ອຸຕ຺ຕຣວິນິຈ຺ຉຍ-ຏີກາ

ຄນ຺ຖາຣມ຺ຠກຖາວຓ຺ຓນາ

(ກ)

ເທວາຕິເທວໍ ສຸຄຕໍ, ເທວພ຺ຣຫ຺ມິນ຺ທວນ຺ທິຕໍ;

ຘມ຺ມຎ຺ຈ ວຏ຺ຏຸປຈ຺ເຉທໍ, ນຕ຺ວາ ວຏ຺ຏາຕິຕໍ ຄຓໍ.

(ຂ)

ວນ຺ທນາມຍປຸຎ຺ເຎນ, ກມ຺ເມນ ຣຕນຕ຺ຕເຍ;

ເຉຕ຺ວາ ອຸປທ຺ທເວ ສພ຺ເພ, ອາຣຠິສ຺ສໍ ສມາຫິໂຕ.

(ຄ)

ເຖເຣນ ພຸທ຺ຘທຕ຺ເຕນ, ຣຈິຕສ຺ສ ສມາສໂຕ;

ສໍວຓ຺ຓນມສໍກິຓ຺ຓໍ, ອຸຕ຺ຕຣສ຺ສ ຍຖາພລໍ.

໑. ອຖາຍມາຈຣິໂຍ ອຕ຺ຕໂນ ວິຣຈິເຕ ວິນເຍ ຕສ຺ສຸປນິສ຺ສເຍ ວິນຍປິຏເກ ຈ ຠິກ຺ຂູນໍ ນານປ຺ປກາຣໂກສລ຺ລຊນນຕ຺ຖໍ ປຣິວາຣຏ຺ຐກຖາຍຎ຺ຈ ອາຄຕວິນິຈ຺ຉຍໍ ສງ຺ຄເຫຕ຺ວາ ອຸຕ຺ຕຣປກຣຓໍ ວຓ຺ຓຍິຕຸກາໂມ ປຐມໍ ຕາວ ອນ຺ຕຣາຍນິວາຣເຓນ ຍຖາຘິປ຺ເປຕສາຘນຕ຺ຖໍ ຣຕນຕ຺ຕຍໍ ວນ຺ທນ຺ໂຕ ອາຫ ‘‘ສພ຺ພສຕ຺ຕຸຕ຺ຕມ’’ນ຺ຕິອາທິ.

ປກຣຓາຣມ຺ເຠ ຣຕນຕ຺ຕຍວນ຺ທນາປໂຍຊນໍ ຕຕ຺ຖ ຕຕ຺ຖາຈຣິເຍຫິ ພຫຸຘາ ປປຎ຺ຈິຕໍ, ອມ຺ເຫຫິ ຈ ວິນຍວິນິຈ຺ຉຍວຓ຺ຓນາຍໍ ສມາສໂຕ ທສ຺ສິຕນ຺ຕິ ນ ຕໍ ອິຘ ວຓ຺ຓຍິສ຺ສາມ. ປກຣຓາຠິເຘຍ຺ຍ ກຣຓປ຺ປກາຣປໂຍຊນານິປິ ຕຕ຺ຖ ທສ຺ສິຕນຍານຸສາເຣນ ອິຘາປິ ເວທິຕພ຺ພານິ. ສມ຺ພນ຺ຘາທິທສ຺ສນມຸເຂນ ອນຸຕ຺ຕານປທວຓ຺ຓນເມເວຕ຺ຖ ກຣິສ຺ສາມິ.

