໙. ປາຕິໂມກ຺ຂຏ຺ຐປນກ຺ຂນ຺ຘໂກ

ປາຕິໂມກ຺ຂຸທ຺ເທສຍາຈນກຖາວຓ຺ຓນາ

໓໘໓. ປາຕິໂມກ຺ຂຏ຺ຐປນກ຺ຂນ຺ຘເກ ປາຬິຍໍ ນນ຺ທິມຸຂິຍາຕິ ໂອທາຕທິສາມຸຂຕາຍ ຕຸຏ຺ຐມຸຂິຍາ. ‘‘ອຸທ຺ຘສ຺ຕໍ ອຣຸຓ’’ນ຺ຕິ ວຕ຺ວາປິ ‘‘ອຸທ຺ທິສຕຸ, ຠນ຺ເຕ, ຠຄວາ’’ຕິ ປາຕິໂມກ຺ຂຸທ຺ເທສຍາຈນໍ ອນຸໂປສເຖ ອຸໂປສຖກຣຓປຏິກ຺ເຂປສ຺ສ ສິກ຺ຂາປທສ຺ສ ອປຎ຺ຎຕ຺ຕຕ຺ຕາ ເຖເຣນ ກຕນ຺ຕິ ທຏ຺ຐພ຺ພໍ. ກສ຺ມາ ປນ ຠຄວາ ເອວໍ ຕຸຓ຺ຫີຠູໂຕວ ຕິຍາມຣຕ຺ຕິໍ ວີຕິນາເມສີຕິ? ອປຣິສຸທ຺ຘາຍ ປຣິສາຍ ອຸໂປສຖາທິສໍວາສກຣຓສ຺ສ ສາວຊ຺ຊຕໍ ຠິກ຺ຂຸສງ຺ເຆ ປາກຏໍ ກາຕຸໍ, ຕຎ຺ຈ ອາຍຕິໍ ຠິກ຺ຂູນໍ ຕຖາປຏິປຊ຺ຊນຕ຺ຖໍ ສິກ຺ຂາປທໍ ຎາເປຕຸໍ. ເກຈິ ປເນຕ຺ຖ ‘‘ອປຣິສຸທ຺ຘມ຺ປິ ປຸຄ຺ຄລໍ ຕສ຺ສ ສມ຺ມຸຂາ ‘ອປຣິສຸທ຺ໂຘ’ຕິ ວຕ຺ຕຸໍ ມຫາກຣຸຓາຍ ອວິສຫນ຺ໂຕ ຠຄວາ ຕຖາ ນິສີທີ’’ຕິ ກາຣຓໍ ວທນ຺ຕິ. ຕໍ ອກາຣຓໍ ປຈ຺ຉາປິ ອວຕ຺ຕພ຺ພໂຕ, ມຫາໂມຄ຺ຄລ຺ລານຕ຺ເຖເຣນາປິ ຕໍ ພາຫາຍໍ ຄເຫຕ຺ວາ ພຫິ ນີຫຣຓສ຺ສ ອກຕ຺ຕພ຺ພຕາປສງ຺ຄໂຕ. ຕສ຺ມາ ຍຖາວຸຕ຺ຕເມເວຕ຺ຖ ກາຣຓນ຺ຕິ. ເຕເນວ ‘‘ອຏ຺ຐານເມຕໍ, ຠິກ຺ຂເວ, ອນວກາໂສ, ຍໍ ຕຖາຄໂຕ ອປຣິສຸທ຺ຘາຍ ປຣິສາຍ ອຸໂປສຖໍ ກເຣຍ຺ຍ, ປາຕິໂມກ຺ຂໍ ອຸທ຺ທິເສຍ຺ຍາ’’ຕິ (ອ. ນິ. ໘.໒໐; ຈູຬວ. ໓໘໖; ອຸທາ. ໔໕) ວຕ຺ວາ ‘‘ນ ຈ, ຠິກ຺ຂເວ, ສາປຕ຺ຕິເກນ ປາຕິໂມກ຺ຂໍ ໂສຕພ຺ພ’’ນ຺ຕິອາທິນາ (ຈູຬວ. ໓໘໖) ສາປຕ຺ຕິກປຣິສາຍ ກຕ຺ຕພ຺ພວິຘິ ທສ຺ສິໂຕ.

