ປາເຖຍ຺ຍກຖາ

໖໖. ປາເຖຍ຺ຍກຖາຍໍ ‘‘ອນຸຊານາມິ, ຠິກ຺ຂເວ’’ຕິອາທິ ຠທ຺ທິຍນຄເຣ ອມິຕປຣິໂຠຄຠູເຕນ ເມຓ຺ຑກເສຏ຺ຐິນາ ອຠິຍາຈິໂຕ ຫຸຕ຺ວາ ອນຸຎ຺ຎາຕໍ, ອິຘ ປນ ປຐມໍ ‘‘ອນຸຊານາມິ, ຠິກ຺ຂເວ, ປຎ຺ຈ ໂຄຣເສ ຂີຣໍ ທຘິໍ ຕກ຺ກໍ ນວນີຕໍ ສປ຺ປິ’’ນ຺ຕິ (ມຫາວ. ໒໙໙) ປຎ຺ຈ ໂຄຣສາ ອນຸຎ຺ຎາຕາ. ຕໂຕ ປຣໍ ເສຏ຺ຐິໂນ ອຠິຍາຈນານຸຣູປໍ ວຕ຺ວາ ອນຸຊານິຕຸໍ ‘‘ສນ຺ຕິ, ຠິກ຺ຂເວ, ມຄ຺ຄາ ກນ຺ຕາຣາ’’ຕິອາທິມາຫ. ເສສໍ ອຏ຺ຐກຖາຍໍ ວຸຕ຺ຕນເຍເນວ ເວທິຕພ຺ພໍ. ຕຖາ ອລຠນ຺ເຕນ ອຎ຺ຎາຕກອປ຺ປວາຣິຕຏ຺ຐານໂຕ ຍາຈິຕ຺ວາປິ ຄເຫຕພ຺ພນ຺ຕິ ເອເຕນ ເອວຣູເປສຸ ກາເລສຸ ວິຎ຺ຎຕ຺ຕິປຈ຺ຈຍາ ໂທໂສ ນຕ຺ຖີຕິ ທສ຺ເສຕິ. ‘‘ເອກທິວເສນ ຄມນີເຍ ມຄ຺ເຄ ເອກຠຕ຺ຕຕ຺ຖາຍ ປຣິເຍສິຕພ຺ພ’’ນ຺ຕິ ວຸຕ຺ຕຕ຺ຕາ ປນ ຕໂຕ ອຸປຣິ ຍາຈນໍ ນ ວຏ຺ຏຕີຕິ ທສ຺ສິຕໍ. ‘‘ທີເຆ ອທ຺ຘາເນ’’ຕິອາທິນາ ສເຈ ມາສຄມນີເຍ ມຄ຺ເຄ ສຕ຺ຕາຫຄມນີໂຍ ເອວ ກນ຺ຕາໂຣ ໂຫຕິ, ຕຕ຺ຖ ສຕ຺ຕາຫຍາປນີຍມຕ຺ຕເມວ ປາເຖຍ຺ຍໍ ປຣິເຍສິຕພ຺ພໍ, ຕໂຕ ປຣໍ ປິຓ຺ຑຈາຣິກາທິວເສນ ສຸຠິກ຺ຂສຸລຠປິຓ຺ຑມຄ຺ຄຕ຺ຕາ ນ ປຣິເຍສິຕພ຺ພນ຺ຕິ.