໓. ໂອວາທວຄ຺ໂຄ

໑. ໂອວາທສິກ຺ຂາປທວຓ຺ຓນາ

໑໔໔. ຕຕິຍວຄ຺ຄສ຺ສ ປຐເມ ຕິຣຈ຺ຉານຠູຕນ຺ຕິ ຕິໂຣກຣຓຠູຕໍ, ພາຫິຣຠູຕນ຺ຕິ ອຕ຺ໂຖ. ສມິທ຺ໂຘຕິ ປຣິປຸຓ຺ໂຓ. ສຫິຕຕ຺ໂຖ ອຕ຺ຖຍຸຕ຺ໂຕ. ອຕ຺ຖຄມ຺ຠີຣຕາທິນາ ຄມ຺ຠີໂຣ.

໑໔໕-໑໔໗. ປຣໂຕຕິ ອຸຕ຺ຕຣິ. ກໂຣນ຺ໂຕວາຕິ ປຣິພາຫິເຣ ກໂຣນ຺ໂຕ. ວິຠງ຺ເຄຕິ ຌານວິຠງ຺ເຄ. ຈຣຓນ຺ຕິ ນິພ຺ພານຄມນາຍ ປາທໍ.

ຍທສ຺ສາຕິ ຍໍ ອສ຺ສ. ຘາເຣຕີຕິ ອວິນສ຺ສມານໍ ຘາເຣຕິ. ປຣິກຖນຕ຺ຖນ຺ຕິ ປກິຓ຺ຓກກຖາວເສນ ປຣິຈ຺ຉິນ຺ນຘມ຺ມກຖນຕ຺ຖໍ. ຕິສ຺ໂສ ອນຸໂມທນາຕິ ສງ຺ຆຠຕ຺ຕາທີສຸ ທານານິສໍສປ຺ປຏິສໍຍຸຕ຺ຕາ ນິຘິກຸຓ຺ຑສຸຕ຺ຕາທິ (ຂຸ. ປາ. ໘.໑ ອາທໂຍ) -ອນຸໂມທນາ, ເຄຫປ຺ປເວສມງ຺ຄລາທີສຸ ມງ຺ຄລສຸຕ຺ຕາທິ (ຂຸ. ປາ. ໕.໑ ອາທໂຍ; ສຸ. ນິ. ມງ຺ຄລສຸຕ຺ຕ) -ອນຸໂມທນາ, ມຕກຠຕ຺ຕາທິອມງ຺ຄເລສຸ ຕິໂຣກຸຏ຺ຏາທິ (ຂຸ. ປາ. ໗.໑ ອາທໂຍ; ເປ. ວ. ໑໔ ອາທໂຍ) -ອນຸໂມທນາຕິ ອິມາ ຕິສ຺ໂສ ອນຸໂມທນາ. ກມ຺ມາກມ຺ມວິນິຈ຺ຉໂຍຕິ ປຣິວາຣາວສາເນ ກມ຺ມວຄ຺ເຄ (ປຣິ. ໔໘໒ ອາທໂຍ) ວຸຕ຺ຕວິນິຈ຺ຉໂຍ. ສມາຘິວເສນາຕິ ສມຖປຸພ຺ພກວເສນ. ວິປສ຺ສນາວເສນ ວາຕິ ທິຏ຺ຐິວິສຸທ຺ຘິອາທິກາຍ ສຸກ຺ຂວິປສ຺ສນາຍ ວເສນ. ອຕ຺ຕໂນ ສີລຣກ຺ຂຓຕ຺ຖໍ ອປຣານເປກ຺ຂຕາຍ ເຍນ ກາມໍ ຄນ຺ຕຸໍ ຈຕສ຺ໂສ ທິສາ ອຣຫຕິ, ອສ຺ສ ວາ ສນ຺ຕິ, ຕາສຸ ວາ ສາຘູຕິ ຈາຕຸທ຺ທິໂສ.

