໖. ສຸຣາປານວຄ຺ໂຄ

໑. ສຸຣາປານສິກ຺ຂາປທວຓ຺ຓນາ

ອາຍສ຺ມໂຕ ຍໍ ມຸນິ ສາຄຕສ຺ສ,

ມຫິທ຺ຘິກຕ຺ຕສ຺ສ ນິທສ຺ສເນນ;

ປານສ຺ສ ໂທໂສ ຕສ຺ສ ທສ຺ສນຕ຺ຖໍ,

ປຸພ຺ເພວ ໂສ ຠທ຺ທວຕິໍ ປຍາໂຕ.

ຕສ຺ມາ ປສ຺ສໍ ນາຄມໂປຖຍິຕ຺ວາ,

ວິນິສ຺ສຏໍ ສາຄຕໍ ອິທ຺ຘິຍາ ຈ;

ນໂຕ ສຸຣາປານນິເສຘນຕ຺ຖໍ,

ໂກສມ຺ພິເມວຊ຺ຌຄມາຕິ ເຎຍ຺ຍໍ.

໓໒໖-໘. ປສຸປາລກາຕິ ອຊປາລກາ. ເຍນ ມຊ຺ຊຕິ, ຕສ຺ສ ພີຊໂຕ ປຏ຺ຐາຍ. ເກຈິ ‘‘ສຈິຕ຺ຕກປກ຺ເຂ ຈິຕ຺ຕໍ ອກຸສລເມວາຕິ (ກງ຺ຂາ. ອຏ຺ຐ. ປຐມປາຣາຊິກວຓ຺ຓນາ) ວຸຕ຺ຕຕ຺ຕາ ວຕ຺ຖຸໍ ຊານິຕ຺ວາ ປິວໂຕ ອກຸສລ’’ນ຺ຕິ ວທນ຺ຕິ. ເອວໍ ສຕິ ‘‘ອກຸສເລເນວ ປາຕພ຺ພຕາຍາຕິ ນ ວຕ຺ຕພ຺ພ’’ນ຺ຕິ ວຸຕ຺ເຕ ‘‘ສຈິຕ຺ຕກປກ຺ຂເມວ ສນ຺ຘາຍາ’’ຕິ ວທນ຺ຕິ. ເອວໍ ສຕິ ‘‘ກຸສລາກຸສລາພ຺ຍາກຕຈິຕ຺ຕນ຺ຕິ ວຕ຺ຕພ຺ພ’’ນ຺ຕິ ວຸຕ຺ເຕ ຕມ຺ປິ ‘‘ຕພ຺ພຫຸລນເຍນ ວຸຕ຺ຕ’’ນ຺ຕິ ວທນ຺ຕິ. ກງ຺ຂາວິຕຣຓິຍມ຺ປິ ອວິເສເສຕ຺ວາ ‘‘ອກຸສລຈິຕ຺ຕ’’ນ຺ຕິ (ກງ຺ຂາ. ອຏ຺ຐ. ສຸຣາປານສິກ຺ຂາປທວຓ຺ຓນາ) ວຸຕ຺ຕໍ, ຕສ຺ມາ ‘‘ຕໍ ອກຸສເລເນວ ປິວຕີ’’ຕິ ວທນ຺ຕີຕິ.

ສຸຣາປານສິກ຺ຂາປທວຓ຺ຓນາ ນິຏ຺ຐິຕາ.

໒. ອງ຺ຄຸລິປໂຕທກສິກ຺ຂາປທວຓ຺ຓນາ

໓໓໐. ອງ຺ຄຸລິປໂຕທກສິກ຺ຂາປທໍ ອຸຕ຺ຕານຕ຺ຖເມວ.

໓. ຫສຘມ຺ມສິກ຺ຂາປທວຓ຺ຓນາ

໓໓໖. ຕຕິເຍ ກຖໍ ຕິເວທນໍ? ຫສາຘິປ຺ປາເຍເນວ ‘‘ປຣສ຺ສ ທຸກ຺ຂໍ ອຸປ຺ປາເທສ຺ສາມີ’’ຕິ ອຸທກໍ ຂິປນ຺ຕສ຺ສ ທຸກ຺ຂເວທນໍ. ເສສໍ ອຸຕ຺ຕານໍ.

ອິທໍ ສຎ຺ຎາວິໂມກ຺ຂຎ຺ເຈ, ຕິກປາຈິຕ຺ຕິຍໍ ກຖໍ;

ກີຬິຕໍວ ອກີຬາຕິ, ມິຈ຺ຉາຄາເຫນ ຕໍ ສິຍາ.

ເອຕ຺ຕາວຕາ ກຖໍ ກີຬາ, ອິຕິ ກີຬາຍໍ ເອວາຍໍ;

ອກີຬາສຎ຺ຎີ ໂຫເຕຕ຺ຖ, ວິນຍຕ຺ຖໍ ສມາທເຍ.

ເອກນ຺ຕາກຸສໂລ ຍສ຺ມາ, ກີຬາຍາຠິຣຕມໂນ;

ຕສ຺ມາ ອກຸສລໍ ຈິຕ຺ຕໍ, ເອກເມເວຕ຺ຖ ລພ຺ຠຕີຕິ.

