໖. ສຸຣາປານວຄ຺ໂຄ

໑. ສຸຣາປານສິກ຺ຂາປທວຓ຺ຓນາ

໓໒໘. ຉຏ຺ຐວຄ຺ຄສ຺ສ ປຐເມ ປາຬິຍໍ ກິຓ຺ຓປກ຺ຂິຕ຺ຕາຕິ ປິຏ຺ຐປູວາທິໍ ອປກ຺ຂິປິຕ຺ວາ ກິຓ຺ຓສງ຺ຂາຕໍ ຘຎ຺ຎງ຺ກຸຣາທິສຸຣາພີຊໍ ປກ຺ຂິປິຕ຺ວາ ກຕາ. ສມ຺ຠາຣສໍຍຸຕ຺ຕາຕິ ສາສປາທິອເນກສມ຺ຠາເຣຫິ ສຎ຺ຎຸຕ຺ຕາ.

ມຘຸກຕາລນາຬິເກຣາທິປຸປ຺ຜາທິຣໂສ ຈິຣປຣິວາສິໂຕ ປຸປ຺ຜາສໂວ ນາມ. ຕຖາ ປນສາທິ ຜລາສໂວ. ມຸທ຺ທິກຣໂສ ມຘ຺ວາສໂວ. ອຸຈ຺ຉຸຣໂສ ຄຸຬາສໂວ. ຕິຜລຕິກຏຸກາທິນານາສມ຺ຠາຣານໍ ຣໂສ ຈິຣປຣິວາສິໂຕ ສມ຺ຠາຣສໍຍຸຕ຺ໂຕ. ພີຊໂຕ ປຏ຺ຐາຍາຕິ ຍຖາວຸຕ຺ຕານໍ ປິຏ຺ຐາທີນໍ ມຊ຺ຊຕ຺ຖາຍ ຠາຊເນ ປກ຺ຂິຕ຺ຕກາລໂຕ ປຏ຺ຐາຍ.

໓໒໙. ໂລຓໂສວີຣກໍ ສຸຕ຺ຕຎ຺ຈ ອເນເກຫິ ທພ຺ພສມ຺ຠາເຣຫິ ອຠິສງ຺ຂໂຕ ເຠສຊ຺ຊວິເສໂສ. ອຸຍ຺ຍຸຕ຺ຕສິກ຺ຂາປທານໍ ອຈິຕ຺ຕກໂລກວຊ຺ເຊສຸ ໂລກວຊ຺ຊຕາ ປຸພ຺ເພ ວຸຕ຺ຕນຍາວາຕິ ຕຕ຺ຖ ກິຎ຺ຈິປິ ອວຕ຺ວາ ອິຘ ເຕຫິ ອສາຘາຣຓວຕ຺ຖຸວິເສສສິທ຺ຘາຍ ອຈິຕ຺ຕກປກ຺ເຂປິ ອກຸສລຈິຕ຺ຕຕາຍ ຕໍ ໂລກວຊ຺ຊຕາທິວິເສສໍ ທສ຺ເສຕຸເມວ ‘‘ວຕ຺ຖຸອຊານນຕາຍ ເຈຕ຺ຖາ’’ຕິອາທິນາ ວຸຕ຺ຕນ຺ຕິ ເວທິຕພ຺ພໍ. ຍໍ ປເນຕ຺ຖ ວຕ຺ຕພ຺ພໍ, ຕໍ ປຐມປາຣາຊິກວຓ຺ຓນາຍໍ ວິຕ຺ຖາຣໂຕ ສາຣຕ຺ຖທີປນິຍໍ ວິຣທ຺ຘຏ຺ຐານວິໂສຘນວເສນ ວຸຕ຺ຕນ຺ຕິ ຕຕ຺ເຖວ ຄເຫຕພ຺ພໍ. ມຊ຺ຊຠາໂວ, ຕສ຺ສ ປານຎ຺ຈາຕິ ອິມາເນຕ຺ຖ ທ຺ເວ ອງ຺ຄານິ.

ສຸຣາປານສິກ຺ຂາປທວຓ຺ຓນາ ນິຏ຺ຐິຕາ.

໒. ອງ຺ຄຸລິປໂຕທກສິກ຺ຂາປທວຓ຺ຓນາ

໓໓໐. ທຸຕິເຍ ຫສາຘິປ຺ປາຍຕາ, ອຸປສມ຺ປນ຺ນສ຺ສ ກາເຍນ ກາຍາມສນນ຺ຕິ ອິມາເນຕ຺ຖ ທ຺ເວ ອງ຺ຄານິ.

ອງ຺ຄຸລິປໂຕທກສິກ຺ຂາປທວຓ຺ຓນາ ນິຏ຺ຐິຕາ.

