ເຠສຊ຺ຊກ຺ຂນ຺ຘກກຖາວຓ຺ຓນາ

໒໖໖໕. ຄຫປຕິສ຺ສ ຠູມິ, ສມ຺ມຸຕິຠູມິ, ອຸສ຺ສາວນນ຺ຕິກາຠູມິ, ໂຄນິສາທິຠູມີຕິ ກປ຺ປິຍຠູມິໂຍ ຈຕສ຺ໂສ ໂຫນ຺ຕີຕິ ວຸຕ຺ຕາ ຠຄວຕາຕິ ໂຍຊນາ.

໒໖໖໖. ກຖໍ ກປ຺ປິຍໍ ກຕ຺ຕພ຺ພນ຺ຕິ ‘‘ອນຸຊານາມິ, ຠິກ຺ຂເວ, ຈຕສ຺ໂສ ກປ຺ປິຍຠູມິໂຍ ອຸສ຺ສາວນນ຺ຕິກໍ ໂຄນິສາທິກໍ ຄຫປຕິໍ ສມ຺ມຸຕິ’’ນ຺ຕິ (ມຫາວ. ໒໙໕) ເອວໍ ຈຕສ຺ໂສ ຠູມິໂຍ ອຸທ຺ຘຣິຕ຺ວາ ຕາສໍ ສາມຎ຺ຎລກ຺ຂຓໍ ທສ຺ເສຕຸມາຫ ‘‘ສງ຺ຆສ຺ສາ’’ຕິອາທິ. ສງ຺ຆສ຺ສ ສນ຺ຕກໍ ວາສຕ຺ຖາຍ ກຕໍ ເຄຫໍ ວາ ຠິກ຺ຂຸໂນ ສນ຺ຕກໍ ວາສຕ຺ຖາຍ ກຕໍ ເຄຫໍ ວາຕິ ໂຍຊນາ. ກປ຺ປິຍໍ ກຕ຺ຕພ຺ພນ຺ຕິ ກປ຺ປິຍຏ຺ຐານໍ ກຕ຺ຕພ຺ພໍ. ສຫເສຍ຺ຍປ຺ປໂຫນກນ຺ຕິ ສພ຺ພຈ຺ຉນ຺ນປຣິຈ຺ຉນ຺ນາທິລກ຺ຂເຓນ ສຫເສຍ຺ຍາຣຫໍ.

໒໖໖໗. ອິທານິ ຈຕສ຺ໂສປິ ຠູມິໂຍ ສຣູປໂຕ ທສ຺ເສຕຸມາຫ ‘‘ຐເປຕ຺ວາ’’ຕິອາທິ. ຠິກ຺ຂຸໍ ຐເປຕ຺ວາ ອຎ຺ເຎຫິ ກປ຺ປິຍຠູມິຍາ ອຕ຺ຖາຍ ທິນ຺ນໍ ວາ ເຕສໍ ສນ຺ຕກໍ ວາ ຍໍ ເຄຫໍ, ອິທໍ ເອວ ຄຫປຕິຠູມິ ນາມາຕິ ໂຍຊນາ.

໒໖໖໘. ຍາ ປນ ກຸຏິ ສງ຺ເຆນ ສມ຺ມຕາ ຎຕ຺ຕິທຸຕິຍາຍ ກມ຺ມວາຈາຍ, ສາ ສມ຺ມຸຕິກາ ນາມ. ຕສ຺ສາ ສມ຺ມນ຺ນນກາເລ ກມ຺ມວາຈໍ ອວຕ຺ວາ ອປໂລກນໍ ວາ ກາຕຸໍ ວຏ຺ຏເຕວາຕິ ໂຍຊນາ.

