຺ນາທາເນນ ສມານສມຸຏ຺ຐານຕ຺ຕາ. ຕິສມຸຏ຺ຐານິກາ ກຕາຕິ ສຈິຕ຺ຕເກຫິ ຕີຫິ ສມຸຏ຺ຐາເນຫິ ສມຸຏ຺ຐຫນ຺ຕີຕິ ວຸຕ຺ຕາ.

ທຸຕິຍປາຣາຊິກສມຸຏ຺ຐານວຓ຺ຓນາ.

໓໗໐. ສຎ຺ຈຣິກຸຏິມຫລ຺ລກນ຺ຕິ ສຎ຺ຈຣິຕ຺ຕໍ, ສຎ຺ຎາຈິກາຍ ກຸຏິກຣຓໍ, ມຫລ຺ລກວິຫາຣກຣຓຎ຺ຈ. ໂຘວາປນຎ຺ຈ ປຏິຄ຺ຄໂຫຕິ ອຎ຺ຎາຕິກາຍ ຠິກ຺ຂຸນິຍາ ປຸຣາຓຈີວຣໂຘວາປນຎ຺ຈ ຈີວຣປຏິຄ຺ຄຫຓຎ຺ຈ. ຈີວຣສ຺ສ ຈ ວິຎ຺ຎຕ຺ຕິນ຺ຕິ ອຎ຺ຎາຕກໍ ຄຫປຕິໍ ວາ ຄຫປຕານິໍ ວາ ຈີວຣວິຎ຺ຎາປນສິກ຺ຂາປທຎ຺ຈ. ຄຫຓຎ຺ຈ ຕທຸຕ຺ຕຣິນ຺ຕິ ຕທຸຕ຺ຕຣິສາທິຍນສິກ຺ຂາປທຎ຺ຈ.

໓໗໑. ອຸປກ຺ຂຏທ຺ວຍຎ຺ເຈວາຕິ ‘‘ຈີວຣເຈຕາປນ຺ນໍ ອຸປກ຺ຂຏໍ ໂຫຕີ’’ຕິ (ປາຣາ. ໕໒໘) ອາຄຕສິກ຺ຂາປທທ຺ວຍຎ຺ຈ. ຕຖາ ທູເຕນ ຈີວຣນ຺ຕິ ທູເຕນຈີວຣເຈຕາປນ຺ນປຫິຕສິກ຺ຂາປທຎ຺ຈ. ໂກສິຍນ຺ຕິ ໂກສິຍມິສ຺ສກສິກ຺ຂາປທຎ຺ຈ. ສຸທ຺ຘກາຬານນ຺ຕິ ‘‘ສຸທ຺ຘກາຬການ’’ນ຺ຕິອາທິສິກ຺ຂາປທຎ຺ຈ (ປາຣາ. ໕໔໘). ທ຺ເວ ຠາຄາທານເມວ ຈາຕິ ‘‘ທ຺ເວ ຠາຄາ ອາທາຕພ຺ພາ’’ຕິ (ປາຣາ. ໕໕໓) ວຸຕ຺ຕສິກ຺ຂາປທຎ຺ຈ.

໓໗໒. ຉພ຺ພສ຺ສານີຕິ ຉພ຺ພສ຺ສານິ ຘາຣຓສິກ຺ຂາປທຎ຺ຈ. ປຸຣາຓສ຺ສາຕິ ‘‘ປຸຣາຓສນ຺ຖຕສ຺ສາ’’ຕິ (ປາຣາ. ໕໖໗) ວຸຕ຺ຕສິກ຺ຂາປທຎ຺ຈ. ໂລມໂຘວາປນມ຺ປິ ຈາຕິ ເອຬກໂລມໂຘວາປນສິກ຺ຂາປທຎ຺ຈ. ຣູປິຍສ຺ສ ປຏິຄ຺ຄາໂຫຕິ ຣູປິຍປຏິຄ຺ຄຫຓສິກ຺ຂາປທຎ຺ຈ. ອຸໂຠ ນານປ຺ປກາຣກາຕິ ຣູປິຍສໍໂວຫາຣກຍວິກ຺ກຍສິກ຺ຂາປທານິ ຈ.

໓໗໓. ອູນພນ຺ຘນປຕ຺ໂຕ ຈາຕິ ອູນປຎ຺ຈພນ຺ຘນປຕ຺ຕສິກ຺ຂາປທຎ຺ຈ. ວສ຺ສສາຏິກສຸຕ຺ຕກນ຺ຕິ ວສ຺ສິກສາຏິກສິກ຺ຂາປທຎ຺ຈ ສຸຕ຺ຕໍ ວິຎ຺ຎາເປຕ຺ວາ ຈີວຣກາຣາປນສິກ຺ຂາປທຎ຺ຈ. ວິກປ຺ປາປຊ຺ຊນນ຺ຕິ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປາປຊ຺ຊນຎ຺ຈ. ຍາວ ທ຺ວາຣທານຎ຺ຈ ສິພ຺ພນນ຺ຕິ ‘‘ຍາວ ທ຺ວາຣໂກສາ ອຄ຺ຄຬຏ຺ຐປນາຍາ’’ຕິ (ປາຈິ. ໑໓໕) ວຸຕ຺ຕສິກ຺ຂາປທຎ຺ຈ ‘‘ອຎ຺ຎາຕິກາຍ ຠິກ຺ຂຸນິຍາ ຈີວຣໍ ທເທຍ຺ຍ (ປາຈິ. ໑໗໑), ຈີວຣໍ ສິພ຺ເພຍ຺ຍາ’’ຕິ (ປາຈິ. ໑໗໖) ວຸຕ຺ຕສິກ຺ຂາປທທ຺ວຍຎ຺ຈ.

໓໗໔. ປູເວຫີຕິ ປູເວຫິ ວາ ມນ຺ເຖຫິ ວາ ອຠິຫຏ຺ຐຸໍ ປວາຣຓສິກ຺ຂາປທຎ຺ຈ. ປຈ຺ຈໂຍຕິ ຈຕຸມາສປຈ຺ຈຍປວາຣຓສິກ຺ຂາປທຎ຺ຈ. ໂຊຕີຕິ ໂຊຕິຍາ ສມາທຫນສິກ຺ຂາປທຎ຺ຈ. ຣຕນນ຺ຕິ ຣຕນສິກ຺ຂາປທຎ຺ຈ. ສູຈິ…ເປ… ສຸຄຕສ຺ສ ຈາຕິ ສູຈິຆຣສິກ຺ຂາປທາທີນິ ສຕ຺ຕ ສິກ຺ຂາປທານິ ຈ.

