ມຫາວິຠງ຺ຄສງ຺ຄຫກຖາວຓ຺ຓນາ

໔. ເອວໍ ໂສຕຸຊນໍ ສວເນ ນິໂຍເຊຕ຺ວາ ຍຖາປຏິຎ຺ຎາຕໍ ອຸຕ຺ຕຣວິນິຈ຺ຉຍໍ ທສ຺ເສຕຸມາຫ ‘‘ເມຖຸນ’’ນ຺ຕິອາທິ. ‘‘ກຕິ ອາປຕ຺ຕິໂຍ’’ຕິ ອຍໍ ທິຏ຺ຐສໍສນ຺ທນາ, ອທິຏ຺ຐໂຊຕນາ, ວິມຕິຈ຺ເຉທນາ, ອນຸມຕິ, ກເຖຕຸກມ຺ຍຕາປຸຈ຺ຉາຕິ ປຎ຺ຈນ຺ນໍ ປຸຈ຺ຉານໍ ກເຖຕຸກມ຺ຍຕາປຸຈ຺ຉາ. ຕິສ຺ໂສ ອາປຕ຺ຕິໂຍ ຜຸເສຕິ ຕສ຺ສາ ສງ຺ເຂປໂຕ ວິສ຺ສຊ຺ຊນໍ.

໕. ເອວໍ ຄຓນາວເສນ ທສ຺ສິຕານໍ ‘‘ຠເວ’’ຕິອາທິ ສຣູປໂຕ ທສ຺ສນໍ. ເຂຕ຺ເຕຕິ ຕິຓ຺ຓໍ ມຄ຺ຄານໍ ອຎ຺ຎຕຣສ຺ມິໍ ອລ຺ໂລກາເສ ຕິລພີຊມຕ຺ເຕປິ ປເທເສ. ເມຖຸນໍ ປຏິເສວນ຺ຕສ຺ສ ປາຣາຊິກໍ ຠເວຕິ ສມ຺ພນ຺ໂຘ. ‘‘ຖຸລ຺ລຈ຺ຈຍ’’ນ຺ຕິ ວຸຕ຺ຕນ຺ຕິ ໂຍຊນາ. ‘‘ເຍຠຸຍ຺ຍກ຺ຂາຍິເຕ’’ຕິ ອິທໍ ນິທສ຺ສນມຕ຺ຕໍ, ອຸປຑ຺ຒກ຺ຂາຍິເຕປິ ຖຸລ຺ລຈ຺ຈຍສ຺ສ ເຫຏ຺ຐາ ວຸຕ຺ຕຕ຺ຕາ. ວຏ຺ຏກເຕ ມຸເຂ ອຜຸສນ຺ຕໍ ອງ຺ຄຊາຕໍ ປເວເສນ຺ຕສ຺ສ ທຸກ຺ກຏໍ ວຸຕ຺ຕນ຺ຕິ ໂຍຊນາ.

໖. ‘‘ອທິນ຺ນໍ ອາທິຍນ຺ໂຕ’’ຕິອາທໂຍປິ ວຸຕ຺ຕນຍາເຍວ.

໗. ປຎ຺ຈມາສຄ຺ຆເນ ວາປີຕິ ໂປຣາຓກສ຺ສ ນີລກຫາປຓສ຺ສ ຈຕຸຕ຺ຖຠາຄສງ຺ຂາເຕ ປຎ຺ຈມາເສ, ຕທຄ຺ຆນເກ ວາ. ອຘິເກ ວາຕິ ອຕິເຣກປຎ຺ຈມາສເກ ວາ ຕທຄ຺ຆນເກ ວາ. ອທິນ຺ເນ ປຎ຺ຈວີສຕິຍາ ອວຫາຣານໍ ອຎ຺ຎຕເຣນ ອວຫເຏ ປຣາຊໂຍ ໂຫຕີຕິ ອຕ຺ໂຖ. ມາເສ ວາ ອູນມາເສ ວາ ຕທຄ຺ຆນເກ ວາ ທຸກ຺ກຏໍ. ຕໂຕ ມຊ຺ເຌຕິ ປຎ຺ຈມາສກໂຕ ມຊ຺ເຌ. ປຎ຺ຈ ມາສາ ສມາຫຏາ, ປຎ຺ຈນ຺ນໍ ມາສານໍ ສມາຫາໂຣຕິ ວາ ປຎ຺ຈມາສໍ, ປຎ຺ຈມາສໍ ອຄ຺ຆຕີຕິ ປຎ຺ຈມາສຄ຺ຆນໍ, ປຎ຺ຈມາສຎ຺ຈ ປຎ຺ຈມາສຄ຺ຆນຎ຺ຈ ປຎ຺ຈມາສຄ຺ຆນໍ, ເອກເທສສຣູເປກເສໂສຍໍ, ຕສ຺ມິໍ. ມາເສ ວາຕິ ເອຕ຺ຖາປິ ມາໂສ ຈ ມາສຄ຺ຆນກຎ຺ຈ ມາສມາສຄ຺ຆນໂກຕິ ວຕ຺ຕພ຺ເພ ‘‘ມາເສ’’ຕິ ເອກເທສສຣູເປກເສໂສ, ອຸຕ຺ຕຣປທໂລໂປ ຈ ທຏ຺ຐພ຺ໂພ.

‘‘ປຎ຺ຈມາສຄ຺ຆເນ’’ຕິ ສາມຎ຺ເຎນ ວຸຕ຺ເຕປິ ໂປຣາຓກສ຺ສ ນີລກຫາປຓສ຺ເສວ ຈຕຸຕ຺ຖຠາຄວເສນ ປຎ຺ຈມາສນິຍໂມ ກາຕພ຺ໂພ. ຕຖາ ຫິ ຠຄວຕາ ທຸຕິຍປາຣາຊິກໍ ປຎ຺ຎາເປນ຺ເຕນ ຠິກ຺ຂູສຸ ປພ຺ພຊິຕໍ ປຸຣາຓໂວຫາຣິກມຫາມຕ຺ຕໍ ຠິກ຺ຂຸໍ ‘‘ກິຕ຺ຕເກນ ວຕ຺ຖຸນາ ຣາຊາ ມາຄໂຘ ເສນິໂຍ ພິມ຺ພິສາໂຣ ໂຈຣໍ ຄເຫຕ຺ວາ ຫນຕິ ວາ ພນ຺ຘຕິ ວາ ປພ຺ພາເຊຕິ ວາ’’ຕິ ປຸຈ຺ຉິຕ຺ວາ ເຕນ ‘‘ປາເທນ ວາ ປາທາຣເຫນ ວາ’’ຕິ ວຸຕ຺ເຕ ເຕເນວ ປມາເຓນ ອທິນ຺ນໍ ອາທິຍນ຺ຕສ຺ສ ປຎ຺ຎຕ຺ຕໍ. ອຏ຺ຐກຖາຍຎ຺ຈ –

‘‘ປຎ຺ຈມາສໂກ ປາໂທຕິ ປາຬິໍ ອຸລ຺ລິງ຺ຄິຕ຺ວາ ‘ຕທາ ຣາຊຄເຫ ວີສຕິມາສໂກ ກຫາປໂຓ ໂຫຕິ, ຕສ຺ມາ ປຎ຺ຈມາສໂກ ປາໂທ’. ເອເຕນ ລກ຺ຂເຓນ ສພ຺ພຊນປເທສຸ ກຫາປຓສ຺ສ ຈຕຸຕ຺ໂຖ ຠາໂຄ ‘ປາໂທ’ຕິ ເວທິຕພ຺ໂພ. ໂສ ຈ ໂຂ ໂປຣາຓກສ຺ສ ນີລກຫາປຓສ຺ສ ວເສນ, ນ ອິຕເຣສໍ ທຸທ຺ຣທາມກາທີນໍ. ເຕນ ຫິ ປາເທນ ອຕີຕາ ພຸທ຺ຘາປິ ປາຣາຊິກໍ ປຎ຺ຎເປສຸໍ, ອນາຄຕາປິ ປຎ຺ຎເປສ຺ສນ຺ຕິ. ສພ຺ພພຸທ຺ຘານຎ຺ຫິ ປາຣາຊິກວຕ຺ຖຸມ຺ຫິ ວາ ປາຣາຊິເກ ວາ ນານຕ຺ຕໍ ນຕ຺ຖິ, ອິມາເນວ ຈຕ຺ຕາຣິ ປາຣາຊິກວຕ຺ຖູນິ, ອິມາເນວ ຈຕ຺ຕາຣິ ປາຣາຊິການິ, ອິໂຕ ອູນໍ ວາ ອຕິເຣກໍ ວາ ນຕ຺ຖິ. ຕສ຺ມາ ຠຄວາປິ ຘນິຍໍ ວິຄຣຫິຕ຺ວາ ປາເທເນວ ທຸຕິຍປາຣາຊິກໍ ປຎ຺ຎເປນ຺ໂຕ ‘ໂຍ ປນ ຠິກ຺ຂຸ ອທິນ຺ນໍ ເຖຍ຺ຍສງ຺ຂາຕ’ນ຺ຕິອາທິມາຫາ’’ຕິ (ປາຣາ. ອຏ຺ຐ. ໑.໘໘) ວຸຕ຺ຕໍ.