໒໖໖໙-໗໐. ປຐມອິຏ຺ຐກາຍ ວາ ປຐມປາສາຓສ຺ສ ວາ ປຐມຕ຺ຖມ຺ຠສ຺ສ ວາ ອາທິ-ຄ຺ຄຫເຓນ ປຐມຠິຕ຺ຕິປາທສ຺ສ ວາ ຐປເນ ປເຣສຸ ມນຸສ຺ເສສຸ ອຸກ຺ຂິປິຕ຺ວາ ຐເປນ຺ເຕສຸ ສມນ຺ຕໂຕ ປຣິວາເຣຕ຺ວາ ‘‘ກປ຺ປິຍກຸຏິໍ ກໂຣມ, ກປ຺ປິຍກຸຏິໍ ກໂຣມາ’’ຕິ ອຠິກ຺ຂຓໍ ວທນ຺ເຕຫິ ອາມສິຕ຺ວາ ວາ ສຍເມວ ອຸກ຺ຂິປິຕ຺ວາ ວາ ອິຏ຺ຐກາ ຐເປຍ຺ຍ ປາສາໂຓ ວາ ຖມ຺ໂຠ ວາ ຠິຕ຺ຕິປາໂທ ວາ ຐເປຍ຺ຍ ຐເປຕພ຺ໂພ, ອຍໍ ອຸສ຺ສາວນນ຺ຕິກາ ກຸຏີຕິ ໂຍຊນາ.

໒໖໗໑. ອິຏ຺ຐກາທິປຕິຏ຺ຐານນ຺ຕິ ປຐມິຏ຺ຐກາທີນໍ ຠູມິຍໍ ປຕິຏ຺ຐານໍ. ວທຕນ຺ຕິ ‘‘ກປ຺ປິຍກຸຏິໍ ກໂຣມ, ກປ຺ປິຍກຸຏິໍ ກໂຣມາ’’ຕິ ວທນ຺ຕານໍ. ສມກາລໍ ຕຸ ວຏ຺ຏຕີຕິ ເອກກາລໍ ວຏ຺ຏຕິ, ອິມິນາ ‘‘ສເຈ ຫິ ອນິຏ຺ຐິເຕ ວຈເນ ຖມ຺ໂຠ ປຕິຏ຺ຐາຕິ, ອປ຺ປຕິຏ຺ຐິເຕ ວາ ຕສ຺ມິໍ ວຈນໍ ນິຏ຺ຐາຕິ, ອກຕາ ໂຫຕິ ກປ຺ປິຍກຸຏີ’’ຕິ (ມຫາວ. ອຏ຺ຐ. ໒໙໕) ອຏ຺ຐກຖາວິນິຈ຺ຉໂຍ ສູຈິໂຕ.

໒໖໗໒. ອາຣາໂມ ສກໂລ ອປຣິກ຺ຂິຕ຺ໂຕ ວາ ເຍຠຸຍ຺ຍໂຕ ອປຣິກ຺ຂິຕ຺ໂຕ ວາຕິ ທຸວິໂຘປິ ວິຎ຺ຎູຫິ ວິນຍຘເຣຫິ ‘‘ໂຄນິສາທີ’’ຕິ ວຸຈ຺ຈຕິ. ປເວສນິວາຣຓາຠາເວນ ປວິຏ຺ຐານໍ ຄຸນ຺ນໍ ນິສຊ຺ຊາໂຍຄໂຕ ຕຖາ ວຸຈ຺ຈຕີຕິ ໂຍຊນາ.

໒໖໗໓. ປໂຍຊນໍ ທສ຺ເສຕຸມາຫ ‘‘ເອຕ຺ຖ ປກ຺ກຎ຺ຈາ’’ຕິອາທິ. ອາມິສນ຺ຕິ ປຸຣິມກາລິກທ຺ວຍໍ. ‘‘ອາມິສ’’ນ຺ຕິ ອິມິນາ ນິຣາມິສໍ ອິຕຣກາລິກທ຺ວຍໍ ອກປ຺ປິຍກຸຏິຍໍ ວຸຕ຺ຖມ຺ປິ ປກ຺ກມ຺ປິ ກປ຺ປຕີຕິ ທີເປຕິ.

໒໖໗໔-໕. ອິມາ ກປ຺ປິຍກຸຏິໂຍ ກທາ ຊຫິຕວຕ຺ຖຸກາ ໂຫນ຺ຕີຕິ ອາຫ ‘‘ອຸສ຺ສາວນນ຺ຕິກາ ຍາ ສາ’’ຕິອາທິ. ຍາ ອຸສ຺ສາວນນ຺ຕິກາ ເຍສຸ ຖມ຺ຠາທີສຸ ອຘິຏ຺ຐິຕາ, ສາ ເຕສຸ ຖມ຺ຠາທີສຸ ອປນີເຕສຸ ຕທຎ຺ເຎສຸປິ ຖມ຺ຠາທີສຸ ຕິຏ຺ຐຕີຕິ ໂຍຊນາ.

