ອານິສໍສກຖາ

໖໘. ອານິສໍສກຖາຍໍ ວິນຍໍ ຘາເຣຕີຕິ ວິນຍຘໂຣ, ສິກ຺ຂນວາຈນມນສິກາຣວິນິຈ຺ຉຍນຕທນຸໂລມກຣຓາທິນາ ວິນຍປຣິຍຕ຺ຕິກຸສໂລ ຠິກ຺ຂຸ. ວິນຍປຣິຍຕ຺ຕິມູລໍ ເອເຕສນ຺ຕິ ວິນຍປຣິຍຕ຺ຕິມູລກາ. ເກ ເຕ? ປຎ຺ຈານິສໍສາ. ວິນຍປຣິຍຕ຺ຕິເຍວ ມູລໍ ກາຣຓໍ ກຕ຺ວາ ລຠິຕພ຺ພອານິສໍສາ, ນ ອຎ຺ຎປຣິຍຕ຺ຕິໍ ວາ ປຏິປຕ຺ຕິອາທໂຍ ວາ ມູລໍ ກຕ຺ວາຕິ ອຕ຺ໂຖ. ອຖ ວາ ປຣິຍາປຸຓນໍ ປຣິຍຕ຺ຕິ, ວິນຍສ຺ສ ປຣິຍຕ຺ຕິ ວິນຍປຣິຍຕ຺ຕິ, ສາ ມູລໍ ເອເຕສນ຺ຕິ ວິນຍປຣິຍຕ຺ຕິມູລກາ, ວິນຍປຣິຍາປຸຓນເຫຕຸຠວາ ອານິສໍສາຕິ ອຕ຺ໂຖ. ‘‘ກຕເມ’’ຕິອາທິນາ ເຕສໍ ປຎ຺ຈານິສໍສາທີນໍ ສຣູປໍ ປຸຈ຺ຉິຕ຺ວາ ‘‘ອຕ຺ຕໂນ’’ຕິອາທິນາ ວິສ຺ສຊ຺ເຊຕ຺ວາ ຕໍ ວຈນໍ ປາຬິຍາ ສມຕ຺ເຖຕຸໍ ‘‘ວຸຕ຺ຕຎ຺ເຫຕ’’ນ຺ຕິອາທິມາຫ.

ເອວໍ ປຎ຺ຈານິສໍສານໍ ສຣູປໍ ທສ຺ເສຕ຺ວາ ອິທານິ ເຕເຍວ ວິຕ຺ຖາຣໂຕ ທສ຺ເສຕຸໍ ‘‘ກຖມສ຺ສາ’’ຕິອາທິນາ ປຸຈ຺ຉິຕ຺ວາ ‘‘ອິເຘກຈ຺ໂຈ’’ຕິອາທິນາ ວິສ຺ສຊ຺ເຊຕິ. ຕຕ຺ຖ ອຕ຺ຕໂນ ສີລກ຺ຂນ຺ຘສຸຄຸຕ຺ຕຠາໂວ ນາມ ອາປຕ຺ຕິອນາປຊ຺ຊນຠາເວເນວ ໂຫຕິ, ໂນ ອຎ຺ຎຖາຕິ ອາປຕ຺ຕິອາປຊ຺ຊນກາຣຓໍ ທສ຺ເສຕ຺ວາ ຕທຠາເວນ ອນາປຊ຺ຊນໍ ທສ຺ເສຕຸໍ ‘‘ອາປຕ຺ຕິໍ ອາປຊ຺ຊນ຺ໂຕ ຉຫາກາເຣຫິ ອາປຊ຺ຊຕີ’’ຕິອາທິມາຫ. ຕຕ຺ຖ –

‘‘ສຎ຺ຈິຈ຺ຈ ອາປຕ຺ຕິໍ ອາປຊ຺ຊຕິ;

ອາປຕ຺ຕິໍ ປຣິຄູຫຕິ;

ອຄຕິຄມນຎ຺ຈ ຄຈ຺ຉຕິ;

