໗. ສປ຺ປາຓກວຄ຺ໂຄ

໑. ສຎ຺ຈິຈ຺ຈປາຓສິກ຺ຂາປທວຓ຺ຓນາ

໓໘໒. ສຕ຺ຕມສ຺ສ ປຐເມ ອຸສຸໍ ສຣໍ ອສຕິ ຂິປຕີຕິ ອິສ຺ສາໂສ. ນ ເຫຕ຺ຖ ກິຎ຺ຈິ ຊີວິຕໍ ນາມ ວິສຸໍ ຕິຏ຺ຐຕີຕິ ສມ຺ພນ຺ໂຘ. ຕຕ຺ຖ ປາເຓຕິ ສຕ຺ເຕ. ອປ຺ປມຕ຺ເຕນ ວຕ຺ຕໍ ກາຕພ຺ພນ຺ຕິ ຍຖາ ປາຓການໍ ວິເຫສາປິ ນ ໂຫຕິ, ເອວໍ ສລ຺ລກ຺ເຂຕ຺ວາ ໂອຕາປນສມ຺ມຊ຺ຊນາທິວຕ຺ຕໍ ກາຕພ຺ພໍ. ເສສໍ ວຸຕ຺ຕນຍເມວ.

ສຎ຺ຈິຈ຺ຈປາຓສິກ຺ຂາປທວຓ຺ຓນາ ນິຏ຺ຐິຕາ.

໒. ສປ຺ປາຓກສິກ຺ຂາປທວຓ຺ຓນາ

໓໘໗. ທຸຕິເຍ ອຸທກສຓ຺ຐານກປ຺ປເທເສຕິ ກທ຺ທມປາສາຓາທິຠູມິຍໍ. ຕຕ຺ຖາຕິ ອາສິຕ຺ເຕ ກປ຺ປິຍອຸທເກ. ເສສໍ ວຸຕ຺ຕນຍເມວ.

ສປ຺ປາຓກສິກ຺ຂາປທວຓ຺ຓນາ ນິຏ຺ຐິຕາ.

໓. ອຸກ຺ໂກຏນສິກ຺ຂາປທວຓ຺ຓນາ

໓໙໒. ຕຕິເຍ ‘‘ຕສ຺ສ ຠິກ຺ຂຸໂນ ສນ຺ຕິກໍ ຄນ຺ຕ຺ວາ’’ຕິ ວຸຕ຺ຕຕ຺ຕາ ຍສ຺ສ ອຘິກຣຓໍ ສງ຺ຆກມ຺ເມນ ນິຫຕໍ, ຕສ຺ສ ສມ຺ມຸເຂ ເອວ ອຸກ຺ໂກເຏນ຺ຕສ຺ສ ປາຈິຕ຺ຕິຍໍ. ປຣມ຺ມຸເຂ ປນ ທຸກ຺ກຏເມວ.

໓໙໕. ‘‘ຘມ຺ມກມ຺ເມ ອຘມ຺ມກມ຺ມສຎ຺ຎີ ອຸກ຺ໂກເຏຕິ, ອນາປຕ຺ຕີ’’ຕິ ວຸຕ຺ຕຕ຺ຕາ ອນາທຣິຍຕາທິ ວິຍ ອຸກ຺ໂກຏນໍ ສຍໍ ອກຸສລໍ ນ ໂຫຕິ, ຘມ຺ມກມ຺ມສຎ຺ຎາຍ, ປນ ວິມຕິຍາ ຈ ອຸກ຺ໂກຏເນເນວ ອກຸສລໍ ໂຫຕິ. ຍຖາຘມ຺ມໍ ນິຫຕຕາ, ຊານນາ, ອຸກ຺ໂກຏນາຕິ ຕີຓິ ອງ຺ຄານິ.

ອຸກ຺ໂກຏນສິກ຺ຂາປທວຓ຺ຓນາ ນິຏ຺ຐິຕາ.