ສາຣຕ຺ຖທີປນິຍຎ຺ຈ –

‘‘ຈຕຸຕ຺ໂຖ ຠາໂຄ ປາໂທຕິ ເວທິຕພ຺ໂພຕິ ອິມິນາວ ສພ຺ພຊນປເທສຸ ກຫາປຓສ຺ເສວ ວີສຕິໂມ ຠາໂຄມາສໂກຕິ ອິທຎ຺ຈ ວຸຕ຺ຕເມວ ໂຫຕີຕິ ທຏ຺ຐພ຺ພໍ. ໂປຣາຓສຕ຺ຖານຸຣູປໍ ລກ຺ຂຓສມ຺ປນ຺ນາ ອຸປ຺ປາທິຕາ ນີລກຫາປຓາຕິ ເວທິຕພ຺ພາ. ທຸທ຺ຣທາເມນ ອຸປ຺ປາທິໂຕ ທຸທ຺ຣທາມໂກ. ໂສ ກິຣ ນີລກຫາປຓສ຺ສ ຕິຠາຄໍ ອຄ຺ຆຕີ’ຕິ ວຕ຺ວາ ‘ຍສ຺ມິໍ ປເທເສ ນີລກຫາປຓາ ນ ສນ຺ຕິ, ຕຕ຺ຖາປິ ນີລກຫາປຓວເສເນວ ປຣິຈ຺ເຉໂທ ກາຕພ຺ໂພ. ກຖໍ? ນີລກຫາປຓານໍ ວຬຎ຺ຊນຏ຺ຐາເນ ຈ ອວຬຎ຺ຊນຏ຺ຐາເນ ຈ ສມານອຄ຺ຆວເສນ ປວຕ຺ຕມານໍ ຠຓ຺ຑໍ ນີລກຫາປເຓນ ສມານຄ຺ຆໍ ຄເຫຕ຺ວາ ຕສ຺ສ ຈຕຸຕ຺ຖຠາຄຄ຺ຆນກໍ ນີລກຫາປຓສ຺ສ ປາທຄ຺ຆນກນ຺ຕິ ປຣິຈ຺ຉິນ຺ທິຕ຺ວາ ວິນິຈ຺ຉໂຍ ກາຕພ຺ໂພ’’ຕິ (ສາຣຕ຺ຖ. ຏີ. ໒.໘໘) ອຍມຕ຺ໂຖວ ວຸຕ຺ໂຕ.

ເອຕ຺ຖ ກຫາປຓໍ ນາມ ກໂຣນ຺ຕາ ສຸວຓ຺ເຓນປິ ກໂຣນ຺ຕິ ຣຊເຕນປິ ຕມ຺ເພນປິ ສຸວຓ຺ຓຣຊຕຕມ຺ພມິສ຺ສເກນປິ. ເຕສຸ ກຕຣໍ ກຫາປຓໍ ນີລກຫາປຓນ຺ຕິ? ເກຈິ ຕາວ ‘‘ສຸວຓ຺ຓກຫາປຓ’’ນ຺ຕິ. ເກຈິ ‘‘ມິສ຺ສກກຫາປຓ’’ນ຺ຕິ. ຕຕ຺ຖ ‘‘ສຸວຓ຺ຓກຫາປຓ’’ນ຺ຕິ ວທນ຺ຕານໍ ອຍມຘິປ຺ປາໂຍ – ປາຣາຊິກວຕ຺ຖຸນາ ປາເທນ ສພ຺ພຕ຺ຖ ເອກລກ຺ຂເຓນ ຠວິຕພ຺ພໍ, ກາລເທສປຣິໂຠຄາທິວເສນ ອຄ຺ຆນານຕ຺ຕໍ ປາທສ຺ເສວ ຠວິຕພ຺ພໍ. ຠຄວຕາ ຫິ ຘມ຺ມິກຣາຊູຫິ ຫນນພນ຺ຘນປພ຺ພາຊນານຸຣູເປເນວ ອທິນ຺ນາທາເນ ປາຣາຊິກໍ ປຎ຺ຎຕ຺ຕໍ, ນ ອິຕຣຖາ. ຕສ຺ມາ ເອສາ ສພ຺ພທາ ສພ຺ພຕ຺ຖ ອພ຺ຍຠິຈາຣີຕິ ສຸວຓ຺ຓມຍສ຺ສ ກຫາປຓສ຺ສ ຈຕຸຕ຺ເຖນ ປາເທນ ຠວິຕພ຺ພນ຺ຕິ.

‘‘ມິສ຺ສກກຫາປຓ’’ນ຺ຕິ ວທນ຺ຕານໍ ປນ ອຍມຘິປ຺ປາໂຍ –

ອຏ຺ຐກຖາຍໍ –

‘‘ຕທາ ຣາຊຄເຫ ວີສຕິມາສໂກ ກຫາປໂຓ ໂຫຕິ, ຕສ຺ມາ ປຎ຺ຈມາສໂກ ປາໂທ. ເອເຕນ ລກ຺ຂເຓນ ສພ຺ພຊນປເທສຸ ກຫາປຓສ຺ສ ຈຕຸຕ຺ໂຖ ຠາໂຄ ‘ປາໂທ’ຕິ ເວທິຕພ຺ໂພ. ໂສ ຈ ໂຂ ໂປຣາຓກສ຺ສ ນີລກຫາປຓສ຺ສ ວເສນ, ນ ອິຕເຣສໍ ທຸທ຺ຣທາມກາທີນ’’ນ຺ຕິ (ປາຣາ. ອຏ຺ຐ. ໑.໘໘) –

ວຸຕ຺ຕຕ຺ຕາ, ສາຣຕ຺ຖທີປນິຍຎ຺ຈ –

‘‘ໂປຣາຓສຕ຺ຖານຸຣູປໍ ລກ຺ຂຓສມ຺ປນ຺ນາ ອຸປ຺ປາທິຕາ ນີລກຫາປຓາຕິ ເວທິຕພ຺ພາ’’ຕິ (ສາຣຕ຺ຖ. ຏີ. ໒.໘໘) –

ວຸຕ຺ຕຕ຺ຕາ ຈ ‘‘ວິນຍວິນິຈ຺ຉຍໍ ປຕ຺ວາ ຄຣຸເກ ຐາຕພ຺ພ’’ນ຺ຕິ ວຈນໂຕ ຈ ມິສ຺ສກກຫາປໂຓເຍວ ນີລກຫາປໂຓ. ຕຕ຺ເຖວ ຫິ ໂປຣາຓສຕ຺ຖວິຫິຕໍ ລກ຺ຂຓໍ ທິສ຺ສຕິ. ກຖໍ? ປຎ຺ຈ ມາສາ ສຸວຓ຺ຓສ຺ສ, ຕຖາ ຣຊຕສ຺ສ, ທສ ມາສາ ຕມ຺ພສ຺ສາຕິ ເອເຕ ວີສຕິ ມາເສ ມິສ຺ເສຕ຺ວາ ພນ຺ຘນຕ຺ຖາຍ ວີຫິມຕ຺ຕໍ ໂລຫໍ ປກ຺ຂິປິຕ຺ວາ ອກ຺ຂຣານິ ຈ ຫຕ຺ຖິອາທີນມຎ຺ຎຕຣຎ຺ຈ ຣູປໍ ທສ຺ເສຕ຺ວາ ກໂຕ ນິທ຺ໂທສຕ຺ຕາ ນີລກຫາປໂຓ ນາມ ໂຫຕີຕິ.

ສິກ຺ຂາຠາຊນວິນິຈ຺ຉເຍ ຈ ເກສຸຈິ ໂປຕ຺ຖເກສຸ ‘‘ປາໂທ ນາມ ປຎ຺ຈ ມາສາ ສຸວຓ຺ຓສ຺ສາ’’ຕິ ປຸຣິມປກ຺ຂວາທີນໍ ມເຕນ ປາໂຐ ລິຂິໂຕ. ເກສຸຈິ ໂປຕ຺ຖເກສຸ ທຸຕິຍປກ຺ຂວາທີນໍ ມເຕນ ‘‘ປຎ຺ຈ ມາສາ ຫິຣຎ຺ຎສ຺ສາ’’ຕິ ປາໂຐ ລິຂິໂຕ. ສີຫຬຠາສາຍ ໂປຣາຓເກຫິ ລິຂິຕາຍ ສາມເຓຣສິກ຺ຂາຍ ປນ –

‘‘ໂປຣາຓກສ຺ສ ນີລກຫາປຓສ຺ສາຕິ ວຸຕ຺ຕອຏ຺ຐກຖາວຈນສ຺ສ, ໂປຣາຓເກ ຣຕນສຸຕ຺ຕາຠິຘານກສຸຕ຺ເຕ ວຸຕ຺ຕກຫາປຓລກ຺ຂຓສ຺ສ ຈ ອນຸຣູປໂຕ ‘ສຸວຓ຺ຓຣຊຕຕມ຺ພານິ ມິສ຺ເສຕ຺ວາ ອຸຏ຺ຐາເປຕ຺ວາ ກຕກຫາປຓໍ ກຫາປຓໍ ນາມາ’ຕິ ຈ ‘ສາມເຓຣານມຸປສມ຺ປນ຺ນານຎ຺ຈ ອທິນ຺ນາທານປາຣາຊິກວຕ຺ຖຸມ຺ຫິ ໂກ ວິເສໂສ’ຕິ ປຸຈ຺ຉໍ ກຕ຺ວາ ‘ສາມເຓຣານໍ ທສິກສຸຕ຺ເຕນາປິ ປາຣາຊິໂກ ໂຫຕິ, ອຸປສມ຺ປນ຺ນານໍ ປນ ສຸວຓ຺ຓສ຺ສ ວີສຕິວີຫິມຕ຺ເຕນາ’’ຕິ –

ຈ ວິເສໂສ ທສ຺ສິໂຕ.