ອຠິວິນເຍຕິ ປາຕິໂມກ຺ຂສໍວຣສງ຺ຂາເຕ ສໍວຣວິນເຍ, ຕປ຺ປກາສເກ ວາ ວິນຍປິຏເກ. ວິເນຕຸນ຺ຕິ ສິກ຺ຂາເປຕຸໍ ປກາເສຕຸໍ. ປຄຸຓາ ວາຈຸຄ຺ຄຕາຕິ ປາຐໂຕ ຈ ອຕ຺ຖໂຕ ຈ ປຄຸຓາ ມຸເຂ ສນ຺ນິຘາປນວເສນ ວາຈຸຄ຺ຄຕາ ກາຕພ຺ພາ. ອຕ຺ຖມຕ຺ຕວເສນເປຕ຺ຖ ໂຍຊນໍ ກໂຣນ຺ຕິ. ອຠິຘມ຺ເມຕິ ລກ຺ຂຓຣສາທິວເສນ ປຣິຈ຺ຉິນ຺ເນ ນາມຣູປຘມ຺ເມ. ປຸພ຺ເພ ກິຣ ມຫາເຖຣາ ປຣິຍຕ຺ຕິອນນ຺ຕຣຘານາຍ ເອເກກສ຺ສ ຄຓສ຺ສ ທີຆນິກາຍາທິເອເກກຘມ຺ມໂກຏ຺ຐາສໍ ນິຍ຺ຍາເຕນ຺ຕາ ‘‘ຕຸມ຺ເຫ ເອຕໍ ປາຬິໂຕ ຈ ອຏ຺ຐກຖາໂຕ ຈ ປຣິຫຣຖ, ສກ຺ໂກນ຺ຕາ ອຸຕ຺ຕຣິປິ ອຸຄ຺ຄຓ຺ຫຖາ’’ຕິ ເອວໍ ສກລຘມ຺ມໍ ຄນ຺ຖວເສນ ນິຍ຺ຍາເຕນ຺ຕິ, ຕຕ຺ຖ ເຕ ຈ ຠິກ຺ຂູ ຄນ຺ຖນາເມນ ທີຆຠາຓກາ ມຊ຺ຌິມຠາຓກາຕິ ໂວຫຣີຍນ຺ຕິ, ເຕ ຈ ອຕ຺ຕໂນ ຠາຣຠູຕໍ ໂກຏ຺ຐາສໍ ປຣິຈ຺ຈຊິຕ຺ວາ ອຎ຺ຎໍ ອຸຄ຺ຄເຫຕຸໍ ນ ລຠນ຺ຕິ. ຕໍ ສນ຺ຘາຍາຫ ‘‘ສເຈ ມຊ຺ຌິມຠາຓໂກ ໂຫຕີ’’ຕິອາທິ.

ຕຕ຺ຖ ເຫຏ຺ຐິມາ ວາ ຕໂຍ ວຄ຺ຄາຕິ ມຫາວຄ຺ຄໂຕ ເຫຏ຺ຐິມາ ສຄາຖກວຄ຺ໂຄ (ສໍ. ນິ. ໑.໑ ອາທໂຍ), ນິທານວຄ຺ໂຄ (ສໍ. ນິ. ໒.໑ ອາທໂຍ), ຂນ຺ຘວຄ຺ໂຄຕິ (ສໍ. ນິ. ໓.໑ ອາທິໂຍ) ອິເມ ຕໂຍ ວຄ຺ຄາ. ຕິກນິປາຕໂຕ ປຏ຺ຐາຍ ເຫຏ຺ຐາຕິ ເອກກນິປາຕທຸກນິປາເຕ ສນ຺ຘາຍ ວຸຕ຺ຕໍ. ຘມ຺ມປທມ຺ປິ ສຫ ວຕ຺ຖຸນາ ຊາຕກຠາຓເກນ ອຕ຺ຕໂນ ຊາຕເກນ ສທ຺ຘິໍ ອຸຄ຺ຄເຫຕພ຺ພໍ. ຕໂຕ ໂອຣໍ ນ ວຏ຺ຏຕີຕິ ມຫາປຈ຺ຈຣິວາທສ຺ສ ອຘິປ຺ປາໂຍ. ຕໂຕ ຕໂຕຕິ ທີຆນິກາຍາທິໂຕ. ອຸຈ຺ຈິນິຕ຺ວາ ອຸຄ຺ຄຫິຕໍ ສທ຺ຘມ຺ມສ຺ສ ຐິຕິຍາ, ຠິກ຺ຂຸໂນປິ ປຸພ຺ພາປຣານຸສນ຺ຘິອາທິກຸສລຕາຍ ຈ ນ ໂຫຕີຕິ ‘‘ຕໍ ນ ວຏ຺ຏຕີ’’ຕິ ປຏິກ຺ຂິຕ຺ຕໍ. ອຠິຘມ຺ເມ ກິຎ຺ຈິ ອຸຄ຺ຄເຫຕພ຺ພນ຺ຕິ ນ ວຸຕ຺ຕນ຺ຕິ ເອຕ຺ຖ ຍສ຺ມາ ວິນເຍ ກຸສລຕ຺ຕິກາທິວິຠາໂຄ, ສຸຕ຺ຕນ຺ເຕສຸ ສມຖວິປສ຺ສນາມຄ຺ໂຄ ຈ ອຠິຘມ຺ມປາຐໍ ວິນາ ນ ວິຎ຺ຎາຍຕິ, ອນ຺ຘກາເຣ ປວິຏ຺ຐກາໂລ ວິຍ ໂຫຕິ, ຕສ຺ມາ ສຸຕ຺ຕວິນຍານໍ ຄຫຓວເສນ ອຠິຘມ຺ມຄ຺ຄຫຓໍ ວຸຕ຺ຕເມວາຕິ ວິສຸໍ ນ ວຸຕ຺ຕນ຺ຕິ ເວທິຕພ຺ພໍ. ຍຖາ ‘‘ໂຠຊນໍ ຠຸຎ຺ຊິຕພ຺ພ’’ນ຺ຕິ ວຸຕ຺ເຕ ‘‘ພ຺ຍຎ຺ຊນໍ ຂາທິຕພ຺ພ’’ນ຺ຕິ ອວຸຕ຺ຕມ຺ປິ ວຸຕ຺ຕເມວ ໂຫຕິ ຕທວິນາຠາວໂຕ, ເອວໍສມ຺ປທມິທໍ ທຏ຺ຐພ຺ພໍ.