໔. ທຸຏ຺ຐຸລ຺ລສິກ຺ຂາປທວຓ຺ຓນາ

໓໙໙. ຈຕຸຕ຺ເຖ ອາປຕ຺ຕິໍ ອາປຊ຺ຊຕິເຍວາຕິ ຘຸຣນິກ຺ເຂປປກ຺ເຂ ວຸຕ຺ຕໍ. ວຕ຺ຖຸປຸຄ຺ຄໂລຕິ ອາປນ຺ນປຸຄ຺ຄໂລ. ຉາເທຕຸກາມຕາຍ ຫິ ສຕິ ເອວ ອວສ຺ສໍ ອຎ຺ຎສ຺ສ ອາໂຣຈນໍ ວຸຕ຺ຕໍ, ວຕ຺ຖຸປຸຄ຺ຄລສ຺ສ ຈ ອາໂຣຈນາ ນາມ ນ ໂຫຕີຕິ ປຏິຈ຺ຉາທນເມວາຕິ ອຘິປ຺ປາໂຍ. ໂກຏິ ຉິນ຺ນາ ໂຫຕີຕິ ຉາເທສ຺ສາມີຕິ ຘຸຣນິກ຺ເຂເປ ສຕິປິ ປຸຄ຺ຄລປຣມ຺ປຣາຍ ຄຈ຺ຉນ຺ຕີ ອາປຕ຺ຕິໂກຏິ ຉິຊ຺ຊຕິ.

໔໐໐. ‘‘ອນຸປສມ຺ປນ຺ນສ຺ສ ສຸກ຺ກວິສ຺ສຏ຺ຐິ ຈ ກາຍສໍສຄ຺ໂຄ ຈາຕິ ອຍໍ ທຸຏ຺ຐຸລ຺ລອຊ຺ຌາຈາໂຣ ນາມາ’’ຕິ ອິທໍ ທຸຏ຺ຐຸລ຺ລາໂຣຈນສິກ຺ຂາປທຏ຺ຐກຖາຍໍ ‘‘ອນຸປສມ຺ປນ຺ນສ຺ສ…ເປ… ອາທິໂຕ ປຎ຺ຈ ສິກ຺ຂາປທານິ ທຸຏ຺ຐຸລ຺ໂລ ນາມ ອຊ຺ຌາຈາໂຣ, ເສສານິ ອທຸຏ຺ຐຸລ຺ໂລ. ສຸກ຺ກວິສ຺ສຏ຺ຐິກາຍສໍສຄ຺ຄທຸຏ຺ຐຸລ຺ລອຕ຺ຕກາມາ ປນສ຺ສ ອຊ຺ຌາຈາໂຣ ນາມາ’’ຕິ (ປາຈິ. ອຏ຺ຐ. ໘໒) ອິມິນາ ວຈເນນ ວິຣຸຊ຺ຌຕີຕິ ວີມໍສິຕພ຺ພໍ. ປຸຄ຺ຄລເປເມນ ຉາທຍໂຕ ເຈຕ຺ຖ ‘‘ອຎ຺ເຎ ຄຣຫິສ຺ສນ຺ຕີ’’ຕິ ຠຍວເສນ ຉາທນກ຺ຂເຓ ປຏິໂຆວ ອຸປ຺ປຊ຺ຊຕີຕິ ‘‘ທຸກ຺ຂເວທນ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ. ອຸປສມ຺ປນ຺ນສ຺ສ ທຸຏ຺ຐຸລ຺ລາປຕ຺ຕິຊານນໍ, ປຏິຈ຺ຉາເທຕຸກາມຕາຍ ຘຸຣນິກ຺ເຂໂປຕິ ທ຺ເວ ອງ຺ຄານິ.

ທຸຏ຺ຐຸລ຺ລສິກ຺ຂາປທວຓ຺ຓນາ ນິຏ຺ຐິຕາ.

໕. ອູນວີສຕິວສ຺ສສິກ຺ຂາປທວຓ຺ຓນາ

໔໐໒. ປຎ຺ຈເມ ຣູປສິປ຺ປນ຺ຕິ ເຫຣຎ຺ຎິກສິປ຺ປໍ. ຄພ຺ເຠ ສຍິຕກາເລນ ສທ຺ຘິໍ ວີສຕິມໍ ວສ຺ສໍ ປຣິປຸຓ຺ຓມສ຺ສາຕິ ຄພ຺ຠວີໂສ.

