໑. ປຐມອນິຍຕສິກ຺ຂາປທວຓ຺ຓນາ

໔໔໔-໕. ອຸທ຺ເທສນ຺ຕິ ອຸທ຺ທິສນໍ, ອາສາຬ຺ຫິນກ຺ຂຕ຺ຕໍ ນາມ ວສ຺ສູປຄມປູຊາ. ໂສຕສ຺ສ ຣໂຫຕິ ເອຕ຺ຖ ຣໂຫ-ວຈນສາມຎ຺ຎໂຕ ວຸຕ຺ຕໍ ທຸຏ຺ຐຸລ຺ລສາມຎ຺ຎໂຕ ທຸຏ຺ຐຸລ຺ລາໂຣຈນປ຺ປຏິຈ຺ຉາທນສິກ຺ຂາປເທສຸ ປາຣາຊິກວຈນໍ ວິຍ. ຕສ຺ມາ ‘‘ຈກ຺ຂຸສ຺ສ ຣເຫເນວ ປນ ປຣິຈ຺ເຉໂທ ກາຕພ຺ໂພ’’ຕິ ວຸຕ຺ຕໍ. ກຖໍ ປຎ຺ຎາຍຕີຕິ ເຈ? ‘‘ມາຕຸຄາໂມ ນາມ ຕທຫຸຊາຕາປິ ທາຣິກາ’’ຕິ ວຈນໂຕ, ‘‘ອລໍກມ຺ມນິເຍຕິ ສກ຺ກາ ໂຫຕິ ເມຖຸນໍ ຘມ຺ມໍ ປຏິເສວິຕຸ’’ນ຺ຕິ ວຈນໂຕ ຈ ຣໂຫນິສຊ຺ຊສ຺ສາໂທ ເຈຕ຺ຖ ເມຖຸນສນ຺ນິສ຺ສິຕກິເລໂສ, ນ ທຸຕິເຍ ວິຍ ທຸຏ຺ຐຸລ຺ລວາຈສ຺ສາທກິເລໂສ, ຕສ຺ມາ ຈ ປຎ຺ຎາຍຕິ ‘‘ໂສຕສ຺ສ ຣໂຫ ນາຘິປ຺ເປໂຕ’’ຕິ. ເກຈິ ປນ ‘‘ຕຎ຺ຈ ລພ຺ຠຕີຕິ ວຈນສ຺ສ ທສ຺ສນຕ຺ຖໍ ວຸຕ຺ຕໍ, ເຕນ ທຸຕິເຍ ວຸຕ຺ຕາ ວິຎ຺ຎູ ປຏິພລາ ຄຫິຕາ ໂຫຕີ’’ຕິ ວທນ຺ຕິ. ເຍນ ວາ ສາຕິ ເອຕ຺ຖ ວາ-ສທ຺ໂທ ‘‘ເຕນ ໂສ ຠິກ຺ຂຸ ກາເຣຕພ຺ໂພ ວາ’’ຕິ ໂຍເຊຕພ຺ໂພ, ໂສ ຈ ວິກປ຺ປຕ຺ໂຖ, ຕສ຺ມາ ກາເຣຕພ຺ໂພ ວາ ປຏິຊານມາໂນ, ນ ວາ ກາເຣຕພ຺ໂພ ອປ຺ປຏິຊານມາໂນຕິ ອຕ຺ໂຖ. ເຕນ ວຸຕ຺ຕໍ ອຏ຺ຐກຖາຍໍ ‘‘ປຏິຊານມາໂນວ ເຕນ ໂສ ຠິກ຺ຂຸ ກາເຣຕພ຺ໂພ…ເປ… ນ ກາເຣຕພ຺ໂພ’’ຕິ. ຕສ຺ມາ ເອວ ປາຬິຍໍ ຕທຕ຺ຖທ຺ວຍທສ຺ສນຕ຺ຖໍ ‘‘ສາ ເຈ ເອວໍ ວເທຍ຺ຍາ’’ຕິອາທິ ວຸຕ຺ຕໍ. ‘‘ສທ຺ເຘຍ຺ຍວຈສາ’’ຕິ ອິມິນາ ໂສຕາປນ຺ນາ ອຕ຺ຖຠຎ຺ຊນກໍ ນ ຠຓນ຺ຕິ, ເສສໍ ຠຓນ຺ຕີຕິ ວາທີນໍ ວາໂທ ປຏິເສຘິໂຕ ໂຫຕິ. ‘‘ທິຏ຺ຐ’’ນ຺ຕິ ວຸຕ຺ຕຕ຺ຕາ ‘‘ໂອໂລເກສີ’’ຕິ ສຸນ຺ທຣໍ. ຣກ຺ເຂຍ຺ຍາສີຕິ ມມ ວິເສສໍ ກສ຺ສຈິ ນາໂຣເຈຍ຺ຍາສີຕິ ອຘິປ຺ປາໂຍ.