ຫສຘມ຺ມສິກ຺ຂາປທວຓ຺ຓນາ ນິຏ຺ຐິຕາ.

໔. ອນາທຣິຍສິກ຺ຂາປທວຓ຺ຓນາ

໓໔໔. ‘‘ໂລກວຊ຺ຊໍ ອຕິກ຺ກມິຕ຺ວາ ‘ອິທໍ ອມ຺ຫາກໍ ອາຈຣິຍຸຄ຺ຄໂຫ’ຕິ ວທນ຺ຕສ຺ສ ນ ວຏ຺ຏຕີ’’ຕິ ລິຂິຕໍ. ຍໍ ສໍກິລິຏ຺ເຐເນວ ຈິຕ຺ເຕນ ອາປຊ຺ຊຕິ, ຍໍ ວາ ອຣິຍປຸຄ຺ຄໂລ ອປຎ຺ຎຕ຺ເຕ ສິກ຺ຂາປເທ ອຊ຺ຌາຈຣຕິ, ອິທໍ ໂລກວຊ຺ຊນ຺ຕິ ສພ຺ພຕ຺ຖິກວາທີອາທີນິ ອາຈຣິຍກຸລານິ. ຕຕ຺ຖ ທຸຕິຍຕຕິຍວິກປ຺ໂປ ອິຘ ນ ອຘິປ຺ເປໂຕ ເສຂິຍານໍ ໂລກວຊ຺ຊຕ຺ຕາ.

ຄາຣຍ຺ໂຫ ອາຈຣິຍຸຄ຺ຄໂຫຕິ ເອຕ຺ຖ ‘‘ຍສ຺ມາ ອຸຈ຺ຉຸຣໂສ ສຕ຺ຕາຫກາລິໂກ, ຕສ຺ສ ກສໂຏ ຍາວຊີວິໂກ, ທ຺ວິນ຺ນໍເຍວ ສມວາໂຍ ອຸຈ຺ຉຸຍຏ຺ຐິ, ຕສ຺ມາ ວິກາເລ ອຸຈ຺ຉຸຍຏ຺ຐິໍ ຂາທິຕຸໍ ວຏ຺ຏຕິ ຄຸຬຫຣີຏກໍ ວິຍາ’ຕິ ເອວມາທິໂກ ສມ຺ປຕິ ນິພ຺ພຕ຺ໂຕ ຄາຣຍ຺ຫາຈຣິຍວາໂທ ນ ຄເຫຕພ຺ໂພ’’ຕິ ຈ, ປຓ຺ຓຕ຺ຕິວຊ຺ເຊ ປນ ວຏ຺ຏຕີຕິ ‘‘ນ ປຕ຺ຕຫຕ຺ເຖນ ກວາໂຏ ປຓາເມຕພ຺ໂພ’ຕິ ອິມສ຺ສ ‘ເຍນ ຫຕ຺ເຖນ ປຕ຺ໂຕ ຄຫິໂຕ, ເຕນ ຫຕ຺ເຖນ ນ ປຓາເມຕພ຺ໂພ, ອິຕເຣນ ປຓາເມຕພ຺ໂພ’ຕິ ອຕ຺ຖໍ ຄເຫຕ຺ວາ ຕຖາ ອາຈຣນ຺ໂຕ ນ ອາປຕ຺ຕິຍາ ກາເຣຕພ຺ໂພ. ‘ຕຖາ ພຸທ຺ຘໂພຘິເຈຕິຍານໍ ປຸປ຺ຜໍ ຄຓ຺ຫິຕຸໍ ວຏ຺ຏຕີຕິ ຕຖາ ອາຈຣນ຺ໂຕ’’ຕິ ຈ. ຕຖາ ອາຈຣຕິ ອຠຍຄິຣິວາສິໂກ. ມຫາວິຫາຣວາສິໂນ ເຈ ເອວໍ ວທນ຺ຕິ, ‘‘ມາ ເອວໍ ວທາ’’ຕິ ອປສາເທຕພ຺ໂພ. ເຕນ ວຸຕ຺ຕໍ ‘‘ສຸຕ຺ຕໍ ສຸຕ຺ຕານຸໂລມຎ຺ຈ ອຸຄ຺ຄຫິຕການໍເຍວາ’’ຕິອາທິ. ‘‘ອິທໍ ສພ຺ພໍ ອຸປຕິສ຺ສຕ຺ເຖໂຣ ອາຫາ’’ຕິ ຈ ວຸຕ຺ຕໍ. ‘‘ສຸຕ຺ຕານຸໂລມໍ ອຏ຺ຐກຖາ’’ຕິ ລິຂິຕໍ.

ອນາທຣິຍສິກ຺ຂາປທວຓ຺ຓນາ ນິຏ຺ຐິຕາ.

໕. ຠິໍສາປນສິກ຺ຂາປທວຓ຺ຓນາ

໓໔໕. ຠິໍສາປນສິກ຺ຂາປທໍ ອຸຕ຺ຕານຕ຺ຖເມວ.

