ລສຸຓກຖາ

໔໙. ລສຸຓກຖາຍໍ ‘‘ລສຸຓໍ ນາມ ມາຄຘກ’’ນ຺ຕິ (ປາຈິ. ໗໙໕) ປາຬິຍໍ ອາຄຕໍ. ອຏ຺ຐກຖາຍໍ (ປາຈິ. ອຏ຺ຐ. ໗໙໕) ປນ ‘‘ມາຄຘກນ຺ຕິ ມຄເຘສຸ ຊາຕໍ. ມຄຘຣຏ຺ເຐ ຊາຕລສຸຓເມວ ຫິ ອິຘ ລສຸຓນ຺ຕິ ອຘິປ຺ເປຕໍ, ຕມ຺ປິ ຠຓ຺ຑິກລສຸຓເມວ, ນ ເອກທ຺ວິຕິມິຎ຺ຊກໍ. ກຸຣຸນ຺ທິຍໍ ປນ ‘ຊາຕິເທສໍ ອວຕ຺ວາ ‘ມາຄຘກໍ ນາມ ຠຓ຺ຑິກລສຸຓ’ນ຺ຕິ ວຸຕ຺ຕ’’ນ຺ຕິ ວຸຕ຺ຕໍ. ສເຈ ທ຺ເວ ຕໂຍ ຠຓ຺ຑິເກ ເອກໂຕເຍວ ສງ຺ຂຣິຕ຺ວາ ອຊ຺ໂຌຫຣຕິ, ເອກໍ ປາຈິຕ຺ຕິຍໍ. ຠິນ຺ທິຕ຺ວາ ເອເກກໍ ມິຎ຺ຊໍ ຂາທນ຺ຕິຍາ ປນ ປໂຍຄຄຓນາຍ ປາຈິຕ຺ຕິຍານິ, ອິທໍ ຠິກ຺ຂຸນີນໍ ວເສນ ປາຈິຕ຺ຕິຍໍ, ຠິກ຺ຂຸສ຺ສ ປນ ທຸກ຺ກຏໍ.

ປລຓ຺ຑຸກາທີນໍ ວຓ຺ເຓນ ວາ ມິຎ຺ຊາຍ ວາ ນານຕ຺ຕໍ ເວທິຕພ຺ພໍ. ວຓ຺ເຓນ ຕາວ ປລຓ຺ຑຸໂກ ນາມ ປຓ຺ຑຸວຓ຺ໂຓ ໂຫຕິ. ຠຎ຺ຊນໂກ ໂລຫິຕວຓ຺ໂຓ, ຫຣິຕໂກ ຫຣິຕວຓ຺ໂຓ, ມິຎ຺ຊາຍ ປນ ປລຓ຺ຑຸກສ຺ສ ເອກາ ມິຎ຺ຊາ ໂຫຕິ, ຠຎ຺ຊນກສ຺ສ ທ຺ເວ, ຫຣິຕກສ຺ສ ຕິສ຺ໂສ, ຈາປລສຸໂຓ ອມິຎ຺ຊໂກ. ອງ຺ກຸຣມຕ຺ຕເມວ ຫິ ຕສ຺ສ ໂຫຕິ. ມຫາປຈ຺ຈຣິຍາທີສຸ ປນ ‘‘ປລຓ຺ຑຸກສ຺ສ ຕີຓິ ມິຎ຺ຊານິ, ຠຎ຺ຊນກສ຺ສ ທ຺ເວ, ຫຣິຕກສ຺ສ ເອກ’’ນ຺ຕິ ວຸຕ຺ຕໍ. ເອເຕ ປລຓ຺ຑຸກາທໂຍ ສຠາເວເນວ ວຏ຺ຏນ຺ຕິ, ສູປສມ຺ປາກາທີສຸ ປນ ມາຄຘກມ຺ປິ ວຏ຺ຏຕິ. ຕຎ຺ຫິ ປຈ຺ຈມາເນສຸ ມຸຄ຺ຄສູປາທີສຸ ວາ ມຈ຺ຉມໍສວິກຕິຍາ ວາ ເຕລາທີສຸ ວາ ພທຣສາຬວາທີສຸ ວາ ອມ຺ພິລປາກາທີສຸ ວາ ອຸຕ຺ຕຣິຠງ຺ເຄ ວາ ຍຕ຺ຖ ກຕ຺ຖຈິ ອນ຺ຕມໂສ ຍາຄຸປຕ຺ເຕປິ ປກ຺ຂິປິຕຸໍ ວຏ຺ຏຕີຕິ ວຸຕ຺ຕໍ. ‘‘ສຠາເວເນວາຕິ ສູປສມ຺ປາກາທິໍ ວິນາວ. ພທຣສາຬວໍ ນາມ ພທຣຜລານິ ສຸກ຺ຂາເປຕ຺ວາ ຈຸຓ຺ເຓຕ຺ວາ ກຕ຺ຕພ຺ພາ ຂາທນີຍວິກຕີ’’ຕິ ສາຣຕ຺ຖທີປນິຍໍ (ສາຣຕ຺ຖ. ຏີ. ປາຈິຕ຺ຕິຍ ໓.໗໙໓-໗໙໗) ວຸຕ຺ຕໍ.