ປຣິມຓ຺ຑລປທພ຺ຍຎ຺ຊນາຍາຕິ ປຣິມຓ຺ຑລານິ ປຣິປຸຓ຺ຓານິ ປເທສຸ ສິຖິລຘນິຕາທິພ຺ຍຎ຺ຊນານິ ຍສ຺ສໍ, ຕາຍ. ປຸຣສ຺ສ ເອສາຕິ ໂປຣີ, ນຄຣວາສີນໍ ກຖາຕິ ອຕ຺ໂຖ. ອເນລຄຬາຍາຕິ ເອຕ຺ຖ ເອລາຕິ ເຂຬໍ ຕຄ຺ຄຬນວິຣຫິຕາຍ. ກລ຺ຍາຓວາກ຺ກຣໂຓຕິ ເອຕ຺ຖ ວາຈາ ເອວ ວາກ຺ກຣຓໍ, ອຸທາຫຣຓໂຆໂສ. ກລ຺ຍາຓໍ ມຘຸຣໍ ວາກ຺ກຣຓມສ຺ສາຕິ ກລ຺ຍາຓວາກ຺ກຣໂຓ. ອຸປສມ຺ປນ຺ນາຍ ເມຖຸເນເນວ ອຠພ຺ໂພ ໂຫຕິ, ນ ສິກ຺ຂມານາສາມເຓຣີສູຕິ ອາຫ ‘‘ຠິກ຺ຂຸນິຍາ ກາຍສໍສຄ຺ຄໍ ວາ’’ຕິອາທິ.

໑໔໘. ຄຣຸເກຫີຕິ ຄຣຸກຠຓ຺ເຑຫິ. ເອກໂຕອຸປສມ຺ປນ຺ນາຍາຕິ ອຸປໂຍຄຕ຺ເຖ ຠຸມ຺ມວຈນໍ. ຠິກ຺ຂູນໍ ສນ຺ຕິເກ ອຸປສມ຺ປນ຺ນາ ນາມ ປຣິວຕ຺ຕລິງ຺ຄາ ວາ ປຎ຺ຈສຕສາກິຍານິໂຍ ວາ. ເອຕາ ປນ ເອກໂຕອຸປສມ຺ປນ຺ນາ ໂອວທນ຺ຕສ຺ສ ປາຈິຕ຺ຕິຍເມວ.

໑໔໙. ນ ນິມນ຺ຕິຕາ ຫຸຕ຺ວາ ຄນ຺ຕຸກາມາຕິ ນິມນ຺ຕິຕາ ຫຸຕ຺ວາ ໂຠຊນປຣິໂຍສາເນ ຄນ຺ຕຸກາມາ ນ ໂຫນ຺ຕິ, ຕຕ຺ເຖວ ວສິຕຸກາມາ ໂຫນ຺ຕີຕິ ອຕ຺ໂຖ. ຍໂຕຕິ ຠິກ຺ຂຸນຸປສ຺ສຍໂຕ. ຍາຈິຕ຺ວາຕິ ‘‘ຕຸມ຺ເຫຫິ ອານີຕໂອວາເທເນວ ມຍມ຺ປິ ວສິສ຺ສາມາ’’ຕິ ຍາຈິຕ຺ວາ. ຕຕ຺ຖາຕິ ຕສ຺ມິໍ ຠິກ຺ຂຸນຸປສ຺ສເຍ. ອຠິກ຺ຂຸກາວາເສ ວສ຺ສໍ ວສນ຺ຕິຍາ ປາຈິຕ຺ຕິຍໍ, ອປຄຈ຺ຉນ຺ຕິຍາ ທຸກ຺ກຏໍ.