ສງ຺ກສ຺ສຣສມາຈາຣນ຺ຕິ ກິຎ຺ຈິເທວ ອສາຣຸປ຺ປໍ ທິສ຺ວາ ‘‘ອິທໍ ອິມິນາ ກຕໍ ຠວິສ຺ສຕີ’’ຕິ ປເຣຫິ ສງ຺ກາຍ ສຣິຕພ຺ພສມາຈາຣໍ, ອຕ຺ຕນາ ວາ ‘‘ມມ ອນາຈາຣໍ ເອເຕ ຊານນ຺ຕີ’’ຕິ ສງ຺ກາຍ ສຣິຕພ຺ພສມາຈາຣໍ. ສມຓເວສຘາຣເຓນ, ສງ຺ຆິກປຈ຺ຈຍຠາຄຄຫຓາທິນາ ຈ ຊີວິກໍ ກປ຺ເປນ຺ໂຕ ‘‘ອຫໍ ສມໂຓ’’ຕິ ປຏິຎ຺ຎໍ ອເທນ຺ໂຕປິ ອຕ຺ຖໂຕ ເທນ຺ໂຕ ວິຍ ໂຫຕີຕິ ‘‘ສມຓປຏິຎ຺ຎໍ ພ຺ຣຫ຺ມຈາຣິປຏິຎ຺ຎ’’ນ຺ຕິ ວຸຕ຺ຕໍ. ອວສ຺ສຸຕນ຺ຕິ ກິເລສາວສ຺ສເນນ ຕິນ຺ຕໍ. ສຎ຺ຊາຕທຸສ຺ສິລ຺ຍກຈວຣຕ຺ຕາ ກສມ຺ພຸຊາຕໍ, ອສາຣຕາຍ ວາ ກສມ຺ພຸ ວິຍ ຊາຕໍ. ພຫິທ຺ວາຣໂກຏ຺ຐກາ ນິກ຺ຂາເມຕ຺ວາຕິ ທ຺ວາຣສາລໂຕ ພຫິ ນິກ຺ຂມາເປຕ຺ວາ.

໓໘໔. ມຫາສມຸທ຺ເທ ອຠິຣມນ຺ຕີຕິ ພຫຸໂສ ທສ຺ສນປວິສນາທິນາ ມຫາສມຸທ຺ເທ ອຠິຣຕິໍ ວິນ຺ທນ຺ຕິ. ນ ອາຍຕເກເນວ ປປາໂຕຕິ ຉິນ຺ນຕຏມຫາໂສພ຺ໂຠ ວິຍ ນ ອາທິໂຕວ ນິນ຺ໂນຕິ ອຕ຺ໂຖ. ຐິຕຘມ຺ໂມຕິ ອວຏ຺ຐິຕສຠາໂວ. ປູຣຕ຺ຕນ຺ຕິ ປຸຓ຺ຓຕ຺ຕໍ. ນາຄາຕິ ສປ຺ປຊາຕິກາ.

ປາຕິໂມກ຺ຂຸທ຺ເທສຍາຈນກຖາວຓ຺ຓນາ ນິຏ຺ຐິຕາ.

ປາຕິໂມກ຺ຂສວນາຣຫກຖາທິວຓ຺ຓນາ

໓໘໖. ອຸທາຫຣິຕພ຺ພນ຺ຕິ ປາຬິຍາ ອວຕ຺ວາ ຕມຕ຺ຖໍ ຍາຍ ກາຍຈິ ຠາສາຍ ອຸທາຫຏມ຺ປິ ອຸທາຫຏເມວາຕິ ທຏ຺ຐພ຺ພໍ.

ປຸເຣ ວາ ປຈ຺ຉາ ວາຕິ ຎຕ຺ຕິອາຣມ຺ຠໂຕ ປຸພ຺ເພ ວາ ຎຕ຺ຕິນິຏ຺ຐານໂຕ ປຈ຺ຉາ ວາ.

໓໘໗. ກຕຎ຺ຈ ອກຕຎ຺ຈ ອຸຠຍໍ ຄເຫຕ຺ວາຕິ ຍສ຺ສ ກຕາປິ ອຕ຺ຖິ ອກຕາປິ. ຕສ຺ສ ຕທຸຠຍໍ ຄເຫຕ຺ວາ. ຘມ຺ມິກໍ ສາມຄ຺ຄິນ຺ຕິ ຘມ຺ມິກໍ ສມຄ຺ຄກມ຺ມໍ. ປຈ຺ຈາທິຍຕີຕິ ອຸກ຺ໂກຏນາຘິປ຺ປາເຍນ ປຸນ ກາຕຸໍ ອາທິຍຕິ.