໓໗໕. ອຎ຺ຎວິຎ຺ຎຕ຺ຕິສິກ຺ຂາ ຈາຕິ ‘‘ອຎ຺ຎໍ ວິຎ຺ຎາເປຍ຺ຍາ’’ຕິ (ປາຈິ. ໗໔໙) ວຸຕ຺ຕສິກ຺ຂາປທຎ຺ຈ. ອຎ຺ຎໍ ເຈຕາປນມ຺ປິ ຈາຕິ ‘‘ອຎ຺ຎໍ ເຈຕາເປຕ຺ວາ ອຎ຺ຎໍ ເຈຕາເປຍ຺ຍາ’’ຕິ (ປາຈິ. ໗໔໙) ວຸຕ຺ຕສິກ຺ຂາປທຎ຺ຈ. ສງ຺ຆິເກນ ທຸເວ ວຸຕ຺ຕາຕິ ‘‘ສງ຺ຆິເກນ ອຎ຺ຎໍ ເຈຕາເປຍ຺ຍ (ປາຈິ. ໗໕໙), ສງ຺ຆິເກນ ສຎ຺ຎາຈິເກນ ອຎ຺ຎໍ ເຈຕາເປຍ຺ຍາ’’ຕິ (ປາຈິ. ໗໖໔) ວຸຕ຺ຕານິ ທ຺ເວ ສິກ຺ຂາປທານິ ຈ. ທ຺ເວ ມຫາຊນິເກນາຕິ ‘‘ມຫາຊນິເກນ ອຎ຺ຎໍ ເຈຕາເປຍ຺ຍ (ປາຈິ. ໗໖໙), ມຫາຊນິເກນ ສຎ຺ຎາຈິເກນ ອຎ຺ຎໍ ເຈຕາເປຍ຺ຍາ’’ຕິ (ປາຈິ. ໗໗໔) ວຸຕ຺ຕານິ ທ຺ເວ ສິກ຺ຂາປທານິ ຈ.

໓໗໖. ຕຖາ ປຸຄ຺ຄລິເກເນກນ຺ຕິ ‘‘ປຸຄ຺ຄລິເກນ ສຎ຺ຎາຈິເກນ ອຎ຺ຎໍ ເຈຕາເປຍ຺ຍາ’’ຕິ (ປາຈິ. ໗໗໙) ວຸຕ຺ຕເມກສິກ຺ຂາປທຎ຺ຈ. ຄຣຸປາວຸຣຓນ຺ຕິ ຄຣຸປາວຸຣຓເຈຕາປນສິກ຺ຂາປທຎ຺ຈ. ລຫຸນ຺ຕິ ລຫຸປາວຸຣຓເຈຕາປນສິກ຺ຂາປທໍ. ‘‘ວິຆາສາ ອຸທສາຏິ ຈາ’’ຕິ ປທຈ຺ເຉໂທ. ທ຺ເວ ວິຆາສາຕິ ‘‘ອຸຈ຺ຈາຣໍ ວາ ປສ຺ສາວໍ ວາ ສງ຺ກາຣໍ ວາ ວິຆາສໍ ວາ ຕິໂຣກຸຏ຺ເຏ ວາ ຕິໂຣປາກາເຣ ວາ ຉຑ຺ເຑຍ຺ຍ ວາ ຉຑ຺ຑາເປຍ຺ຍ ວາ (ປາຈິ. ໘໒໕), ຫຣິເຕ ຉຑ຺ເຑຍ຺ຍ ວາ ຉຑ຺ຑາເປຍ຺ຍ ວາ’’ຕິ (ປາຈິ. ໘໒໙) ເອວໍ ວຸຕ຺ຕານິ ທ຺ເວ ວິຆາສສິກ຺ຂາປທານິ ຈ. ອຸທສາຏິ ຈາຕິ ອຸທກສາຏິກສິກ຺ຂາປທຎ຺ຈ. ຕຖາ ສມຓຈີວຣນ຺ຕິ ຕຖາ ‘‘ສມຓຈີວຣໍ ທເທຍ຺ຍາ’’ຕິ (ປາຈິ. ໙໑໗) ວຸຕ຺ຕສິກ຺ຂາປທຎ຺ຈາຕິ.

໓໗໗. ອິຕິ ເອເຕ ເອກູນປຓ຺ຓາສ ຘມ຺ມາ ທຸກ຺ຂນ຺ຕທສ຺ສິນາ ຠຄວຕາ ຉສມຸຏ຺ຐານິກາ ເຕເຍວ ສຎ຺ຈຣິຕ຺ຕສມາ ສຎ຺ຈຣິຕ຺ຕສິກ຺ຂາປເທນ ສມາ ກຕາ ອນຸມຕາ ປຎ຺ຎຕ຺ຕາຕິ ໂຍຊນາ.

ສຎ຺ຈຣິຕ຺ຕສມຸຏ຺ຐານວຓ຺ຓນາ.

໓໗໘. ສງ຺ຆເຠໂທຕິ ສງ຺ຆເຠທສິກ຺ຂາປທຎ຺ຈ. ເຠທານຸວຕ຺ຕທຸພ຺ພຈທູສກາຕິ ເຠທານຸວຕ຺ຕກທຸພ຺ພຈກຸລທູສກສິກ຺ຂາປທານິ ຈ. ທຸຏ຺ຐຸລ຺ລຈ຺ຉາທນນ຺ຕິ ທຸຏ຺ຐຸລ຺ລປຏິຈ຺ຉາທນສິກ຺ຂາປທຎ຺ຈ. ທິຏ຺ຐີຕິ ທິຏ຺ຐິອປ຺ປຏິນິສ຺ສຊ຺ຊນສິກ຺ຂາປທຎ຺ຈ. ຉນ຺ທອຸຊ຺ຊຄ຺ຆິກາ ທຸເວຕິ ຉນ຺ທໍອທຕ຺ວາຄມນສິກ຺ຂາປທຎ຺ຈ ອຸຊ຺ຊຄ຺ຆິກາຍ ອນ຺ຕຣຆເຣ ຄມນນິສີທນສິກ຺ຂາປທທ຺ວຍຎ຺ຈ.

໓໗໙. ອປ຺ປສທ຺ທາ ທຸເວ ວຸຕ຺ຕາຕິ ‘‘ອປ຺ປສທ຺ໂທ ອນ຺ຕຣຆເຣ ຄມິສ຺ສາມິ, ນິສີທິສ຺ສາມີ’’ຕິ (ປາຈິ. ໕໘໘, ໕໘໙) ວຸຕ຺ຕານິ ທ຺ເວ ສິກ຺ຂາປທານິ ຈ. ນ ພ຺ຍາຫເຣຕິ ‘‘ນ ສກພເຬນ ມຸເຂນ ພ຺ຍາຫຣິສ຺ສາມີ’’ຕິ (ປາຈິ. ໖໑໙) ວຸຕ຺ຕສິກ຺ຂາປທຎ຺ຈ. ຉມາ, ນີຈາສເນ, ຐານນ຺ຕິ ‘‘ຉມາຍໍ ນິສີທິຕ຺ວາ (ປາຈິ. ໖໔໕), ນີເຈ ອາສເນ ນິສີທິຕ຺ວາ (ປາຈິ. ໖໔໗), ຐິໂຕ ນິສິນ຺ນສ຺ສາ’’ຕິ (ປາຈິ. ໖໔໘) ວຸຕ຺ຕສິກ຺ຂາປທຎ຺ຈ. ປຈ຺ຉໂຕ ອຸປ຺ປເຖນ ຈາຕິ ‘‘ປຈ຺ຉໂຕ ຄຈ຺ຉນ຺ໂຕ ປຸຣໂຕ ຄຈ຺ຉນ຺ຕສ຺ສ (ປາຈິ. ໖໔໙), ອຸປ຺ປເຖນ ຄຈ຺ຉນ຺ໂຕ ປເຖນ ຄຈ຺ຉນ຺ຕສ຺ສາ’’ຕິ (ປາຈິ. ໖໕໐) ວຸຕ຺ຕສິກ຺ຂາປທທ຺ວຍຎ຺ຈ.

