໔. ສມຖກ຺ຂນ຺ຘໂກ

ສຕິວິນຍກຖາທິວຓ຺ຓນາ

໑໙໕. ສມຖກ຺ຂນ຺ຘເກ ຂີຓາສວສ຺ສ ວິປຸລສຕິໍ ນິສ຺ສາຍ ທາຕພ຺ໂພ ວິນໂຍ ໂຈທນາທິອສາຣຸປ຺ປານໍ ວິນຍນຸປາໂຍ ສຕິວິນໂຍ.

໑໙໖. ຈິຕ຺ຕວິປຣິຍາສກໂຕຕິ ກຕຈິຕ຺ຕວິປຣິຍາໂສ. ຄຄ຺ຄໍ ຠິກ຺ຂຸໍ…ເປ… ໂຈເທນ຺ຕີຕິ ເອຕ຺ຖ ປນ ອຸມ຺ມຕ຺ຕກສ຺ສ ອິທໍ ອຸມ຺ມຕ຺ຕກໍ, ອຊ຺ຌາຈິຓ຺ຓໍ. ຕເທວ ຈິຕ຺ຕວິປຣິຍາເສນ ກຕນ຺ຕິ ຈິຕ຺ຕວິປຣິຍາສກຕໍ. ເຕນ ອຸມ຺ມຕ຺ຕເກນ ຈິຕ຺ຕວິປຣິຍາສກເຕນ ອຊ຺ຌາຈິຓ຺ເຓນ ອນາຈາເຣນ ອາປນ຺ນາຍ ອາປຕ຺ຕິຍາ ຄຄ຺ຄໍ ຠິກ຺ຂຸໍ ໂຈເທນ຺ຕີຕິ ເອວມຕ຺ໂຖ ທຏ຺ຐພ຺ໂພ. ປຐມໍ ມູຬ຺ໂຫ ຫຸຕ຺ວາ ປຈ຺ຉາ ອມູຬ຺ຫຠາວໍ ອຸປຄຕສ຺ສ ທາຕພ຺ໂພ ວິນໂຍ ອມູຬ຺ຫວິນໂຍ.

໒໐໒. ຘມ຺ມວາທີນໍ ເຍຠຸຍ຺ຍຠາວສມ຺ປາທິກາ ກິຣິຍາ ເຍຠຸຍ຺ຍສິກາຕິ ອິມສ຺ມິໍ ອຕ຺ເຖ ສ-ກາຣາຄມສຫິໂຕ ອິກ-ປຈ຺ຈຍນ຺ໂຕຍໍ ສທ຺ໂທຕິ ທສ຺ເສຕຸໍ ອາຫ ‘‘ຍສ຺ສາ’’ຕິອາທິ. ຕຕ຺ຖ ຍສ຺ສາ ກິຣິຍາຍາຕິ ຄູຬ຺ຫກວິວຏ຺ຏກາທິນາ ສລາກຄ຺ຄາຫາປກກິຣິຍາຍ. ເຍຠຸຍ຺ຍຠາວໍ ນິສ຺ສິຕສມຖກິຣິຍາ ເຍຠຸຍ຺ຍສິກາຕິ ເອວໍ ເຍຠຸຍ຺ຍສິກາສທ຺ທສ຺ສ ອຕ຺ໂຖ ຄເຫຕພ຺ໂພ. ເອວຎ຺ຫິ ອຍໍ ອຘິກຣຓສມໂຖ ນາມ ໂຫຕິ. ຍຖາວຸຕ຺ຕສລາກຄ຺ຄາເຫນ ຫິ ຘມ຺ມວາທີນໍ ເຍຠຸຍ຺ຍຠາເວ ສິທ຺ເຘ ປຈ຺ຉາ ຕໍ ເຍຠຸຍ຺ຍຠາວໍ ນິສ຺ສາເຍວ ອຘິກຣຓວູປສໂມ ໂຫຕິ, ນ ຘມ຺ມວາທີນໍ ພຫຸຕຣຠາວສາຘກກິຣິຍາມຕ຺ເຕນ.