໔໐໔. ນິກ຺ຂມນີຍປຸຓ຺ຓມາສີຕິ ສາວຓມາສສ຺ສ ປຸຓ຺ຓມິຍາ ອາສາຬ຺ຫີປຸຓ຺ຓມິຍາ ອນນ຺ຕຣປຸຓ຺ຓມີ. ປາຏິປທທິວເສຕິ ປຈ຺ຉິມິກາຍ ວສ຺ສູປນາຍິກາຍ. ທ຺ວາທສ ມາເສ ມາຕຸ ກຸຈ຺ຉິສ຺ມິໍ ວສິຕ຺ວາ ມຫາປວາຣຓາຍ ຊາຕໍ ອຸປສມ຺ປາເທນ຺ຕີຕິ ອຕ຺ໂຖ. ‘‘ຕິໍສ ຣຕ຺ຕິນ຺ທິໂວ ມາໂສ, ທ຺ວາທສມາສິໂກ ສໍວຈ຺ຉໂຣ’’ຕິ (ອ. ນິ. ໓.໗໑; ໘.໔໓; ວິຠ. ໑໐໒໓) ວຈນໂຕ ‘‘ຈຕ຺ຕາໂຣ ມາສາ ປຣິຫາຍນ຺ຕີ’’ຕິ ວຸຕ຺ຕໍ. ວສ຺ສໍ ອຸກ຺ກຑ຺ຒນ຺ຕີຕິ ວສ຺ສໍ ອຸທ຺ຘໍ ກຑ຺ຒນ຺ຕິ, ‘‘ເອກມາສໍ ອຘິກມາໂສ’’ຕິ ຉຑ຺ເຑຕ຺ວາ ວສ຺ສໍ ອຸປຄຈ຺ຉນ຺ຕີຕິ ອຕ຺ໂຖ. ຕສ຺ມາ ຕຕິໂຍ ຕຕິໂຍ ສໍວຈ຺ຉໂຣ ເຕຣສມາສິໂກ ໂຫຕິ. ເຕ ທ຺ເວ ມາເສ ຄເຫຕ຺ວາຕິ ນິກ຺ຂມນີຍປຸຓ຺ຓມາສໂຕ ຍາວ ຊາຕທິວສຠູຕາ ມຫາປວາຣຓາ. ຕາວ ເຍ ທ຺ເວ ມາສາ ອນາຄຕາ, ເຕສໍ ອຕ຺ຖາຍ ອຘິກມາສໂຕ ລທ຺ເຘ ທ຺ເວ ມາເສ ຄເຫຕ຺ວາ. ເຕນາຫ ‘‘ໂຍ ປວາເຣຕ຺ວາ ວີສຕິວສ຺ໂສ ຠວິສ຺ສຕີ’’ຕິອາທິ. ‘‘ນິກ຺ກງ຺ຂາ ຫຸຕ຺ວາ’’ຕິ ອິທໍ ອຏ຺ຐາຣສນ຺ນໍ ວສ຺ສານໍ ເອກອຘິກມາເສ ຄເຫຕ຺ວາ ຕໂຕ ວີສຕິຍາ ວສ຺ເສສຸປິ ຈາຕຸທ຺ທສີອຕ຺ຖາຍ ຈຕຸນ຺ນໍ ມາສານໍ ປຣິຫາປເນນ ສພ຺ພທາ ປຣິປຸຓ຺ຓວີສຕິວສ຺ສຕໍ ສນ຺ຘາຍ ວຸຕ຺ຕໍ. ປວາເຣຕ຺ວາ ວີສຕິວສ຺ໂສ ຠວິສ຺ສຕີຕິ ມຫາປວາຣຓາທິວເສ ອຕິກ຺ກນ຺ເຕ ຄພ຺ຠວສ຺ເສນ ສຫ ວີສຕິວສ຺ໂສ ຠວິສ຺ສຕີຕິ ອຕ຺ໂຖ. ຕສ຺ມາຕິ ຍສ຺ມາ ຄພ຺ຠມາສາປິ ຄຓນູປຄາ ໂຫນ຺ຕິ, ຕສ຺ມາ. ເອກວີສຕິວສ຺ໂສຕິ ຊາຕິຍາ ວີສຕິວສ຺ສໍ ສນ຺ຘາຍ ວຸຕ຺ຕໍ.

໔໐໖. ອຎ຺ຎໍ ອຸປສມ຺ປາເທຕີຕິ ອຸປຊ຺ຌາໂຍ, ອາຈຣິໂຍ ວາ ຫຸຕ຺ວາ ອຸປສມ຺ປາເທຕິ. ໂສປີຕິ ອຸປສມ຺ປາເທນ຺ໂຕປິ ອນຸປສມ຺ປນ຺ໂນ. ອູນວີສຕິວສ຺ສຕາ, ຕໍ ຎຕ຺ວາ ອຸປຊ຺ຌາເຍນ ຫຸຕ຺ວາ ອຸປສມ຺ປາທນນ຺ຕິ ທ຺ເວ ອງ຺ຄານິ.

ອູນວີສຕິວສ຺ສສິກ຺ຂາປທວຓ຺ຓນາ ນິຏ຺ຐິຕາ.

໖. ເຖຍ຺ຍສຕ຺ຖສິກ຺ຂາປທວຓ຺ຓນາ

໔໐໙. ຉຏ຺ເຐ ເຖຍ຺ຍສຕ຺ຖຠາໂວ, ຎຕ຺ວາ ສໍວິຘານໍ, ອວິສງ຺ເກເຕນ ຄມນນ຺ຕິ ຕີຓິ ອງ຺ຄານິ.