໓. ຫສຘມ຺ມສິກ຺ຂາປທວຓ຺ຓນາ

໓໓໘. ຕຕິເຍ ປາຬິຍໍ ຫສຘມ຺ເມ ຫສຘມ຺ມສຎ຺ຎີຕິອາທີສຸ ອຸປ຺ລວາທິມຕ຺ຕໍ ກິໍ ຫສຘມ຺ໂມ ໂຫຕີຕິ ຄຫຓວເສນ ສຕິ ກຣຓີເຍ ກຣິຍມານໍ ຫສຘມ຺ມໍ ຫສຘມ຺ໂມຕິ ຄຫຓວເສນ ອຕ຺ໂຖ ເວທິຕພ຺ໂພ. ອຸສ຺ສາເຣນ຺ໂຕຕິ ອຸທເກ ຐິຕໍ ນາວໍ ຕີເຣ ອາໂຣເປນ຺ໂຕ.

ປຕນຸປ຺ປຕນວາເຣສູຕິ ອຸທກສ຺ສ ອຸປຣິຕເລ ມຓ຺ຑູກຄຕິຍາ ປຕນຸປ຺ປຕນວເສນ ຄມນຕ຺ຖໍ ຂິຕ຺ຕາຍ ເອກິສ຺ສາ ກຖລາຍ ວເສນ ວຸຕ຺ຕໍ. ອຸທກສ຺ສ ອຸປຣິໂຄປ຺ຜກຕາ, ຫສາຘິປ຺ປາເຍນ ກີຬນນ຺ຕິ ທ຺ເວ ອງ຺ຄານິ.

ຫສຘມ຺ມສິກ຺ຂາປທວຓ຺ຓນາ ນິຏ຺ຐິຕາ.

໔. ອນາທຣິຍສິກ຺ຂາປທວຓ຺ຓນາ

໓໔໔. ຈຕຸຕ຺ເຖ ສຸຕ຺ຕານຸໂລມນ຺ຕິ ມຫາປເທສາ. ອຏ຺ຐກຖາຕິປິ ວທນ຺ຕິ. ອຸປສມ຺ປນ຺ນສ຺ສ ປຎ຺ຎຕ຺ເຕນ ວຈນໍ, ອນາທຣິຍກຣຓນ຺ຕິ ທ຺ເວ ອງ຺ຄານິ.

ອນາທຣິຍສິກ຺ຂາປທວຓ຺ຓນາ ນິຏ຺ຐິຕາ.

໕. ຠິໍສາປນສິກ຺ຂາປທວຓ຺ຓນາ

໓໔໕. ປຎ຺ຈເມ ອຸປສມ຺ປນ຺ນຕາ, ຕສ຺ສ ທສ຺ສນສວນວິສເຍ ຠິໍສາເປຕຸກາມຕາຍ ວາຍມນນ຺ຕິ ທ຺ເວ ອງ຺ຄານິ.

ຠິໍສາປນສິກ຺ຂາປທວຓ຺ຓນາ ນິຏ຺ຐິຕາ.

໖. ໂຊຕິສິກ຺ຂາປທວຓ຺ຓນາ

໓໕໔. ຉຏ຺ເຐ ອລາຕໍ ປຕິຕນ຺ຕິ ອຄ຺ຄິກປາລໂຕ ພຫິ ປຕິຕໍ. ວິຊ຺ຌາຕນ຺ຕິ ວິຊ຺ຌາຕໍ ອລາຕໍ ກປາລຄ຺ຄິມ຺ຫິ ປກ຺ຂິປິຕ຺ວາ ຊາເລນ຺ຕສ຺ສ ປາຈິຕ຺ຕິຍໍ, ຕຖາ ເກວລໍ ອິນ຺ຘນໍ ປາເຕນ຺ຕສ຺ສປິ ວິຊ຺ຌາຕໍ ກປາລຄ຺ຄິໍ ມຸຂວາຕາທິນາ ອຸຊ຺ຊາເລນ຺ຕສ຺ສປິ. ຄິລານຕາທິກາຣຓາຠາໂວ, ວິສິພ຺ເພຕຸກາມຕາ, ສມາທຫນນ຺ຕິ ຕີຓິ ອງ຺ຄານິ.

ໂຊຕິສິກ຺ຂາປທວຓ຺ຓນາ ນິຏ຺ຐິຕາ.

໗. ນຫານສິກ຺ຂາປທວຓ຺ຓນາ

໓໕໗. ສຕ຺ຕເມ ປາຬິຍໍ ນຄເຣ ຖກິເຕຕິ ເອຕ຺ຖ ຣຎ຺ຎາ ຈິຣໍ ນຫາຍິຕຸກາເມນ ‘‘ອຫໍ ພຫິ ອຸຍ຺ຍາເນ ກຕາຣກ຺ໂຂ ວສິສ຺ສາມິ, ນຄຣໍ ຖເກຕ຺ວາ ໂຄເປຖາ’’ຕິ ອນຸຎ຺ຎາຕາ, ເຕ ຖກິໍສູຕິ ທຏ຺ຐພ຺ພໍ. ອສມ຺ຠິນ຺ເນນາຕິ ອນຏ຺ເຐນ, ຕໍ ທິວສໍ ປຸນ ອຄ຺ຄຫິຕາລງ຺ກາເຣນ ປພຸທ຺ຘມຕ຺ເຕນາຕິ ອຘິປ຺ປາໂຍ. ມຊ຺ຌິມເທເສ ອູນກທ຺ຘມາສນຫານໍ, ສມຍາທີນໍ ອຠາໂວຕິ ທ຺ເວ ອງ຺ຄານິ.

