ນິຄມນກຖາວຓ຺ຓນາ

ນິຄມຄາຖາສຸ ປຐມຄາຖາຍໍ ສທ຺ຘມ຺ມຏ຺ຐິຕິກາເມນ ສາສນຸຊ຺ໂຊຕກາຣິນາ ປຣກ຺ກມພາຫຸນາ ນຣິນ຺ເທນ ອຊ຺ເຌສິໂຕ ໂສ ອຫໍ ວິນຍສງ຺ຄຫໍ ອກາສິນ຺ຕິ ໂຍຊນາ.

ທຸຕິຍຕຕິຍຄາຖາຍໍ ເຕເນວ ປຣກ຺ກມພາຫຸນຣິນ຺ເທເນວ ກາຣິເຕ ຣມ຺ເມ ຣມຓີເຍ ປາສາທສຕມຓ຺ຑິເຕ ປາສາທານໍ ສເຕນ ປຏິມຓ຺ຑິເຕ ນານາທຸມຄຓາກິຓ຺ເຓ ຠາວນາຠິຣຕາລເຍ ຠາວນາຍ ອຠິຣຕານໍ ຠິກ຺ຂູນໍ ອາລຍຠູເຕ ສີຕລູທກສມ຺ປນ຺ເນ ເຊຕວເນ ເຊຕວນນາມເກ ວິຫາເຣ ວສໍ ວສນ຺ໂຕ ຫຸຕ຺ວາ, ອຖ ວາ ວສໍ ວສນ຺ໂຕ ໂສຫໍ ໂສ ອຫໍ ໂຍຄີນໍ ຫິຕໍ ຫິຕຠູຕໍ ສາຣໍ ສາຣວນ຺ຕໍ ອິມໍ ອີທິສໍ ວິນຍສງ຺ຄຫໍ ອກາສິນ຺ຕິ ໂຍຊນາ.

ເສສຄາຖາສຸ ອິມິນາ ຄນ຺ຖກຣເຓນ ຍໍ ປຸຎ຺ຎໍ ມຍ຺ຫໍ ສິທ຺ຘໍ, ອຎ຺ຎໍ ອິໂຕ ຄນ຺ຖກຣຓໂຕ ອຎ຺ຎຠູຕໍ ຍໍ ປຸຎ຺ຎໍ ມຍາ ປສຸຕໍ ໂຫຕິ, ເອເຕນ ປຸຎ຺ຎກມ຺ເມນ ທຸຕິເຍ ອຕ຺ຕສມ຺ຠເວ ຕາວຕິໍເສ ປໂມເທນ຺ໂຕ ສີລາຈາຣຄຸເຓ ຣໂຕ ປຎ຺ຈກາເມສຸ ອລຄ຺ໂຄ ເທວປຸຕ຺ໂຕ ຫຸຕ຺ວາ ປຐມໍ ປຐມຠູຕໍ ຜລໍ ໂສຕາປຕ຺ຕິຜລໍ ປຕ຺ວານ ອນ຺ຕິເມ ອຕ຺ຕຠາວມ຺ຫິ ໂລກຄ຺ຄປຸຄ຺ຄລໍ ນາຖໍ ນາຖຠູຕໍ ສພ຺ພສຕ຺ຕຫິເຕ ຣຕໍ ເມຕ຺ເຕຍ຺ຍໍ ເມຕ຺ເຕຍ຺ຍນາມກໍ ມຸນິປຸງ຺ຄວໍ ມຸນິເສຏ຺ຐໍ ທິສ຺ວານ ຕສ຺ສ ຘີຣສ຺ສ ສທ຺ຘມ຺ມເທສນໍ ສຸຕ຺ວາ ອຄ຺ຄໍ ຜລໍ ອຣຫຕ຺ຕຜລໍ ອຘິຄນ຺ຕ຺ວາ ລຠິຕ຺ວາ ຊິນສາສນໍ ໂສເຠຍ຺ຍໍ ໂສຠາເປຍ຺ຍນ຺ຕິ ອຍໍ ປາກຏໂຍຊນາ.

