໖. ສູກຣຂຕວຄ຺ໂຄ

໑. ສາລສຸຕ຺ຕວຓ຺ຓນາ

໕໒໑. ສູຣຠາເວນາຕິ ອຕິສູຣຠາເວນ. ພຸຊ຺ຌນຕ຺ຖາຍາຕິ ສຈ຺ຈປຏິເວຘາຍ.

໒. ມລ຺ລິກສຸຕ຺ຕວຓ຺ຓນາ

໕໒໒. ຈຕ຺ຕາຣິ ອິນ຺ທ຺ຣິຍານີຕິ ປຎ຺ຎິນ຺ທ຺ຣິຍໍ ຐເປຕ຺ວາ ເສສານິ ຈຕ຺ຕາຣິ. ‘‘ອຣິຍຎາຓໍ ໂລກຸຕ຺ຕຣ’’ນ຺ຕິ ວຸຕ຺ຕໍ ມຄ຺ຄຎາຓໍ ກຕ຺ວາ. ອຣິຍ-ສທ຺ໂທ ປນ ຍຖາ ຕຖາ ວິສຸທ຺ເຘປິ ໂຫຕີຕິ ຕາທິສໍ ສນ຺ຘາຍ ວຸຕ຺ຕໍ ‘‘ຕມ຺ປິ ປນາ’’ຕິອາທິ. ຍຖາ ຫິ ຈຕ຺ຕາຣິນ຺ທ຺ຣິຍານິ ມິສ຺ສການິ, ເອວໍ ປຎ຺ຎິນ຺ທ຺ຣິຍມ຺ປິ ມິສ຺ສກນ຺ຕິ ວຸຈ຺ຈມາເນ ນ ໂກຈິ ວິໂຣໂຘຕິ ອຘິປ຺ປາເຍນາຫ ‘‘ຕມ຺ປິ ປນ…ເປ… ວຏ຺ຏຕີ’’ຕິ.

໓. ເສຂສຸຕ຺ຕວຓ຺ຓນາ

໕໒໓. ນ ສກ຺ໂກຕິ ອິນ຺ທ຺ຣິຍານໍ ອປຣິປກ຺ກຕ຺ຕາ. ອຕ຺ຖີຕິ ປຊານາຕິ ນຍຄ຺ຄາເຫນ, ນ ປຈ຺ຈກ຺ຂໂຕ. ນ ຫິ ອຣິຍາປິ ອນຘິຄຕໍ ມຄ຺ຄຜລໍ ປຈ຺ຈເວກ຺ຂິຕຸໍ ສກ຺ໂກນ຺ຕິ.

໖. ປຕິຏ຺ຐິຕສຸຕ຺ຕວຓ຺ຓນາ

໕໒໖. ສາສເວສູຕິ ຈຕຸຣາສວວິນິມຸຕ຺ເຕສຸ ເສສຘມ຺ເມສຸ ອາຣມ຺ມເຓສຸ. ເຕສຸປິ ອຸປ຺ປຊ຺ຊນກອນຕ຺ຖໂຕ ຈິຕ຺ຕໍ ຣກ຺ຂຕິ ນາມ.

໘. ສູກຣຂຕສຸຕ຺ຕວຓ຺ຓນາ

໕໒໘. ຕໍ ສນ຺ຘາຍາຕິ ຕໍ ສູກຣຂຕເລຓໍ ສນ຺ຘາຍ. ເອຕໍ ‘‘ສູກຣຂຕາຍ’’ນ຺ຕິ ວຈນໍ ວຸຕ຺ຕໍ. ຠາວນປຸໍສກນ຺ຕິ ຠາວໂຊຕກໍ ນປຸໍສກວຈນໍ ຍຖາ ‘‘ວິສມໍ ວາຕາ ວາຍນ຺ຕິ, ເອກມນ຺ຕໍ ນິສີທີ’’ຕິ. ກິຈ຺ຈປຏິປຕ຺ຕິ ເຕສໍ ສໍກາສນຏ຺ເຐນ ສປຕິໂສ, ສປຕິໂສ ເອວ ສປ຺ປຕິສ຺ໂສ, ສເຊຏ຺ຐໂກຕິ ອາຫ ‘‘ສປ຺ປຕິສ຺ໂສຕິ ສເຊຏ຺ຐໂກ’’ຕິ.

ສູກຣຂຕວຄ຺ຄວຓ຺ຓນາ ນິຏ຺ຐິຕາ.