ຕໍ ປນ ສຸວຓ຺ຓມາສກວເສນ ອຑ຺ຒຕິຍມາສກໍ ໂຫຕິ, ປຎ຺ຈມາສເກນ ຈ ຠຄວຕາ ປາຣາຊິກໍ ປຎ຺ຎຕ຺ຕໍ. ຕສ຺ມາ ຕສ຺ສ ຍຖາວຸຕ຺ຕລກ຺ຂຓສ຺ສ ກຫາປຓສ຺ສ ສພ຺ພເທເສສຸ ອລພ຺ຠມານຕ຺ຕາ ສພ຺ພເທສສາຘາຣເຓນ ຕສ຺ສ ມິສ຺ສກກຫາປຓສ຺ສ ປຎ຺ຈມາສປາທຄ຺ຆນເກນ ສຸວຓ຺ເຓເນວ ປາຣາຊິກວຕ຺ຖຸມ຺ຫິ ນິຍມິເຕ ສພ຺ພເທສວາສີນໍ ອຸປກາຣາຍ ໂຫຕີຕິ ເອວໍ ສຸວຓ຺ເຓເນວ ປາຣາຊິກວຕ຺ຖຸປຣິຈ຺ເຉໂທ ກໂຕ. ອຍເມວ ນິຍໂມ ສີຫຬາຈຣິຍວາເທຫິ ສາໂຣຕິ ຄຫິໂຕ. ຕສ຺ມາ ສິກ຺ຂາຄຣຸເກຫິ ສພ຺ພຕ຺ຖ ເປສເລຫິ ວິນຍຘເຣຫິ ອຍເມວ ວິນິຈ຺ຉໂຍ ສາຣໂຕ ປຈ຺ເຈຕພ຺ໂພ. ໂຫນ຺ຕິ ເຈຕ຺ຖ –

‘‘ເຫມຣຊຕຕມ຺ເພຫິ, ສຕ຺ເຖ ນິທ຺ທິຏ຺ຐລກ຺ຂຓໍ;

ອຫາເປຕ຺ວາ ກໂຕ ວີສ-ມາໂສ ນີລກຫາປໂຓ.

ເຫມປາທໍ ສຊ຺ຌຸປາທໍ, ຕມ຺ພປາທທ຺ວຍຎ຺ຫິ ໂສ;

ມິສ຺ເສຕ຺ວາ ຣູປມປ຺ເປຕ຺ວາ, ກາຕຸໍ ສຕ຺ເຖສຸ ທສ຺ສິໂຕ.

‘ເອລາ’ຕິ ວຸຈ຺ຈເຕ ໂທໂສ, ນິທ຺ໂທສຕ຺ຕາ ຕຖີຣິໂຕ;

ຕສ຺ສ ປາໂທ ສຸວຓ຺ຓສ຺ສ, ວີສວີຫຄ຺ຆໂນ ມໂຕ.

ຍສ຺ມິໍ ປນ ປເທເສ ໂສ, ນ ວຕ຺ຕຕິ ກຫາປໂຓ;

ວີສໂສວຓ຺ຓວີຫຄ຺ຆໍ, ຕປ຺ປາທຄ຺ຆນ຺ຕິ ເວທິຍໍ.

ວີສໂສວຓ຺ຓວີຫຄ຺ຆໍ, ເຖເນນ຺ຕາ ຠິກ຺ຂໂວ ຕໂຕ;

ຈວນ຺ຕິ ສາມຎ຺ຎຄຸຓາ, ອິຈ຺ຈາຫຸ ວິນຍຎ຺ຎຸໂນ’’ຕິ.

໙. ໂອປາຕນ຺ຕິ ອາວາຏໍ. ທຸກ຺ເຂ ຊາເຕຕິ ໂຍຊນາ.

໑໐. ອຸຕ຺ຕຣິໍ ຘມ຺ມນ຺ຕິ ເອຕ຺ຖ ‘‘ອຸຕ຺ຕຣິມນຸສ຺ສຘມ຺ມ’’ນ຺ຕິ ວຕ຺ຕພ຺ເພ ນິຣຸຕ຺ຕິນເຍນ ມຊ຺ຌປທໂລປໍ, ນິຄ຺ຄຫີຕາຄມຎ຺ຈ ກຕ຺ວາ ‘‘ອຸຕ຺ຕຣິໍ ຘມ຺ມ’’ນ຺ຕິ ວຸຕ຺ຕໍ. ອຸຕ຺ຕຣິມນຸສ຺ສານໍ ຌາຍີນຎ຺ເຈວ ອຣິຍານຎ຺ຈ ຘມ຺ມໍ ອຸຕ຺ຕຣິມນຸສ຺ສຘມ຺ມໍ. ອຕ຺ຕຸປນາຍິກນ຺ຕິ ອຕ຺ຕນິ ຕໍ ອຸປເນຕິ ‘‘ມຍິ ອຕ຺ຖີ’’ຕິ ສມຸທາຈຣນ຺ໂຕ, ອຕ຺ຕານໍ ວາ ຕຕ຺ຖ ອຸປເນຕິ ‘‘ອຫໍ ເອຕ຺ຖ ສນ຺ທິສ຺ສາມີ’’ຕິ ສມຸທາຈຣນ຺ໂຕຕິ ອຕ຺ຕຸປນາຍິໂກ, ຕໍ ອຕ຺ຕຸປນາຍິກໍ, ເອວໍ ກຕ຺ວາ ວທນ຺ໂຕຕິ ສມ຺ພນ຺ໂຘ.

໑໑. ປຣິຍາເຍຕິ ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິອາທິນາ (ປຣິ. ໒໘໗) ປຣິຍາຍຠຓເນ. ຎາເຕຕິ ຍໍ ອຸທ຺ທິສ຺ສ ຠຓຕິ, ຕສ຺ມິໍ ວິຎ຺ຎຸມ຺ຫິ ມນຸສ຺ສຊາຕິເກ ອຈິເຣນ ຎາເຕ. ໂນ ເຈຕິ ໂນ ເຈ ຊານາຕິ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ປາຣາຊິກກຖາວຓ຺ຓນາ ນິຏ຺ຐິຕາ.

໑໓. ເຈເຕຕິ, ອຸປກ຺ກມຕິ, ມຸຈ຺ຈຕິ, ເອວໍ ອງ຺ຄຕ຺ຕເຍ ປຸຓ຺ເຓ ຄຣຸກໍ ວຸຕ຺ຕໍ. ທ຺ວງ຺ເຄ ເຈເຕຕິ, ອຸປກ຺ກມຕິ ຍທິ ນ ມຸຈ຺ຈຕິ, ເອວໍ ອງ຺ຄທ຺ວເຍ ຖຸລ຺ລຈ຺ຈຍນ຺ຕິ ໂຍຊນາ. ປໂຍເຄຕິ ປໂຍເຊຕ຺ວາ ອຸປກ຺ກມິຕຸໍ ອງ຺ຄຊາຕາມສນໍ, ປຣສ຺ສ ອາຓາປນນ຺ຕິ ເອວຣູເປ ສາຫຕ຺ຖິກາຓຕ຺ຕິກປໂຍເຄ.

໑໔. ວຸຕ຺ຕນເຍເນວ ອຸປຣູປຣິ ປຎ຺ຫາປຸຈ຺ຉນໍ ຎາຕຸໍ ສກ຺ກາຕິ ຕໍ ອວຕ຺ຕຸກາໂມ ອາຫ ‘‘ອິໂຕ ປຏ຺ຐາຍາ’’ຕິອາທິ. ມຍມ຺ປິ ຍເທຕ຺ຖ ປຸພ຺ເພ ອວຸຕ຺ຕມນຸຕ຺ຕານຕ຺ຖຎ຺ຈ, ຕເທວ ວຓ຺ຓຍິສ຺ສາມ.

໑໕. ກາເຍນາຕິ ອຕ຺ຕໂນ ກາເຍນ. ກາຍນ຺ຕິ ອິຕ຺ຖິຍາ ກາຍໍ. ເອສ ນໂຍ ‘‘ກາຍພທ຺ຘ’’ນ຺ຕິ ເອຕ຺ຖາປິ.

໑໖. ອຕ຺ຕໂນ ກາເຍນ ປຏິພທ຺ເຘນ ອິຕ຺ຖິຍາ ກາຍປຏິພທ຺ເຘ ຜຸຏ຺ເຐ ຕຸ ທຸກ຺ກຏນ຺ຕິ ໂຍຊນາ.

໑໗. ຕິສ຺ໂສ ອາປຕ຺ຕິໂຍ ສິຍຸນ຺ຕິ ໂຍຊນາ. ທ຺ວິນ຺ນໍ ມຄ຺ຄານນ຺ຕິ ວຈ຺ຈມຄ຺ຄປສ຺ສາວມຄ຺ຄານໍ.

໑໘. ວຓ຺ຓາທິຠຎ຺ເຎຕິ ວຓ຺ຓາທິນາ ຠຓເນ. ກາຍປຏິພທ຺ເຘ ວຓ຺ຓາທິນາ ຠຎ຺ເຎ ທຸກ຺ກຏນ຺ຕິ ໂຍຊນາ.

໑໙. ອຕ຺ຕກາມຈຣິຍາຍາຕິ ອຕ຺ຕກາມປາຣິຈຣິຍາຍ.

໒໐. ປຓ຺ຑກສ຺ສ ສນ຺ຕິເກປິ ອຕ຺ຕກາມປາຣິຈຣິຍາຍ ວຓ຺ຓໍ ວທໂຕ ຕສ຺ສ ຠິກ຺ຂຸໂນຕິ ໂຍຊນາ. ຕິຣຈ຺ຉານຄຕສ຺ສາປິ ສນ຺ຕິເກຕິ ເອຕ຺ຖາປິ ເອເສວ ນໂຍ.

