ອຸປາລິປຎ຺ຈກໍ

ນປ຺ປຏິປ຺ປສ຺ສມ຺ຠນວຄ຺ຄວຓ຺ຓນາ

໔໒໑. ສມຄ຺ເຄຫິ ກຣຓີຍານີຕິ ວິວາທາຘິກຣເຓຫິ ປຸພ຺ເພ ອສມຄ຺ຄາ ຫຸຕ຺ວາ ປຈ຺ຉາ ສາມຄ຺ຄິໍ ອຸປຄເຕຫິ ກຕ຺ຕພ຺ພານິ. ກິໍ ປນ ອສຎ຺ຎຕມິສ຺ສປຣິສາຍ ສທ຺ຘິໍ ລຊ຺ຊິໂນ ສາມຄ຺ຄິໍ ກໂຣນ຺ຕີຕິ ອາຫ ‘‘ອຸໂປສຖປວາຣຓາທີສຸ ຫີ’’ຕິອາທິ. ຕຕ຺ຖ ຐິຕາສູຕິ ອຸໂປສຖປວາຣຓາສຸ ອປ຺ປວຕ຺ຕີສຸ. ອຸປຕ຺ຖມ຺ໂຠ ນ ທາຕພ຺ໂພຕິ ອຸປຣູປຣິ ອປ຺ປວຕ຺ຕນຕ຺ຖາຍ ມຍມ຺ປິ ອຸໂປສຖໍ ນ ກຣິສ຺ສາມາຕິອາທິນາ ກລຫສ຺ສ ອຸປຕ຺ຖມ຺ໂຠ ນ ທາຕພ຺ໂພ, ຘມ຺ເມນ ວິນເຍນ ສາມຄ຺ຄິໍ ກຕ຺ວາ ສມຄ຺ເຄເຫວ ອສຎ຺ຎຕາ ຠິກ຺ຂູ ວິເນຕພ຺ພາຕິ ອຘິປ຺ປາໂຍ. ເຕນາຫ ‘‘ສເຈ ສງ຺ໂຆ ອຈ຺ຈຍໍ ເທສາເປຕ຺ວາ’’ຕິອາທິ. ຠິກ຺ຂຸໂນ ນກ຺ຂມຕີຕິ ເກສຸຈິ ປຸຄ຺ຄເລສຸ ອປ຺ປມຕ຺ຕກໂທສທສ຺ສເນນ ນ ຣຸຈ຺ຈຕິ. ທິຏ຺ຐາວິກມ຺ມມ຺ປິ ກຕ຺ວາຕິ ‘‘ນ ເມຕໍ ຂມຕີ’’ຕິ ສຠາຄສ຺ສ ຠິກ຺ຂຸໂນ ອຕ຺ຕໂນ ທິຏ຺ຐິໍ ອາວິກຕ຺ວາ. ອຸເປຕພ຺ພາຕິ ສາສນຫານິຍາ ອຠາວາ ສາມຄ຺ຄິໍ ອໂກເປຕ຺ວາ ກາຍສາມຄ຺ຄີ ທາຕພ຺ພາ, ອີທິເສ ຐາເນ ອລຊ຺ຊິປຣິໂຠໂຄ ອາປຕ຺ຕິກໂຣ ນ ໂຫຕິ, ວຏ຺ຏຕິເຍວ. ເຍ ປນ ສາສນວິນາສາຍ ປຏິປນ຺ນາ, ເຕຫິ ສຫ ນ ວຕ຺ຕຕິ, ອາປຕ຺ຕິ ເອວ ໂຫຕິ ສາສນວິນາໂສ ຈ. ເຕນາຫ ‘‘ຍຕ຺ຣ ປນ ອຸທ຺ຘມ຺ມ’’ນ຺ຕິອາທິ. ‘‘ທິຏ຺ຐາວິກມ຺ມໍ ນ ວຏ຺ຏຕີ’’ຕິ ອິມິນາ ທິຏ຺ຐິຍາ ອາວິກຕາຍປິ ອາປຕ຺ຕິໍ ທສ຺ເສຕິ.

