໑໐. ຠິກ຺ຂຸນິກ຺ຂນ຺ຘກວຓ຺ຓນາ

ມຫາປຊາປຕິໂຄຕມີວຕ຺ຖຸກຖາວຓ຺ຓນາ

໔໐໒-໓. ສູເນຫີຕິ ສຸເຕຫິ. ‘‘ເສຕຏ຺ຏິກາ ນາມ ໂຣຄຊາຕີ’’ຕິ ປາຬິ. ‘‘ເສຕຏ຺ຐິກາ’’ຕິ ອຏ຺ຐກຖາ. ‘‘ປຏິສມ຺ຠິທາປຕ຺ຕຂີຓາສວຄ຺ຄຫເຓນ ຌານານິປິ ຄຫິຕາເນວ ໂຫນ຺ຕິ. ນ ຫິ ນິຊ຺ຌານິການໍ ສພ຺ພປ຺ປກາຣາ ສມ຺ປຕ຺ຕິ ອິຊ຺ຌຕີ’’ຕິ ລິຂິຕໍ.

ຠິກ຺ຂຸນີອຸປສມ຺ປທານຸຊານນກຖາວຓ຺ຓນາ

໔໐໔. ຍທຄ຺ເຄນ ຍໍ ທິວສໍ ອາທິໍ ກຕ຺ວາ. ຕເທວາຕິ ຕສ຺ມິໍ ເອວ ທິວເສ. ‘‘ອນຸຎຕ຺ຕິຍາ’’ຕິ ປາໂຐ. ‘‘ອນຸປຎ຺ຎຕ຺ຕິຍາ’’ຕິ ນ ສຸນ຺ທຣໍ.

໔໐໕. ‘‘ປຏິຄ຺ຄຓ຺ຫາມິ ຍາວຊີວໍ ອນຕິກ຺ກມນີໂຍ’’ຕິ ວຕ຺ວາ ອິທານິ ກິໍ ກາຣຓາ ວຣໍ ຍາຈຕີຕິ ເຈ? ປຣູປວາທວິວຊ຺ຊນຕ຺ຖໍ. ທຸພ຺ພຸທ຺ຘິໂນ ຫິ ເກຈິ ວເທຍ຺ຍຸໍ ‘‘ມຫາປຊາປຕິຍາ ປຐມໍ ສມ຺ປຏິຈ຺ຉິຕຕ຺ຕາ ອຸຠໂຕສງ຺ຆສ຺ສ ຍຖາວຸຑ຺ຒອຠິວາທນໍ ນ ຊາຕໍ. ໂຄຕມີ ເຈ ວຣໍ ຍາເຈຍ຺ຍ, ຠຄວາ ອນຸຊາເນຍ຺ຍາ’’ຕິ.

໔໐໘. ວິມາເນຕ຺ວາຕິ ອປຣຊ຺ຌິຕ຺ວາ.

໔໑໐-໓. ກມ຺ມປ຺ປຕ຺ຕາໂຍປີຕິ ກມ຺ມາຣຫາປິ. ອາປຕ຺ຕິຄາມິນິໂຍປີຕິ ອາປຕ຺ຕິໍ ອາປນ຺ນາໂຍປິ. ທ຺ເວ ຕິສ຺ໂສ ຠິກ຺ຂຸນິໂຍຕິ ທ຺ວີຫິ ຕີຫິ ຠິກ຺ຂຸນີຫິ. ‘‘ມໂນສິລິກາຍາ’’ຕິ ປາໂຐ.

໔໒໐. ‘‘ເຕນ ຈ ຠິກ຺ຂຸ ນິມນ຺ເຕຕພ຺ໂພ’’ຕິ ສາມີຈິວເສນ ວຸຕ຺ຕໍ.

໔໒໒-໓. ‘‘ອນຸຊານາມິ…ເປ… ຕາວກາລິກ’’ນ຺ຕິ ປຸຄ຺ຄລິກໍ ສນ຺ຘາຍ ວຸຕ຺ຕໍ, ນ ສງ຺ຆິກນ຺ຕິ ອາຈຣິໂຍ. ‘‘ອນຸຊານາມິ, ຠິກ຺ຂເວ, ອຸຕຸນິຍາ ກຏິສຸຕ຺ຕກ’’ນ຺ຕິ ວຈນໂຕ ຠິກ຺ຂຸສ຺ສ ວິນິພນ຺ຘໍ ກຏິສຸຕ຺ຕກໍ ນ ວຏ຺ຏຕິ. ປຄ຺ຆຣນ຺ຕີ ວິສວິຓາ. ເວປຸຣິສິກາ ມສ຺ສຸທາຐີ.

໔໒໕. ຕໂຍ ນິສ຺ສເຍຕິ ຣຸກ຺ຂມູລຎ຺ຫິ ສາ ນ ລຠຕິ.

໔໒໖. ຠຕ຺ຕຄ຺ເຄ ສເຈ ທາຍກາ ຠິກ຺ຂຸນິສງ຺ຆສ຺ສ ຠຸຕ຺ຕວໂຕ ຈຕຸປຈ຺ຈເຍ ທາຕຸກາມາ ໂຫນ຺ຕິ, ຍຖາວຸຑ຺ຒເມວ.