໒໑. ອິຕ຺ຖິປຸຣິສານມນ຺ຕເຣ ສຎ຺ຈຣິຕ຺ຕໍ ສຎ຺ຈຣຓຠາວໍ ສມາປນ຺ເນ ຠິກ຺ຂຸມ຺ຫິ ປຏິຄ຺ຄຓ຺ຫນວີມໍສາປຈ຺ຈາຫຣຓກຕ຺ຕິເກ ສມ຺ປນ຺ເນ ຕສ຺ສ ພຸໂຘ ຄຣຸກໍ ນິທ຺ທິເສຕິ ໂຍຊນາ.

໒໒. ທ຺ວງ຺ຄສມາໂຍເຄຕິ ຕີສ຺ເວເຕສຸ ທ຺ວິນ຺ນໍ ອງ຺ຄານໍ ຍຖາກຖຎ຺ຈິ ສມາໂຍເຄ. ອງ຺ເຄ ສຕິ ປເນກສ຺ມິນ຺ຕິ ຕິຓ຺ຓເມກສ຺ມິໍ ປນ ອງ຺ເຄ ສຕິ.

໒໔. ປໂຍເຄຕິ ‘‘ອເທສິຕວຕ຺ຖຸກໍ ປມາຓາຕິກ຺ກນ຺ຕໍ ກຸຏິໍ, ອເທສິຕວຕ຺ຖຸກໍ ມຫລ຺ລກວິຫາຣຎ຺ຈ ກາເຣສ຺ສາມີ’’ຕິ ອຸປກຣຓຕ຺ຖໍ ອຣຎ຺ຎຄມນໂຕ ປຏ຺ຐາຍ ສພ຺ພປໂຍເຄ. ເອກປິຓ຺ເຑ ອນາຄເຕຕິ ສພ຺ພປຣິຍນ຺ຕິມໍ ປິຓ຺ຑໍ ສນ຺ຘາຍ ວຸຕ຺ຕໍ.

໒໕. ອິຘ ໂຍ ຠິກ຺ຂຸ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສຕີຕິ ໂຍຊນາ.

໒໖. ໂອກາສໍ ນ ຈ ກາເຣຕ຺ວາຕິ ‘‘ກໂຣຕຸ ເມ, ອາຍສ຺ມາ, ໂອກາສໍ, ອຫໍ ເຕ ວຕ຺ຕຸກາໂມ’’ຕິ ເອວໍ ເຕນ ຠິກ຺ຂຸນາ ໂອກາສໍ ອກາຣາເປຕ຺ວາ.

໒໘. ອຎ຺ຎຠາຄິເຍຕິ ອຎ຺ຎຠາຄິຍປເທນ ອຸປລກ຺ຂິຕສິກ຺ຂາປເທ. ເອວໍ ອຎ຺ຎຕ຺ຣປິ ອີທິເສສຸ ຐາເນສຸ ອຕ຺ໂຖ ເວທິຕພ຺ໂພ.

໒໙. ‘‘ສມນຸຠາສນາຍ ເອວາ’’ຕິ ປທຈ຺ເຉໂທ. ນ ປຏິນິສ຺ສຊນ຺ຕິ ອປ຺ປຏິນິສ຺ສຊນ຺ໂຕ.

໓໐. ຎຕ຺ຕິຍາ ທຸກ຺ກຏໍ ອາປນ຺ໂນ ສິຍາ, ທ຺ວີຫິ ກມ຺ມວາຈາຫິ ຖຸລ຺ລຕໍ ອາປນ຺ໂນ ສິຍາ, ກມ຺ມວາຈາຍ ໂອສາເນ ຄຣຸກໍ ອາປນ຺ໂນ ສິຍາຕິ ໂຍຊນາ. ‘‘ຖຸລ຺ລຕ’’ນ຺ຕິ ອິທໍ ຖຸລ຺ລຈ຺ຈຍາປຕ຺ຕິອຸປລກ຺ຂຓວຈນໍ.

໓໑. ຈຕູສຸ ຍາວຕຕິຍເກສຸ ປຐເມ ອາປຕ຺ຕິປຣິຈ຺ເຉທໍ ທສ຺ເສຕ຺ວາ ອິຕເຣສໍ ຕິຓ຺ຓໍ ເຕນປິ ເອກປຣິຈ຺ເຉທຕ຺ຕາ ຕຕ຺ຖ ວຸຕ຺ຕນຍເມວ ເຕສຸ ອຕິທິສນ຺ໂຕ ອາຫ ‘‘ເຠທານຸວຕ຺ຕເກ’’ຕິອາທິ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ສງ຺ຆາທິເສສກຖາວຓ຺ຓນາ ນິຏ຺ຐິຕາ.

໓໒. ອຕິເຣກຈີວຣນ຺ຕິ ອນຘິຏ຺ຐິຕໍ, ອວິກປ຺ປິຕໍ ວິກປ຺ປນຸປຄປມາຓໍ ຈີວຣໍ ລທ຺ຘາ ທສາຫໍ ອຕິກ຺ກມນ຺ໂຕ ເອກເມວ ນິສ຺ສຄ຺ຄິຍໍ ປາຈິຕ຺ຕິຍໍ ອາປຊ຺ຊຕິ. ຕິຈີວເຣນ ເອກຣຕ຺ຕິມ຺ປິ ວິນາ ວສນ຺ໂຕ ເອກເມວ ນິສ຺ສຄ຺ຄິຍໍ ປາຈິຕ຺ຕິຍໍ ອາປຊ຺ຊຕິ. ອິທຎ຺ຈ ຊາຕິວເສນ ເອກຕ຺ຕໍ ສນ຺ຘາຍ ວຸຕ຺ຕໍ ວຕ຺ຖຸຄຓນາຍ ອາປຕ຺ຕີນໍ ປຣິຈ຺ຉິນ຺ທິຕພ຺ພຕ຺ຕາ.

໓໓. ຄເຫຕ຺ວາກາລຈີວຣນ຺ຕິ ອກາລຈີວຣໍ ປຏິຄ຺ຄເຫຕ຺ວາ. ມາສນ຺ຕິ ສຕິຍາ ປຈ຺ຈາສາຍ ນິກ຺ຂິປິຕຸໍ ອນຸຎ຺ຎາຕໍ ມາສໍ. ອຕິກ຺ກມນ຺ໂຕຕິ ສຕິຍາປິ ປຈ຺ຈາສາຍ ວີຕິກ຺ກມນ຺ໂຕ ອນ຺ໂຕມາເສ ອນຘິຏ຺ຐຫິຕ຺ວາ, ອວິກປ຺ເປຕ຺ວາ ວາ ຕິໍສທິວສານິ ອຕິກ຺ກມນ຺ໂຕ, ຈີວຣຸປ຺ປາທທິວສໍ ອຣຸຓໍ ອາທິໍ ກຕ຺ວາ ເອກຕິໍສມໍ ອຣຸຓໍ ອຸຏ຺ຐາເປນ຺ໂຕຕິ ອຕ຺ໂຖ. ເອກໍ ນິສ຺ສຄ຺ຄິຍໍ ອາປຕ຺ຕິໍ ອາປຊ຺ຊຕີຕິ ອຸທີຣິຕນ຺ຕິ ໂຍຊນາ.

໓໔. ອຎ຺ຎາຕິກາຍ ຠິກ຺ຂຸນິຍາ. ຍໍກິຎ຺ຈິ ປຸຣາຓຈີວຣນ຺ຕິ ເອກວາຣມ຺ປິ ປຣິຠຸຕ຺ຕໍ ສງ຺ຆາຏິອາທີນມຎ຺ຎຕຣໍ ຈີວຣໍ.

໓໕. ປໂຍຄສ຺ມິນ຺ຕິ ‘‘ໂຘວາ’’ຕິອາທິເກ ຠິກ຺ຂຸໂນ ອາຓຕ຺ຕິກປໂຍເຄ, ເອວໍ ອາຓຕ຺ຕາຍ ຈ ຠິກ຺ຂຸນິຍາ ອຸທ຺ຘນາທິເກ ສພ຺ພສ຺ມິໍ ປໂຍເຄ ຈ. ‘‘ນິສ຺ສຄ຺ຄິຍາວ ປາຈິຕ຺ຕິ ໂຫຕີຕິ ນິສ຺ສຄ຺ຄິຍາ ປາຈິຕ຺ຕິ ຈ ໂຫຕີຕິ ໂຍຊນາ.

໓໖. ປຏິຄຓ຺ຫໂຕຕິ ເອຕ຺ຖ ‘‘ອຎ຺ຎຕ຺ຣ ປາຣິວຕ຺ຕກາ’’ຕິ ໂຍຊນາ.

໓໘. ປໂຍຄສ຺ມິນ຺ຕິ ວິຎ຺ຎາປນປໂຍເຄ. ວິຎ຺ຎາປິເຕຕິ ວິຎ຺ຎາປິຕຈີວເຣ ປຏິລທ຺ເຘ.

໓໙. ຠິກ຺ຂູຕິ ອຈ຺ຉິນ຺ນຈີວໂຣ ວາ ນຏ຺ຐຈີວໂຣ ວາ ຠິກ຺ຂຸ. ຕທຸຕ຺ຕຣິນ຺ຕິ ສນ຺ຕຣຸຕ຺ຕຣປຣມໂຕ ອຸຕ຺ຕຣິໍ.

໔໑. ປໂຍເຄຕິ ວິກປ຺ປນາປຊ຺ຊນປໂຍເຄ.

