ຠິກ຺ຂຸນິວິຠງ຺ໂຄ

໑໗໐. ວິນຍສ຺ສ ວິນິຈ຺ຉເຍ ຠິກ຺ຂູນໍ ປາຏວຕ຺ຖາຍາຕິ ຠິກ຺ຂຸນີນໍ ປາຏວສ຺ສາປິ ຕທຘີນຕ຺ຕາ ປຘານທສ຺ສນວເສນ ວຸຕ຺ຕໍ. ອຖ ວາ ທສ຺ສນລິງ຺ຄນ຺ຕຣສາຘາຣຓຕ຺ເຕ ອິຈ຺ຉິເຕ ປຸລ຺ລິງ຺ເຄນ, ນປຸໍສກລິງ຺ເຄນ ວາ ນິທ຺ເທໂສ ສທ຺ທສຕ຺ຖານຸໂຍຄໂຕຕິ ‘‘ຠິກ຺ຂູນ’’ນ຺ຕິ ປຸລ຺ລິງ຺ເຄນ ວຸຕ຺ຕໍ.

໑໗໑. ນນ຺ທນ຺ຕີ ສາທິຍນ຺ຕີ.

໑໗໒. ຕິສ຺ໂສ ອາປຕ຺ຕິໂຍ ຜຸເສຕິ ໂຍຊນາ. ຊາຓຸສ຺ສ ອຸທ຺ຘໍ, ອກ຺ຂກສ຺ສ ອໂຘ ຄຫຓໍ ສາທິຍນ຺ຕິຍາ ຕສ຺ສາ ປາຣາຊິກນ຺ຕິ ໂຍຊນາ.

໑໗໓. ກາຍປຏິພທ຺ເຘ ວາ ຄຫຓໍ ສາທິຍນ຺ຕິຍາ ທຸກ຺ກຏໍ.

໑໗໔. ວຊ຺ຊນ຺ຕິ ອຎ຺ຎິສ຺ສາ ຠິກ຺ຂຸນິຍາ ປາຣາຊິກາປຕ຺ຕິໍ.

໑໗໖. ຕໍ ລທ຺ຘິນ຺ຕິ ອຸກ຺ຂິຕ຺ຕສ຺ສ ຍໍ ລທ຺ຘິໍ ອຕ຺ຕໂນ ໂຣເຈສິ, ຕໍ ລທ຺ຘິໍ ນ ນິສ຺ສຊ຺ຊນ຺ຕີຕິ ໂຍຊນາ.

໑໗໘. ‘‘ອິຘ ອາຄຈ຺ຉາ’’ຕິ ປທຈ຺ເຉໂທ. ‘‘ວຸຕ຺ຕາ ອາຄຈ຺ຉຕີ’’ຕິ ປທຈ຺ເຉໂທ.

໑໗໙. ຫຕ຺ຖປາສປ຺ປເວສເນຕິ ຫຕ຺ຖປາສູປຄມເນ. ‘‘ຫຕ຺ຖຄຕປ຺ປເວສເນ’’ຕິ ວາ ປາໂຐ, ໂສເຍວ ອຕ຺ໂຖ.

ອິຕິ ອຸຕ຺ຕເຣ ລີນຕ຺ຖປກາສນິຍາ ຠິກ຺ຂຸນິວິຠງ຺ເຄ

ປາຣາຊິກກຖາວຓ຺ຓນາ ນິຏ຺ຐິຕາ.

໑໘໐. ເອກສ຺ສາຕິ ອຕ຺ຕໂນ ອຕ຺ຕໂນ ອຏ຺ຏກາຣສ຺ສ ວາ. ອາໂຣຈເນຕິ ວຕ຺ຕພ຺ພສ຺ສ ໂວຫາຣິການໍ ນິເວທເນ.

໑໘໑. ທຸຕິຍາໂຣຈເນຕິ ທຸຕິຍສ຺ສ, ທຸຕິຍໍ ເອວໍ ອາໂຣຈເນ.

໑໘໒. ທ຺ວີຫີຕິ ທ຺ວີຫິ ກມ຺ມວາຈາຫິ. ກມ຺ມວາໂຈສາເນຕິ ກມ຺ມວາຈາໂອສາເນ.

໑໘໓. ປຣິກ຺ເຂເປ ອຕິກ຺ກນ຺ເຕຕິ ອຕ຺ຕໂນ ຄາມໂຕ ຄນ຺ຕ຺ວາ ອິຕຣໍ ຄາມໍ ປວິສນ຺ຕິຍາ ປຐເມນ ປາເທນ ຕສ຺ສ ຄາມສ຺ສ ປຣິກ຺ເຂເປ ອຕິກ຺ກນ຺ເຕ, ປຐມປາເທ ປຣິກ຺ເຂປໍ ອຕິກ຺ກເມຕ຺ວາ ອນ຺ໂຕຄາມສງ຺ເຂປໍ ຄເຕຕິ ອຕ຺ໂຖ.

໑໘໔. ທຸຕິເຍນາຕິ ຄາມປຣິກ຺ເຂປໂຕ ພຫິ ຐິເຕນ ທຸຕິຍປາເທນ. ອຕິກ຺ກນ຺ເຕຕິ ຕສ຺ມິໍ ຄາມປຣິກ຺ເຂເປ ອຕິກ຺ກນ຺ເຕ, ຕສ຺ມິໍ ປາເທ ອນ຺ໂຕຄາມໍ ປເວສິເຕຕິ ອຕ຺ໂຖ. ເສສໍ ອຸຕ຺ຕານຕ຺ຖເມວ.

ອິຕິ ອຸຕ຺ຕເຣ ລີນຕ຺ຖປກາສນິຍາ ຠິກ຺ຂຸນິວິຠງ຺ເຄ

ສງ຺ຆາທິເສສກຖາວຓ຺ຓນາ ນິຏ຺ຐິຕາ.

໑໙໓. ອິຫ ຠິກ຺ຂຸນີ ປຕ຺ຕສນ຺ນິຈຍໍ ກໂຣນ຺ຕີ ໂຫຕິ, ສາ ເອກໍ ນິສ຺ສຄ຺ຄິຍໍ ປາຈິຕ຺ຕິຍໍເຍວ ຜຸເສຕິ ໂຍຊນາ.

໑໙໔. ອກາລຈີວຣໍ ກາລຈີວຣໍ ກຕ຺ວາ ຠາຊາເປນ຺ຕິຍາຕິ ໂຍຊນາ. ປໂຍເຄຕິ ຠາຊນປໂຍເຄ.

໑໙໕. ຉິນ຺ເນຕິ ອຈ຺ຉິນ຺ເນ.

໑໙໖. ຕໂຕ ປຣນ຺ຕິ ຕໂຕ ປຐມໂຕ ອຎ຺ຎໍ.

ອິຕິ ອຸຕ຺ຕເຣ ລີນຕ຺ຖປກາສນິຍາ ຠິກ຺ຂຸນິວິຠງ຺ເຄ

ນິສ຺ສຄ຺ຄິຍກຖາວຓ຺ຓນາ ນິຏ຺ຐິຕາ.

໑໙໙. ລສຸຓໍ ຂາທຕິ ເຈ, ທ຺ເວ ອາປຕ຺ຕິໂຍ ຜຸຏາຕິ ໂຍຊນາ.

໒໐໐. ປໂຍເຄຕິ ສໍຫາຣາປນປໂຍເຄ. ສໍຫເຏຕິ ອຕ຺ຕນາ ສໍຫເຏ, ປເຣນ ສໍຫຣາປິເຕ ຈ ອາປຕ຺ຕິ ປາຈິຕ຺ຕິ ໂຫຕິ.

໒໐໑. ກເຕຕິ ຕລຆາເຕ ກເຕ.

໒໐໒. ຊຕຸນາ ມຏ຺ຐກນ຺ຕິ ຊຕຸນາ ກຕໍ ມຏ຺ຐທຓ຺ຑກໍ. ‘‘ທຸກ຺ກຏໍ ອາທິນ຺ເນ’’ຕິ ປທຈ຺ເຉໂທ.

໒໐໔. ຠຸຎ຺ຊມານສ຺ສ ຠິກ຺ຂຸສ຺ສ ຫຕ຺ຖປາເສຕິ ໂຍຊນາ. ຫິຕ຺ວາ ຫຕ຺ຖປາສໍ.

໒໐໕. ວິຎ຺ຎາເປຕ຺ວາຕິ ອນ຺ຕມໂສ ມາຕຣມ຺ປິ ຍາຈິຕ຺ວາ. ອຊ຺ໂຌຫາເຣ ປາຈິຕ຺ຕິໍ ທີປເຍຕິ ໂຍຊນາ.

໒໐໖. ອຸຈ຺ຈາຣາທິນ຺ຕິ ອາທິ-ສທ຺ເທນ ວິຆາສສງ຺ກາຣມຸຕ຺ຕານໍ ຄຫຓໍ.

ລສຸຓວຄ຺ຄວຓ຺ຓນາ ປຐມາ.

໒໐໙. ອິຘ ອິມສ຺ມິໍ ຣຕ຺ຕນ຺ຘກາຣວຄ຺ເຄ. ປຐເມ, ທຸຕິເຍ, ຕຕິເຍ, ຈຕຸຕ຺ເຖປິ ວິນິຈ຺ຉໂຍ ລສຸຓວຄ຺ຄສ຺ສ ຉຏ຺ເຐນ ສິກ຺ຂາປເທນ ຕຸລ຺ໂຍ ສທິໂສຕິ ໂຍຊນາ.