໒໐໗. ‘‘ເສສເມຕ຺ຖ ຕຊ຺ຊນີຍາທີສຸ ວຸຕ຺ຕນຍເມວາ’’ຕິ ເອເຕນ ຕຊ຺ຊນີຍາທິສຕ຺ຕກມ຺ມານິ ວິຍ ອິທມ຺ປິ ຕສ຺ສປາປິຍສິກາກມ຺ມໍ ອສຸຈິຠາວາທິໂທສຍຸຕ຺ຕສ຺ສ, ສງ຺ຆສ຺ສ ຈ ວິນິຈ຺ຉເຍ ອຕິຏ຺ຐມານສ຺ສ ກຕ຺ຕພ຺ພໍ ວິສຸໍ ເອກໍ ນິຄ຺ຄຫກມ຺ມນ຺ຕິ ທສ຺ເສຕິ. ເອຕສ຺ມິຎ຺ຫິ ນິຄ຺ຄຫກມ຺ເມ ກເຕ ໂສ ປຸຄ຺ຄໂລ ‘‘ອຫໍ ສຸທ຺ໂຘ’’ຕິ ອຕ຺ຕໂນ ສຸທ຺ຘິຍາ ສາຘນຕ຺ຖໍ ສງ຺ຆມຊ຺ຌໍ ໂອຕຣິຕຸໍ, ສງ຺ໂຆ ຈສ຺ສ ວິນິຈ຺ຉຍໍ ທາຕຸໍ ນ ລຠຕິ, ຕໍ ກມ຺ມກຣຓມຕ຺ເຕເນວ ຈ ຕໍ ອຘິກຣຓໍ ວູປສນ຺ຕໍ ໂຫຕິ.

ກຖໍ ປເນຕໍ ກມ຺ມໍ ປຏິປ຺ປສ຺ສມ຺ຠຕີຕິ? ເກຈິ ປເນຕ຺ຖ ‘‘ໂສ ຕຖາ ນິຄ຺ຄຫິໂຕ ນິຄ຺ຄຫິໂຕວ ໂຫຕິ, ໂອສາຣຓໍ ນ ລຠຕິ. ເຕເນວ ປາຬິຍໍ ໂອສາຣຓາ ນ ວຸຕ຺ຕາ’’ຕິ ວທນ຺ຕິ. ອຎ຺ເຎ ປນ ‘‘ປາຬິຍໍ ນ ອຸປສມ຺ປາເທຕພ຺ພນ຺ຕິອາທິນາ ສມ຺ມາວຕ຺ຕນສ຺ສ ວຸຕ຺ຕຕ຺ຕາ ສມ຺ມາວຕ຺ຕິຕ຺ວາ ລຊ຺ຊິຘມ຺ເມ ໂອກ຺ກນ຺ຕສ຺ສ ໂອສາຣຓາ ອວຸຕ຺ຕາປິ ຕຊ຺ຊນີຍາທີສຸ ວິຍ ນຍໂຕ ກມ຺ມວາຈໍ ໂຍເຊຕ຺ວາ ໂອສາຣຓາ ກາຕພ຺ພາ ເອວາ’’ຕິ ວທນ຺ຕິ, ອິທໍ ຍຸຕ຺ຕໍ. ເຕເນວ ອຏ຺ຐກຖາຍໍ ວກ຺ຂຕິ ‘‘ສເຈ ສີລວາ ຠວິສ຺ສຕິ, ວຕ຺ຕໍ ປຣິປູເຣຕ຺ວາ ປຏິປ຺ປສ຺ສທ຺ຘິໍ ລຠິສ຺ສຕິ. ໂນ ເຈ, ຕຖານາສິຕໂກວ ຠວິສ຺ສຕີ’’ຕິ (ຈູຬວ. ອຏ຺ຐ. ໒໓໘). ຕສ຺ສປາປິຍສິກາກມ຺ມນ຺ຕິ ຈ ອລຸຕ຺ຕສມາໂສເຍວ. ເຕນາຫ ‘‘ອິທໍ ຫີ’’ຕິ ອາທິ.

ສຕິວິນຍກຖາທິວຓ຺ຓນາ ນິຏ຺ຐິຕາ.

ອຘິກຣຓກຖາວຓ຺ຓນາ

໒໑໕. ວິຣູປໂຕ ວິປຣິຓາມຏ຺ເຐນ ຈິຕ຺ຕໍ ທຸກ຺ຂໍ ວິປຈ຺ຈຕີຕິ ອາຫ ‘‘ຈິຕ຺ຕທຸກ຺ຂຕ຺ຖໍ ໂວຫາໂຣ’’ຕິອາທິ. ອຸປວທນາຕິ ໂຈທນາ. ຕຕ຺ເຖວາຕິ ອນຸວທເນ.

