໖. ເຠສຊ຺ຊກ຺ຂນ຺ຘໂກ

ປຎ຺ຈເຠສຊ຺ຊາທິກຖາວຓ຺ຓນາ

໒໖໐. ເຠສຊ຺ຊກ຺ຂນ຺ຘເກ ປິຕ຺ຕໍ ໂກຏ຺ຐພ຺ຠນ຺ຕຣຄຕໍ ໂຫຕີຕິ ພຫິສຣີເຣ ພ຺ຍາເປຕ຺ວາ ຐິຕໍ ອພທ຺ຘປິຕ຺ຕໍ ໂກຏ຺ຐພ຺ຠນ຺ຕຣຄຕໍ ໂຫຕິ, ເຕນ ປິຕ຺ຕໍ ກຸປິຕໍ ໂຫຕີຕິ ອຘິປ຺ປາໂຍ.

໒໖໑-໒. ປາຬິຍໍ ນຈ຺ຉາເທນ຺ຕີຕິ ຣຸຈິໍ ນ ອຸປ຺ປາເທນ຺ຕິ. ສຸສຸກາຕິ ສມຸທ຺ເທ ເອກາ ມຈ຺ຉຊາຕິ, ກຸມ຺ຠິລາຕິປິ ວທນ຺ຕິ. ສໍສຏ຺ຐນ຺ຕິ ປຣິສ຺ສາວິຕໍ.

໒໖໓. ປິຏ຺ເຐຫີຕິ ປິສິເຕຫິ. ກສາເວຫີຕິ ຕຈາທີນິ ອຸທເກ ຕາເປຕ຺ວາ ຄຫິຕອູສເຣຫິ. ອຸພ຺ຠິທນ຺ຕິ ອູສຣປໍສຸມຍໍ. ໂລຓພິລນ຺ຕິ ໂລຓວິເສໂສ.

໒໖໔-໕. ຉກຓນ຺ຕິ ໂຄມຍໍ. ປາກຕິກຈຸຓ຺ຓນ຺ຕິ ອປກ຺ກກສາວຈຸຓ຺ຓໍ, ຄນ຺ຘຈຸຓ຺ຓໍ ປນ ນ ວຏ຺ຏຕິ. ປາຬິຍໍ ຈຸຓ຺ຓຈາລິນິນ຺ຕິ ອຸທຸກ຺ຂເລ ໂກຏ຺ຏິຕຈຸຓ຺ຓປຣິສ຺ສາວນິໍ. ສຸວຓ຺ຓເຄຣຸໂກຕິ ສຸວຓ຺ຓຕຸຕ຺ຖາທິ. ປາຬິຍໍ ອຎ຺ຊນູປປິສນນ຺ຕິ ອຎ຺ຊເນ ອຸປເນຕຸໍ ປິສິຕພ຺ພເຠສຊ຺ຊໍ.

໒໖໗-໙. ກພຬິກາຕິ ອຸປນາຫເຠສຊ຺ຊໍ. ຆຣທິນ຺ນກາພາໂຘ ນາມ ຆຣຓິຍາ ທິນ຺ນວສີກຣຓເຠສຊ຺ຊສມຸຏ຺ຐິຕອາພາໂຘ. ຕາຍ ຉາຣິກາຍ ປຄ຺ຆຣິຕໍ ຂາໂຣທກນ຺ຕິ ປຣິສ຺ສາວເນ ຕຈ຺ຉາຣິກໍ ປກ຺ຂິປິຕ຺ວາ ອຸທເກ ອຠິສິຎ຺ຈິເຕ ຕໂຕ ຉາຣິກໂຕ ເຫຏ຺ຐາ ປຄ຺ຆຣິຕໍ ຂາໂຣທກໍ. ປາຬິຍໍ ອກຏຍູເສນາຕິ ອນຠິສງ຺ຂເຕນ ມຸຄ຺ຄຍູເສນ. ກຏາກເຏນາຕິ ມຸຄ຺ເຄ ປຈິຕ຺ວາ ອຈາເລຕ຺ວາ ປຣິສ຺ສາວິເຕນ ມຸຄ຺ຄຍູເສນາຕິ ວທນ຺ຕິ.

