໙. ຈມ຺ເປຍ຺ຍກ຺ຂນ຺ຘໂກ

ກສ຺ສປໂຄຕ຺ຕຠິກ຺ຂຸວຕ຺ຖຸກຖາທິວຓ຺ຓນາ

໓໘໐. ຈມ຺ເປຍ຺ຍກ຺ຂນ຺ຘເກ ຕນ຺ຕິພທ຺ໂຘຕິ ຕນ຺ຕິ ວຸຈ຺ຈຕິ ພ຺ຍາປາໂຣ, ຕຕ຺ຖ ພທ຺ໂຘ, ອຸສ຺ສຸກ຺ກໍ ອາປນ຺ໂນຕິ ອຕ຺ໂຖ. ເຕນາຫ ‘‘ຕສ຺ມິໍ ອາວາເສ’’ຕິອາທິ.

໓໘໗-໘. ຫາປນໍ ວາ ອຎ຺ຎຖາ ກຣຓໍ ວາ ນຕ຺ຖີຕິ ຎຕ຺ຕິກມ຺ມສ຺ສ ຎຕ຺ຕິຍາ ເອກຕ຺ຕາ ຫາປນໍ ນ ສມ຺ຠວຕິ, ຕສ຺ສາ ເອກຕ຺ຕາ ເອວ ປຈ຺ຉາ ຎຕ຺ຕິຐປນວເສນ, ທ຺ວິກ຺ຂຕ຺ຕຸໍ ຐປນວເສນ ຈ ອຎ຺ຎຖາ ກຣຓໍ ນຕ຺ຖິ. ປຣໂຕຕິ ປຣິວາເຣ. ຕນ຺ຕິ ປພ຺ພາຊນີຍກມ຺ມໍ, ຕສ຺ສາຕິ ອຕ຺ໂຖ.

ກສ຺ສປໂຄຕ຺ຕຠິກ຺ຂຸວຕ຺ຖຸກຖາທິວຓ຺ຓນາ ນິຏ຺ຐິຕາ.

ທ຺ເວນິສ຺ສຣຓາທິກຖາວຓ຺ຓນາ

໓໙໕. ເອສາຕິ ‘‘ພາໂລ’’ຕິອາທິນາ ນິທ຺ທິຏ຺ຐປຸຄ຺ຄໂລ, ອປ຺ປຕ຺ໂຕຕິ ສມ຺ພນ຺ໂຘ. ຕຕ຺ຖ ກາຣຓມາຫ ‘‘ຍສ຺ມາ’’ຕິອາທິ. ຕຕ຺ຖ ອາເວຓິເກນ ລກ຺ຂເຓນາຕິ ປພ຺ພາຊນີຍກມ຺ມສ຺ສ ນິມິຕ຺ຕຠາເວນ ປາຬິຍໍ ວຸຕ຺ຕຕ຺ຕາ ອສາຘາຣຓຠູເຕນ ກຸລທູສກຠາເວນ. ຍທິ ເຫສ ຕໍ ກມ຺ມໍ ອປ຺ປຕ຺ໂຕ, ກຖໍ ປນ ສຸນິສ຺ສາຣິໂຕຕິ ອາຫ ‘‘ຍສ຺ມາ ປນສ຺ສ ອາກງ຺ຂມາໂນ ສງ຺ໂຆ ປພ຺ພາຊນີຍກມ຺ມໍ ກເຣຍ຺ຍາຕິ ວຸຕ຺ຕໍ, ຕສ຺ມາ ສຸນິສ຺ສາຣິໂຕ’’ຕິ. ຕຕ຺ຖ ວຸຕ຺ຕນ຺ຕິ ກມ຺ມກ຺ຂນ຺ຘເກ (ຈູຬວ. ໒໗) ວຸຕ຺ຕໍ.