໓໘໘. ອາກາຣາທິສຎ຺ຎາ ເວທິຕພ຺ພາຕິ ອາກາຣລິງ຺ຄນິມິຕ຺ຕນາມານິ ວຸຕ຺ຕານີຕິ ເວທິຕພ຺ພານິ.

ປາຕິໂມກ຺ຂສວນາຣຫກຖາທິວຓ຺ຓນາ ນິຏ຺ຐິຕາ.

ອຕ຺ຕາທານອງ຺ຄກຖາທິວຓ຺ຓນາ

໓໙໘. ປຸນ ໂຈເທຕຸໍ ອຕ຺ຕນາ ອາທາຕພ຺ພໍ ຄເຫຕພ຺ພໍ ອຘິກຣຓໍ ອຕ຺ຕາທານນ຺ຕິ ອາຫ ‘‘ສາສນໍ ໂສເຘຕຸກາໂມ’’ຕິອາທິ. ວສ຺ສາຣຕ຺ໂຕຕິ ວສ຺ສກາໂລ. ໂສປິ ຫິ ທຸພ຺ຠິກ຺ຂາທິກາໂລ ວິຍ ອຘິກຣຓວູປສມຕ຺ຖໍ ລຊ຺ຊິປຣິສາຍ ທູຣໂຕ ອານຍນສ຺ສ, ອາຄຕານຎ຺ຈ ປິຓ຺ຑາຍ ຈຣຓາທິສມາຈາຣສ຺ສ ທຸກ຺ກຣຕ຺ຕາ ອກາໂລ ເອວ.

ສມນຸສ຺ສຣຓກຣຓນ຺ຕິ ອນຸສ຺ສຣິຕານຸສ຺ສຣິຕກ຺ຂເຓ ປີຕິປາໂມຊ຺ຊຊນນໂຕ ອນຸສ຺ສຣຓຸປ຺ປາທກໍ. ວິຄຕູປກ຺ກິເລສ…ເປ… ສໍວຕ຺ຕຕີຕິ ເອຕ຺ຖ ຍຖາ ອພ຺ຠຫິມາທິອຸປກ຺ກິເລສວິຣຫິຕານໍ ຈນ຺ທິມສູຣິຍານໍ ສສ຺ສິຣີກຕາ ໂຫຕິ, ເອວມສ຺ສາປິ ໂຈທກສ຺ສ ປາປປຸຄ຺ຄລູປກ຺ກິເລສວິຄເມນ ສສ຺ສິຣີກຕາ ໂຫຕີຕິ ອຘິປ຺ປາໂຍ.

໓໙໙. ອຘິຄຕໍ ເມຕ຺ຕຈິຕ຺ຕນ຺ຕິ ອປ຺ປນາປ຺ປຕ຺ຕໍ ເມຕ຺ຕຌານໍ.

໔໐໐-໑. ‘‘ໂທສນ຺ຕໂຣ’’ຕິ ເອຕ຺ຖ ອນ຺ຕຣ-ສທ຺ໂທ ຈິຕ຺ຕປຣິຍາໂຍຕິ ອາຫ ‘‘ນ ທຸຏ຺ຐຈິຕ຺ໂຕ ຫຸຕ຺ວາ’’ຕິ.

ກາຣຸຎ຺ຎໍ ນາມ ກຣຸຓາ ເອວາຕິ ອາຫ ‘‘ກາຣຸຎ຺ຎຕາຕິ ກຣຸຓາຠາໂວ’’ຕິ. ກຣຸຓນ຺ຕິ ອປ຺ປນາປ຺ປຕ຺ຕໍ ວທຕິ. ຕຖາ ເມຕ຺ຕນ຺ຕິ.

ອຕ຺ຕາທານອງ຺ຄກຖາທິວຓ຺ຓນາ ນິຏ຺ຐິຕາ.

ປາຕິໂມກ຺ຂຏ຺ຐປນກ຺ຂນ຺ຘກວຓ຺ຓນານໂຍ ນິຏ຺ຐິໂຕ.