ຂນ຺ຘກປຸຈ຺ຉາກຖາວຓ຺ຓນາ

໓໐໐. ເສເສສູຕິ ອຠພ຺ພປຸຄ຺ຄລປຣິທີປເກສຸ ສພ຺ພປເທສຸ.

໓໐໒. ‘‘ນສ຺ສນ຺ຕຸ ເອເຕ’’ຕິ ປທຈ຺ເຉໂທ. ປຸຣກ຺ຂກາຕິ ເອຕ຺ຖ ສາມິອຕ຺ເຖ ປຈ຺ຈຕ຺ຕວຈນໍ, ເຠທປຸເຣກ຺ຂກສ຺ສ, ເຠທປຸເຣກ຺ຂກາຍາຕິ ອຕ຺ໂຖ.

໓໐໓. ເສເສສູຕິ ອວເສເສສຸ ອສໍວາສກາທິທີປເກສຸ ປຏິກ຺ເຂປປເທສຸ.

໓໐໔. ເອກາວ ທຸກ຺ກຏາປຕ຺ຕິ ວຸຕ຺ຕາຕິ ວສ຺ສໍ ອນຸປຄມນາທິປຈ຺ຈຍາ ຊາຕິໂຕ ເອກາວ ທຸກ຺ກຏາປຕ຺ຕິ ວຸຕ຺ຕາ.

໓໐໕. ອຸໂປສຖສມາ ມຕາຕິ ອຸໂປສຖກ຺ຂນ຺ຘເກ ວຸຕ຺ຕສທິສາ ຊາຕາ ອາປຕ຺ຕິໂຍ ມຕາ ອຘິປ຺ເປຕາ.

໓໐໖. ຈມ຺ເມຕິ ຈມ຺ມກ຺ຂນ຺ຘເກ. ວຈ຺ຉຕຣິໍ ຄເຫຕ຺ວາ ມາເຣນ຺ຕານໍ ຉພ຺ພຄ຺ຄິຍານໍ ປາຈິຕ຺ຕິ ວຸຕ຺ຕາຕິ ສມ຺ພນ຺ໂຘ. ວຈ຺ຉຕຣິນ຺ຕິ ພລສມ຺ປນ຺ນໍ ຕຣຸຓຄາວິໍ. ສາ ຫິ ວຈ຺ຉກຠາວໍ ຕຣິຕ຺ວາ ອຕິກ຺ກມິຕ຺ວາ ຐິຕຕ຺ຕາ ‘‘ວຈ຺ຉຕຣີ’’ຕິ ວຸຈ຺ຈຕິ.

໓໐໗. ອງ຺ຄຊາຕໍ ຉຸປນ຺ຕສ຺ສາຕິ ຄາວີນໍ ອງ຺ຄຊາຕໍ ອຕ຺ຕໂນ ອງ຺ຄຊາເຕນ ພຫິ ຉຸປນ຺ຕສ຺ສ. ເສເສສູຕິ ຄາວີນໍ ວິສາຓາທີສຸ ຄຫເຓ, ປິຏ຺ຐິອຠິຣຸຫເຓ ຈ. ຍຖາຫ ‘‘ຉພ຺ພຄ຺ຄິຍາ ຠິກ຺ຂູ ອຈິຣວຕິຍາ ນທິຍາ ຄາວີນໍ ຕຣນ຺ຕີນໍ ວິສາເຓສຸປິ ຄຓ຺ຫນ຺ຕີ’’ຕິອາທິ (ມຫາວ. ໒໕໒).

໓໐໙. ຕຕ຺ຖ ເຠສຊ຺ຊກ຺ຂນ຺ຘເກ. ສາມນ຺ຕາ ທ຺ວງ຺ຄຸເລຕິ ວຈ຺ຈມຄ຺ຄປສ຺ສາວມຄ຺ຄານໍ ສາມນ຺ຕາ ທ຺ວງ຺ຄຸລມຕ຺ເຕ ປເທເສ. ສຕ຺ຖກມ຺ມໍ ກໂຣນ຺ຕສ຺ສ ຖຸລ຺ລຈ຺ຈຍມຸທີຣິຕນ຺ຕິ ໂຍຊນາ. ຍຖາຫ – ‘‘ນ, ຠິກ຺ຂເວ, ສມ຺ພາຘສ຺ສ ສາມນ຺ຕາ ທ຺ວງ຺ຄຸເລ ສຕ຺ຖກມ຺ມໍ ວາ ວຕ຺ຖິກມ຺ມໍ ວາ ກາເຣຕພ຺ພໍ, ໂຍ ກາເຣຍ຺ຍ, ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ (ມຫາວ. ໒໗໙). ເອຕ຺ຖ ຈ ‘‘ສາມນ຺ຕາ ທ຺ວງ຺ຄຸເລ’’ຕິ ອິທໍ ສຕ຺ຖກມ຺ມໍເຍວ ສນ຺ຘາຍ ວຸຕ຺ຕໍ. ວຕ຺ຖິກມ຺ມໍ ປນ ສມ຺ພາເຘເຍວ ປຏິກ຺ຂິຕ຺ຕໍ.

