ຍາຄຸກຖາ

ຍາຄຸກຖາຍໍ ‘‘ທສຍິເມ, ພ຺ຣາຫ຺ມຓ, ອານິສໍສາ ຍາຄຸຍາ. ກຕເມ ທສ, ຍາຄຸໍ ເທນ຺ໂຕ ອາຍຸໍ ເທຕິ, ວຓ຺ຓໍ ເທຕິ, ສຸຂໍ ເທຕິ, ພລໍ ເທຕິ, ປຏິຠານໍ ເທຕິ, ຍາຄຸປີຕາ ຂຸທໍ ປຏິຫນຕິ, ປິປາສໍ ວິເນຕິ, ວາຕໍ ອນຸໂລເມຕິ, ວຕ຺ຖິໍ ໂສເຘຕິ, ອາມາວເສສໍ ປາເຈຕິ. ອິເມ ໂຂ, ພ຺ຣາຫ຺ມຓ, ທສານິສໍສາ ຍາຄຸຍາຕິ.

‘ໂຍ ສຎ຺ຎຕານໍ ປຣທຕ຺ຕໂຠຊິນໍ;

ກາເລນ ສກ຺ກຈ຺ຈ ທທາຕິ ຍາຄຸໍ;

ທສສ຺ສ ຐານານິ ອນຸປ຺ປເວຈ຺ຉຕິ;

ອາຍຸຎ຺ຈ ວຓ຺ຓຎ຺ຈ ສຸຂໍ ພລຎ຺ຈ.

‘ປຏິຠານມສ຺ສ ອຸປຊາຍເຕ ຕໂຕ;

ຂຸທ຺ທໍ ປິປາສຎ຺ຈ ພ຺ຍປເນຕິ ວາຕໍ;

ໂສເຘຕິ ວຕ຺ຖິໍ ປຣິຓາເມຕິ ຠຕ຺ຕໍ;

ເຠສຊ຺ຊເມຕໍ ສຸຄເຕນ ວຓ຺ຓິຕໍ.

‘ຕສ຺ມາ ຫິ ຍາຄຸໍ ອລເມວ ທາຕຸໍ;

ນິຈ຺ຈໍ ມນຸສ຺ເສນ ສຸຂຕ຺ຖິເກນ;

ທິພ຺ພານິ ວາ ປຕ຺ຖຍຕາ ສຸຂານິ;

ມານຸສ຺ສໂສຠຄ຺ຍຕມິຈ຺ຉຕາ ວາ’ຕິ.

ອຖ ໂຂ ຠຄວາ ຕໍ ພ຺ຣາຫ຺ມຓໍ ອິມາຫິ ຄາຖາຫິ ອນຸໂມທິຕ຺ວາ ອຸຏ຺ຐາຍາສນາ ປກ຺ກາມິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ອນຸຊານາມິ, ຠິກ຺ຂເວ, ຍາຄຸຎ຺ຈ ມຘຸໂຄຬກຎ຺ຈາ’’ຕິ (ມຫາວ. ໒໘໒) ວຈນໂຕ ຍາຄຸຎ຺ຈ ມຘຸໂຄຬກຎ຺ຈ ສມ຺ປຏິຈ຺ຉິຕຸໍ ວຏ຺ຏຕິ. ອນຸໂມທນາຄາຖາຍ ‘‘ປຕ຺ຖຍຕໍ ອິຈ຺ຉຕ’’ນ຺ຕິ ປທານໍ ‘‘ອລເມວ ທາຕຸ’’ນ຺ຕິ ອິມິນາ ສມ຺ພນ຺ໂຘ. ສເຈ ປນ ‘‘ປຕ຺ຖຍຕາ ອິຈ຺ຉຕາ’’ຕິ ປາໂຐ ອຕ຺ຖິ, ໂສເຍວ ຄເຫຕພ຺ໂພ. ‘‘ນ, ຠິກ຺ຂເວ, ອຎ຺ຎຕ຺ຣ ນິມນ຺ຕິເຕນ ອຎ຺ຎສ຺ສ ໂຠຊ຺ຊຍາຄຸ ປຣິຠຸຎ຺ຊິຕພ຺ພາ, ໂຍ ປຣິຠຸຎ຺ເຊຍ຺ຍ, ຍຖາຘມ຺ໂມ ກາເຣຕພ຺ໂພ’’ຕິ (ມຫາວ. ໒໘໓) ວຈນໂຕ ຕຖາ ຠຸຎ຺ຊນ຺ຕສ຺ສ ປຣມ຺ປຣໂຠຊນສິກ຺ຂາປເທນ ອາປຕ຺ຕິ ໂຫຕິ. ໂຠຊ຺ຊຍາຄູຕິ ຍາ ປວາຣຓໍ ຊເນຕິ. ຍຖາຘມ຺ໂມ ກາເຣຕພ຺ໂພຕິ ປຣມ຺ປຣໂຠຊເນນ ກາເຣຕພ຺ໂພ.