໗. ສງ຺ຆເຠທກກ຺ຂນ຺ຘໂກ

ຉສກ຺ຍປພ຺ພຊ຺ຊາກຖາທິວຓ຺ຓນາ

໓໓໐. ສງ຺ຆເຠທກກ຺ຂນ຺ຘເກ ປາຬິຍໍ ອນຸປິຍໍ ນາມາຕິ ອນຸປິຍາ ນາມ. ເຫຏ຺ຐາ ປາສາທາຕິ ປາສາທໂຕ ເຫຏ຺ຐາ ເຫຏ຺ຐິມຕລໍ, ‘‘ເຫຏ຺ຐາປາສາທ’’ນ຺ຕິປິ ປາໂຐ. ອຠິເນຕພ຺ພນ຺ຕິ ວປິຕເຂຕ຺ເຕສຸ ປເວເສຕພ຺ພໍ. ນິນ຺ເນຕພ຺ພນ຺ຕິ ຕໂຕ ນີຫຣິຕພ຺ພໍ. ນິທ຺ຘາເປຕພ຺ພນ຺ຕິ ສສ຺ສທູສກຕິຓາທີນິ ອຸທ຺ຘຣິຕພ຺ພໍ. ອຸຊຸໍ ກາຣາເປຕພ຺ພນ຺ຕິ ປຸຎ຺ຊໍ ກາຣາເປຕພ຺ພໍ, ອຍເມວ ວາ ປາໂຐ.

໓໓໒. ປຣທຕ຺ໂຕຕິ ປເຣຫິ ທິນ຺ນປຈ຺ຈເຍຫິ ປວຕ຺ຕມາໂນ. ມິຄຠູເຕນ ເຈຕສາຕິ ກຕ຺ຖຈິ ອລຄ຺ຄຕາຍ ມິຄສ຺ສ ວິຍ ຊາເຕນ ຈິຕ຺ເຕນ.

໓໓໓. ມໂນມຍໍ ກາຍນ຺ຕິ ຌານມເນນ ນິພ຺ພຕ຺ຕໍ ພ຺ຣຫ຺ມກາຍໍ, ‘‘ກິໍ ນຸ ໂຂ ອຫໍ ປສາເທຍ຺ຍໍ, ຍສ຺ມິໍ ເມ ປສນ຺ເນ ພຫຸລາຠສກ຺ກາໂຣ ອຸປ຺ປຊ຺ເຊຍ຺ຍາ’’ຕິ ປຐມໍ ອຸປ຺ປນ຺ນປຣິວິຕກ຺ກສ຺ສ ມນ຺ທປຣິຍຸຏ຺ຐານຕາຍ ເທວທຕ຺ຕສ຺ສ ຕສ຺ມິໍ ຂເຓ ຌານປຣິຫານິ ນາໂຫສິ, ປຈ຺ຉາ ເອວ ອໂຫສີຕິ ທຏ຺ຐພ຺ພໍ. ເຕນາຫ ‘‘ສຫ ຈິຕ຺ຕຸປ຺ປາທາ’’ຕິອາທິ. ທ຺ເວ ວາ ຕີຓິ ວາ ມາຄຘການິ ຄາມເຂຕ຺ຕານີຕິ ເອຕ຺ຖ ມຄຘຣຏ຺ເຐ ຂຸທ຺ທກໍ ຄາມເຂຕ຺ຕໍ ຄາວຸຕມຕ຺ຕໍ, ມຊ຺ຌິມໍ ປນ ທິຍຑ຺ຒຄາວຸຕມຕ຺ຕໍ, ມຫນ຺ຕໍ ອເນກໂຍຊນມ຺ປິ ໂຫຕິ. ເຕສຸ ມຊ຺ຌິເມນ ຄາມເຂຕ຺ເຕນ ທ຺ເວ ວາ ຂຸທ຺ທເກນ ຕີຓິ ວາ ຄາມເຂຕ຺ຕານິ, ຕສ຺ສ ສຣີຣໍ ຕິຄາວຸຕປ຺ປມາໂຓ ອຕ຺ຕຠາໂວຕິ ວຸຕ຺ຕໍ ໂຫຕິ.