໓໘໐. ວຊ຺ຊຈ຺ຉາທາຕິ ວຊ຺ຊໂຕ ປຏິຈ຺ຉາທນສິກ຺ຂາປທຎ຺ຈ. ອນຸວຕ຺ຕາ ຈາຕິ ອຸກ຺ຂິຕ຺ຕານຸວຕ຺ຕນສິກ຺ຂາປທຎ຺ຈ. ຄຫຓນ຺ຕິ ‘‘ຫຕ຺ຖຄ຺ຄຫຓໍ ວາ ສາທິເຍຍ຺ຍາ’’ຕິ (ປາຈິ. ໖໗໕) ວຸຕ຺ຕສິກ຺ຂາປທຎ຺ຈ. ໂອສາເຣຍ຺ຍ ຈາຕິ ‘‘ອນປໂລເກຕ຺ວາ ກາຣກສງ຺ຆໍ ອນຎ຺ຎາຍ ຄຓສ຺ສ ຉນ຺ທໍ ໂອສາເຣຍ຺ຍາ’’ຕິ (ປາຈິ. ໖໙໕) ວຸຕ຺ຕສິກ຺ຂາປທຎ຺ຈ. ປຈ຺ຈກ຺ຂາມີຕິ ສິກ຺ຂາ ຈາຕິ ‘‘ພຸທ຺ຘໍ ປຈ຺ຈາຈິກ຺ຂາມີ’’ຕິ (ປາຈິ. ໗໑໐) ວຸຕ຺ຕສິກ຺ຂາປທຎ຺ຈ. ຕຖາ ກິສ຺ມິຎ຺ຈິເທວ ຈາຕິ ‘‘ກິສ຺ມິຎ຺ຈິເທວ ອຘິກຣເຓ ປຈ຺ຈາກຕາ’’ຕິ (ປາຈິ. ໗໑໖) ວຸຕ຺ຕສິກ຺ຂາປທຎ຺ຈ.

໓໘໑. ສໍສຏ຺ຐາ ທ຺ເວ ຈາຕິ ‘‘ຠິກ຺ຂຸນິໂຍ ປເນວ ສໍສຏ຺ຐາ ວິຫຣນ຺ຕີ’’ຕິ (ປາຈິ. ໗໒໒) ຈ ‘‘ຍາ ປນ ຠິກ຺ຂຸນີ ເອວໍ ວເທຍ຺ຍ ສໍສຏ຺ຐາວ, ອຍ຺ເຍ, ຕຸມ຺ເຫ ວິຫຣຖາ’’ຕິອາທິວຈນໍ (ປາຈິ. ໗໒໘) ປຏິຈ຺ຈ ວຸຕ຺ຕສິກ຺ຂາປທທ຺ວຍຎ຺ຈ. ວຘິຕ຺ວາ ຈາຕິ ‘‘ອຕ຺ຕານໍ ວຘິຕ຺ວາ ວຘິຕ຺ວາ ໂຣເທຍ຺ຍາ’’ຕິ (ປາຈິ. ໘໘໐) ວຸຕ຺ຕສິກ຺ຂາປທຎ຺ຈ. ວິສິພ຺ເພຕ຺ວາ ຈາຕິ ‘‘ຠິກ຺ຂຸນິຍາ ຈີວຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ’’ຕິ (ປາຈິ. ໘໙໓) ວຸຕ຺ຕສິກ຺ຂາປທຎ຺ຈ. ທຸກ຺ຂິຕນ຺ຕິ ‘‘ທຸກ຺ຂິຕໍ ສຫຊີວິນິ’’ນ຺ຕິ (ປາຈິ. ໙໔໗) ວຸຕ຺ຕສິກ຺ຂາປທຎ຺ຈ. ປຸນເທວ ຈ ສໍສຏ຺ຐາຕິ ‘‘ສໍສຏ຺ຐາ ວິຫເຣຍ຺ຍ ຄຫປຕິນາ ວາ ຄຫປຕິປຸຕ຺ເຕນ ວາ’’ຕິ (ປາຈິ. ໙໕໖) ເອວໍ ປຸນ ວຸຕ຺ຕສໍສຏ຺ຐສິກ຺ຂາປທຎ຺ຈ. ເນວ ວູປສເມຍ຺ຍ ຈາຕິ ‘‘‘ເອຫາຍ຺ເຍ, ອິມໍ ອຘິກຣຓໍ ວູປສເມຫີ’ຕິ (ປາຈິ. ໙໙໕) ວຸຈ຺ຈມານາ ‘ສາຘູ’ຕິ ປຏິສ຺ສຸຓິຕ຺ວາ ສາ ປຈ຺ຉາ ອນນ຺ຕຣາຍິກິນີ ເນວ ວູປສເມຍ຺ຍາ’’ຕິ ວຸຕ຺ຕສິກ຺ຂາປທຎ຺ຈ.

໓໘໒. ຊານໍ ສຠິກ຺ຂຸກາຣາມນ຺ຕິ ‘‘ຊານໍ ສຠິກ຺ຂຸກໍ ອາຣາມໍ ອນາປຸຈ຺ຉາ ປວິເສຍ຺ຍາ’’ຕິ (ປາຈິ. ໑໐໒໔) ວຸຕ຺ຕສິກ຺ຂາປທຎ຺ຈ. ຕເຖວ ນ ປວາຣເຍຕິ ‘‘ອຸຠໂຕສງ຺ເຆ ຕີຫິ ຐາເນຫິ ນ ປວາເຣຍ຺ຍາ’’ຕິ (ປາຈິ. ໑໐໕໑) ວຸຕ຺ຕສິກ຺ຂາປທຎ຺ຈ. ຕຖາ ອນ຺ວທ຺ຘມາສຎ຺ຈາຕິ ‘‘ອນ຺ວທ຺ຘມາສໍ ຠິກ຺ຂຸນິຍາ ຠິກ຺ຂຸສງ຺ຆໂຕ ທ຺ເວ ຘມ຺ມາ ປຈ຺ຈາສີສິຕພ຺ພາ’’ຕິ (ປາຈິ. ໑໐໕໙) ວຸຕ຺ຕສິກ຺ຂາປທຎ຺ຈ. ສຫຊີວິນິໂຍ ທຸເວຕິ ‘‘ສຫຊີວິນິໍ ວຸຏ຺ຐາເປຕ຺ວາ ທ຺ເວ ວສ຺ສານິ ເນວ ອນຸຄ຺ຄຓ຺ເຫຍ຺ຍ (ປາຈິ. ໑໑໐໘), ສຫຊີວິນິໍ ວຸຏ຺ຐາເປຕ຺ວາ ເນວ ວູປກາເສຍ຺ຍາ’’ຕິ (ປາຈິ. ໑໑໑໖) ວຸຕ຺ຕສິກ຺ຂາປທທ຺ວຍຎ຺ຈ.