໔໔໖. ‘‘ສາ ເຈ ເອວໍ ວເທຍ຺ຍ ‘ອຍ຺ຍສ຺ສ ມຍາ ສຸຕໍ ນິສິນ຺ນສ຺ສ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາເສນ຺ຕສ຺ສາ’’’ຕິ, ອິທໍ ກິມຕ຺ຖເມຕ຺ຖ ວຸຕ຺ຕໍ, ນ ອຘິປ຺ເປຕຎ຺ເຫຕໍ ອິຘ ໂສຕສ຺ສ ຣໂຫ ນາຘິປ຺ເປໂຕຕິ ກຕ຺ວາຕິ ເຈ? ອລໍກມ຺ມນິຍຏ຺ຐາເນ ທຸຏ຺ຐຸລ຺ລວາຈາປິ ລພ຺ຠຕິ, ນ ປນ ນາລໍກມ຺ມນິຍຏ຺ຐາເນ ເມຖຸນນ຺ຕິ ທສ຺ສນຕ຺ຖໍ ວຸຕ຺ຕນ຺ຕິ ເວທິຕພ຺ພນ຺ຕິ. ຍຖາ ເອຕໍ, ຕຖາ ‘‘ສາ ເຈ ເອວໍ ວເທຍ຺ຍ ‘ອຍ຺ຍສ຺ສ ມຍາ ສຸຕໍ ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສນ຺ຕສ຺ສາ’’’ຕິ ເອຕມ຺ປິ ອິຘ ລພ຺ຠຕິ, ນ ທຸຕິເຍ ນາລໍກມ຺ມນິຍຏ຺ຐານຕ຺ຕາຕິ ເອເກ. ກງ຺ຂາວິຕຣຓິຍໍ (ກງ຺ຂາ. ອຏ຺ຐ. ທຸຕິຍານິຍຕສິກ຺ຂາປທວຓ຺ຓນາ) ອິຘາປິ ທຸຕິຍານິຍຕາຘິກາເຣ ປາຣາຊິກາປຕ຺ຕິຎ຺ຈ ປຣິຫາເປຕ຺ວາ ທຸຏ຺ຐຸລ຺ລວາຈາປຕ຺ຕິຍາ ວຸຕ຺ຕຕ຺ຕາ ປຐມານິຍເຕ ທຸຏ຺ຐຸລ຺ລວາຈາປຕ຺ຕິ ນ ວຸຕ຺ຕາຕິ ເຈ? ‘‘ສາ ເຈ’’ຕິ ຕສ຺ສາ ປາຬິຍາ ໂປຕ຺ຖກາ ໂສເຘຕພ຺ພາ. ຄຓ຺ຐິປເທ ຈ ‘‘ອິຘ ສິກ຺ຂາປເທ ເມຖຸນກາຍສໍສຄ຺ຄຣໂຫນິສຊ຺ຊານເມວາຄຕຕ຺ຕາ ຈກ຺ຂຸສ຺ສຣໂຫວ ປມາຓ’’ນ຺ຕິ ລິຂິຕໍ, ທຸຕິຍານິຍຕາຘິກາເຣ ຈ ‘‘ອນນ຺ໂຘ ກາຍສໍສຄ຺ຄໍ ປສ຺ສຕິ, ອພຘິໂຣ ທຸຏ຺ຐຸລ຺ລໍ ສຸຓາຕິ, ກາຍຈິຕ຺ຕໂຕ ກາຍສໍສຄ຺ໂຄ, ວາຈາຈິຕ຺ຕໂຕ ທຸຏ຺ຐຸລ຺ລໍ, ອຸຠເຍຫິ ອຸຠຍ’’ນ຺ຕິ ຈ ລິຂິຕໍ. ອຏ຺ຐກຖາຍໍ ‘‘ສມຸຏ຺ຐານາທີນິ ປຐມປາຣາຊິກສທິສາເນວາ’’ຕິ ວຸຕ຺ຕຕ຺ຕາປິ ທຸຏ຺ຐຸລ຺ລວາໂທ ນ ສຸນ຺ທໂຣ ‘‘ຕທຫຸຊາຕາ’’ຕິ ວຸຕ຺ຕຕ຺ຕາຕິ.

ປຐມອນິຍຕສິກ຺ຂາປທວຓ຺ຓນາ ນິຏ຺ຐິຕາ.