໒໑໐. ອາສເນຕິ ປລ຺ລງ຺ເກ ຕສ຺ໂສກາສຠູເຕ. ສາມິເກ ອນາປຸຈ຺ຉາຕິ ຕສ຺ມິໍ ກຸເລ ຍໍ ກິຎ຺ຈິ ວິຎ຺ຎຸມນຸສ຺ສໍ ອນາປຸຈ຺ຉາ.

໒໑໑. ອໂນວສ຺ສນ຺ຕິ ຠິຕ຺ຕິຍາ ພຫິ ນິພ຺ພໂກສພ຺ຠນ຺ຕຣໍ. ທຸຕິຍາຕິກ຺ກເມຕິ ທຸຕິເຍນ ປາເທນ ນິພ຺ພໂກສສ຺ສ ອຸທກປາຕຏ຺ຐານາຕິກ຺ກເມ.

໒໑໒. ນິສີທິເຕຕິ ນິສິນ຺ເນ.

໒໑໓. ປໂຍເຄຕິ ອຸຊ຺ຌາປນປໂຍເຄ.

໒໑໔. ນິຣຍາທິນາ ອຕ຺ຕານໍ ວາ ປຣໍ ວາ ອຠິສປ຺ເປນ຺ຕີ ສປຖໍ ກໂຣນ຺ຕີ ທ຺ເວ ຜຸເສຕິ ໂຍຊນາ. ອຠິສປ຺ປິເຕຕິ ອຠິສປິເຕ.

໒໑໕. ວຘິຕ຺ວາຕິ ຫຕ຺ຖາທີຫິ ປຫຣິຕ຺ວາ. ‘‘ກໂຣຕິ ເອກ’’ນ຺ຕິ ປທຈ຺ເຉໂທ.

ຣຕ຺ຕນ຺ຘກາຣວຄ຺ຄວຓ຺ຓນາ ທຸຕິຍາ.

໒໑໖. ນຄ຺ຄາຕິ ອນິວຕ຺ຖາ ວາ ອປາຣຸຕາ ວາ. ປໂຍເຄຕິ ຈຸຓ຺ຓມຕ຺ຕິກາອຠິສງ຺ຂຣຓາທິປໂຍເຄ.

໒໑໗. ປມາຓາຕິກ຺ກນ຺ຕນ຺ຕິ ‘‘ທີຆໂສຈຕສ຺ໂສ ວິທຕ຺ຖິໂຍ ສຸຄຕວິທຕ຺ຖິຍາ, ຕິຣິຍໍ ທ຺ເວ ວິທຕ຺ຖິໂຍ’’ຕິ (ປາຈິ. ໘໘໘) ວຸຕ຺ຕປມາຓມຕິກ຺ກນ຺ຕໍ. ປໂຍເຄຕິ ກາຣາປນປໂຍເຄ.

໒໑໘. ວິສິພ຺ເພຕ຺ວາຕິ ທຸສ຺ສິພ຺ພິຕໍ ປຸນ ສິພ຺ພນຕ຺ຖາຍ ວິສິພ຺ເພຕ຺ວາ.

໒໑໙. ປຎ຺ຈ ອຫານິ ປຎ຺ຈາຫໍ, ປຎ຺ຈາຫເມວ ປຎ຺ຈາຫິກໍ. ສງ຺ຆາຏີນໍ ຈາໂຣ ສງ຺ຆາຏິຈາໂຣ, ປຣິໂຠຄວເສນ ວາ ໂອຕາປນວເສນ ວາ ສງ຺ຆຏິຕຏ຺ເຐນ ‘‘ສງ຺ຆາຏີ’’ຕິ ລທ຺ຘນາມານໍ ‘‘ຕິຈີວຣໍ, ອຸທກສາຏິກາ, ສໍກຈ຺ຈິກາ’’ຕິ ອິເມສໍ ປຎ຺ຈນ຺ນໍ ຈີວຣານໍ ປຣິວຕ຺ຕນໍ. ອຕິກ຺ກເມຕິ ຠິກ຺ຂຸນີ ອຕິກ຺ກເມຍ຺ຍ. ອສ຺ສາ ປນ ເອກາວ ປາຈິຕ຺ຕິ ປຣິທີປິຕາຕິ ໂຍຊນາ.

໒໒໐. ສງ຺ກມນີຍນ຺ຕິ ສງ຺ກເມຕພ຺ພໍ. ອຎ຺ຎິສ຺ສາ ສນ຺ຕກໍ ອນາປຸຈ຺ຉາ ຄຫິຕໍ ປຸນ ທາຕພ຺ພໍ ປຎ຺ຈນ຺ນໍ ອຎ຺ຎຕຣໍ.