ສພ຺ເພສຸ ຖມ຺ຠາທີສຸ ອປນີເຕສຸ ສາ ຊຫິຕວຕ຺ຖຸກາ ສິຍາຕິ ໂຍຊນາ. ໂຄນິສາທິກຸຏິ ປຣິກ຺ຂິຕ຺ຕາ ວຕິອາທີຫິ ຊຫິຕວຕ຺ຖຸກາ ສິຍາ. ປຣິກ຺ຂິຕ຺ຕາຕິ ຈ ‘‘ອາຣາໂມ ປນ ອຸປຑ຺ຒປຣິກ຺ຂິຕ຺ໂຕປິ ພຫຸຕຣໍ ປຣິກ຺ຂິຕ຺ໂຕປິ ປຣິກ຺ຂິຕ຺ໂຕເຍວ ນາມາ’’ຕິ (ມຫາວ. ອຏ຺ຐ. ໒໙໕) ກຸຣຸນ຺ທິມຫາປຈ຺ຈຣິຍາທີສຸ ວຸຕ຺ຕຕ຺ຕາ ນ ເກວລໍ ສພ຺ພປຣິກ຺ຂິຕ຺ຕາວ, ອຸປຑ຺ຒປຣິກ຺ຂິຕ຺ຕາປິ ເຍຠຸຍ຺ຍປຣິກ຺ຂິຕ຺ຕາປິ ຄເຫຕພ຺ພາ.

ເສສາຕິ ຄຫປຕິສມ຺ມຸຕິກຸຏິໂຍ. ຉທນນາສໂຕ ຊຫິຕວຕ຺ຖຸກາ ສິຍຸນ຺ຕິ ໂຍຊນາ. ຉທນນາສໂຕຕິ ເອຕ຺ຖ ‘‘ໂຄປານສິມຕ຺ຕໍ ຐເປຕ຺ວາ’’ຕິ ເສໂສ. ສເຈ ໂຄປານສີນໍ ອຸປຣິ ເອກມ຺ປິ ປກ຺ຂປາສມຓ຺ຑລໍ ອຕ຺ຖິ, ຣກ຺ຂຕິ. ຍຕ຺ຣ ປນິມາ ຈຕສ຺ໂສປິ ກປ຺ປິຍຠູມິໂຍ ນຕ຺ຖິ, ຕຕ຺ຖ ກິໍ ກາຕພ຺ພໍ? ອນຸປສມ຺ປນ຺ນສ຺ສ ທຕ຺ວາ ຕສ຺ສ ສນ຺ຕກໍ ກຕ຺ວາ ປຣິຠຸຎ຺ຊິຕພ຺ພໍ.

໒໖໗໖. ຠິກ຺ຂຸໍ ຐເປຕ຺ວາ ອຎ຺ເຎສໍ ຫຕ຺ຖໂຕ ປຏິຄ຺ຄໂຫ ຈ ເຕສໍ ສນ຺ນິຘິ ຈ ເຕສໍ ອນ຺ໂຕວຸຕ຺ຖຎ຺ຈ ຠິກ຺ຂຸສ຺ສ ວຏ຺ຏຕີຕິ ໂຍຊນາ.

໒໖໗໗. ຠິກ຺ຂຸສ຺ສ ສນ຺ຕກໍ ສງ຺ຆິກມ຺ປິ ວາ ອກປ຺ປິຍຠູມິຍໍ ສຫເສຍ຺ຍປ຺ປໂຫນເກ ເຄເຫ ອນ຺ໂຕວຸຕ຺ຖຎ຺ຈ ອນ຺ໂຕປກ຺ກຎ຺ຈ ຠິກ຺ຂຸສ຺ສ ນ ວຏ຺ຏຕິ. ຠິກ຺ຂຸນິຍາ ສນ຺ຕກໍ ສງ຺ຆິກມ຺ປິ ວາ ອກປ຺ປິຍຠູມິຍໍ ສຫເສຍ຺ຍປ຺ປໂຫນເກ ເຄເຫ ອນ຺ໂຕວຸຕ຺ຖຎ຺ຈ ອນ຺ໂຕປກ຺ກຎ຺ຈ ຠິກ຺ຂຸນິຍາ ນ ວຏ຺ຏຕີຕິ ເອວໍ ອຸຠິນ຺ນໍ ຠິກ຺ຂຸຠິກ຺ຂຸນີນໍ ນ ວຏ຺ຏຕີຕິ ໂຍຊນາ.