໓໘໓-໔. ສເຈ ເມ ຈີວຣໍ ອຍ຺ເຍຕິ ‘‘ສເຈ ເມ ຕ຺ວໍ, ອຍ຺ເຍ, ຈີວຣໍ ທສ຺ສສິ, ເອວາຫໍ ຕໍ ວຸຏ຺ຐາເປສ຺ສາມີ’’ຕິ (ປາຈິ. ໑໑໕໑) ວຸຕ຺ຕສິກ຺ຂາປທຎ຺ຈ. ອນຸພນ຺ຘິສ຺ສສີຕິ ‘‘ສເຈ ມໍ ຕ຺ວໍ, ອຍ຺ເຍ, ທ຺ເວ ວສ຺ສານິ ອນຸພນ຺ຘິສ຺ສສິ, ເອວາຫໍ ຕໍ ວຸຏ຺ຐາເປສ຺ສາມີ’’ຕິ (ປາຈິ. ໑໑໕໕) ວຸຕ຺ຕສິກ຺ຂາປທຎ຺ຈ. ອສເມນ ສມ຺ພຸທ຺ເຘນ ປກາສິຕາ ອິເມ ສຕ຺ຕຕິໍສ ຘມ຺ມາ ສພ຺ເພ ກາຍວາຈາທິໂຕ ກາຍວາຈາຈິຕ຺ຕໂຕ ເອກສມຸຏ຺ຐານາ ກຕາ ສມນຸຠາສນາ ສິຍຸໍ ສມຸຏ຺ຐານໂຕ ສມນຸຠາສນສິກ຺ຂາປເທນ ສທິສາ ສິຍຸນ຺ຕິ ໂຍຊນາ.

ສມນຸຠາສນສມຸຏ຺ຐານວຓ຺ຓນາ.

໓໘໕. ກຖິນານິ ຈ ຕີຓີຕິ ‘‘ນິຏ຺ຐິຕຈີວຣສ຺ມິໍ ຠິກ຺ຂຸນາ ອຸພ຺ຠຕສ຺ມິໍ ກຖິເນ’’ຕິ (ປາຣາ. ໔໖໒) ວຸຕ຺ຕານິ ອາທິໂຕ ຕີຓິ ສິກ຺ຂາປທານິ. ປຕ຺ໂຕຕິ ‘‘ທສາຫປຣມໍ ອຕິເຣກປຕ຺ໂຕ’’ຕິ (ປາຣາ. ໖໐໑) ວຸຕ຺ຕສິກ຺ຂາປທຎ຺ຈ. ເຠສຊ຺ຊເມວ ຈາຕິ ‘‘ປຏິສາຍນີຍານິ ເຠສຊ຺ຊານີ’’ຕິ (ປາຣາ. ໖໒໒) ວຸຕ຺ຕສິກ຺ຂາປທຎ຺ຈ. ອຈ຺ເຈກມ຺ປິ ຈາຕິ ອຈ຺ເຈກສິກ຺ຂາປທຎ຺ຈ. ສາສງ຺ກນ຺ຕິ ຕທນນ຺ຕຣເມວ ສາສງ຺ກສິກ຺ຂາປທຎ຺ຈ. ປກ຺ກມນ຺ຕທ຺ວຍມ຺ປິ ຈາຕິ ‘‘ຕໍ ປກ຺ກມນ຺ໂຕ ເນວ ອຸທ຺ຘເຣຍ຺ຍາ’’ຕິ (ປາຈິ. ໑໐໙, ໑໑໕) ຠູຕຄາມວຄ຺ເຄ ວຸຕ຺ຕສິກ຺ຂາປທທ຺ວຍຎ຺ຈ.

໓໘໖. ຕຖາ ອຸປສ຺ສຍໍ ຄນ຺ຕ຺ວາຕິ ‘‘ຠິກ຺ຂຸນຸປສ຺ສຍໍ ອຸປສງ຺ກມິຕ຺ວາ ຠິກ຺ຂຸນິໂຍ ໂອວເທຍ຺ຍາ’’ຕິ (ປາຈິ. ໑໕໘) ວຸຕ຺ຕສິກ຺ຂາປທຎ຺ຈ. ປຣມ຺ປຣໍ ໂຠຊນນ຺ຕິ ‘‘ປຣມ຺ປຣໂຠຊເນ ປາຈິຕ຺ຕິຍ’’ນ຺ຕິ (ປາຈິ. ໒໒໑) ວຸຕ຺ຕສິກ຺ຂາປທຎ຺ຈ. ອນຕິຣິຕ຺ຕນ຺ຕິ ‘‘ອນຕິຣິຕ຺ຕໍ ຂາທນີຍໍ ວາ ໂຠຊນີຍໍ ວາ’’ຕິ (ປາຈິ. ໒໓໘) ວຸຕ຺ຕສິກ຺ຂາປທຎ຺ຈ. ສຠຕ຺ໂຕຕິ ‘‘ນິມນ຺ຕິໂຕ ສຠຕ຺ໂຕ ສມາໂນ’’ຕິ (ປາຈິ. ໒໙໙) ວຸຕ຺ຕສິກ຺ຂາປທຎ຺ຈ. ວິກປ຺ເປຕ຺ວາ ຕເຖວ ຈາຕິ ‘‘ຈີວຣໍ ວິກປ຺ເປຕ຺ວາ’’ຕິ (ປາຈິ. ໓໗໓) ວຸຕ຺ຕສິກ຺ຂາປທຎ຺ຈ.

໓໘໗. ຣຎ຺ໂຎຕິ ‘‘ຣຎ຺ໂຎ ຂຕ຺ຕິຍສ຺ສາ’’ຕິ (ປາຈິ. ໔໙໘) ວຸຕ຺ຕສິກ຺ຂາປທຎ຺ຈ. ວິກາເລຕິ ‘‘ວິກາເລ ຄາມໍ ປວິເສຍ຺ຍາ’’ຕິ (ປາຈິ. ໕໐໙-໕໑໒) ວຸຕ຺ຕສິກ຺ຂາປທຎ຺ຈ. ໂວສາສາຕິ ‘‘ໂວສາສມານຣູປາ ຐິຕາ’’ຕິ (ປາຈິ. ໕໕໘) ວຸຕ຺ຕສິກ຺ຂາປທຎ຺ຈ. ‘‘ອາຣຎ຺ຎເກ ອຸສ຺ສຍວາທິກາ’’ຕິ ປທຈ຺ເຉໂທ. ອາຣຎ຺ຎເກຕິ ‘‘ຕຖາຣູເປສຸ ອາຣຎ຺ຎເກສຸ ເສນາສເນສຸ ປຸພ຺ເພ ອປ຺ປຏິສໍວິທິຕ’’ນ຺ຕິ (ປາຈິ. ໕໗໐) ວຸຕ຺ຕສິກ຺ຂາປທຎ຺ຈ. ອຸສ຺ສຍວາທິກາຕິ ‘‘ອຸສ຺ສຍວາທິກາ ວິຫເຣຍ຺ຍາ’’ຕິ (ປາຈິ. ໖໗໙) ວຸຕ຺ຕສິກ຺ຂາປທຎ຺ຈ. ປຕ຺ຕສນ຺ນິຈຍຎ຺ເຈວາຕິ ‘‘ປຕ຺ຕສນ຺ນິຈຍໍ ກເຣຍ຺ຍາ’’ຕິ (ປາຈິ. ໗໓໔) ວຸຕ຺ຕສິກ຺ຂາປທຎ຺ຈ. ປຸເຣ, ປຈ຺ຉາ, ວິກາລເກຕິ ‘‘ຍາ ປນ ຠິກ຺ຂຸນີ ປຸເຣຠຕ຺ຕໍ ກຸລານິ ອຸປສງ຺ກມິຕ຺ວາ’’ຕິ (ປາຈິ. ໘໕໕) ຈ ‘‘ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ’’ຕິ (ປາຈິ. ໘໖໐) ຈ ‘‘ວິກາເລ ກຸລານິ ອຸປສງ຺ກມິຕ຺ວາ’’ຕິ (ປາຈິ. ໘໖໕) ຈ ວຸຕ຺ຕສິກ຺ຂາປທຕ຺ຕຍຎ຺ຈ.