ຊິນໍ, ຘມ຺ມຎ຺ຈ, ຄຓຎ຺ຈ ວນ຺ທິຕ຺ວາ ອຸຕ຺ຕຣໍ ທານິ ກຣິສ຺ສາມີຕິ ສມ຺ພນ຺ໂຘ. ກິໍວິສິຏ຺ຐໍ ຊິນໍ, ຘມ຺ມໍ, ຄຓຎ຺ຈ ວນ຺ທິຕ຺ວາຕິ ອາຫ ‘‘ສພ຺ພສຕ຺ຕຸຕ຺ຕມ’’ນ຺ຕິອາທິ. ຕຕ຺ຖ ສພ຺ພສຕ຺ຕຸຕ຺ຕມນ຺ຕິ ປຎ຺ຈສຸ ກາມຄຸເຓສຸ ສຕ຺ຕາ ອາສຕ຺ຕາ ວິສຕ຺ຕາ ລຄ຺ຄິຕາຕິ ສຕ຺ຕາ, ປຣມຕ຺ຖໂຕ ສຕ຺ຕປຎ຺ຎຕ຺ຕິຍາ ອຸປາທານຠູຕາ ອຸປາທານກ຺ຂນ຺ຘາ ໂວຫາຣໂຕ ຂນ຺ຘສນ຺ຕຕິໍ ອຸປາທາຍ ປຎ຺ຎຕ຺ຕາ ສມ຺ມຸຕິ ‘‘ສຕ຺ຕາ’’ຕິ ວຸຈ຺ຈນ຺ຕິ. ເຕ ປນ ກາມາວຈຣາທິຠູມິວເສນ, ນິຣຍາທິປເທສວເສນ, ອເຫຕຸກາທິປຏິສນ຺ຘິວເສນາຕິ ເອວມາທີຫິ ອນນ຺ຕປເຠທາ. ເຕສຸ ຂີຓາສວານໍ ຍຖາວຸຕ຺ຕນິພ຺ພຈນຕ຺ເຖນ ສຕ຺ຕໂວຫາໂຣ ນ ລພ຺ຠຕິ. ຕຖາປິ ເຕ ຠູຕປຸພ຺ພຄຕິຍາ ວາ ຕໍສທິສຕ຺ຕາ ວາ ‘‘ສຕ຺ຕາ’’ຕິ ວຸຈ຺ຈນ຺ຕິ. ສພ຺ເພ ຈ ເຕ ສຕ຺ຕາ ຈາ ຕິ ສພ຺ພສຕ຺ຕາ. ອຸທ຺ຘຏຕມຕ຺ຕາ, ອຸຄ຺ຄຕຕມຕ຺ຕາ, ເສຏ຺ຐຕ຺ຕາ ຈ ອຸຕ຺ຕໂມ, ສພ຺ພສຕ຺ຕານໍ ໂລກິຍໂລກຸຕ຺ຕເຣຫິ ຣູປາຣູປຄຸເຓຫິ ອຸຕ຺ຕໂມ, ສພ຺ພສຕ຺ເຕສຸ ວາ ອຸຕ຺ຕໂມ ປວໂຣ ເສຏ຺ໂຐຕິ ສພ຺ພສຕ຺ຕຸຕ຺ຕໂມ. ‘‘ຊິນ’’ນ຺ຕິ ເອຕສ຺ສ ວິເສສນໍ.

ປຸນປິ ກິໍວິສິຏ຺ຐນ຺ຕິ ອາຫ ‘‘ຘີຣ’’ນ຺ຕິ. ຘີ ວຸຈ຺ຈຕິ ປຎ຺ຎາ, ຕາຍ ອີຣຕິ ວຕ຺ຕຕີຕິ ຘີໂຣ, ຕໍ. ຕາທິຠາເວນ ອິນ຺ທຂີລສິເນຣຸອາທໂຍ ວິຍ ອຏ຺ຐໂລກຘມ຺ມສງ຺ຂາເຕນ ຠຸສວາເຕນ ອກມ຺ປິຍຏ຺ເຐນ, ຈຕຸເວສາຣຊ຺ຊວເສນ ສເທວເກ ໂລເກ ເກນຈິ ອກມ຺ປນີຍຏ຺ເຐນ ຈ ຘີຣໍ, ຘິຕິສມ຺ປນ຺ນນ຺ຕິ ອຕ຺ໂຖ. ອິທມ຺ປິ ຕສ຺ເສວ ວິເສສນໍ.