ອາທິໂຕ ປຏ຺ຐາຍ ຈ ຕສ຺ສ ຕສ຺ສ ກມ຺ມສ຺ສ ວິຎ຺ຎາຕຕ຺ຕາຕິ ວິຕ຺ຖາຣໂຕ ອາຄຕກມ຺ມວຄ຺ຄສ຺ສ ອາທິໂຕ ປຏ຺ຐາຍ ວຓ຺ຓນາມຸເຂນ ວິຎ຺ຎາຕຕ຺ຕາ ວິນິຈ຺ຉໂຍ ຠວິສ຺ສຕີຕິ ໂຍຊນາ.

໒໑໖. ປາຬິຍໍ ອຊ຺ຌຕ຺ຕໍ ວາຕິ ອຕ຺ຕນິ ວາ ອຕ຺ຕໂນ ປຣິສາຍ ວາ. ພຫິທ຺ຘາ ວາຕິ ປຣສ຺ມິໍ ວາ ປຣສ຺ສ ປຣິສາຍ ວາ. ອນວສ຺ສວາຍາຕິ ອນຸປ຺ປາທາຍ.

໒໒໐. ‘‘ວິວາທາຘິກຣຓໍ ກຸສລໍ ອກຸສລໍ ອພ຺ຍາກຕ’’ນ຺ຕິ ອິທໍ ປຸຈ຺ຉາວຈນໍ. ວິວາທາຘິກຣຓໍ ສິຍາ ກຸສລນ຺ຕິອາທິ ວິສຊ຺ຊນໍ. ເອສ ນໂຍ ເສເສສຸປິ.

໒໒໒. ສມ຺ມຸຕິສຠາວາຍປິ ອາປຕ຺ຕິຍາ ກາຣຓູປຈາເຣນ ອກຸສລາພ຺ຍາກຕຠາເວນ ວຸຈ຺ຈມາເນ ກຸສລສ຺ສາປິ ອາປຕ຺ຕິກາຣຓຕ຺ຕາ ຕທຸປຈາເຣນ ‘‘ອາປຕ຺ຕາຘິກຣຓໍ ສິຍາ ກຸສລ’’ນ຺ຕິ ວຕ຺ຕພ຺ພໍ ຠເວຍ຺ຍ, ຕຖາ ອວຕ຺ວາ ‘‘ນຕ຺ຖິ ອາປຕ຺ຕາຘິກຣຓໍ ກຸສລ’’ນ຺ຕິ ເອວໍວຈນສ຺ສ ກາຣຓໍ ທສ຺ເສຕຸໍ ‘‘ເອຕ຺ຖ ສນ຺ຘາຍຠາສິຕວເສນ ອຕ຺ໂຖ ເວທິຕພ຺ໂພ’’ຕິ ວຸຕ຺ຕໍ. ເອຕ຺ຖ ຈາຍມຘິປ຺ປາໂຍ – ຍທິ ຫິ ອາປຕ຺ຕິ ນາມ ປຣມຕ຺ຖຘມ຺ມສຠາວາ ຠເວຍ຺ຍ, ຕທາ ‘‘ອາປຕ຺ຕາຘິກຣຓໍ ສິຍາ ອກຸສລ’’ນ຺ຕິອາທິວຈນໍ ຍຸຊ຺ເຊຍ຺ຍ. ຍສ຺ມາ ທຸຏ຺ຐໂທສສິກ຺ຂາປທຏ຺ຐກຖາທີສຸ ທສ຺ສິຕໂທສປ຺ປສງ຺ຄໂຕ ປຣມຕ຺ຖສຠອາວຕາ ນ ຍຸຕ຺ຕາ, ເອກນ຺ຕສມ຺ມຸຕິສຠາວາ ເອວ ສາ ໂຫຕິ, ຕສ຺ມາ ‘‘ສິຍາ ອກຸສລໍ ສິຍາ ອພ຺ຍາກຕ’’ນ຺ຕິປິ ນິປ຺ປຣິຍາຍໂຕ ນ ວຕ຺ຕພ຺ພາ. ຍທິ ປນ ອກຸສລອພ຺ຍາກຕຘມ຺ມສມຸຏ຺ຐິຕຕ຺ຕເມວ ອຸປາທາຍ ປຣິຍາຍໂຕ ‘‘ສິຍາ ອກຸສລໍ ສິຍາ ອພ຺ຍາກຕ’’ນ຺ຕິ ວຸຕ຺ຕໍ. ຕທາ ກຸສລຘມ຺ມສມອຸຏ຺ຐິຕຕ຺ຕມ຺ປິ ອຸປາທາຍ ປຣິຍາຍໂຕ ‘‘ອາປຕ຺ຕາຘິກຣຓໍ ສິຍາ ກຸສລ’’ນ຺ຕິປິ ວຕ຺ຕພ຺ພໍ ຠເວຍ຺ຍ. ຍໂຕ ເຈຕໍ ວຈນໍ ອາປຕ຺ຕິຍາ ອກຸສລາພ຺ຍາກຕູປຈາຣາຣຫຕ຺ຕສ຺ສ ກຸສລູປຈາຣານາຣຫຕ຺ຕສ຺ສ ວິສຸໍ ກາຣຓສພ຺ຠາວໍ ສນ຺ຘາຍ ຠາສິຕໍ, ຕສ຺ມາ ຍໍ ຕໍ ກາຣຓວິເສສໍ ສນ຺ຘາຍ ອິທໍ ຠາສິຕໍ, ຕສ຺ສ ວເສເນເວຕ຺ຖ ອຕ຺ໂຖ ເວທິຕພ຺ໂພ.