໓໘໘-໙. ປຎ຺ຈາຫິກນ຺ຕິ ‘‘ປຎ຺ຈາຫິກໍ ສງ຺ຆາຏິຈາຣໍ ອຕິກ຺ກເມຍ຺ຍາ’’ຕິ (ປາຈິ. ໘໙໘) ວຸຕ຺ຕສິກ຺ຂາປທຎ຺ຈ. ສງ຺ກມນິນ຺ຕິ ‘‘ຈີວຣສງ຺ກມນີຍໍ ຘາເຣຍ຺ຍາ’’ຕິ (ປາຈິ. ໙໐໓) ວຸຕ຺ຕສິກ຺ຂາປທຎ຺ຈ. ຕຖາ ອາວສຖທ຺ວຍນ຺ຕິ ‘‘ອາວສຖຈີວຣໍ ອນິສ຺ສຊ຺ຊິຕ຺ວາ ປຣິຠຸຎ຺ເຊຍ຺ຍ (ປາຈິ. ໑໐໐໔), ອາວສຖໍ ອນິສ຺ສຊ຺ຊິຕ຺ວາ ຈາຣິກໍ ປກ຺ກເມຍ຺ຍາ’’ຕິ (ປາຈິ. ໑໐໐໙) ເອວໍ ອາວສເຖນ ສທ຺ຘິໍ ວຸຕ຺ຕສິກ຺ຂາປທທ຺ວຍຎ຺ຈ. ປສາເຂຕິ ‘‘ປສາເຂ ຊາຕໍ ຄຓ຺ຑໍ ວາ’’ຕິ (ປາຈິ. ໑໐໖໓) ວຸຕ຺ຕສິກ຺ຂາປທຎ຺ຈ. ອາສເນ ຈາຕິ ‘‘ຠິກ຺ຂຸສ຺ສ ປຸຣໂຕ ອນາປຸຈ຺ຉາ ອາສເນ ນິສີເທຍ຺ຍາ’’ຕິ (ປາຈິ. ໑໒໑໕) ວຸຕ຺ຕສິກ຺ຂາປທຎ຺ຈາຕິ ອິເມ ປນ ເອກູນຕິໍສ ຘມ຺ມາ ກາຍວາຈໂຕ, ກາຍວາຈາຈິຕ຺ຕໂຕ ຈ ສມຸຏ຺ຐານໂຕ ສພ຺ເພ ທ຺ວິສມຸຏ຺ຐານິກາ, ຕໂຕເຍວ ກຖິນສມ຺ຠວາ ກຖິນສມຸຏ຺ຐານາ ໂຫນ຺ຕີຕິ ໂຍຊນາ.

ກຖິນສມຸຏ຺ຐານວຓ຺ຓນາ.

໓໙໐. ທ຺ເວ ເສຍ຺ຍາຕິ ທ຺ເວ ສຫເສຍ຺ຍສິກ຺ຂາປທານິ ຈ. ອາຫຈ຺ຈປາໂທ ຈາຕິ ອາຫຈ຺ຈປາທກສິກ຺ຂາປທຎ຺ຈ. ປິຓ຺ຑຎ຺ຈາຕິ ອາວສຖປິຓ຺ຑໂຠຊນສິກ຺ຂາປທຎ຺ຈ. ຄຓໂຠຊນນ຺ຕິ ຄຓໂຠຊນສິກ຺ຂາປທຎ຺ຈ. ວິກາເລຕິ ວິກາລໂຠຊນສິກ຺ຂາປທຎ຺ຈ. ສນ຺ນິຘິຎ຺ເຈວາຕິ ສນ຺ນິຘິກາຣກສິກ຺ຂາປທຎ຺ຈ. ທນ຺ຕໂປນນ຺ຕິ ທນ຺ຕໂປນສິກ຺ຂາປທຎ຺ຈ. ອເຈລກນ຺ຕິ ອເຈລກສິກ຺ຂາປທຎ຺ຈ.

໓໙໑. ອຸຍ຺ຍຸຕ຺ຕຎ຺ຈາຕິ ‘‘ອຸຍ຺ຍຸຕ຺ຕໍ ເສນໍ ທສ຺ສນາຍ ຄຈ຺ເຉຍ຺ຍາ’’ຕິ (ປາຈິ. ໓໑໑) ວຸຕ຺ຕສິກ຺ຂາປທຎ຺ຈ. ‘‘ວເສ ອຸຍ຺ໂຍຘິ’’ນ຺ຕິ ປທຈ຺ເຉໂທ. ວເສຕິ ‘‘ເສນາຍ ວເສຍ຺ຍາ’’ຕິ (ປາຈິ. ໓໑໘) ວຸຕ຺ຕສິກ຺ຂາປທຎ຺ຈ. ອຸຍ຺ໂຍຘິນ຺ຕິ ‘‘ອຸຍ຺ໂຍຘິກໍ ວາ…ເປ… ອນີກທສ຺ສນໍ ວາ ຄຈ຺ເຉຍ຺ຍາ’’ຕິ (ປາຈິ. ໓໒໓) ວຸຕ຺ຕສິກ຺ຂາປທຎ຺ຈ. ສຸຣາຕິ ສຸຣາປານສິກ຺ຂາປທຎ຺ຈ. ໂອເຣນ ນ຺ຫາຍນນ຺ຕິ ໂອເຣນທ຺ຘມາສນຫາຍນສິກ຺ຂາປທຎ຺ຈ. ທຸພ຺ພຓ຺ຓກຣຓຎ຺ເຈວາຕິ ‘‘ຕິຓ຺ຓໍ ທຸພ຺ພຓ຺ຓກຣຓານ’’ນ຺ຕິ (ປາຈິ. ໓໖໘) ວຸຕ຺ຕສິກ຺ຂາປທຎ຺ຈ. ປາຏິເທສນີຍທ຺ວຍນ຺ຕິ ວຸຕ຺ຕາວເສສໍ ປາຏິເທສນີຍທ຺ວຍຎ຺ຈ.

