໑໐. ຠິກ຺ຂຸນິກ຺ຂນ຺ຘໂກ

ມຫາປຊາປຕິໂຄຕມີວຕ຺ຖຸກຖາວຓ຺ຓນາ

໔໐໓. ຠິກ຺ຂຸນິກ຺ຂນ຺ຘເກ ‘‘ມາຕຸຄາມສ຺ສ ປພ຺ພຊິຕຕ຺ຕາ’’ຕິ ອິທໍ ປຎ຺ຈວສ຺ສສຕໂຕ ອຸທ຺ຘໍ ສທ຺ຘມ຺ມສ຺ສ ອປ຺ປວຕ຺ຕນກາຣຓທສ຺ສນໍ. ສຸກ຺ຂວິປສ຺ສກຂີຓາສວວເສນ ວສ຺ສສຫສ຺ສນ຺ຕິອາທິ ຂນ຺ຘກຠາຓການໍ ມຕໍ ຄເຫຕ຺ວາ ວຸຕ຺ຕໍ. ທີຆນິກາຍຏ຺ຐກຖາຍໍ ປນ ‘‘ປຏິສມ຺ຠິທາປ຺ປຕ຺ເຕຫິ ວສ຺ສສຫສ຺ສໍ ອຏ຺ຐາສິ, ຉຬຠິຎ຺ເຎຫິ ວສ຺ສສຫສ຺ສໍ, ເຕວິຊ຺ເຊຫິ ວສ຺ສສຫສ຺ສໍ, ສຸກ຺ຂວິປສ຺ສເກຫິ ວສ຺ສສຫສ຺ສໍ, ປາຕິໂມກ຺ເຂຫິ ວສ຺ສສຫສ຺ສໍ ອຏ຺ຐາສີ’’ຕິ (ທີ. ນິ. ອຏ຺ຐ. ໓.໑໖໑) ວຸຕ຺ຕໍ. ອງ຺ຄຸຕ຺ຕຣ (ອ. ນິ. ອຏ຺ຐ. ໓.໘.໕໑) -ສໍຍຸຕ຺ຕຏ຺ຐກຖາສຸປິ (ສໍ. ນິ. ອຏ຺ຐ. ໒.໒.໑໕໖) ອຎ຺ຎຖາວ ວຸຕ຺ຕໍ, ຕໍ ສພ຺ພໍ ອຎ຺ຎມຎ຺ຎວິຣຸທ຺ຘມ຺ປິ ຕໍຕໍຠາຓການໍ ມເຕນ ລິຂິຕສີຫຬຏ຺ຐກຖາສຸ ອາຄຕນຍເມວ ຄເຫຕ຺ວາ ອາຈຣິເຍນ ລິຂິຕໍ ອີທິເສ ກຖາວິໂຣເຘ ສາສນປຣິຫານິຍາ ອຠາວໂຕ, ໂສຘນຸປາຍາຠາວາ ຈ. ປຣມຕ຺ຖວິໂຣໂຘ ເອວ ຫິ ສຸຕ຺ຕາທິນເຍນ ໂສຘນີໂຍ, ນ ກຖາມຄ຺ຄວິໂຣໂຘຕິ.

ມຫາປຊາປຕິໂຄຕມີວຕ຺ຖຸກຖາວຓ຺ຓນາ ນິຏ຺ຐິຕາ.

ຠິກ຺ຂຸນີອຸປສມ຺ປທານຸຊານນກຖາວຓ຺ຓນາ

໔໐໔-໘. ປາຬິຍໍ ຍທຄ຺ເຄນາຕິ ຍສ຺ມິໍ ທິວເສ. ຕທາຕິ ຕສ຺ມິໍເຍວ ທິວເສ. ວິມາເນຕ຺ວາຕິ ອວມານໍ ກຕ຺ວາ.

