ສມຖກ຺ຂນ຺ຘກກຖາວຓ຺ຓນາ

໒໗໖໐. ອິທານິ ສມຖວິນິຈ຺ຉຍໍ ທສ຺ເສຕຸໍ ເຍສຸ ອຘິກຣເຓສຸ ສນ຺ເຕສຸ ສມເຖຫິ ຠວິຕພ຺ພໍ, ຕານິ ຕາວ ທສ຺ເສນ຺ໂຕ ອາຫ ‘‘ວິວາທາຘາຣຕາ’’ຕິອາທິ. ວິວາທາຘາຣຕາຕິ ວິວາທາຘິກຣຓໍ. ອາປຕ຺ຕາຘາຣຕາຕິ ເອຕ຺ຖາປິ ເອເສວ ນໂຍ. ອາຘາຣຕາຕິ ອຘິກຣຓປຣິຍາໂຍ. ອາຘາຣີຍຕິ ອຠິຠຸຍ຺ຍຕິ ວູປສມ຺ມຕິ ສມເຖຫີຕິ ອາຘາໂຣ, ວິວາໂທ ຈ ໂສ ອາຘາໂຣ ຈາຕິ ວິວາທາຘາໂຣ, ໂສ ເອວ ວິວາທາຘາຣຕາ. ເອວມາຘາຣາຘິກຣຓ-ສທ຺ທານໍ ວິວາທາທິສທ຺ເທຫິ ສຫ ກມ຺ມຘາຣຍສມາໂສ ທຏ຺ຐພ຺ໂພ. ອຘິກຣີຍຕິ ອຠິຠຸຍ຺ຍຕິ ວູປສມ຺ມຕິ ສມເຖຫີຕິ ອຘິກຣຓນ຺ຕິ ວິວາທາທິຈຕຸພ຺ພິຘເມວ ປາຬິຍໍ ທສ຺ສິຕໍ. ອຍມຕ຺ໂຖ ‘‘ເອເຕສໍ ຕຸ ຈຕຸນ຺ນມ຺ປິ, ສມຕ຺ຕາ ສມຖາ ມຕາ’’ຕິ ວກ຺ຂມາເນນ ວິຎ຺ຎາຍຕິ.

໒໗໖໑. ເອຕານິ ຈຕ຺ຕາຣິ ອຘິກຣຓານິ ຈ ‘‘ອິຘ ປນ, ຠິກ຺ຂເວ, ຠິກ຺ຂູ ວິວທນ຺ຕິ ‘ຘມ຺ໂມ’ຕິ ວາ ‘ອຘມ຺ໂມ’ຕິ ວາ’’ຕິ (ຈູຬວ. ໒໑໕) ອຏ຺ຐາຣສ ເຠທກາຣກວຕ຺ຖູນິ ຈ ມເຫສິນາ ວຸຕ຺ຕານິ. ຕຕ຺ຖ ເຕສຸ ຈຕູສຸ ອຘິກຣເຓສຸ ວິວາໂທ ອຘິກຣຓສງ຺ຂາໂຕ ເອຕານິ ອຏ຺ຐາຣສ ເຠທກຣວຕ຺ຖູນິ ນິສ຺ສິໂຕ ນິສ຺ສາຍ ປວຕ຺ໂຕຕິ ໂຍຊນາ.