ອິທານິ ປນ ໂຍ ອງ຺ຄປ຺ປໂຫນກຈິຕ຺ຕເມວ ສນ຺ຘາຍ ອາປຕ຺ຕິຍາ ອກຸສລາທິຠາໂວ ວຸຕ຺ໂຕ, ນາຎ຺ຎໍ ວິເສສກາຣຓໍ ສນ຺ຘາຍາຕິ ຄຓ຺ເຫຍ຺ຍ, ຕສ຺ສ ຄາເຫ ໂທສໍ ທສ຺ເສນ຺ໂຕ ‘‘ຍສ຺ມິໍ ຫີ’’ຕິອາທິມາຫ. ຕຕ຺ຖ ປຖວີຂຓນາທິເກຕິ ປຖວີຂຓນາທິນິມິຕ຺ເຕ ປຓ຺ຓຕ຺ຕິວຊ຺ເຊ. ອາປຕ຺ຕາຘິກຣເຓ ກຸສລຈິຕ຺ຕໍ ອງ຺ຄນ຺ຕິ ປຓ຺ຓຕ຺ຕິໍ ອຊານິຕ຺ວາ ກຸສລຈິຕ຺ເຕນ ເຈຕິຍງ຺ຄຓາທີສຸ ຠູມິໂສຘນາທິວເສນ ປຖວີຠູຕຄາມວິໂກປນາທິກາເລ ກຸສລຈິຕ຺ຕໍ ກາຣຓໍ ໂຫຕິ. ຕສ຺ມິໍ ສຕີຕິ ຕສ຺ມິໍ ອາປຕ຺ຕາຘິກຣເຓ ວິຊ຺ຊມາເນ ກຸສລຈິຕ຺ຕສມຸຏ຺ຐິຕຕ຺ເຕນ ກຸສລໂວຫາຣາຣຫາຍ ອາປຕ຺ຕິຍາ ວິຊ຺ຊມານາຍາຕິ ອຘິປ຺ປາໂຍ. ສາຣຕ຺ຖທີປນິຍໍ (ສາຣຕ຺ຖ. ຏີ. ຈູຬວຄ຺ຄ ໓.໒໒໒) ປນ ‘‘ຕສ຺ມິໍ ສຕີ’’ຕິ ອິມສ຺ສ ‘‘ຕສ຺ມິໍ ກຸສລຈິຕ຺ເຕ ອາປຕ຺ຕິຠາເວນ ຄຫິເຕ’’ຕິ ອຕ຺ໂຖ ວຸຕ຺ໂຕ, ຕໍ ນ ຍຸຊ຺ຊຕິ ‘‘ຍສ຺ມິ’’ນ຺ຕິ ຍ-ສທ຺ເທນ ປຣາມຏ຺ຐສ຺ເສວ ອາປຕ຺ຕາຘິກຣຓສ຺ສ ‘‘ຕສ຺ມິ’’ນ຺ຕິ ປຣາມສິຕພ຺ພໂຕ.