ວນ຺ທິຕ຺ວາຕິ ກາຍວຈີມໂນທ຺ວາເຣຫິ ອຠິວາເທຕ຺ວາຕິ ອຕ຺ໂຖ, ຍຖາຠຸຈ຺ຈຄຸຓສໍກິຕ຺ຕເນນ ໂຖເມຕ຺ວາ. ສິຣສາຕິ ຠຕ຺ຕິຠາວນຕຸຕ຺ຕມງ຺ເຄນ ກຣຓຠູເຕນ. ອິມິນາ ວິເສສໂຕ ກາຍປຓາໂມ ທສ຺ສິໂຕ, ຄຸຓສໍກິຕ຺ຕເນນ ວຈີປຓາໂມ, ອຸຠຍປຓາເມຫິ ນານນ຺ຕຣິຍກຕາຍ ມໂນປຓາໂມປິ ທສ຺ສິໂຕ ຈ ໂຫຕິ.

ຊິນນ຺ຕິ ເທວປຸຕ຺ຕກິເລສາຠິສງ຺ຂາຣມຈ຺ຈຸຂນ຺ຘມາຣສງ຺ຂາເຕ ປຎ຺ຈວິເຘ ມາເຣ ພລວິຘມນສມອຸຈ຺ເຉທປຫານສຫາຍເວກລ຺ລນິທາໂນປຈ຺ເຉທວິສຍາຕິກ຺ກມວເສນ ປຎ຺ຈຫິ ອາກາເຣຫິ ຊິຕວາຕິ ຊິໂນ, ຕໍ.

‘‘ຘມ຺ມ’’ນ຺ຕິ ເອຕສ຺ສ ນິພ຺ພຈນາທິວເສນ ອຕ຺ຖວິນິຈ຺ຉໂຍ ເຫຏ຺ຐາ ທສ຺ສິໂຕວ. ອຘມ຺ມວິທ຺ຘໍສນ຺ຕິ ຘມ຺ມສງ຺ຂາຕສ຺ສ ກຸສລສ຺ສ ປຏິປກ຺ຂຕ຺ຕາ ອຘມ຺ໂມ ວຸຈ຺ຈຕິ ອກຸສລຘມ຺ໂມ, ຕໍ ອກຸສລສງ຺ຂາຕໍ ອຘມ຺ມໍ ວິທ຺ຘໍເສຕິ ວິນາເສຕິ ປຊຫຕິ ຕທງ຺ຄວິກ຺ຂມ຺ຠນສມຸຈ຺ເຉທປຏິປ຺ປສ຺ສທ຺ຘິນິສ຺ສຣຓປ຺ປຫາເນນາຕິ ອຘມ຺ມວິທ຺ຘໍໂສ, ສປຣິຍຕ຺ຕິໂກ ນວໂລກຸຕ຺ຕໂຣ ຘມ຺ໂມ. ປຣິຍຕ຺ຕິ ຫິ ປຎ຺ຈນ຺ນໍ ປຫານານໍ ມູລກາຣຓຕ຺ຕາ ຜລູປຈາເຣນ ຕຖາ ວຸຈ຺ຈຕິ, ຕໍ ອຘມ຺ມວິທ຺ຘໍສໍ. ‘‘ຘມ຺ມ’’ນ຺ຕິ ເອຕສ຺ສ ວິເສສນໍ.

ຄຓນ຺ຕິ ອຏ຺ຐນ຺ນໍ ອຣິຍປຸຄ຺ຄລານໍ ສມູຫໍ, ສງ຺ຆນ຺ຕິ ອຕ຺ໂຖ. ອງ຺ຄຓນາສນນ຺ຕິ ອຕ຺ຕໂນ ນິສ຺ສຍໍ ອງ຺ຄນ຺ຕິ ມຕ຺ເຖນ຺ຕີຕິ ອງ຺ຄຓາ, ກິເລສາ ຣາຄໂທສໂມຫາ, ເຕ ອງ຺ຄເຓ ນາເສຕິ ຍຖາໂຍຄໍ ຕທງ຺ຄວິກ຺ຂມ຺ຠນສມຸຈ຺ເຉທປຏິປ຺ປສ຺ສທ຺ຘິນິສ຺ສຣຓປ຺ປຫາເນຫິ ປຊຫຕີຕິ ອງ຺ຄຓນາສໂນ, ຕໍ. ‘‘ຄຓ’’ນ຺ຕິ ເອຕສ຺ສ ວິເສສນໍ.

