໓. ທຸຏ຺ຐຸລ຺ລວາຈາສິກ຺ຂາປທວຓ຺ຓນາ

໒໘໓. ຕຕິເຍ ຕໂຍ ສງ຺ຆາທິເສສວາຣາ ຕໂຍ ຖຸລ຺ລຈ຺ຈຍວາຣາ ຕໂຍ ທຸກ຺ກຏວາຣາ ຕໂຍ ກາຍປຏິພທ຺ຘວາຣາຕິ ທ຺ວາທສ ວາຣາ ສຣູເປນ ອາຄຕາ. ຕຕ຺ຖ ຕໂຍ ສງ຺ຆາທິເສສວາຣາ ທຸຕິຍສິກ຺ຂາປເທ ວຸຕ຺ຕາຕິ ຕິຓ຺ຓໍ ວີສຕິການໍ ເອເກກມູລາ ວາຣາຕິ ເວທິຕພ຺ພາ, ຕສ຺ມາ ອິຘ ວິເສສາຕິ ປຓ຺ຓາສ ວາຣາ ສໍຂິຕ຺ຕາ ໂຫນ຺ຕິ, ອຎ຺ຎຖາ ອິຕ຺ຖີ ຈ ໂຫຕິ ເວມຕິໂກ ສາຣຕ຺ໂຕ ຈ, ຠິກ຺ຂຸ ຈ ນໍ ອິຕ຺ຖິຍາ ວຈ຺ຈມຄ຺ຄໍ ປສ຺ສາວມຄ຺ຄໍ ອາທິສ຺ສ ວຓ຺ຓມ຺ປິ ຠຓຕິ…ເປ… ອາປຕ຺ຕິ ຖຸລ຺ລຈ຺ຈຍສ຺ສ. ອິຕ຺ຖີ ຈ ໂຫຕິ ປຓ຺ຑກປຸຣິສສຎ຺ຎີ ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ, ຠິກ຺ຂຸ ຈ ນໍ ອິຕ຺ຖິຍາ ວຈ຺ຈມຄ຺ຄໍ ປສ຺ສາວມຄ຺ຄໍ ອາທິສ຺ສ ວຓ຺ຓມ຺ປິ ຠຓຕິ ອກ຺ໂກສຕິປິ, ອາປຕ຺ຕິ ຖຸລ຺ລຈ຺ຈຍສ຺ສ. ປຓ຺ຑໂກ ຈ ໂຫຕິ ປຓ຺ຑກສຎ຺ຎີ ສາຣຕ຺ໂຕ ຈ, ຠິກ຺ຂຸ ຈ ນໍ ປຓ຺ຑກສ຺ສ ວຈ຺ຈມຄ຺ຄໍ ອາທິສ຺ສ ວຓ຺ຓມ຺ປິ ຠຓຕິ, ອາປຕ຺ຕິ ຖຸລ຺ລຈ຺ຈຍສ຺ສາຕິ ເອວມາທີນໍ ອາປຕ຺ຕິຏ຺ຐານານໍ ອນາປຕ຺ຕິຏ຺ຐານຕາ ອາປຊ຺ເຊຍ຺ຍ, ນ ຈາປຊ຺ຊຕິ, ປຓ຺ຑເກ ອິຕ຺ຖິສຎ຺ຎິສ຺ສ ທຸກ຺ກຏນ຺ຕິ ທີເປຕຸໍ ‘‘ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສາ’’ຕິ ວຸຕ຺ຕຕ຺ຕາ ‘‘ປຓ຺ຑເກ ປຓ຺ຑກສຎ຺ຎິສ຺ສ ຖຸລ຺ລຈ຺ຈຍ’’ນ຺ຕິ ວຸຕ຺ຕເມວ ໂຫຕິ, ຕສ຺ມາ ສພ຺ພຕ຺ຖ ສໍຂິຕ຺ຕວາເຣສຸ ຖຸລ຺ລຈ຺ຈຍຏ຺ຐາເນ ຖຸລ຺ລຈ຺ຈຍໍ, ທຸກ຺ກຏຏ຺ຐາເນ ທຸກ຺ກຏມ຺ປິ ວຸຕ຺ຕເມວ ໂຫຕີຕິ ເວທິຕພ຺ພໍ. ຕຖາ ‘‘ອິຕ຺ຖີ ຈ ໂຫຕິ ເວມຕິໂກ ສາຣຕ຺ໂຕ ຈ, ຠິກ຺ຂຸ ຈ ນໍ ອິຕ຺ຖິຍາ ວຈ຺ຈມຄ຺ຄໍ ປສ຺ສາວມຄ຺ຄໍ ຐເປຕ຺ວາ ອຘກ຺ຂກໍ ອຸພ຺ຠຊາຓຸມຓ຺ຑລໍ ອາທິສ຺ສ ວຓ຺ຓມ຺ປິ ຠຓຕິ…ເປ… ຖຸລ຺ລຈ຺ຈຍສ຺ສາ’’ຕິອາທິນາ ນເຍນ ຖຸລ຺ລຈ຺ຈຍເຂຕ຺ເຕປິ ຍຖາສມ຺ຠວໍ ອຸທ຺ຘຣິຕພ຺ພາ. ຕຖາ ‘‘ອິຕ຺ຖີ ຈ ໂຫຕິ ເວມຕິໂກ ສາຣຕ຺ໂຕ ຈ, ຠິກ຺ຂຸ ຈ ນໍ ອິຕ຺ຖິຍາ ກາຍປຏິພທ຺ຘໍ ອາທິສ຺ສ ວຓ຺ຓມ຺ປິ ຠຓຕິ…ເປ… ທຸກ຺ກຏສ຺ສາ’’ຕິອາທິນາ ນເຍນ ກາຍປຏິພທ຺ຘວາຣາປິ ຍຖາສມ຺ຠວໍ ອຸທ຺ຘຣິຕພ຺ພາ. ກາຍປ຺ປຏິພທ຺ຘວາຣຕ຺ຕິກໍ ວິຍ ນິສ຺ສຄ຺ຄິຍວາຣຕ຺ຕິກໍ ລພ຺ຠມານມ຺ປິ ອາປຕ຺ຕິວິເສສາຠາວໂຕ ນ ອຸທ຺ຘຏໍ. ກາຍປ຺ປຏິພທ຺ຘວາຣຕ຺ຕິເກ ປນ ທິນ຺ນນຍຕ຺ຕາ ຕມ຺ປິ ຕທນຸໂລມາ ວາຣາ ຈ ອຸທ຺ຘຣິຕພ຺ພາ. ສພ຺ພຕ຺ຖ ນ-ວິຎ຺ຎູ ຕຣຸຓທາຣິກາ, ມຫລ຺ລິກາ ອຸມ຺ມຕ຺ຕິກາທິກາ ຈ ອນຘິປ຺ເປຕາ, ປເຄວ ປາກຕິກາ ຕິຣຈ຺ຉານຄຕິຕ຺ຖີນໍ, ຕຖາ ປຓ຺ຑກາທໂຍປີຕິ ເວທິຕພ຺ພາ. ເສສໍ ທຸຕິເຍ ວຸຕ຺ຕນເຍເນວ ເວທິຕພ຺ພໍ.