໓໙໒. ລສຸຓນ຺ຕິ ລສຸຓສິກ຺ຂາປທຎ຺ຈ. ອຸປຕິຏ຺ເຐຍ຺ຍາຕິ ‘‘ຠິກ຺ຂຸສ຺ສ ຠຸຎ຺ຊນ຺ຕສ຺ສ ປານີເຍນ ວາ ວິຘູປເນນ ວາ ອຸປຕິຏ຺ເຐຍ຺ຍາ’’ຕິ (ປາຈິ. ໘໑໖) ວຸຕ຺ຕສິກ຺ຂາປທຎ຺ຈ. ນຈ຺ຈທສ຺ສນເມວ ຈາຕິ ‘‘ນຈ຺ຈໍ ວາ ຄີຕໍ ວາ ວາທິຕໍ ວາ ທສ຺ສນາຍ ຄຈ຺ເຉຍ຺ຍາ’’ຕິ (ປາຈິ. ໘໓໔) ວຸຕ຺ຕສິກ຺ຂາປທຎ຺ຈ. ນຄ຺ຄນ຺ຕິ ‘‘ນຄ຺ຄາ ນຫາເຍຍ຺ຍາ’’ຕິ (ປາຈິ. ໘໘໔) ວຸຕ຺ຕສິກ຺ຂາປທຎ຺ຈ. ອຕ຺ຖຣຓນ຺ຕິ ‘‘ເອກຕ຺ຖຣຓປາວຸຣຓາ ຕຸວຏ຺ເຏຍ຺ຍຸ’’ນ຺ຕິ (ປາຈິ. ໙໓໗) ວຸຕ຺ຕສິກ຺ຂາປທຎ຺ຈ. ມຎ຺ເຈຕິ ‘‘ເອກມຎ຺ເຈ ຕຸວຏ຺ເຏຍ຺ຍຸ’’ນ຺ຕິ (ປາຈິ. ໙໓໓) ວຸຕ຺ຕສິກ຺ຂາປທຎ຺ຈ. ອນ຺ໂຕຣຏ຺ເຐຕິ ‘‘ອນ຺ໂຕຣຏ຺ເຐ ສາສງ຺ກສມ຺ມເຕ’’ຕິ (ປາຈິ. ໙໖໒) ວຸຕ຺ຕສິກ຺ຂາປທຎ຺ຈ. ຕຖາ ພຫີຕິ ‘‘ຕິໂຣຣຏ຺ເຐ ສາສງ຺ກສມ຺ມເຕ’’ຕິ (ປາຈິ. ໙໖໖) ວຸຕ຺ຕສິກ຺ຂາປທຎ຺ຈ.

໓໙໓. ອນ຺ໂຕວສ຺ສນ຺ຕິ ‘‘ອນ຺ໂຕວສ຺ສໍ ຈາຣິກໍ ຈເຣຍ຺ຍາ’’ຕິ (ປາຈິ. ໙໗໐) ວຸຕ຺ຕສິກ຺ຂາປທຎ຺ຈ. ອຄາຣຎ຺ຈາຕິ ‘‘ຣາຊາຄາຣໍ ວາ ຈິຕ຺ຕາຄາຣໍ ວາ…ເປ… ໂປກ຺ຂຣຓິໍ ວາ ທສ຺ສນາຍ ຄຈ຺ເຉຍ຺ຍາ’’ຕິ (ປາຈິ. ໙໗໘) ວຸຕ຺ຕສິກ຺ຂາປທຎ຺ຈ. ອາສນ຺ທິນ຺ຕິ ‘‘ອາສນ຺ທິໍ ວາ ປລ຺ລງ຺ກໍ ວາ ປຣິຠຸຎ຺ເຊຍ຺ຍາ’’ຕິ (ປາຈິ. ໙໘໓) ວຸຕ຺ຕສິກ຺ຂາປທຎ຺ຈ. ສຸຕ຺ຕກນ຺ຕນນ຺ຕິ ‘‘ສຸຕ຺ຕໍ ກນ຺ເຕຍ຺ຍາ’’ຕິ (ປາຈິ. ໙໘໗) ວຸຕ຺ຕສິກ຺ຂາປທຎ຺ຈ. ເວຍ຺ຍາວຈ຺ຈນ຺ຕິ ‘‘ຄິຫິເວຍ຺ຍາວຈ຺ຈໍ ກເຣຍ຺ຍາ’’ຕິ (ປາຈິ. ໙໙໑) ວຸຕ຺ຕສິກ຺ຂາປທຎ຺ຈ. ສຫຕ຺ຖາ ຈາຕິ ‘‘ອຄາຣິກສ຺ສ ວາ ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ທເທຍ຺ຍາ’’ຕິ (ປາຈິ. ໑໐໐໐) ວຸຕ຺ຕສິກ຺ຂາປທຎ຺ຈ. ອາວາເສ ຈ ອຠິກ຺ຂຸເກຕິ ‘‘ອຠິກ຺ຂຸເກ ອາວາເສ ວສ຺ສໍ ວເສຍ຺ຍາ’’ຕິ (ປາຈິ. ໑໐໔໗) ວຸຕ຺ຕສິກ຺ຂາປທຎ຺ຈ.

໓໙໔. ຉຕ຺ຕນ຺ຕິ ‘‘ຉຕ຺ຕຸປາຫນໍ ຘາເຣຍ຺ຍາ’’ຕິ (ປາຈິ. ໑໑໗໘) ວຸຕ຺ຕສິກ຺ຂາປທຎ຺ຈ. ຍານຎ຺ຈາຕິ ‘‘ຍາເນນ ຍາເຍຍ຺ຍາ’’ຕິ (ປາຈິ. ໑໑໘໖) ວຸຕ຺ຕສິກ຺ຂາປທຎ຺ຈ. ສງ຺ຆາຓິນ຺ຕິ ‘‘ສງ຺ຆາຓິໍ ຘາເຣຍ຺ຍາ’’ຕິ (ປາຈິ. ໑໑໙໑) ວຸຕ຺ຕສິກ຺ຂາປທຎ຺ຈ. ອລງ຺ກາຣນ຺ຕິ ‘‘ອິຕ຺ຖາລງ຺ກາຣໍ ຘາເຣຍ຺ຍາ’’ຕິ (ປາຈິ. ໑໑໙໕) ວຸຕ຺ຕສິກ຺ຂາປທຎ຺ຈ. ຄນ຺ຘວາສິຕນ຺ຕິ ‘‘ຄນ຺ຘວຓ຺ຓເກນ ນຫາເຍຍ຺ຍ (ປາຈິ. ໑໑໙໙), ວາສິຕເກນ ປິຎ຺ຎາເກນ ນຫາເຍຍ຺ຍາ’’ຕິ (ປາຈິ. ໑໒໐໓) ວຸຕ຺ຕສິກ຺ຂາປທທ຺ວຍຎ຺ຈ. ‘‘ຠິກ຺ຂຸນີ…ເປ… ຄິຫິນິຍາ’’ຕິ ເອເຕນ ‘‘ຠິກ຺ຂຸນິຍາ ອຸມ຺ມທ຺ທາເປຍ຺ຍາ’’ຕິອາທີນິ (ປາຈິ. ໑໒໐໗) ຈຕ຺ຕາຣິ ສິກ຺ຂາປທານິ ວຸຕ຺ຕານິ.