໒. ມຍາ ວິນຍສ຺ສ ໂຍ ສາໂຣ ວິນິຈ຺ຉໂຍ ຣຈິໂຕ, ຕສ຺ສ ວິນິຈ຺ຉຍສ຺ສາຕິ ໂຍຊນາ. ນຕ຺ຖິ ຕສ຺ສ ອຸຕ຺ຕໂຣຕິ ອນຸຕ຺ຕໂຣ, ສພ຺ເພສຸ ວິນິຈ຺ຉເຍສຸ, ສພ຺ເພສໍ ວາ ວິນິຈ຺ຉຍານໍ ອນຸຕ຺ຕໂຣ ອຸຕ຺ຕໂມ ວິນິຈ຺ຉໂຍຕິ ສພ຺ພານຸຕ຺ຕໂຣ, ຕໍ. ອຸຕ຺ຕຣໍ ປກຣຓໍ ອິທານິ ກຣິສ຺ສາມີຕິ ໂຍຊນາ.

໓. ຠຓໂຕຕິ ຠຓນ຺ຕສ຺ສ ປຄຸຓໍ ວາຈຸຄ຺ຄຕໍ ກໂຣນ຺ຕສ຺ສ. ປຐໂຕຕິ ປຐນ຺ຕສ຺ສ ວາຈຸຄ຺ຄຕໍ ສຊ຺ຌາຍນ຺ຕສ຺ສ. ປຍຸຎ຺ຊໂຕຕິ ຕຕ຺ຖ ປກາເຣນ ຍຸຎ຺ຊນ຺ຕສ຺ສ, ຕໍ ອຎ຺ເຎສໍ ວາເຈນ຺ຕສ຺ສ ວາ. ສຸຓໂຕຕິ ປເຣຫິ ວຸຈ຺ຈມານໍ ສຸຓນ຺ຕສ຺ສ. ຈິນ຺ຕຍໂຕຕິ ຍຖາສຸຕໍ ອຕ຺ຖໂຕ, ສທ຺ທໂຕ ຈ ຈິນ຺ເຕນ຺ຕສ຺ສ. ‘‘ອພຸທ຺ຘສ຺ສ ພຸທ຺ຘິວຑ຺ຒນ’’ນ຺ຕິ ວຕ຺ຕພ຺ເພ ຄາຖາພນ຺ຘວເສນ ວິຠຕ຺ຕິໂລໂປ. ອພຸທ຺ຘສ຺ສ ພາລສ຺ສ ວິນເຍ ອປ຺ປກຕຎ຺ຎຸໂນ ຠິກ຺ຂຸຠິກ຺ຂຸນິຊນສ຺ສ. ພຸທ຺ຘິວຑ຺ຒນໍ ວິນຍວິນິຈ຺ຉເຍ ປຎ຺ຎາວຸທ຺ຘິນິປ຺ຜາທກໍ. ອຖ ວາ ພຸທ຺ຘສ຺ສ ວິນິຈ຺ຉເຍ ກຕປຣິຈຍຕ຺ຕາ ປຎ຺ຎວໂຕ ຊນສ຺ສ ພຸທ຺ຘິວຑ຺ຒນໍ ພຸທ຺ຘິຍາ ປຎ຺ຎາຍ ຕິກ຺ຂວິສທຠາວາປາທເນນ ຠິຍ຺ໂຍຠາວສາຘກໍ. ປຣມໍ ອຸຕ຺ຕມໍ ອຸຕ຺ຕຣໍ ນາມ ປກຣຓໍ ວທໂຕ ກເຖນ຺ຕສ຺ສ ເມ ມມ ສນ຺ຕິກາ ນິຣຕາ ວິນິຈ຺ຉເຍ, ຕີສຸ ສິກ຺ຂາສຸ ວາ ວິເສເສນ ຣຕາ ນິໂພຘຖ ຊານາຖ ສຸຕມຍຎາຓໍ ອຠິນິປ຺ຜາເທຖາຕິ ໂສຕຸຊນໍ ສວເນ ນິໂຍເຊຕິ.