໒໖໗໘. ອກປ຺ປກຸຏິຍາຕິ ອກປ຺ປິຍກຸຏິຍາ, ‘‘ອກປ຺ປິຍຠູມິຍໍ ສຫເສຍ຺ຍປ຺ປໂຫນເກ ເຄເຫ’’ຕິ ອຏ຺ຐກຖາຍໍ ວຸຕ຺ຕາຍ ອກປ຺ປິຍຠູມິຍາຕິ ອຕ຺ໂຖ. ອາທິ-ສທ຺ເທນ ນວນີຕເຕລມຘຸຜາຓິຕານໍ ຄຫຓໍ.

໒໖໗໙. ເຕເຫວ ອນ຺ໂຕວຸຕ຺ເຖຫິ ສປ຺ປິອາທີຫິ ສຕ຺ຕາຫກາລິເກຫິ ສຫ ຠິກ຺ຂຸນາ ປກ຺ກໍ ຕໍ ຍາວຊີວິກໍ ນິຣາມິສໍ ສຕ຺ຕາຫໍ ປຣິຠຸຎ຺ຊິຕຸໍ ວຏ຺ຏເຕວາຕິ ໂຍຊນາ.

໒໖໘໐. ປກ຺ກໍ ສາມໍປກ຺ກໍ ຕໍ ຍາວຊີວິກໍ ສເຈ ອາມິສສໍສຏ຺ຐໍ ປຣິຠຸຎ຺ຊຕິ, ອນ຺ໂຕວຸຕ຺ຖຎ຺ຈ ຠຸຎ຺ຊຕິ, ກິຎ຺ຈ ຠິຍ຺ໂຍ ສາມໍປກ຺ກຎ຺ຈ ຠຸຎ຺ຊຕີຕິ ໂຍຊນາ. ຍາວຊີວິກສ຺ສ ອາມິສສໍສຏ຺ຐສ຺ສ ອາມິສຄຕິກຕ຺ຕາ ‘‘ອນ຺ໂຕວຸຕ຺ຖ’’ນ຺ຕິ ວຸຕ຺ຕໍ.

໒໖໘໒. ອຸທກໍ ນ ໂຫຕິ ກາລິກໍ ຈຕູສຸ ກາລິເກສຸ ອສງ຺ຄຫິຕຕ຺ຕາ.

໒໖໘໓. ຕິກາລິກາ ຍາວກາລິກາ ຍາມກາລິກາ ສຕ຺ຕາຫກາລິກາຕິ ຕໂຍ ກາລິກາ ປຏິຄ຺ຄຫວເສເນວ ອຕ຺ຕໂນ ອຕ຺ຕໂນ ກາລໍ ອຕິກ຺ກມິຕ຺ວາ ຠຸຕ຺ຕາ ໂທສກຣາ ໂຫນ຺ຕິ, ຕຕິຍໍ ສຕ຺ຕາຫາຕິກ຺ກເມ ນິສ຺ສຄ຺ຄິຍປາຈິຕ຺ຕິຍວຕ຺ຖຸຕ຺ຕາ ອຠຸຕ຺ຕມ຺ປິ ໂທສກຣນ຺ຕິ ໂຍຊນາ.