໓໓໔. ສຕ຺ຖາໂຣຕິ ຄຓສຕ຺ຖາໂຣ. ນາສ຺ສສ຺ສາຕິ ນ ເອຕສ຺ສ ຠເວຍ຺ຍ. ຕນ຺ຕິ ສຕ຺ຖາຣໍ. ເຕນາຕິ ອມນາເປນ. ສມ຺ມນ຺ນຕີຕິ ຈີວຣາທິນາ ອມ຺ຫາກໍ ສມ຺ມານໍ ກໂຣຕິ, ປເຣຫິ ວາ ອຍໍ ສຕ຺ຖາ ສມ຺ມານີຍຕີຕິ ອຕ຺ໂຖ.

໓໓໕. ນາສາຍ ປິຕ຺ຕໍ ຠິນ຺ເທຍ຺ຍຸນ຺ຕິ ອຈ຺ຉປິຕ຺ຕໍ ວາ ມຈ຺ຉປິຕ຺ຕໍ ວາ ນາສາປຸເຏ ປກ຺ຂິເປຍ຺ຍຸໍ. ອສ຺ສຕຣີຕິ ວຬວາຍ ກຸຈ຺ຉິສ຺ມິໍ ຄທ຺ຣຠສ຺ສ ຊາຕາ. ຕສ຺ສາ ຫິ ຄຫິຕຄພ຺ຠາຍ ວິຊາຍິຕຸມສກ຺ໂກນ຺ຕິຍາ ອຸທຣໍ ຜາເລຕ຺ວາ ໂປຕກໍ ນີຫຣນ຺ຕິ. ເຕນາຫ ‘‘ອຕ຺ຕວຘາຍ ຄພ຺ຠໍ ຄຓ຺ຫາຕີ’’ຕິ.

໓໓໙. ໂປຕ຺ຖນິກນ຺ຕິ ຉຸຣິກໍ, ‘‘ຂຣ’’ນ຺ຕິປິ ວຸຈ຺ຈຕິ.

໓໔໒. ມາ ກຸຎ຺ຊຣ ນາຄມາສໂທຕິ ເຫ ກຸຎ຺ຊຣ ພຸທ຺ຘນາຄໍ ວຘກຈິຕ຺ເຕນ ມາ ອຸປຄຈ຺ຉ. ທຸກ຺ຂນ຺ຕິ ທຸກ຺ຂກາຣຓຕ຺ຕາ ທຸກ຺ຂໍ. ອິໂຕຕິ ອິໂຕ ຊາຕິໂຕ. ຍໂຕຕິ ຍສ຺ມາ, ຍນ຺ຕສ຺ສ ວາ, ຄຈ຺ຉນ຺ຕສ຺ສາຕິ ອຕ຺ໂຖ. ມາ ຈ ມໂທຕິ ມໂທ ຕຍາ ນ ກາຕພ຺ໂພຕິ ອຕ຺ໂຖ.

໓໔໓. ຕິກໂຠຊນນ຺ຕິ ຕີຫິ ຠຸຎ຺ຊິຕພ຺ພໍ ໂຠຊນໍ, ຕໂຕ ອຘິເກຫິ ເອກໂຕ ປຏິຄ຺ຄເຫຕ຺ວາ ຠຸຎ຺ຊິຕຸໍ ນ ວຏ຺ຏນກໍ ຄຓໂຠຊນປຏິປກ຺ຂໍ ໂຠຊນນ຺ຕິ ອຕ຺ໂຖ. ໂກກາລິໂກຕິອາທີນິ ເທວທຕ຺ຕປຣິສາຍ ຄຓປາໂມກ຺ຂານໍ ນາມານິ. ກປ຺ປນ຺ຕິ ມຫານິຣເຍ ອາຍຸກປ຺ປໍ, ຕໍ ອນ຺ຕຣກປ຺ປນ຺ຕິ ເກຈິ. ເກຈິ ປນ ‘‘ອສງ຺ຂ຺ເຍຍ຺ຍກປ຺ປ’’ນ຺ຕິ.

ຉສກ຺ຍປພ຺ພຊ຺ຊາກຖາທິວຓ຺ຓນາ ນິຏ຺ຐິຕາ.