ນ ສກ຺ກາ ວຕ຺ຕຸນ຺ຕິ ຍທິ ສມ຺ມຸຕິສຠາວາຍປິ ອາປຕ຺ຕິຍາ ອກຸສລາທິສມຸຏ຺ຐິຕຕ຺ເຕນ ອກຸສລາທິໂວຫາໂຣ ກຣີຍຕິ, ຕທາ ກຸສລໂວຫາໂຣປິ ກຕ຺ຕພ຺ໂພຕິ ‘‘ນຕ຺ຖິ ອາປຕ຺ຕາຘິກຣຓໍ ກຸສລ’’ນ຺ຕິ ນ ສກ຺ກາ ວຕ຺ຕຸໍ, ອຎ຺ຎຖາ ອກຸສລາທິຠາໂວປິສ຺ສ ປຏິກ຺ຂິປິຕພ຺ໂພຕິ ອຘິປ຺ປາໂຍ. ຕສ຺ມາຕິ ຍສ຺ມາ ກຸສລາທີນໍ ຕິຓ຺ຓໍ ສມາເນປິ ອາປຕ຺ຕິຍາ ອງ຺ຄປ຺ປໂຫນກຕ຺ເຕ ກຸສລໂວຫາໂຣວ ອາປຕ຺ຕິຍາ ປຏິກ຺ຂິຕ຺ໂຕ, ນ ອກຸສລາທິໂວຫາໂຣ, ຕສ຺ມາ ນຍິທໍ ອງ຺ຄປ຺ປໂຫນກໍ ຈິຕ຺ຕໍ ສນ຺ຘາຍ ວຸຕ຺ຕນ຺ຕິ ‘‘ອາປຕ຺ຕາຘິກຣຓໍ ສິຍາ ອກຸສລໍ ສິຍາ ອພ຺ຍາກຕໍ, ນຕ຺ຖິ ອາປຕ຺ຕາຘິກຣຓໍ ກຸສລ’’ນ຺ຕິ ອິທໍ ອາປຕ຺ຕິຍາ ສມຸຏ຺ຐາປກຕ຺ເຕນ ອງ຺ຄປ຺ປໂຫນກໍ ກາຣຓຠູຕໍ ຈິຕ຺ຕມຕ຺ຕໍ ສນ຺ຘາຍ ນ ວຸຕ຺ຕໍ, ອຎ຺ຎຖາ ‘‘ອາປຕ຺ຕາຘິກຣຓໍ ສິຍາ ກຸສລ’’ນ຺ຕິປິ ວຕ຺ຕພ຺ພໂຕຕິ ອຘິປ຺ປາໂຍ. ເອເຕນ ອາປຕ຺ຕິຍາ ອກຸສລາທິຠາໂວປິ ເກນຈິ ນິມິຕ຺ເຕນ ປຣິຍາຍໂຕວ ວຸຕ຺ໂຕ, ນ ປຣມຕ຺ຖໂຕຕິ ທສ຺ເສຕິ. ຍຖາຫ ‘‘ຍໍ ກຸສລຈິຕ຺ເຕນ ອາປຊ຺ຊຕິ, ຕໍ ກຸສລໍ, ອິຕເຣຫິ ອິຕຣ’’ນ຺ຕິ.

