ນິສີທນາທິກຖາ

ນິສີທນາທິກຖາຍໍ ‘‘ອນຸຊານາມິ, ຠິກ຺ຂເວ, ກາຍຄຸຕ຺ຕິຍາ ຈີວຣຄຸຕ຺ຕິຍາ ເສນາສນຄຸຕ຺ຕິຍາ ນິສີທນ’’ນ຺ຕິ (ມຫາວ. ໓໕໓) ວຈນໂຕ ກາຍາທີນໍ ອສຸຈິມຸຈ຺ຈນາທິໂຕ ໂຄປນຕ຺ຖາຍ ນິສີທນໍ ຘາເຣຕຸໍ ວຏ຺ຏຕິ. ຕສ຺ສ ວິຘານໍ ເຫຏ຺ຐາ ວຸຕ຺ຕເມວ. ‘‘ອນຸຊານາມິ, ຠິກ຺ຂເວ, ຍາວມຫນ຺ຕໍ ປຈ຺ຈຕ຺ຖຣຓໍ ອາກງ຺ຂຕິ, ຕາວມຫນ຺ຕໍ ປຈ຺ຈຕ຺ຖຣຓໍ ກາຕຸ’’ນ຺ຕິ ວຈນໂຕ ອຕິຂຸທ຺ທເກນ ນິສີທເນນ ເສນາສນສ຺ສ ອໂຄປນຕ຺ຕາ ມຫນ຺ຕມ຺ປິ ປຈ຺ຈຕ຺ຖຣຓໍ ກາຕຸໍ ວຏ຺ຏຕິ. ‘‘ອນຸຊານາມິ, ຠິກ຺ຂເວ, ຍສ຺ສ ກຓ຺ຑຸ ວາ ປີຬກາ ວາ ອສ຺ສາໂວ ວາ ຖຸລ຺ລກຈ຺ຉຸ ວາ ອາພາໂຘ, ກຓ຺ຑຸປຏິຈ຺ຉາທິ’’ນ຺ຕິ ວຈນໂຕ ອີທິເສສຸ ອາພາເຘສຸ ສນ຺ເຕສຸ ຈີວຣາທິຄຸຕ຺ຕຕ຺ຖາຍ ກຓ຺ຑຸປຏິຈ຺ຉາທິ ວຏ຺ຏຕິ. ຕຕ຺ຖ ປມາຓໍ ເຫຏ຺ຐາ ວຸຕ຺ຕເມວ. ‘‘ອນຸຊານາມິ, ຠິກ຺ຂເວ, ມຸຂປຸຎ຺ຉນໂຈຬ’’ນ຺ຕິ (ມຫາວ. ໓໕໕) ວຈນໂຕ ມຸຂໂສຘນຕ຺ຖາຍ ມຸຂປຸຎ຺ຉນໂຈຬໍ ວຏ຺ຏຕິ. ຕມ຺ປິ ເຫຏ຺ຐາ ວຸຕ຺ຕເມວ. ‘‘ອນຸຊານາມິ, ຠິກ຺ຂເວ, ປຣິກ຺ຂາຣໂຈຬກ’’ນ຺ຕິ ວຈນໂຕ ຕິຈີວເຣ ປຣິປຸຓ຺ເຓ ປຣິສ຺ສາວນຖວິກາທີຫິ ອຕ຺ເຖ ສຕິ ປຣິກ຺ຂາຣໂຈຬໍ ວຏ຺ຏຕິ. ‘‘ອນຸຊານາມິ, ຠິກ຺ຂເວ, ຕິຈີວຣໍ ອຘິຏ຺ຐາຕຸໍ ນ ວິກປ຺ເປຕຸໍ, ວສ຺ສິກສາຏິກໍ ວສ຺ສານໍ ຈາຕຸມາສໍ ອຘິຏ຺ຐາຕຸໍ ຕໂຕ ປຣໍ ວິກປ຺ເປຕຸໍ, ນິສີທນໍ ອຘິຏ຺ຐາຕຸໍ ນ ວິກປ຺ເປຕຸໍ, ປຈ຺ຈຕ຺ຖຣຓໍ ອຘິຏ຺ຐາຕຸໍ ນ ວິກປ຺ເປຕຸໍ, ກຓ຺ຑຸປຏິຈ຺ຉາທິໍ ຍາວ ອາພາຘາ ອຘິຏ຺ຐາຕຸໍ ຕໂຕ ປຣໍ ວິກປ຺ເປຕຸໍ, ມຸຂປຸຎ຺ຉນໂຈຬໍ ອຘິຏ຺ຐາຕຸໍ ນ ວິກປ຺ເປຕຸໍ, ປຣິກ຺ຂາຣໂຈຬໍ ອຘິຏ຺ຐາຕຸໍ ນ ວິກປ຺ເປຕຸ’’ນ຺ຕິ (ມຫາວ. ໓໕໘) ວຈນໂຕ ວຸຕ຺ຕນເຍນ ອຘິຏ຺ຐານຎ຺ຈ ວິກປ຺ປນາ ຈ ກາຕພ຺ພາ. ອຍເມຕ຺ຖ ສງ຺ເຂໂປ, ວິຕ຺ຖາໂຣ ປນ ເຫຏ຺ຐາ ວຸຕ຺ໂຕວ.