ປຎ຺ຈເຠສຊ຺ຊາທິກຖາວຓ຺ຓນາ ນິຏ຺ຐິຕາ.

ຄຸຬາທິອນຸຊານນກຖາວຓ຺ຓນາ

໒໗໒-໔. ຄຸຬກຣຓນ຺ຕິ ອຸຈ຺ຉຸສາລໍ. ອວິສ຺ສຕ຺ຖາຕິ ສາສງ຺ກາ.

໒໗໖. ອປ຺ປມຕ຺ຕເກປິ ວາເຣນ຺ຕີຕິ ອປ຺ປມຕ຺ຕເກ ທິນ຺ເນ ທາຍການໍ ປີຬາຕິ ປຏິກ຺ຂິປນ຺ຕິ. ປຏິສງ຺ຂາປີຕິ ເອຕ຺ຕເກນປິ ຍາເປຕຸໍ ສກ຺ກາ, ‘‘ອວເສສໍ ອຎ຺ເຎສໍ ໂຫຕູ’’ຕິ ສລ຺ລກ຺ເຂຕ຺ວາປິ ປຏິກ຺ຂິປນ຺ຕິ.

໒໗໙. ວຕ຺ຖິປີຬນນ຺ຕິ ຍຖາ ວຕ຺ຖິຄຕເຕລາທິ ອນ຺ໂຕສຣີເຣ ອາໂຣຫນ຺ຕິ, ເອວໍ ຫຕ຺ເຖນ ວຕ຺ຖິມທ຺ທນໍ. ສມ຺ພາເຘ ສຕ຺ຖກມ຺ມວຕ຺ຖິກມ຺ມານເມວ ປຏິກ຺ຂິຕ຺ຕຕ຺ຕາ ທຫນກມ຺ມໍ ວຏ຺ຏຕິ ເອວ.

ຄຸຬາທິອນຸຊານນກຖາວຓ຺ຓນາ ນິຏ຺ຐິຕາ.

ຍາຄຸມຘຸໂຄຬກາທິກຖາວຓ຺ຓນາ

໒໘໒-໓. ປາຬິຍໍ ທສສ຺ສ ຐານານີຕິ ອສ຺ສ ປຏິຄ຺ຄາຫກສ຺ສ ທສ ຐານານິ ກາຣຓານິ ຘມ຺ເມນາຕິ ອຕ຺ໂຖ. ອນຸປ຺ປເວຈ຺ຉຕີຕິ ເທຕິ. ວາຕຎ຺ຈ ພ຺ຍປເນຕີຕິ ສມ຺ພນ຺ໂຘ, ວາຕຎ຺ຈ ອນຸໂລເມຕີຕິ ອຕ຺ໂຖ. ສຄ຺ຄາ ເຕ ອາຣທ຺ຘາຕິ ຕຍາ ເທວໂລກາ ອາຣາຘິຕາ.

ຍາຄຸມຘຸໂຄຬກາທິກຖາວຓ຺ຓນາ ນິຏ຺ຐິຕາ.