໔໒. ທຸເວຕິ ທຸກ຺ກຏປາຈິຕ຺ຕິຍວເສນ ທຸເວ ອາປຕ຺ຕິໂຍ ຜຸເສຕິ ໂຍເຊຕພ຺ພໍ.

໔໔. ປໂຍເຄຕິ ອນຸຎ຺ຎາຕປໂຍຄໂຕ ອຕິເຣກາຠິນິປ຺ຜາທນປໂຍເຄ. ລາເຠຕິ ຈີວຣສ຺ສ ປຏິລາເຠ.

ກຖິນວຄ຺ຄວຓ຺ຓນາ ປຐມາ.

໔໕. ໂກສິຍວຄ຺ຄສ຺ສ ອາທີສຸ ປຎ຺ຈສຸ ສິກ຺ຂາປເທສຸ ທ຺ເວ ທ຺ເວ ອາປຕ຺ຕິໂຍຕິ ໂຍຊນາ. ປໂຍເຄຕິ ກຣຓກາຣາປນປໂຍເຄ. ລາເຠຕິ ກຕ຺ວາ ວາ ກາເຣຕ຺ວາ ວາ ປຣິນິຏ຺ຐາປເນ.

໔໖. ‘‘ຄເຫຕ຺ວາ ເອຬກໂລມານີ’’ຕິ ປທຈ຺ເຉໂທ. ອຕິກ຺ກມນ຺ຕິ ອຕິກ຺ກມນ຺ໂຕ.

໔໗. ອຎ຺ຎາຍາຕິ ອຎ຺ຎາຕິກາຍ ຠິກ຺ຂຸນິຍາ. ‘‘ໂຘວາເປຕິ ເອຬໂລມກ’’ນ຺ຕິ ປທຈ຺ເຉໂທ. ເອຬໂລມກນ຺ຕິ ເອຬກໂລມານິ. ນິຣຸຕ຺ຕິນເຍນ ກ-ກາຣສ຺ສ ວິປຣິຍາໂຍ. ປໂຍເຄຕິ ໂຘວາປນປໂຍເຄ.

໔໘. ປໂຍເຄຕິ ປຏິຄ຺ຄຓ຺ຫນປໂຍເຄ.

໔໙. ນານາກາຣນ຺ຕິ ນານປ຺ປກາຣໍ. ສມາປຊ຺ຊນ຺ຕິ ສມາປຊ຺ຊນ຺ໂຕ ຠິກ຺ຂຸ. ສມາປນ຺ເນຕິ ສໍໂວຫາເຣ ສມາປນ຺ເນ ສຕິ. ປໂຍເຄຕິ ສມາປຊ຺ຊນປໂຍເຄ.

໕໐. ປໂຍເຄຕິ ກຍວິກ຺ກຍາປຊ຺ຊນປໂຍເຄ. ຕສ຺ມິໍ ກເຕຕິ ຕສ຺ມິໍ ຠຓ຺ເຑ ອຕ຺ຕໂນ ສນ຺ຕກຠາວໍ ນີເຕ.

ໂກສິຍວຄ຺ຄວຓ຺ຓນາ ທຸຕິຍາ.

໕໑. ອຕິເຣກກນ຺ຕິ ອນຘິຏ຺ຐິຕໍ, ອວິກປ຺ປິຕໍ ວາ ປຕ຺ຕໍ. ທສາຫໍ ອຕິກ຺ກເມນ຺ຕສ຺ສ ຕສ຺ສ ຠິກ຺ຂຸໂນ ເອກາວ ນິສ຺ສຄ຺ຄິຍາປຕ຺ຕິ ໂຫຕີຕິ ໂຍຊນາ.

໕໒-໓. ນຕ຺ຖິ ເອຕສ຺ສ ປຎ຺ຈ ພນ຺ຘນານີຕິ ອປຎ຺ຈພນ຺ຘໂນ, ຕສ຺ມິໍ, ອູນປຎ຺ຈພນ຺ຘເນ ປຕ຺ເຕຕິ ອຕ຺ໂຖ. ປໂຍເຄຕິ ວິຎ຺ຎາປນປໂຍເຄ. ຕສ຺ສ ປຕ຺ຕສ຺ສ ລາເຠ ປຏິລາເຠ.

໕໔. ເຠສຊ຺ຊນ຺ຕິ ສປ຺ປິອາທິກໍ.

໕໕. ປໂຍເຄຕິ ປຣິເຍສນປໂຍເຄ.

໕໖. ປໂຍເຄຕິ ອຈ຺ຉິນ຺ທນອຈ຺ຉິນ຺ທາປນປໂຍເຄ. ຫເຏຕິ ອຈ຺ຉິນ຺ທິຕ຺ວາ ຄຫິເຕ.

໕໗. ທ຺ເວ ປນາປຕ຺ຕິໂຍ ຜຸເສຕິ ວາຍາປນປໂຍເຄ ທຸກ຺ກຏໍ, ວິກປ຺ປນຸປຄປຈ຺ຉິມຈີວຣປມາເຓນ ວີເຕ ນິສ຺ສຄ຺ຄິຍນ຺ຕິ ທ຺ເວ ອາປຕ຺ຕິໂຍ ອາປຊ຺ຊຕີຕິ ອຕ຺ໂຖ.

໕໘-໙. ໂຍ ປນ ຠິກ຺ຂຸ ອປ຺ປວາຣິໂຕ ອຎ຺ຎາຕກສ຺ເສວ ຕນ຺ຕວາເຍ ສເມຈ຺ຈ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊນ຺ໂຕ ໂຫຕິ. ໂສຕິ ໂສ ຠິກ຺ຂຸ. ທ຺ເວ ອາປຕ຺ຕິໂຍ ອາປຊ຺ຊຕິ, ນ ສໍສໂຍຕິ ໂຍຊນາ. ປໂຍເຄຕິ ວິກປ຺ປາປຊ຺ຊນປໂຍເຄ.

໖໐. ອຈ຺ເຈກສຎ຺ຎິຕໍ ຈີວຣໍ ປຏິຄ຺ຄເຫຕ຺ວາຕິ ໂຍຊນາ. ກາລນ຺ຕິ ຈີວຣກາລໍ.

໖໑. ຕິຓ຺ຓມຎ຺ຎຕຣໍ ວຕ຺ຖນ຺ຕິ ຕິຓ຺ຓໍ ຈີວຣານໍ ອຎ຺ຎຕຣໍ ຈີວຣໍ. ຆເຣຕິ ອນ຺ຕຣຆເຣ. ນິທຫິຕ຺ວາຕິ ນິກ຺ຂິປິຕ຺ວາ. ເຕນ ຈີວເຣນ ວິນາ ຉາຣຕ຺ຕໂຕ ອຘິກໍ ທິວສໍ ຍສ຺ສ ອາຣຎ຺ຎກສ຺ສ ວິຫາຣສ຺ສ ໂຄຈຣຄາເມ ຕໍ ຈີວຣໍ ນິກ຺ຂິຕ຺ຕໍ, ຕມ຺ຫາ ວິຫາຣາ ອຎ຺ຎຕ຺ຣ ວສນ຺ໂຕ ນິສ຺ສຄ຺ຄິຍໍ ຜຸເສຕິ ໂຍຊນາ.

໖໒. ສງ຺ຆິກໍ ລາຠໍ ປຣິຓຕໍ ຊານໍ ຊານນ຺ໂຕ.

໖໓. ປໂຍເຄຕິ ປຣິຓາມນປໂຍເຄ. ສພ຺ພຕ຺ຖາຕິ ປາຣາຊິກາທີສຸ ສພ຺ພສິກ຺ຂາປເທສຸ. ອປ຺ປນາວາຣປຣິຫານີຕິ ປຣິວາເຣ ປຐມໍ ວຸຕ຺ຕກຕ຺ຖປຎ຺ຎຕ຺ຕິວາຣສ຺ສ ປຣິຫາປນໍ, ອິຘ ອວຈນນ຺ຕິ ອຕ຺ໂຖ, ຕສ຺ສ ວາຣສ຺ສ ປຣິວາເຣ ສພ຺ພປຐມຕ຺ຕາ ປຐມໍ ວຕ຺ຕພ຺ພຠາເວປິ ຕຕ຺ຖ ວຕ຺ຕພ຺ພໍ ປຈ຺ຉາ ຄຓ຺ຫິຕຸກາເມນ ມຍາ ຕໍ ຐເປຕ຺ວາ ປຐມໍ ອາປຕ຺ຕິທສ຺ສນຕ຺ຖໍ ຕທນນ຺ຕໂຣ ກຕາປຕ຺ຕິວາໂຣ ປຐມໍ ວຸຕ຺ໂຕຕິ ອຘິປ຺ປາໂຍ.

ປຕ຺ຕວຄ຺ຄວຓ຺ຓນາ ຕຕິຍາ.

ອິຕິ ອຸຕ຺ຕເຣ ລີນຕ຺ຖປກາສນິຍາ

ຕິໍສນິສ຺ສຄ຺ຄິຍກຖາວຓ຺ຓນາ ນິຏ຺ຐິຕາ.

໖໔. ມນຸສ຺ສຸຕ຺ຕຣິຘມ຺ເມຕິ ອຸຕ຺ຕຣິມນຸສ຺ສຘມ຺ເມ. ອຠູຕສ຺ມິໍ ອຸຕ຺ຕຣິມນຸສ຺ສຘມ຺ເມ ສມຸລ຺ລປິເຕ ປຣາຊໂຍ ປາຣາຊິກາປຕ຺ຕິ.