໖. ໂຊຕິສິກ຺ຂາປທວຓ຺ຓນາ

໓໕໔. ‘‘ວິສິພ຺ພນາເປກ຺ໂຂ’’ຕິ ວຈນໂຕ ຍສ຺ສ ອເປກ຺ຂາ ນຕ຺ຖິ, ຕສ຺ສ ອນາປຕ຺ຕິ.

ໂຊຕິສິກ຺ຂາປທວຓ຺ຓນາ ນິຏ຺ຐິຕາ.

໗. ນຫານສິກ຺ຂາປທວຓ຺ຓນາ

໓໖໔. ນຫານສິກ຺ຂາປທໍ ອຸຕ຺ຕານຕ຺ຖເມວ.

໘. ທຸພ຺ພຓ຺ຓກຣຓສິກ຺ຂາປທວຓ຺ຓນາ

໓໖໘. ອລຠີຕິ ລໂຠ. ຍຖາ ‘‘ປຈຕີຕິ ປໂຈ, ປຖຕີຕິ ປໂຖ’’ຕິ ວຸຈ຺ຈຕິ, ເອວໍ ‘‘ລຠຕີຕິ ລໂຠ’’ຕິ ກສ຺ມາ ນ ວຸຕ຺ຕໍ? ປຣິນິຏ຺ຐິຕລາຠສ຺ເສວ ອິຘາຘິປ຺ເປຕຕ຺ຕາ. ມຄ຺ເຄຕິ ສິພ຺ພິນິມຄ຺ເຄ. ກປ຺ປກເຕນ ສທ຺ຘິໍ ອກປ຺ປກຕໍ ສິພ຺ເພຕິ. ຍາວຕາ ອຘິຏ຺ຐານໍ ນ ວິຊຫຕິ, ຕາວຕາ ປຸພ຺ພໍ ກປ຺ປເມວ. ກປ຺ປໍ ນ ວິຊຫຕິ ເຈ, ປຸນ ກປ຺ປໍ ທາຕພ຺ພນ຺ຕິ ອາຈຣິຍສ຺ສ ຕກ຺ໂກ.

ທຸພ຺ພຓ຺ຓກຣຓສິກ຺ຂາປທວຓ຺ຓນາ ນິຏ຺ຐິຕາ.

໙. ວິກປ຺ປນສິກ຺ຂາປທວຓ຺ຓນາ

໓໗໔. ປຣິໂຠໂຄ ເອຕ຺ຖ ກາຍກມ຺ມໍ. ອປຈ຺ຈຸທ຺ຘາຣຓໍ ວຈີກມ຺ມໍ.

ວິກປ຺ປນສິກ຺ຂາປທວຓ຺ຓນາ ນິຏ຺ຐິຕາ.

໑໐. ຈີວຣາປນິຘານສິກ຺ຂາປທວຓ຺ຓນາ

໓໗໙. ທສເມ ຍສ຺ມາ ນິສີທນສນ຺ຖຕໍ ຈີວຣນິສີທນມ຺ປີຕິ ອຸຠຍມ຺ປິ ສທສເມວ, ຕສ຺ມາ ຕໍ ອຸຠຍມ຺ປິ ເອກໂຕ ກຕ຺ວາ ‘‘ນິສີທນໍ ນາມ ສທສໍ ວຸຈ຺ຈຕີ’’ຕິ ອາຫ. ຕຕ຺ຖາປິ ຈີວຣຄ຺ຄຫເຓນ ຈີວຣນິສີທນໍ ຄຫິຕເມວາຕິ ອຕ຺ຖໂຕ ສນ຺ຖຕນິສີທນເມວ ວຸຕ຺ຕໍ ໂຫຕິ. ຍທິ ເອວໍ ‘‘ນິສີທນສນ຺ຖຕໍ ນາມ ສທສໍ ວຸຈ຺ຈຕີ’’ຕິ ວຕ຺ຕພ຺ພນ຺ຕິ? ນ, ອິຕຣສ຺ສ ອນິສີທນອທສຠາວປ຺ປສງ຺ຄໂຕ. ເອຕ຺ຖ ນິສີທນສນ຺ຖຕສ຺ສ ປາຈິຕ຺ຕິຍວຕ຺ຖຸຕ຺ຕາ ອິຕຣມ຺ປິ ປາຈິຕ຺ຕິຍວຕ຺ຖຸເມວາຕິ ເວທິຕພ຺ພໍ ຕຊ຺ຊາຕິກຕ຺ຕາ. ສສ຺ສາມິເກ ສູຈິຆເຣ ສູຈິຄຓນາຍ ອາປຕ຺ຕິໂຍຕິ ໂປຣາຓາ.

ຈີວຣາປນິຘານສິກ຺ຂາປທວຓ຺ຓນາ ນິຏ຺ຐິຕາ.

ສມຕ຺ໂຕ ວຓ຺ຓນາກ຺ກເມນ ສຸຣາປານວຄ຺ໂຄ ຉຏ຺ໂຐ.