ປາຏລິຄາມວຕ຺ຖຸກຖາວຓ຺ຓນາ

໒໘໖. ປາຏລິຄາເມ ນຄຣໍ ມາເປນ຺ຕີຕິ ປາຏລິຄາມສ຺ສ ສມີເປ ຕສ຺ເສວ ຄາມເຂຕ຺ຕຠູເຕ ມຫນ຺ເຕ ອຣຎ຺ຎປ຺ປເທເສ ປາຏລິປຸຕ຺ຕໍ ນາມ ນຄຣໍ ມາເປນ຺ຕິ. ຍາວຕາ ອຣິຍໍ ອາຍຕນນ຺ຕິ ຍຕ຺ຕກໍ ອຣິຍມນຸສ຺ສານໍ ໂອສຣຓຏ຺ຐານໍ. ຍາວຕາ ວຓິປ຺ປໂຖຕິ ຍຕ຺ຕກໍ ວາຓິຊານໍ ຠຓ຺ຑວິກ຺ກີຓນຏ຺ຐານໍ, ວສນຏ຺ຐານໍ ວາ, ອິທໍ ເຕສໍ ສພ຺ເພສໍ ອຄ຺ຄນຄຣໍ ຠວິສ຺ສຕີຕິ ອຕ຺ໂຖ. ປຸຏເຠທນນ຺ຕິ ສກຏາທີຫິ ນານາເທສໂຕ ອາຫຏານໍ ຠຓ຺ຑປຸຏານໍ ວິກ຺ກີຓນຕ຺ຖາຍ ໂມຈນຏ຺ຐານໍ. ສຣນ຺ຕິ ຕຬາກາທີສຸປິ ວຕ຺ຕຕິ, ຕນ຺ນິວຕ຺ຕນຕ຺ຖໍ ‘‘ສຣນ຺ຕິ ອິຘ ນທີ ອຘິປ຺ເປຕາ’’ຕິ ວຸຕ຺ຕໍ ສຣຕິ ສນ຺ທຕີຕິ ກຕ຺ວາ. ວິນາ ເອວ ກຸລ຺ເລນ ຕິຓ຺ຓາຕິ ອິທໍ ອປ຺ປມຕ຺ຕກອຸທກມ຺ປິ ອຜຸສິຕ຺ວາ ວິນາ ກຸລ຺ເລນ ປາຣປ຺ປຕ຺ຕາ.

ປາຏລິຄາມວຕ຺ຖຸກຖາວຓ຺ຓນາ ນິຏ຺ຐິຕາ.

ໂກຏິຄາເມສຈ຺ຈກຖາວຓ຺ຓນາ

໒໘໗. ປາຬິຍໍ ສນ຺ຘາວິຕນ຺ຕິ ຠວໂຕ ຠວໍ ປຏິສນ຺ຘິຄ຺ຄຫຓວເສນ ສນ຺ຘາວນໍ ກຕໍ. ສໍສຣິຕນ຺ຕິ ຕສ຺ເສວ ເວວຈນໍ. ມມຎ຺ເຈວ ຕຸມ຺ຫາກຎ຺ຈາຕິ ມຍາ ຈ ຕຸມ຺ເຫຫິ ຈ, ສາມິວເສເນວ ວາ ມມ ຈ ຕຸມ຺ຫາກຎ຺ຈ ສນ຺ຘາວນໍ ອໂຫສີຕິ ອຕ຺ໂຖ ຄເຫຕພ຺ໂພ. ສໍສຣິຕນ຺ຕິ ສໍສຣິ. ຠວຕຓ຺ຫາ ເອວ ຠວໂຕ ຠວໍ ເນຕີຕິ ຠວເນຕ຺ຕີຕິ ວຸຕ຺ຕາ.

໒໘໙. ‘‘ນີລາ ໂຫນ຺ຕີ’’ຕິ ວຸຕ຺ຕເມວຕ຺ຖໍ ວິວຣິຕຸໍ ‘‘ນີລວຓ຺ຓາ’’ຕິອາທິ ວຸຕ຺ຕໍ. ນີລວຓ຺ຓາຕິ ນີລວິເລປນາ. ເອສ ນໂຍ ສພ຺ພຕ຺ຖ. ປຏິວຏ຺ເຏສີຕິ ປຫຣິ. ອມ຺ພກາຍາຕິ ອມ຺ພາຍ. ອຸປຈາຣວຈນຎ຺ເຫຕໍ, ມາຕຸຄາເມນາຕິ ອຕ຺ໂຖ. ອຸປສໍຫຣຖາຕິ ອຸປເນຖ, ‘‘ອີທິສາ ຕາວຕິໍສາ’’ຕິ ປຣິກປ຺ເປຖາຕິ ອຕ຺ໂຖ. ອິທຎ຺ຈ ຠິກ຺ຂູນໍ ສໍເວຄຊນນຕ຺ຖໍ ວຸຕ຺ຕໍ, ນ ນິມິຕ຺ຕຄ຺ຄາຫຕ຺ຖໍ. ລິຈ຺ຉວິຣາຊາໂນ ຫິ ສພ຺ເພ ນ ຈິຣສ຺ເສວ ອຊາຕສຕ຺ຕຸນາ ວິນາສໍ ປາປຸຓິສ຺ສນ຺ຕິ.

