໑໑. ປຎ຺ຈສຕິກກ຺ຂນ຺ຘກວຓ຺ຓນາ

ສງ຺ຄີຕິນິທານກຖາວຓ຺ຓນາ

໔໓໗. ຉິນ຺ນປາຕນ຺ຕິ ຠາວນປຸໍສກໍ, ເຕນາກາເຣນ ປຕນ຺ຕີຕິ ອຕ຺ໂຖ. ອຸປທ຺ທຸຕາ ຈ ມຍໍ ໂຫມາຕິ ອຕີຕຕ຺ເຖ ວຕ຺ຕມານວຈນໍ, ອຫຸມ຺ຫາຕິ ອຕ຺ໂຖ. ອຖ ວາ ຕສ຺ມິໍ ສຕິ ໂຫມ. ‘‘ປຎ຺ຈ ຠິກ຺ຂຸສຕານີ’’ຕິ ຄຓນວເສນ ວຕ຺ວາ ‘‘ວສ຺ສໍ ວສນ຺ຕາ’’ຕິ ປຸຄ຺ຄລນິທ຺ເທໂສ ກໂຕ.

ຂຸທ຺ທານຸຂຸທ຺ທກກຖາວຓ຺ຓນາ

໔໔໓. ‘‘ວສ຺ສິກສາຏິກໍ ອກ຺ກມິຕ຺ວາ’’ຕິ ວຈນໂຕ ຠຄວໂຕ ຈຕຸຕ຺ຖຈີວຣມ຺ປິ ອຕ຺ຖີຕິ ສິທ຺ຘໍ. ເຕເນວາຫ ຈີວຣກ຺ຂນ຺ຘເກ ‘‘ຈຕຸຕ຺ຖໍ ຈີວຣໍ ປາຣຸປີ’’ຕິ.

໔໔໔. ‘‘ອປິຈ ຍເຖວ ມຍາ’’ຕິອາທິ ສງ຺ຄີຕິຍາ ອຄ຺ຄຫຓາຘິປ຺ປາຍວເສນ ວຸຕ຺ຕໍ, ກິນ຺ຕຸ ສຸສງ຺ຄີຕາ ອາວຸໂສ ເຖເຣຫິ ຘມ຺ໂມ ຈ ວິນໂຍ ຈ. ອປິຈາຫໍ ນາມ ຕເຖວາຫໍ ຘາເຣສ຺ສາມີຕິ ຍເຖວ ມຍາ ຠຄວໂຕ ສມ຺ມຸຂາ ສຸຕໍ ສມ຺ມຸຂາ ປຏິຄ຺ຄຫິຕໍ, ຕເຖວ ເຖເຣຫິ ຠຄວຕາ ສຍເມວ ເອຕທຄ຺ຄໍ ອາໂຣປິເຕຫິ, ຕສ຺ມາ ສຸສງ຺ຄຫິຕາ ສງ຺ຄີຕີຕິ ວຸຕ຺ຕໍ ໂຫຕິ.

ພ຺ຣຫ຺ມທຓ຺ຑກຖາວຓ຺ຓນາ

໔໔໕. ‘‘ຕ຺ວໍເຍວ ອາຓາເປຫີ’’ຕິ ເອຕ຺ຕກເມວ ວຸຕ຺ຕໍ, ເຖຣາ ປນ ພ຺ຣຫ຺ມທຓ຺ຑໍ ກຕ຺ວາ ວຸຕ຺ຕໍເຍວ ‘‘ຉນ຺ນສ຺ສາ’’ຕິອາທິມາຫໍສູຕິ ເວທິຕພ຺ພໍ. ເອຕ຺ຖ ຈ ອານນ຺ທຕ຺ເຖໂຣ ວິຍ ອຎ຺ໂຎປິ ສງ຺ເຆນ ອາຓຕ຺ໂຕ ຠິກ຺ຂຸ ພ຺ຣຫ຺ມທຓ຺ຑກເຕນ ຠິກ຺ຂຸນາ ອາລປິຕຸໍ ລຠຕິ, ນ ອຎ຺ໂຎ. ອຸຊ຺ຊວນິກາຍາຕິ ປຏິໂສຕຄາມິນິຍາ. ອາຄມາ ນຸ ໂຂ ອິຘ ອາຄມາ ນຸ ຂ຺ວິຘ. ອາຄມາ ໂຂ ອິຘ, ເຕ ໂອໂຣຘາ ອິຘ ອາຄມາ ໂຂ. ‘‘ຠິສິຈ຺ຉວີຕິ ຠິສິຕ຺ຖວິກາ’’ຕິ ລິຂິຕໍ. ສພ຺ເພວິເມຕິ ສພ຺ພເມວ. ກຸລວໍ ຄເມນ຺ຕີຕິ ນິຣຕ຺ຖກວິນາສໍ ຄເມນ຺ຕິ. ກຸຈ຺ຉິໂຕ ລໂວ ກຸລໂວ, ອນຍວິນາໂສຕິ ວຸຕ຺ຕໍ ໂຫຕິ. ອິມາຍ ໂຂ ປນ ‘‘ຘມ຺ມວິນຍສງ຺ຄີຕິຍາ’’ຕິ ວຕ຺ຕພ຺ເພ ວິເສເສນ ວິນຍສ຺ສ ສາສນມູລຠາວທສ຺ສນຕ຺ຖໍ, ຕສ຺ມິໍ ຐິເຕ ສກລສາສນຐິຕິສິທ຺ຘິທີປນຕ຺ຖຎ຺ຈ ‘‘ອິທໍ ໂວ ກປ຺ປຕິ, ອິທໍ ໂວ ນ ກປ຺ປຕີ’’ຕິ ວຕ຺ຖຸສ຺ມິໍ ອາຣທ຺ຘຕ຺ຕາ, ອິມິສ຺ສາ ຈ ປຣິຍຕ຺ຕິຍາ ວິນຍປິຏກຕ຺ຕາ ‘‘ວິນຍສງ຺ຄີຕິຍາ’’ຕິ ອິຘ ວຸຕ຺ຕໍ.

ປຎ຺ຈສຕິກກ຺ຂນ຺ຘກວຓ຺ຓນາ ນິຏ຺ຐິຕາ.