ເອຕິສ຺ສາຍ ປນ ໂຍຊນາຍ ສຕິ ອາຈຣິຍວຣສ຺ສ ວຈນໍ ນ ສມ຺ປຏິຈ຺ຉນ຺ຕິ ປຓ຺ຑິຕາ. ກຖໍ? ເອຕ຺ຖ ຫິ ອິໂຕ ທຸຕິຍຠເວ ຕາວຕິໍສຠວເນ ເທວປຸຕ຺ໂຕ ຫຸຕ຺ວາ ໂສຕາປຕ຺ຕິຜລໍ ປຕ຺ວາ ອນ຺ຕິມຠເວ ເມຕ຺ເຕຍ຺ຍສ຺ສ ຠຄວໂຕ ຘມ຺ມເທສນໍ ສຸຕ຺ວາ ອຣຫຕ຺ຕຜລໍ ລເຠຍ຺ຍນ຺ຕິ ອາຈຣິຍສ຺ສ ປຕ຺ຖນາ, ສາ ອຍຸຕ຺ຕຣູປາ ໂຫຕິ. ໂສຕາປນ຺ນສ຺ສ ຫິ ສຕ຺ຕຠວໂຕ ອຸທ຺ຘໍ ປຏິສນ຺ຘິ ນຕ຺ຖິ, ຕາວຕິໍສານຎ຺ຈ ເທວານໍ ຠວສເຕນປິ ຠວສຫສ຺ເສນປິ ຠວສຕສຫສ຺ເສນປິ ເມຕ຺ເຕຍ຺ຍສ຺ສ ຠຄວໂຕ ອຸປ຺ປຊ຺ຊນກາໂລ ອປ຺ປຕ຺ຕພ຺ໂພ ໂຫຕິ. ອຖາປິ ວເທຍ຺ຍ ‘‘ອນ຺ຕຣາ ພ຺ຣຫ຺ມໂລເກ ນິພ຺ພຕ຺ຕິຕ຺ວາ ເມຕ຺ເຕຍ຺ຍສ຺ສ ຠຄວໂຕ ກາເລ ມນຸສ຺ໂສ ຠເວຍ຺ຍາ’’ຕິ, ເອວມ຺ປິ ນ ຍຸຊ຺ຊຕິ. ນ ຫິ ພ຺ຣຫ຺ມໂລກຄຕານໍ ອຣິຍານໍ ປຸນ ກາມຠວູປປຕ຺ຕິ ອຕ຺ຖິ. ວຸຕ຺ຕຎ຺ຫິ ອຠິຘມ຺ເມ ຍມກປ຺ປກຣເຓ (ຍມ. ໒.ອນຸສຍຍມກ. ໓໑໒) ‘‘ຣູປຘາຕຸຍາ ຈຸຕສ຺ສ ກາມຘາຕຸໍ ອຸປປຊ຺ຊນ຺ຕສ຺ສ ສຕ຺ເຕວ ອນຸສຍາ ອນຸເສນ຺ຕີ’’ຕິ. ອຖາປິ ວເທຍ຺ຍ ‘‘ພ຺ຣຫ຺ມໂລເກເຍວ ຐຕ຺ວາ ອຄ຺ຄຜລໍ ລເຠຍ຺ຍາ’’ຕິ, ຕຖາ ຈ ອາຈຣິຍສ຺ສ ວຈເນ ນ ທິສ຺ສຕິ, ‘‘ໂສເຠຍ຺ຍໍ ຊິນສາສນ’’ນ຺ຕິ ວຸຕ຺ຕຕ຺ຕາ ຠິກ຺ຂຸຠູຕຕ຺ຕເມວ ທິສ຺ສຕິ. ນ ຫິ ຠິກ຺ຂຸຠູໂຕ ສາສນໍ ໂສຠາເປຕຸໍ ສກ຺ໂກຕິ. ອຠິຘມ຺ມຕ຺ຖວິຠາວນິຍຎ຺ຈ –

‘‘ໂຊຕຍນ຺ຕໍ ຕທາ ຕສ຺ສ, ສາສນໍ ສຸທ຺ຘມານສໍ;