ໂກຏິຄາເມສຈ຺ຈກຖາວຓ຺ຓນາ ນິຏ຺ຐິຕາ.

ສີຫເສນາປຕິວຕ຺ຖຸອາທິກຖາວຓ຺ຓນາ

໒໙໐. ສນ຺ຘາຄາເຣຕິ ຣາຊກິຈ຺ຈສ຺ສ ສນ຺ຘາຣຓຕ຺ຖາຍ ນິຈ຺ຉິທ຺ທໍ ກຕ຺ວາ ວິຈາຣຓຕ຺ຖາຍ ກຕມຫາສຠາຍ. ຄມິກາຠິສງ຺ຂາໂຣຕິ ຄມເນ ວາຍາໂມ. ຘມ຺ມສ຺ສ ຈ ອນຸຘມ຺ມນ຺ຕິ ຕຸມ຺ເຫຫິ ວຸຕ຺ຕສ຺ສ ກາຣຓສ຺ສ ອນຸກາຣຓໍ, ຕຸມ຺ເຫຫິ ວຸຕ຺ຕສ຺ສ ອຕ຺ຖສ຺ສ ອນຸຣູປເມວາຕິ ອຘິປ຺ປາໂຍ. ສຫຘມ຺ມິໂກ ວາທານຸວາໂທຕິ ປເຣຫິ ວຸຕ຺ຕກາຣເຓນ ສກາຣໂຓ ຫຸຕ຺ວາ ຕຸມ຺ຫາກໍ ວາໂທ ວາ ອິໂຕ ປຣໍ ຕສ຺ສ ອນຸວາໂທ ວາ. ໂກຈິ ອປ຺ປມຕ຺ຕໂກປິ ຄາຣຍ຺ຫໍ ຐານໍ ນ ອາຄຈ຺ຉຕີຕິ ກິໍ ຕວ ວາເທ ຄາຣຍ຺ຫກາຣຓໍ ນຕ຺ຖີຕິ ວຸຕ຺ຕໍ ໂຫຕິ.

໒໙໓. ອນຸວິຈ຺ຈກາຣນ຺ຕິ ອນຸວິທິຕາກາຣໍ. ຣຕນຕ຺ຕຍສ຺ສ ສຣຓຄມນາທິກິຣິຍໍ ກໂຣຕິ. ສຫສາ ກຕ຺ວາ ມາ ປຈ຺ຉາ ວິປ຺ປຏິສາຣີ ອໂຫສີຕິ ອຕ຺ໂຖ. ປຏາກໍ ປຣິຫເຣຍ຺ຍຸນ຺ຕິ ຘຊປຏາກໍ ອຸກ຺ຂິປິຕ຺ວາ ‘‘ອີທິໂສ ອມ຺ຫາກໍ ສຣຓໍ ຄໂຕ ສາວໂກ ຊາໂຕ’’ຕິ ນຄເຣ ໂຆເສນ຺ຕາ ອາຫິຓ຺ຑນ຺ຕິ.

໒໙໔. ນິມິຕ຺ຕກມ຺ມສ຺ສາຕິ ມໍສຂາທນນິມິຕ຺ເຕນ ອຸປ຺ປນ຺ນປາຓາຕິປາຕກມ຺ມສ຺ສ.

ສີຫເສນາປຕິວຕ຺ຖຸອາທິກຖາວຓ຺ຓນາ ນິຏ຺ຐິຕາ.

ກປ຺ປິຍຠູມິອນຸຊານນກຖາວຓ຺ຓນາ

໒໙໕. ອນຸປ຺ປເຄ ເອວາຕິ ປາໂຕວ. ໂອຣວສທ຺ທນ຺ຕິ ມຫາສທ຺ທໍ. ຕໍ ປນ ອວຕ຺ວາປີຕິ ປິ-ສທ຺ເທນ ຕຖາວຈນມ຺ປິ ອນຸຊານາຕິ. ອຏ຺ຐກຖາສູຕິ ອນ຺ຘກຏ຺ຐກຖາວິຣຫິຕາສຸ ເສສຏ຺ຐກຖາສຸ. ສາຘາຣຓລກ຺ຂຓນ຺ຕິ ອນ຺ຘກຏ຺ຐກຖາຍ ສຫ ສພ຺ພຏ຺ຐກຖານໍ ສມານໍ.

