໘. ສນ຺ນິຘິກາຣກສິກ຺ຂາປທວຓ຺ຓນາ

໒໕໓. ອປຣຊ຺ຊຸ ສນ຺ນິຘິ ນາມ ໂຫຕີຕິ ອຕ຺ໂຖ. ອຊ຺ຊ ປຏິຄ຺ຄຫິຕນ຺ຕິ ນ ເກວລໍ ປຏິຄ຺ຄຫິຕເມວ, ອຖ ໂຂ ອຸຄ຺ຄຫິຕກມ຺ປິ, ເຕເນວ ອຏ຺ຐກຖາຍໍ ‘‘ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສາຕິ ເອວໍ ສນ຺ນິຘິກຕໍ ຍໍ ກິຎ຺ຈິ ຍາວກາລິກໍ ວາ ຍາມກາລິກໍ ວາ ອຊ຺ໂຌຫຣິຕຸກາມຕາຍ ຄຓ຺ຫນ຺ຕສ຺ສ ປຏິຄ຺ຄຫເຓ ຕາວ ອາປຕ຺ຕິ ທຸກ຺ກຏສ຺ສາ’’ຕິ ວຸຕ຺ຕໍ. ຍທິ ຕໍ ປຐມເມວ ປຏິຄ຺ຄຫິຕໍ, ‘‘ປຏິຄ຺ຄຫເຓ ຕາວາ’’ຕິ ນ ວຕ຺ຕພ຺ພໍ, ຕສ຺ມາ ເວທິຕພ຺ພເມຕໍ ‘‘ອຕ຺ຕໂນ ກາເລ ຄຫິຕໍ ອຊ຺ຊ ປຏິຄ຺ຄຫິຕ’ນ຺ຕິ ວຸຕ຺ຕ’’ນ຺ຕິ.

ເອຕ຺ຖາຫ – ຍຖາ ປຎ຺ຈ ເຠສຊ຺ຊານິ ອຸຄ຺ຄຫິຕການິ ອນຘິປ຺ເປຕານິ. ສຕ຺ຕາຫາຕິກ຺ກເມ ອນາປຕ຺ຕິ ອນຊ຺ໂຌຫຣຓີຍຕ຺ຕາ, ຕຖາ ອິຘາປິ ອຸຄ຺ຄຫິຕກໍ ນາຘິປ຺ເປຕນ຺ຕິ? ເອຕ຺ຖ ວຸຈ຺ຈຕິ – ເຠສຊ຺ຊສິກ຺ຂາປເທ (ປາຣາ. ໖໑໘ ອາທໂຍ) ອຸຄ຺ຄຫິຕກໍ ນາຘິປ຺ເປຕນ຺ຕິ ຍຸຕ຺ຕໍ ອຕ຺ຕໂນ ກາລາຕິກ຺ກມນມຕ຺ເຕນ ຕຕ຺ຖ ອາປຕ຺ຕິປ຺ປສງ຺ຄໂຕ. ເອຕ຺ຖ ນ ຍຸຕ຺ຕໍ ອຕ຺ຕໂນ ກາລາຕິກ຺ກມນມຕ຺ເຕນ ອາປຕ຺ຕິປ຺ປສງ຺ຄາຠາວໂຕ. ອຊ຺ໂຌຫຣເຓເນວ ຫິ ເອຕ຺ຖ ອາປຕ຺ຕີຕິ ອຘິປ຺ປາໂຍ, ຕສ຺ມາ ອນຸຄຓ຺ຐິປທມເຕນ ອຊ຺ຊ ອຸຄ຺ຄເຫຕ຺ວາ ປຸນທິວເສ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ.