໓໙໕. ຕຖາສໍກຈ຺ຈິກາຕິ ‘‘ອສໍກຈ຺ຈິກາ ຄາມໍ ປວິເສຍ຺ຍາ’’ຕິ (ປາຈິ. ໑໒໒໕) ເອວໍ ວຸຕ຺ຕສິກ຺ຂາປທຎ຺ຈ. ອິເມ ປນ ເຕຈຕ຺ຕາລີສ ຘມ຺ມາ ສພ຺ເພ ກາຍຈິຕ຺ຕວເສນ ທ຺ວິສມຸຏ຺ຐານິກາ. ເອຬກໂລເມນ ສມຸຏ຺ຐານໂຕ ສມາ ໂຫນ຺ຕີຕິ ໂຍຊນາ.

ເອຬກໂລມສມຸຏ຺ຐານວຓ຺ຓນາ.

໓໙໖-໗. ອຎ຺ຎຕ຺ຣາຕິ ‘‘ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສຍ຺ຍ ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນາ’’ຕິ (ປາຈິ. ໖໓) ວຸຕ຺ຕສິກ຺ຂາປທຎ຺ຈ. ອສມ຺ມໂຕ ເຈວາຕິ ‘‘ອສມ຺ມໂຕ ຠິກ຺ຂຸນິໂຍ ໂອວເທຍ຺ຍາ’’ຕິ (ປາຈິ. ໑໔໖) ວຸຕ຺ຕສິກ຺ຂາປທຎ຺ຈ. ຕຖາ ອຕ຺ຖງ຺ຄເຕນ ຈາຕິ ‘‘ອຕ຺ຖງ຺ຄເຕ ສູຣິເຍ ຠິກ຺ຂຸນິໂຍ ໂອວເທຍ຺ຍາ’’ຕິ (ປາຈິ. ໑໕໔) ວຸຕ຺ຕສິກ຺ຂາປທຎ຺ຈ. ຕິຣຈ຺ຉານວິຊ຺ຊາ ທ຺ເວ ວຸຕ຺ຕາຕິ ‘‘ຕິຣຈ຺ຉານວິຊ຺ຊໍ ປຣິຍາປຸເຓຍ຺ຍ, ວາເຈຍ຺ຍາ’’ຕິ (ປາຈິ. ໑໐໑໔, ໑໐໑໘) ເອວໍ ວຸຕ຺ຕານິ ທ຺ເວ ສິກ຺ຂາປທານິ ຈ. ອໂນກາສກຕມ຺ປິ ຈາຕິ ‘‘ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ເຉຍ຺ຍາ’’ຕິ (ປາຈິ. ໑໒໒໐) ວຸຕ຺ຕສິກ຺ຂາປທຎ຺ຈາຕິ ອິເມ ປນ ສພ຺ເພ ຉ ຘມ຺ມາ ວາຈໂຕ, ວາຈາຈິຕ຺ຕໂຕ ຈາຕິ ອິເມຫິ ທ຺ວີຫິ ສມຸຏ຺ຐາເນຫິ ສມຸຏ຺ຐານິກາ ໂຫນ຺ຕິ. ປທໂສຘມ຺ມຕຸລ຺ຍຕາ ອຍເມເຕສໍ ປທໂສຘມ຺ເມນ ສທິສຠາໂວຕິ ໂຍຊນາ.

ປທໂສຘມ຺ມສມຸຏ຺ຐານວຓ຺ຓນາ.

໓໙໘-໙. ເອກນ຺ຕິ ‘‘ຠິກ຺ຂຸນິຍາ ສທ຺ຘິໍ ສໍວິຘາຍ ເອກທ຺ຘານມຄ຺ຄໍ ປຏິປຊ຺ເຊຍ຺ຍາ’’ຕິ (ປາຈິ. ໑໘໐) ວຸຕ຺ຕສິກ຺ຂາປທຎ຺ຈ. ນາວນ຺ຕິ ‘‘ເອກນາວໍ ອຠິຣຸເຫຍ຺ຍາ’’ຕິ (ປາຈິ. ໑໘໘) ວຸຕ຺ຕສິກ຺ຂາປທຎ຺ຈ. ປຓີຕຎ຺ຈາຕິ ‘‘ປຓີຕໂຠຊນານິ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາຠຸຎ຺ເຊຍ຺ຍາ’’ຕິ (ປາຈິ. ໒໕໙) ວຸຕ຺ຕສິກ຺ຂາປທຎ຺ຈ. ສໍວິຘານຎ຺ຈາຕິ ມາຕຸຄາເມນ ສທ຺ຘິໍ ສໍວິຘາຍ ຄມນສິກ຺ຂາປທຎ຺ຈ. ສໍຫເຣຕິ ‘‘ສມ຺ພາເຘ ໂລມໍ ສໍຫຣາເປຍ຺ຍາ’’ຕິ (ປາຈິ. ໗໙໙) ວຸຕ຺ຕສິກ຺ຂາປທຎ຺ຈ. ຘຎ຺ຎນ຺ຕິ ‘‘ອາມກຘຎ຺ຎໍ ວິຎ຺ຎຕ຺ວາ ວາ’’ຕິ (ປາຈິ. ໘໒໑) ວຸຕ຺ຕສິກ຺ຂາປທຎ຺ຈ. ນິມນ຺ຕິຕາ ເຈວາຕິ ‘‘ນິມນ຺ຕິຕາ ວາ ປວາຣິຕາ ວາ ຂາທນີຍໍ ວາ ໂຠຊນີຍໍ ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ’’ຕິ (ປາຈິ. ໑໐໓໘) ວຸຕ຺ຕສິກ຺ຂາປທຎ຺ຈ. ປາຏິເທສນິຍຏ຺ຐກນ຺ຕິ ຠິກ຺ຂຸນີນໍ ວຸຕ຺ຕາ ອຏ຺ຐ ປາຏິເທສນີຍາ ເຈຕິ ພຸທ຺ຘເສຏ຺ເຐນ ປຎ຺ຎຕ຺ຕາ ເອຕາ ຈຸທ຺ທສ ສິກ຺ຂາ ຈຕຸສມຸຏ຺ຐານາ ກາຍໂຕ, ກາຍວາຈໂຕ, ກາຍຈິຕ຺ຕໂຕ, ວາຈາຈິຕ຺ຕໂຕ ຈາຕິ ຈຕູຫິ ສມຸຏ຺ຐາເນຫິ ສມຸຏ຺ຐຫນ຺ຕິ. ສມຸຏ຺ຐານໂຕ ອທ຺ຘາເນນ ອທ຺ຘານສິກ຺ຂາປເທນ ສມາ ໂຫນ຺ຕີຕິ ມຕາຕິ ໂຍຊນາ.

ອທ຺ຘານສມຸຏ຺ຐານວຓ຺ຓນາ.