ປສ຺ເສຍ຺ຍໍ ສກ຺ກເຣຍ຺ຍຎ຺ຈ, ຄຣຸໍ ເມ ສາຣິສມ຺ຠວ’’ນ຺ຕິ. –

ຠິກ຺ຂຸຠູຕເມວ ວຸຕ຺ຕໍ. ອຖາປິ ວເທຍ຺ຍ ‘‘ອນ຺ຕຣາ ທີຆາຍຸໂກ ຠຸມ຺ມເທໂວ ຫຸຕ຺ວາ ຕທາ ມນຸສ຺ໂສ ຠເວຍ຺ຍາ’’ຕິ, ເອວມ຺ປິ ເອກສ຺ສ ພຸທ຺ຘສ຺ສ ສາວກຠູໂຕ ອຣິຍປຸຄ຺ຄໂລ ປຸນ ອຎ຺ຎສ຺ສ ພຸທ຺ຘສ຺ສ ສາວໂກ ນ ຠເວຍ຺ຍາຕິ, ອາຈຣິໂຍ ປນ ສພ຺ພປຣິຍຕ຺ຕິຘໂຣ ອເນກຄນ຺ຖກາຣໂກ ອເນເກສໍ ຄນ຺ຖກາຣການໍ ເຖຣານໍ ອາຈຣິຍປາຈຣິຍຠູໂຕ, ເຕນ ນ ເກວລໍ ອິເຘວ ອິມາ ຄາຖາໂຍ ຐປິຕາ, ອຖ ໂຂ ສາຣຕ຺ຖທີປນີນາມິກາຍ ວິນຍຏີກາຍ ອວສາເນ ຈ ຐປິຕາ, ຕສ຺ມາ ຠວິຕພ຺ພເມຕ຺ຖ ກາຣເຓນາຕິ ວີມໍສິຕພ຺ພເມຕໍ.

ອຖ ວາ ອິມິນາ…ເປ… ເທວປຸຕ຺ໂຕ ຫຸຕ຺ວາ ປຐມໍ ຕາວ ຜລໍ ຍຖາວຸຕ຺ຕໍ ຕາວຕິໍເສ ປໂມທນສີລາຈາຣຄຸເຓ ຣຕໍ ປຎ຺ຈກາເມສຸ ອລຄ຺ຄຠາວສງ຺ຂາຕໍ ອານິສໍສໍ ປຕ຺ວານ ອນ຺ຕິເມ ອຕ຺ຕຠາວມ຺ຫິ…ເປ… ໂສເຠຍ຺ຍນ຺ຕິ ໂຍຊນາ. ອຖ ວາ ອິມິນາ…ເປ… ປຎ຺ຈກາເມສຸ ອລຄ຺ໂຄ ຫຸຕ຺ວາ ອນ຺ຕິເມ ອຕ຺ຕຠາວມ຺ຫິ…ເປ… ສທ຺ຘມ຺ມເທສນໍ ສຸຕ຺ວາ ປຐມໍ ຜລໍ ໂສຕາປຕ຺ຕິຜລໍ ປຕ຺ວາ ຕໂຕ ປຣໍ ອຄ຺ຄຜລໍ ອຣຫຕ຺ຕຜລໍ ອຘິຄນ຺ຕ຺ວາ ຊິນສາສນໍ ໂສເຠຍ຺ຍນ຺ຕິ ໂຍຊນາ. ຍຖາ ອມ຺ຫາກໍ ຠຄວໂຕ ຘມ຺ມຈກ຺ກປ຺ປວຕ຺ຕນສຸຕ຺ຕນ຺ຕຘມ຺ມເທສນໍ ສຸຕ຺ວາ ອຎ຺ຎາຕໂກຓ຺ຑຎ຺ຎຕ຺ເຖໂຣ ໂສຕາປຕ຺ຕິຜລໍ ປຕ຺ວາ ປຈ຺ຉາ ອຣຫຕ຺ຕຜລໍ ອຘິຄນ຺ຕ຺ວາ ຊິນສາສນໍ ໂສເຠສິ, ເອວນ຺ຕິ ອຕ຺ໂຖ. ອິໂຕ ອຎ຺ຎານິປິ ນຍານິ ຍຖາ ເຖຣສ຺ສ ວຈນານຸກູລານິ, ຕານິ ປຓ຺ຑິເຕຫິ ຈິນ຺ເຕຕພ຺ພານິ.

ນິຄມນກຖາວຓ຺ຓນາ ນິຏ຺ຐິຕາ.