໒໗໖໒. ວິປຕ຺ຕິໂຍ ຈຕສ຺ໂສວາຕິ ‘‘ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ອນຸວທນ຺ຕິ ສີລວິປຕ຺ຕິຍາ ວາ ອາຈາຣວິປຕ຺ຕິຍາ ວາ ທິຏ຺ຐິວິປຕ຺ຕິຍາ ວາ ອາຊີວວິປຕ຺ຕິຍາ ວາ’’ຕິ (ຈູຬວ. ໒໑໕) ວຸຕ຺ຕາ ຈຕສ຺ໂສ ວິປຕ຺ຕິໂຍ. ທິຏ຺ຐາທີນໍ ອນຸຄນ຺ຕ຺ວາ ສີລວິປຕ຺ຕິອາທີຫິ ວທນໍ ໂຈທນາ ອນຸວາໂທ. ອຸປາຄໂຕຕິ ນິສ຺ສິໂຕ, ອນຸວາໂທ ຈຕສ຺ໂສ ວິປຕ຺ຕິໂຍ ນິສ຺ສາຍ ປວຕ຺ໂຕຕິ ອຕ຺ໂຖ. ‘‘ຕຕ຺ຖາ’’ຕິ ປຐມເມວ ນິທ຺ຘາຣຓສ຺ສ ວຸຕ຺ຕຕ຺ຕາ ອິຘ ປຸນວຈເນ ປໂຍຊນໍ ນ ທິສ຺ສຕິ, ‘‘ສມ຺ຠວາ’’ຕິ ວຈນສ຺ສາປິ ນ ໂກຈິ ອຕ຺ຖວິເສໂສ ທິສ຺ສຕິ. ຕສ຺ມາ ‘‘ອາປຕ຺ຕາຘາຣຕາ ຕຕ຺ຖ, ສຕ຺ຕອາປຕ຺ຕິສມ຺ຠວາ’’ຕິ ປາໂຐ ນ ຍຸຊ຺ຊຕິ, ‘‘ອາປຕ຺ຕາຘາຣຕາ ນາມ, ສຕ຺ຕ ອາປຕ຺ຕິໂຍ ມຕາ’’ຕິ ປາໂຐ ຍຸຕ຺ຕຕໂຣ, ອາປຕ຺ຕາຘາຣຕາ ນາມ ອາປຕ຺ຕາຘິກຣຓໍ ນາມ ສຕ຺ຕ ອາປຕ຺ຕິໂຍ ມຕາ ສຕ຺ຕ ອາປຕ຺ຕິໂຍວ ອຘິປ຺ເປຕາຕິ ອຕ຺ໂຖ.

໒໗໖໓. ສງ຺ຆກິຈ຺ຈານິ ນິສ຺ສາຍາຕິ ອປໂລກນກມ຺ມາທີນິ ຈຕ຺ຕາຣິ ສງ຺ຆກມ຺ມານິ ອຸປາທາຍ ກິຈ຺ຈາຘິກຣຓາຠິຘານໍ ສິຍາ, ກິຈ຺ຈາຘິກຣຓໍ ນາມ ຈຕ຺ຕາຣິ ສງ຺ຆກມ຺ມານີຕິ ອຕ຺ໂຖ. ເອເຕສໍ ຕຸ ຈຕຸນ຺ນມ຺ປີຕິ ເອເຕສໍ ປນ ຈຕຸນ຺ນມ຺ປິ ອຘິກຣຓານໍ. ສມຕ຺ຕາຕິ ວູປສມເຫຕຸຕ຺ຕາ. ສມຖາ ມຕາຕິ ສມ຺ມຸຂາວິນຍາທໂຍ ສຕ຺ຕ ອຘິກຣຓສມຖາຕິ ອຘິປ຺ເປຕາ. ອຘິກຣຓານິ ສເມນ຺ຕິ, ສມ຺ມນ຺ຕິ ວາ ເອເຕຫີຕິ ‘‘ສມຖາ’’ຕິ ວຸຈ຺ຈນ຺ຕີຕິ ‘‘ສມຕ຺ຕາ ສມຖາ ມຕາ’’ຕິ ອິມິນາ ສມຖ-ສທ຺ທສ຺ສ ອນ຺ວຕ຺ຖໍ ທີເປຕິ.

໒໗໖໔-໕. ເຕ ສຣູປໂຕ ທສ຺ເສຕຸມາຫ ‘‘ສມ຺ມຸຂາ’’ຕິອາທິ. ‘‘ວິນໂຍ’’ຕິ ອິທໍ ສມ຺ມຸຂາທິປເທຫິ ປຈ຺ເຈກໍ ໂຍເຊຕພ຺ພໍ ‘‘ສມ຺ມຸຂາວິນໂຍ ສຕິວິນໂຍ ອມູຬ຺ຫວິນໂຍ’’ຕິ. ‘‘ປຏິຎ຺ຎາວິນໂຍ’’ຕິ ຈ ປຏິຎ຺ຎາຕກຣຓໍ ວຸຕ຺ຕໍ. ສຕ຺ຕໂມ ວິນໂຍຕິ ສມໂຖ ອຘິປ຺ເປໂຕ. ຕິຓວຕ຺ຖາຣໂກຕິ ອິເມ ສຕ຺ຕ ສມຖາ ພຸທ຺ເຘນາທິຈ຺ຈພນ຺ຘຸນາ ວຸຕ຺ຕາຕິ ໂຍຊນາ.

