໑໒. ສຕ຺ຕສຕິກກ຺ຂນ຺ຘກວຓ຺ຓນາ

ທສວຕ຺ຖຸກຖາວຓ຺ຓນາ

໔໔໖. ນິກ຺ຂິຕ຺ຕມຓິສຸວຓ຺ຓາຕິ ສິກ຺ຂາປເທເນວ ປຏິກ຺ຂິຕ຺ຕມຓິສຸວຓ຺ຓາ. ຕຕ຺ຖ ມຓິຄ຺ຄຫເຓນ ສພ຺ພໍ ທຸກ຺ກຏວຕ຺ຖຸ, ສຸວຓ຺ຓຄ຺ຄຫເຓນ ສພ຺ພໍ ປາຈິຕ຺ຕິຍວຕ຺ຖຸ ຄຫິຕໍ ໂຫຕິ. ຠິກ຺ຂຄ຺ເຄນ ຠິກ຺ຂຸຄຓນາຍາຕິ ວຸຕ຺ຕໍ ໂຫຕິ.

໔໔໗. ມຫິກາຕິ ຫິມໍ. ໂປສາຕິ ສຕ຺ຕາ. ສຣຊາຕິ ສກິເລສຣຊາ. ມຄາຕິ ມຄສທິສາ. ຕສ຺ມິໍ ຕສ຺ມິໍ ວິສເຍ, ຠເວ ວາ ເນຕີຕິ ເນຕ຺ຕິ, ຕຓ຺ຫາເຍຕໍ ອຘິວຈນໍ, ຕາຍ ສຫ ວຕ຺ຕນ຺ຕີຕິ ສເນຕ຺ຕິກາ.

໔໕໐-໒. ອໂຫຄງ຺ໂຄຕິ ປພ຺ພຕສ຺ສ ນາມໍ. ອນຸມາເນສ຺ສາມາຕິ ປຎ຺ຎາເປສ຺ສາມ. ອາສຸຕາຕິ ສຊ຺ຊິຕາ, ‘‘ອສຸຕ຺ຕາ’’ຕິ ວາ ປາໂຐ, ອນາວິລາ ອປກ຺ກາ ຕຣຸຓາ.

໔໕໓. ອຸຊ຺ຊວິໍສຸ ປຏິໂສເຕນ ຄຈ຺ຉິໍສຸ.

໔໕໕. ອປ຺ເປວ ນາມາຕິ ສາຘຸ ນາມ. ມູລາ ທາຍກາ ເປສລກາ. ‘‘ກຸລ຺ລກວິຫາເຣນາຕິ ຂຸທ຺ທກວິຫາເຣນາ’’ຕິ ລິຂິຕໍ. ຣູປາວຕາຣຕ຺ຕາ ກຸລ຺ລກວິຫາໂຣ ນາມ. ກຖໍ ປເນຕໍ ປຎ຺ຎາຍຕິ, ເຍນ ສນ຺ນິຘິກຕໍ ຍາວຊີວິກໍ ຍາວກາລິເກນ ຕທຫຸປຏິຄ຺ຄຫິເຕນ ສມ຺ຠິນ຺ນຣສໍ ຕທຫຸປຏິຄ຺ຄຫິຕສງ຺ຂຍໍ ອາຄນ຺ຕ຺ວາ ສນ຺ນິຘິກຕາມິສສງ຺ຂ຺ຍເມວ ຄຈ຺ຉຕີຕິ? ວຸຈ຺ຈເຕ – ‘‘ຍາວກາລິເກນ, ຠິກ຺ຂເວ, ຍາວຊີວິກໍ ຕທຫຸປຏິຄ຺ຄຫິຕ’’ນ຺ຕິ ວຈນໂຕ ປຸເຣປຏິຄ຺ຄຫິຕໍ ຍາວຊີວິກໍ ຕທຫຸປຏິຄ຺ຄຫິເຕນາມິເສນ ເຈ ສມ຺ຠິນ຺ນໍ, ປຸເຣປຏິຄ຺ຄຫິຕສງ຺ຂ຺ຍເມວ ຄຈ຺ຉຕີຕິ ສິທ຺ຘໍ. ອຎ຺ຎຖາ ‘‘ສຕ຺ຕາຫກາລິເກນ, ຠິກ຺ຂເວ, ຍາວຊີວິກໍ ປຏິຄ຺ຄຫິຕໍ ສຕ຺ຕາຫໍ ກປ຺ປຕີ’’ຕິ (ມຫາວ. ໓໐໕) ວຸຕ຺ຕຏ຺ຐາເນ ວິຍ ອິຘາປິ ‘‘ຍາວກາລິເກນ, ຠິກ຺ຂເວ, ຍາວຊີວິກໍ ປຏິຄ຺ຄຫິຕໍ ກາເລ ກປ຺ປຕີ’’ຕິ ວເທຍ຺ຍ, ຕຎ຺ຈາວຸຕ຺ຕໍ. ຕສ຺ມາ ປຸເຣປຏິຄ຺ຄຫິຕໍ ຕໍ ອາມິສສມ຺ຠິນ຺ນໍ ອາມິສຄຕິກເມວາຕິ ເວທິຕພ຺ພໍ. ຄຓ຺ຐິປເທ ປນ ‘‘ສນ຺ນິຘິກາຣກໍ ຂາທນີຍໍ ວາ ໂຠຊນີຍໍ ວາ’’ຕິ (ປາຈິ. ໒໕໓) ວຸຕ຺ຕໍ. ພ຺ຍຎ຺ຊນມຕ຺ຕໍ ນ ຄເຫຕພ຺ພໍ.