ອິມາສຸ ກຕຣາປຕ຺ຕິ ປຣິຫຣິຕພ຺ພາຕິ ໂຈທນໍ ປຣິຫຣນ຺ໂຕ ອາຫ ‘‘ສາ ຣກ຺ຂິຕພ຺ພາ’’ຕິ. ສາ ວສ຺ສານຸຄມນມູລິກາ ອາປຕ຺ຕິ ຣກ຺ຂິຕພ຺ພາ, ອິຕຣາຍ ອນາປຕ຺ຕິກາຣຓໍ ອຕ຺ຖີຕິ ອຘິປ຺ປາໂຍ. ເຕນາຫ ‘‘ອາປທາສຸ ຫີ’’ຕິອາທິ.

ໂອວາທຕ຺ຖາຍາຕິ ໂອວາເທ ຍາຈນຕ຺ຖາຍ. ທ຺ເວ ຕິສ຺ໂສຕິ ທ຺ວີຫິ ຕີຫິ, ກຣຓຕ຺ເຖ ເຈຕໍ ປຈ຺ຈຕ຺ຕວຈນໍ. ປາສາທິເກນາຕິ ປສາທຊນເກນ ກາຍກມ຺ມາທິນາ. ສມ຺ປາເທຕູຕິ ຕິວິຘໍ ສິກ຺ຂໍ ສມ຺ປາເທຕຸ. ອສມ຺ມຕຕາ, ຠິກ຺ຂຸນິຍາ ປຣິປຸຓ຺ຓູປສມ຺ປນ຺ນຕາ, ໂອວາທວເສນ ອຏ຺ຐຄຣຸຘມ຺ມທານນ຺ຕິ ອິມາເນຕ຺ຖ ຕີຓິ ອງ຺ຄານິ.

ໂອວາທສິກ຺ຂາປທວຓ຺ຓນາ ນິຏ຺ຐິຕາ.

໒. ອຕ຺ຖງ຺ຄຕສິກ຺ຂາປທວຓ຺ຓນາ

໑໕໓. ທຸຕິເຍ ໂກກນທນ຺ຕິ ປທຸມວິເສສໍ, ຕໍ ກິຣ ພຫຸປຕ຺ຕໍ ວຓ຺ຓສມ຺ປນ຺ນໍ. ອຍຎ຺ເຫຕ຺ຖ ອຕ຺ໂຖ – ຍຖາ ໂກກນທສງ຺ຂາຕໍ ປທຸມໍ, ເອວໍ ຜຸລ຺ລມຸຂປທຸມໍ ອວີຕຄຸຓຄນ຺ຘໍ ນິມ຺ມເລ ອນ຺ຕລິກ຺ເຂ ອາທິຈ຺ຈໍ ວິຍ ຈ ອຕ຺ຕໂນ ເຕຊສາ ຕປນ຺ຕໍ ຕໂຕ ເອວ ວິໂຣຈມານໍ ອງ຺ເຄຫິ ນິຈ຺ຉຣຓກຊຸຕິຍາ ອງ຺ຄີຣສໍ ສມ຺ມາສມ຺ພຸທ຺ຘໍ ປສ຺ສາຕິ. ຣໂຊຫຣຓນ຺ຕິ ສຣີເຣ ຣຊໍ ປຸຎ຺ຉຕີຕິ ຣໂຊຫຣຓນ຺ຕິ ປຸຎ຺ຉນໂຈຬສ຺ສ ນາມໍ. ໂອຠາສວິສ຺ສຊ຺ຊນປຸພ຺ພກາ ຠາສິຕຄາຖາ ໂອຠາສຄາຖາ ນາມ. ວິສຸທ຺ຘິມຄ຺ຄາທີສຸ (ວິສຸທ຺ຘິ. ໒.໓໘໖) ປນ ‘‘ຣາໂຄ ຣໂຊ ນ ຈ ປນ ເຣຓຸ ວຸຈ຺ຈຕີ’’ຕິອາທິ ໂອຠາສຄາຖາ ວຸຕ຺ຕາ, ນ ປເນສາ ‘‘ອຘິເຈຕໂສ’’ຕິ ຄາຖາ. ອຍຎ຺ຈ ຈູຬປນ຺ຖກຕ຺ເຖຣສ຺ສ ອຸທານຄາຖາຕິ ອຸທານປາຬິຍໍ ນຕ຺ຖິ, ເອກຸທານິຍຕ຺ເຖຣສ຺ສ (ເຖຣຄາ. ໑.໖໗ ເອກຸທານິຍຕ຺ເຖຣຄາຖາວຓ຺ຓນາ) ນາຍໍ ອຸທານຄາຖາຕິ ຕຕ຺ຖ ວຸຕ຺ຕໍ. ອິຘ ປນ ປາຬິຍາ ເອວ ວຸຕ຺ຕຕ຺ຕາ ເຖຣສ຺ສາປິ ອຸທານຄາຖາຕິ ຄເຫຕພ຺ພໍ. ອິຘ ຈ ອຄຣຸຘມ຺ເມນາປິ ໂອວທໂຕ ປາຈິຕ຺ຕິຍເມວ. ອຕ຺ຖງ຺ຄຕສູຣິຍຕາ, ປຣິປຸຓ຺ຓູປສມ຺ປນ຺ນຕາ, ໂອວທນນ຺ຕິ ອິມາເນຕ຺ຖ ຕີຓິ ອງ຺ຄານິ.