ປທຠາຊນີຍວຓ຺ຓນາ

໒໘໕. ວຸຕ຺ຕນຍເມວາຕິ ‘‘ກາຍສໍສຄ຺ເຄ ອິຕ຺ຖິລກ຺ຂເຓນາ’’ຕິ ລິຂິຕໍ. ‘‘ອິຕ຺ຖິລກ຺ຂເຓນາ’’ຕິ ກິຣ ມຫາອຏ຺ຐກຖາປາໂຐ. ສີສໍ ນ ເອຕີຕິ ອກ຺ໂກສນໍ ນ ໂຫຕິ, ຆຏິເຕ ປນ ໂຫຕິ. ຕຕ຺ຣາຍໍ ວິເສໂສ – ອິເມຫິ ຕີຫິ ຆຏິເຕ ເອວ ສງ຺ຆາທິເສໂສ ວຈ຺ຈມຄ຺ຄປສ຺ສາວມຄ຺ຄານໍ ນິຍຕວຈນຕ຺ຕາ, ອຈ຺ໂຈຬາຣິກຕ຺ຕາ ວາ, ນ ອຎ຺ເຎຫິ ອນິມິຕ຺ຕາສີຕິອາທີຫິ ອຏ຺ຐຫິ. ຕຕ຺ຖ ອໂລຫິຕາສິ, ຘຸວໂລຫິຕາສິ, ຘຸວໂຈຬາສິ, ປຄ຺ຆຣຓີສິ, ອິຕ຺ຖິປຓ຺ຑກາສິ, ເວປຸຣິສິກາສີຕິ ເອຕານິ ຉ ມຄ຺ຄານໍ ອນິຍຕວຈນານິ, ອນິມິຕ຺ຕາສິ, ນິມິຕ຺ຕມຕ຺ຕາສີຕິ ທ຺ເວ ປທານິ ອນຈ຺ໂຈຬາຣິການິ ຈ, ຍໂຕ ອຏ຺ຐປທານິ ‘‘ສງ຺ຆາທິເສສໍ ນ ຊເນນ຺ຕີ’’ຕິ ວຸຕ຺ຕານິ, ຕສ຺ມາ ຕານິ ຖຸລ຺ລຈ຺ຈຍວຕ຺ຖູນິ. ປຣິພ຺ພາຊກວຕ຺ຖຸມ຺ຫິ ວິຍ ອກ຺ໂກສມຕ຺ຕຕ຺ຕາ ທຸກ຺ກຏວຕ຺ຖູນີຕິ ເອເກ. ອິຕ຺ຖິປຓ຺ຑກາສິ, ເວປຸຣິສິກາສີຕິ ເອຕາເນວ ປທານິ ສກລສຣີຣສຓ຺ຐານເຠທທີປການິ ສຸທ຺ຘານິ ສງ຺ຆາທິເສສໍ ນ ຊເນນ຺ຕິ ສກລສຣີຣສາມຎ຺ຎຕ຺ຕາ, ອິຕຣານິ ຊເນນ຺ຕິ ອສາມຎ຺ຎຕ຺ຕາ. ຕານິ ຫິ ປສ຺ສາວມຄ຺ຄເມວ ທີເປນ຺ຕິ ສິຂຣຓີ-ປທໍ ວິຍ. ອຸຠໂຕພ຺ຍຎ຺ຊນາສີຕິ ວຈນໍ ປນ ປຸຣິສນິມິຕ຺ເຕນ ອສງ຺ຆາທິເສສວຕ຺ຖຸນາ ມິສ຺ສວຈນໍ. ປຸຣິສອຸຠໂຕພ຺ຍຎ຺ຊນກສ຺ສ ຈ ອິຕ຺ຖິນິມິຕ຺ຕໍ ປຏິຈ຺ຉນ຺ນໍ, ປຸຣິສນິມິຕ຺ຕໍ ປາກຏໍ ໂຫຕິ. ຍທິ ຕມ຺ປິ ຊເນຕິ, ກຖໍ ອນິມິຕ຺ຕາສີຕິອາທິປທານິ ນ ສງ຺ຆາທິເສສໍ ຊເນນ຺ຕີຕິ ເອເກ, ຕໍ ນ ຍຸຕ຺ຕໍ. ປຸຣິສສ຺ສປິ ນິມິຕ຺ຕາຘິວຈນໂຕ, ‘‘ເມຖຸນຸປສໍຫິຕາຫິ ສງ຺ຆາທິເສໂສ’’ຕິ ມາຕິກາຍ ລກ຺ຂຓສ຺ສ ວຸຕ຺ຕຕ຺ຕາ ຈ ເມຖຸນຸປສໍຫິຕາຫິປິ ໂອຠາສເນ ປຏິວິຊານນ຺ຕິຍາ ສງ຺ຆາທິເສໂສ, ອປ຺ປຏິວິຊານນ຺ຕິຍາ ຖຸລ຺ລຈ຺ຈຍໍ, ອິຕເຣຫິ ໂອຠາສເນ ປຏິວິຊານນ຺ຕິຍາ ຖຸລ຺ລຈ຺ຈຍໍ, ອປ຺ປຏິວິຊານນ຺ຕິຍາ ທຸກ຺ກຏນ຺ຕິ ເອເກ, ສພ຺ພໍ ສຸຏ຺ຐຸ ວິຈາເຣຕ຺ວາ ຄເຫຕພ຺ພໍ.

໒໘໗. ຫສນ຺ໂຕຕິ ຍໍ ອຸທ຺ທິສ຺ສ ຠຓຕິ, ສາ ເຈ ປຏິວິຊານາຕິ, ສງ຺ຆາທິເສໂສ.

ວິນີຕວຕ຺ຖຸວຓ຺ຓນາ

໒໘໙. ‘‘ປຏິວຸຕ຺ຕໍ ນາມາ’’ຕິ ປາໂຐ. ໂນ-ສທ຺ໂທ ອຘິໂກ. ‘‘ອກ຺ຂຣລິຂເນນປິ ໂຫຕີ’’ຕິ ວທນ຺ຕິ, ຕໍ ອາວຊ຺ຊນສມນນ຺ຕຣວິຘິນາ ສເມຕິ ເຈ, ຄເຫຕພ຺ພໍ.

ທຸຏ຺ຐຸລ຺ລວາຈາສິກ຺ຂາປທວຓ຺ຓນາ ນິຏ຺ຐິຕາ.