໕. ຊຣາວຄ຺ໂຄ

໑. ຊຣາຘມ຺ມສຸຕ຺ຕວຓ຺ຓນາ

໕໑໑. ປມຸເຂ, ປາສາທສ຺ສ ຈ ປຈ຺ຉິມຠາເຄ ອາຕໂປ ປຈ຺ຉາຕໂປ, ຕສ຺ມິໍ ປຈ຺ຉາຕເປ. ໂສ ຫິ ປາສາທສ຺ສ ປມຸຂຠາເວນ ກໂຕ. ກິໍ ປນ ຠຄວໂຕ ວຊິຣສາຣໍ ສຣີຣໍ ໂອຕາເປຕພ຺ພໍ ໂຫຕີຕິ ອາຫ – ‘‘ສມ຺ມາສມ຺ພຸທ຺ຘສ຺ສາ’’ຕິອາທິ. ອຍຎ຺ຈ ອິມໍ ສຸຕ຺ຕໍ ເທສິຕສມເຍ. ນ ສກ຺ໂກຕິ ພ຺ຍາມປ຺ປຠາຍ ກາຍຈິ ປຠາຍ ອນຠິຠວນີຍຕ຺ຕາ. ກິຎ຺ຈາປິ ພຸທ຺ຘາຠາ ສູຣິຍາຠາຍ ອນຠິຠວນີຍາ, ຆມ຺ມສຠາວຕາຍ ປນ ຣສ຺ມີນໍ ປຣິໂຕ ຜຣນ຺ຕີ ສູຣິຍາຠາ ຕິຂິຓາ ອຸຓ຺ຫາຕິ ອາຫ ‘‘ຣສ຺ມິເຕຊ’’ນ຺ຕິ. ອິທານິ ຕມຕ຺ຖໍ ອຸປມາຍ ວິຠາເວຕຸໍ ‘‘ຍເຖວ ຫີ’’ຕິອາທິ ວຸຕ຺ຕໍ.

ສຸວຓ຺ຓາວຏ຺ຏໍ ວິຍາຕິ ອຈ຺ເຉ ສຸວຓ຺ຓປຕ຺ເຕ ວິນິວຕ຺ຕອາວຏ຺ຏໍ ວິຍ. ຄຣຫຓຈ຺ຉຣິຍໍ ນາມ ກິເຣຕໍ ‘‘ອຈ຺ຉຣິຍເມຕໍ ອວິສິຈ຺ເຉຜລວທ’’ນ຺ຕິອາທີສຸ ວິຍ. ນ ເອວເມຕຣຫີຕິ ອຕ຺ຕໂນ ປາກຏວເສນ ວທຕິ, ນ ອິຕເຣສມ຺ປີຕິ. ສິຣາຊາລາຕິ ສິຣາສນ຺ຕານາ. ເອວຣູປໍ ນ ໂຫຕີຕິ ອຎ຺ເຎສໍ ປາກຕິກສຕ຺ຕານໍ ວຸຕ຺ຕາກາຣໍ ວິຍ ນ ໂຫຕິ ປຸຎ຺ຎສມ຺ຠາຣສ຺ສ ອຸຬາຣຕມຕ຺ຕາ ວິປຈ຺ຈນສ຺ສ ປຣິຍນ຺ຕຄຕຕ຺ຕາ. ເຕນາຫ ‘‘ອຎ຺ເຎສໍ ອປາກຏ’’ນ຺ຕິ. ວລິຍາວຏ຺ຏກນ຺ຕິ ອປ຺ປກໍ ວລິຍາວຏ຺ຏໍ. ເຕນາຫ ‘‘ເກສຄ຺ຄປ຺ປມາຓ’’ນ຺ຕິ. ສພ຺ພານີຕິ ສິຣາຊາລານິ. ປຸຣໂຕ ວງ຺ໂກຕິ ໂຖກໍ ປຸຣໂຕ ນຕມຕ຺ຕໍ ສນ຺ຘາຍາຫ. ເຕນ ວຸຕ຺ຕໍ ‘‘ສ຺ວາຍໍ ອຎ຺ເຎສໍ ອປາກໂຏ’’ຕິ. ນຍຄ຺ຄາຫໂຕຕິ ອນຸມານໂຕ. ຘີ ຕນ຺ຕິ ຘີ-ສທ຺ທໂຍເຄ ອຸປໂຍຄວຈນໍ. ຘີຕິ ຊິຄຸຈ຺ຉນຕ຺ເຖ ນິປາໂຕ. ຘິກ຺ກາໂຣຕິ ຊິຄຸຈ຺ຉາປໂຍໂຄ. ຕໍ ຜຸສຕູຕິ ຕຸຍ຺ຫໍ ປາປຸຓາຕຸ.