໒໒໑. ຄຓຈີວຣລາຠສ຺ສາຕິ ຠິກ຺ຂຸນິສງ຺ເຆນ ລຠິຕພ຺ພຈີວຣສ຺ສ. ອນ຺ຕຣາຍໍ ກໂຣຕີຕິ ຍຖາ ເຕ ທາຕຸກາມາ ນ ເທນ຺ຕິ, ເອວໍ ປຣກ຺ກມຕິ.

໒໒໒. ຘມ຺ມິກນ຺ຕິ ສມຄ຺ເຄນ ສງ຺ເຆນ ສນ຺ນິປຕິຕ຺ວາ ກຣິຍມານໍ. ປຏິພາຫນ຺ຕີຕິ ປຏິເສເຘນ຺ຕີ. ປຏິພາຫິເຕ ປຏິເສຘິເຕ.

໒໒໓. ອຄາຣິກາທິໂນຕິ ອາທິ-ສທ຺ເທນ ‘‘ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ’’ຕິ (ປາຣາ. ໙໑໗) ວຸຕ຺ເຕ ສງ຺ຄຓ຺ຫາຕິ. ສມຓຈີວຣນ຺ຕິ ກປ຺ປກຕໍ ນິວາສນປາຣຸປນຸປຄໍ. ປໂຍເຄຕິ ທານປໂຍເຄ.

໒໒໔. ຈີວເຣ ທຸພ຺ພລາສາຍາຕິ ທຸພ຺ພລຈີວຣປຈ຺ຈາສາຍ ‘‘ສເຈ ສກ຺ໂກມ, ທສ຺ສາມາ’’ຕິ ເອຕ຺ຕກມຕ຺ຕໍ ສຸຕ຺ວາ ອຸປ຺ປາທິຕາຍ ອາສາຍາຕິ ອຕ຺ໂຖ. ກາລນ຺ຕິ ຈີວຣກາລສມຍໍ. ສມຕິກ຺ກເມຕິ ຠິກ຺ຂຸນີຫິ ກາລຈີວເຣ ຠາຊິຍມາເນ ‘‘ອາຄເມຖ, ອຍ຺ເຍ, ອຕ຺ຖິ ສງ຺ຆສ຺ສ ຈີວຣປຈ຺ຈາສາ’’ຕິ ວຕ຺ວາ ຕໍ ຈີວຣວິຠງ຺ຄໍ ສມຕິກ຺ກເມຍ຺ຍ.

໒໒໕. ຘມ຺ມິກໍ ກຖິນຸທ຺ຘາຣນ຺ຕິ ສມຄ຺ເຄນ ສງ຺ເຆນ ກຣິຍມານໍ ກຖິນສ຺ສ ອນ຺ຕຣຸພ຺ຠາຣໍ. ປຏິພາຫນ຺ຕິຍາຕິ ນິວາເຣນ຺ຕິຍາ.

ນ຺ຫານວຄ຺ຄວຓ຺ຓນາ ຕຕິຍາ.

໒໒໖. ຕຸວຏ຺ເຏຍ຺ຍຸນ຺ຕິ ນິປຊ຺ເຊຍ຺ຍຸໍ. ອິຕຣໍ ປາຈິຕ຺ຕິຍໍ.

໒໒໗. ປໂຍເຄຕິ ຠິກ຺ຂຸນິຍາ ອຜາສຸກກຣຓປໂຍເຄ ກຣິຍມາເນ.

໒໒໘. ທຸກ຺ຂິຕນ຺ຕິ ຄິລານໍ. ນຸປຏ຺ຐາເປນ຺ຕິຍາ ວາປີຕິ ຕສ຺ສາ ອຸປຏ຺ຐານໍ ປເຣຫິ ອກາຣາເປນ຺ຕິຍາ, ສຍໍ ວາ ອກໂຣນ຺ຕິຍາ.

໒໒໙. ອຸປສ຺ສຍໍ ທຕ຺ວາຕິ ກວາຏພນ຺ຘໍ ອຕ຺ຕໂນ ປຸຄ຺ຄລິກວິຫາຣໍ ທຕ຺ວາ. ກຑ຺ຒິເຕຕິ ນິກ຺ກຑ຺ຒິເຕ.

໒໓໐. ສໍສຏ຺ຐາຕິ ຄຫປຕິນາ ວາ ຄຫປຕິປຸຕ຺ເຕນ ວາ ສໍສຏ຺ຐວິຫາຣີ ຠິກ຺ຂຸນີ ສງ຺ເຆນ ສໍສຏ຺ຐວິຫາຣໂຕ ນິວຕ຺ຕິຍມານາ. ຎຕ຺ຕິຍາ ທຸກ຺ກຏໍ ຜຸເສຕິ ສມນຸຠາສນກມ຺ມຎຕ຺ຕິຍາ ທຸກ຺ກຏໍ ອາປຊ຺ເຊຍ຺ຍ.