ນຫານສິກ຺ຂາປທວຓ຺ຓນາ ນິຏ຺ຐິຕາ.

໘. ທຸພ຺ພຓ຺ຓກຣຓສິກ຺ຂາປທວຓ຺ຓນາ

໓໖໘. ອຏ຺ຐເມ ປຏິລທ຺ຘນວຈີວເຣນາຕິ ເອຕ຺ຖ ປຸພ຺ເພ ອກຕກປ຺ປໍ ກຕິປາຫໍ ນິວາສນຕ຺ຖາຍ ຕາວກາລິກວເສນ ລທ຺ຘມ຺ປິ ສງ຺ຄຍ຺ຫຕີຕິ ວທນ຺ຕິ.

໓໖໙. ‘‘ນວໍ ນາມ ອກຕກປ຺ປ’’ນ຺ຕິ ສາມຎ຺ຎໂຕ ວຸຕ຺ຕຕ຺ຕາ ອຎ຺ເຎນ ຠິກ຺ຂຸນາ ກປ຺ປພິນ຺ທຸໍ ທຕ຺ວາ ປຣິຠຸຕ຺ຕໍ ຈີວຣໍ, ເຕນ ວາ, ຕໂຕ ລຠິຕ຺ວາ ອຎ຺ເຎນ ວາ ເກນຈິ ທິນ຺ນມ຺ປິ ກຕກປ຺ປເມວ ນວໍ ນາມ ນ ໂຫຕີຕິ ທຏ຺ຐພ຺ພໍ. ‘‘ນິວາເສຕຸໍ ວາ ປາຣຸປິຕຸໍ ວາ’’ຕິ ວຸຕ຺ຕຕ຺ຕາ ອໍສພທ຺ຘກາສາວມ຺ປິ ປາຣຸປິຕພ຺ພໂຕ ກປ຺ປໍ ກາຕພ຺ພນ຺ຕິ ວທນ຺ຕິ. ຈມ຺ມກາຣນີລໍ ນາມ ຈມ຺ມໍ ນີລວຓ຺ຓໍ ກາຕຸໍ ໂຍຊິຍມານໍ ນີລໍ. ປກຕິນີລເມວາຕິ ເກຈິ. ຍຖາວຸຕ຺ຕຈີວຣສ຺ສ ອກຕກປ຺ປຕາ, ອນຏ຺ຐຈີວຣາທິຕາ, ນິວາສນາທິຕາຕິ ຕີຓິ ອງ຺ຄານິ.

ທຸພ຺ພຓ຺ຓກຣຓສິກ຺ຂາປທວຓ຺ຓນາ ນິຏ຺ຐິຕາ.

໙. ວິກປ຺ປນສິກ຺ຂາປທວຓ຺ຓນາ

໓໗໔. ນວເມ ເຍນາຕິ ເຍນ ສທ຺ຘິໍ, ຍສ຺ສ ສນ຺ຕິເກຕິ ອຕ຺ໂຖ. ສາມໍ ວິກປ຺ປິຕສ຺ສ ອປຈ຺ຈຸທ຺ຘາໂຣ, ວິກປ຺ປນຸປຄຈີວຣຕາ, ອວິສ຺ສາເສນ ປຣິໂຠໂຄຕິ ຕີຓິ ອງ຺ຄານິ.

ວິກປ຺ປນສິກ຺ຂາປທວຓ຺ຓນາ ນິຏ຺ຐິຕາ.

໑໐. ຈີວຣອປນິຘານສິກ຺ຂາປທວຓ຺ຓນາ

໓໗໘. ທສເມ ປາຬິຍໍ ອນ຺ຕມໂສ ຫສາເປກ຺ໂຂປີຕິ ອປິ-ສທ຺ເທນ ອເຖຍ຺ຍຈິຕ຺ຕໍ ໂກເຘນ ທຸກ຺ຂາເປຕຸກາມໍ, ອວຓ຺ຓໍ ປກາເສຕຸກາມຎ຺ຈ ສງ຺ຄຍ຺ຫຕິ. ເຕເນວ ‘‘ຕິເວທນ’’ນ຺ຕິ ວຸຕ຺ຕໍ. ອຸປສມ຺ປນ຺ນສ຺ສ ປຕ຺ຕາທີນໍ ອປນິຘານໍ, ວິເຫເສຕຸກາມຕາທີຕິ ທ຺ເວ ອງ຺ຄານິ.

ຈີວຣອປນິຘານສິກ຺ຂາປທວຓ຺ຓນາ ນິຏ຺ຐິຕາ.

ນິຏ຺ຐິໂຕ ສຸຣາປານວຄ຺ໂຄ ຉຏ຺ໂຐ.