໒. ອຸຓ຺ຓາຠພ຺ຣາຫ຺ມຓສຸຕ຺ຕວຓ຺ຓນາ

໕໑໒. ອຎ຺ຎມຎ຺ຎສ຺ສາຕິ ອຎ຺ໂຎ ອຎ຺ຎສ຺ສ. ນ ປຈ຺ຈນຸໂຠຕິ ອຕ຺ຕໂນ ອວິສຍຠາວໂຕ. ອິທານິ ຕໍ ອຎ຺ຎວິສຍຕໍ ອນ຺ວຍໂຕ ພ຺ຍຕິເຣກໂຕ ວິຠາເວຕຸໍ ‘‘ສເຈ ຫີ’’ຕິອາທິ ວຸຕ຺ຕໍ.

ວິສຍານິ ປຏິສຣນ຺ຕິ ເອຕ຺ຖາຕິ ປຏິສຣຓໍ. ອິນ຺ທ຺ຣິຍວິຎ຺ຎາຓານິ ຫິ ອສຕິປິ ຕາທິເສ ອຘິປ຺ປາເຍ ອຕ຺ຕໂນ ອາຣມ຺ມຓສ຺ສ ຍາຖາວໂຕ ສມ຺ປຊານນໂຕ ປເວທນວິຊານນານິ ກໂຣນ຺ຕານິ ວິຍ ປວຕ຺ຕນ຺ຕິ, ຕຖາ ໂລກສ຺ສ ອຎ຺ຎຕ຺ຖ ສິທ຺ຘິໂຕ. ເຕນາຫ ຠຄວາ – ‘‘ມໂນ ປຏິສຣຓໍ, ມໂນວ ເນສໍ ໂຄຈຣວິສຍໍ ປຈ຺ຈນຸໂຠຕີ’’ຕິ ມໂນທ຺ວາຣິກຊວນມໂນ ຫິ ສວິເສສໍ ມໂນວິສຍໍ ປຈ຺ຈນຸໂຠຕິ, ປຎ຺ຈທ຺ວາຣິກຊວນມໂນ ມນນມຕ຺ຕເມວ ປຈ຺ຈນຸຠວຕິ. ຣຊ຺ຊນາທິຄ຺ຄຫຓຎ຺ເຈຕ຺ຖ ນິທສ຺ສນມຕ຺ຕໍ, ຕສ຺ມາ ສທ຺ທຫນາທິປິ ຄຫິຕເມວາຕິ ທຏ຺ຐພ຺ພໍ, ປຎ຺ຈທ຺ວາຣປ຺ປວຕ຺ຕິວເສນ ຕຖາ ວຸຕ຺ຕໍ. ເອກສ຺ມິໍ ປນ ທ຺ວາເຣຕິ ຈກ຺ຂຸທ຺ວາເຣ.

ທຸພ຺ພລໂຠຊກາຕິ ອປ຺ປານຸຠາວາ ຣາຊໂຠຄ຺ຄາ. ອາຍນ຺ຕິ ໂຠຄຸປ຺ປຕ຺ຕິຏ຺ຐານໍ. ໂຍຕ຺ຕພນ຺ຘາທິນິມິຕ຺ຕໍ ລທ຺ຘພ຺ພກຫາປໂຓ ໂຍຕ຺ຕກຫາປໂຓ. ອທ຺ທຸພນ຺ຘາທິນິມິຕ຺ຕໍ ຄເຫຕພ຺ພກຫາປໂຓ ອທ຺ທຸກຫາປໂຓ. ມາຆາຕໂຆສນາຍ ກຕາຍ ຫິໍສານິມິຕ຺ຕໍ ຄເຫຕພ຺ພກຫາປໂຓ ມາປຫາຣກຫາປໂຓ. ຕສ຺ສ ປຣິມາຓໍ ທສ຺ເສຕຸໍ ‘‘ອຏ຺ຐກຫາປໂຓ’’ຕິອາທິ ວຸຕ຺ຕໍ. ສຕວຕ຺ຖຸກນ຺ຕິ ສຕກຣີສວຕ຺ຖຸກໍ.

ມຄ຺ຄສຕີຕິ ອຣິຍມຄ຺ຄສຕິ. ຠາວນມນຸຍຸຎ຺ຊນ຺ຕສ຺ສ ຫິ ຊວນມໂນ ອຸສ຺ສກ຺ກິຕ຺ວາວ ມຄ຺ຄສຕິໍ ປຏິສຣຕິ ຕປ຺ປຣິໂຍສານຕ຺ຕາ. ຕນ຺ຕິ ນິພ຺ພານໍ. ສາຕິ ຜລວິມຸຕ຺ຕິ. ປຏິສຣຕິ ອຄ຺ຄມຄ຺ຄສຕິຍາ. ຜລວິມຸຕ຺ຕິ ນິພ຺ພານນ຺ຕິ ອຸຠຍໍ ມຄ຺ຄສ຺ສ ສິທ຺ຘາເຍວາຕິ. ອາຣມ຺ມຓວເສນ ນຕ຺ຖິ ເອຕສ຺ສ ປຏິສຣຓນ຺ຕິ ອປ຺ປຏິສຣຓໍ ອສງ຺ຂຕາມຕສ຺ສ ສນ຺ຕິນິຈ຺ຈສຠາວຕ຺ຕາ. ສຍໍ ປນ ສພ຺ເພສໍເຍວ ອຣິຍານໍ ປຏິສຣຓໍ. ເຕນາຫ ‘‘ນິພ຺ພານໍ ອຣຫໂຕ ຄຕີ’’ຕິ (ປຣິ. ໓໓໙). ນິພ຺ພານໍ ອນຸປວິຏ຺ຐໍ ນິພ຺ພານນິສ຺ສຍຕ຺ຕາ. ນ ຕໂຕ ປຣໍ ຄຈ຺ຉຕິ ຄຕສ຺ສ ອຎ຺ຎສ຺ສ ຕາທິສສ຺ສ ອຠາວາ. ນິພ຺ພານໍ ປຣິ ສພ຺ພໂສ ໂອສານນ຺ຕິ ນິພ຺ພານປຣິໂຍສານໍ.

