໙. ຣາຊວຄ຺ໂຄ

໑. ອນ຺ເຕປຸຣສິກ຺ຂາປທວຓ຺ຓນາ

໔໙໙. ນວມວຄ຺ຄສ຺ສ ປຐເມ ປາຬິຍໍ ສໍສຸທ຺ຘຄຫຓິໂກຕິ ເອຕ຺ຖ ຄຫຓີຕິ ຄພ຺ຠາສຍສຎ຺ຎິໂຕ ມາຕຸ ກຸຈ຺ຉິປ຺ປເທໂສ, ປຸຣິສນ຺ຕຣສຸກ຺ກາສມ຺ຜຸຏ຺ຐຕາຍ ສໍສຸທ຺ຘຄຫຓິໂກ. ອຠິສິຕ຺ຕຂຕ຺ຕິຍຕາ, ອຸຠິນ຺ນມ຺ປິ ສຍນິຆຣໂຕ ອນິກ຺ຂນ຺ຕຕາ, ອປ຺ປຏິສໍວິທິຕສ຺ສ ອິນ຺ທຂີລາຕິກ຺ກໂມຕິ ຕີຓິ ອງ຺ຄານິ.

ອນ຺ເຕປຸຣສິກ຺ຂາປທວຓ຺ຓນາ ນິຏ຺ຐິຕາ.

໒. ຣຕນສິກ຺ຂາປທວຓ຺ຓນາ

໕໐໖. ທຸຕິເຍ ອາວສຖສ຺ສາຕິ ເອຕ຺ຖ ອນ຺ໂຕອາຣາເມ ວາ ໂຫຕຸ ອຎ຺ຎຕ຺ຖ ວາ, ຍຕ຺ຖ ກຕ຺ຖຈິ ອຕ຺ຕໂນ ວສນຏ຺ຐານໍ ອາວສໂຖ ນາມ. ຉນ຺ເທນປິ ຠເຍນປີຕິ ວຑ຺ຒກິອາທີສຸ ຉນ຺ເທນ, ຣາຊວລ຺ລເຠສຸ ຠເຍນ. ອາກິຓ຺ຓມນຸສ຺ເສປິ ຊາເຕ…ເປ… ອາສງ຺ກນ຺ຕີຕິ ຕສ຺ມິໍ ນິມ຺ມນຸສ຺ສຏ຺ຐາເນ ປຈ຺ຉາ ອາກິຓ຺ຓມນຸສ຺ເສ ຊາເຕປິ ວິສຣິຕ຺ວາ ຄມນກາເລ ອຎ຺ຎສ຺ສ ອທິຏ຺ຐຕ຺ຕາ ຕເມວ ຠິກ຺ຂຸໍ ອາສງ຺ກນ຺ຕິ. ປຕິຣູປໍ ນາມ ກປ຺ປິຍຠຓ຺ເຑ ສຍໍ ປໍສຸກູລໍ ຄເຫຕ຺ວາ ອກປ຺ປິຍຠຓ຺ເຑ ປຕິຣູປານໍ ອຸປາສກາທີນໍ ທສ຺ເສຕ຺ວາ ເຈຕິຍາທິປຸຎ຺ເຎ ນິໂຍຊນໍ ວາ ທາເປຕ຺ວາ ນິຣເປກ຺ຂຄມນໍ ວາ. ສມາທເປຕ຺ວາຕິ ຍາຈິຕ຺ວາ. ປຣສນ຺ຕກຕາ, ວິສ຺ສາສຄ຺ຄາຫປໍສຸກູລສຎ຺ຎານໍ ອຠາໂວ, ອນນຸຎ຺ຎາຕກາຣຓາ ອຸຄ຺ຄຫຓາທິ ຈາຕິ ຕີຓິ ອງ຺ຄານິ.

ຣຕນສິກ຺ຂາປທວຓ຺ຓນາ ນິຏ຺ຐິຕາ.

