ອຏ຺ຐວຣກຖາ

ອຏ຺ຐວຣກຖາຍໍ ‘‘ອນຸຊານາມິ, ຠິກ຺ຂເວ, ວສ຺ສິກສາຏິກໍ ອາຄນ຺ຕຸກຠຕ຺ຕໍ ຄມິກຠຕ຺ຕໍ ຄິລານຠຕ຺ຕໍ ຄິລານຸປຏ຺ຐາກຠຕ຺ຕໍ ຄິລານເຠສຊ຺ຊໍ ຘຸວຍາຄຸໍ ຠິກ຺ຂຸນິສງ຺ຆສ຺ສ ອຸທກສາຏິກ’’ນ຺ຕິ ວຈນໂຕ ອິມານິ ອຏ຺ຐ ທານານິ ສມ຺ປຏິຈ຺ຉິຕຸໍ ວຏ຺ຏຕິ. ຕຕ຺ຖ ນິກ຺ຂິຕ຺ຕຈີວຣາ ຫຸຕ຺ວາ ກາຍໍ ໂອວສ຺ສນ຺ຕານໍ ຠິກ຺ຂູນໍ ນຄ຺ຄິຍໍ ອສຸຈິ ເຊຄຸຈ຺ຉໍ ປຏິກູລໍ ໂຫຕິ, ຕສ຺ມາ ວສ຺ສິກສາຏິກາ ອນຸຎ຺ຎາຕາ. ອາຄນ຺ຕຸໂກ ຠິກ຺ຂຸ ນ ວີຖິກຸສໂລ ໂຫຕິ, ນ ໂຄຈຣກຸສໂລ, ກິລນ຺ໂຕ ປິຓ຺ຑາຍ ຈຣຕິ, ຕສ຺ມາ ອາຄນ຺ຕຸກຠຕ຺ຕໍ ອນຸຎ຺ຎາຕໍ, ຄມິໂກ ຠິກ຺ຂຸ ອຕ຺ຕໂນ ຠຕ຺ຕໍ ປຣິເຍສມາໂນ ສຕ຺ຖາ ວາ ວິຫາຍິສ຺ສຕິ, ຍຕ຺ຖ ວາ ວາສໍ ຄນ຺ຕຸກາໂມ ຠວິສ຺ສຕິ, ຕຕ຺ຖ ວິກາເລນ ອຸປຄຈ຺ຉິສ຺ສຕິ, ກິລນ຺ໂຕ ອທ຺ຘານໍ ຄມິສ຺ສຕິ, ຕສ຺ມາ ຄມິກຠຕ຺ຕໍ. ຄິລານສ຺ສ ຠິກ຺ຂຸໂນ ສປ຺ປາຍານິ ໂຠຊນານິ ອລຠນ຺ຕສ຺ສ ອາພາໂຘ ວາ ອຠິວຑ຺ຒິສ຺ສຕິ, ກາລກິຣິຍາ ວາ ຠວິສ຺ສຕິ, ຕສ຺ມາ ຄິລານຠຕ຺ຕໍ. ຄິລານຸປຏ຺ຐາໂກ ຠິກ຺ຂຸ ອຕ຺ຕໂນ ຠຕ຺ຕໍ ປຣິເຍສມາໂນ ຄິລານສ຺ສ ອຸສ຺ສູເຣ ຠຕ຺ຕໍ ນີຫຣິສ຺ສຕິ, ຕສ຺ມາ ຄິລານຸປຏ຺ຐາກຠຕ຺ຕໍ. ຄິລານສ຺ສ ຠິກ຺ຂຸໂນ ສປ຺ປາຍານິ ເຠສຊ຺ຊານິ ອລຠນ຺ຕສ຺ສ ອາພາໂຘ ວາ ອຠິວຑ຺ຒິສ຺ສຕິ, ກາລກິຣິຍາ ວາ ຠວິສ຺ສຕິ, ຕສ຺ມາ ຄິລານເຠສຊ຺ຊໍ. ຍສ຺ມາ ຠຄວຕາ ອນ຺ຘກວິນ຺ເທ ທສານິສໍເສ ສມ຺ປສ຺ສມາເນນ ຍາຄຸ ອນຸຎ຺ຎາຕາ, ຕສ຺ມາ ຘຸວຍາຄຸ. ຍສ຺ມາ ມາຕຸຄາມສ຺ສ ນຄ຺ຄິຍໍ ອສຸຈິ ເຊຄຸຈ຺ຉໍ ປຏິກູລໍ ໂຫຕິ, ຕສ຺ມາ ຠິກ຺ຂຸນິສງ຺ຆສ຺ສ ອຸທກສາຏິກາ ອນຸຎ຺ຎາຕາ.