໘. ວຕ຺ຕກ຺ຂນ຺ຘໂກ

ອາຄນ຺ຕຸກວຕ຺ຕກຖາວຓ຺ຓນາ

໓໕໗. ວຕ຺ຕກ຺ຂນ຺ຘເກ ປຕ຺ຖຣິຕພ຺ພນ຺ຕິ ອາຕເປ ປຕ຺ຖຣິຕພ຺ພໍ. ປາຬິຍໍ ອຠິວາທາເປຕພ຺ໂພຕິ ວນ຺ທນຕ຺ຖາຍ ວສ຺ສໍ ປຸຈ຺ຉເນນ ນວໂກ ສຍເມວ ວນ຺ທຕີຕິ ວຸຕ຺ຕໍ. ນິລ຺ໂລເກຕພ຺ໂພຕິ ໂອໂລເກຕພ຺ໂພ.

ອາຄນ຺ຕຸກວຕ຺ຕກຖາວຓ຺ຓນາ ນິຏ຺ຐິຕາ.

ອາວາສິກວຕ຺ຕກຖາວຓ຺ຓນາ

໓໕໙. ‘‘ຍຖາຠາຄ’’ນ຺ຕິ ຐປິຕຏ຺ຐານໍ ອນຕິກ຺ກມິຕ຺ວາ ມຎ຺ຈປີຐາທິໍ ປປ຺ໂຜເຏຕ຺ວາ ປຕ຺ຖຣິຕ຺ວາ ອຸປຣິ ປຈ຺ຈຕ຺ຖຣຓໍ ທຕ຺ວາ ທານມ຺ປິ ເສນາສນປຎ຺ຎາປນເມວາຕິ ທສ຺ເສນ຺ໂຕ ອາຫ ‘‘ປປ຺ໂຜເຏຕ຺ວາ ຫິ ປຕ຺ຖຣິຕຸໍ ປນ ວຏ຺ຏຕິເຍວາ’’ຕິ.

ອາວາສິກວຕ຺ຕກຖາວຓ຺ຓນາ ນິຏ຺ຐິຕາ.

ອນຸໂມທນວຕ຺ຕກຖາວຓ຺ຓນາ

໓໖໒. ປຎ຺ຈເມ ນິສິນ຺ເນຕິ ອນຸໂມທນຕ຺ຖາຍ ນິສິນ຺ເນ. ນ ມຫາເຖຣສ຺ສ ຠາໂຣ ໂຫຕີຕິ ອນຸໂມທກໍ ອາຄເມຕຸໍ ນ ຠາໂຣ. ອຊ຺ຌິຏ຺ໂຐວ ອາຄເມຕພ຺ໂພຕິ ອຕ຺ຕນາ ອຊ຺ຌິຏ຺ເຐຫິ ຠິກ຺ຂູຫິ ອນຸໂມທນ຺ເຕເຍວ ນິສີທິຕພ຺ພນ຺ຕິ ອຕ຺ໂຖ.

ອນຸໂມທນວຕ຺ຕກຖາວຓ຺ຓນາ ນິຏ຺ຐິຕາ.

ຠຕ຺ຕຄ຺ຄວຕ຺ຕກຖາວຓ຺ຓນາ

໓໖໔. ມນຸສ຺ສານໍ ປຣິວິສນຏ຺ຐານນ຺ຕິ ຍຕ຺ຖ ອນ຺ໂຕວິຫາເຣປິ ມນຸສ຺ສາ ສປຸຕ຺ຕທາຣາ ອາວສິຕ຺ວາ ຠິກ຺ຂູ ເນຕ຺ວາ ໂຠເຊນ຺ຕິ. ອາສເນສຸ ສຕີຕິ ນິສີທນຏ຺ຐາເນສຸ ສນ຺ເຕສຸ. ອິທໍ, ຠນ຺ເຕ, ອາສນໍ ອຸຈ຺ຈນ຺ຕິ ອາສນ຺ເນ ສມຠູມິຠາເຄ ປຎ຺ຎຕ຺ຕໍ ເຖຣາສເນນ ສມກໍ ອາສນໍ ສນ຺ຘາຍ ວຸຕ຺ຕໍ, ເຖຣາສນໂຕ ປນ ອຸຈ຺ຈຕເຣ ອາປຸຈ຺ຉິຕ຺ວາປິ ນິສີທິຕຸໍ ນ ວຏ຺ຏຕິ. ຍທິ ຕໍ ອາສນ຺ນມ຺ປິ ນີຈຕຣໍ ໂຫຕິ, ອນາປຸຈ຺ຉາປິ ນິສີທິຕຸໍ ວຏ຺ຏຕິ. ມຫາເຖຣສ຺ເສວ ອາປຕ຺ຕີຕິ ອາສເນນ ປຏິພາຫນາປຕ຺ຕິຍາ ອາປຕ຺ຕິ. ອວຕ຺ຖຣິຕ຺ວາຕິ ປາຣຸຕສງ຺ຆາຏິໍ ອວຕ຺ຖຣິຕ຺ວາ, ອນຸກ຺ຂິປິຕ຺ວາຕິ ອຕ຺ໂຖ.