໒໓໑. ອນ຺ໂຕຣຏ຺ເຐຕິ ຍສ຺ສ ວິຊິເຕ ວິຫຣຕິ, ຕສ຺ສ ຣຏ຺ເຐ. ປຏິປນ຺ນາຍາຕິ ຈາຣິກໍ ກປ຺ເປນ຺ຕິຍາ. ເສສກນ຺ຕິ ປາຈິຕ຺ຕິຍໍ.

ຕຸວຏ຺ຏວຄ຺ຄວຓ຺ຓນາ ຈຕຸຕ຺ຖາ.

໒໓໓. ຣາຊາຄາຣາທິກນ຺ຕິ ອາທິ-ສທ຺ເທນ ຈິຕ຺ຕາຄາຣາທີນໍ ຄຫຓໍ.

໒໓໕. ປໂຍເຄຕິ ກປ຺ປາສວິຈາຣຓໍ ອາທິໍ ກຕ຺ວາ ສພ຺ພປໂຍເຄ. ອຸຊ຺ຊວຸຊ຺ຊວເນຕິ ຍຕ຺ຕກໍ ຫຕ຺ເຖນ ອຎ຺ຉິຕໍ ໂຫຕິ, ຕສ຺ມິໍ ຕກ຺ກມ຺ຫິ ເວຐິເຕ.

໒໓໗. ປໂຍເຄຕິ ອຄາຣິກສ຺ສ ວາ ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ ສຫຕ຺ຖາ ຂາທນີຍາທີນໍ ທານປໂຍເຄ.

໒໓໘. ‘‘ສມໍ ອາປຕ຺ຕິປເຠທໂຕ’’ຕິ ປທຈ຺ເຉໂທ.

໒໓໙. ຕິຣຈ຺ຉານຄຕໍ ວິຊ຺ຊນ຺ຕິ ຍໍ ກິຎ຺ຈິ ພາຫິຣກໍ ອນຕ຺ຖສໍຫິຕໍ ປຣູປຆາຕກຣໍ ຫຕ຺ຖິສິກ຺ຂາທິສິປ຺ປໍ. ປຐນ຺ຕິຍາຕິ ສິກ຺ຂນ຺ຕິຍາ. ປໂຍເຄຕິ ທຸຣຸປສງ຺ກມນາທິປໂຍເຄ. ປເທ ປເທຕິ ປທາທິວເສນ ປຣິຍາປຸຓນ຺ຕິຍາ ປເທ ປເທ ອກ຺ຂຣປທານໍ ວເສນ.

໒໔໐. ນວເມ ‘‘ປຣິຍາປຸຓາຕີ’’ຕິ ປທໍ, ທສເມ ‘‘ວາເຈຕີ’’ຕິ ປທນ຺ຕິ ເອວໍ ປທມຕ຺ຕເມວ ອຸຠິນ຺ນໍ ວິເສສກໍ ເຠທກໍ.

ຈິຕ຺ຕາຄາຣວຄ຺ຄວຓ຺ຓນາ ປຎ຺ຈມາ.

໒໔໑. ຕມາຣາມນ຺ຕິ ຍຕ຺ຖ ຠິກ຺ຂູ ຣຸກ຺ຂມູເລປິ ວສນ຺ຕິ, ຕໍ ສຠິກ຺ຂຸກໍ ປເທສໍ.

໒໔໓. ອກ຺ໂກສຕີຕິ ທສນ຺ນໍ ອກ຺ໂກສວຕ຺ຖູນໍ ອຎ຺ຎຕເຣນ ສມ຺ມຸຂາ ວາ ປຣມ຺ມຸຂາ ວາ ອກ຺ໂກສຕິ. ປຣິຠາສຕີຕິ ຠຍທສ຺ສເນນ ຕຊ຺ເຊຕິ. ‘‘ປາຈິຕ຺ຕິ ອກ຺ໂກສິເຕ’’ຕິ ປທຈ຺ເຉໂທ.

໒໔໔. ຈຓ຺ຑິກຠາເວນາຕິ ໂກເຘນ. ຄຓນ຺ຕິ ຠິກ຺ຂຸນິສງ຺ຆໍ. ປຣິຠາສຕີຕິ ‘‘ພາລາ ເອຕາ’’ຕິອາທີຫິ ວຈເນຫິ ອກ຺ໂກສຕິ. ປໂຍເຄຕິ ປຣິຠາສນປໂຍເຄ. ປຣິຠຏ຺ເຐຕິ ອກ຺ໂກສິເຕ. ອິຕຣໍ ປາຈິຕ຺ຕິຍໍ.