໓. ວິກາລຄາມປ຺ປວິສນສິກ຺ຂາປທວຓ຺ຓນາ

໕໐໘. ຕຕິເຍ ປາຬິຍໍ ຠຍກຖນ຺ຕິ ຣາຊໂຈຣາທິຠຍໍ ວາ ໂຣຄາມນຸສ຺ສທຸພ຺ຠິກ຺ຂກນ຺ຕາຣາທິຠຍໍ ວາ ອາຣພ຺ຠ ປວຕ຺ຕໍ. ວິສິຂາກຖນ຺ຕິ ສຸນິວິຏ຺ຐາທິວີຖິກຖໍ. ກຸມ຺ຠຏ຺ຐານກຖນ຺ຕິ ອຸທກຕິຕ຺ຖກຖໍ, ກຸມ຺ຠທາສີກຖໍ ວາ. ປຸພ຺ພເປຕກຖນ຺ຕິ ອຕີຕຎາຕິກຖໍ. ນານຕ຺ຕກຖນ຺ຕິ ວຸຕ຺ຕາຫິ, ວກ຺ຂມານາຫິ ຈ ວິມຸຕ຺ຕໍ ນານາສຠາວໍ ນິຣຕ຺ຖກກຖໍ. ໂລກກ຺ຂາຍິກນ຺ຕິ ‘‘ອຍໍ ໂລໂກ ເກນ ນິມ຺ມິໂຕ’’ຕິອາທິນາ ໂລກສຠາວກ຺ຂານວເສນ ປວຕ຺ຕນກຖາ. ເອວໍ ສມຸທ຺ທກ຺ຂາຍິກາ ເວທິຕພ຺ພາ. ອິຕິ ຠໂວ ອິຕິ ອຠໂວຕິ ຍໍ ວາ ຕໍ ວາ ນິຣຕ຺ຖກກາຣຓໍ ວຕ຺ວາ ປວຕ຺ຕິຕກຖາ ອິຕິຠວາຠວກຖາ. ເອຕ຺ຖ ຈ ຠໂວ ສສ຺ສຕໍ, ວຸຑ຺ຒິ, ກາມສຸຂຎ຺ຈາຕິ ຕິວິໂຘ, ອຠໂວ ຕພ຺ພິປຣີຕວເສນ. ອິຕິ ອິມາຍ ຉພ຺ພິຘາຍ ອິຕິຠວາຠວກຖາຍ ສທ຺ຘິໍ ທ຺ວຕ຺ຕິໍສຕິຣຈ຺ຉານກຖາ ນາມ ໂຫນ຺ຕິ. ອຖ ວາ ປາຬິຍໍ ສຣູປໂຕ ອນາຄຕາປິ ອຣຎ຺ຎປພ຺ພຕນທີທີປກຖາ ອິຕິ-ສທ຺ເທນ ສງ຺ຄເຫຕ຺ວາ ທ຺ວຕ຺ຕິໍສຕິຣຈ຺ຉານກຖາຕິ ວຸຈ຺ຈນ຺ຕິ. ອິຕິ ວາຕິ ເອຕ຺ຖ ອິຕິ-ສທ຺ໂທ ປກາຣຕ຺ເຖ. ວາ-ສທ຺ໂທ ວິກປ຺ປຕ຺ເຖ. ຕສ຺ມາ ເອວໍ ປກາຣໍ ອິໂຕ ອຎ຺ຎໍ ວາ ຕາທິສໍ ນິຣຕ຺ຖກກຖໍ ກເຖຕີຕິ ອຕ຺ໂຖ ຄເຫຕພ຺ໂພ.

໕໑໒. ອຸສ຺ສາຫໍ ປຏິປ຺ປສ຺ສມ຺ເຠຕ຺ວາ ວິຫາຣໍ ຄຈ຺ຉນ຺ຕາຕິ ເອຕ຺ຖ ຄາມູປຈາຣໂຕ ພຫິ ນິກ຺ຂນ຺ເຕ ອນ຺ຕຣາຣາມາທີນມຸປຈາຣໍ ປວິຏ຺ເຐ ສນ຺ຘາຍ ວຸຕ຺ຕໍ. ຄາມູປຈາຣພ຺ຠນ຺ຕເຣ ປນ ປຏິປສ຺ສທ຺ຘຸສ຺ສາຫານມ຺ປິ ປຸນ ຕເມວ ວາ ອຎ຺ຎໍ ວາ ຄາມໍ ປວິສິຕຸກາມຕາຍ ສຕິ ອາປຸຈ຺ຉນກິຈ຺ຈໍ ນຕ຺ຖິ. ‘‘ກຸລຆເຣ ວາ…ເປ… ຄນ຺ຕພ຺ພ’’ນ຺ຕິ ອິທໍ ປນ ປຸເຣຠຕ຺ຕໍ ປວິຏ຺ຐານໍ ວິກາເລ ສຎ຺ຊາເຕ ວິກາເລ ຄາມປ຺ປເວສສ຺ສ ອາປຸຈ຺ຉິຕພ຺ພຕາຍ ວຸຕ຺ຕໍ. ອທິນ຺ນາທາເນ ວຸຕ຺ຕນເຍນາຕິ ທຸຕິຍເລຑ຺ຑຸປາຕໍ ສນ຺ຘາຍ ວຸຕ຺ຕໍ.