໔໒໗. ວິກາເລຕິ ຍາວ ວິກາເລ ໂຫນ຺ຕິ, ຕາວ ປວາເຣສຸນ຺ຕິ ອຕ຺ໂຖ. ອຊ຺ຊຕ຺ຕນາຕິ ອຊ຺ຊຕນາ.

໔໒໘. ອນຸວາທນ຺ຕິ ອິສ຺ສຣິຍຏ຺ຐານໍ. ອິທໍ ສພ຺ພໍ ‘‘ອຊ຺ຊຕຄ຺ເຄ ໂອວໂຏ ຠິກ຺ຂຸນີນໍ ຠິກ຺ຂູສຸ ວຈນປໂຖ’’ຕິ ປຎ຺ຎຕ຺ຕສ຺ສ ຄຣຸຘມ຺ມສ຺ສ ວີຕິກ຺ກມອາປຕ຺ຕິປຎ຺ຎາປນຕ຺ຖໍ ວຸຕ຺ຕນ຺ຕິ ເວທິຕພ຺ພໍ, ອຎ຺ຎຖາ ເຍສໍ ຄຣຸຘມ຺ມານໍ ປຏິຄ຺ຄຫເຓນ ຠິກ຺ຂຸນີນໍ ອຸປສມ຺ປທາ ອນຸຎ຺ຎາຕາ, ເຕສໍ ວີຕິກ຺ກເມ ອນຸປສມ຺ປນ຺ນາວ ສິຍາຕິ ອາສງ຺ກາ ຠເວຍ຺ຍ.

໔໒໙. ອິຕ຺ຖິຍຸຕ຺ເຕນາຕິ ອິຕ຺ຖີຫິ ຄາວີອາທີຫິ ຘຸຣຏ຺ຐາເນ ຍຸຕ຺ເຕນ. ປຸຣິສນ຺ຕເຣນາຕິ ປຸຣິເສນ ອນ຺ຕຣິເກນ. ‘‘ປຸຣິສທຸຕິເຍນາ’’ຕິ ລິຂິຕໍ, ປຸຣິສສາຣຖິນາຕິ ອຘິປ຺ປາໂຍ. ‘‘ພາຬ຺ຫຕຣໍ ອຜາສູ’’ຕິ ວຈນໂຕ ຄິລານາຍ ວຏ຺ຏຕິຈ຺ເຈວ ສິທ຺ຘໍ, ຠຄວນ຺ຕໍ ອາປຸຈ຺ຉິຕ຺ວາ ອນຸຎ຺ຎາຕຏ຺ຐາເນ ອຸປສມ຺ປຊ຺ຊິສ຺ສາມີຕິ ອຘິປ຺ປາໂຍ.

໔໓໐. ສາ ເກນຈິເທວ ອນ຺ຕຣາເຍນາຕິ ສພ຺ພນ຺ຕຣາຍສງ຺ຄຫນວຈນໍ, ຕສ຺ມາ ຕໍ ນ ອນ຺ຕຣາຍໍ ກິຕ຺ເຕຕ຺ວາ, ວຸຕ຺ຕນ຺ຕຣາເຍນ ‘‘ຣາຊນ຺ຕຣາເຍນາ’’ຕິ ສາເຘຕພ຺ພນ຺ຕິ ອາຈຣິໂຍ.

໔໓໑-໒. ‘‘ນວກມ຺ມນ຺ຕິ ກຕ຺ວາ ‘ເອຕ຺ຕການິ ວສ຺ສານິ ວສຕູ’ຕິ ອປໂລເກຕ຺ວາ ສງ຺ຆິກຠູມິທານ’’ນ຺ຕິ ລິຂິຕໍ. ‘‘ສາຄາຣ’’ນ຺ຕິ ວຸຕ຺ຕຕ຺ຕາ ອຄາຣປຏິສໍຍຸຕ຺ຕຣໂຫນິສຊ຺ຊສິກ຺ຂາທິວຊ຺ຊິຕາຕິ ເກຈິ, ຍຸຕ຺ຕເມຕໍ. ກສ຺ມາ? ‘‘ສຫາຄາຣເສຍ຺ຍມຕ຺ຕໍ ຐເປຕ຺ວາ’’ຕິ ອຏ຺ຐກຖາຍໍ ວຸຕ຺ຕຕ຺ຕາ. ‘‘ອນຸຊານາມິ, ຠິກ຺ຂເວ, ໂປເສຕຸ’’ນ຺ຕິ ວຈນໂຕ ໂປສນຍຸຕ຺ຕກມ຺ມໍ ສພ຺ພໍ ວຏ຺ຏຕິ ມາຕຸຍາ, ນ ອຎ຺ເຎສໍ. ວສິຕຸໍ ເຈ ນ ສກ຺ໂກຕິ ທຸຕິຍໍ ວິນາ, ສມ຺ມນ຺ນິຕ຺ວາວ ທາຕພ຺ພາ ຕາຍ ອິຕິ ໂນ ມຕິ. ກິຕ຺ຕກໍ ກາລໍ? ວສິຕ຺ວາ ເຈ ທຸຕິຍາ ຄນ຺ຕຸມິຈ຺ຉຕິ, ອຎ຺ຎໍ ສມ຺ມນ຺ນິຕຸໍ ຍຸຕ຺ຕາວ. ສາ ວິຊາຕາ ລເຠຕິ ອາຈຣິໂຍ.

