໘. ສຫຘມ຺ມິກວຄ຺ໂຄ

໑. ສຫຘມ຺ມິກສິກ຺ຂາປທວຓ຺ຓນາ

໔໓໔. ອຏ຺ຐມວຄ຺ຄສ຺ສ ປຐເມ ອຸປສມ຺ປນ຺ນສ຺ສ ປຎ຺ຎຕ຺ເຕນ ວຈນໍ, ອສິກ຺ຂິຕຸກາມສ຺ສ ເລເສນ ເອວໍ ວຈນນ຺ຕິ ທ຺ເວ ອງ຺ຄານິ.

ສຫຘມ຺ມິກສິກ຺ຂາປທວຓ຺ຓນາ ນິຏ຺ຐິຕາ.

໒. ວິເລຂນສິກ຺ຂາປທວຓ຺ຓນາ

໔໓໘. ທຸຕິເຍ ອລຊ຺ຊິຕາຕິ ອລຊ຺ຊິຕາຍ. ເອວໍ ເສເສສຸປິ. ສຎ຺ຈິຈ຺ຈ ອາປຕ຺ຕິໍ ອາປຊ຺ຊຕີຕິອາທິ ຠິກ຺ຂຸຠິກ຺ຂຸນີນຎ຺ເຎວ ວຸຕ຺ຕໍ ອລຊ຺ຊິລກ຺ຂຓໍ, ສາມເຓຣາທີນໍ, ປນ ຄຫຏ຺ຐານຎ຺ຈ ສາຘາຣຓວເສນ ຍຖາສກໍ ສິກ຺ຂາປທວີຕິກ຺ກມນປຏິຄູຫນາທິໂຕ ເວທິຕພ຺ພໍ. ລຊ຺ຊິລກ຺ຂເຓປິ ເອເສວ ນໂຍ. ກິຎ຺ຈາປິ ກຸກ຺ກຸຈ຺ເຈ ອຸປ຺ປນ຺ເນປິ ມທ຺ທິຕ຺ວາ ກໂຣນ຺ໂຕ, ກປ຺ປິເຍ ອກປ຺ປິຍສຎ຺ຎິຕາຍ ກໂຣນ຺ໂຕປິ ຕງ຺ຂຓິກາຍ ອລຊ຺ຊິຕາຍ ເອວໍ ກໂຣນ຺ຕິ. ຕຖາປິ ກຸກ຺ກຸຈ຺ຈາທິເຠເທ ວິສຸໍ ຄຫິຕາຕິ ທຏ຺ຐພ຺ພໍ.

ວຊ຺ຊິປຸຕ຺ຕກາ ທສວຕ຺ຖຸທີປກາ. ປຣູປຫາຣອຎ຺ຎາຓກງ຺ຂາປຣວິຕາຣຓາທິວາທາຕິ ເອຕ຺ຖ ອຣຫຕ຺ຕໍ ປຏິຊານນ຺ຕານໍ ກຸຫການໍ ສຸກ຺ກວິສ຺ສຏ຺ຐິໍ ທິສ຺ວາ ‘‘ມາຣກາຍິກາ ເທວຕາ ອສຸຈິໍ ອຸປສໍຫຣນ຺ຕີ’’ຕິຄາຫິໂນ ປຣູປຫາຣວາທາ ນາມ. ອຣຫໂຕ ສພ຺ເພສໍ ອິຕ຺ຖິປຸຣິສາທີນໍ ນາມາທິອຊານເນ ອຎ຺ຎາຓໍ, ຕຕ຺ຖ ສນ຺ນິຏ຺ຐານຠາເວນ ກງ຺ຂາ, ປຣໂຕ ສຸຕ຺ວາ ນາມາທິຊານເນນ ປຣວິຕາຣໂຓ ອຕ຺ຖີຕິວາທິໂນ ອຎ຺ຎາຓວາທາ, ກງ຺ຂາວາທາ, ປຣວິຕາຣຓວາທາ ຈ ເຕສໍ, ມຫາສງ຺ຆິກາທີນຎ຺ຈ ວິຠາໂຄ ກຖາວຕ຺ຖຸປ຺ປກຣເຓ ວຸຕ຺ໂຕ.