ອຕ຺ຖງ຺ຄຕສິກ຺ຂາປທວຓ຺ຓນາ ນິຏ຺ຐິຕາ.

໓. ຠິກ຺ຂຸນຸປສ຺ສຍສິກ຺ຂາປທວຓ຺ຓນາ

໑໖໒. ຕຕິຍໍ ອຸຕ຺ຕານເມວ. ອຸປສ຺ສຍູປຄມນໍ, ປຣິປຸຓ຺ຓູປສມ຺ປນ຺ນຕາ, ສມຍາຠາໂວ, ຄຣຸຘມ຺ເມຫິ ໂອວທນນ຺ຕິ ອິມາເນຕ຺ຖ ຈຕ຺ຕາຣິ ອງ຺ຄານິ.

ຠິກ຺ຂຸນຸປສ຺ສຍສິກ຺ຂາປທວຓ຺ຓນາ ນິຏ຺ຐິຕາ.

໔. ອາມິສສິກ຺ຂາປທວຓ຺ຓນາ

໑໖໔. ຈຕຸຕ຺ເຖ ອາມິສນິຣເປກ຺ຂມ຺ປິ ອາມິສເຫຕຸ ໂອວທຕີຕິສຎ຺ຎາຍ ຠຓນ຺ຕສ຺ສປິ ອນາປຕ຺ຕິ ສຈິຕ຺ຕກຕ຺ຕາ ສິກ຺ຂາປທສ຺ສ. ເສສເມຕ຺ຖ ອຸຕ຺ຕານເມວ. ອຸປສມ຺ປນ຺ນຕາ, ຘມ຺ເມນ ລທ຺ຘສມ຺ມຸຕິຕາ, ອນາມິສນ຺ຕຣຕາ, ອວຓ຺ຓກາມຕາຍ ເອວໍ ຠຓນນ຺ຕິ ອິມາເນຕ຺ຖ ຈຕ຺ຕາຣິ ອງ຺ຄານິ.

ອາມິສສິກ຺ຂາປທວຓ຺ຓນາ ນິຏ຺ຐິຕາ.

໑໖໙. ປຎ຺ຈມໍ ຈີວຣທານສິກ຺ຂາປທໍ ອຸຕ຺ຕານເມວ.

໖. ຈີວຣສິພ຺ພນສິກ຺ຂາປທວຓ຺ຓນາ

໑໗໖. ຉຏ຺ເຐ ກຖິນວຕ຺ຕນ຺ຕິ ກຖິນມາເສ ຈີວຣໍ ກໂຣນ຺ຕານໍ ສພ຺ຣຫ຺ມຈາຣີນໍ ສຫາຍຠາວູປຄມນໍ ສນ຺ຘາຍ ວຸຕ຺ຕໍ. ວຎ຺ເຈຕ຺ວາຕິ ‘‘ຕວ ຎາຕິກາຍາ’’ຕິ ອວຕ຺ວາ ‘‘ເອກິສ຺ສາ ຠິກ຺ຂຸນິຍາ’’ຕິ ເອຕ຺ຕກເມວ ວຕ຺ວາ ‘‘ເອກິສ຺ສາ ຠິກ຺ຂຸນິຍາ’’ຕິ ສຸຕ຺ວາ ເຕ ອຎ຺ຎາຕິກສຎ຺ຎິໂນ ອເຫສຸນ຺ຕິ ອາຫ ‘‘ອກປ຺ປິເຍ ນິໂຍຊິຕຕ຺ຕາ’’ຕິ. ອຎ຺ຎາຕິກາຍ ຠິກ຺ຂຸນິຍາ ສນ຺ຕກຕາ, ນິວາສນປາຣຸປນູປຄຕາ, ວຸຕ຺ຕນເຍນ ສິພ຺ພນໍ ວາ ສິພ຺ພາປນໍ ວາຕິ ອິມາເນຕ຺ຖ ຕີຓິ ອງ຺ຄານິ.

