ທສຠາຄກຖາ

໖໕. ທສຠາຄກຖາຍໍ ສງ຺ຆິການີຕິ ສງ຺ຆສນ຺ຕການິ ພີຊານິ. ປຸຄ຺ຄລິກາຍາຕິ ປຸຄ຺ຄລສ຺ສ ສນ຺ຕກາຍ ຠູມິຍາ. ຠາຄໍ ທຕ຺ວາຕິ ມູລຠາຄສງ຺ຂາຕໍ ທສມຠາຄໍ ຠູມິສາມິການໍ ທຕ຺ວາ. ປຣິຠຸຎ຺ຊິຕພ຺ພານີຕິ ເຕສໍ ພີຊານໍ ຜລານິ ໂຣປເກຫິ ປຣິຠຸຎ຺ຊິຕພ຺ພານີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວ. ອິທໍ ກິຣ ຊມ຺ພຸທີເປ ໂປຣາຓກຈາຣິຕ຺ຕນ຺ຕິ ອາທິກປ຺ປກາເລ ປຐມກປ຺ປິກາ ມນຸສ຺ສາ ໂພຘິສຕ຺ຕໍ ມຫາສມ຺ມຕໍ ນາມ ຣາຊານໍ ກຕ຺ວາ ສພ຺ເພປິ ອຕ຺ຕໂນ ອຕ຺ຕໂນ ຕຓ຺ຑຸລຜລສາລິເຂຕ຺ຕໂຕ ປວຕ຺ຕຕຓ຺ຑຸລຜລານິ ທສ ໂກຏ຺ຐາເສ ກຕ຺ວາ ເອກໍ ໂກຏ຺ຐາສໍ ຠູມິສາມິກຠູຕສ຺ສ ມຫາສມ຺ມຕຣາຊິໂນ ທຕ຺ວາ ປຣິຠຸຎ຺ຊິໍສຸ. ຕໂຕ ປຏ຺ຐາຍ ຊມ຺ພຸທີປິການໍ ມນຸສ຺ສານໍ ຈາຣິຕຕ຺ຕາ ວຸຕ຺ຕໍ. ເຕເນວ ສາຣຕ຺ຖທີປນີນາມິກາຍມ຺ປິ ວິນຍຏີກາຍໍ (ວຊິຣ. ຏີ. ມຫາວຄ຺ຄ ໓໐໔) ‘‘ທສຠາຄໍ ທຕ຺ວາຕິ ທສມຠາຄໍ ທຕ຺ວາ. ເຕເນວາຫ ‘ທສ ໂກຏ຺ຐາເສ ກຕ຺ວາ ເອໂກ ໂກຏ຺ຐາໂສ ຠູມິສາມິການໍ ທາຕພ຺ໂພ’ຕິ’’ ວຸຕ຺ຕໍ.