ໂອກາສກຕກຖາ

໕໙. ໂອກາສກຕກຖາຍໍ ນ, ຠິກ຺ຂເວ, ອໂນກາສກໂຕຕິອາທິ ‘‘ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອໂນກາສກຕໍ ຠິກ຺ຂຸໍ ອາປຕ຺ຕິຍາ ໂຈເທນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ – ນ, ຠິກ຺ຂເວ, ອໂນກາສກໂຕ ຠິກ຺ຂຸ ອາປຕ຺ຕິຍາ ໂຈເທຕພ຺ໂພ, ໂຍ ໂຈເທຍ຺ຍ, ອາປຕ຺ຕິ ທຸກ຺ກຏສ຺ສ. ອນຸຊານາມິ, ຠິກ຺ຂເວ, ໂອກາສໍ ກາຣາເປຕ຺ວາ ອາປຕ຺ຕິຍາ ໂຈເທຕຸໍ, ກໂຣຕຸ ອາຍສ຺ມາ ໂອກາສໍ, ອຫໍ ຕໍ ວຕ຺ຕຸກາໂມ’’ຕິ (ມຫາວ. ໑໕໓) ອິທໍ ປາຐໍ ສນ຺ຘາຍ ວຸຕ຺ຕໍ. ອຘິປ຺ປາເຍສຸ ຈາວນາຘິປ຺ປາໂຍຕິ, ສາສນໂຕ ຈາເວຕຸກາໂມ. ອກ຺ໂກສາຘິປ຺ປາໂຍຕິ ປຣໍ ອກ຺ໂກສິຕຸກາໂມ ປຣິຠາສິຕຸກາໂມ. ກມ຺ມາຘິປ຺ປາໂຍຕິ ຕຊ຺ຊນີຍາທິກມ຺ມໍ ກຕ຺ຕຸກາໂມ. ວຸຏ຺ຐານາຘິປ຺ປາໂຍຕິ ອາປຕ຺ຕິໂຕ ວຸຏ຺ຐາເປຕຸກາໂມ. ອຸໂປສຖປ຺ປວາຣຓຏ຺ຐປນາຘິປ຺ປາໂຍຕິ ອຸໂປສຖໍ, ປວາຣຓໍ ວາ ຐເປຕຸກາໂມ. ອນຸວິຊ຺ຊນາຘິປ຺ປາໂຍຕິ ອຸປປຣິກ຺ຂິຕຸກາໂມ. ຘມ຺ມກຖາຘິປ຺ປາໂຍຕິ ຘມ຺ມໍ ເທເສຕຸກາໂມ. ອິຕິ ປຣໍ ໂຈເທນ຺ຕານໍ ຠິກ຺ຂູນໍ ອຘິປ຺ປາຍເຠໂທ ອເນກວິໂຘ ໂຫຕີຕິ ອຕ຺ໂຖ. ປຸຣິເມສຸ ຈຕູສຸ ອຘິປ຺ປາເຍສູຕິ ຈາວນາຘິປ຺ປາຍອກ຺ໂກສາຘິປ຺ປາຍກມ຺ມາຘິປ຺ປາຍວຸຏ຺ຐານາຘິປ຺ປາເຍສຸ ໂອກາສໍ ອກາຣາເປນ຺ຕສ຺ສ ທຸກ຺ກຏໍ. ກາຣາເປຕ຺ວາປິ ສມ຺ມຸຂາ ໂຈເທນ຺ຕສ຺ສ ຍຖານຸຣູປໍ ສງ຺ຆາທິເສສປາຈິຕ຺ຕິຍທຸກ຺ກຏານິ, ອສມ຺ມຸຂາ ປນ ທຸກ຺ກຏເມວາຕິ ອຍເມຕ຺ຖ ປິຓ຺ຑຕ຺ໂຖ. ເສສໍ ສຸວິຎ຺ເຎຍ຺ຍເມວ.

‘‘ຐປນກ຺ເຂຕ຺ຕໍ ປນ ຊານິຕພ຺ພ’’ນ຺ຕິ ວຕ຺ວາ ຕໍ ທສ຺ເສນ຺ໂຕ ‘‘ສຸຓາຕຸ ເມ’’ຕິອາທິມາຫ. ອນຸວິຊ຺ຊກສ຺ສ ອນຸວິຊ຺ຊນາຘິປ຺ປາເຍນ ວທນ຺ຕສ຺ສ ໂອກາສກມ຺ມໍ ນຕ຺ຖີຕິ ໂຍຊນາ. ຘມ຺ມກຖິກສ຺ສ ອໂນທິສ຺ສ ກມ຺ມໍ ກເຖນ຺ຕສ຺ສ ໂອກາສກມ຺ມໍ ນຕ຺ຖິ. ສເຈ ປນ ໂອທິສ຺ສ ກເຖຕິ, ອາປຕ຺ຕິ, ຕສ຺ມາ ຕໍ ທສ຺ເສຕ຺ວາ ຄນ຺ຕພ຺ພນ຺ຕິ ໂຍເຊຕພ຺ພໍ. ເສສໍ ສຸວິຎ຺ເຎຍ຺ຍເມວ.