໔໐໐-໑. ສຸຕິນ຺ຕິ ອຸປສ຺ສຸຕິຕິຏ຺ຐນສິກ຺ຂາປທຎ຺ຈ. ສູປາທິວິຎ຺ຎຕ຺ຕິນ຺ຕິ ສູໂປທນວິຎ຺ຎຕ຺ຕິສິກ຺ຂາປທຎ຺ຈ. ອນ຺ຘກາເຣຕິ ‘‘ຣຕ຺ຕນ຺ຘກາເຣ ອປ຺ປທີເປ’’ຕິ (ປາຈິ. ໘໓໙) ວຸຕ຺ຕສິກ຺ຂາປທຎ຺ຈ. ຕເຖວ ຈ ປຏິຈ຺ຉນ຺ເນຕິ ‘‘ປຏິຈ຺ຉນ຺ເນ ໂອກາເສ’’ຕິ (ປາຈິ. ໘໔໓) ວຸຕ຺ຕສິກ຺ຂາປທຎ຺ຈ. ໂອກາເສຕິ ‘‘ອຊ຺ໂຌກາເສ ປຸຣິເສນ ສທ຺ຘິ’’ນ຺ຕິ (ປາຈິ. ໘໔໗) ເອວໍ ວຸຕ຺ຕສິກ຺ຂາປທຎ຺ຈ. ພ຺ຍູເຫ ຈາຕິ ຕທນນ຺ຕຣເມວ ‘‘ຣຖິກາຍ ວາ ພ຺ຍູເຫ ວາ ສິງ຺ຆາຏເກ ວາ ປຸຣິເສນ ສທ຺ຘິ’’ນ຺ຕິ (ປາຈິ. ໘໕໑) ອາຄຕສິກ຺ຂາປທຎ຺ຈາຕິ ອິເມ ສພ຺ເພປິ ອາທິຈ຺ຈພນ຺ຘຸນາ ເທສິຕາ ຉ ຘມ຺ມາ ຈຕຸຕ຺ຖຈ຺ຉຏ຺ຐໂຕ ກາຍຈິຕ຺ຕໂຕ, ກາຍວາຈາຈິຕ຺ຕໂຕ ຈ ສມຸຏ຺ຐຫນ຺ຕາ ເຖຍ຺ຍສຕ຺ຖສມຸຏ຺ຐານາ ເຖຍ຺ຍສຕ຺ຖສິກ຺ຂາປເທນ ສມານສມຸຏ຺ຐານາ ສິຍຸນ຺ຕິ ໂຍຊນາ.

ເຖຍ຺ຍສຕ຺ຖສມຸຏ຺ຐານວຓ຺ຓນາ.

໔໐໒. ຉຕ຺ຕ, ທຓ຺ຑກຣສ຺ສາປີຕິ ‘‘ນ ຉຕ຺ຕປາຓິສ຺ສ ທຓ຺ຑປາຓິສ຺ສາ’’ຕິ (ປາຈິ. ໖໓໕) ວຸຕ຺ຕສິກ຺ຂາປທທ຺ວຍຎ຺ຈ. ສຕ຺ຖາວຸຘກຣສ຺ສາປີຕິ ‘‘ນ ສຕ຺ຖປາຓິສ຺ສ (ປາຈິ. ໖໓໖), ນ ອາວຸຘປາຓິສ຺ສາ’’ຕິ (ປາຈິ. ໖໓໗) ວຸຕ຺ຕສິກ຺ຂາປທທ຺ວຍຎ຺ຈ. ປາທຸກູປາຫນາ, ຍານນ຺ຕິ ‘‘ນ ປາທຸກາຣຸຬ຺ຫສ຺ສ (ປາຈິ. ໖໓໘), ນ ອຸປາຫນາຣຸຬ຺ຫສ຺ສ (ປາຈິ. ໖໓໙), ນ ຍານຄຕສ຺ສາ’’ຕິ (ປາຈິ. ໖໔໐) ວຸຕ຺ຕສິກ຺ຂາປທຕ຺ຕຍຎ຺ຈ. ເສຍ຺ຍາ, ປລ຺ລຕ຺ຖິກາຍ ຈາຕິ ‘‘ນ ສຍນຄຕສ຺ສ (ປາຈິ. ໖໔໑), ນ ປລ຺ລຕ຺ຖິກາຍ ນິສິນ຺ນສ຺ສາ’’ຕິ (ປາຈິ. ໖໔໒) ວຸຕ຺ຕສິກ຺ຂາປທທ຺ວຍຎ຺ຈ.

໔໐໓. ເວຐິໂຕຄຸຓ຺ຐິໂຕ ຈາຕິ ‘‘ນ ເວຐິຕສີສສ຺ສ (ປາຈິ. ໖໔໓), ນ ໂອຄຸຓ຺ຐິຕສີສສ຺ສາ’’ຕິ (ປາຈິ. ໖໔໔) ວຸຕ຺ຕສິກ຺ຂາປທທ຺ວຍຎ຺ຈາຕິ ນິທສ຺ສິຕາ ສພ຺ເພ ເອກາທສ ຘມ຺ມາ ວາຈາຈິຕ຺ຕສງ຺ຂາເຕນ ເອເກນ ສມຸຏ຺ຐາເນນ ສມຸຏ຺ຐິຕາ ຘມ຺ມເທສນສມຸຏ຺ຐານາຕິ ສຎ຺ຎິຕາ ສລ຺ລກ຺ຂິຕາຕິ ໂຍຊນາ.

ຘມ຺ມເທສນສມຸຏ຺ຐານວຓ຺ຓນາ.

໔໐໔. ເອວໍ ຕາວ ສມ຺ຠິນ຺ນສມຸຏ຺ຐານໍ ເວທິຕພ຺ພໍ, ນິຍຕສມຸຏ຺ຐານໍ ຕິວິຘໍ, ຕໍ ເອກສ຺ເສວ ສິກ຺ຂາປທສ຺ສ ໂຫຕີຕິ ວິສຸໍເຍວ ທສ຺ເສຕຸມາຫ ‘‘ຠູຕາໂຣຈນກຎ຺ເຈວາ’’ຕິອາທິ. ຠູຕາໂຣຈນກຎ຺ເຈວາຕິ ຕີຫິ ອຈິຕ຺ຕກສມຸຏ຺ຐາເນຫິ ສມຸຏ຺ຐິຕໍ ຠູຕາໂຣຈນສິກ຺ຂາປທຎ຺ຈ. ໂຈຣິວຸຏ຺ຐາປນມ຺ປິ ຈາຕິ ວາຈາຈິຕ຺ຕໂຕ, ກາຍວາຈາຈິຕ຺ຕໂຕ ຈາຕິ ທ຺ວີຫິ ສມຸຏ຺ຐິຕໍ ໂຈຣິວຸຏ຺ຐາປນສິກ຺ຂາປທຎ຺ຈ. ອນນຸຎ຺ຎາຕເມວ ອນນຸຎ຺ຎາຕມຕ຺ຕໍ. ອນນຸຎ຺ຎາຕມຕ຺ຕນ຺ຕິ ວາຈໂຕ, ກາຍວາຈໂຕ, ວາຈາຈິຕ຺ຕໂຕ, ກາຍວາຈາຈິຕ຺ຕໂຕ ຈາຕິ ຈຕູຫິ ສມຸຏ຺ຐິຕໍ ອນນຸຎ຺ຎາຕສິກ຺ຂາປທຎ຺ຈາຕິ. ອິທໍ ຕຍນ຺ຕິ ອິທໍ ສິກ຺ຂາປທຕ຺ຕຍໍ. ອສມ຺ຠິນ຺ນນ຺ຕິ ເກນຈິ ອຎ຺ເຎນ ສິກ຺ຂາປເທນ ອສມ຺ມິສ຺ສສມຸຏ຺ຐານໍ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ສມຸຏ຺ຐານສີສກຖາວຓ຺ຓນາ ນິຏ຺ຐິຕາ.