ເຖຍ຺ຍສຕ຺ຖສິກ຺ຂາປທວຓ຺ຓນາ ນິຏ຺ຐິຕາ.

໔໑໒. ສຕ຺ຕມໍ ວຸຕ຺ຕນຍເມວ.

໘. ອຣິຏ຺ຐສິກ຺ຂາປທວຓ຺ຓນາ

໔໑໗. ອຏ຺ຐເມ ອນ຺ຕຣາຍນ຺ຕິ ອນ຺ຕຣາ ເວມຊ຺ເຌ ເອຕິ ອາຄຈ຺ຉຕີຕິ ອນ຺ຕຣາໂຍ, ທິຏ຺ຐຘມ຺ມິກາທິອນຕ຺ໂຖ. ອານນ຺ຕຣິຍຘມ຺ມາຕິ ອນນ຺ຕເຣ ຠເວ ຜລນິພ຺ພຕ຺ຕເນ ນິຍຸຕ຺ຕາ ເຈຕນາທິຘມ຺ມາຕິ ອຕ຺ໂຖ. ‘‘ນ ສຄ຺ຄສ຺ສາ’’ຕິ ອິທໍ ຠິກ຺ຂຸນິທູສນກມ຺ມສ຺ສ ອານນ຺ຕຣິຍຕ຺ຕາຠາວໂຕ ວຸຕ຺ຕໍ. ອຣິຍສາວິກາສຸ, ປນ ກລ຺ຍາຓປຸຖຸຊ຺ຊນຠູຕາຍ ຈ ພລກ຺ກາເຣນ ທູເສນ຺ຕສ຺ສ ອານນ຺ຕຣິຍສອສເມວ. ໂມກ຺ຂນ຺ຕຣາຍິກຕາ ປນ ໂລລາຍປິ ປກຕຕ຺ຕຠິກ຺ຂຸນິຍາ ທູສກສ຺ສ ຕສ຺ມິໍ ອຕ຺ຕຠາເວ ມຄ຺ຄຸປ຺ປຕ຺ຕິຍາ ອຠາວໂຕ ວຸຕ຺ຕາ.

ຕສ຺ມິໍ ອຕ຺ຕຠາເວ ອນິວຕ຺ຕນກາ ອເຫຕຸກອກິຣິຍນຕ຺ຖິກທິຏ຺ຐິໂຍວ ນິຍຕມິຈ຺ຉາທິຏ຺ຐິຘມ຺ມາ. ປຓ຺ຑກາທີນໍ ຄຫຓໍ ນິທສ຺ສນມຕ຺ຕໍ. ສພ຺ພາປິ ທຸເຫຕຸກາເຫຕຸກປຏິສນ຺ຘິໂຍ ວິປາກນ຺ຕຣາຍິກາວ ທຸເຫຕຸການມ຺ປິ ມຄ຺ຄານຸປ຺ປຕ຺ຕິໂຕ.

ອຍນ຺ຕິ ອຣິຏ຺ໂຐ. ຣເສນ ຣສນ຺ຕິ ອນວຊ຺ເຊນ ປຈ຺ຈຍປຣິຠຸຎ຺ຊນຣເສນ ປຎ຺ຈກາມຄຸຓປອໂຠຄຣສໍ ສມາເນຕ຺ວາ. ອຸປເນນ຺ໂຕ ວິຍາຕິ ຆເຏນ຺ໂຕ ວິຍ, ໂສ ເອວ ວາ ປາໂຐ.