ເອທິໂສ ວຸຈ຺ຈຕິ ອລຊ຺ຊິປຸຄ຺ຄໂລ’’ຕິ. (ປຣິ. ໓໕໙) –

ວຸຕ຺ເຕນ ອລຊ຺ຊີລກ຺ຂເຓນ ນ ລຊ຺ຊຕິ ນ ຫິຣີຍຕີຕິ ອລຊ຺ຊີ, ຕສ຺ສ ຠາໂວ ອລຊ຺ຊິຕາ. ນຕ຺ຖິ ຎາຓໍ ເອຕສ຺ສາຕິ ອຎ຺ຎາຓໍ, ຕສ຺ສ ຠາໂວ ອຎ຺ຎາຓຕາ. ກຸກຕສ຺ສ ຠາໂວ ກຸກ຺ກຸຈ຺ຈໍ, ເຕນ ປກໂຕ ກຸກ຺ກຸຈ຺ຈປກໂຕ, ຕສ຺ສ ຠາໂວ ກຸກ຺ກຸຈ຺ຈປກຕຕາ. ກປ຺ປຕີຕິ ກປ຺ປິຍໍ, ນ ກປ຺ປິຍໍ ອກປ຺ປິຍໍ, ຕສ຺ມິໍ ອກປ຺ປິເຍ, ກປ຺ປິຍໍ ອິຕິ ສຎ຺ຎາ ຍສ຺ສ ໂສ ກປ຺ປິຍສຎ຺ຎີ, ຕສ຺ສ ຠາໂວ ກປ຺ປິຍສຎ຺ຎິຕາ. ອິຕຣໍ ຕປ຺ປຏິປກ຺ຂໂຕ ກາຕພ຺ພໍ, ອິເມສຸ ປຎ຺ຈສຸ ປເທສຸ ຍກາຣໂລໂປ, ຕສ຺ມາ ‘‘ອລຊ຺ຊິຕາຍ ອາປຕ຺ຕິໍ ອາປຊ຺ຊຕີ’’ຕິອາທິນາ ໂຍເຊຕພ຺ພານິ. ເຫຕ຺ວຕ຺ເຖ ເຈຕໍ ນິສ຺ສກ຺ກວຈນໍ. ສຣຕີຕິ ສຕິ, ສມຸສ຺ສນໍ ສມ຺ໂມໂສ. ສຕິຍາ ສມ຺ໂມໂສ ສຕິສມ຺ໂມໂສ, ຕສ຺ມາ ສຕິສມ຺ໂມສາ. ເຫຕ຺ວຕ຺ເຖ ເຈຕໍ ກຣຓວຈນໍ. ອິທານິ ຕານິ ກາຣຓານິ ວິຕ຺ຖາຣໂຕ ທສ຺ເສຕຸໍ ‘‘ກຖ’’ນ຺ຕ຺ຍາທິມາຫ. ຕໍ ນຍານຸໂຍເຄນ ວິຎ຺ເຎຍ຺ຍເມວ.

ອຣິຏ຺ໂຐ ອິຕິ ຠິກ຺ຂຸ ອຣິຏ຺ຐຠິກ຺ຂຸ, ກຓ຺ຏໂກ ອິຕິ ສາມເຓໂຣ ກຓ຺ຏກສາມເຓໂຣ, ເວສາລິຍາ ຊາຕາ ເວສາລິກາ, ວຊ຺ຊີນໍ ປຸຕ຺ຕາ ວຊ຺ຊິປຸຕ຺ຕາ, ເວສາລິກາ ຈ ເຕ ວຊ຺ຊິປຸຕ຺ຕາ ຈາຕິ ເວສາລິກວຊ຺ຊິປຸຕ຺ຕາ, ອຣິຏ຺ຐຠິກ຺ຂຸ ຈ ກຓ຺ຏກສາມເຓໂຣ ຈ ເວສາລິກວຊ຺ຊິປຸຕ຺ຕາ ຈ ອຣິຏ຺ຐຠິກ຺ຂຸກຓ຺ຏກສາມເຓຣເວສາລິກວຊ຺ຊິປຸຕ຺ຕກາ. ປຣູປຫາໂຣ ຈ ອຎ຺ຎາຓຎ຺ຈ ກງ຺ຂາວິຕຣຓຎ຺ຈ ປຣູປຫາຣອຎ຺ຎາຓກງ຺ຂາວິຕຣຓາ. ເກ ເຕ? ວາທາ. ເຕ ອາທິ ເຍສໍ ເຕຕິ ປຣູປຫາຣອຎ຺ຎາຓກງ຺ຂາວິຕຣຓາທໂຍ. ວທນ຺ຕິ ເອເຕຫີຕິ ວາທາ, ປຣູປຫາຣອຎ຺ຎາຓກງ຺ຂາວິຕຣຓາທໂຍ ວາທາ ເອເຕສນ຺ຕິ ປຣູ…ເປ… ວາທາ. ເກ ເຕ? ມິຈ຺ຉາວາທິໂນ. ອຣິຏ຺ຐ…ເປ… ປຸຕ຺ຕາ ຈ ປຣູປຫາຣ…ເປ… ວາທາ ຈ ມຫາສງ຺ຆິກາທໂຍ ຈ ສາສນປຈ຺ຈຕ຺ຖິກາ ນາມາຕິ ສມຸຈ຺ຈຍທ຺ວນ຺ທວເສນ ໂຍຊນາ ກາຕພ຺ພາ. ເສສໍ ສຸວິຎ຺ເຎຍ຺ຍເມວ.

ອານິສໍສກຖາ ນິຏ຺ຐິຕາ.

ອິຕິ ວິນຍສງ຺ຄຫສໍວຓ຺ຓນາຠູເຕ ວິນຍາລງ຺ກາເຣ

ປກິຓ຺ຓກວິນິຈ຺ຉຍກຖາລງ຺ກາໂຣ ນາມ

ຈຕຸຕ຺ຕິໍສຕິໂມ ປຣິຈ຺ເຉໂທ.