໒໔໕. ນິມນ຺ຕິຕາຕິ ຄຓໂຠຊເນ ວຸຕ຺ຕນເຍນ ນິມນ຺ຕິຕາ. ປວາຣິຕາຕິ ປວາຣຓສິກ຺ຂາປເທ ວຸຕ຺ຕນເຍນ ວາຣິຕາ. ຂາທນໍ ໂຠຊນມ຺ປິ ວາຕິ ຍາຄຸປູວຂຊ຺ຊກໍ, ຍາວກາລິກໍ ມູລຂາທນີຍາທິຂາທນີຍໍ, ໂອທນາທິໂຠຊນມ຺ປິ ວາ ຍາ ຠິກ຺ຂຸນີ ຠຸຎ຺ຊນ຺ຕີ ໂຫຕິ, ສາ ປນ ທ຺ເວເຍວ ອາປຕ຺ຕິໂຍ ຜຸເສຕິ ໂຍຊນາ.

໒໔໗. ມຈ຺ຉຣາຍນ຺ຕີຕິ ມຈ຺ຉຣໍ ກໂຣນ຺ຕີ, ອຕ຺ຕໂນ ປຈ຺ຈຍທາຍກກຸລສ຺ສ ອຎ຺ເຎຫິ ສາຘາຣຓຠາວໍ ອສຫນ຺ຕີຕິ ອຕ຺ໂຖ. ປໂຍເຄຕິ ຕທນຸຣູເປ ກາຍວຈີປໂຍເຄ. ມຈ຺ຉຣິເຕຕິ ມຈ຺ຉຣວເສນ ກຕປໂຍເຄ ນິປ຺ຜນ຺ເນ.

໒໔໘. ອຠິກ຺ຂຸເກ ປນາວາເສຕິ ຍໂຕ ຠິກ຺ຂຸນຸປສ຺ສຍໂຕ ອທ຺ຘໂຍຊນພ຺ຠນ຺ຕເຣ ໂອວາທທາຍກາ ຠິກ຺ຂູ ນ ວສນ຺ຕິ, ມຄ຺ໂຄ ວາ ອເຂໂມ ໂຫຕິ, ນ ສກ຺ກາ ອນນ຺ຕຣາເຍນ ຄນ຺ຕຸໍ, ເອວຣູເປ ອາວາເສ. ປຸພ຺ພກິຈ຺ເຈສູຕິ ‘‘ວສ຺ສໍ ວສິສ຺ສາມີ’’ຕິ ເສນາສນປຎ຺ຎາປນປານີຍອຸປຏ຺ຐາປນາທິປຸພ຺ພກິຈ຺ເຈ ປນ ກຣິຍມາເນ ທຸກ຺ກຏໍ ຠເວຕິ ໂຍຊນາ.

໒໔໙. ວສ຺ສໍວຸຕ຺ຖາຕິ ປຸຣິມໍ ວາ ປຈ຺ຉິມໍ ວາ ເຕມາສໍ ວຸຕ຺ຖາ. ອຸຠໂຕສງ຺ເຆຕິ ຠິກ຺ຂຸນິສງ຺ເຆ, ຠິກ຺ຂຸສງ຺ເຆ ຈ. ຕີຫິປິ ຐາເນຫີຕິ ‘‘ທິຏ຺ເຐນ ວາ’’ຕິອາທິນາ ວຸຕ຺ເຕຫິ ຕີຫິ ກາຣເຓຫິ.

໒໕໐. ໂອວາທຕ຺ຖາຍາຕິ ຄຣຸຘມ຺ໂມວາທນຕ຺ຖາຍ. ສໍວາສຕ຺ຖາຍາຕິ ອຸໂປສຖປຸຈ຺ຉນຕ຺ຖາຍ ເຈວ ປວາຣຓຕ຺ຖາຍ ຈ. ນ ຄຈ຺ຉຕີຕິ ຠິກ຺ຂຸໍ ນ ອຸປຄຈ຺ຉຕິ.

໒໕໑. ໂອວາທມ຺ປິ ນ ຍາຈນ຺ຕີຕິ ອຸໂປສຖາທິວເສນ ໂອວາທູປສງ຺ກມນໍ ຠິກ຺ຂຸໍ ນ ຍາຈນ຺ຕີ ນ ປຸຈ຺ຉນ຺ຕີ. ອຸໂປສຖນ຺ຕິ ອຸໂປສຖທິວສໂຕ ປຸຣິມທິວເສ ເຕຣສິຍໍ ວາ ຈາຕຸທ຺ທສິຍໍ ວາ ອຸໂປສຖໍ ນ ປຸຈ຺ຉນ຺ຕີ.