໒໗໖໖. ຈຕູສຸ ອຘິກຣເຓສຸ ຍໍ ອຘິກຣຓໍ ຍຕ຺ຕເກຫິ ສມເຖຫິ ສມ຺ມຕິ, ເຕ ສງ຺ຄເຫຕ຺ວາ ທສ຺ເສນ຺ໂຕ ອາຫ ‘‘ວິວາໂທ’’ຕິອາທິ.

໒໗໖໗-໙. ‘‘ວິວາໂທ’’ຕິອາທິນາ ອຸທ຺ທິຏ຺ຐມຕ຺ຖໍ ນິທ຺ທິສນ຺ໂຕ ອາຫ ‘‘ຉຏ຺ເຐນາ’’ຕິອາທິ. ເອຕ຺ຖ ເອເຕສຸ ຈຕູສຸ ອຘິກຣເຓສຸ, ສມເຖສຸ ຈ ກິໍ ເກນ ສມ຺ມຕີຕິ ເຈ? ວິວາໂທ ວິວາທາຘິກຣຓໍ ຉຏ຺ເຐນ ເຍຠຸຍ຺ຍສິກາຍ, ປຐເມນ ສມເຖນ ສມ຺ມຸຂາວິນເຍນ ຈາຕິ ທ຺ວີຫິ ສມເຖຫິ ສມ຺ມຕິ. ຍສ຺ສາ ກິຣິຍາຍ ຘມ຺ມວາທິໂນ ພຫຸຕຣາ, ເອສາ ເຍຠຸຍ຺ຍສິກາ. ‘‘ສງ຺ຆສມ຺ມຸຂຕາ, ຘມ຺ມສມ຺ມຸຂຕາ, ວິນຍສມ຺ມຸຂຕາ, ປຸຄ຺ຄລສມ຺ມຸຂຕາ’’ຕິ (ຈູຬວ. ໒໒໙, ໒໓໔, ໒໓໖, ໒໓໗, ໒໔໒) ວຸຕ຺ຕານໍ ສງ຺ຆາທີນໍ ຈຕຸນ຺ນໍ ສນ຺ນິຘາເນນ ວາ ຄຓປຸຄ຺ຄເລຫິ ສມິຍມານໍ ວິວາທາຘິກຣຓໍ ສງ຺ຆສມ຺ມຸຂຕໍ ວິນາ ອິຕເຣຫິ ຕີຫິ ວາ ສມ຺ມຕີຕິ ວຸຕ຺ຕໍ ໂຫຕິ.

ເອຕ຺ຖ ຈ ກາຣກສງ຺ຆສ຺ສ ສງ຺ຆສາມຄ຺ຄິວເສນ ສມ຺ມຸຂີຠາໂວ ສງ຺ຆສມ຺ມຸຂຕາ, ສເມຕພ຺ພສ຺ສ ວຕ຺ຖຸໂນ ຠູຕຕາ ຘມ຺ມສມ຺ມຸຂຕາ, ຍຖາ ຕໍ ສເມຕພ຺ພໍ, ຕເຖວສ຺ສ ສມນໍ ວິນຍສມ຺ມຸຂຕາ, ໂຍ ຈ ວິວທຕິ, ເຍນ ຈ ວິວທຕິ, ເຕສໍ ອຸຠິນ຺ນໍ ອຕ຺ຖປຈ຺ຈຕ຺ຖິການໍ ສມ຺ມຸຂີຠາໂວ ປຸຄ຺ຄລສມ຺ມຸຂຕາ.

‘‘ອນຸວາໂທ ຈຕູຫິປີ’’ຕິ ອຸທ຺ທິຏ຺ຐໍ ນິທ຺ທິສນ຺ໂຕ ອາຫ ‘‘ສມ຺ມຸຂາ’’ຕິອາທິ. ອນຸປຸພ຺ເພນາຕິ ອນຸປຏິປາຏິຍາ. ສມ຺ມຸຂາວິນຍາທີຫິ ຕີຫິປີຕິ ສມ຺ມຸຂາວິນຍສຕິວິນຍອມູຬ຺ຫວິນເຍຫິ ຕີຫິປິ. ຕເຖວາຕິ ຍຖາ ຕີຫິ, ຕຖາ ປຎ຺ຈເມນ ຕສ຺ສປາປິຍສິກາສມເຖນາປິ ອນຸວາໂທ ສມ຺ມຕິ, ປເຄວ ຈຕູຫີຕິ ອຕ຺ໂຖ.