‘‘ຠຸຕ຺ຕາ ໂທສກຣາ’’ຕິ ອິມິນາ ປຸຣິມກາລິກທ຺ວຍໍ ປຏິຄ຺ຄເຫຕ຺ວາ ກາລາຕິກ຺ກມນມຕ຺ເຕນ ອາປຕ຺ຕິຍາ ກາຣຓໍ ນ ໂຫຕິ, ຠຸຕ຺ຕເມວ ໂຫຕິ. ສຕ຺ຕາຫກາລິກໍ ກາລາຕິກ຺ກເມນ ອປຣິຠຸຕ຺ຕມ຺ປິ ອາປຕ຺ຕິຍາ ກາຣຓໍ ໂຫຕີຕິ ທີເປຕິ. ເຕສຸ ສຕ຺ຕາຫກາລິເກເຍວ ວິເສສໍ ທສ຺ເສຕຸມາຫ ‘‘ອຠຸຕ຺ຕໍ ຕຕິຍມ຺ປິ ຈາ’’ຕິ. ຈ-ສທ຺ໂທ ຕຸ-ສທ຺ທຕ຺ເຖ. ຍາວຊີວິກໍ ປນ ປຏິຄ຺ຄເຫຕ຺ວາ ຍາວຊີວໍ ປຣິຠຸຎ຺ຊິຍມານໍ ອິຕຣກາລິກສໍສຄ຺ຄໍ ວິນາ ໂທສກຣໍ ນ ໂຫຕີຕິ ນ ຄຫິຕໍ.

໒໖໘໔. ອມ຺ພາທໂຍ ສທ຺ທາ ຣຸກ຺ຂານໍ ນາມຠູຕາ ຕໍຕໍຜເລປິ ວຕ຺ຕມານາ ອິຘ ອຸປຈາຣວເສນ ຕຊ຺ເຊ ປານເກ ວຸຕ຺ຕາ, ເຕເນວາຫ ‘‘ປານກໍ ມຕ’’ນ຺ຕິ. ໂຈຈໍ ອຏ຺ຐິກກທລິປານໍ. ໂມຈໍ ອິຕຣກທລິປານໍ. ມຘູຕິ ມຸທ຺ທິກຜລານໍ ຣສໍ. ມຸທ຺ທິກາຕິ ສີໂຕທເກ ມທ຺ທິຕານໍ ມຸທ຺ທິກຜລານໍ ປານໍ. ‘‘ສາລູກປານນ຺ຕິ ຣຕ຺ຕຸປ຺ປລນີລຸປ຺ປລາທີນໍ ສາລູເກ ມທ຺ທິຕ຺ວາ ກຕປານ’’ນ຺ຕິ ປາຬິຍໍ, ອຏ຺ຐກຖາຍ (ມຫາວ. ອຏ຺ຐ. ໓໐໐) ຈ ສາລູກ-ສທ຺ທສ຺ສ ທີຆວເສນ ສໍໂຍຄທສ຺ສນໂຕ ‘‘ສາລຸ ຜາຣຸສກຎ຺ຈາ’’ຕິ ຄາຖາພນ຺ຘວເສນ ຣສ຺ໂສ ກໂຕ.

ສາລູກໍ ກຸມຸທຸປ຺ປລານໍ ຜລຣສໍ. ຂຸທ຺ທສິກ຺ຂາວຓ຺ຓນາຍໍ ປນ ‘‘ສາລູກປານໍ ນາມ ຣຕ຺ຕຸປ຺ປລນີລຸປ຺ປລາທີນໍ ກິຎ຺ຊກ຺ຂເຣຓູຫິ ກຕປານ’’ນ຺ຕິ ວຸຕ຺ຕໍ. ‘‘ຜາຣຸສກ’ນ຺ຕິອາທີສຸ ເອໂກ ຣຸກ຺ໂຂ’’ຕິ ຄຓ຺ຐິປເທ ວຸຕ຺ຕໍ. ຕສ຺ສ ຜລຣໂສ ຜາຣຸສກໍ ນາມ. ເອເຕສໍ ອຏ຺ຐນ຺ນໍ ຜລານໍ ຣໂສ ອຸທກສມ຺ຠິນ຺ໂນ ວຏ຺ຏຕິ, ສີຕຸທເກ ມທ຺ທິໂຕ ປສນ຺ໂນ ນິກ຺ກສໂຏວ ວຏ຺ຏຕິ, ອຸທເກນ ປນ ອສມ຺ຠິນ຺ໂນ ຣໂສ ຍາວກາລິໂກ.