ສງ຺ຆເຠທກກຖາວຓ຺ຓນາ

໓໔໕. ປຣສ຺ສ ຈິຕ຺ຕໍ ຎຕ຺ວາ ກຖນໍ ອາເທສນາປາຏິຫາຣິຍໍ. ເກວລໍ ຘມ຺ມເທສນາ ອນຸສາສນີປາຏິຫາຣິຍໍ. ຕທຸຠຍມ຺ປິ ຘມ຺ມີ ກຖາ ນາມ. ຕາຍ ເຖໂຣ ໂອວທິ. ອິທ຺ຘິວິຘໍ ອິທ຺ຘິປາຏິຫາຣິຍໍ ນາມ. ເຕນ ສຫິຕາ ອນຸສາສນີ ເອວ ຘມ຺ມີ ກຖາ. ຕາຍ ເຖໂຣ ໂອວທິ.

‘‘ຖຸລ຺ລຈ຺ຈຍໍ ເທສາເປຫີ’’ຕິ ອິທໍ ເຠທປຸເຣກ຺ຂາຣສ຺ສ ອຸໂປສຖາທິກຣເຓ ຖຸລ຺ລຈ຺ຈຍສ຺ສ ອຸໂປສຖກ຺ຂນ຺ຘກາທີສຸ ປຐມເມວ ປຎ຺ຎຕ຺ຕຕ຺ຕາ ວຸຕ຺ຕໍ, ອິຕຣຖາ ເອເຕສໍ ອາທິກມ຺ມິກຕ຺ຕາ ອນາປຕ຺ຕິເຍວ ສິຍາ.

໓໔໖. ສຣສີຕິ ສໂຣ. ມຫິໍ ວິກ຺ຣຸພ຺ພໂຕຕິ ມຫິໍ ທນ຺ເຕຫິ ວິລິຂນ຺ຕສ຺ສ. ອິທຎ຺ຈ ຫຕ຺ຖີນໍ ສຠາວທສ຺ສນໍ. ນທີສູຕິ ສເຣສຸ. ຠິສໍ ຆສມານສ຺ສາຕິ ໂຍຊນາ. ຊຄ຺ຄໂຕຕິ ຍູຖໍ ປາເລນ຺ຕສ຺ສ.

໓໔໗. ທູເຕຍ຺ຍໍ ຄນ຺ຕຸນ຺ຕິ ທູຕກມ຺ມໍ ປຕ຺ຕຸໍ, ທູຕກມ຺ມໍ ກາຕຸນ຺ຕິ ອຕ຺ໂຖ. ສຫິຕາສຫິຕສ຺ສາຕິ ຍຸຕ຺ຕາຍຸຕ຺ຕສ຺ສ, ຍໍ ວຕ຺ຕຸໍ, ກາຕຸຎ຺ຈ ຍຸຕ຺ຕໍ, ຕຕ຺ຖ ກຸສໂລ. ອຖ ວາ ອຘິປ຺ເປຕານາຘິປ຺ເປຕສ຺ສ ວຈນສ຺ສ ກຸສໂລ, ພ຺ຍຎ຺ຊນມຕ຺ເຕ ນ ຕິຏ຺ຐຕິ, ອຘິປ຺ເປຕຕ຺ຖເມວ ອາໂຣເຈຕີຕິ ອຕ຺ໂຖ.

໓໕໐. ຄາຖາສຸ ຊາຕູຕິ ເອກໍເສນ. ມາ ອຸທປຊ຺ຊຖ ມາ ໂຫຕູຕິ ອຕ຺ໂຖ. ປາປິຈ຺ຉານໍ ຍຖາຄຕີຕິ ປາປິຈ຺ຉານໍ ປຸຄ຺ຄລານໍ ຍາທິສີ ຄຕິ ອຠິສມ຺ປຣາໂຍ. ຕໍ ອຕ຺ຖຊາຕໍ. ອິມິນາປິ ກາຣເຓນ ຊານາຖາຕິ ເທວທຕ຺ຕສ຺ສ ‘‘ປຓ຺ຑິໂຕ’’ຕິອາທິນາ ອຸປຣິ ວກ຺ຂມານາກາຣໍ ທສ຺ເສຕິ.