ໂຍ ປາປຸສ຺ສນ຺ນຕາຍ ປາປິໂຍ ປຸຄ຺ຄໂລ, ຕສ຺ສ ກຕ຺ຕພ຺ພໂຕ ‘‘ຕສ຺ສປາປິຍສິກາ’’ຕິ ກມ຺ມໍ ວຸຈ຺ຈຕິ. ອາຍສ຺ມໂຕ ທພ຺ພສ຺ສ ມລ຺ລປຸຕ຺ຕສ຺ສ ວິຍ ສຕິເວປຸລ຺ລປ຺ປຕ຺ຕສ຺ສ ຂີຓາສວສ຺ສ ກຕາ ອມູລິກາ ສີລວິປຕ຺ຕິໂຈທນາ ສມ຺ມຸຂາວິນເຍນ, ຎຕ຺ຕິຈຕຸຕ຺ຖາຍ ກມ຺ມວາຈາຍ ທິນ຺ເນນ ສຕິວິນເຍນ ຈ ສມ຺ມຕິ. ອຸມ຺ມຕ຺ຕກສ຺ສ ຠິກ຺ຂຸໂນ ກຕາ ອາປຕ຺ຕິໂຈທນາ ສມ຺ມຸຂາວິນເຍນ ຈ ຕເຖວ ທິນ຺ເນນ ອມູຬ຺ຫວິນເຍນ ຈ ສມ຺ມຕິ. ສງ຺ຆມຊ຺ເຌ ອາປຕ຺ຕິຍາ ໂຈທິຍມານສ຺ສ ອວຊານິຕ຺ວາ ປຏິຊານນາທິໍ ກໂຣນ຺ຕສ຺ສ ປາປຠິກ຺ຂຸໂນ ພຫຸລາປຕ຺ຕິໂຈທນາ ສມ຺ມຸຂາວິນເຍນ ເຈວ ຕເຖວ ປກເຕນ ຕສ຺ສປາປິຍສິກາກມ຺ເມນ ຈ ວູປສມ຺ມຕີຕິ ວຸຕ຺ຕໍ ໂຫຕິ.

‘‘ອາປຕ຺ຕິ ປນ ຕີເຫວາ’’ຕິ ອຸທ຺ເທສສ຺ສ ນິທ຺ເທສມາຫ ‘‘ສມ຺ມຸເຂນາ’’ຕິອາທິ. ສມ຺ມຸເຂນ ສມ຺ມຸຂາວິນເຍນ, ປຏິຎ຺ຎາຍ ປຏິຎ຺ຎາຕກຣເຓນ, ຕິຓວຕ຺ຖາຣເກນ ວາ ອິເມຫິ ຕີຫິ ເອວ ສມເຖຫິ ສາ ອາປຕ຺ຕິ ອາປຕ຺ຕາຘິກຣຓໍ ອຸປສມໍ ຍາຕີຕິ ໂຍຊນາ. ເອຕ຺ຖ ປຏິຎ຺ຎາຕກຣຓໍ ນາມ ອາປຕ຺ຕິໍ ປຏິຄ຺ຄຓ຺ຫນ຺ເຕນ ‘‘ປສ຺ສສີ’’ຕິ ວຸຕ຺ເຕ ອາປຕ຺ຕິໍ ເທເສນ຺ເຕນ ‘‘ອາມ ປສ຺ສາມີ’’ຕິ ສມ຺ປຏິຈ຺ຉນໍ. ຕິຓວຕ຺ຖາຣກໍ ປນ ສຍເມວ ວກ຺ຂຕິ.