໕໑໕. ອນ຺ຕຣາຣາມນ຺ຕິອາທີສູຕິ ເອຕ຺ຖ ອຸສ຺ສວທິວສາທີສຸ ມນຸສ຺ເສຫິ ຄາເມ ປທກ຺ຂິຓໍ ກາເຣນ຺ຕໍ ຊິນພິມ຺ພາທິໍ ປູເຊຕຸກາເມຫິ ວາ ໂຣຄວູປສມາທິຍຕ຺ຖໍ ມນຸສ຺ເສຫິ ຍາຈິເຕຫິ ວາ ຠິກ຺ຂູຫິ ສຸປ຺ປຏິຈ຺ຉນ຺ນາທິວິຘິໍ ອກຕ຺ວາປິ ວີຖິມຊ຺ເຌເນວ ຄາມໍ ປທກ຺ຂິຓໍ ກາຕຸໍ ວຏ຺ຏຕີຕິ ວທນ຺ຕິ, ຕໍ ນ ຄເຫຕພ຺ພໍ ອນາປຕ຺ຕິວາເຣ ອວຸຕ຺ຕຕ຺ຕາ, ‘‘ມຄ຺ຄາ ອໂນກ຺ກມິຕ຺ວາ…ເປ… ປາຈິຕ຺ຕິຍ’’ນ຺ຕິ (ກງ຺ຂາ. ອຏ຺ຐ. ວິກາລຄາມປ຺ປເວສນສິກ຺ຂາປທວຓ຺ຓນາ) ປຏິກ຺ຂິຕ຺ຕຕ຺ຕາ ຈ. ເວສາລິໍ ອນຸປຣິຍາຍິຕ຺ວາ ປຣິຕ຺ຕໍ ກໂຣນ຺ເຕນາປິ ອານນ຺ທຕ຺ເຖເຣນ ສຸປ຺ປຏິຈ຺ຉນ຺ນຕາທິໍ ອໂກເປນ຺ເຕເນວ, ອປຎ຺ຎຕ຺ເຕ ວາ ສິກ຺ຂາປເທ ກຕນ຺ຕິ ທຏ຺ຐພ຺ພໍ. ເກຈິ ປນ ‘‘ອນ຺ຕຣາຣາມາທິຄາມນ຺ຕເຣ ຐິເຕຫິ ຄຣຸຏ຺ຐານີຍານໍ ປຈ຺ຈຸຄ຺ຄມນານຸຄ຺ຄມນາທິວເສນ ຄາມວີຖິໍ ໂອຕຣິຕຸໍ ວຏ຺ຏຕີ’’ຕິ ວທນ຺ຕິ, ຕມ຺ປິ ອນ຺ຕຣຆຣໍ ປວິສນ຺ຕໍ ປຕິ ກາຕຸໍ ນ ວຏ຺ຏຕິ ເອວ. ອນ຺ຕຣາຣາມາທິກປ຺ປິຍຠູມິໍ ປນ ອຸທ຺ທິສ຺ສ ຄຈ຺ຉນ຺ຕໍ ປຕິ ກາຕຸໍ ວຏ຺ຏຕີຕິ ຂາຍຕິ, ວີມໍສິຕພ຺ພໍ. ສນ຺ຕໍ ຠິກ຺ຂຸໍ ອນາປຸຈ຺ຉນາ, ອນນຸຎ຺ຎາຕກາຣຓາ ວິກາເລ ຄາມປ຺ປເວໂສຕິ ທ຺ເວ ອງ຺ຄານິ.