ອິທໍ ປນາຕິອາທີສຸ ອຍໍ ອຘິປ຺ປາໂຍ – ‘‘ອາປຕ຺ຕາຘິກຣຓໍ ສິຍາ ອກຸສລໍ ສິຍາ ອພ຺ຍາກຕ’’ນ຺ຕິ ອິທຎ຺ຫິ ຍໍ ກິຎ຺ຈິ ກທາຈິ ກຕ຺ຖຈິ ກາຣຓໍ ຠວນ຺ຕໍ ອນິຍຕກາຣຓໍ ສນ຺ຘາຍ ວຸຕ຺ຕໍ ນ ໂຫຕິ. ຍໍ ປນ ສພ຺ພສິກ຺ຂາປເທສຸ ອາປຕ຺ຕິຍາ ກາຣຓໍ ຠວິຕຸມຣຫຕິ, ອິທເມວ ກາຣຓໍ ສນ຺ຘາຍ ວຸຕ຺ຕໍ. ອກຸສລຎ຺ຫິ ປຓ຺ຓຕ຺ຕິໍ ຎຕ຺ວາ ວີຕິກ຺ກມນ຺ຕສ຺ສ ສພ຺ພາປຕ຺ຕິຍາ ກາຣຓໍ ໂຫຕິ, ໂລກວຊ຺ຊາປຕ຺ຕິຍາ ປນ ປຓ຺ຓຕ຺ຕິໍ ອຊານນ຺ຕສ຺ສປິ ກາຣຓໍ ໂຫຕິ. ເກວລໍ ປຓ຺ຓຕ຺ຕິວຊ຺ຊາປຕ຺ຕີສຸ ກຸສລາພ຺ຍາກຕຈິຕ຺ຕປວຕ຺ຕິກ຺ຂເຓ ເອວ ອກຸສລໍ ນ ວຕ຺ຕຕິ, ຕທຎ຺ຎຕ຺ຖ ສຍເມວ ປວຕ຺ຕຕິ. ອພ຺ຍາກຕໍ ປນ ກາຍວຈີຠູຕໍ ກຸສລາກຸສລາທີນໍ ປວຕ຺ຕິກ຺ຂເຓ ນິໂຣຘສມາປນ຺ນສ຺ສ ສຫເສຍ຺ຍາປຕ຺ຕິຍນ຺ຕິ ສພ຺ພາປຕ຺ຕິຍາ ອງ຺ຄເມວ ໂຫຕິ ຉນ຺ນໍ ອາປຕ຺ຕິສມຸຏ຺ຐານານໍ ກາຍວາຈງ຺ຄວິຣຫິຕຕ຺ຕາຠາວາ. ຕສ຺ມາ ອິເມສໍ ອກຸສລາພ຺ຍາກຕານໍ ສພ຺ພາປຕ຺ຕິມູລກຕ຺ຕເມວ ສນ຺ຘາຍ ອິທໍ ອາປຕ຺ຕິຍາ ອກຸສລຕ຺ຕໍ, ອພ຺ຍາກຕຕ຺ຕຎ຺ຈ ວຸຕ຺ຕໍ. ຍຕ຺ຖ ປນ ປຖວີຂຓນາທີສຸ ກຸສລມ຺ປິ ອາປຕ຺ຕິຍາ ກາຣຓໍ ໂຫຕິ, ຕຕ຺ຖາປິ ອາປຕ຺ຕິຍາ ຕທຸປຈາເຣນ ກຸສລຕ຺ຕໂວຫາໂຣ ອຍຸຕ຺ໂຕ ສາວຊ຺ຊານວຊ຺ຊານໍ ເອກຕ຺ຕໂວຫາຣສ຺ສ ວິຣຸທ຺ຘຕ຺ຕາ. ຍທຄ຺ເຄນ ອຎ຺ຎມຎ຺ຎໍ ວິຣຸທ຺ຘາ, ຕທຄ຺ເຄນ ກາຣຓກາຣິຍໂວຫາໂຣປິ ເນສໍ ອຍຸຕ຺ໂຕ. ຕສ຺ມາ ຕຕ຺ຖ ວິຊ຺ຊມານມ຺ປິ ກຸສລໍ ອພ຺ໂພຫາຣິກໍ, ກາຍວຈີທ຺ວາຣເມວ ອາເວຓິກໍ ກາຣຓນ຺ຕິ.

ຕຕ຺ຖ ເອກນ຺ຕໂຕ ອກຸສລເມວາຕິ ອກຸສລຈິຕ຺ເຕນ ສມຸຏ຺ຐຫນໂຕ ກາຣຓູປຈາຣໂຕ ເອວໍ ວຸຕ຺ຕໍ. ຕຕ຺ຖາຕິ ໂລກວຊ຺ເຊ. ວິກປ຺ໂປ ນຕ຺ຖີຕິ ສິຍາ-ສທ຺ທສ຺ສ ວິກປ຺ປນຕ຺ຖຕໍ ທສ຺ເສຕິ. ອກຸສລໍ ໂຫຕີຕິ ອກຸສລສມຸຏ຺ຐິຕາຍ ກາຣຓູປຈາເຣນ ອກຸສລໍ ໂຫຕິ. ສຫເສຍ຺ຍາທິວເສນ ອາປຊ຺ຊນໂຕ ອພ຺ຍາກຕໍ ໂຫຕີຕິ ອິຕ຺ຖິຍາທີຫິ ສຫ ປິຏ຺ຐິປສາຣຓວສປ຺ປວຕ຺ຕກາຍທ຺ວາຣສງ຺ຂາຕຣູປາພ຺ຍາກຕວເສເນວ ອາປຊ຺ຊິຕພ຺ພໂຕ ກາຣຓູປຈາເຣເນວ ອາປຕ຺ຕິ ອພ຺ຍາກຕໍ ໂຫຕິ. ຕຕ຺ຖາຕິ ຕສ຺ມິໍ ປຓ຺ຓຕ຺ຕິວຊ຺ຊາປຕ຺ຕາຘິກຣເຓ. ສຎ຺ຈິຈ຺ຈາສຎ຺ຈິຈ຺ຈວເສນາຕິ ປຓ຺ຓຕ຺ຕິໍ ຎຕ຺ວາ, ອຎ຺ຎຕ຺ວາ ຈ ອາປຊ຺ຊນວເສນ ອິມໍ ວິກປ຺ປຠາວໍ ສນ຺ຘາຍ ອກຸສລຕ຺ຕອພ຺ຍາກຕຕ຺ຕສງ຺ຂາຕໍ ຍຖາວຸຕ຺ຕໍ ອິມໍ ວິກປ຺ປສຠາວໍ ສນ຺ຘາຍ ອິທໍ ວຈນໍ ວຸຕ຺ຕໍ.