ຈຍນ຺ຕິ ອຘິຏ຺ຐານອຸຈ຺ຈວຕ຺ຖຸໍ. ຍໂຕ ປຏ຺ຐາຍາຕິ ຍໂຕ ອິຏ຺ຐກາທິໂຕ ປຏ຺ຐາຍ, ຍໍ ອາທິໍ ກຕ຺ວາ ຠິຕ຺ຕິໍ ອຸຏ຺ຐາເປຕຸກາມາຕິ ອຕ຺ໂຖ. ‘‘ຖມ຺ຠາ ປນ ອຸປຣິ ອຸຄ຺ຄຈ຺ຉນ຺ຕິ, ຕສ຺ມາ ວຏ຺ຏນ຺ຕີ’’ຕິ ເອເຕນ ອິຏ຺ຐກປາສາຓາ ເຫຏ຺ຐາ ປຕິຏ຺ຐາປິຕາປິ ຍທິ ຈຍໂຕ, ຠູມິໂຕ ວາ ເອກງ຺ຄຸລມຕ຺ຕມ຺ປິ ອຸຄ຺ຄຕາ ຕິຏ຺ຐນ຺ຕິ, ວຏ຺ຏນ຺ຕີຕິ ສິທ຺ຘໍ ໂຫຕິ.

ອາຣາໂມຕິ ອຸປຈາຣສີມາປຣິຈ຺ຉິນ຺ໂນ ສກໂລ ວິຫາໂຣ. ເສນາສນານີຕິ ວິຫາຣສ຺ສ ອນ຺ໂຕ ຕິຓກຸຏິອາທິການິ ສງ຺ຆສ຺ສ ນິວາສເຄຫານິ. ວິຫາຣໂຄນິສາທິກາ ນາມາຕິ ເສນາສນໂຄນິສາທິກາ. ເສນາສນານິ ຫິ ສຍໍ ປຣິກ຺ຂິຕ຺ຕານິປິ ອາຣາມປຣິກ຺ເຂປາຠາເວນ ‘‘ໂຄນິສາທິການີ’’ຕິ ວຸຕ຺ຕານິ. ‘‘ອຸປຑ຺ຒປຣິກ຺ຂິຕ຺ໂຕປີ’’ຕິ ອິມິນາ ຕໂຕ ອູນປຣິກ຺ຂິຕ຺ໂຕ ເຍຠຸຍ຺ເຍນ ອປຣິກ຺ຂິຕ຺ໂຕ ນາມ, ຕສ຺ມາ ອປຣິກ຺ຂິຕ຺ຕສງ຺ຂ຺ຍເມວ ຄຈ຺ຉຕີຕິ ທສ຺ເສຕິ. ເອຕ຺ຖາຕິ ອຸປຑ຺ຒາທິປຣິກ຺ຂິຕ຺ເຕ. ກປ຺ປິຍກຸຏິໍ ລທ຺ຘຸໍ ວຏ຺ຏຕີຕິ ໂຄນິສາທິຍາ ອຠາເວນ ເສສກປ຺ປິຍກຸຏີສຸ ຕີສຸ ຍາ ກາຈິ ກປ຺ປິຍກຸຏິ ກາຕພ຺ພາຕິ ອຕ຺ໂຖ.