ຈຕ຺ຕາໂຣ ມຄ຺ຄາ ຈ ຜລານິ ຈາຕິ ເອຕ຺ຖ ຈ-ກາເຣນ ອຠິຎ຺ຎາປຏິສມ຺ຠິທາປິ ສງ຺ຄຫິຕາຕິ ທຏ຺ຐພ຺ພໍ. ເກຈີຕິ ປຣິຍຕ຺ຕິຘຣາ ຘມ຺ມກຖິກາ. ປຸນ ເກຈີຕິ ປຏິປຕ຺ຕິຘຣາ ປໍສຸກູລິກຕ຺ເຖຣາ. ອິຕເຣ ປນາຕິອາທີສຸ ອຍໍ ອຘິປ຺ປາໂຍ – ຘມ຺ມກຖິກຕ຺ເຖຣາ ປນ ປໍສຸກູລິກຕ຺ເຖເຣຫິ ອາຠຕໍ ສຸຕ຺ຕໍ ສຸຕ຺ວາ –

‘‘ຍາວ ຕິຏ຺ຐນ຺ຕິ ສຸຕ຺ຕນ຺ຕາ, ວິນໂຍ ຍາວ ທິປ຺ປຕິ;

ຕາວ ທກ຺ຂນ຺ຕິ ອາໂລກໍ, ສູຣິເຍ ອພ຺ຠຸຏ຺ຐິເຕ ຍຖາ.

‘‘ສຸຕ຺ຕນ຺ເຕສຸ ອສນ຺ເຕສຸ, ປມຸຏ຺ເຐ ວິນຍມ຺ຫິ ຈ;

ຕໂມ ຠວິສ຺ສຕິ ໂລເກ, ສູຣິເຍ ອຕ຺ຖງ຺ຄເຕ ຍຖາ.

‘‘ສຸຕ຺ຕນ຺ເຕ ຣກ຺ຂິເຕ ສນ຺ເຕ, ປຏິປຕ຺ຕິ ໂຫຕິ ຣກ຺ຂິຕາ;

ປຏິປຕ຺ຕິຍໍ ຐິໂຕ ຘີໂຣ, ໂຍຄກ຺ເຂມາ ນ ຘໍສຕີ’’ຕິ. (ອ. ນິ. ອຏ຺ຐ. ໑.໑.໑໓໐) –

ອິທໍ ສຸຕ຺ຕໍ ອາຫຣິຕ຺ວາ ອຕ຺ຕໂນວ ວາທໍ ປຕິຏ຺ຐເປນ຺ຕາ ປາຣາຊິການາປຊ຺ຊນວເສນ ຐິຕາ ປຏິປຕ຺ຕິສງ຺ຄຫິຕາ ປຣິຍຕ຺ຕິເຍວ ມູລນ຺ຕິ ອາຫໍສູຕິ. ເຕນາຫ ‘‘ສເຈ ປຎ຺ຈ ຠິກ຺ຂູ ຈຕ຺ຕາຣິ ປາຣາຊິການິ ຣກ຺ຂຓກາ…ເປ… ສາສນໍ ວຸຑ຺ຒິໍ ວິຣຸຬ຺ຫິໍ ຄມຍິສ຺ສນ຺ຕີ’’ຕິ. ເອເຕນ ຈ ປຣິກ຺ຂີເຓ ກາເລ ລຊ຺ຊິຄຓໍ ອລຠນ຺ເຕນ ວິນຍຘເຣນ ອລຊ຺ຊິໂນປິ ປກຕຕ຺ເຕ ສງ຺ຄເຫຕ຺ວາ ເຕຫິ ສຫ ຘມ຺ມາມິສສມ຺ໂຠຄໍ ສໍວາສໍ ກໂຣນ຺ເຕນ ພຫູ ກຸລປຸຕ຺ເຕ ອຸປສມ຺ປາເທຕ຺ວາ ສາສນໍ ປຄ຺ຄເຫຕຸໍ ວຏ຺ຏຕີຕິ ອິທໍ ສິຊ຺ຌຕີຕິ ທຏ຺ຐພ຺ພໍ. ຄຣຫິຕຸກາມຕາ, ອຸປສມ຺ປນ຺ນສ຺ສ ສນ຺ຕິເກ ສິກ຺ຂາປທວິວຓ຺ຓນນ຺ຕິ ທ຺ເວ ອງ຺ຄານິ.

