ຈຕຸວິປຕ຺ຕິກຖາວຓ຺ຓນາ

໒໗໓. ອິທານິ ອຸຠຍສາຘາຣຓໍ ກຕ຺ວາ ວິປຕ຺ຕິວາຣາທີນໍ ວິສິຏ຺ຐວາຣານໍ ສງ຺ຄຫໍ ກາຕຸມາຫ ‘‘ກຕິ ອາປຕ຺ຕິໂຍ’’ຕິອາທິ.

໒໗໔. ຠິກ຺ຂຸນີ ສເຈ ຉາເທຕິ, ຈຸຕາ ໂຫຕິ. ສເຈ ເວມຕິກາ ຉາເທຕິ, ຖຸລ຺ລຈ຺ຈຍໍ ສິຍາຕິ ໂຍຊນາ.

໒໗໕. ສງ຺ຆາທິເສສນ຺ຕິ ປຣສ຺ສ ສງ຺ຆາທິເສສໍ.

໒໗໖. ‘‘ກຕິ ອາຈາຣວິປຕ຺ຕິປຈ຺ຈຍາ’’ຕິ ປທຈ຺ເຉໂທ.

໒໗໗. ອາຈາຣວິປຕ຺ຕິນ຺ຕິ ອຕ຺ຕໂນ ວາ ປຣສ຺ສ ວາ ອາຈາຣວິປຕ຺ຕິໍ.

໒໗໙. ປາປິກໍ ທິຏ຺ຐິນ຺ຕິ ອເຫຕຸກອກິຣິຍນຕ຺ຖິກທິຏ຺ຐິອາທິໍ ລາມິກໍ ທິຏ຺ຐິໍ.

໒໘໑. ມນຸສ຺ສຸຕ຺ຕຣິຘມ຺ມນ຺ຕິ ອຸຕ຺ຕຣິມນຸສ຺ສຘມ຺ມໍ.

໒໘໒. ອາຊີວເຫຕຸ ສຎ຺ຈຣິຕ຺ຕໍ ສມາປນ຺ໂນຕິ ໂຍຊນາ. ປຣິຍາຍວຈເນຕິ ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິອາທິເກ ເລສວຈເນ. ຎາເຕຕິ ຍໍ ອຸທ຺ທິສ຺ສ ວທຕິ, ຕສ຺ມິໍ ມນຸສ຺ສຊາຕິເກ ວຈນສມນນ຺ຕຣເມວ ຎາເຕ.

໒໘໓. ວຕ຺ວາຕິ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ. ຠິກ຺ຂຸນີ ປນ ສເຈ ເອວໍ ໂຫຕິ, ຠິກ຺ຂຸນີ ອຄິລານາ ອຕ຺ຕໂນ ອຕ຺ຖາຍ ປຓີຕໂຠຊນໍ ວິຎ຺ຎາເປຕ຺ວາ ຠຸຕ຺ຕາວິນີ ສເຈ ໂຫຕີຕິ ອຘິປ຺ປາໂຍ. ຕສ຺ສາ ປາຏິເທສນີຍໍ ສິຍາຕິ ໂຍຊນາ.

໒໘໔. ‘‘ອຕ຺ຕໂນ ອຕ຺ຖາຍ ວິຎ຺ຎາເປຕ຺ວານາ’’ຕິ ອິມິນາ ປຣສ຺ສ ຎາຕກປວາຣິເຕ ຕສ຺ເສວຕ຺ຖາຍ ວິຎ຺ຎາເປຕ຺ວາ ເຕນ ທິນ຺ນໍ ວາ ຕສ຺ສ ວິສ຺ສາເສນ ວາ ປຣິຠຸຎ຺ຊນ຺ຕສ຺ສ ເຕສໍ ອຕ຺ຕໂນ ອຎ຺ຎາຕກອປ຺ປວາຣິເຕ ສຸທ຺ຘຈິຕ຺ຕຕາຍ ອນາປຕ຺ຕີຕິ ທີເປຕິ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ຈຕຸວິປຕ຺ຕິກຖາວຓ຺ຓນາ ນິຏ຺ຐິຕາ.