ຕີເຫວ ສມເຖຫີຕິ ເອຕ຺ຖ ຄຣຸກາປຕ຺ຕິ ສມ຺ມຸຂາວິນເຍນ, ປຏິຎ຺ຎາຕກຣເຓນ ຈາຕິ ທ຺ວີຫິ, ລຫຸກາປຕ຺ຕິໍ ອາປຊ຺ຊິຕ຺ວາ ສງ຺ເຆ ວາ ຄເຓ ວາ ປຸຄ຺ຄເລ ວາ ເທສນາຍ ສມ຺ມຸຂາວິນເຍນ ເຈວ ປຏິຎ຺ຎາຕກຣເຓນ ຈ, ໂກສມ຺ພການໍ ວິຄ຺ຄຫສທິສໍ ມຫາວິຄ຺ຄຫໍ ກໂຣນ຺ເຕຫິ ອາປນ຺ນາ ອເນກວິຘາ ອາປຕ຺ຕິໂຍ ສເຈ ໂຫນ຺ຕິ, ຕາສຸ ວກ຺ຂມານສຣູປໍ ຖຸລ຺ລວຊ຺ຊາທິໍ ຐເປຕ຺ວາ ອວເສສາ ສພ຺ພາ ອາປຕ຺ຕິໂຍ ສມ຺ມຸຂາວິນເຍນ, ຕິຓວຕ຺ຖາຣເກນ ຈ ສມ຺ມນ຺ຕີຕິ ອຕ຺ໂຖ.

ກິຈ຺ຈໍ ກິຈ຺ຈາຘິກຣຓໍ ເອເກນ ສມ຺ມຸຂາວິນເຍເນວ ສມ຺ມຕີຕິ ໂຍຊນາ.

໒໗໗໐. ເຍຠຸຍ຺ຍສິກກມ຺ເມຕິ ເອຕ຺ຖ ນິມິຕ຺ຕຕ຺ເຖ ຠຸມ຺ມໍ. ສລາກໍ ຄາຫເຍຕິ ວິນິຈ຺ຉຍກາຣເກ ສງ຺ເຆ ຘມ຺ມວາທີນໍ ພຫຸຕ຺ຕໍ ວາ ອປ຺ປຕຣຕ຺ຕໍ ວາ ຊານິຕຸໍ ວກ຺ຂມາເນນ ນເຍນ ສລາກໍ ຄາຫາເປຍ຺ຍ. ພຸໂຘຕິ ‘‘ນ ຉນ຺ທາຄຕິໍ ຄຈ຺ຉຕິ…ເປ… ຄຫິຕາຄຫິຕຎ຺ຈ ຊານາຕີ’’ຕິ ວຸຕ຺ຕໍ ປຎ຺ຈຫິ ອງ຺ເຄຫິ ສມນ຺ນາຄຕໍ ປຸຄ຺ຄລໍ ທສ຺ເສຕິ. ‘‘ຄູຬ຺ເຫນາ’’ຕິອາທິນາ ສລາກຄ຺ຄາຫປ຺ປກາໂຣ ທສ຺ສິໂຕ. ກຓ຺ຓຊປ຺ເປນາຕິ ເອຕ຺ຖ ກຓ຺ເຓ ຊປ຺ໂປ ຍສ຺ມິໍ ສລາກຄ຺ຄາຫປໂຍເຄຕິ ວິຄ຺ຄໂຫ. ເອຕ຺ຖ ຄູຬ຺ຫສລາກຄ຺ຄາໂຫ ນາມ ຘມ຺ມວາທິສລາກາ ຈ ອຘມ຺ມວາທິສລາກາ ຈ ວິສຸໍ ວິສຸໍ ຈີວຣກຓ຺ເຓ ປກ຺ຂິປິຕ຺ວາ ປຸຄ຺ຄລານໍ ສນ຺ຕິກໍ ວິສຸໍ ວິສຸໍ ອຸປສງ຺ກມິຕ຺ວາ ສລາກາ ວິສຸໍ ວິສຸໍ ທສ຺ເສຕ຺ວາ ‘‘ອິໂຕ ຕວ ຣຸຈ຺ຈນກໍ ຄຓ຺ຫາຫີ’’ຕິ ຣໂຫ ຐຕ຺ວາ ຄາຫາປນໍ. ວິວຏກໍ ນາມ ຘມ຺ມວາທີນໍ ພຫຸຠາວໍ ຎຕ຺ວາ ສພ຺ເພສຸ ຊານນ຺ເຕສຸ ປຸຄ຺ຄລານໍ ສນ຺ຕິກໍ ຄາຫາປນໍ. ກຓ຺ຓຊປ຺ປນໍ ນາມ ເອວເມວ ກຓ຺ຓມູເລ ຣໂຫ ຐຕ຺ວາ ຄາຫາປນໍ.