໒໖໘໕. ຜລນ຺ຕິ ອມ຺ພາທິຜລໍ. ສວຕ຺ຖຸກປຏິຄ຺ຄໂຫຕິ ປານວຕ຺ຖຸການໍ ຜລານໍ ປຏິຄ຺ຄໂຫ. ວສຕິ ເອຕ຺ຖ ປານນ຺ຕິ ວຕ຺ຖຸ, ຜລໍ, ວຕ຺ຖຸນາ ສຫ ວຏ຺ຏຕີຕິ ສວຕ຺ຖຸກໍ, ປານໍ, ສວຕ຺ຖຸກສ຺ສ ປຏິຄ຺ຄໂຫ ສວຕ຺ຖຸກປຏິຄ຺ຄໂຫ. ສວຕ຺ຖຸກສ຺ສ ປຏິຄ຺ຄຫໍ ນາມ ວຕ຺ຖຸປຏິຄ຺ຄຫຓເມວາຕິ ກຕ຺ວາ ວຸຕ຺ຕໍ ‘‘ປານວຕ຺ຖຸການໍ ຜລານໍ ປຏິຄ຺ຄໂຫ’’ຕິ.

໒໖໘໖. ‘‘ສຸໂກຏ຺ເຏຕ຺ວາ’’ຕິ ວຸຈ຺ຈມານຕ຺ຕາ ‘‘ອມ຺ພປກ຺ກ’’ນ຺ຕິ ອາມກເມວ ອມ຺ພຜລໍ ວຸຈ຺ຈຕິ. ອຸທເກຕິ ສີໂຕທເກ. ປຣິສ຺ສວໍ ປຣິສ຺ສາວິຕໍ. ກຕ຺ວາຕິ ມຘຸອາທີຫິ ອຠິສງ຺ຂຣິຕ຺ວາ. ຍຖາຫ – ‘‘ຕທຫຸປຏິຄ຺ຄຫິເຕຫິ ມຘຸສກ຺ກຣກປ຺ປູຣາທີຫິ ໂຍເຊຕ຺ວາ ກາຕພ຺ພ’’ນ຺ຕິ (ມຫາວ. ອຏ຺ຐ. ໓໐໐). ປາຕຸໍ ວຏ຺ຏຕີຕິ ເອຕ຺ຖ ວິນິຈ຺ຉໂຍ ‘‘ເອວໍ ກຕໍ ປຸເຣຠຕ຺ຕເມວ ກປ຺ປຕິ, ອນຸປສມ຺ປນ຺ເນຫິ ກຕໍ ລຠິຕ຺ວາ ປນ ປຸເຣຠຕ຺ຕໍ ປຏິຄ຺ຄຫິຕໍ ປຸເຣຠຕ຺ຕໍ ສາມິສປຣິໂຠເຄນາປິ ວຏ຺ຏຕິ, ປຈ຺ຉາຠຕ຺ຕໍ ນິຣາມິສປຣິໂຠເຄນ ຍາວ ອຣຸຓຸຄ຺ຄມນາ ວຏ຺ຏຕິເຍວ. ເອສ ນໂຍ ສພ຺ພປາເນສູ’’ຕິ ອຏ຺ຐກຖາຍໍ ວຸຕ຺ໂຕ.

໒໖໘໗. ເສສປານເກສຸປີຕິ ຊມ຺ພຸປານກາທີສຸປິ.

໒໖໘໘. ອຸຈ຺ຉຸຣໂສ ອນ຺ໂຕຄຘຕ຺ຕາ ອິຘ ວຸຕ຺ໂຕ, ນ ປນ ຍາມກາລິກຕ຺ຕາ, ໂສ ປນ ສຕ຺ຕາຫກາລິໂກເຍວ.

໒໖໘໙. ມຘຸກສ຺ສ ຣສນ຺ຕິ ມຘຸກປຸປ຺ຜສ຺ສ ຣສໍ. ເອຕ຺ຖ ມຘຸກປຸປ຺ຜຣໂສ ອຄ຺ຄິປາໂກ ວາ ໂຫຕຸ ອາທິຈ຺ຈປາໂກ ວາ, ປຈ຺ຉາຠຕ຺ຕໍ ນ ວຏ຺ຏຕິ. ປຸເຣຠຕ຺ຕມ຺ປິ ຍໍ ປານໍ ຄເຫຕ຺ວາ ມຊ຺ຊໍ ກໂຣນ຺ຕິ, ໂສ ອາທິໂຕ ປຏ຺ຐາຍ ນ ວຏ຺ຏຕິ. ມຘຸກປຸປ຺ຜໍ ປນ ອລ຺ລໍ ວາ ສຸກ຺ຂໍ ວາ ຠຊ຺ຊິຕໍ ວາ ເຕນ ກຕຜາຓິຕໍ ວາ ຍໂຕ ປຏ຺ຐາຍ ມຊ຺ຊໍ ນ ກໂຣນ຺ຕິ, ຕໍ ສພ຺ພໍ ປຸເຣຠຕ຺ຕໍ ວຏ຺ຏຕິ.