໒໕໒. ອປຸຈ຺ຉິຕ຺ວາວ ສງ຺ຆໍ ວາຕິ ສງ຺ຆໍ ວາ ຄຓໍ ວາ ອນປໂລເກຕ຺ວາວ. ‘‘ເຠທາເປຕີ’’ຕິ ອິທໍ ນິທສ຺ສນມຕ຺ຕໍ ‘‘ຜາລາເປຍ຺ຍ ວາ ໂຘວາເປຍ຺ຍ ວາ ອາລິມ຺ປາເປຍ຺ຍ ວາ ພນ຺ຘາເປຍ຺ຍ ວາ ໂມຈາເປຍ຺ຍ ວາ’’ຕິ ອິເມສມ຺ປິ ກິຣິຍາວິກປ຺ປານໍ ສງ຺ຄເຫຕພ຺ພຕ຺ຕາ. ປສາຂຊນ຺ຕິ ນາຠິຍາ ເຫຏ຺ຐາ, ຊາຓຸມຓ຺ຑລານໍ ອຸປຣິ ປເທເສ ຊາຕໍ ຄຓ຺ຑໍ ວາ ຣຸຘິຕໍ ວາ. ປໂຍເຄຕິ ເຠທາປນາທິປໂຍເຄ.

ອາຣາມວຄ຺ຄວຓ຺ຓນາ ຉຏ຺ຐາ.

໒໕໓. ຄພ຺ຠິນິນ຺ຕິ ອາປນ຺ນສຕ຺ຕໍ ສິກ຺ຂມານໍ. ວຸຏ຺ຐາເປນ຺ຕີຕິ ອຸປຊ຺ຌາຍາ ຫຸຕ຺ວາ ອຸປສມ຺ປາເທນ຺ຕີ. ປໂຍເຄຕິ ຄຓປຣິເຍສນາທິປໂຍເຄ. ວຸຏ຺ຐາປິເຕຕິ ອຸປສມ຺ປາທິເຕ, ກມ຺ມວາຈາປຣິໂຍສາເນຕິ ອຕ຺ໂຖ.

໒໕໕. ສຫຊີວິນິນ຺ຕິ ສທ຺ຘິວິຫາຣິນິໍ. ນານຸຄ຺ຄຓ຺ຫນ຺ຕີຕິ ອຸທ຺ເທສທານາທີຫິ ນ ສງ຺ຄຓ຺ຫນ຺ຕີ.

ຄພ຺ຠິນິວຄ຺ຄວຓ຺ຓນາ ສຕ຺ຕມາ.

໒໕໘. ‘‘ອລໍ ວຸຏ຺ຐາປິເຕນາ’’ຕິ ວຸຈ຺ຈມານາ ຠິກ຺ຂຸນີຫິ ນິວາຣິຍມານາ. ຂີຍຕີຕິ ອຎ຺ຎາສໍ ພ຺ຍຕ຺ຕານໍ ລຊ຺ຊີນໍ ວຸຏ຺ຐານສມ຺ມຸຕິໍ ທີຍມານໍ ທິສ຺ວາ ‘‘ອຫເມວ ນູນ ພາລາ’’ຕິອາທິນາ ຠຓມານາ ຂີຍຕິ. ປໂຍເຄຕິ ຂີຍມານປໂຍເຄ. ຂີຍິເຕຕິ ຂີຍນປໂຍເຄ ນິຏ຺ຐິເຕ.

ກຸມາຣິຠູຕວຄ຺ຄວຓ຺ຓນາ ອຏ຺ຐມາ.

໒໖໐. ຉຕ຺ຕຸປາຫນນ຺ຕິ ວຸຕ຺ຕລກ຺ຂຓໍ ຉຕ຺ຕຎ຺ຈ ອຸປາຫນາໂຍ ຈ. ປໂຍເຄຕິ ຘາຣຓປໂຍເຄ.

໒໖໑. ຍາເນນາຕິ ວຍ຺ຫາທິນາ. ຍາຍນ຺ຕີຕິ ສເຈ ຍາເນນ ຄຕາ ໂຫຕິ.

໒໖໒. ສງ຺ຆາຓິນ຺ຕິ ຍໍ ກິຎ຺ຈິ ກຏູປຄໍ. ຘາເຣນ຺ຕິຍາຕິ ກຏິຍໍ ປຏິມຸຈ຺ຈນ຺ຕິຍາ.

໒໖໓. ຄນ຺ຘວຓ຺ເຓນາຕິ ເຍນ ເກນຈິ ວຓ຺ເຓນ ຈ ເຍນ ເກນຈິ ຄນ຺ເຘນ ຈ. ຄນ຺ໂຘ ນາມ ຈນ຺ທນາເລປາທິ. ວຓ຺ໂຓ ນາມ ກຸງ຺ກຸມຫລິທ຺ທາທິ. ປໂຍເຄຕິ ຄນ຺ຘາທິປໂຍເຄ ຣຈນໂຕ ປຏ຺ຐາຍ ປຸພ຺ພປໂຍເຄ.

