ມຫາປເທສກຖາ

໖໗. ມຫາປເທສກຖາຍໍ ມຫາປເທສາ ນາມ ອປ຺ປຏິກ຺ຂິຕ຺ຕາ ທ຺ເວ, ອນນຸຎ຺ຎາຕາ ທ຺ເວຕິ ຈຕ຺ຕາໂຣຕິ ທສ຺ເສນ຺ໂຕ ‘‘ຍໍ ຠິກ຺ຂເວ’’ຕິອາທິມາຫ. ເຕສຸ ອປ຺ປຏິກ຺ຂິຕ຺ເຕປິ ອກປ຺ປິຍານຸໂລມກປ຺ປິຍານຸໂລມວເສນ ທ຺ເວ, ຕຖາ ອນນຸຎ຺ຎາເຕປີຕິ.

ຕຕ຺ຖ ‘‘ປຣິມທ຺ທນ຺ຕາຕິ ອຸປປຣິກ຺ຂນ຺ຕາ. ປຏ຺ຏຓ຺ຓຸເທເສ ສຎ຺ຊາຕວຕ຺ຖໍ ປຏ຺ຏຸຓ຺ຓໍ. ‘ປຏ຺ຏຸຓ຺ຓໍ ໂກເສຍ຺ຍວິເສໂສ’ຕິ ຫິ ອຠິຘານໂກເສ ວຸຕ຺ຕໍ. ຈີນເທເສ ໂສມາຣເທເສ ຈ ສຎ຺ຊາຕວຕ຺ຖານິ ຈີນໂສມາຣປຏານິ. ປຏ຺ຏຸຓ຺ຓາທີນິ ຕີຓິ ໂກເສຍ຺ຍສ຺ສ ອນຸໂລມານິ ປາຓເກຫິ ກຕສຸຕ຺ຕມຍຕ຺ຕາ. ອິທ຺ຘິມຍໍ ເອຫິຠິກ຺ຂູນໍ ປຸຎ຺ຎິທ຺ຘິຍາ ນິພ຺ພຕ຺ຕຈີວຣໍ, ຕໍ ໂຂມາທີນໍ ອຎ຺ຎຕຣໍ ໂຫຕີຕິ ເຕສໍເຍວ ອນຸໂລມໍ. ເທວຕາຫິ ທິນ຺ນຈີວຣໍ ເທວທຕ຺ຕິຍໍ, ຕໍ ກປ຺ປຣຸກ຺ເຂ ນິພ຺ພຕ຺ຕໍ ຊາລິນິຍາ ເທວກຎ຺ຎາຍ ອນຸຣຸທ຺ຘຕ຺ເຖຣສ຺ສ ທິນ຺ນວຕ຺ຖສທິສໍ, ຕມ຺ປິ ໂຂມາທີນໍເຍວ ອນຸໂລມໍ ໂຫຕິ ເຕສຸ ອຎ຺ຎຕຣຠາວໂຕ. ທ຺ເວ ປຏານິ ເທສນາເມນ ວຸຕ຺ຕານີຕິ ເຕສໍ ສຣູປທສ຺ສນມຕ຺ຕເມຕໍ, ນາຎ຺ຎນິວຕ຺ຕນປທໍ ປຏ຺ຏຸຓ຺ຓປຏ຺ຏສ຺ສປິ ເທສນາເມເນວ ວຸຕ຺ຕຕ຺ຕາ. ຕຸມ຺ພາຕິ ຕີຓິ ຠາຊນານິ. ຜລກຕຸມ຺ໂພ ລາພຸອາທິ. ອຸທກຕຸມ຺ໂພ ອຸທກຸກ຺ຂິປນກຸຏໂກ. ກິລຎ຺ຊຈ຺ຉຕ຺ຕນ຺ຕິ ເວຬຸວິລີເວຫິ ວາຍິຕ຺ວາ ກຕຉຕ຺ຕ’’ນ຺ຕິ ສາຣຕ຺ຖທີປນິຍໍ (ສາຣຕ຺ຖ. ຏີ. ມຫາວຄ຺ຄ ໓.໓໐໕) ວຸຕ຺ຕໍ.

‘‘ຍາວກາລິກປກ຺ການນ຺ຕິ ປກ຺ເກ ສນ຺ຘາຍ ວຸຕ຺ຕໍ. ອາມານິ ປນ ອນຸປສມ຺ປນ຺ເນຫິ ສີຕຸທເກ ມທ຺ທິຕ຺ວາ ປຣິສ຺ສາເວຕ຺ວາ ທິນ຺ນປານໍ ປຈ຺ຉາຠຕ຺ຕມ຺ປິ ກປ຺ປຕິ ເອວ. ອຍຎ຺ຈ ອຕ຺ໂຖ ມຫາອຏ຺ຐກຖາຍໍ ສຣູປໂຕ ອວຸຕ຺ໂຕຕິ ອາຫ ‘ກຸຣຸນ຺ທິຍໍ ປນາ’ຕິອາທິ. ອຸຈ຺ຉຸຣໂສ ນິກສໂຏຕິ ອິທໍ ປາຕພ຺ພຕາສາມຎ຺ເຎນ ຍາມກາລິກກຖາຍໍ ວຸຕ຺ຕໍ, ຕໍ ປນ ສຕ຺ຕາຫກາລິກເມວາຕິ ຄເຫຕພ຺ພໍ. ອິເມ ຈຕ຺ຕາໂຣ ຣສາຕິ ຜລປຕ຺ຕປຸປ຺ຜອຸຈ຺ຉຸຣສາ ຈຕ຺ຕາໂຣ’’ຕິ ວິມຕິວິໂນທນິຍໍ (ວິ. ວິ. ຏີ. ມຫາວຄ຺ຄ ໒.໓໐໐) ວຸຕ຺ຕໍ. ‘‘ທ຺ເວ ປຏາ ເທສນາເມເນວາຕິ ຈີນປຏໂສມາຣປຏານິ. ຕີຓີຕິ ປຏ຺ຏຸຓ຺ເຓນ ສຫ ຕີຓິ. ອິທ຺ຘິມຍໍ ເອຫິຠິກ຺ຂູນໍ ນິພ຺ພຕ຺ຕໍ. ເທວທຕ຺ຕິຍໍ ອນຸຣຸທ຺ຘຕ຺ເຖເຣນ ລທ຺ຘ’’ນ຺ຕິ ວຊິຣພຸທ຺ຘິຏີກາຍໍ (ວຊິຣ. ຏີ. ມຫາວຄ຺ຄ ໓໐໕).