‘‘ນ, ຠິກ຺ຂເວ, ອຎ຺ຎຕ຺ຣ ນິມນ຺ຕິເຕນ ອຎ຺ຎສ຺ສ ໂຠຊ຺ຊຍາຄຸ ປຣິຠຸຎ຺ຊິຕພ຺ພາ, ໂຍ ປຣິຠຸຎ຺ເຊຍ຺ຍ, ຍຖາຘມ຺ໂມ ກາເຣຕພ຺ໂພ’’ຕິ (ມຫາວ. ໒໘໓) ວຸຕ຺ຕຕ຺ຕາ ອາຫ ‘‘ໂຠຊ຺ຊຍາຄູສຸ ປາຈິຕ຺ຕີ’’ຕິ. ເອຕ຺ຖ ຈ ໂຠຊ຺ຊຍາຄຸ ນາມ ພຫລຍາຄຸ. ‘‘ປິຓ຺ຑໍ ວຏ຺ເຏຕ຺ວາ ປາຕພ຺ພຍາຄູ’’ຕິ ຄຓ຺ຐິປເທ ວຸຕ຺ຕໍ. ປາຈິຕ຺ຕີຕິ ປຣມ຺ປຣໂຠຊນປວາຣຓສິກ຺ຂາປເທຫິ ປາຈິຕ຺ຕິ. ເສເສສູຕິ ອນ຺ໂຕວຸຕ຺ຖອນ຺ໂຕປກ຺ກສຍໍປກ຺ກປຣິໂຠຄາທີສຸ. ຍຖາຫ ‘‘ນ, ຠິກ຺ຂເວ, ອນ຺ໂຕວຸຕ຺ຖໍ ອນ຺ໂຕປກ຺ກໍ ສາມໍປກ຺ກໍ ປຣິຠຸຎ຺ຊິຕພ຺ພໍ, ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິອາທິ (ມຫາວ. ໒໗໔).

໓໑໐. ຈີວຣສໍຍຸຕ຺ເຕຕິ ຈີວຣກ຺ຂນ຺ຘເກ.

໓໑໓. ຈມ຺ເປຍ຺ຍເກ ຈ ໂກສມ຺ເພຕິ ຈມ຺ເປຍ຺ຍກ຺ຂນ຺ຘເກ ເຈວ ໂກສມ຺ພກກ຺ຂນ຺ຘເກ ຈ. ‘‘ກມ຺ມສ຺ມິ’’ນ຺ຕິອາທີສຸປິ ເອເສວ ນໂຍ.

໓໑໗. ໂຣມນ຺ເຖຕິ ຠຸຕ຺ຕສ຺ສ ລຫຸໍ ປາກຕ຺ຕາຍ ກຸຈ຺ຉິຄຕໍ ມຸຂໍ ອາໂຣເປຕ຺ວາ ສຓ຺ຫກຣຓວເສນ ອນຸຈາລເນ.

໓໑໘. ເສນາສນສ຺ມິນ຺ຕິ ເສນາສນກ຺ຂນ຺ຘເກ. ຄຣຸໂນຕິ ຄຣຸຠຓ຺ຑສ຺ສ.

໓໒໐. ສງ຺ຆເຠເທຕິ ສງ຺ຆເຠທກກ຺ຂນ຺ຘເກ.

໓໒໑. ເຠທານຸວຕ຺ຕການນ຺ຕິ ສງ຺ຆເຠທານຸວຕ຺ຕການໍ. ຄຓໂຠເຄຕິ ຄຓໂຠຊເນ.

໓໒໒. ສາຕິ ເອຕ຺ຖ ສພ຺ພວຕ຺ເຕສຸ ອນາທຣິເຍນ ໂຫຕີຕິ ເສໂສ. ເສສໍ ອຸຕ຺ຕານຕ຺ຖເມວ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ຂນ຺ຘກປຸຈ຺ຉາກຖາວຓ຺ຓນາ ນິຏ຺ຐິຕາ.