ອຏ຺ຐິກງ຺ກລູປມາຕິ ເອຕ຺ຖ ອຏ຺ຐິ ເອວ ນິມ຺ມໍສຕາຍ ກງ຺ກລນ຺ຕິ ຈ ວຸຈ຺ຈຕິ. ປລິຠຎ຺ຊນຏ຺ເຐນາຕິ ອວສ຺ສໍ ປຕນຏ຺ເຐນ. ອຘິກຸຏ຺ຏນຏ຺ເຐນາຕິ ອຕິ ວິຍ ກຸຏ຺ຏນຏ຺ເຐນ. ປາຬິຍໍ ‘‘ຕຖາຫໍ ຠຄວຕາ…ເປ… ນາລໍ ອນ຺ຕຣາຍາຍາ’’ຕິ ອິທໍ ວຕ຺ຖຸອນຸຣູປໂຕ ວຸຕ຺ຕໍ. ເອວໍ ປນ ອຄ຺ຄເຫຕ຺ວາ ອຎ຺ເຎນປິ ອາກາເຣນ ຍໍ ກິຎ຺ຈິ ຠຄວຕາ ວຸຕ຺ຕໍ ວິປຣີຕໂຕ ຄເຫຕ຺ວາ ປເຣຫິ ວຸຕ຺ເຕປິ ອມຸຎ຺ຈິຕ຺ວາ ໂວຫຣນ຺ຕສ຺ສາປິ ວຸຕ຺ຕນຍານຸສາເຣນ ຕທນຸຄຸຓໍ ສມນຸຠາສນກມ຺ມວາຈໍ ໂຍເຊຕ຺ວາ ອາປຕ຺ຕິຍາ ອາໂຣເປຕຸໍ, ອາປຕ຺ຕິຍາ ອທສ຺ສນາທີສຸ ຕີສຸ ຍໍ ກິຎ຺ຈິ ອຠິຣຸຈິຕໍ ນິມິຕ຺ຕໍ ກຕ຺ວາ ອຸກ຺ເຂປນີຍກມ຺ມໍ ກາຕຸຎ຺ຈ ລພ຺ຠຕິ. ສມນຸຠາສນໍ ອກຕ຺ວາປິ ‘‘ມາຍສ຺ມາ ເອວໍ ອວຈາ’’ຕິ ຠິກ຺ຂູຫິ ວຸຕ຺ຕມຕ຺ເຕ ລທ຺ຘິຍາ ອປ຺ປຏິນິສ຺ສຊ຺ຊນປຈ຺ຈຍາຍ ທຸກ຺ກຏາປຕ຺ຕິຍາປິ ອຸກ຺ເຂປນີຍກມ຺ມໍ ກາຕຸມ຺ປິ ວຏ຺ຏເຕວາຕິ ທຏ຺ຐພ຺ພໍ. ຘມ຺ມກມ຺ມຕາ, ສມນຸຠາສນາຍ ອປ຺ປຏິນິສ຺ສຊ຺ຊນນ຺ຕິ ທ຺ເວ ອງ຺ຄານິ.

ອຣິຏ຺ຐສິກ຺ຂາປທວຓ຺ຓນາ ນິຏ຺ຐິຕາ.

໙. ອຸກ຺ຂິຕ຺ຕສມ຺ໂຠຄສິກ຺ຂາປທວຓ຺ຓນາ

໔໒໔. ນວເມ ‘‘ອຸກ຺ຂິຕ຺ໂຕ ອໂນສາຣິໂຕ’’ຕິ ວຸຕ຺ຕຕ຺ຕາ ອຣິຏ຺ຐສ຺ສ ອຸກ຺ເຂປນີຍກມ຺ມໍ ກຕນ຺ຕິ ທຏ຺ຐພ຺ພໍ.

໔໒໕. ປາຬິຍໍ ‘‘ເອກຈ຺ຉນ຺ເນ’’ຕິ ສາມຎ຺ຎໂຕ ວຸຕ຺ຕຕ຺ຕາ ນານູປຈາເຣປິ ເອກຈ຺ຉນ຺ເນ ນິປຊ຺ຊເນ ປຓ຺ຓຕ຺ຕິໍ ອຊານນ຺ຕສ຺ສ ອຣຫໂຕປິ ອຸກ຺ຂິຕ຺ຕານຸວຕ຺ຕການມ຺ປິ ປາຈິຕ຺ຕິຍເມວ. ອກຕານຸຘມ຺ມຕາ, ຎຕ຺ວາ ສມ຺ໂຠຄາທິກຣຓນ຺ຕິ ທ຺ເວ ອງ຺ຄານິ.

ອຸກ຺ຂິຕ຺ຕສມ຺ໂຠຄສິກ຺ຂາປທວຓ຺ຓນາ ນິຏ຺ຐິຕາ.

໑໐. ກຓ຺ຏກສິກ຺ຂາປທວຓ຺ຓນາ

໔໒໘. ທສເມ ປິເຣຕິ ສມ຺ໂພຘນຕ຺ເຖ ນິປາຕປທໍ. ເສສໍ ອນນ຺ຕຣສິກ຺ຂາປທທ຺ວເຍ ວຸຕ຺ຕນຍເມວ.

ກຓ຺ຏກສິກ຺ຂາປທວຓ຺ຓນາ ນິຏ຺ຐິຕາ.

ນິຏ຺ຐິໂຕ ສປ຺ປາຓກວຄ຺ໂຄ ສຕ຺ຕໂມ.