ຂິປິຕກຖາ

໔໘. ຂິປິຕກຖາຍໍ ຂິປີຍິຕ຺ຖາຕິ ຂິປິໂຕ. ຂິປິ ອພ຺ຍຕ຺ຕສທ຺ເທຕິ ຘາຕຸ. ຠາເວນຠາວລກ຺ຂຓຕ຺ຕາ ຕສ຺ມິໍ ຂິປິເຕຕິ ວິຠຕ຺ຍນ຺ຕໍ. ‘‘ຍສ຺ມິໍ ກິສ຺ມິຎ຺ຈິ ປຸຄ຺ຄເລ’’ຕິ ລກ຺ຂຓວນ຺ຕກຕ຺ຕາ ອຊ຺ຌາຫຣິຕພ຺ໂພ. ຊີວາຕິ ຊີວ ປາຓຘາຣເຓຕິ ຘາຕຸ, ວິຠຕ຺ຕິໂລໂປ. ຍສ຺ມິໍ ກິສ຺ມິຎ຺ຈິ ປຸຄ຺ຄເລ ຂິປິເຕ ຠິກ຺ຂຸນາ ‘‘ຊີວາ’’ຕິ ວຈນໍ ນ ວຕ຺ຕພ຺ພໍ, ຠິກ຺ຂຸສ຺ມິໍ ຂິປິເຕ ຄິຫິນາ ‘‘ຊີວຖ ຠນ຺ເຕ’’ຕິ ວຸຈ຺ຈມາເນ ສຕິ ‘‘ຈິຣໍ ຊີວາ’’ຕິ ຠິກ຺ຂຸນາ ວຕ຺ຕຸໍ ວຏ຺ຏຕີຕິ ໂຍຊນາ. ‘‘ວຸຈ຺ຈມາເນ’’ຕິ ເອຕ຺ຖ ປນ ລກ຺ຂຓສ຺ສ ກມ຺ມວາຈກຕ຺ຕາ ເຕນ ສມານາຘິກຣຓໍ ກມ຺ມຠູຕໍ ‘‘ຠິກ຺ຂຸສ຺ມິ’’ນ຺ຕິ ລກ຺ຂຓວນ຺ຕກມ຺ມໍ ອຊ຺ຌາຫຣິຕພ຺ພໍ ຍຖາ ກິໍ ‘‘ໂຄສຸ ທຸຍ຺ຫມານາສຸ ປຸຣິໂສ ອາຄໂຕ’’ຕິ. ອປເຣ ປນ ອາຈຣິຍາ ອີທິເສສຸ ຐາເນສຸ ‘‘ສນ຺ເຕສູ’’ຕິ ປທໍ ອຊ຺ຌາຫຣິຕ຺ວາ ອິທເມວ ລກ຺ຂຓປທໍ, ‘‘ໂຄສຸ ທຸຍ຺ຫມານາສູ’’ຕິ ປທທ຺ວຍໍ ປນ ‘‘ສນ຺ເຕສູ’’ຕິ ເອຕ຺ຖ ປກຕິວິກຕິວເສນ ກຕ຺ຕາ ເອວາຕິ ວທນ຺ຕິ, ວີມໍສິຕ຺ວາ ຄເຫຕພ຺ພໍ.