໒໗໗໑. ອລຊ຺ຊຸສ຺ສເທຕິ ເອຕ຺ຖ ‘‘ສງ຺ເຆ’’ຕິ ເສໂສ. ລຊ຺ຊິສຸ ພາເລສູຕິ ເອຕ຺ຖາປິ ‘‘ອຸສ຺ສເທສູ’’ຕິ ວຕ຺ຕພ຺ພໍ.

໒໗໗໒. ສເກນ ກມ຺ມຸນາເຍວາຕິ ອຕ຺ຕໂນ ຍໍ ກິຈ຺ຈໍ, ເຕເນວາຕິ.

໒໗໗໓-໕. ‘‘ອາປຊ຺ຊຕີ’’ຕິອາທິ ‘‘ອລຊ຺ຊີ, ລຊ຺ຊີ, ພາໂລ’’ຕິ ຊານນສ຺ສ ເຫຕຸຠູຕກມ຺ມທສ຺ສນໍ. ທຸຈ຺ຈິນ຺ຕິໂຕຕິ ອຠິຊ຺ຌາທິຕິວິຘມໂນທຸຈ຺ຈຣິຕວເສນ ທຸຏ຺ຐຸ ຈິນ຺ເຕນ຺ໂຕ. ທຸພ຺ຠາສີຕິ ມຸສາວາທາທິຈຕຸພ຺ພິຘວຈີທຸຈ຺ຈຣິຕວເສນ ວຈີທ຺ວາເຣ ປຎ຺ຎຕ຺ຕານໍ ສິກ຺ຂາປທານໍ ວີຕິກ຺ກມວເສນ ທຸຏ຺ຐຸ ຠາສນສີໂລ. ທຸກ຺ກຏກາຣິໂກຕິ ປາຓາຕິປາຕາທິຕິວິຘກາຍທຸຈ຺ຈຣິຕວເສນ ກາຍທ຺ວາເຣ ປຎ຺ຎຕ຺ຕສິກ຺ຂາປທານໍ ວີຕິກ຺ກມວເສນ ກຸຈ຺ຉິຕກມ຺ມສ຺ສ ກຣຓສີໂລ. ອິຕິ ລກ຺ຂເຓເນວາຕິ ຍຖາວຸຕ຺ຕໍ ອລຊ຺ຊີລຊ຺ຊີພາລລກ຺ຂຓໍ ນິຄເມຕິ.

໒໗໗໖. ‘‘ເຍຠຸຍ຺ຍສິກາ’’ຕິອາທິຄາຖາຫິ ນິທ຺ທິຏ຺ຐເມວ ອຕ຺ຖໍ ນິຄເມຕຸມາຫ ‘‘ຕິຘາ’’ຕິອາທິ. ຕິຘາສລາກຄາເຫນາຕິ ຕິວິຘສ຺ສ ສລາກຄາຫສ຺ສ ອຎ຺ຎຕເຣນ. ພຫຸກາ ຘມ຺ມວາທິໂນ ຍທິ ສິຍຸນ຺ຕິ ໂຍຊນາ. ກາຕພ຺ພນ຺ຕິ ເອຕ຺ຖ ‘‘ວິວາທາຘິກຣຓວູປສມນ’’ນ຺ຕິ ເສໂສ.

໒໗໗໗. ໂຍ ປຸຄ຺ຄໂລ ອລຊ຺ຊີ ຈ ໂຫຕິ ສານຸວາໂທ ຈ ກມ຺ມໂຕ ກາຍກມ຺ມໂຕ, ວຈີກມ຺ມໂຕ ຈ ອສຸຈິ ຈ ສມ຺ພຸທ຺ຘຊິຄຸຈ຺ຉນີໂຍຕິ ອຕ຺ໂຖ. ໂສ ເອວໍວິໂຘ ປາປປຸຄ຺ຄໂລ ຕສ຺ສ ປາປິຍສິກກມ຺ມສ຺ສ ໂຍໂຄ ໂຫຕີຕິ ສມ຺ພນ຺ໂຘ. ສານຸວາໂທຕິ ເອຕ຺ຖ ອນຸວາໂທ ນາມ ໂຈທນາ, ສຫ ອນຸວາເທນ ວຕ຺ຕຕີຕິ ສານຸວາໂທ, ປາປຄຣຫິຕປຸຄ຺ຄເລຫິ ກາຕພ຺ພໂຈທນາຍ ອນຸຣູໂປຕິ ອຕ຺ໂຖ.