໒໖໖. ອນາປຸຈ຺ຉາຕິ ‘‘ນິສີທາມິ, ອຍ຺ຍາ’’ຕິ ອນາປຸຈ຺ຉິຕ຺ວາ. ນິສີທິເຕ ຠິກ຺ຂຸສ຺ສ ອຸປຈາເຣ ອນ຺ຕມໂສ ຉມາຍ ນິສິນ຺ເນ.

໒໖໗. ອໂນກາສກຕນ຺ຕິ ‘‘ອສຸກສ຺ມິໍ ນາມ ຐາເນ ປຸຈ຺ຉິສ຺ສາມີ’’ຕິ ເອວໍ ອກຕໂອກາສໍ.

໒໖໘. ປວິສນ຺ຕິຍາຕິ ວິນິຈ຺ຉຍໍ ອາຣາມວຄ຺ຄສ຺ສ ປຐເມເນວ ສິກ຺ຂາປເທນ ສທິສໍ ກຕ຺ວາ ວເທຍ຺ຍາຕິ ໂຍຊນາ.

ຉຕ຺ຕຸປາຫນວຄ຺ຄວຓ຺ຓນາ ນວມາ.

ອິຕິ ອຸຕ຺ຕເຣ ລີນຕ຺ຖປກາສນິຍາ ຠິກ຺ຂຸນິວິຠງ຺ເຄ

ປາຈິຕ຺ຕິຍກຖາວຓ຺ຓນາ ນິຏ຺ຐິຕາ.

໒໖໙-໗໐. ອຏ຺ຐສຸ ປາຏິເທສນີຍສິກ຺ຂາປເທສຸປິ ທ຺ວິຘາ ອາປຕ຺ຕິ ໂຫຕີຕິ ໂຍຊນາ. ຕໂຕຕິ ຄຫຓເຫຕຸ. ສພ຺ເພສູຕິ ປາຏິເທສນີຍສິກ຺ຂາປເທສຸ.

ປາຏິເທສນີຍກຖາວຓ຺ຓນາ.

໒໗໑-໒. ອິມໍ ປຣມໍ ອຸຕ຺ຕມໍ ນິຣຸຕ຺ຕຣໍ ເກນຈິ ວາ ວຕ຺ຕພ຺ເພນ ອຸຕ຺ຕເຣນ ຣຫິຕໍ ນິທ຺ໂທສໍ ອຸຕ຺ຕຣໍ ເອວໍນາມກໍ ຘີໂຣ ປຎ຺ຎວາ ຠິກ຺ຂຸ ອຕ຺ຖວເສນ ວິທິຕ຺ວາ ທຸຣຸຕ຺ຕຣໍ ກິຈ຺ເຉນ ອຸຕ຺ຕຣິຕພ຺ພໍ ປຎ຺ຎຕ຺ຕມຫາສມຸທ຺ທໍ ວິນຍມຫາສາຄຣໍ ສຸເຂເນວ ຍສ຺ມາ ອຸຕ຺ຕຣຕິ, ຕສ຺ມາ ກງ຺ຂຈ຺ເຉເທ ວິນຍວິຈິກິຈ຺ຉາຍ ຉິນ຺ທເນ ສຕ຺ເຖ ສຕ຺ຖສທິເສ ອສ຺ມິໍ ສຕ຺ເຖ ອິມສ຺ມິໍ ອຸຕ຺ຕຣປກຣເຓ ອຸສ຺ມາຍຸຕ຺ໂຕ ກມ຺ມຊເຕໂຊຘາຕຸຍາ ສມນ຺ນາຄໂຕ ຊີວມາໂນ ຠິກ຺ຂຸ ນິຈ຺ຈໍ ນິຣນ຺ຕຣໍ ສຕ຺ໂຕ ອຠິຣໂຕ ນິຈ຺ຈໍ ໂຍຄໍ ສຕຕາຠິໂຍຄໍ ກາຕຸໍ ຍຸຕ຺ໂຕ ອນຸຣູໂປຕິ ໂຍຊນາ.

ຠິກ຺ຂຸນິວິຠງ຺ໂຄ ນິຏ຺ຐິໂຕຕິ ເອຕ຺ຖາປິ ອຸປ຺ປຕ຺ຕິ ວຸຕ຺ຕນເຍເນວ ເວທິຕພ຺ພາ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ຠິກ຺ຂຸນິວິຠງ຺ຄວຓ຺ຓນາ ນິຏ຺ຐິຕາ.