ອຘມ຺ມກມ຺ມກຖາ

໕໘. ອຘມ຺ມກມ຺ມກຖາຍໍ ນ, ຠິກ຺ຂເວ…ເປ… ທຸກ຺ກຏສ຺ສາຕິ ອິທໍ ‘‘ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສງ຺ຆມຊ຺ເຌ ອຘມ຺ມກມ຺ມໍ ກໂຣນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ – ນ, ຠິກ຺ຂເວ, ອຘມ຺ມກມ຺ມໍ ກາຕພ຺ພໍ, ໂຍ ກເຣຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ (ມຫາວ. ໑໕໔) ອິມໍ ອຸໂປສຖກ຺ຂນ຺ຘເກ ອາຄຕປາຐໍ ສນ຺ຘາຍ ວຸຕ຺ຕໍ. ອນຸຊານາມິ…ເປ… ປຏິກ຺ໂກສິຕຸນ຺ຕິ ຕເຖວ ອາຄຕໍ ‘‘ຠຄວໂຕ ເອຕມຕ຺ຖໍ ອາໂຣເຈສຸໍ – ອນຸຊານາມິ, ຠິກ຺ຂເວ, ອຘມ຺ມກມ຺ເມ ກຍິຣມາເນ ປຏິກ຺ໂກສິຕຸ’’ນ຺ຕິ ອິມໍ. ຕຕ຺ຖ ກໂຣນ຺ຕິເຍວາຕິ ປຎ຺ຎຕ຺ຕມ຺ປິ ສິກ຺ຂາປທໍ ມທ຺ທິຕ຺ວາ ອຘມ຺ມກມ຺ມໍ ກໂຣນ຺ຕິເຍວາຕິ ອຕ຺ໂຖ. ‘‘ອນຸຊານາມິ…ເປ… ປຏິກ຺ໂກສິຕຸ’’ນ຺ຕິ ເອວໍ ອຘມ຺ມກມ຺ເມ ກຍິຣມາເນ ສຕິ ‘‘ເປສເລຫິ ຠິກ຺ຂູຫິ ຕໍ ອຘມ຺ມກມ຺ມໍ ອກຕໍ, ກມ຺ມໍ ທຸກ຺ກຏໍ ກມ຺ມໍ ປຸນ ກາຕພ຺ພ’’ນ຺ຕິ ເອວໍ ປຏິກ຺ໂກສິຕພ຺ພໍ, ນ ຕຸຓ຺ຫີຠາເວນ ຂມິຕພ຺ພນ຺ຕິ ອຕ຺ໂຖ. ອິຕິ ວຈນໂຕຕິ ອິທໍ ປນ ປຸພ຺ພປາຐໍ ຄເຫຕ຺ວາ ອິຕິ ວຈນໂຕ. ອຘມ຺ມກມ຺ມໍ ນ ກາຕພ຺ພນ຺ຕິ ອປຣປາຐໍ ຄເຫຕ຺ວາ ອິຕິ ວຈນໂຕ ກຍິຣມານຎ຺ຈ ອຘມ຺ມກມ຺ມໍ ຠິກ຺ຂູຫິ ນິວາເຣຕພ຺ພນ຺ຕິ ທ຺ວິຘາ ໂຍຊນາ ກາຕພ຺ພາ.

ນິວາເຣນ຺ເຕຫິ ຈາຕິອາທິ ປນ ‘‘ເຕນ ໂຂ ປນ ສມເຍນ ເປສລາ ຠິກ຺ຂູ ຉພ຺ພຄ຺ຄິເຍຫິ ຠິກ຺ຂູຫິ ອຘມ຺ມກມ຺ເມ ກຍິຣມາເນ ປຏິກ຺ໂກສນ຺ຕິ, ຉພ຺ພຄ຺ຄິຍາ ຠິກ຺ຂູ ລຠນ຺ຕິ ອາຆາຕໍ, ລຠນ຺ຕິ ອປ຺ປຈ຺ຈຍໍ, ວເຘນ ຕຊ຺ເຊນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ – ອນຸຊານາມິ, ຠິກ຺ຂເວ, ທິຏ຺ຐິມ຺ປິ ອາວິກາຕຸ’’ນ຺ຕິ (ມຫາວ. ໑໕໔) ປາຐຎ຺ຈ ‘‘ເຕສໍເຍວ ສນ຺ຕິເກ ທິຏ຺ຐິໍ ອາວິກໂຣນ຺ຕິ, ຉພ຺ພຄ຺ຄິຍາ ຠິກ຺ຂູ ລຠນ຺ຕິ ອາຆາຕໍ, ລຠນ຺ຕິ ອປ຺ປຈ຺ຈຍໍ, ວເຘນ ຕຊ຺ເຊນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ – ອນຸຊານາມິ, ຠິກ຺ຂເວ, ຈຕູຫິ ປຎ຺ຈຫິ ປຏິກ຺ໂກສິຕຸໍ, ທ຺ວີຫິ ຕີຫິ ທິຏ຺ຐິໍ ອາວິກາຕຸໍ, ເອເກນ ອຘິຏ຺ຐາຕຸໍ ນ ເມຕໍ ຂມຕີ’’ຕິ ອິເມ ປາເຐ ສນ຺ຘາຍ ວຸຕ຺ຕໍ. ວຈນໂຕຕິ ອິທໍ ປນ ປາຬິຍໍ ຕີຓິ ສມ຺ປທານານິ ຄເຫຕ຺ວາ ຕີຫິ ກິຣິຍາປເທຫິ ວິສຸໍ ວິສຸໍ ໂຍເຊຕພ຺ພໍ. ສພ຺ພຎ຺ເຈຕໍ ອນຸປທ຺ທວຕ຺ຖາຍ ວຸຕ຺ຕໍ, ນ ອາປຕ຺ຕິສພ຺ຠາວໂຕຕິ ໂຍຊນາ. ກຖໍ ອນຸປທ຺ທວສມ຺ຠໂວຕິ? ນິຄ຺ຄຫກມ຺ມໍ ກາຕຸໍ ອສກ຺ກຸເຓຍ຺ຍຠາວໂຕ, ອຎ຺ຎສ຺ສ ອຸປທ຺ທວສ຺ສ ຈ ນິວາຣຓໂຕ. ເຕນ ວຸຕ຺ຕໍ ວຊິຣພຸທ຺ຘິຏີກາຍໍ (ວຊິຣ. ຏີ. ມຫາວຄ຺ຄ ໑໕໔) ‘‘ເຕສໍ ອນຸປທ຺ທວຕ຺ຖາຍາຕິ ສງ຺ໂຆ ສງ຺ຆສ຺ສ ກມ຺ມໍ ນ ກໂຣຕິ, ອຎ຺ໂຎປິ ອຸປທ຺ທໂວ ພຫູນໍ ໂຫຕິ, ຕສ຺ມາ ວຸຕ຺ຕ’’ນ຺ຕິ.