ຈີວຣສິພ຺ພນສິກ຺ຂາປທວຓ຺ຓນາ ນິຏ຺ຐິຕາ.

໗. ສໍວິຘານສິກ຺ຂາປທວຓ຺ຓນາ

໑໘໓. ສຕ຺ຕເມ ປາຬິຍໍ ຄຈ຺ຉາມ ຠຄິນິ ຄຈ຺ຉາມາຍ຺ຍາຕິ ຠິກ຺ຂຸປຸພ຺ພກໍ ສໍວິຘານໍ, ອິຕຣໍ ຠິກ຺ຂຸນິປຸພ຺ພກໍ. ເອກທ຺ຘານມຄ຺ຄນ຺ຕິ ເອກໂຕ ອທ຺ຘານສງ຺ຂາຕໍ ມຄ຺ຄໍ. ຫິຍ຺ໂຍຕິ ສຸເວ. ປເຣຕິ ຕຕິເຍ ທິວເສ.

ທ຺ວິຘາ ວຸຕ຺ຕປ຺ປກາໂຣຕິ ປາທຄມເນ ປກ຺ຂຄມເນຕິ ທ຺ວິຘາ ວຸຕ຺ຕປ຺ປກາໂຣ. ອຸປຈາໂຣ ນ ລພ຺ຠຕີຕິ ໂຍ ປຣິກ຺ຂິຕ຺ຕາທິຄາມສ຺ສ ເອກເລຑ຺ຑຸປາຕາທິອຸປຈາໂຣ ວຸຕ຺ໂຕ, ໂສ ອິຘ ນ ລພ຺ຠຕິ ອາສນ຺ນຕ຺ຕາ. ເອເຕນ ຈ ອນ຺ຕຣຆເຣເຍເວຕ຺ຖ ຄາໂມຕິ ອຘິປ຺ເປໂຕ, ນ ສກລໍ ຄາມເຂຕ຺ຕໍ. ຕຕ຺ຖາປິ ຍຕ຺ຖ ອຸປຈາໂຣ ລພ຺ຠຕິ, ຕຕ຺ຖ ອຸປຈາໂຣກ຺ກມເນ ເອວ ອາປຕ຺ຕີຕິ ທສ຺ເສຕິ. ເຕນາຫ ‘‘ຣຕນມຕ຺ຕນ຺ຕໂຣ’’ຕິອາທິ. ອຸປຈາໂຣກ຺ກມນຎ຺ເຈຕ຺ຖ ອຸປຈາຣພ຺ຠນ຺ຕເຣ ປວິສນເມວ ໂຫຕິ. ຕຕ຺ຖ ອປ຺ປວິສິຕ຺ວາປິ ອຸປຈາຣໂຕ ພຫິ ອທ຺ຘໂຍຊນພ຺ຠນ຺ຕຣຄເຕນ ມຄ຺ເຄນ ຄຈ຺ຉນ຺ໂຕປິ ມຄ຺ຄສ຺ສ ທ຺ວີສຸ ປສ຺ເສສຸ ອທ຺ຘໂຍຊນພ຺ຠນ຺ຕຣຄຕໍ ຄາມູປຈາຣໍ ສພ຺ພໍ ໂອກ຺ກມິຕ຺ວາ ຄຈ຺ຉຕິຈ຺ເຈວ ວຸຈ຺ຈຕິ. ອທ຺ຘໂຍຊນໂຕ ພຫິ ຄເຕນ ມຄ຺ເຄນ ຄຈ຺ຉນ຺ໂຕ ນ ຄາມູປຈາຣຄຓນາຍ ກາເຣຕພ຺ໂພ, ອທ຺ຘໂຍຊນຄຓນາເຍວ ກາເຣຕພ຺ໂພ. ເອວຎ຺ຈ ສຕິ ອນນ຺ຕຣສິກ຺ຂາປເທ ນາວາເຍວ ຄາມຕີຣປສ຺ເສນ ຄຈ຺ຉນ຺ຕສ຺ສ ຄາມູປຈາຣຄຓນາຍ ອາປຕ຺ຕິ ສມຕ຺ຖິຕາ ໂຫຕິ. ນ ຫິ ສກ຺ກາ ນາວາຍ ຄາມູປຈາຣພ຺ຠນ຺ຕເຣ ປວິສິຕຸໍ. ຕິຓ຺ຓໍ ມຄ຺ຄານໍ ສມ຺ພນ຺ຘຏ຺ຐານໍ ສິງ຺ຆາຏກໍ. ເອຕ຺ຖນ຺ຕເຣ ສໍວິທຫິເຕຕິ ເອຕ຺ຖ ນ ເກວລໍ ຍຖາວຸຕ຺ຕຣຖິກາທີສຸ ເອວ ສໍວິທຫເນ ທຸກ຺ກຏໍ, ອນ຺ຕຣາມຄ຺ເຄປີຕິ ອຘິປ຺ປາໂຍ.