໔໑໐-໑. ອາປຕ຺ຕິຄາມິນິໂຍຕິ ອາປຕ຺ຕິໍ ອາປນ຺ນາໂຍ. ກມ຺ມວິຠງ຺ເຄຕິ ປຣິວາເຣ ກມ຺ມວິຠງ຺ເຄ (ປຣິ. ໔໘໒ ອາທໂຍ).

໔໑໓-໕. ປາຬິຍໍ ທ຺ເວ ຕິສ຺ໂສ ຠິກ຺ຂຸນິໂຍຕິ ທ຺ວີຫິ ຕີຫິ ຠິກ຺ຂຸນີຫິ. ນ ອາໂຣເຈນ຺ຕີຕິ ປາຕິໂມກ຺ຂຸທ຺ເທສກສ຺ສ ນ ອາໂຣເຈນ຺ຕິ.

໔໑໖. ທຸສ຺ສເວຓິຍາຕິ ອເນກທຸສ຺ສປຏ຺ເຏ ເອກໂຕ ກຕ຺ວາ ກຕເວຓິຍາ.

໔໑໗. ວິເສສກນ຺ຕິ ປຕ຺ຕເລຂາທິວຓ຺ຓວິເສສໍ. ປກິຓນ຺ຕີຕິ ວິກ຺ກິຓນ຺ຕິ. ນມນກນ຺ຕິ ປາສຸກຏ຺ຐິນມນກພນ຺ຘນໍ.

໔໒໒-໕. ສໍເວລ຺ລິຍນ຺ຕິ ກຈ຺ຉໍ ພນ຺ຘິຕ຺ວາ ນິວາສນໍ. ຕໂຍ ນິສ຺ສເຍຕິ ຣຸກ຺ຂມູລເສນາສນສ຺ສ ຕາສໍ ອລພ຺ຠນໂຕ ວຸຕ຺ຕໍ.

໔໒໖-໘. ອຏ຺ເຐວ ຠິກ຺ຂຸນິໂຍ ຍຖາວຸຑ຺ຒໍ ປຏິພາຫນ຺ຕີຕິ ອຏ຺ຐ ຠິກ຺ຂຸນິໂຍ ວຸຑ຺ຒປຏິປາຏິຍາວ ຄຓ຺ຫນ຺ຕິໂຍ ອາຄຕປຏິປາຏິໍ ປຏິພາຫນ຺ຕິ, ນາຎ຺ຎາຕິ ອຕ຺ໂຖ. ອນຸວາທໍ ປຏ຺ຐເປນ຺ຕີຕິ ອິສ຺ສຣິຍໍ ປວຕ຺ເຕນ຺ຕີຕິ ອຕ຺ຖໍ ວທນ຺ຕິ.

໔໓໐. ຠິກ຺ຂຸທູເຕນາຕິ ຠິກ຺ຂຸນາ ທູຕຠູເຕນ. ສິກ຺ຂມານທູເຕນາຕິ ສິກ຺ຂມານາຍ ທູຕາຍ.

໔໓໑. ນ ສມ຺ມຕີຕິ ນປ຺ປໂຫຕິ. ນວກມ຺ມນ຺ຕິ ‘‘ນວກມ຺ມໍ ກຕ຺ວາ ວສຕູ’’ຕິ ອປໂລເກຕ຺ວາ ສງ຺ຆິກຠູມິຍາ ໂອກາສທານໍ.

໔໓໒-໖. ສນ຺ນິສິນ຺ນຄພ຺ຠາຕິ ທຸວິຎ຺ເຎຍ຺ຍຄພ຺ຠາ. ມຫິລາຕິຕ຺ເຖຕິ ອິຕ຺ຖີນໍ ສາຘາຣຓຕິຕ຺ເຖ.

ຠິກ຺ຂຸນີອຸປສມ຺ປທານຸຊານນກຖາວຓ຺ຓນາ ນິຏ຺ຐິຕາ.

ຠິກ຺ຂຸນິກ຺ຂນ຺ຘກວຓ຺ຓນານໂຍ ນິຏ຺ຐິໂຕ.