໔໒໒. ກຓ຺ຫວາໂຈຕິ ຣາຄໂທສາທີຫິ ກິລິຏ຺ຐວຈໂນ. ອນຕ຺ຖກວຈນສ຺ສ ທີປນໍ ປກາສນໍ ອສ຺ສາຕິ ອນຕ຺ຖກທີປໂນ. ມານໍ ນິສ຺ສາຍາຕິ ວິນິຈ຺ຉຍກຣຓໍ ຕວ ຠາໂຣຕິ ສງ຺ເຆນ ຠາເຣ ອກເຕປິ ‘‘ອຫເມເວຕ຺ຖ ໂວຫຣິຕຸໍ ອຣຫຣູໂປ’’ຕິ ມານໍ ນິສ຺ສາຍ. ຍຖາທິຏ຺ຐິຍາຕິ ອນຸຣູປລທ຺ຘິຍາ. ຍສ຺ສ ຫິ ອຕ຺ຖສ຺ສ ຍາທິສີ ທິຏ຺ຐິ ອນຸຣູປາ, ຕໍ ຄເຫຕ຺ວາ ນ ພ຺ຍາກຕາຕິ ອຕ຺ໂຖ.ອສ຺ສ ອຕ຺ຕໂນຕິ ອຘມ຺ມາທິອຕ຺ຖໍ ສນ຺ຘາຍ ວທຕິ, ນ ປຸຄ຺ຄລໍ, ອສ຺ສ ອຘມ຺ມາທິອຕ຺ຖສງ຺ຂາຕສ຺ສ ອຕ຺ຕໂນ ສຣູປສ຺ສ ຍາ ອນຸຣູປາ ທິຏ຺ຐີຕິ ອຕ຺ໂຖ. ລທ຺ຘິໍ ນິກ຺ຂິປິຕ຺ວາຕິ ອນຸຣູປລທ຺ຘິໍ ຉຑ຺ເຑຕ຺ວາ, ອຄ຺ຄເຫຕ຺ວາຕິ ອຕ຺ໂຖ. ເຕນາຫ ‘‘ອຘມ຺ມາທີສຸ ຘມ຺ມາທິລທ຺ຘິໂກ ຫຸຕ຺ວາ’’ຕິ. ອຖ ວາ ອຕ຺ຕໂນ ລທ຺ຘິໍ ນິຄູຫິຕ຺ວາ ປຸຄ຺ຄລານຸຄຸຓໍ ຕຖາ ພ຺ຍາກໂຣນ຺ໂຕ ນ ຍຖາທິຏ຺ຐິຍາ ພ຺ຍາກຕາ ນາມ. ອິມສ຺ມິໍ ປກ຺ເຂ ອຘມ຺ມາທີສຸ ຘມ຺ມາທິລທ຺ຘິໂກ ຫຸຕ຺ວາຕິ ເອຕ຺ຖ ອຘມ຺ມາທີສຸ ຘມ຺ມາທິລທ຺ຘິໂກ ວິຍ ຫຸຕ຺ວາຕິ ອຕ຺ໂຖ ຄເຫຕພ຺ໂພ.

ນປ຺ປຏິປ຺ປສ຺ສມ຺ຠນວຄ຺ຄວຓ຺ຓນາ ນິຏ຺ຐິຕາ.

ໂວຫາຣວຄ຺ຄາທິວຓ຺ຓນາ

໔໒໔. ກມ຺ມຎຕ຺ຕີຕິ ກມ຺ມຠູຕາ ຎຕ຺ຕິ. ອນຸສ຺ສາວນນິຣເປກ຺ຂາ ຎຕ຺ຕິກມ຺ມຠູຕາ ຎຕ຺ຕີຕິ ອຕ຺ໂຖ. ກມ຺ມປາທຎຕ຺ຕິ ນາມ ຎຕ຺ຕິທຸຕິຍກມ຺ມາທີສຸ ອນຸສ຺ສາວນກມ຺ມສ຺ສ ປາທຠູຕາ ອຘິຏ຺ຐານຠູຕາ ຎຕ຺ຕິ. ນວສຸ ຐາເນສູຕິ ໂອສາຣຓາທີສຸ ນວສຸ ຐາເນສຸ. ທ຺ວີສຸ ຐາເນສູຕິ ຎຕ຺ຕິທຸຕິຍຎຕ຺ຕິຈຕຸຕ຺ຖກມ຺ເມສຸ.

ສຸຕ຺ຕານຸໂລມນ຺ຕິ ອຸຠໂຕວິຠງ຺ເຄ ສຸຕ຺ຕານຸໂລມຠູເຕ ມຫາປເທເສ ສນ຺ຘາຍ ວຸຕ຺ຕໍ. ວິນຍານຸໂລມນ຺ຕິ ຂນ຺ຘກປຣິວາຣານຸໂລມຠູເຕ ມຫາປເທເສ. ສຸຕ຺ຕນ຺ຕິເກ ຈຕ຺ຕາໂຣ ມຫາປເທເສຕິ ສຸຕ຺ຕາຠິຘມ຺ມປິຏເກສຸ ອນຸຎ຺ຎາຕປຏິກ຺ຂິຕ຺ຕສຸຕ຺ຕານຸໂລມວເສນ ນຍໂຕ ຄເຫຕພ຺ເພ ຈຕ຺ຕາໂຣ ອຕ຺ເຖ.