໖໕. ອມູລນ຺ຕິມວຕ຺ຖຸນາ ອມູລເກນ ປາຣາຊິເກນ ຘມ຺ເມນ ຠິກ຺ຂຸໍ ໂຈທນາຍ ຄຣຸ ສງ຺ຆາທິເສໂສ ໂຫຕີຕິ ໂຍຊນາ. ປຣິຍາຍວຈເນຕິ ‘‘ໂຍ ເຕ ວິຫາເຣ ວສຕີ’’ຕິອາທິນາ (ປຣິ. ໒໘໗) ປຣິຍາເຍນ ກຖເນ. ຎາເຕຕິ ຍສ຺ສ ກເຖຕິ, ຕສ຺ມິໍ ວຈນານນ຺ຕຣເມວ ຎາເຕ.

໖໖. ໂນ ເຈ ປນ ວິຊານາຕີຕິ ອຖ ຕໍ ປຣິຍາເຍນ ວຸຕ຺ຕໍ ວຈນານນ຺ຕຣເມວ ສເຈ ນ ຊານາຕິ. ສມຸທາຫຏນ຺ຕິ ກຖິຕໍ.

໖໗. ໂອມສໂຕ ຠິກ຺ຂຸສ຺ສ ທຸເວ ອາປຕ຺ຕິໂຍ ວຸຕ຺ຕາ. ອຸປສມ຺ປນ຺ນໍ ໂອມສໂຕ ປາຈິຕ຺ຕິ ສິຍາ. ອິຕຣໍ ອນຸປສມ຺ປນ຺ນໍ ໂອມສໂຕ ທຸກ຺ກຏໍ ສິຍາຕິ ໂຍຊນາ.

໖໘. ເປສຸຎ຺ຎຫຣເຓປິ ທ຺ເວ ອາປຕ຺ຕິໂຍ ໂຫນ຺ຕິ.

໖໙. ປໂຍເຄຕິ ປທໂສ ຘມ຺ມໍ ວາເຈນ຺ຕສ຺ສ ວຈນກິຣິຍາຣມ຺ຠໂຕ ປຏ຺ຐາຍ ຍາວ ປທາທີນໍ ປຣິສມາປນໍ, ເອຕ຺ຖນ຺ຕເຣ ອກ຺ຂຣຸຈ຺ຈາຣຓປໂຍເຄ ທຸກ຺ກຏໍ. ປທານໍ ປຣິສມຕ຺ຕິຍໍ ປາຈິຕ຺ຕິຍໍ.

໗໐. ‘‘ຕິຣຕ຺ຕາ ອນຸປສມ຺ປນ຺ນສຫເສຍ຺ຍາຍາ’’ຕິ ປທຈ຺ເຉໂທ. ອນຸປສມ຺ປນ຺ເນນ ສຫເສຍ຺ຍາ ອນຸປສມ຺ປນ຺ນສຫເສຍ຺ຍາ, ຕາຍ. ຕິຣຕ຺ຕາ ອຸຕ຺ຕຣິໍ ອນຸປສມ຺ປນ຺ນສຫເສຍ຺ຍາຍາຕິ ໂຍຊນາ. ປໂຍເຄຕິ ສຍນຕ຺ຖາຍ ເສຍ຺ຍາປຎ຺ຎາປນກາຍາວຊ຺ຊນາທິປຸພ຺ພປໂຍເຄ. ປນ຺ເນຕິ ກາຍປສາຣຓລກ຺ຂເຓນ ສຍເນນ ນິປນ຺ເນ.

໗໑. ໂຍ ປນ ຠິກ຺ຂຸ ເອກຣຕ຺ຕິຍໍ ມາຕຸຄາເມນ ສຫເສຍ຺ຍໍ ກປ຺ເປຕິ. ທຸກ຺ກຏາທໂຍຕິ ‘‘ປໂຍເຄ ທຸກ຺ກຏໍ, ນິປນ຺ເນ ປາຈິຕ຺ຕິຍ’’ນ຺ຕິ ຍຖາວຸຕ຺ຕທ຺ເວອາປຕ຺ຕິໂຍ ອາປຊ຺ຊຕີຕິ ໂຍຊນາ.

໗໒. ປໂຍເຄຕິ ຍຖາວຸຕ຺ຕລກ຺ຂຓປໂຍເຄ.

໗໓. ອນຸປສມ຺ປນ຺ເນຕິ ສມີປຕ຺ເຖ ເຈຕໍ ຠຸມ຺ມໍ. ອນຸປສມ຺ປນ຺ນສ຺ສ ສນ຺ຕິເກ ຠູຕໍ ອຸຕ຺ຕຣິມນຸສ຺ສຘມ຺ມໍ ໂຍ ສເຈ ອາໂຣເຈຕີຕິ ໂຍຊນາ. ທຸກ຺ກຏາທໂຍຕິ ຍສ຺ສ ອາໂຣເຈຕິ, ໂສ ນປ຺ປຏິວິຊານາຕິ, ທຸກ຺ກຏໍ, ປຏິວິຊານາຕິ, ປາຈິຕ຺ຕິຍນ຺ຕິ ເອວໍ ທ຺ເວ ອາປຕ຺ຕິໂຍ ຕສ຺ສ ໂຫນ຺ຕິ.

໗໔. ອຎ຺ຎໂຕ ອຎ຺ຎສ຺ສ ອຸປສມ຺ປນ຺ນສ຺ສ ທຸຏ຺ຐຸລ຺ລສ຺ສ ອາປຕ຺ຕິໍ ອນຸປສມ຺ປນ຺ເນ ອນຸປສມ຺ປນ຺ນສ຺ສ ສນ຺ຕິເກ ວທໍ ວທນ຺ໂຕຕິ ໂຍຊນາ. ປໂຍເຄຕິ ອາຣມ຺ຠໂຕ ປຏ຺ຐາຍ ປຸພ຺ພປໂຍເຄ ທຸກ຺ກຏໍ ອາຄຈ຺ຉຕິ ທຸກ຺ກຏໍ ອາປຊ຺ຊຕິ. ອາໂຣຈິເຕ ປາຈິຕ຺ຕິ ສິຍາຕິ ໂຍຊນາ.

໗໕. ປໂຍເຄຕິ ‘‘ອກປ຺ປິຍປຖວິໍ ຂຓິສ຺ສາມີ’’ຕິ ກຸທາລ ປຣິເຍສນາທິສພ຺ພປໂຍເຄຕິ.

ມຸສາວາທວຄ຺ຄວຓ຺ຓນາ ປຐມາ.

໗໖. ປາເຕນ຺ໂຕຕິ ວິໂກເປນ຺ໂຕ. ຕສ຺ສາຕິ ຠູຕຄາມສ຺ສ. ປາເຕຕິ ວິໂກປເນ.

໗໗. ອຎ຺ຎວາທກວິເຫສການໍ ເອກໂຍຄນິທ຺ທິຏ຺ຐຕ຺ຕາ ຕຕ຺ຖ ວຸຕ຺ຕນເຍເນວ ວິເຫສເກ ຈ ຎາຕຸໍ ສກ຺ກາຕິ ຕຕ຺ຖ ວິສຸໍ ອາປຕ຺ຕິເຠໂທ ນ ວຸຕ຺ໂຕ.

໗໘. ປຣນ຺ຕິ ອຎ຺ຎໍ ສງ຺ເຆນ ສມ຺ມຕເສນາສນປຎ຺ຎາປກາທິກໍ ອຸປສມ຺ປນ຺ນໍ. ອຸຊ຺ຌາເປນ຺ໂຕຕິ ຕສ຺ສ ອຍສໍ ອຸປ຺ປາເທຕຸກາມຕາຍ ຠິກ຺ຂູຫິ ອວຊານາເປຕຸໍ ‘‘ຉນ຺ທາຍ ອິຕ຺ຖນ຺ນາໂມ ອິທໍ ນາມ ກໂຣຕີ’’ຕິອາທີນິ ວຕ຺ວາ ອວຎ຺ຎາຍ ໂອໂລກາເປນ຺ໂຕ, ລາມກໂຕ ວາ ຈິນ຺ຕາເປນ຺ໂຕ. ປໂຍເຄຕິ ອຸຊ຺ຌາປນຕ຺ຖາຍ ຕສ຺ສ ອວຓ຺ຓຠຓນາທິເກ ປຸພ຺ພປໂຍເຄ.

໘໓. ສງ຺ຆິເກ ວິຫາເຣ ປຸພ຺ພູປຄຕໍ ຠິກ຺ຂຸໍ ຊານໍ ຊານນ຺ໂຕ ອນຸປຂຊ຺ຊ ເສຍ຺ຍໍ ກປ຺ເປຕິ, ຕສ຺ເສວໍ ເສຍ຺ຍໍ ກປ຺ປຍໂຕຕິ ໂຍຊນາ. ປໂຍເຄທຸກ຺ກຏາທໂຍຕິ ເອຕ຺ຖ ອລຸຕ຺ຕສມາໂສ. ອາທິ-ສທ຺ເທນ ເສຍ຺ຍາກປ຺ປເນ ປາຈິຕ຺ຕິຍໍ ສງ຺ຄຓ຺ຫາຕິ.

໘໔. ປໂຍເຄຕິ ‘‘ນິກ຺ກຑ຺ຒຖ ອິມ’’ນ຺ຕິອາທິເກ ອາຓຕ຺ຕິເກ ວາ ‘‘ຍາຫິ ຍາຫີ’’ຕິອາທິເກ ວາຈສິເກ ວາ ຫຕ຺ເຖນ ຕສ຺ສ ອງ຺ຄປຣາມສນາທິວເສນ ກເຕ ກາຍິເກ ວາ ນິກ຺ກຑ຺ຒນປໂຍເຄ. ເສສນ຺ຕິ ປາຈິຕ຺ຕິຍໍ.