ອທ຺ຘໂຍຊນໍ ອຕິກ຺ກມນ຺ຕສ຺ສາຕິ ອສຕິ ຄາເມ ອທ຺ຘໂຍຊນໍ ອຕິກ຺ກມນ຺ຕສ຺ສ. ຍສ຺ມິຎ຺ຫິ ຄາມເຂຕ຺ຕຠູເຕປິ ອຣຎ຺ເຎ ອທ຺ຘໂຍຊນພ຺ຠນ຺ຕເຣ ຄາໂມ ນ ໂຫຕິ, ຕມ຺ປິ ອິຘ ອຄາມກໍ ອຣຎ຺ຎນ຺ຕິ ອຘິປ຺ເປຕໍ, ນ ວິຎ຺ຌາຏວາທໂຍ.

໑໘໕. ຣຏ຺ຐເຠເທຕິ ຣຏ຺ຐວິໂລເປ. ຈກ຺ກສມາຣຸຬ຺ຫາຕິ ອິຣິຍາປຖຈກ຺ກໍ, ສກຏຈກ຺ກໍ ວາ ສມາຣຸຬ຺ຫາ. ທ຺ວິນ຺ນມ຺ປິ ສໍວິທຫິຕ຺ວາ ມຄ຺ຄປ຺ປຏິປຕ຺ຕິ, ອວິສງ຺ເກຕໍ, ສມຍາຠາໂວ, ອນາປທາ, ຄາມນ຺ຕໂຣກ຺ກມນໍ ວາ ອທ຺ຘໂຍຊນາຕິກ຺ກໂມ ວາຕິ ອິມາເນຕ຺ຖ ປຎ຺ຈ ອງ຺ຄານິ. ເອກໂຕອຸປສມ຺ປນ຺ນາທີຫິ ສທ຺ຘິໍ ສໍວິຘາຍ ຄຈ຺ຉນ຺ຕສ຺ສ ປນ ມາຕຸຄາມສິກ຺ຂາປເທນ ອາປຕ຺ຕິ.

ສໍວິຘານສິກ຺ຂາປທວຓ຺ຓນາ ນິຏ຺ຐິຕາ.

໘. ນາວາຠິຣຸຫນສິກ຺ຂາປທວຓ຺ຓນາ

໑໘໙. ອຏ຺ຐເມ ເອກໍ ຕີຣໍ…ເປ… ນິຣນ຺ຕຣນ຺ຕິ ນທິໂຕ ອທ຺ຘໂຍຊນພ຺ຠນ຺ຕເຣ ປເທເສ ນິວິຏ຺ຐຄາເມຫິ ນິຣນ຺ຕຣຕາ ວຸຕ຺ຕາ. ເອກໍ ອຄາມກໍ ອຣຎ຺ຎນ຺ຕິ ຕຖາ ນິວິຏ຺ຐຄາມາຠາເວນ ວຸຕ຺ຕໍ. ອຄາມກຕີຣປສ຺ເສນາຕິອາທິ ປນ ອຕິເຣກອທ຺ຘໂຍຊນວິຕ຺ຖຕໍ ນທິໍ ສນ຺ຘາຍ ວຸຕ຺ຕໍ. ຕໂຕ ອູນວິຕ຺ຖາຣາຍ ຫິ ນທິຍາ ມຊ຺ເຌນາປິ ຄມເນ ຕີຣທ຺ວຍສ຺ສາປິ ອທ຺ຘໂຍຊນພ຺ຠນ຺ຕເຣ ຄຕຕ຺ຕາ ຄາມນ຺ຕຣຄຓນາຍ, ອທ຺ຘໂຍຊນຄຓນາຍ ຈ ອາປຕ຺ຕິໂຍ ປຣິຈ຺ຉິນ຺ທິຕພ຺ພາ. ເຕເນວ ‘‘ໂຍຊນວິຕ຺ຖຕາ…ເປ… ອທ຺ຘໂຍຊນຄຓນາຍ ປາຈິຕ຺ຕິຍານີ’’ຕິ ວຸຕ຺ຕໍ. ເຕເນວ ຫິ ໂຍຊນໂຕ ອູນາຍ ນທິຍາ ອທ຺ຘໂຍຊນພ຺ຠນ຺ຕຣຄຕຕີຣວເສເນວ ອາປຕ຺ຕິຄຓນໍ ວຸຕ຺ຕເມວ ໂຫຕິ. ‘‘ສພ຺ພອຏ຺ຐກຖາສູ’’ຕິອາທິນາ ວຸຕ຺ຕເມວຕ຺ຖໍ ສມຕ຺ເຖຕິ. ຕຕ຺ຖ ກິຎ຺ຈາປິ ສມຸທ຺ທຕຬາກາທີສຸ ປາຈິຕ຺ຕິຍໍ ນ ວຸຕ຺ຕໍ, ຕຖາປິ ກີຬາປຸເຣກ຺ຂາຣສ຺ສ ຕຕ຺ຖ ທຸກ຺ກຏເມວາຕິ ຄເຫຕພ຺ພໍ, ປຐມໍ ກີຬາປຸເຣກ຺ຂາຣສ຺ສາປິ ປຈ຺ຉາ ນາວາຍ ນິທ຺ທຸປຄຕສ຺ສ, ໂຍນິໂສ ວາ ມນສິ ກໂຣນ຺ຕສ຺ສ ຄາມນ຺ຕໂຣກ຺ກມນາທີສຸປິ ອາປຕ຺ຕິສມ຺ຠວໂຕ ປຓ຺ຓຕ຺ຕິວຊ຺ຊຕາ, ຕິຈິຕ຺ຕຕາ ຈສ຺ສ ສິກ຺ຂາປທສ຺ສ ວຸຕ຺ຕາຕິ ເວທິຕພ຺ພໍ. ເສສໍ ສຸວິຎ຺ເຎຍ຺ຍເມວ.

