ນອກ຺ກມິຕພ຺ພາທິກຖາ

໕໐. ນອກ຺ກມິຕພ຺ພາທິກຖາຍໍ ‘‘ປຣິຠຓ຺ຑກຕຠູມິ ນາມ ສຓ຺ຫມຕ຺ຕິກາຫິ ກຕາ ກາຬວຓ຺ຓາທິຠູມິ. ເສນາສນໍ ມຎ຺ຈປີຐາທິກາເຍວ. ຕເຖວ ວຬຎ຺ເຊຕຸໍ ວຏ຺ຏຕີຕິ ອຎ຺ເຎຫິ ອາວາສິເກຫິ ຠິກ຺ຂູຫິ ປຣິຠຸຕ຺ຕນີຫາເຣນ ປຣິຠຸຎ຺ຊິຕຸໍ ວຏ຺ຏຕິ. ‘ເນວາສິກາ ປກຕິຍາ ອນຕ຺ຖຕາຍ ຠູມິຍາ ຐເປນ຺ຕິ ເຈ, ເຕສມ຺ປິ ອນາປຕ຺ຕິເຍວາ’ຕິ ຄຓ຺ຐິປເທສຸ ວຸຕ຺ຕໍ. ‘ທ຺ວາຣມ຺ປີ’ຕິອາທິນາ ວຸຕ຺ຕທ຺ວາຣວາຕປານາທໂຍ ອປຣິກມ຺ມກຕາປິ ນ ອປສ຺ສຍິຕພ຺ພາ. ໂລເມສູຕິ ໂລເມສຸ ຜຸສນ຺ເຕສູ’’ຕິ ສາຣຕ຺ຖທີປນິຍໍ (ສາຣຕ຺ຖ. ຏີ. ຈູຬວຄ຺ຄ ໓.໓໒໔) ວຸຕ຺ຕໍ. ວິມຕິວິໂນທນິຍມ຺ປິ (ວິ. ວິ. ຏີ. ຈູຬວຄ຺ຄ ໒.໓໒໔) ‘‘ປຣິຠຓ຺ຑກຕຠູມິ ວາຕິ ກາຬວຓ຺ຓາທິກຕສຓ຺ຫຠູມິ ວາ. ເສນາສນໍ ວາຕິ ມຎ຺ຈປີຐາທິ ວາ. ຕເຖວ ວຬຎ຺ເຊຕຸໍ ວຏ຺ຏຕີຕິ ອິມິນາ ເນວາສິເກຫິ ໂຘຕປາທາທີຫິ ວຬຎ຺ຊນຏ຺ຐາເນ ສຎ຺ຈິຈ຺ຈ ອໂຘຕປາທາທີຫິ ວຬຎ຺ຊນ຺ຕສ຺ເສວ ອາປຕ຺ຕິ ປຎ຺ຎຕ຺ຕາຕິ ທສ຺ເສຕິ, ‘ທ຺ວາຣມ຺ປີ’ຕິອາທິນາ ສາມຎ຺ຎໂຕ ວຸຕ຺ຕຕ຺ຕາ ທ຺ວາຣວາຕປານາທໂຍ ອປຣິກມ຺ມກຕາປິ ນ ອປສ຺ສຍິຕພ຺ພາ. ອຊານິຕ຺ວາ ອປສ຺ສຍນ຺ຕສ຺ສປິ ອິຘ ໂລມຄຓນາຍ ອາປຕ຺ຕີ’’ຕິ ວຸຕ຺ຕໍ. ວຊິຣພຸທ຺ຘິຏີກາຍໍ (ວຊິຣ. ຏີ. ຈູຬວຄ຺ຄ ໓໒໓-໓໒໔) ‘‘ເນວາສິກາ ປກຕິຍາ ອນຕ຺ຖຕາຍ ຠູມິຍາ ຐເປນ຺ຕິ ເຈ, ເຕສມ຺ປິ ອນາປຕ຺ຕິເຍວາຕິ ລິຂິຕໍ, ທ຺ວາຣວາຕປານາທໂຍ ອປຣິກມ຺ມກຕາປິ ນ ອປສ຺ສຍິຕພ຺ພາຕິ ລິຂິຕ’’ນ຺ຕິ ວຸຕ຺ຕໍ.