ປມາທໍ ອນຸຈິຓ຺ໂຓຕິ ປມາທໍ ອາປນ຺ໂນ. ອາສີສາຍນ຺ຕິ ອວສ຺ສໍຠາວີອຕ຺ຖສິທ຺ຘິຍໍ. ສາ ຫິ ອິຘ ອາສີສາຕິ ອຘິປ຺ເປຕາ, ນ ປຕ຺ຖນາ. ອີທິເສ ອນາຄຕຕ຺ເຖ ອຕີຕວຈນໍ ສທ຺ທວິທູ ອິຈ຺ຉນ຺ຕິ.

ທຸພ຺ເຠຕິ ທຸພ຺ເຠຍ຺ຍ. ວິສກຸມ຺ເຠນາຕິ ເອເກນ ວິສປຸຓ຺ຓກຸມ຺ເຠນ. ໂສຕິ ໂສ ປຸຄ຺ຄໂລ. ນ ປທູເສຍ຺ຍ ວິສມິສ຺ສໍ ກາຕຸໍ ນ ສກ຺ໂກຕີຕິ ອຕ຺ໂຖ. ຠຍານໂກຕິ ວິປຸລຄມ຺ຠີຣຠາເວນ ຠຍານໂກ. ເຕນາປິ ທູເສຕຸໍ ນ ສກ຺ກຸເຓຍ຺ຍຕໍ ທສ຺ເສຕິ. ວາເທນາຕິ ໂທສກຖເນນ. ອຸປຫິໍສຕີຕິ ພາຘຕິ.

ສງ຺ຆເຠທກກຖາວຓ຺ຓນາ ນິຏ຺ຐິຕາ.

ອຸປາລິປຎ຺ຫາກຖາວຓ຺ຓນາ

໓໕໑. ນ ປນ ເອຕ຺ຕາວຕາ ສງ຺ໂຆ ຠິນ຺ໂນ ໂຫຕີຕິ ສລາກຄ຺ຄາຫາປນມຕ຺ເຕນ ສງ຺ຆເຠທານິພ຺ພຕ຺ຕິໂຕ ວຸຕ຺ຕໍ. ອຸໂປສຖາທິສງ຺ຆກມ຺ເມ ກເຕ ເອວ ຫິ ສງ຺ໂຆ ຠິນ຺ໂນ ໂຫຕິ. ຕຕ຺ຖ ຈ ອຸໂປສຖປວາຣຓາສຸ ຎຕ຺ຕິນິຏ຺ຐາເນນ, ເສສກມ຺ເມສຸ ອປໂລກນາທິກມ຺ມປຣິໂຍສາເນນ ສງ຺ຆເຠໂທ ສມຕ຺ໂຖຕິ ທຏ຺ຐພ຺ໂພ.

‘‘ອຠພ຺ພຕາ ນ ວຸຕ຺ຕາ’’ຕິ ອິທໍ ‘‘ຠິກ຺ຂເວ, ເທວທຕ຺ເຕນ ປຐມໍ ອານນ຺ຕຣິຍກມ຺ມໍ ອຸປຈິຕ’’ນ຺ຕິອາທິນາ ອານນ຺ຕຣິຍຕ຺ຕໍ ວທຕາ ຠຄວຕາ ຕສ຺ສ ອຠພ຺ພຕາສງ຺ຂາຕາ ປາຣາຊິກຕາ ນ ປຎ຺ຎຕ຺ຕາ. ເອເຕນ ອາປຕ຺ຕິ ວິຍ ອຠພ຺ພຕາປິ ປຎ຺ຎຕ຺ຕິອນນ຺ຕຣເມວ ໂຫຕິ, ນ ຕໂຕ ປຸເຣຕິ ທສ຺ເສຕິ. ອິຘ ປນ ອາທິກມ຺ມິກສ຺ສປິ ອນາປຕ຺ຕິຍາ ອວຸຕ຺ຕຕ຺ຕາ ເທວທຕ຺ຕາທໂຍປິ ນ ມຸຕ຺ຕາຕິ ທຏ຺ຐພ຺ພໍ.