໔໓໔. ‘‘ອິທໍ ໂອທິສ຺ສ ອນຸຎ຺ຎາຕໍ ວຏ຺ຏຕີຕິ ເອກໂຕ ວາ ອຸຠໂຕ ວາ ອວສ຺ສເວ ສຕິປິ ວຏ຺ຏຕີ’’ຕິ ລິຂິຕໍ. ‘‘ເກສຈ຺ເຉທາທິກໍ ກມ຺ມໍ ອນຸຊານາມິ ສາທິຕຸໍ ’’ອິຈ຺ເຈວ ວຸຕ຺ຕຕ຺ຕາ ວຸຕ຺ຕໍ ‘‘ຕທຎ຺ເຎ ສາທິຕຸ’’ນ຺ຕິ. ‘‘ເກສຈ຺ເຉທາທິກໍ ກມ຺ມໍ ອນຸຊານາມິ, ຠິກ຺ຂເວ’’ຕິ ອວຕ຺ວາ ເອຕ຺ຕກໍ ຍສ຺ມາ ‘‘ສາທິຕຸ’’ນ຺ຕິ ຠາສິຕໍ, ຕສ຺ມາ ສາ ວິຈິກິຈ຺ຉາຍ ອຸຠໂຕປິ ອວສ຺ສເວ ອປິ ປາຣາຊິກເຂຕ຺ເຕນ ສາ ປາຣາຊິກໍ ຜຸສຕິ. ອິຕິ ອຏ຺ຐກຖາສ຺ເວຕໍ ສພ຺ພາສຸປິ ວິນິຈ຺ຉິຕໍ. ໂອທິສ຺ສກາຠິລາໂປ ຫິ ອຎ຺ຎຖາ ນິພ຺ພິເສສໂຕ ຕໍ ປມາຓໍ. ຍທິ ຕຖາ ຠິກ຺ຂຸສ຺ສ ກປ຺ປຕິ ວິຈິກິຈ຺ຉາ.

ກາລໂມທິສ຺ສ ນໍ ປທໍ, ນ ສຕ຺ໂຕທິສ຺ສກຎ຺ຫິ ຕໍ;

ອຖ ຠິກ຺ຂຸນິຍາ ເອວ, ກາລໂມທິສ຺ສ ຠາສິຕໍ.

ເອວໍ ປາຣາຊິກາປຕ຺ຕິ, ສິຖິລາວ ກຕາ ສິຍາ;

ສພ຺ພໂສ ປິຫິຕໍ ທ຺ວາຣໍ, ສພ຺ພປາຣາຊິກສ຺ມິນ຺ຕິ.

ນິຣຕ຺ຖກຠາວໂຕ, ອຸພ຺ຠຊາຓຸມຓ຺ຑເລ;

ຕສ຺ມາ ນ ສາທິຍນ຺ຕີຕິ, ນິທານວຈນກ຺ກມໍ.

ນິສ຺ສາຍ ສຕ຺ຖຸນາ ວຸຕ຺ຕໍ, ສາທິຕຸນ຺ຕິ ນ ອຎ຺ຎຖາ;

ອຕ຺ຕໂນ ປຓ຺ຫິສມ຺ຜສ຺ສໍ, ສາທິຕຸໍ ເຍນ ວາຣິຕໍ.

ອປິ ປາຣາຊິກກ຺ເຂຕ຺ເຕ, ກຖໍ ທ຺ວາຣໍ ທເທຍ຺ຍ ໂສ;

ຕຖາປິ ພຸທ຺ຘປຸຕ຺ຕານໍ, ພຸທ຺ຘຠາສິຕຠາສິຕໍ.

ວຈນຎ຺ຈ ສມາເນນ຺ໂຕ, ໂນ ເຈຕ຺ຖ ຍຸຕ຺ຕິກຖາ ຘີຣາ;

ເກສຈ຺ເຉທາທິກມ຺ມສ຺ສ, ອວສ຺ສໍ ກຣຓີຍໂຕ.

ຈິຕ຺ຕສ຺ສ ຈາຕິໂລລຕ຺ຕາ, ຄຓສ຺ສ ຈ ອງ຺ຄສມ຺ປທາ-

ຠາວາ ຠິກ຺ຂຸນີນໍ ມເຫສິນາ, ຣກ຺ຂິຕຸຎ຺ຈ ອສງ຺ກຕ຺ຕາ;

ນນຸ ໂມທິສ຺ສກໍ ກຕນ຺ຕິ.

ຠິກ຺ຂຸນິກ຺ຂນ຺ຘກວຓ຺ຓນາ ນິຏ຺ຐິຕາ.