ວິກາລຄາມປ຺ປວິສນສິກ຺ຂາປທວຓ຺ຓນາ ນິຏ຺ຐິຕາ.

໔. ສູຈິຆຣສິກ຺ຂາປທວຓ຺ຓນາ

໕໒໐. ຈຕຸຕ຺ເຖ ປາຬິຍໍ ວາສິຊເຏຕິ ວາສິທຓ຺ຑເກ. ອຏ຺ຐິມຍາທິສູຈິຆຣຕາ, ກຣຓກາຣາປນາທິວເສນ ອຕ຺ຕໂນ ປຏິລາໂຠຕິ ທ຺ເວ ອງ຺ຄານິ.

ສູຈິຆຣສິກ຺ຂາປທວຓ຺ຓນາ ນິຏ຺ຐິຕາ.

໕. ມຎ຺ຈປີຐສິກ຺ຂາປທວຓ຺ຓນາ

໕໒໑. ປຎ຺ຈເມ ປາຬິຍໍ ອາສຍໂຕ, ຠິກ຺ຂເວ, ໂມຆປຸຣິໂສ ເວທິຕພ຺ໂພຕິ ຫີນຊ຺ຌາສຍວເສນ ອຍໍ ຕຸຈ຺ຉປຸຣິໂສຕິ ຎາຕພ຺ໂພ, ຫີນາຍ ປຈ຺ຈເຍ ໂລລຕາຍ ປຸຄ຺ຄລສ຺ສ ຕຸຈ຺ຉຕາ ຎາຕພ຺ພາຕິ ອຘິປ຺ປາໂຍ. ອິມສ຺ມິໍ ສິກ຺ຂາປເທ, ອິໂຕ ປເຣສຸ ຈ ປຎ຺ຈສຸ ອຕ຺ຕນາ ກາຣາປິຕສ຺ສ ປຏິລາເຠ ເອວ ປາຈິຕ຺ຕິຍໍ. ປຣິໂຠເຄ ປນສ຺ສ, ອຎ຺ເຎສຎ຺ຈ ທຸກ຺ກຏເມວ. ປມາຓາຕິກ຺ກນ຺ຕມຎ຺ຈປີຐຕາ, ອຕ຺ຕໂນ ກຣຓກາຣາປນວເສນ ປຏິລາໂຠຕິ ທ຺ເວ ອງ຺ຄານິ.

ມຎ຺ຈປີຐສິກ຺ຂາປທວຓ຺ຓນາ ນິຏ຺ຐິຕາ.

໖. ຕູໂລນທ຺ຘສິກ຺ຂາປທວຓ຺ຓນາ

໕໒໖. ຉຏ຺ເຐ ໂປຏກິຕູລນ຺ຕິ ຕິຓຄຈ຺ຉຊາຕິການໍ ຕູລໍ. ເສສໍ ວຸຕ຺ຕນຍເມວ.

ຕູໂລນທ຺ຘສິກ຺ຂາປທວຓ຺ຓນາ ນິຏ຺ຐິຕາ.

໗. ນິສີທນສິກ຺ຂາປທວຓ຺ຓນາ

໕໓໑-໕໓໖. ສຕ຺ຕເມ ນິສີທນສ຺ສ ປມາຓາຕິກ຺ກນ຺ຕຕາ, ອຕ຺ຕໂນ ກຣຓາທິນາ ປຏິລາໂຠຕິ ທ຺ເວ ອງ຺ຄານິ.

ນິສີທນສິກ຺ຂາປທວຓ຺ຓນາ ນິຏ຺ຐິຕາ.

໕໓໗-໕໔໗. ອິມິນາ ນເຍນ ອຏ຺ຐມນວມທສເມສຸປິ ອງ຺ຄານິ ເວທິຕພ຺ພານິ. ເສສໍ ສພ຺ພຕ຺ຖ ສຸວິຎ຺ເຎຍ຺ຍເມວາຕິ.

ນິຏ຺ຐິໂຕ ຣາຊວຄ຺ໂຄ ນວໂມ.

ຂຸທ຺ທກວຓ຺ຓນານໂຍ ນິຏ຺ຐິໂຕ.