ເຕສໍ ເຄຫານີຕິ ເອຕ຺ຖ ຠິກ຺ຂູນໍ ວາສຕ຺ຖາຍ ກຕມ຺ປິ ຍາວ ນ ເທນ຺ຕິ, ຕາວ ເຕສໍ ສນ຺ຕກໍເຍວ ຠວິສ຺ສຕີຕິ ທຏ຺ຐພ຺ພໍ. ວິຫາຣໍ ຐເປຕ຺ວາຕິ ອຸປສມ຺ປນ຺ນານໍ ວາສຕ຺ຖາຍ ກຕເຄຫໍ ຐເປຕ຺ວາຕິ ອຕ຺ໂຖ. ເຄຫນ຺ຕິ ນິວາສເຄຫໍ, ຕທຎ຺ຎໍ ປນ ອຸໂປສຖາຄາຣາທິ ສພ຺ພໍ ອນິວາສເຄຫໍ ຈຕຸກປ຺ປິຍຠູມິວິມຸຕ຺ຕາ ປຎ຺ຈມີ ກປ຺ປິຍຠູມິ. ສງ຺ຆສນ຺ຕເກປິ ຫິ ເອຕາທິເສ ເຄເຫ ສຸຏ຺ຐຸ ປຣິກ຺ຂິຕ຺ຕາຣາມຕ຺ເຕປິ ອພ຺ໂຠກາເສ ວິຍ ອນ຺ໂຕວຸຕ຺ຖາທິໂທໂສ ນຕ຺ຖິ. ເຍນ ເກນຈິ ຉນ຺ເນ, ປຣິຈ຺ຉນ຺ເນ ຈ ສຫເສຍ຺ຍປ຺ປໂຫນເກ ຠິກ຺ຂຸສງ຺ຆສ຺ສ ນິວາສເຄເຫ ອນ຺ໂຕວຸຕ຺ຖາທິໂທໂສ, ນ ອຎ຺ຎຕ຺ຖ. ເຕນາຫ ‘‘ຍໍ ປນາ’’ຕິອາທິ. ຕຕ຺ຖ ‘‘ສງ຺ຆິກໍ ວາ ປຸຄ຺ຄລິກໍ ວາ’’ຕິ ອິທໍ ກິຎ຺ຈາປິ ຠິກ຺ຂຸນີນໍ ສາມຎ຺ຎໂຕ ວຸຕ຺ຕໍ, ຠິກ຺ຂູນໍ ປນ ສງ຺ຆິກໍ ປຸຄ຺ຄລິກຎ຺ຈ ຠິກ຺ຂຸນີນໍ, ຕາສໍ ສງ຺ຆິກໍ ປຸຄ຺ຄລິກຎ຺ຈ ຠິກ຺ຂູນໍ ຄິຫິສນ຺ຕກຏ຺ຐາເນ ຕິຏ຺ຐຕີຕິ ເວທິຕພ຺ພໍ.

ມຸຂສນ຺ນິຘີຕິ ອນ຺ໂຕສນ຺ນິຫິຕໂທໂສ ຫິ ມຸຂປ຺ປເວສນນິມິຕ຺ຕໍ ອາປຕ຺ຕິໍ ກໂຣຕິ, ນາຎ຺ຎຖາ. ຕສ຺ມາ ‘‘ມຸຂສນ຺ນິຘີ’’ຕິ ວຸຕ຺ໂຕ.

ຕຕ຺ຖ ຕຕ຺ຖ ຂຓ຺ຑາ ໂຫນ຺ຕີຕິ ອຸປຑ຺ຒໂຕ ອຘິກໍ ຂຓ຺ຑາ ໂຫນ຺ຕິ. ສພ຺ພສ຺ມິໍ ຉທເນ ວິນຏ຺ເຐຕິ ຕິຓປຓ຺ຓາທິວສ຺ສປຣິຕ຺ຕາຍເກ ຉທເນ ວິນຏ຺ເຐ. ໂຄປານສີນໍ ປນ ອຸປຣິ ວລ຺ລີຫິ ພທ຺ຘທຓ຺ເຑສຸ ຐິເຕສຸປິ ຊຫິຕວຕ຺ຖຸກາ ໂຫນ຺ຕິ ເອວ. ປກ຺ຂປາສກມຓ຺ຑລນ຺ຕິ ເອກສ຺ມິໍ ປສ຺ເສ ຕິຓ຺ຓໍ ໂຄປານສີນໍ ອຸປຣິ ຐິຕຕິຓປຓ຺ຓາທິຈ຺ຉທນໍ ວຸຈ຺ຈຕິ.