ຍທິ ເອວໍ ອສຎ຺ຈິຈ຺ຈາປຊ຺ຊນປກ຺ເຂ ກຸສເລນາປິ ອາປຊ຺ຊນໂຕ ຕມ຺ປິ ວິກປ຺ປໍ ສນ຺ຘາຍ ‘‘ອາປຕ຺ຕາຘິກຣຓໍ ສິຍາ ກຸສລ’’ນ຺ຕິປິ ກສ຺ມາ ນ ວຸຕ຺ຕນ຺ຕິ ອາຫ ‘‘ສເຈ ປນາ’’ຕິອາທິ. ‘‘ອຈິຕ຺ຕການ’’ນ຺ຕິ ວຸຕ຺ຕເມວຕ຺ຖໍ ສມຸຏ຺ຐານວເສນ ວິຠາເວຕຸໍ ‘‘ເອຬກໂລມປທໂສຘມ຺ມາທິສມຸຏ຺ຐານານມ຺ປີ’’ຕິ ວຸຕ຺ຕໍ. ອຈິຕ຺ຕກສມຸຏ຺ຐານານໍ ‘‘ກຸສລຈິຕ຺ຕໍ ອາປຊ຺ເຊຍ຺ຍາ’’ຕິ ເອເຕນ ສາວຊ຺ຊຠູຕາຍ ອາປຕ຺ຕິຍາ ກາຣຓູປຈາເຣນາປິ ອນວຊ຺ຊຠູຕກຸສລໂວຫາໂຣ ອຍຸຕ຺ໂຕຕິ ທສ຺ເສຕິ. ‘‘ນ ຈ ຕຕ຺ຖາ’’ຕິອາທິນາ ກຸສລສ຺ສ ອາປຕ຺ຕິຍາ ກາຣຓຕ຺ຕໍ ວິຊ຺ຊມານມ຺ປິ ຕຖາ ໂວຫຣິຕຸໍ ອຍຸຕ຺ຕນ຺ຕິ ປຏິກ຺ຂິປິຕ຺ວາ ກາຍວາຈາສງ຺ຂາຕໍ ອພ຺ຍາກຕສ຺ເສວ ກາຣຓຕ຺ຕໍ ທສ຺ເສຕິ. ຕຕ຺ຖ ຈລິຕປ຺ປວຕ຺ຕານນ຺ຕິ ຈລິຕານໍ, ປວຕ຺ຕານຎ຺ຈ. ຈລິໂຕ ຫິ ກາໂຍ, ປວຕ຺ຕາ ວາຈາ. ເອຕ຺ຖ ຈ ກາຍວາຈານມຎ຺ຎຕຣເມວ ອງ຺ຄໍ. ຕຎ຺ຈ…ເປ… ອພ຺ຍາກຕນ຺ຕິ ເອວໍ ອພ຺ຍາກຕສ຺ສ ອາປຕ຺ຕິກາຣຓຠາເວເນວ ວຸຕ຺ຕຕ຺ຕາ. ‘‘ອາປຕ຺ຕາຘິກຣຓໍ ສິຍາ ອກຸສລໍ ສິຍາ ອພ຺ຍາກຕ’’ນ຺ຕິ ອິທໍ ກາຣຓູປຈາເຣນ ປຣິຍາຍໂຕ ວຸຕ຺ຕໍ, ນ ນິປ຺ປຣິຍາຍໂຕຕິ ສິຊ຺ຌຕິ.