ປກ຺ກຑາກຣສນ຺ຕິ ປກ຺ກສ຺ສ ຍາວກາລິກສ຺ສ ຣສໍ. ສພ຺ໂພ ປຕ຺ຕຣໂສ ຍາມກາລິໂກ ວຸຕ຺ໂຕຕິ ໂຍຊນາ. ອຏ຺ຐກຖາຍໍ ‘‘ຍາວກາລິກປຕ຺ຕານຎ຺ຫິ ປຸເຣຠຕ຺ຕໍເຍວ ຣໂສ ກປ຺ປຕີ’’ຕິ (ມຫາວ. ອຏ຺ຐ. ໓໐໐) ອິມເມວ ສນ຺ຘາຍ ວຸຕ຺ຕໍ.

໒໖໙໐. ສານຸໂລມານໍ ສຕ຺ຕນ຺ນໍ ຘຎ຺ຎານໍ ຜລຊໍ ຣສໍ ຐເປຕ຺ວາ ສພ຺ໂພ ຜລໂຊ ຣໂສ ວິກາເລ ຍາມສຎ຺ຎິເຕ ອນຸໂລມໂຕ ປຣິຠຸຎ຺ຊິຕຸໍ ອນຸຎ຺ຎາໂຕຕິ ໂຍຊນາ.

໒໖໙໑. ຍາວກາລິກປຕ຺ຕານໍ ສີຕຸທເກ ມທ຺ທິຕ຺ວາ ກໂຕ ຣໂສປິ ອປກ຺ໂກ, ອາທິຈ຺ຈປາໂກປິ ວິກາເລ ປນ ວຏ຺ຏຕີຕິ ໂຍຊນາ.

໒໖໙໒-໓. ສຕ຺ຕຘຎ຺ຎານຸໂລມານິ ສຣູປໂຕ ທສ຺ເສຕຸມາຫ ‘‘ຕາລຎ຺ຈນາຬິເກຣຎ຺ຈາ’’ຕິອາທິ. ອປຣຓ຺ຓໍ ມຸຄ຺ຄາທິ. ‘‘ສຕ຺ຕຘຎ຺ຎານຸໂລມິກ’’ນ຺ຕິ ອິມິນາ ເອເຕສໍ ຣໂສ ຍາວກາລິໂກ ຍາມກາລສງ຺ຂາເຕ ວິກາເລ ປຣິຠຸຎ຺ຊິຕຸໍ ນ ວຏ຺ຏຕີຕິ ທສ຺ເສຕິ.

໒໖໙໕. ເອວມາທີນໍ ຂຸທ຺ທການໍ ຜລານໍ ຣໂສ ປນ ອຏ຺ຐປານານຸໂລມຕ຺ຕາ ອນຸໂລມິເກ ຍາມກາລິການຸໂລມິເກ ນິທ຺ທິຏ຺ໂຐ ກຖິໂຕຕິ ໂຍຊນາ.

໒໖໙໖. ອິຘ ອິມສ຺ມິໍ ໂລເກ ສານຸໂລມສ຺ສ ຘຎ຺ຎສ຺ສ ຜລຊໍ ຣສໍ ຐເປຕ຺ວາ ອຍາມກາລິໂກ ອຎ຺ໂຎ ຜລຣໂສ ນຕ຺ຖີຕິ ໂຍຊນາ, ສພ຺ໂພ ຍາມກາລິໂກເຍວາຕິ ທີເປຕິ.

ເຠສຊ຺ຊກ຺ຂນ຺ຘກກຖາວຓ຺ຓນາ.