ເອຕ຺ຖ ປນ ກຸລທູສກກມ຺ມໍ ກຕ຺ວາ ປພ຺ພາຊນີຍກມ຺ມກຕສ຺ສ ເຕຣສກກຓ຺ຑກຏ຺ຐກຖາຍໍ ‘‘ຍສ຺ມິໍ ວິຫາເຣ ວສນ຺ເຕນ ຍສ຺ມິໍ ຄາເມ ກຸລທູສກກມ຺ມໍ ກຕໍ ໂຫຕິ, ຕສ຺ມິໍ ວິຫາເຣ ວາ ຕສ຺ມິໍ ຄາເມ ວາ ນ ວສິຕພ຺ພ’’ນ຺ຕິອາທິນາ (ປາຣາ. ອຏ຺ຐ. ໒.໔໓໓) ຍາ ສມ຺ມາວຕ຺ຕນາ ວຸຕ຺ຕາ, ສາ ອິຕເຣນາປິ ປູເຣຕພ຺ພາ. ຍໍ ປນ ປຏິປ຺ປສ຺ສທ຺ຘກມ຺ມສ຺ສ ກຸລທູສກສ຺ສ ຕຕ຺ເຖວ ອຏ຺ຐກຖາຍໍ ‘‘ເຍສຸ ກຸເລສຸ ກຸລທູສກກມ຺ມໍ ກຕໍ, ຕໂຕ ປຈ຺ຈຍາ ນ ຄເຫຕພ຺ພາ’’ຕິອາທິ ວຸຕ຺ຕໍ, ຕໍ ນ ປູເຣຕພ຺ພໍ ກຸລສງ຺ຄຫສ຺ສ ອກຕຕ຺ຕາ. ເອວໍ ເສສກມ຺ເມສຸປິ. ຍທິ ເອວໍ ‘‘ຕຊ຺ຊນີຍກມ຺ມາຣຫສ຺ສ ນິຍສກມ຺ມໍ ກໂຣຕິ…ເປ… ເອວໍ ໂຂ, ອຸປາລິ, ອຘມ຺ມກມ຺ມໍ ໂຫຕີ’’ຕິອາທິວຈນໍ (ມຫາວ. ໔໐໒) ວິຣຸຊ຺ຌຕີຕິ? ນ ວິຣຸຊ຺ຌຕິ ສງ຺ຆສນ຺ນິຏ຺ຐານວເສນ ຕຊ຺ຊນີຍາທິກມ຺ມາຣຫຕ຺ຕສ຺ສ ສິຊ຺ຌນໂຕ. ຍສ຺ສ ຫິ ສງ຺ໂຆ ‘‘ຕຊ຺ຊນີຍກມ຺ມໍ ກໂຣມາ’’ຕິ ສນ຺ນິຏ຺ຐານໍ ກຕ຺ວາ ກມ຺ມວາຈໍ ສາເວນ຺ໂຕ ປພ຺ພາຊນີຍກມ຺ມວາຈໍ ສາເວຕິ, ຕສ຺ສ ກມ຺ມໍ ອຘມ຺ມກມ຺ມໍ ໂຫຕິ. ສເຈ ປນ ‘‘ຕສ຺ເສວ ປພ຺ພາຊນີຍກມ຺ມເມວ ກໂຣມາ’’ຕິ ສນ຺ນິຏ຺ຐານໍ ກຕ຺ວາ ຕເທວ ກໂຣຕິ, ຕສ຺ສ ຕໍ ກມ຺ມໍ ຘມ຺ມກມ຺ມນ຺ຕິ ເວທິຕພ຺ພໍ.

ເອວມິຘ ‘‘ນິສ຺ສາຣຓ’’ນ຺ຕິ ອຘິປ຺ເປຕສ຺ສ ປພ຺ພາຊນີຍກມ຺ມສ຺ສ ວເສນ ອຕ຺ຖໍ ທສ຺ເສຕ຺ວາ ອິທານິ ຕທຎ຺ເຎສໍ ຕຊ຺ຊນີຍາທີນໍ ວເສນ ນິສ຺ສາຣເຓ ອຘິປ຺ເປເຕ ‘‘ອປ຺ປຕ຺ໂຕ ນິສ຺ສາຣຓ’’ນ຺ຕິ ອິມສ຺ສ ປຏິປກ຺ຂວເສນ ສມ຺ປຕ຺ໂຕ ນິສ຺ສາຣຓໍ, ‘‘ຕຎ຺ເຈ ສງ຺ໂຆ ນິສ຺ສາເຣຕິ. ສຸນິສ຺ສາຣິໂຕ’’ຕິ ອຕ຺ຖສມ຺ຠວໍ ທສ຺ເສຕຸໍ ປຸນ ‘‘ຕຎ຺ເຈ ສງ຺ໂຆ ນິສ຺ສາເຣຕີຕິ ສເຈ ສງ຺ໂຆ’’ຕິອາທິ ວຸຕ຺ຕໍ. ຕຕ຺ຖ ຕຕ຺ຖາຕິ ຕຊ຺ຊນີຍາທິກມ຺ມວິສເຍ, ເອເກນາປິ ອງ຺ເຄນ ນິສ຺ສາຣຓາ ອນຸຎ຺ຎາຕາຕິ ໂຍຊນາ. ປາຬິຍໍ ອປ຺ປຕ຺ໂຕ ນິສ຺ສາຣຓນ຺ຕິ ເອຕ຺ຖ ອາປນ຺ໂນ ອາເວຓິກວເສນ ຕຊ຺ຊນີຍາທິສງ຺ຂາຕໍ ນິສ຺ສາຣຓໍ ປຕ຺ໂຕຕິ ອຕ຺ໂຖ ຄເຫຕພ຺ໂພ.

ທ຺ເວນິສ຺ສຣຓາທິກຖາວຓ຺ຓນາ ນິຏ຺ຐິຕາ.

ຈມ຺ເປຍ຺ຍກ຺ຂນ຺ຘກວຓ຺ຓນານໂຍ ນິຏ຺ຐິໂຕ.