ວິເລຂນສິກ຺ຂາປທວຓ຺ຓນາ ນິຏ຺ຐິຕາ.

໓. ໂມຫນສິກ຺ຂາປທວຓ຺ຓນາ

໔໔໔. ຕຕິເຍ ປາຬິຍໍ ໂກ ປນ ວາໂທ ຠິຍ຺ໂຍຕິ ເຕຫິ ອຎ຺ເຎຫິ ຠິກ຺ຂູຫິ ທິຏ຺ຐທ຺ວຕ຺ຕິວາຣໂຕ ຠິຍ຺ໂຍ ປນ ວິຕ຺ຖາເຣນ ອຸທ຺ທິສິຍມາເນ ປາຕິໂມກ຺ເຂ ນິສິນ຺ນປຸພ຺ພຕາ ອຕ຺ຖິ ເຈ, ຕຕ຺ຖ ກິເມວ ວຕ຺ຕພ຺ພໍ, ອາປຕ຺ຕິໂມກ຺ໂຂ ນຕ຺ຖິ ເອວາຕິ ອຘິປ຺ປາໂຍ. ຕຎ຺ຈ ຍຖາຘມ຺ໂມ ກາເຣຕພ຺ໂພຕິ ຕນ຺ຕິ ກາຣຓຕ຺ເຖ ອຸປໂຍຄວຈນໍ, ຕາຍາຕິ ອຕ຺ໂຖ. ຍຖາ ຘມ຺ໂມ ຈ ວິນໂຍ ຈ ຐິໂຕ, ຕຖາ ຕາຍ ອາປຕ຺ຕິຍາ ກາເຣຕພ຺ໂພຕິ ວຸຕ຺ຕໍ ໂຫຕິ. ໂມຫາໂຣປນໍ, ຕິກ຺ຂຕ຺ຕຸໍ ສຸຕຠາໂວ, ໂມເຫຕຸກາມສ຺ສ ໂມຫນນ຺ຕິ ຕີຓິ ອງ຺ຄານິ.

ໂມຫນສິກ຺ຂາປທວຓ຺ຓນາ ນິຏ຺ຐິຕາ.

໔. ປຫາຣສິກ຺ຂາປທວຓ຺ຓນາ

໔໕໑. ຈຕຸຕ຺ເຖ ປາຬິຍໍ ກາຍປຏິພທ຺ເຘນ ວາຕິ ເອຕ຺ຖ ປາສາຓາທິນິສ຺ສຄ຺ຄິຍປຫາໂຣປິ ສງ຺ຄຫິໂຕ.

໔໕໒. ຣຕ຺ຕຈິຕ຺ໂຕຕິ ກາຍສໍສຄ຺ຄຣາເຄນ ວຸຕ຺ຕໍ. ເມຖຸນຣາເຄນ ປນ ປຫາຣໂຕ ປຸຣິສາທີສຸ ທຸກ຺ກຏເມວ. ໂມກ຺ຂາຘິປ຺ປາເຍນ ທຓ຺ຑໂກຏິຍາ ສປ຺ປາທິໍ ຆຏ຺ເຏຕ຺ວາ ມຓ຺ຑູກາທິໍ ໂມເຈນ຺ຕສ຺ສປິ ອນາປຕ຺ຕິ ເອວ. ກຸປິຕຕາ, ອຸປສມ຺ປນ຺ນສ຺ສ ນ ໂມກ຺ຂາຘິປ຺ປາເຍນ ປຫາໂຣຕິ ທ຺ເວ ອງ຺ຄານິ.