໔໕໗. ອິຘາຕິ ອິມສ຺ມິໍ ປາເຐ. ‘‘‘ກາເລ ກປ຺ປຕິ, ວິກາເລ ນ ກປ຺ປຕີ’ຕິ (ມຫາວ. ໓໐໕) ວຸຕ຺ຕວຈນມຕ຺ເຕນ ‘ວິກາເລ ກປ຺ປຕີ’ຕິ ວິກາລໂຠຊນປາຈິຕ຺ຕິຍໍ ອາວຫໍ ໂຫຕີຕິ ອຕ຺ໂຖ, ‘ນ ກປ຺ປຕີ’ຕິ ສນ຺ນິຘິໂຠຊນປາຈິຕ຺ຕິຍໍ ອາວຫໍ ໂຫຕີຕິ ອຕ຺ໂຖ, ຍທິ ສມ຺ຠິນ຺ນຣສໍ ອຊ຺ຊປຏິຄ຺ຄຫິຕມ຺ປິ ຍາວຊີວິກນ຺ຕິ ອຕ຺ໂຖ’’ຕິ ລິຂິຕໍ. ສຸຕ຺ຕວິຠງ຺ເຄຕິ ມາຕິກາສງ຺ຂາເຕ ສຸຕ຺ເຕ ຈ ຕສ຺ສ ປທຠາຊນີຍສງ຺ຂາເຕ ວິຠງ຺ເຄ ຈາຕິ ອຕ຺ໂຖ. ອິທໍ ອາຄຕເມວ. ກຕຣນ຺ຕິ? ‘‘ອຕິກ຺ກາມຍໂຕ ເຉທນກ’’ນ຺ຕິ ອິທໍ.

ຕິວິທຕ຺ຖິປມາຓຎ຺ເຈ, ອທສໍ ຕໍ ນິສີທນໍ;

ນິສີທນໍ ກຖໍ ໂຫຕິ, ສທສໍ ຕຎ຺ຫິ ລກ຺ຂຓໍ.

ຕິວິທຕ຺ຖິປມາຓໍ ຕໍ, ທສາ ຕຕ຺ຖ ວິທຕ຺ຖິ ເຈ;

ຕໍນິສີທນນາມຕ຺ຕາ, ຕສ຺ມິໍ ເຉທນກໍ ສິຍາ.

ອນິສີທນນາມມ຺ຫິ, ກຖໍ ເຉທນກໍ ຠເວ;

ອິຕິ ເຈ ເນວ ວຕ຺ຕພ຺ພໍ, ນິສີທນວິທຕ຺ຖິໂຕ.

ກປ຺ປເຕ ສທສາມຕ຺ຕໍ, ນິສີທນມິຕິ ກາຣຓໍ;

ກຖໍ ຍຸຊ຺ຊຕິ ໂນ ເຈຕໍ, ນິສີທນສ຺ສ ນາມກໍ.

ນິສີທນນ຺ຕິ ວຸຕ຺ຕຕ຺ຕາ, ປມາຓສມຕິກ຺ກມາ;

ຕສ຺ສານຸມຕິເຫຕຸຕ຺ຕາ, ຕຕ຺ຖ ເຉທນກໍ ຠເວ.

ຊາຕຣູປກປ຺ເປ –

ຊາຕຣູປໍ ປຏິກ຺ຂິຕ຺ຕໍ, ປຸຄ຺ຄລສ຺ເສວ ປາຬິຍໍ;

ນ ສງ຺ຆສ຺ສາຕິ ສງ຺ຆສ຺ສ, ຕຎ຺ເຈ ກປ຺ປຕິ ສພ຺ພໂສ.

ວິກາລໂຠຊນຎ຺ຈາປິ, ປຸຄ຺ຄລສ຺ເສວ ວາຣິຕໍ;

ນ ສງ຺ຆສ຺ສາຕິ ສງ຺ຆສ຺ສ, ກປ຺ປຕີຕິ ກຖໍ ສມໍ.

ສຕ຺ຕສຕິກກ຺ຂນ຺ຘກວຓ຺ຓນາ ນິຏ຺ຐິຕາ.

ຈູຬວຄ຺ຄວຓ຺ຓນາ ນິຏ຺ຐິຕາ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