ອນຸປສມ຺ປນ຺ນສ຺ສ ທາຕພ຺ໂພ ອສ຺ສາຕິອາທິນາ ອກປ຺ປິຍກຸຏິຍໍ ວຸຕ຺ຖມ຺ປິ ອນຸປສມ຺ປນ຺ນສ຺ສ ທິນ຺ເນ ກປ຺ປິຍໍ ໂຫຕິ, ສາເປກ຺ຂທານຎ຺ເຈຕ຺ຖ ວຏ຺ຏຕິ, ປຏິຄ຺ຄຫຓໍ ວິຍ ນ ໂຫຕີຕິ ທສ຺ເສຕິ.

໒໙໙. ປາຬິຍໍ ກນ຺ຕາເຣ ສມ຺ຠາເວສີຕິ ອປ຺ປຠກ຺ຂກນ຺ຕາເຣ ສມ຺ປາປຸຓິ.

ກປ຺ປິຍຠູມິອນຸຊານນກຖາວຓ຺ຓນາ ນິຏ຺ຐິຕາ.

ເກຓິຍຊຏິລວຕ຺ຖຸກຖາວຓ຺ຓນາ

໓໐໐. ຊຏິໂລຕິ ອາຫຣິມຊຏາຘໂຣ ຕາປສເວສຘາຣໂກ ຍຎ຺ຎຍຸຕ຺ໂຕ ໂລກປູຊິໂຕ ພ຺ຣາຫ຺ມໂຓ. ປວຕ຺ຕາໂຣ ປາວຈນວເສນ ວຕ຺ຕາໂຣ. ເຍສໍ ສນ຺ຕກມິທໍ, ເຍຫິ ວາ ອິທໍ ຄີຕນ຺ຕິ ອຕ຺ໂຖ. ຄີຕໍ ປວຸຕ຺ຕໍ ສມິຫິຕນ຺ຕິ ອຎ຺ຎມຎ຺ຎສ຺ສ ປຣິຍາຍວຈນໍ ວຸຕ຺ຕນ຺ຕິ ອຕ຺ໂຖ. ຕທນຸຄາຍນ຺ຕີຕິ ຕໍ ເຕຫິ ປຸພ຺ເພ ຄີຕໍ ອນຸຄາຍນ຺ຕິ. ເອວໍ ເສເສສຸ ຈ.

ຍາວກາລິກປກ຺ການນ຺ຕິ ປກ຺ເກ ສນ຺ຘາຍ ວຸຕ຺ຕໍ, ອາມານິ ປນ ອນຸປສມ຺ປນ຺ເນຫິ ສີຕຸທເກ ມທ຺ທິຕ຺ວາ ປຣິສ຺ສາເວຕ຺ວາ ທິນ຺ນປານໍ ປຈ຺ຉາຠຕ຺ຕມ຺ປິ ກປ຺ປຕິ ເອວ. ອຍຎ຺ຈ ອຕ຺ໂຖ ມຫາອຏ຺ຐກຖາຍໍ ສຣູປໂຕ ອວຸຕ຺ໂຕຕິ ອາຫ ‘‘ກຸຣຸນ຺ທິຍໍ ປນາ’’ຕິອາທິ. ‘‘ອຸຈ຺ຉຸຣໂສ ນິກສໂຏ’’ຕິ ອິທໍ ປາຕພ຺ພສາມຎ຺ເຎນ ຍາມກາລິກກຖາຍໍ ວຸຕ຺ຕໍ, ຕໍ ປນ ສຕ຺ຕາຫກາລິກເມວາຕິ ຄເຫຕພ຺ພໍ. ອິເມ ຈຕ຺ຕາໂຣ ຣສາຕິ ຜລປຕ຺ຕປຸປ຺ຜອຸຈ຺ຉຸຣສາ ຈຕ຺ຕາໂຣ.

ປາຬິຍໍ ອຄ຺ຄິຫຸຕ຺ຕມຸຂາຕິ ອຄ຺ຄິຊຸຫນປຸພ຺ພກາ. ຉນ຺ທໂສຕິ ເວທສ຺ສ. ສາວິຕ຺ຕີ ມຸຂໍ ປຐມໍ ສຊ຺ຌາຍິຕພ຺ພາຕິ ອຕ຺ໂຖ. ຕປຕນ຺ຕິ ວິໂຊຕນ຺ຕານໍ.