ຕໂຍ ສຕິປຏ຺ຐານາຕິອາທີສຸ ຕໂຍ ເອວ ສຕິປຏ຺ຐານາ, ນ ຕໂຕ ປຣນ຺ຕິ ເອກສ຺ສ ສຕິປຏ຺ຐານສ຺ສ ປຏິກ຺ເຂໂປວ ອິຘ ອຘມ຺ໂມ, ນ ປນ ຕິຓ຺ຓໍ ສຕິປຏ຺ຐານຕ຺ຕວິຘານໍ ຕສ຺ສ ຘມ຺ມຕ຺ຕາ. ເອວໍ ເສເສສຸປິ ຫາປນໂກຏ຺ຐາເສສຸ. ວຑ຺ຒເນສຸ ປນ ຉ ອິນ຺ທ຺ຣິຍານີຕິ ອນິນ຺ທ຺ຣິຍສ຺ສປິ ເອກສ຺ສ ອິນ຺ທ຺ຣິຍຕ຺ຕວິຘານເມວ ອຘມ຺ໂມ. ເອວໍ ເສເສສຸປິ. ນ ເກວລຎ຺ຈ ເອເຕວ, ‘‘ຈຕ຺ຕາໂຣ ຂນ຺ຘາ, ເຕຣສາຍຕນານີ’’ຕິອາທິນາ ຍຕ຺ຖ ກຕ຺ຖຈິ ວິປຣີຕໂຕ ປກາສນໍ ສພ຺ພໍ ອຘມ຺ໂມ. ຍາຖາວໂຕ ປກາສນຎ຺ຈ ສພ຺ພໍ ຘມ຺ໂມຕິ ທຏ຺ຐພ຺ພໍ. ປກາສນນ຺ຕິ ເຈຕ຺ຖ ຕຖາ ຕຖາ ກາຍວຈີປໂຍຄສມຸຏ຺ຐາປິກາ ອຣູປກ຺ຂນ຺ຘາວ ອຘິປ຺ເປຕາ, ເອວເມຕ຺ຖ ທສກຸສລກມ຺ມປຖາທີສຸ ອນວຊ຺ຊຏ຺ເຐນ ສຣູປໂຕ ຘມ຺ເມສຸ, ອກຸສລກມ຺ມປຖາທີສຸ ສາວຊ຺ຊຏ຺ເຐນ ສຣູປໂຕ ອຘມ຺ເມສຸ ຈ ຕທຎ຺ເຎສຸ ຈ ອພ຺ຍາກເຕສຸ ຍສ຺ສ ກສ຺ສຈິ ໂກຏ຺ຐາສສ຺ສ ຠຄວຕາ ປຎ຺ຎຕ຺ຕກ຺ກເມເນວ ປກາສນໍ ‘‘ຘມ຺ໂມ’’ຕິ ຈ ວິປຣີຕໂຕ ປກາສນໍ ‘‘ອຘມ຺ໂມ’’ຕິ ຈ ທສ຺ສິຕນ຺ຕິ ທຏ຺ຐພ຺ພໍ. ກາມຎ຺ເຈຕ຺ຖ ວິນຍາທໂຍປິ ຍຖາຠູຕໂຕ, ອຍຖາຠູຕໂຕ ຈ ປກາສນວເສນ ຘມ຺ມາຘມ຺ເມສຸ ເອວ ປວິສນ຺ຕິ, ວິນຍາທິນາເມນ ປນ ວິເສເສຕ຺ວາ ວິສຸໍ ຄຫິຕຕ຺ຕາ ຕທວເສສເມວ ຘມ຺ມາຘມ຺ມໂກຏ຺ຐາເສ ປວິສຕີຕິ ທຏ຺ຐພ຺ພໍ.