ປຫາຣສິກ຺ຂາປທວຓ຺ຓນາ ນິຏ຺ຐິຕາ.

໕. ຕລສຕ຺ຕິກສິກ຺ຂາປທວຓ຺ຓນາ

໔໕໗. ປຎ຺ຈເມ ນ ປຫຣິຕຸກາມຕາຍ ທິນ຺ນຕ຺ຕາ ທຸກ຺ກຏນ຺ຕິ ເອຕ຺ຖ ກິມິທໍ ທຸກ຺ກຏໍ, ປຫາຣປຈ຺ຈຍາ, ອຸທາຫຸ ອຸຄ຺ຄິຣຓປຈ຺ຈຍາຕິ? ອຸຄ຺ຄິຣຓປຈ຺ຈຍາວ, ນ ປຫາຣປຈ຺ຈຍາ. ນ ຫິ ປຫຣິຕຸກາມຕາຍ ອສຕິ ຕປ຺ປຈ຺ຈຍາ ກາຈິ ອາປຕ຺ຕິ ຍຸຕ຺ຕາ, ອຸຄ຺ຄິຣຓສ຺ສ ປນ ອຕ຺ຕໂນ ສຠາເວນ ອສຓ຺ຐິຕຕ຺ຕາ ຕປ຺ປຈ຺ຈຍາ ປາຈິຕ຺ຕິຍໍ ນ ຊາຕໍ, ອສຸທ຺ຘຈິຕ຺ເຕນ ກຕປໂຍຄຕ຺ຕາ ຈ ເອຕ຺ຖ ອນາປຕ຺ຕິ ນ ຍຸຕ຺ຕາຕິ ທຸກ຺ກຏໍ ວຸຕ຺ຕນ຺ຕິ ຄເຫຕພ຺ພໍ.

໔໕໘. ປຸພ຺ເພຕິ ອນນ຺ຕຣສິກ຺ຂາປເທ. ເສສໍ ອນນ຺ຕຣສທິສເມວ.

ຕລສຕ຺ຕິກສິກ຺ຂາປທວຓ຺ຓນາ ນິຏ຺ຐິຕາ.

໖. ອມູລກສິກ຺ຂາປທວຓ຺ຓນາ

໔໕໙. ຉຏ຺ເຐ ‘‘ອຕ຺ຕປຣິຕ຺ຕາຓໍ ກໂຣນ຺ຕາ’’ຕິ ອິທໍ ນ ຈ ເວຣມູລິກາ ອນຸທ຺ຘໍສນາຕິ ທສ຺ສນຕ຺ຖໍ ວຸຕ຺ຕໍ. ອນຸທ຺ຘໍສນກ຺ຂເຓ ປນ ໂກປຈິຕ຺ຕເມວ ອຸປ຺ປຊ຺ຊຕິ. ເຕເນວ ‘‘ທຸກ຺ຂເວທນ’’ນ຺ຕິ ວຸຕ຺ຕໍ. ເສສໍ ວຸຕ຺ຕນຍເມວ.

ອມູລກສິກ຺ຂາປທວຓ຺ຓນາ ນິຏ຺ຐິຕາ.

໗. ກຸກ຺ກຸຈ຺ຈຸປ຺ປາທນສິກ຺ຂາປທວຓ຺ຓນາ

໔໖໔. ສຕ຺ຕເມ ອຸປສມ຺ປນ຺ນສ຺ສ ອຜາສຸກາມຕາ, ກຸກ຺ກຸຈ຺ຈຸປ຺ປາທນນ຺ຕິ ທ຺ເວ ອງ຺ຄານິ.

ກຸກ຺ກຸຈ຺ຈຸປ຺ປາທນສິກ຺ຂາປທວຓ຺ຓນາ ນິຏ຺ຐິຕາ.