ນາວາຠິຣຸຫນສິກ຺ຂາປທວຓ຺ຓນາ ນິຏ຺ຐິຕາ.

໙. ປຣິປາຈິຕສິກ຺ຂາປທວຓ຺ຓນາ

໑໙໗. ນວເມ ປາຬິຍໍ ‘‘ສິກ຺ຂມານາ…ເປ… ປຎ຺ຈ ໂຠຊນານິ ຐເປຕ຺ວາ ສພ຺ພຕ຺ຖ ອນາປຕ຺ຕີ’’ຕິ ອິທໍ ອິມິນາ ສິກ຺ຂາປເທນ ອນາປຕ຺ຕິໍ ສນ຺ຘາຍ ວຸຕ຺ຕໍ. ປຎ຺ຈຫິ ສຫຘມ຺ມິເກຫິ ກຕວິຎ຺ຎຕ຺ຕິປຣິກຖາທີຫິ ອຸປ຺ປນ຺ນໍ ປຣິຠຸຎ຺ຊນ຺ຕສ຺ສ ທຸກ຺ກຏເມວ. ຠິກ຺ຂຸນິຍາ ປຣິປາຈິຕຕາ, ຕຖາ ຊານນໍ, ຄິຫິສມາຣມ຺ຠາຠາໂວ, ໂຠຊນຕາ, ຕສ຺ສ ອຊ຺ໂຌຫຣຓນ຺ຕິ ອິມາເນຕ຺ຖ ປຎ຺ຈ ອງ຺ຄານິ.

ປຣິປາຈິຕສິກ຺ຂາປທວຓ຺ຓນາ ນິຏ຺ຐິຕາ.

໑໐. ຣໂຫນິສຊ຺ຊສິກ຺ຂາປທວຓ຺ຓນາ

໑໙໘. ທສເມ ອຸປນນ຺ທສ຺ສ ຈຕຸຕ຺ຖສິກ຺ຂາປເທນາຕິ ມາຕຸຄາເມນ ຣໂຫນິສຊ຺ຊສິກ຺ຂາປທໍ ສນ຺ຘາຍ ວຸຕ຺ຕໍ, ຕໍ ປນ ອເຈລກວຄ຺ເຄ ປຎ຺ຈມມ຺ປິ ອຸປນນ຺ທໍ ອາຣພ຺ຠ ປຎ຺ຎຕ຺ເຕສຸ ຈຕຸຕ຺ຖຕ຺ຕາ ເອວໍ ວຸຕ຺ຕນ຺ຕິ ທຏ຺ຐພ຺ພໍ.

ຣໂຫນິສຊ຺ຊສິກ຺ຂາປທວຓ຺ຓນາ ນິຏ຺ຐິຕາ.

ນິຏ຺ຐິໂຕ ໂອວາທວຄ຺ໂຄ ຕຕິໂຍ.