ອິມໍ ອຘມ຺ມໍ ຘມ຺ໂມຕິ ກຣິສ຺ສາມາຕິອາທິ ຘມ຺ມຎ຺ຈ ອຘມ຺ມຎ຺ຈ ຍາຖາວໂຕ ຎຕ຺ວາວ ປາປິຈ຺ຉໍ ນິສ຺ສາຍ ວິປຣີຕໂຕ ປກາເສນ຺ຕສ຺ເສວ ສງ຺ຆເຠໂທ ໂຫຕິ, ນ ປນ ຕຖາສຎ຺ຎາຍ ປກາເສນ຺ຕສ຺ສາຕິ ທສ຺ສນຕ຺ຖໍ ວຸຕ຺ຕໍ. ເອສ ນໂຍ ‘‘ອວິນຍໍ ວິນໂຍຕິ ທີເປນ຺ຕີ’’ຕິອາທີສຸປິ. ຕຕ຺ຖ ນິຍ຺ຍານິກນ຺ຕິ ອຸກ຺ກຏ຺ຐນ຺ຕິ ອຕ຺ໂຖ. ‘‘ຕເຖວາ’’ຕິ ອິມິນາ ‘‘ເອວໍ ອມ຺ຫາກໍ ອາຈຣິຍກຸລ’’ນ຺ຕິອາທິນາ ວຸຕ຺ຕມຕ຺ຖໍ ອາກຑ຺ຒຕິ.

ສໍວໂຣ ປຫານໍ ປຏິສງ຺ຂາຕິ ສໍວຣວິນໂຍ, ປຫານວິນໂຍ, ປຏິສງ຺ຂາວິນໂຍ ຈ ວຸຕ຺ໂຕ. ເຕນາຫ ‘‘ອຍໍ ວິນໂຍ’’ຕິ. ‘‘ປຎ຺ຎຕ຺ຕໍ ອປຎ຺ຎຕ຺ຕ’’ນ຺ຕິ ທຸກໍ ‘‘ຠາສິຕໍ ອຠາສິຕ’’ນ຺ຕິ ທຸເກນ ອຕ຺ຖໂຕ ສມານເມວ, ຕຖາ ທຸຏ຺ຐຸລ຺ລທຸກໍ ຄຣຸກທຸເກນ. ເຕເນວ ເຕສໍ ‘‘ຈຕ຺ຕາໂຣ ສຕິປຏ຺ຐານາ…ເປ… ອິທໍ ອປຎ຺ຎຕ຺ຕໍ ນາມາ’’ຕິອາທິນາ ສທິສນິທ຺ເທໂສ ກໂຕ. ສາວເສສາປຕ຺ຕິນ຺ຕິ ອວເສສສີເລຫິ ສຫິຕາປຕ຺ຕິໍ. ນຕ຺ຖິ ເອຕິສ຺ສໍ ອາປນ຺ນາຍໍ ສີລາວເສສາຕິ ອນວເສສາປຕ຺ຕິ.

໓໕໔. ປາຬິຍໍ ສມຄ຺ຄານຎ຺ຈ ອນຸຄ຺ຄໂຫຕິ ຍຖາ ສມຄ຺ຄານໍ ສາມຄ຺ຄີ ນ ຠິຊ຺ຊຕິ, ເອວໍ ອນຸຄ຺ຄຫຓໍ ອນຸພລປ຺ປທານໍ.