ຍໍ ປນ ສາຣຕ຺ຖທີປນິຍໍ (ສາຣຕ຺ຖ. ຏີ. ຈູຬວ. ໓.໒໒໒) ອາປຕ຺ຕິຍາ ນິປ຺ປຣິຍາຍໂຕວ ອກຸສລາທິສຠາວຕໍ ສມຕ຺ເຖຕຸໍ ພຫຸໍ ປປຎ຺ຈິຕໍ, ຕໍ ນ ສາຣໂຕ ປຈ຺ເຈຕພ຺ພໍ ທຸຏ຺ຐໂທສສິກ຺ຂາປທຏ຺ຐກຖາຍເມວ ປຏິກ຺ຂິຕ຺ຕຕ຺ຕາ. ເຕເນເວຕ຺ຖາປິ ‘‘ຍໍ ຈິຕ຺ຕໍ ອາປຕ຺ຕິຍາ ອງ຺ຄໍ ໂຫຕີ’’ຕິອາທິນາ ອກຸສລຈິຕ຺ຕສ຺ສາປິ ອາປຕ຺ຕິຍາ ກາຣຓຕ຺ເຕນ ຠິນ຺ນຕາວ ທສ຺ສິຕາ. ຍໍ ປເນຕ຺ຖ ວຕ຺ຕພ຺ພໍ, ຕໍ ເຫຏ຺ຐາ ທສ຺ສິຕເມວາຕິ ອິຘ ນ ວິຕ຺ຖາຣຍິມ຺ຫ. ເອວໍ ວີຕິກ຺ກມໂຕ ໂຍ ວີຕິກ຺ກໂມຕິ ເອຕ຺ຖ ອກຸສລຈິຕ຺ເຕນ ຎຕ຺ວາ ວີຕິກ຺ກມນ຺ຕສ຺ສ ກາຍວຈີວີຕິກ຺ກມສມຸຏ຺ຐິຕາ ອາປຕ຺ຕິວີຕິກ຺ກໂມຕິ ວຸຕ຺ໂຕ. ເອສ ນໂຍ ອພ຺ຍາກຕວາເຣປິ.

ອຘິກຣຓກຖາວຓ຺ຓນາ ນິຏ຺ຐິຕາ.

ອຘິກຣຓວູປສມນສມຖກຖາທິວຓ຺ຓນາ

໒໒໘. ປາຬິຍໍ ວິວາທາຘິກຣຓໍ ເອກໍ ສມຖໍ ອນາຄມ຺ມາຕິອາທິ ປຸຈ຺ຉາ. ສິຍາຕິອາທິ ວິສ຺ສຊ຺ຊນໍ. ສິຍາຕິສ຺ສ ວຈນີຍນ຺ຕິ ເອເຕເນວ ວູປສມໍ ສິຍາຕິ ວຕ຺ຕພ຺ພໍ ຠເວຍ຺ຍາຕິ ອຕ຺ໂຖ. ສມ຺ມຸຂາວິນຍສ຺ມິນ຺ຕິ ສມ຺ມຸຂາວິນຍຕ຺ຕສ຺ມິນ຺ຕິ ຠາວປ຺ປຘາໂນ ນິທ຺ເທໂສ ທຏ຺ຐພ຺ໂພ. ເອວໍ ສພ຺ພວາເຣສຸ. ‘‘ກາຣໂກ ອຸກ຺ໂກເຏຕີ’’ຕິ ອິທໍ ອຸປລກ຺ຂຓມຕ຺ຕໍ, ຍສ຺ສ ກສ຺ສຈິ ອຸກ຺ໂກເຏນ຺ຕສ຺ສ ປາຈິຕ຺ຕິຍເມວ. ອຸພ຺ພາຫິກາຍ ຂີຍນເກ ປາຈິຕ຺ຕິຍໍ ນ ວຸຕ຺ຕໍ ຕຕ຺ຖ ຉນ຺ທທານສ຺ສ ນຕ຺ຖິຕາຍ.

໒໓໕. ວຓ຺ຓາວຓ຺ຓາໂຍ ກຕ຺ວາຕິ ຂຸທ຺ທກມຫນ຺ເຕຫິ ສຎ຺ຎາເຓຫິ ຍຸຕ຺ຕາໂຍ ກຕ຺ວາ. ເຕນາຫ ‘‘ນິມິຕ຺ຕສຎ຺ຎໍ ອາໂຣເປຕ຺ວາ’’ຕິ.

໒໔໒. ກິຈ຺ຈາຘິກຣຓໍ …ເປ… ສມ຺ມຕີຕິ ເອຕ຺ຖ ສມ຺ມຸຂາວິນເຍນ ອປໂລກນາທິກມ຺ມໍ ສມ຺ປຊ຺ຊຕີຕິ ອຕ຺ໂຖ ທຏ຺ຐພ຺ໂພ.

ອຘິກຣຓວູປສມນສມຖກຖາທິວຓ຺ຓນາ ນິຏ຺ຐິຕາ.

ສມຖກ຺ຂນ຺ຘກວຓ຺ຓນານໂຍ ນິຏ຺ຐິໂຕ.