ຕຕ຺ຣາຍໍ ວິຈາຣຓາ – ອຕ຺ຕນາ ຠຸຎ຺ຊິຕຸກາໂມ ອຊ຺ຊ ອຸຄ຺ຄເຫຕ຺ວາ ປຸນທິວເສ ຠຸຎ຺ຊຕິ, ທ຺ເວ ອາປຕ຺ຕິໂຍ ອາປຊ຺ຊຕິ. ສາມເຓຣາທີນໍເຍວ ອຕ຺ຖາຍ ອຸຄ຺ຄເຫຕ຺ວາ ຄຫິຕໍ ປຸນທິວເສ ປຏິຄ຺ຄເຫຕ຺ວາ ຠຸຎ຺ຊນ຺ໂຕ ອາປຕ຺ຕິຍາ ນ ກາເຣຕພ຺ໂພຕິ. ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສາຕິ ເອຕ຺ຖາຍມຘິປ຺ປາໂຍ – ສເຈ ເພລຏ຺ຐສີໂສ ວິຍ ທຸຕິຍຕຕິຍາທິທິວສຕ຺ຖາຍ ອຊ຺ຊ ປຏິຄ຺ຄເຫຕ຺ວາ ສາມເຓຣາທີນໍ ໂຄປນຕ຺ຖາຍ ເທຕິ, ຕສ຺ສ ປຸນທິວເສ ອຊ຺ໂຌຫຣຓຕ຺ຖໍ ປຏິຄ຺ຄຫເຓ ອາປຕ຺ຕິ ທຸກ຺ກຏສ຺ສາຕິ ສມ຺ຠວຕິ. ສຍເມວ ສເຈ ຕໍ ໂຄເປຕ຺ວາ ຐເປຕິ, ປຸນທິວເສ ປຕິຕໍ ກຈວຣໍ ທິສ຺ວາ ວິມຕິວເສນ ວາ ປຏິຄ຺ຄຓ຺ຫໂຕ ປຏິຄ຺ຄຫຓໂຕວ ອາປຕ຺ຕິ ທຸກ຺ກຏສ຺ສາຕິ ສມ຺ຠວຕິ. ໂນ ເຈ ປຏິຄ຺ຄຓ຺ຫາຕິ, ຕໍ ທຸກ຺ກຏໍ ນຕ຺ຖິ. ‘‘ອິທຎ຺ຫິ ‘ເອກໍ ປາທໍ ອຕິກ຺ກາເມຕິ, ອາປຕ຺ຕິ ຖຸລ຺ລຈ຺ຈຍສ຺ສາ’ຕິອາທິ ວິຍາ’’ຕິ ວຸຕ຺ຕໍ. ໂຍ ປນ ເອກປ຺ປຫາເຣເນວ ທ຺ເວປິ ປາເທ ອຕິກ຺ກາເມຕິ, ຕສ຺ສ ຕໍ ຖຸລ຺ລຈ຺ຈຍໍ ນຕ຺ຖິ, ເອວໍສມ຺ປທມິທນ຺ຕິ ເວທິຕພ຺ພໍ. ເອຕ຺ຖ ປຏິຄ຺ຄຫິຕຠາວໍ ອວິຊຫນ຺ຕເມວ ສນ຺ນິຘິໍ ຊເນຕີຕິ ຘມ຺ມສິຣິຕ຺ເຖໂຣ, ຕໍ ‘‘ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສາ’’ຕິ ປາຬິຍາ ວິຣຸຊ຺ຌຕິ. ກປາເລນ ປີໂຕ ປນ ສ຺ເນໂຫ ອພ຺ໂພຫາຣິໂກ. ກິຎ຺ຈາປິ ອຸຓ຺ເຫ ໂອຕາເປນ຺ຕສ຺ສ ປຄ຺ຆຣຕິ, ຕຖາປິ ‘‘ເຠສຊ຺ຊສິກ຺ຂາປເທ ວິຍາ’’ຕິ ວຸຕ຺ຕໍ. ອິຕຣຖາ ກປາເລນ ປີຕາ ສປ຺ປິອາທໂຍປິ ສຕ຺ຕາຫາຕິກ຺ກເມ ອາປຕ຺ຕິໍ ຊເນຍ຺ຍຸນ຺ຕິ. ສຍໍ ປຏິຄ຺ຄເຫຕ຺ວາຕິ ອິຘາປິ ປຸພ຺ເພ ວຸຕ຺ຕວິຘິເຍວ. ທຸທ຺ໂຘຕປຕ຺ຕກຖາປິ ເອເຕນ ສເມຕິ ວິຍ. ອາຫາຣຕ຺ຖາຍາຕິ ກາເລປິ ລພ຺ຠຕິ. ປກຕິອາມິເສຕິ ກປ຺ປິຍາມິເສ. ສາມິເສນ ມຸເຂນ ອຊ຺ໂຌຫຣໂຕ ທ຺ເວຕິ ‘‘ຫິຍ຺ໂຍ ປຏິຄ຺ຄຫິຕຍາມກາລິກໍ ອຊ຺ຊ ປຸເຣຠຕ຺ຕໍ ສາມິເສນ ມຸເຂນ ອຊ຺ໂຌຫຣໂຕ ທ຺ເວ ປາຈິຕ຺ຕິຍານີ’’ຕິ ລິຂິຕໍ. ອຊ຺ຊ ປຏິຄ຺ຄຫິຕໍ ຍາວກາລິກມ຺ປິ ຫິ ຍາມາຕິກ຺ກນ຺ຕປານເກນ ສໍສຏ຺ຐໍ ສນ຺ນິຘິໍ ກໂຣຕິ. ອກປ຺ປິຍມໍເສສຸ ມນຸສ຺ສມໍເສ ຖຸລ຺ລຈ຺ຈຍໍ, ເສສມໍເສ ທຸກ຺ກຏຎ຺ຈ ວຑ຺ຒຕິ.

໒໕໕. ສຕ຺ຕາຫກາລິກໍ ຍາວຊີວິກໍ ອາຫາຣຕ຺ຖາຍາຕິ ກາເລປິ ທຸກ຺ກຏເມວ ສນ຺ນິຘິໍ ອນາປຊ຺ຊນໂຕຕິ ເກຈິ. ຕທຫຸ ປຏິຄ຺ຄຫິຕໍ ຕທຫຸ ປຸເຣຠຕ຺ຕໍ ວຏ຺ຏຕີຕິ ເຈ? ນ, ປາຬິຍມ຺ປິ ອຏ຺ຐກຖາຍມ຺ປິ ວິເສສສ຺ສ ນຕ຺ຖິຕາຍ. ເຠສຊ຺ຊສິກ຺ຂາປເທ ປຸເຣຠຕ຺ຕໍ ຍຖາສຸຂໍ ປຣິຠຸຎ຺ຊນໍ ວຸຕ຺ຕນ຺ຕິ ເຈ? ອາຫາເຣ ສປ຺ປິອາທິ ສງ຺ຄຫໍ ຍາຕິ, ເຕນ ຕຄ຺ຄຕິກວເສນ ວຸຕ຺ຕໍ, ນ ເຠສຊ຺ຊວເສນ ວຸຕ຺ຕນ຺ຕິ ອຸປຕິສ຺ໂສ.

ສນ຺ນິຘິກາຣກສິກ຺ຂາປທວຓ຺ຓນາ ນິຏ຺ຐິຕາ.