໓໕໕. ສິຍາ ນຸ ໂຂຕິ ສມ຺ຠເວຍ຺ຍ ນຸ ໂຂ. ຕສ຺ມິໍ ອຘມ຺ມທິຏ຺ຐີຕິ ອຕ຺ຕໂນ ‘‘ອຘມ຺ມໍ ຘມ຺ໂມ’’ຕິ ເອຕສ຺ມິໍ ທີປເນ ອຍຸຕ຺ຕທິຏ຺ຐິ. ເຠເທ ອຘມ຺ມທິຏ຺ຐີຕິ ‘‘ອຘມ຺ມໍ ຘມ຺ໂມ’’ຕິ ທີເປຕ຺ວາ ອນຸສ຺ສາວນສລາກຄ຺ຄາຫາປນາທິນາ ອຕ຺ຕານໍ ມຸຎ຺ຈິຕ຺ວາ ຈຕຸວຄ຺ຄາທິກໍ ສງ຺ຆໍ ເອກສີມາຍເມວ ຐິຕໂຕ ຈຕຸວຄ຺ຄາທິສງ຺ຆໂຕ ວິໂຍເຊຕ຺ວາ ເອກກມ຺ມາທິນິປ຺ຜາທນວເສນ ສງ຺ຆເຠທກຣເຓ ອຘມ຺ມທິຏ຺ຐິໂກ ຫຸຕ຺ວາຕິ ອຕ຺ໂຖ. ວິນິຘາຍ ທິຏ຺ຐິນ຺ຕິ ຍາ ຕສ຺ມິໍ ‘‘ອຘມ຺ມໍ ຘມ຺ໂມ’’ຕິ ທີປເນ ອຕ຺ຕໂນ ອຘມ຺ມທິຏ຺ຐິ ອຸປ຺ປຊ຺ຊຕິ, ຕໍ ວິນິຘາຍ ປຏິຈ຺ຉາເທຕ຺ວາ ‘‘ຘມ຺ໂມ ເອວາຍ’’ນ຺ຕິ ວິປຣີຕໂຕ ປກາເສຕ຺ວາຕິ ອຕ຺ໂຖ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ເຠເທ ຘມ຺ມທິຏ຺ຐີຕິ ຍຖາວຸຕ຺ຕນເຍນ ສງ຺ຆເຠທເນ ໂທໂສ ນຕ຺ຖີຕິ ລທ຺ຘິໂກ. ອຍໍ ປນ ‘‘ອຘມ຺ມໍ ຘມ຺ໂມ’’ຕິ ທີປເນ ອຘມ຺ມທິຏ຺ຐິໂກ ຫຸຕ຺ວາປິ ຕໍ ທິຏ຺ຐິໍ ວິນິຘາຍ ກຣເຓນ ສງ຺ຆເຠທໂກ ອເຕກິຈ຺ໂຉ ຊາໂຕ. ເອວໍ ເຠເທ ເວມຕິໂກຕິ ອິມສ຺ສ ປນ ເຠເທ ເວມຕິກທິຏ຺ຐິຍາ ວິນິຘານມ຺ປິ ອຕ຺ຖິ. ເສສໍ ສມເມວ. ຕສ຺ມິໍ ຘມ຺ມທິຏ຺ຐິເຠເທ ອຘມ຺ມທິຏ຺ຐີຕິ ອຍໍ ປນ ເຠເທ ອຘມ຺ມທິຏ຺ຐິໍ ວິນິຘາຍ ກຕຕ຺ຕາ ສງ຺ຆເຠທໂກ ອເຕກິຈ຺ໂຉ ຊາໂຕ. ສຸກ຺ກປກ຺ເຂ ປນ ສພ຺ພຕ຺ຖ ‘‘ອຘມ຺ມໍ ຘມ຺ໂມ’’ຕິອາທິທີປເນ ວາ ເຠເທ ວາ ຘມ຺ມທິຏ຺ຐິຕາຍ ທິຏ຺ຐິໍ ອວິນິຘາເຍວ ກຕຕ຺ຕາ ສງ຺ຆເຠທໂກປິ ສເຕກິຈ຺ໂຉ ຊາໂຕ. ຕສ຺ມາ ‘‘ອຘມ຺ມໍ ຘມ຺ໂມ’’ຕິອາທິທີປເນ ວາ ສງ຺ຆເຠເທ ວາ ອຸໂຠສຸປິ ວາ ອຘມ຺ມທິຏ຺ຐິ ວາ ເວມຕິໂກ ວາ ຫຸຕ຺ວາ ຕໍ ທິຏ຺ຐິໍ, ວິມຕິຎ຺ຈ ວິນິຘາຍ ‘‘ຘມ຺ໂມ’’ຕິ ປກາເສຕ຺ວາ ວຸຕ຺ຕນເຍນ ສງ຺ຆເຠທໍ ກໂຣນ຺ຕສ຺ເສວ ອານນ຺ຕຣິຍໍ ໂຫຕີຕິ ເວທິຕພ຺ພໍ.

ອຸປາລິປຎ຺ຫາກຖາວຓ຺ຓນາ ນິຏ຺ຐິຕາ.

ສງ຺ຆເຠທກກ຺ຂນ຺ຘກວຓ຺ຓນານໂຍ ນິຏ຺ຐິໂຕ.