ເກຓິຍຊຏິລວຕ຺ຖຸກຖາວຓ຺ຓນາ ນິຏ຺ຐິຕາ.

ໂຣຊມລ຺ລາທິວຕ຺ຖຸກຖາວຓ຺ຓນາ

໓໐໑. ພຫຸກໂຕ ພຸທ຺ເຘ ວາຕິ ພຸທ຺ເຘ ກຕພຫຸມາໂນຕິ ອຕ຺ໂຖ. ໂສ ໂຂ ອຫໍ, ຠນ຺ເຕ ອານນ຺ທ, ຎາຕີນໍ ທຓ຺ຑຠຍຕຊ຺ຊິໂຕ ອໂຫສິນ຺ຕິ ເສໂສ. ເອວຎ຺ຫິ ສຕິ ‘‘ເອວາຫ’’ນ຺ຕິ ປຸນ ອຫໍ-ຄຫຓໍ ຍຸຊ຺ຊຕິ. ວິວຣີຕິ ‘‘ວິວຣຕູ’’ຕິ ຈິນ຺ຕາມຕ຺ເຕນ ວິວຣິ, ນ ອຸຏ຺ຐາຍ ຫຕ຺ເຖນ.

໓໐໓. ອຎ຺ຎຕໂຣຕິ ສຸຠທ຺ໂທ ວຸຑ຺ຒປພ຺ພຊິໂຕ. ທ຺ເວ ທາຣກາຕິ ສາມເຓຣຠູມິຍໍ ຐິຕາ ທ຺ເວ ປຸຕ຺ຕາ. ນາຬິຍາວາປເກນາຕິ ນາຬິຍາ ເຈວ ຖວິກາຍ ຈ. ສໍຫຣຖ ອິເມຫິ ຠາຊເນຫິ ຕຓ຺ຑຸລາທີນິ ສງ຺ກຑ຺ຒຖາຕິ ອຕ຺ໂຖ. ຠຸສາຄາເຣຕິ ປລາລມເຍ ອຄາເຣ, ປລາລປຸຎ຺ຊໍ ອພ຺ຠນ຺ຕຣໂຕ ປລາລໍ ສງ຺ກຑ຺ຒິຕ຺ວາ ອຄາຣໍ ກຕໍ ໂຫຕິ, ຕຕ຺ຖາຕິ ອຕ຺ໂຖ.

ໂຣຊມລ຺ລາທິວຕ຺ຖຸກຖາວຓ຺ຓນາ ນິຏ຺ຐິຕາ.

ຈຕຸມຫາປເທສກຖາວຓ຺ຓນາ

໓໐໕. ປຣິມທ຺ທນ຺ຕາຕິ ອຸປປຣິກ຺ຂນ຺ຕາ. ທ຺ເວ ປຏາ ເທສນາເມເນວ ວຸຕ຺ຕາຕິ ເຕສໍ ສຣູປທສ຺ສນປທເມຕໍ. ນາຎ຺ຎນິວຕ຺ຕນປທໍ ປຕ຺ຕຸຓ຺ຓປຏສ຺ສາປິ ເທສນາເມນ ວຸຕ຺ຕຕ຺ຕາ.

ຕຸມ຺ພາຕິ ຠາຊນານິ. ຜລຕຸມ຺ໂພ ນາມ ລາພຸອາທິ. ອຸທກຕຸມ຺ໂພ ອຸທກຆໂຏ. ກິລຎ຺ຊຈ຺ຉຕ຺ຕນ຺ຕິ ເວຬຸວິລີເວຫິ ວາຍິຕ຺ວາ ກຕຉຕ຺ຕໍ. ສມ຺ຠິນ຺ນຣສນ຺ຕິ ມິສ຺ສີຠູຕຣສໍ.

ຈຕຸມຫາປເທສກຖາວຓ຺ຓນາ ນິຏ຺ຐິຕາ.

ເຠສຊ຺ຊກ຺ຂນ຺ຘກວຓ຺ຓນານໂຍ ນິຏ຺ຐິໂຕ.