໘. ອຸປສ຺ສຸຕິສິກ຺ຂາປທວຓ຺ຓນາ

໔໗໑. ອຏ຺ຐເມ ສຸຍ຺ຍຕີຕິ ສຸຕິ, ວຈນໍ. ຕສ຺ສາ ສມີປໍ ອຸປສ຺ສຸຕິ. ສຸຍ຺ຍຕິ ເອຕ຺ຖາຕິ ສຸຕີຕິ ເອວຎ຺ຫິ ອຕ຺ເຖ ຄຍ຺ຫມາເນ ສວນຏ຺ຐານສມີເປ ອຎ຺ຎສ຺ມິໍ ອສ຺ສວນຏ຺ຐາເນ ຕິຏ຺ຐຕີຕິ ອາປຊ຺ຊຕິ. ອຏ຺ຐກຖາຍຎ຺ຈ ອຸປສ຺ສຸຕິ-ສທ຺ທສ຺ເສວ ອຕ຺ຖໍ ທສ຺ເສຕຸໍ ‘‘ຍຕ຺ຖ ຐຕ຺ວາ’’ຕິອາທິ ວຸຕ຺ຕໍ, ນ ສຸຕິ-ສທ຺ທມຕ຺ຕສ຺ສ.

໔໗໓. ເອກປຣິຈ຺ເຉທານີຕິ ກທາຈິ ອກິຣິຍໂຕ, ກທາຈິ ກິຣິຍໂຕ ສມຸຏ຺ຐານສາມຎ຺ເຎນ ວຸຕ຺ຕໍ. ອຸປສມ຺ປນ຺ເນນ ໂຈທນາຘິປ຺ປາໂຍ, ສວນນ຺ຕິ ທ຺ເວ ອງ຺ຄານິ.

ອຸປສ຺ສຸຕິສິກ຺ຂາປທວຓ຺ຓນາ ນິຏ຺ຐິຕາ.

໙. ຂິຍ຺ຍນສິກ຺ຂາປທວຓ຺ຓນາ

໔໗໔. ນວເມ ຘມ຺ມກມ຺ມຕາ, ຊານນໍ, ຉນ຺ທໍ ທຕ຺ວາ ຂິຍ຺ຍນນ຺ຕິ ຕີຓິ ອງ຺ຄານິ.

ຂິຍ຺ຍນສິກ຺ຂາປທວຓ຺ຓນາ ນິຏ຺ຐິຕາ.

໑໐. ປກ຺ກມນສິກ຺ຂາປທວຓ຺ຓນາ

໔໘໑. ທສເມ ວິນິຈ຺ຉຍກຖາຍ ຘມ຺ມິກຕາ, ຕໍ ຎຕ຺ວາ ກມ຺ມໂຕ ປຏ຺ຐາຍ ເອກສີມຏ຺ຐສ຺ສ ສມານສໍວາສິກສ຺ສ ຫຕ຺ຖປາສວິຊຫນນ຺ຕິ ທ຺ເວ ອງ຺ຄານິ.

ປກ຺ກມນສິກ຺ຂາປທວຓ຺ຓນາ ນິຏ຺ຐິຕາ.

໑໑. ທຸພ຺ພລສິກ຺ຂາປທວຓ຺ຓນາ

໔໘໔. ເອກາທສເມ ອຸປສມ຺ປນ຺ນສ຺ສ ຘມ຺ເມນ ລທ຺ຘສມ຺ມຸຕິຕາ, ສງ຺ເຆນ ສທ຺ຘິໍ ຈີວຣໍ ທຕ຺ວາ ຂິຍ຺ຍິຕຸກາມຕາຍ ຂິຍ຺ຍນນ຺ຕິ ທ຺ເວ ອງ຺ຄານິ.

ທຸພ຺ພລສິກ຺ຂາປທວຓ຺ຓນາ ນິຏ຺ຐິຕາ.

໔໘໙. ທ຺ວາທສມໍ ວຸຕ຺ຕນຍເມວ.

ນິຏ຺ຐິໂຕ ສຫຘມ຺ມິກວຄ຺ໂຄ ອຏ຺ຐໂມ.