ມູລຊາຕາ ຊາຕມູລາ. ຕໂຕ ເອວ ປຕິຏ຺ຐິຕາ. ກາ ປນສ຺ສາຕິ ອາຫ ‘‘ມຄ຺ເຄນ ອາຄຕສທ຺ຘາ’’ຕິ. ມຄ຺ໂຄ ທຬ຺ຫາຍ ອສໍຫາຣິຍສທ຺ຘາຍ ມູລໍ ທິຏ຺ຐິສມ຺ປຍຸຕ຺ຕານິ ເຈວ ວິຈິກິຈ຺ຉາຈິຕ຺ຕຎ຺ຈາຕິ ປຎ຺ຈ ອກຸສລຈິຕ຺ຕານິ ສມຸຈ຺ເຉທວເສນ ປຫີນານິ. ປຎ຺ຈ ນີວຣຓານີຕິ ເອຕ຺ຖ ອປາຍຄມນີຍານິ ປຐມມຄ຺ເຄເນວ ປຫີນານິ, ອິຕຣານິ ວິກ຺ຂມ຺ຠນວເສນ ຌາເນນ ປຫີນານີຕິ ປຎ຺ຈສຸ ໂອຣມ຺ຠາຄິຍກິເລສສໍໂຍຊເນສຸ ເອກເທສວິຄເມເນວ ພຫິທ຺ຘາສໍໂຍຊໂນ ວິຍ ຊາໂຕຕິ ວຸຕ຺ຕໍ ‘‘ຌານອນາຄາມິຏ຺ຐາເນ ຐິໂຕ’’ຕິ. ເຕນາຫ ‘‘ໂສ ອປຣິຫີນ…ເປ… ນິພ຺ພາເຍຍ຺ຍາ’’ຕິ.

໕. ປຐມປຸພ຺ພາຣາມສຸຕ຺ຕວຓ຺ຓນາ

໕໑໕. ປຸພ຺ພໂກຏ຺ຐເກ ເອວໍ ອາຄຕສຸຕ຺ຕໍ ອາທິໍ ກຕ຺ວາ ຜລິນ຺ທ຺ຣິຍາເນວ ກຖິຕານິ ອຄ຺ຄຜລວເສນ ເທສນາຍ ອາຄຕຕ຺ຕາ.

໑໐. ອາປຓສຸຕ຺ຕວຓ຺ຓນາ

໕໒໐. ອຸປຣິ ສຫ ວິປສ຺ສນາຍ ຕໂຍ ມຄ຺ຄາຕິ ວິປສ຺ສນາຍ ສຫ ໂສຕາປຕ຺ຕິຜລໂຕ ອຸປຣິ ຕໂຍ ມຄ຺ຄາ. ມຄ຺ຄາຘິຄເມນ ອິທານິ ປຈ຺ຈກ຺ຂຠູຕຕ຺ຕາ ‘‘ອິເມ ໂຂ ເຕ ຘມ຺ມາ’’ຕິ ວຸຕ຺ຕາ. ຕຕ຺ຖ ຍໍ ອຄ຺ຄຠູຕໍ, ຕສ຺ສ ວເສນ ທສ຺ເສຕຸໍ ‘‘ອຣຫຕ຺ຕຜລິນ຺ທ຺ຣິຍໍ ນາມາ’’ຕິ ວຸຕ຺ຕໍ ອິນ຺ທ຺ຣິຍຠາວສາມຎ຺ເຎນ ເອກຊ຺ຌໍ ກຕ຺ວາ. ອຕິວິຊ຺ຌິຕ຺ວາ ປສ຺ສາມີຕິ ສຈ຺ຉິກຕ຺ວາ ຍາຖາວໂຕ ປສ຺ສາມິ. ຈຕູຫິ ອິນ຺ທ຺ຣິເຍຫີຕິ ວີຣິຍິນ຺ທ຺ຣິຍາທີຫິ ຈຕູຫິ ອິນ຺ທ຺ຣິເຍຫິ. ສາ ວິປສ຺ສນາມຄ຺ຄຜລສຫຄຕາ ສິຍາຕິ ມິສ຺ສກາ ວຸຕ຺ຕາ.

ຊຣາວຄ຺ຄວຓ຺ຓນາ ນິຏ຺ຐິຕາ.