ຈຕຸມຫາປເທສກຖາ

໖໗. ຍໍ ຠິກ຺ຂເວຕິອາທິ ມຫາປເທສກຖາ ນາມ. ຕຕ຺ຖ ມຫນ຺ເຕ ອຕ຺ເຖ ອຸປທິສ຺ສຕິ ເອເຕຫີຕິ ມຫາປເທສາ, ມຫນ຺ຕາ ວາ ອຕ຺ຖາ ປທິສ຺ສນ຺ຕິ ປຎ຺ຎາຍນ຺ຕິ ເອຕ຺ຖາຕິ ມຫາປເທສາ, ມຫນ຺ຕານໍ ວາ ອຕ຺ຖານໍ ປເທໂສ ປວຕ຺ຕິເທໂສຕິ ມຫາປເທສາ. ເກ ເຕ? ອິເມເຍວ ຈຕ຺ຕາໂຣ ປາຐາ, ອຕ຺ຖາ ວາ. ເຕນ ວຸຕ຺ຕໍ ‘‘ອິເມ ຈຕ຺ຕາໂຣ ມຫາປເທເສ’’ຕິອາທິ. ຕຕ຺ຖ ຘມ຺ມສງ຺ຄາຫກຕ຺ເຖຣາຕິ ມຫາກສ຺ສປາທໂຍ. ສຸຕ຺ຕໍ ຄເຫຕ຺ວາຕິ ‘‘ຐເປຕ຺ວາ ຘຎ຺ຎຜລຣສ’’ນ຺ຕິອາທິກໍ ສຸຕ຺ຕໍ ຄເຫຕ຺ວາ ອຸປຘາເຣນ຺ໂຕ. ສຕ຺ຕ ຘຎ຺ຎານີຕິ –

‘‘ສາລິ ວີຫິ ຈ ກຸທ຺ຣູໂສ, ໂຄຘຸໂມ ວຣໂກ ຍໂວ;

ກງ຺ຄູຕິ ສຕ຺ຕ ຘຎ຺ຎານິ, ນີວາຣາທີ ຕຸ ຕພ຺ຠິທາ’’ຕິ –.

ວຸຕ຺ຕານິ ສຕ຺ຕ ຘຎ຺ຎານິ. ສພ຺ພໍ ອປຣຓ຺ຓນ຺ຕິ ມຸຄ຺ຄມາສາທໂຍ. ອຏ຺ຐ ປານານີຕິ ອມ຺ພປານໍ ຊມ຺ພຸປານໍ ໂຈຈປານໍ ໂມຈປານໍ ສາລຸກປານໍ ມຸທ຺ທິກປານໍ ມຘຸກປານໍ ຜາຣຸສກປານຎ຺ຈ.

ອິມິນາ ນເຍນາຕິ ສຸຕ຺ຕານຸໂລມນເຍນ. ວຸຕ຺ຕຎ຺ເຫຕໍ ອຏ຺ຐກຖາຍໍ ‘‘ສຸຕ຺ຕານຸໂລມໍ ນາມ ຈຕ຺ຕາໂຣ ມຫາປເທສາ’’ຕິ. ປາຬິຎ຺ຈ ອຏ຺ຐກຖຎ຺ຈ ອນເປກ຺ຂິຕ຺ວາຕິ ປາຬິຍໍ ນີຕຕ຺ຖໂຕ ອາຄຕເມວ ອຄ຺ຄເຫຕ຺ວາ. ອຎ຺ຎານິປີຕິ ຕໂຕ ອຎ຺ຎານິປິ. ເອເຕນ ມຫາປເທສາ ນາມ ນ ເກວລໍ ຍຖາວຸຕ຺ຕາ ເອວ, ອຖ ໂຂ ອເນການິ ນານປ຺ປກາຣານິ ວິນຍຘຣສ຺ສ ຎາຓານຸຠາວປ຺ປກາສິຕານີຕິ ທສ຺ເສຕິ.