໒໗໗໘-໙. ຠຓ຺ຑເນຕິ ກລຫສ຺ສ ປຸພ຺ພຠາເຄ. ກລເຫຕິ ກາຍວຈີທ຺ວາຣປ຺ປວຕ຺ເຕ ຫຕ຺ຖປຣາມສາທິເກ ກລເຫ ຈ. ວິວາທມ຺ຫິ ອນປ຺ປເກຕິ ພຫຸວິເຘ ວິວາເທ ຊາເຕ. ພຫຸອສ຺ສາມເຓ ຈິຓ຺ເຓຕິ ສມຓານໍ ອນນຸຈ຺ຉວິເກ ນານປ຺ປກາເຣ ກາຍິກວາຈສິກວີຕິກ຺ກເມ ຈ ກເຕ. ອນຄ຺ເຄຕິ ອນນ຺ເຕ. ຠສ຺ສເກຕິ ກຸຈ຺ຉິເຕ ອມນາປວຈເນ ຈິຓ຺ເຓຕິ ໂຍຊນາ, ຠາສິເຕຕິ ອຕ຺ໂຖ. ຄເວສນ຺ຕນ຺ຕິ ຄເວສິຍມານໍ, ອາປຕ຺ຕາຘິກຣຓນ຺ຕິ ເສໂສ. ວາຬນ຺ຕິ ຈຓ຺ຑໍ. ກກ຺ຂຬນ຺ຕິ ອາສຊ຺ຊໍ. ກາຕພ຺ພນ຺ຕິ ວູປສເມຕພ຺ພໍ.

໒໗໘໐-໒. ຍຖາ ຈ ວູປສມ຺ມຕິ, ຕຖາ ຕິຓວຕ຺ຖາຣເກ ສຸທ຺ໂຘ ໂຫຕີຕິ ສມ຺ພນ຺ໂຘ.

ຖຸລ຺ລວຊ຺ຊນ຺ຕິ ປາຣາຊິກຎ຺ເຈວ ສງ຺ຆາທິເສສຎ຺ຈ. ຄິຫີຫິ ປຏິສໍຍຸຕນ຺ຕິ ຄິຫີນໍ ຊາຕິອາທີຫິ ປາຬິຍາ ອາຄເຕຫິ ທສຫິ ອກ຺ໂກສວຕ຺ຖູຫິ, ອຏ຺ຐກຖາຄເຕຫິ ຈ ຕທຎ຺ເຎຫິ ອກ຺ໂກສວຕ຺ຖູຫິ ຂຸໍສນວມ຺ຠນປຈ຺ຈຍາ ຈ ຘມ຺ມິກປຏິສ຺ສວສ຺ສ ອສຈ຺ຈາປນປຈ຺ຈຍາ ຈ ອາປນ຺ນາປຕ຺ຕິໍ. ເອສາ ເອວ ຫິ ອາປຕ຺ຕິ ຄິຫິປຏິສໍຍຸຕ຺ຕາ ນາມ ປຣິວາເຣ ‘‘ອຕ຺ຖິ ຄິຫິປຏິສໍຍຸຕ຺ຕາ, ອຕ຺ຖິ ນຄິຫິປຏິສໍຍຸຕ຺ຕາ’’ຕິ ທຸກໍ ນິກ຺ຂິປິຕ຺ວາ ‘‘ຄິຫິປຏິສໍຍຸຕ຺ຕາຕິ ສຸຘມ຺ມຕ຺ເຖຣສ຺ສ ອາປຕ຺ຕິ, ຍາ ຈ ຘມ຺ມິກສ຺ສ ປຏິສ຺ສວສ຺ສ ອສຈ຺ຈາປເນ ອາປຕ຺ຕິ. ອວເສສາ ນຄິຫິປຏິສໍຍຸຕ຺ຕາ’’ຕິ (ປຣິ. ອຏ຺ຐ. ໓໒໑) ວຈນໂຕ.