໘໕. ‘‘ເວຫາສກຸຏິຍາ ອຸປຣີ’’ຕິ ປທຈ຺ເຉໂທ. ອາຫຈ຺ຈປາທເກຕິ ເອຕ຺ຖ ‘‘ມຎ຺ເຈ ວາ ປີເຐ ວາ’’ຕິ ເສໂສ. ສີທນ຺ຕິ ນິສີທນ຺ໂຕ. ທຸກ຺ກຏາທໂຍຕິ ປໂຍເຄ ທຸກ຺ກຏໍ, ນິປຊ຺ຊາຍ ປາຈິຕ຺ຕິຍນ຺ຕິ ອິມາ ອາປຕ຺ຕິໂຍ ຜຸເສຕິ ອຕ຺ໂຖ.

໘໖. ອສ຺ສ ປຊ຺ຊສ຺ສ ປຐມປາທໍ ທສກ຺ຂຣປາທກໍ ຉນ຺ໂທວິຈິຕິຍໍ ວຸຕ຺ຕຄາຖາ, ‘‘ຄາຖາຉນ຺ໂທ ອຕີຕທ຺ວຍ’’ນ຺ຕິ ອິມິນາ ຉນ຺ໂທວິຈິຕິລກ຺ຂເຓນ ຄາຖາຉນ຺ທຕ຺ຕາ ອຘິຏ຺ຐິຕ຺ວາ ທ຺ວຕ຺ຕິປຣິຍາເຍຕິ ເອຕ຺ຖ ອກ຺ຂຣທ຺ວຍໍ ອຘິກໍ ວຸຕ຺ຕນ຺ຕິ ທຏ຺ຐພ຺ພໍ. ປໂຍເຄຕິ ອຘິຏ຺ຐານປໂຍເຄ. ອຘິຏ຺ຐິເຕຕິ ທ຺ວຕ຺ຕິປຣິຍາຍານໍ ອຸປຣິ ອຘິຏ຺ຐາເນ ກເຕ.

໘໗. ປໂຍເຄຕິ ສິຎ຺ຈນສິຎ຺ຈາປນປໂຍເຄ. ສິຕ຺ເຕຕິ ສິຎ຺ຈນກິຣິຍປຣິໂຍສາເນ.

ຠູຕຄາມວຄ຺ຄວຓ຺ຓນາ ທຸຕິຍາ.

໘໘. ທຸກ຺ກຏໍ ຜຸເສຕິ ໂຍຊນາ. ໂອວທິເຕ ປາຈິຕ຺ຕິ ສິຍາຕິ ໂຍຊນາ.

໘໙. ວິຠາໂຄເຍວ ວິຠາຄຕາ.

໙໐. ອຎ຺ຎາຕິກາຍ ຠິກ຺ຂຸນິຍາ ອຎ຺ຎຕ຺ຣ ປາຣິວຕ຺ຕກາ ຈີວຣໍ ເທນ຺ໂຕ ຠິກ຺ຂຸ ທຸເວ ອາປຕ຺ຕິໂຍ ຜຸເສຕິ ໂຍຊນາ. ປໂຍເຄຕິ ທານປໂຍເຄ.

໙໓. ‘‘ນາວໍ ເອກ’’ນ຺ຕິ ປທຈ຺ເຉໂທ. ປໂຍເຄຕິ ອຠິຣຸຫຓປໂຍເຄ. ທຸກ຺ກຏາທໂຍຕິ ອາທິ-ສທ຺ເທນ ອຠິຣຸຬ຺ເຫ ປາຈິຕ຺ຕິຍໍ ສງ຺ຄຓ຺ຫາຕິ.

໙໔. ‘‘ທຸວິຘໍ ອາປຕ຺ຕິ’’ນ຺ຕິ ປທຈ຺ເຉໂທ.

໙໖. ຠິກ຺ຂຸນິຍາ ສທ຺ຘິໍ ຣໂຫ ນິສຊ຺ຊໍ ກປ຺ເປນ຺ໂຕ ຠິກ຺ຂຸ ປໂຍເຄທຸກ຺ກຏາທໂຍ ທ຺ເວປິ ອາປຕ຺ຕິໂຍ ຜຸເສຕິ ໂຍຊນາ.

ໂອວາທວຄ຺ຄວຓ຺ຓນາ ຕຕິຍາ.

໙໗. ຕທຸຕ຺ຕຣິນ຺ຕິ ຕໂຕ ຠຸຎ຺ຊິຕຸໍ ອນຸຎ຺ຎາຕເອກທິວສໂຕ ອຸຕ຺ຕຣິໍ ທຸຕິຍທິວສໂຕ ປຏ຺ຐາຍ. ອນນ຺ຕຣສ຺ສ ວຄ຺ຄສ຺ສາຕິ ໂອວາທວຄ຺ຄສ຺ສ. ນວເມນາຕິ ຠິກ຺ຂຸນິຍາ ປຣິປາຈິຕປິຓ຺ຑປາຕສິກ຺ຂາປເທນ.

໙໙. ທ຺ວຕ຺ຕິປຕ຺ເຕຕິ ທ຺ວຕ຺ຕິປຕ຺ຕປູເຣ. ຕທຸຕ຺ຕຣິນ຺ຕິ ທ຺ວຕ຺ຕິປຕ຺ຕປູຣໂຕ ອຸຕ຺ຕຣິໍ. ປໂຍເຄຕິ ປຏິຄ຺ຄຫຓປໂຍເຄ.

໑໐໑. ອຠິຫຏ຺ຐຸນ຺ຕິ ອຠິຫຣິຕ຺ວາ.

໑໐໒. ຕສ຺ສາຕິ ອຠິຫຣນ຺ຕສ຺ສ. ປິຏເກຕິ ວິນຍປິຏເກ.

໑໐໓. ທສເມປີຕິ ເອຕ຺ຖ ‘‘ທສເມ ອປີ’’ຕິ ປທຈ຺ເຉໂທ.

ໂຠຊນວຄ຺ຄວຓ຺ຓນາ ຈຕຸຕ຺ຖາ.

໑໐໔. ອເຈລກາທິໂນຕິ ອາທິ-ສທ຺ເທນ ‘‘ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ’’ຕິ (ປາຈິ. ໒໗໐) ວຸຕ຺ເຕ ສງ຺ຄຓ຺ຫາຕິ. ໂຠຊນາທິກນ຺ຕິ ອາທິ-ສທ຺ເທນ ຂາທນີຍໍ ສງ຺ຄຓ຺ຫາຕິ. ປໂຍເຄຕິ ສຫຕ຺ຖາ ທານປໂຍເຄ.

໑໐໕. ທາເປຕ຺ວາ ວາ ອທາເປຕ຺ວາ ວາ ກິຎ຺ຈິ ອາມິສໍ. ປໂຍເຄຕິ ອຸຍ຺ໂຍຊນປໂຍເຄ. ຕສ຺ມິນ຺ຕິ ຕສ຺ມິໍ ຠິກ຺ຂຸມ຺ຫິ. ອຸຍ຺ໂຍຊິເຕ ປາຈິຕ຺ຕິ ສິຍາຕິ ໂຍຊນາ.

໑໐໙. ອຸມ຺ມາຣາຕິກ຺ກເມຕິ ອິນ຺ທຂີລາຕິກ຺ກເມ.

໑໑໐. ຕທຸຕ຺ຕຣິນ຺ຕິ ຕໂຕ ປຣິຈ຺ຉິນ຺ນຣຕ຺ຕິປຣິຍນ຺ຕໂຕ ວາ ປຣິຈ຺ຉິນ຺ນເຠສຊ຺ຊປຣິຍນ຺ຕໂຕ ວາ ອຸຕ຺ຕຣິໍ.

໑໑໑. ອຸຍ຺ຍຸຕ຺ຕໍ ທສ຺ສນຕ຺ຖາຍ ຄຈ຺ຉນ຺ໂຕ ທ຺ເວ ອາປຕ຺ຕິໂຍ ຜຸເສຕິ ໂຍຊນາ.

ອເຈລກວຄ຺ຄວຓ຺ຓນາ ປຎ຺ຈມາ.

໑໑໔. ເມເຣຍ຺ຍນ຺ຕິ ເມຣຍໍ. ນິຣຸຕ຺ຕິນເຍນ ອ-ກາຣສ຺ສ ເອ-ກາໂຣ, ຍ-ກາຣສ຺ສ ຈ ທ຺ວິຕ຺ຕໍ. ເມຣຍ-ສທ຺ທປຣິຍາໂຍ ວາ ເມເຣຍ຺ຍ-ສທ຺ໂທ. ມຸນີຕິ ຠິກ຺ຂຸ.

໑໑໕. ‘‘ຠິກ຺ຂຸ ອງ຺ຄຸລິປໂຕເທນາ’’ຕິ ປທຈ຺ເຉໂທ. ປໂຍເຄຕິ ຫາສາປນປໂຍເຄ. ຕສ຺ສາຕິ ຫາສາເປນ຺ຕສ຺ສ.

໑໑໖. ໂຄປ຺ຜກາ ເຫຏ຺ຐາ ອຸທເກ ທຸກ຺ກຏໍ. ໂຄປ຺ຜກໂຕ ອຸປຣິ ອຸປຣິໂຄປ຺ຜກໍ, ອຸທກໍ, ຕສ຺ມິໍ, ໂຄປ຺ຜກໂຕ ອຘິກປ຺ປມາເຓ ອຸທເກຕິ ອຕ຺ໂຖ.