ປາຬິຍໍ ‘‘ອຸໂຠຫິ ຫຕ຺ເຖຫິ…ເປ… ໂອທໂນ ປຏິຄ຺ຄເຫຕພ຺ໂພ’’ຕິ ອິທໍ ຫຕ຺ຖຕເລ ວາ ປຈ຺ຉິປິຏ຺ຐິອາທິທຸສ຺ສຓ຺ຐິຕາຘາເຣ ວາ ປຕ຺ຕໍ ຐເປຕ຺ວາ ໂອທນສ຺ສ ຄຫຓກາເລ ປຕ຺ຕສ຺ສ ອປຕນຕ຺ຖາຍ ວຸຕ຺ຕໍ, ສຸສຊ຺ຊິເຕ ປນ ອາຘາເຣ ປຕ຺ຕໍ ຐເປຕ຺ວາ ເອເກນ ຫຕ຺ເຖນ ຕໍ ປຣາມສິຕ຺ວາປິ ໂອທນໍ ປຏິຄ຺ຄເຫຕຸໍ ວຏ຺ຏຕິ ເອວ. ອຸໂຠຫິ ຫຕ຺ເຖຫິ…ເປ… ອຸທກໍ ປຏິຄ຺ຄເຫຕພ຺ພນ຺ຕິ ເອຕ຺ຖາປິ ເອເສວ ນໂຍ.

ຫຕ຺ຖໂຘວນອຸທກນ຺ຕິ ໂຠຊນາວສາເນ ອຸທກໍ. ເຕນາຫ ‘‘ປານີຍໍ ປິວິຕ຺ວາ ຫຕ຺ຖາ ໂຘວິຕພ຺ພາ’’ຕິ. ເຕນ ປຣິໂຍສາເນ ໂຘວນເມວ ປຏິກ຺ຂິຕ຺ຕໍ, ໂຠຊນນ຺ຕເຣ ປນ ປານີຍປິວນາທິນາ ນເຍນ ຫຕ຺ຖໍ ໂຘວິຕ຺ວາ ປຸນ ຠຸຎ຺ຊິຕຸໍ ວຏ຺ຏຕີຕິ ທສ຺ເສຕິ. ໂປຕ຺ຖເກສຸ ປນ ‘‘ປານີຍໍ ປິວິຕ຺ວາ ຫຕ຺ຖາ ນ ໂຘວິຕພ຺ພາ’’ຕິ ລິຂນ຺ຕິ, ຕໍ ປຸຣິມວຈເນນ ນ ສເມຕິ ປຣິໂຍສາເນ ອຸທກສ຺ເສວ ‘‘ຫຕ຺ຖໂຘວນອຸທກ’’ນ຺ຕິ ວຸຕ຺ຕຕ຺ຕາ. ສເຈ ມນຸສ຺ສາ ໂຘວຖ, ຠນ຺ເຕຕິອາທິ ນິຏ຺ຐິຕຠຕ຺ຕໍ ນິສິນ຺ນໍ ເຖຣໍ ສນ຺ຘາຍ ວຸຕ຺ຕໍ. ຘຸເຣ ທ຺ວາຣສມີເປ.

ຠຕ຺ຕຄ຺ຄວຕ຺ຕກຖາວຓ຺ຓນາ ນິຏ຺ຐິຕາ.

ປິຓ຺ຑຈາຣິກວຕ຺ຕກຖາທິວຓ຺ຓນາ

໓໖໖. ປາຬິຍໍ ຐາເປຕິ ວາຕິ ຕິຏ຺ຐ ຠນ຺ເຕຕິ ວທນ຺ຕິ.

໓໖໗. ອຕ຺ຖິ, ຠນ຺ເຕ, ນກ຺ຂຕ຺ຕປທານີຕິ ນກ຺ຂຕ຺ຕປທວິສຍານິ ຎາຕານິ ອຕ຺ຖິ, ອສ຺ສຍຸຊາທິນກ຺ຂຕ຺ຕໍ ຊານາຖາຕິ ອຘິປ຺ປາໂຍ. ເຕນາຫ ‘‘ນ ຊານາມ, ອາວຸໂສ’’ຕິ. ອຕ຺ຖິ, ຠນ຺ເຕ, ທິສາຠາຄນ຺ຕິ ເອຕ຺ຖາປິ ເອເສວ ນໂຍ. ເກນຊ຺ຊ, ຠນ຺ເຕ, ຍຸຕ຺ຕນ຺ຕິ ເກນ ນກ຺ຂຕ຺ເຕນ ຈນ຺ໂທ ຍຸຕ຺ໂຕຕິ ອຕ຺ໂຖ.

໓໖໙. ອງ຺ຄເຓຕິ ອພ຺ໂຠກາເສ. ເອວເມວ ປຏິປຊ຺ຊິຕພ຺ພນ຺ຕິ ອຸທ຺ເທສທານາທິ ອາປຸຈ຺ຉິຕພ຺ພນ຺ຕິ ທສ຺ເສຕິ.

໓໗໔. ນິພທ຺ຘຄມນຕ຺ຖາຍາຕິ ອຕ຺ຕໂນວ ນິຣນ຺ຕຣຄມນຕ຺ຖາຍ. ອູຫທິຕາຕິ ເອຕ຺ຖ ຫທ-ຘາຕຸສ຺ສ ວຈ຺ຈວິສ຺ສຊ຺ຊນຕ຺ຖຕາຍາຫ ‘‘ພຫິ ວຈ຺ຈມກ຺ຂິຕາ’’ຕິ.

ປິຓ຺ຑຈາຣິກວຕ຺ຕກຖາທິວຓ຺ຓນາ ນິຏ຺ຐິຕາ.

ວຕ຺ຕກ຺ຂນ຺ຘກວຓ຺ຓນານໂຍ ນິຏ຺ຐິໂຕ.