໔໒໕. ທິຏ຺ຐີນໍ ອາວິກມ຺ມານີຕິ ອາປຕ຺ຕິລທ຺ຘີນໍ ປກາສນານິ, ອາປຕ຺ຕິເທສນາກມ຺ມານີຕິ ອຕ຺ໂຖ.

ຍຖາ ຈຕູຫິ ປຎ຺ຈຫິ ທິຏ຺ຐິ ອາວິກຕາ ໂຫຕີຕິ ຍຖາ ອາວິກເຕ ຈຕູຫິ ປຎ຺ຈຫິ ເອກີຠູເຕຫິ ເອກສ຺ສ ປຸຄ຺ຄລສ຺ສ ສນ຺ຕິເກ ອາປຕ຺ຕິ ເທສິຕາ ນາມ ໂຫຕິ, ເອວໍ ເທເສຕີຕິ ອຕ຺ໂຖ. ເອວໍ ເທເສນ຺ໂຕ ຈ ອຕ຺ຕນາ ສທ຺ຘິໍ ຕໂຍ ວາ ຈຕ຺ຕາໂຣ ວາ ຠິກ຺ຂູ ຄເຫຕ຺ວາ ເອກສ຺ສ ສນ຺ຕິເກ ເທເສຕິ. ເອວໍ ເທເສຕຸໍ ນ ວຏ຺ຏຕິ. ເທສິຕາ ຈ ອາປຕ຺ຕິ ນ ວຸຏ຺ຐາຕິ, ເທສນາປຈ຺ຈຍາ ທຸກ຺ກຏຎ຺ຈ ໂຫຕິ. ທ຺ວິນ຺ນໍ ຕິຓ຺ຓໍ ປນ ເອກໂຕ ເທເສຕຸໍ ວຏ຺ຏຕິ.

໔໔໔. ອທສ຺ສເນນາຕິ ອິມສ຺ສ ອກປ຺ປິຍໍ ປຣິວຊ຺ເຊນ຺ຕານໍ ວິນຍຘຣານໍ ປຏິປຕ຺ຕິຍາ ອທສ຺ສເນນ, ເຕສໍ ທິຏ຺ຐານຸຄຕິໍ ອນາປຊ຺ຊເນນາຕິປິ ອຕ຺ໂຖ ຄເຫຕພ຺ໂພ. ອກປ຺ປິເຍ ກປ຺ປິຍສອຎຕາຍາຕິ ຣຊຕາທິອກປ຺ປິເຍ ຕິປຸອາທິສຎ຺ຎິຕາຍ. ປຸຈ຺ຉິຕ຺ວາ ວາ ອຎ຺ເຎສໍ ວາ ວຸຈ຺ຈມານໍ ອສຸຓນ຺ໂຕ ອາປຊ຺ຊຕີຕິ ເອຕ຺ຖ ປຸຈ຺ຉິຕ຺ວາ ອສຸຓນ຺ໂຕ ວາ ປຸຈ຺ຉິຍມານໍ ອສຸຓນ຺ໂຕ ວາຕິ ປຈ຺ເຈກໍ ໂຍເຊຕພ຺ພໍ. ເອກຣຕ຺ຕາຕິກ຺ກມາທິວເສນາຕິ ອຘິຏ຺ຐິຕຈີວເຣນ ວິປ຺ປວສິຕ຺ວາ ເອກຣຕ຺ຕາຕິກ຺ກເມນ ປາຈິຕ຺ຕິຍໍ ອາປຊ຺ຊຕິ. ອາທິ-ສທ຺ເທນ ຉຣຕ຺ຕາຕິກ຺ກມາທີນໍ ສງ຺ຄໂຫ.

໔໕໐. ອນຕ຺ຖໍ ກລິສາສນນ຺ຕິ ອນຕ຺ຖາວຫໍ ໂກຘວຈນໍ ອາໂຣເປນ຺ໂຕ ໂທສໍ ອາໂຣເປນ຺ໂຕ ອຸປທ຺ທວາຍ ປຣິສກ຺ກຕີຕິ ອຕ຺ໂຖ.

໔໕໔. ໂວຫາຣນິຣຸຕ຺ຕິຍນ຺ຕິ ຕສ຺ສ ຕສ຺ສ ອຕ຺ຖສ຺ສ ວາຈກສທ຺ເທ ປເຠທຄຕຎາຓປ຺ປຕ຺ໂຕ ນ ໂຫຕີຕິ ອຕ຺ໂຖ.