໑໑໗. ອນາທຣິຍນ຺ຕິ ປຸຄ຺ຄລານາທຣິຍໍ, ຘມ຺ມານາທຣິຍໍ ວາ. ປໂຍເຄຕິ ອນາທຣິຍວເສນ ປວຕ຺ເຕ ກາຍປໂຍເຄ ວາ ວຈີປໂຍເຄ ວາ. ກເຕ ອນາທຣິເຍ.

໑໑໘. ປໂຍເຄຕິ ຠິໍສາປນປໂຍເຄ.

໑໑໙. ໂຊຕິນ຺ຕິ ອຄ຺ຄິໍ. ສມາທຫິຕ຺ວານາຕິ ຊາເລຕ຺ວາ. ‘‘ວິສິພ຺ເພນ຺ໂຕ’’ຕິ ອິມິນາ ຜລູປຈາເຣນ ກາຣຓໍ ວຸຕ຺ຕໍ. ວິສິພ຺ພນກິຣິຍາ ຫິ ສມາທຫນກິຣິຍາຍ ຜລນ຺ຕິ ວິສິພ຺ພນກິຣິຍາໂວຫາເຣນ ສມາທຫນກິຣິຍາວ. ຕສ຺ມາ ວິສິພ຺ເພນ຺ໂຕຕິ ເອຕ຺ຖ ສມາທຫນ຺ໂຕຕິ ອຕ຺ໂຖ. ປໂຍເຄຕິ ສມາທຫນສມາທຫາປນປໂຍເຄ. ວິສີວິເຕຕິ ວຸຕ຺ຕນເຍນ ສມາທຫິເຕຕິ ອຕ຺ໂຖ.

໑໒໐. ປໂຍເຄຕິ ຈຸຓ຺ຓມຕ຺ຕິກາຠິສງ຺ຂຣຓາທິສພ຺ພປໂຍເຄ. ອິຕຣນ຺ຕິ ປາຈິຕ຺ຕິຍໍ.

໑໒໑. ຕິຓ຺ຓໍ ທຸພ຺ພຓ຺ຓກຣຓານນ຺ຕິ ກໍສນີລປຕ຺ຕນີລກທ຺ທມສງ຺ຂາຕານໍ ຕິຓ຺ຓໍ ທຸພ຺ພຓ຺ຓກຣຓານໍ. ເອກໍ ອຎ຺ຎຕຣໍ ອນາທິຍ ອທຕ຺ວາ. ຈີວຣນ຺ຕິ ນວຈີວຣໍ.

໑໒໒. ນຕ຺ຖິ ເອຕສ຺ສ ອຸທ຺ຘາຣນ຺ຕິ ອນຸທ຺ຘາໂຣ, ຕໍ ອນຸທ຺ຘາຣນ຺ຕິ ວຕ຺ຕພ຺ເພ ຄາຖາພນ຺ຘວເສນ ຣສ຺ສຕ຺ຕໍ, ອກຕປຈ຺ຈຸທ຺ຘາຣນ຺ຕິ ອຕ຺ໂຖ.

໑໒໓. ອປນິເຘນ຺ໂຕຕິ ອປເນຕ຺ວາ ນິເຘນ຺ໂຕ ນິກ຺ຂິເປນ຺ໂຕ. ປຕ຺ຕາທິກນ຺ຕິ ອາທິ-ສທ຺ເທນ ຈີວຣນິສີທນສູຈິຆຣກາຍພນ຺ຘນານໍ ຄຫຓໍ. ປໂຍເຄຕິ ອປນິຘານປໂຍເຄ. ຕສ຺ມິໍ ປຕ຺ຕາທິເກ ປຎ຺ຈວິເຘ ປຣິກ຺ຂາເຣ. ອປນິຫິເຕ ເສສາ ປາຈິຕ຺ຕິຍາປຕ຺ຕິ ສິຍາຕິ ໂຍຊນາ.

ສຸຣາປານວຄ຺ຄວຓ຺ຓນາ ຉຏ຺ຐາ.

໑໒໔. ຕໂປຘໂນຕິ ປາຕິໂມກ຺ຂສໍວຣສີລສງ຺ຂາຕໍ ຕໂປຘນມສ຺ສາຕິ ຕໂປຘໂນ, ຠິກ຺ຂຸ.

໑໒໕. ຕສ຺ມິໍ ໂອປາເຕ.

໑໒໖. ມນຸສ຺ສວິຄ຺ຄໂຫ ມນຸສ຺ສສຣີໂຣ. ຕິຣຈ຺ຉານຄໂຕ ນາໂຄ ວາ ສຸປຓ຺ໂຓ ວາ. ຕສ຺ສ ໂອປາຕຂຓກສ຺ສ.

໑໒໗. ປຏຸພຸທ຺ຘິນາຕິ ສພ຺ເພສຸ ເຎຍ຺ຍຘມ຺ເມສຸ ນິປຸນຎາເຓນ ຠຄວຕາ.

໑໒໘. ປໂຍເຄຕິ ປຣິໂຠຄຕ຺ຖາຍ ຄຫຓາທິເກ ປໂຍເຄ. ຕສ຺ສາຕິ ຠິກ຺ຂຸສ຺ສ.

໑໒໙. ອຸກ຺ໂກເຏນ຺ໂຕຕິ ອຸຈ຺ຈາເລນ຺ໂຕ ຍຖາຐາເນ ຐາຕຸໍ ອເທນ຺ໂຕ. ປໂຍເຄຕິ ອຸກ຺ໂກຏນປໂຍເຄ. ອຸກ຺ໂກຏິເຕ ປາຈິຕ຺ຕິຍໍ ສິຍາຕິ ໂຍຊນາ.

໑໓໐. ທຸຏ຺ຐຸລ຺ລໍ ວຊ຺ຊກນ຺ຕິ ສງ຺ຆາທິເສສາທິເກ. ເອກໍ ປາຈິຕ຺ຕິຍໍ ອາປຕ຺ຕິໍ ອາປຊ຺ຊຕິ ອິຕິ ທີປິຕນ຺ຕິ ໂຍຊນາ.

໑໓໑. ປໂຍເຄຕິ ຄຓປຣິເຍສນາທິປໂຍເຄ. ທຸກ຺ກຏໍ ປຕ຺ໂຕ ສິຍາ ທຸກ຺ກຏາປຕ຺ຕິໍ ອາປນ຺ໂນ ຠເວຍ຺ຍາຕິ ອຕ຺ໂຖ. ເສສາຕິ ປາຈິຕ຺ຕິຍາປຕ຺ຕິ ອຸປສມ຺ປາທິເຕ ສິຍາ. ຄາຖາພນ຺ຘວເສນ ອຸປສຄ຺ຄໂລໂປ.

໑໓໒-໓. ຊານໍ ເຖຍ຺ຍສຕ຺ເຖນ ສຫ ສໍວິຘາຍ ມຄ຺ຄໍ ປຏິປຊ຺ຊໂຕ ຈ ຕເຖວ ມາຕຸຄາເມນ ສຫ ສໍວິຘາຍ ມຄ຺ຄໍ ປຏິປຊ຺ຊໂຕ ຈາຕິ ໂຍຊນາ. ປໂຍເຄຕິ ສໍວິຘາຍ ຄນ຺ຕຸໍ ປຏິປຸຈ຺ຉາທິກຣຓປໂຍເຄ. ປຏິປນ຺ເນຕິ ມຄ຺ຄປຏິປນ຺ເນ. ອນນ຺ຕຣນ຺ຕິ ອທ຺ຘໂຍຊນຄາມນ຺ຕຣາຕິກ຺ກມນານນ຺ຕຣໍ.

໑໓໔. ຎຕ຺ຕິຍາ ໂອສາເນ ທຸກ຺ກຏໍ ຜຸເສຕິ ໂຍຊນາ.

໑໓໕. ອກຕານຸຘມ຺ເມນາຕິ ອນຸຘມ຺ໂມ ວຸຈ຺ຈຕິ ອາປຕ຺ຕິຍາ ອທສ຺ສເນ ວາ ອປ຺ປຏິກມ຺ເມ ວາ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ວາ ຘມ຺ເມນ ວິນເຍນ ສຕ຺ຖຸສາສເນນ ອຸກ຺ຂິຕ຺ຕກສ຺ສ ອນຸໂລມວຕ຺ຕໍ ທິສ຺ວາ ກຕ຺ວາ ໂອສາຣຓາ, ໂສ ໂອສາຣຓສງ຺ຂາໂຕ ອນຸຘມ຺ໂມ ຍສ຺ສ ນ ກໂຕ, ອຍໍ ອກຕານຸຘມ຺ໂມ ນາມ, ຕາທິເສນ ຠິກ຺ຂຸນາ ສທ຺ຘິນ຺ຕິ ອຕ຺ໂຖ. ສມ຺ຠຸຎ຺ຊນ຺ໂຕຕິ ອາມິສສມ຺ໂຠຄໍ ກໂຣນ຺ໂຕ ຠິກ຺ຂຸ. ປໂຍເຄຕິ ຠຸຎ຺ຊິຕຸໍ ອາມິສປຏິຄ຺ຄຫຓາທິປໂຍເຄ. ຠຸຕ຺ເຕຕິ ສມ຺ຠຸຕ຺ເຕ, ອຸຠຍສມ຺ໂຠເຄ, ຕທຎ຺ຎຕເຣ ວາ ກເຕຕິ ອຕ຺ໂຖ.

໑໓໖. ອຸປລາເປນ຺ໂຕຕິ ປຕ຺ຕຈີວຣອຸທ຺ເທສປຣິປຸຈ຺ຉນາທິວເສນ ສງ຺ຄຓ຺ຫນ຺ໂຕ. ປໂຍເຄຕິ ອຸປລາປນປໂຍເຄ.