ສຸຘມ຺ມຕ຺ເຖຣສ຺ສ ອາປຕ຺ຕີຕິ ຈ ເຕນ ຈິຕ຺ຕສ຺ສ ຄຫປຕິໂນ ຊາຕິໍ ປຏິຈ຺ຈ ຂຸໍສນວມ຺ຠນປຈ຺ຈຍາ ອາປນ຺ນາ ໂອມສວາທສິກ຺ຂາປທວິຠາຄຄຕາ ທຸກ຺ກຏາປຕ຺ຕິ ຄເຫຕພ຺ພາ. ອິທຎ຺ຈ ອຸປລກ຺ຂຓມຕ຺ຕໍ, ຕສ຺ມາ ອິຕເຣຫິປິ ອກ຺ໂກສວຕ຺ຖູຫິ ຄິຫິໍ ຂຸໍເສນ຺ຕານໍ ວມ຺ເຠນ຺ຕານໍ ອິຕເຣສໍ ຠິກ຺ຂູນໍ ສາ ອາປຕ຺ຕິ ຄິຫິປຏິສໍຍຸຕ຺ຕາວາຕິ ເວທິຕພ຺ພໍ. ຕຖາ ອາປນ຺ນໍ ອາປຕ຺ຕິໍ ເທສາເປນ຺ເຕນ ທສ຺ສນູປຈາຣໍ ອວິຊຫາເປຕ຺ວາ ສວນູປຈາຣໍ ຊຫາເປຕ຺ວາ ເອກໍເສ ອຸຕ຺ຕຣາສງ຺ຄໍ ກາຣາເປຕ຺ວາ ອຸກ຺ກຸຏິກໍ ນິສີທາເປຕ຺ວາ ອຎ຺ຊລິໍ ປຄ຺ຄຓ຺ຫາເປຕ຺ວາ ສາ ອາປຕ຺ຕິ ເທສາເປຕພ຺ພາ.

ທິຏ຺ຐາວິກມ຺ມິກນ຺ຕິ ທິຏ຺ຐາວິກມ຺ເມ ນິຍຸຕ຺ໂຕ ທິຏ຺ຐາວິກມ຺ມິໂກ, ຕໍ, ອຏ຺ຐກຖາຍໍ ‘‘ເຍ ປນ ‘ນ ເມຕໍ ຂມຕີ’ຕິ ອຎ຺ຎມຎ຺ຎໍ ທິຏ຺ຐາວິກມ຺ມໍ ກໂຣນ຺ຕີ’’ຕິ (ຈູຬວ. ອຏ຺ຐ. ໒໑໔) ເຍ ປຸຄ຺ຄລາ ທສ຺ສິຕາ, ເຕສມຎ຺ຎຕຣສ຺ເສວ ຄຫຓໍ.

ໂຍຕິ ຠຓ຺ຑນກາຣເກຫິ ຠິກ຺ຂູຫິ ສທ຺ຘິໍ ມຫນ຺ຕໍ ວິຄ຺ຄຫໍ ກຕ຺ວາ ສມ຺ພຫຸລາ ອາປຕ຺ຕິໂຍ ອາປນ຺ໂນ ໂຍ ຠິກ຺ຂຸ. ຕຕ຺ຖາຕິ ຕສ຺ມິໍ ຕິຓວຕ຺ຖາຣກສມຖກາຣເກ ຠິກ຺ຂຸສມູເຫ. ນ ໂຫຕີຕິ ຉນ຺ທໍ ທຕ຺ວາ ຕໍ ຠິກ຺ຂຸປຣິສໍ ອນາຄຕຕ຺ຕາ ນ ສໍວິຊ຺ຊຕິ. ຕຎ຺ຈ ຐເປຕ຺ວາຕິ ໂຍຊນາ.

ຕິຓວຕ຺ຖາຣເກ ກເຕ ສຕິ ຍາວ ອຸປສມ຺ປທມາຬໂຕ ປຠຸຕິ ອາປນ຺ນາຍ ເສສາຍ ອາປຕ຺ຕິຍາ ນິຣາປຕ຺ຕິ ຫຸຕ຺ວາ ສຸທ຺ໂຘ ໂຫຕິ ສງ຺ໂຆຕິ ໂຍຊນາ.

ສມຖກ຺ຂນ຺ຘກກຖາວຓ຺ຓນາ.