໔໕໕. ປຣິມຓ຺ຑລພ຺ຍຎ຺ຊນາໂຣປເນ ກຸສໂລ ນ ໂຫຕີຕິ ປຣິມຓ຺ຑເລນ ປທພ຺ຍຎ຺ຊເນນ ວຕ຺ຖຸໍ, ປເຣຫິ ວຸຕ຺ຕໍ ຊານິຕຸຎ຺ຈ ອສມຕ຺ໂຖຕິ ອຕ຺ໂຖ.

໔໕໘. ອນຸສ຺ສາວເນນາຕິ ອນຸ ອນຸ ກຖເນນ. ເຕນາຫ ‘‘ນນຸ ຕຸມ຺ເຫ’’ຕິອາທິ, ຍໍ ອໂວຈຸມ຺ຫ, ສ຺ວາຍໍ ປກາສິໂຕຕິ ສມ຺ພນ຺ໂຘ. ຕຕ຺ຖ ຍນ຺ຕິ ອິທໍ ຍສ຺ມາ ວຈນາເປກ຺ຂໍ ນ ໂຫຕິ, ວຈນຕ຺ຖາເປກ຺ຂເມວ, ຕສ຺ມາ ເຕນ ວຈເນນ ນານາກຣຓາຠາວໍ ປກາສຍິສ຺ສາມາຕິ ຍມຕ຺ຖໍ ອໂວຈຸມ຺ຫາຕິ ອຕ຺ໂຖ ຄເຫຕພ຺ໂພ. ເຕເນວ ‘‘ສ຺ວາຍ’’ນ຺ຕິ ປຸລ຺ລິງ຺ຄວເສນ ປຏິນິທ຺ເທໂສ ກໂຕ, ຕສ຺ສ ໂສ ອຍໍ ນານາກຣຓາຠາໂວຕິ ອຕ຺ໂຖ.

໔໖໗. ມຎ຺ຈປທາທີສຸປິ ນຬາຏໍ ປຏິຫຎ຺ເຎຍ຺ຍາຕິ ອນ຺ຘກາເຣ ຈມ຺ມຂຓ຺ຑໍ ປຎ຺ຎເປຕ຺ວາ ວນ຺ທິຕຸໍ ໂອນມນ຺ຕສ຺ສ ນຬາຏໍ ວາ ອກ຺ຂິ ວາ ມຎ຺ຈາທີສຸ ປຏິຫຎ຺ຎຕິ. ເອເຕນ ວນ຺ທໂຕປິ ອາປຕ຺ຕິອຠາວໍ ວຕ຺ວາ ວນ຺ທນາຍ ສພ຺ພຖາ ປຏິກ຺ເຂປາຠາວຎ຺ຈ ທີເປຕິ. ເອວໍ ສພ຺ພຕ຺ຖ ສຸຕ຺ຕນ຺ຕເຣຫິ ອປ຺ປຏິກ຺ຂິຕ຺ເຕສຸ. ນຄ຺ຄາທີສຸ ປນ ວນ຺ທິຕຸໍ ນ ວຏ຺ຏຕີຕິ. ເອກໂຕ ອາວຏ຺ໂຏຕິ ເອກສ຺ມິໍ ໂທສາຄຕິປກ຺ເຂ ປຣິວຕ຺ໂຕ ປວິຏ຺ໂຐຕິ ອຕ຺ໂຖ. ເຕນາຫ ‘‘ສປຕ຺ຕປກ຺ເຂ ຐິໂຕ’’ຕິ. ວນ຺ທິຍມາໂນຕິ ໂອນມິຕ຺ວາ ວນ຺ທິຍມາໂນ. ວນ຺ທິຕພ຺ເພສຸ ອຸທ຺ເທສາຈຣິໂຍ, ນິສ຺ສຍາຈຣິໂຍ ຈ ຍສ຺ມາ ນວກາປິ ໂຫນ຺ຕິ, ຕສ຺ມາ ເຕ ວຸຑ຺ຒາ ເອວ ວນ຺ທິຍາຕິ ເວທິຕພ຺ພາ.

໔໗໐. ປຸພ຺ເພ ວຸຕ຺ຕເມວາຕິ ສຫເສຍ຺ຍາທິປຓ຺ຓຕ຺ຕິວຊ຺ຊໍ. ອິຕຣນ຺ຕິ ສຈິຕ຺ຕກໍ.

ໂວຫາຣວຄ຺ຄາທິວຓ຺ຓນາ ນິຏ຺ຐິຕາ.